darwesh

zamistāñ kī is shaam

nīche ḳhayābāñ meñ

mere darīche ke pā.īñ

jahāñ tīrgī munjamid ho ga.ī hai

ye bhārī yaḳh-ālūd qadmoñ kī āvāz

kyā kah rahī hai

ḳhudāvand

kyā aaj kī raat bhī

terī palkoñ kī sangīñ chaTāneñ

nahīñ haT sakeñgī

ḳhayābāñ to hai duur tak gahrī zulmat kā pātāl

aur maiñ is meñ ġhota-zanī kar rahā huuñ

sadāoñ ke mā'nī kī sīna-kushā.ī kī ḳhātir chalā huuñ

ye darvesh

jis ke ab o jad

vo sahrā-e-dīroz kī ret par

thak ke mar jaane vaale

isī kī tarah the

tahī-dast aur ḳhāk-e-tīra meñ ġhaltāñ

jo taslīm ko be-niyāzī banā kar

hamesha kī mahrūmiyoñ hī ko apne liye

bāl-o-par jānte the

jinheñ thī faroġh-e-gadā.ī kī ḳhātir

jalāl-e-shahī kī baqā bhī gavārā

jo lāshoñ meñ chalte the

kahte the lāshoñ se

sote raho

sub.h-e-fardā kahīñ bhī nahīñ hai

vo jin ke liye hurriyat kī nihāyat yahī thī

ki shāhoñ kā iz.hār-e-shāhanshahī

had se baḌhne na paa.e

bhalā had kī kis ko ḳhabar hai

magar aaj kā ye gadā

ye hamesha kā mahrūm bhī

un ab o jad ke mānind

go vaqt ke shātiroñ kī siyāsat kā maarā huā hai

sitam ye ki is ke liye aaj

mullā-e-rūmī ke

majzūb-e-shīrāz ke

zang-ālūda auhām bhī

dast-gīrī ko hāzir nahīñ haiñ

ḳhudāvand

kyā aaj kī raat bhī

terī palkoñ kī sangīñ chaTāneñ

nahīñ haT sakeñgī

tujhe ai zamāne ke rauñde hue

aaj ye baat kahne kī hājat hī kyuuñ ho

tū ḳhush ho

ki tere liye khul ga.ī haiñ hazāroñ zabāneñ

jo terī zabāñ ban ke

shāhoñ ke ḳhvābīda mahloñ ke chāroñ taraf

sho'le ban kar lipaTtī chalī jā rahī haiñ

siyāsat ne sochā hai

terī zabāñ band kar de

siyāsat ko ye kyuuñ ḳhabar ho

ki lab band hoñge

to khul jā.eñge dast-o-bāzū

vo bhārī yaḳh-ālūd qadmoñ kī āvāz

yak-laḳht ḳhāmosh kyuuñ ho ga.ī hai

nau-āmoz-e-mashriq ke

nau-ḳhez aa.iin ke tāziyāno

sukūt-e-gadā se

gadā.ī to sākit na hogī

zamistan ki is sham

niche KHayaban mein

mere dariche ke pain

jahan tirgi munjamid ho gai hai

ye bhaari yaKH-alud qadmon ki aawaz

kya kah rahi hai

KHudawand

kya aaj ki raat bhi

teri palkon ki sangin chaTanen

nahin haT sakengi

KHayaban to hai dur tak gahri zulmat ka patal

aur main is mein ghota-zani kar raha hun

sadaon ke ma'ni ki sina-kushai ki KHatir chala hun

ye darwesh

jis ke ab o jad

wo sahra-e-diroz ki ret par

thak ke mar jaane wale

isi ki tarah the

tahi-dast aur KHak-e-tira mein ghaltan

jo taslim ko be-niyazi bana kar

hamesha ki mahrumiyon hi ko apne liye

baal-o-par jaante the

jinhen thi farogh-e-gadai ki KHatir

jalal-e-shahi ki baqa bhi gawara

jo lashon mein chalte the

kahte the lashon se

sote raho

subh-e-farda kahin bhi nahin hai

wo jin ke liye hurriyat ki nihayat yahi thi

ki shahon ka izhaar-e-shahanshahi

had se baDhne na pae

bhala had ki kis ko KHabar hai

magar aaj ka ye gada

ye hamesha ka mahrum bhi

un ab o jad ke manind

go waqt ke shatiron ki siyasat ka mara hua hai

sitam ye ki is ke liye aaj

mulla-e-rumi ke

majzub-e-shiraaz ke

zang-aluda auham bhi

dast-giri ko hazir nahin hain

KHudawand

kya aaj ki raat bhi

teri palkon ki sangin chaTanen

nahin haT sakengi

tujhe ai zamane ke raunde hue

aaj ye baat kahne ki hajat hi kyun ho

tu KHush ho

ki tere liye khul gai hain hazaron zabanen

jo teri zaban ban ke

shahon ke KHwabida mahlon ke chaaron taraf

sho'le ban kar lipaTti chali ja rahi hain

siyasat ne socha hai

teri zaban band kar de

siyasat ko ye kyun KHabar ho

ki lab band honge

to khul jaenge dast-o-bazu

wo bhaari yaKH-alud qadmon ki aawaz

yak-laKHt KHamosh kyun ho gai hai

nau-amoz-e-mashriq ke

nau-KHez aain ke taziyano

sukut-e-gada se

gadai to sakit na hogi