ghusse ki fasl

maiñ zamāne se ḳhafā 'aurat huuñ

us ne hamesha tārīḳh meñ mardoñ ko

ham par fazīlat dī

merī āñkhoñ meñ aisī chingāriyāñ

jin se maiñ har nazar aane vaalī shai ko aag lagā saktī huuñ

maiñ vo 'aurat huuñ

jis kī maañg meñ dukh kā sindūr lagā hai

jis kī loriyāñ

nauha aur hañsī rajaz hai

jis ke dupaTTe par ghaTiyā jumle chipke haiñ

mardoñ ne sirf jangeñ laḌnā aur marnā sīkhā

mujhe banāyā gayā

un par rone ke liye

maiñ ne mohabbat kī be-nishāñ qabroñ par

ḳhāmoshī meñ lipTī du'ā.eñ māñgīñ

tamannāoñ ke ātish-dān ko

apnī hī sāñsoñ se bujhāyā

aur har din ek yaad ke daraḳht ko aañsū daan kiye

ek chehre kī muskān dekhne ke liye

ḳhud ko ā.īna banā.e rakhā

aur mohabbat ke dariyā meñ ḳhaak uḌtī dekhī

maiñ nārāz huuñ

mere andar ek biphrā huā samundar hai

jis kī lahreñ pahāḌoñ ke saroñ se guzar jā.eñgī

jis ke har qatre meñ baġhāvat kī aag hai

ye duniyā mujhe sivā.e udāsī ke kuchh na de sakī

is fitrat se jo mard kī mīrās banī

is zindagī se jis kī kokh be-ma'ānī hai

aur us ḳhudā se

jo sirf ḳhāmosh 'auratoñ kā ḳhudā hai

kyā merā ḳhudā bhī mard thā

maiñ nārāz huuñ

har us zabān se

jo mujhe chup rahne kā mashvara de

har us kitāb se

jis meñ mere liye sabaq haiñ

ḳhvāb nahīñ

har us haath se

jo mere hisse kī zamīn chhīn le

har us rivāj se

jo merī sāñsoñ par zanjīr Daal de

aur un sab se baḌh kar

maiñ nārāz huuñ

tum se aur ḳhud apne aap se

tum ye mat pūchhnā ki kyoñ

suno

'aurat kī nārāzgī se Daro

ki ye qahr kī sadā hai

magar us 'aurat kī nārāzgī se panāh māñgo

jo zahīn aur diler hai

us se mat uljho

ki tumhārā apnā vujūd

ḳhud us ke haq meñ gavāhī degā

ki ye vo ā.īna hai

jis meñ tumheñ apnī vahshat

aur apnā khokhlā vaqār barhana dikhā.ī degā

main zamane se KHafa 'aurat hun

us ne hamesha tariKH mein mardon ko

hum par fazilat di

meri aankhon mein aisi chingariyan

jin se main har nazar aane wali shai ko aag laga sakti hun

main wo 'aurat hun

jis ki mang mein dukh ka sindur laga hai

jis ki loriyan

nauha aur hansi rajaz hai

jis ke dupaTTe par ghaTiya jumle chipke hain

mardon ne sirf jangen laDna aur marna sikha

mujhe banaya gaya

un par rone ke liye

main ne mohabbat ki be-nishan qabron par

KHamoshi mein lipTi du'aen mangin

tamannaon ke aatish-dan ko

apni hi sanson se bujhaya

aur har din ek yaad ke daraKHt ko aansu dan kiye

ek chehre ki muskan dekhne ke liye

KHud ko aaina banae rakha

aur mohabbat ke dariya mein KHak uDti dekhi

main naraaz hun

mere andar ek biphra hua samundar hai

jis ki lahren pahaDon ke saron se guzar jaengi

jis ke har qatre mein baghawat ki aag hai

ye duniya mujhe siwae udasi ke kuchh na de saki

is fitrat se jo mard ki miras bani

is zindagi se jis ki kokh be-ma'ani hai

aur us KHuda se

jo sirf KHamosh 'auraton ka KHuda hai

kya mera KHuda bhi mard tha

main naraaz hun

har us zaban se

jo mujhe chup rahne ka mashwara de

har us kitab se

jis mein mere liye sabaq hain

KHwab nahin

har us hath se

jo mere hisse ki zamin chhin le

har us riwaj se

jo meri sanson par zanjir Dal de

aur un sab se baDh kar

main naraaz hun

tum se aur KHud apne aap se

tum ye mat puchhna ki kyon

suno

'aurat ki naraazgi se Daro

ki ye qahr ki sada hai

magar us 'aurat ki naraazgi se panah mango

jo zahin aur diler hai

us se mat uljho

ki tumhaara apna wujud

KHud us ke haq mein gawahi dega

ki ye wo aaina hai

jis mein tumhein apni wahshat

aur apna khokhla waqar barhana dikhai dega