handloom

ye dastī pārcha-bāfī hamāre ghar kī san'at hai

ye san'at iftiḳhār-e-qaum hai bhārat kī 'azmat hai

yahī san'at hameñ baḳhshegī ḳhushiyāñ aur ḳhush-hālī

isī fan se hamāre ghar meñ hogī fāriġh-ul-bālī

hamārī dast-bāfī bhā ga.ī hai zauq vāloñ ko

bahut marġhūb haiñ kapḌe hamāre mah-jamāloñ ko

banāvaT meñ numāyāñ chand sadiyoñ ke ḳhazāne haiñ

ellora ke namūne haiñ ajantā ke fasāne haiñ

kahīñ haiñ naqsh muġhloñ rājputoñ kī saqāfat ke

kahīñ manzar haiñ dilkash hind kī qaumī vajāhat ke

zabāñ-zad ho rahī hai āj-kal in kī dil-āvezī

baḌā dilkash hai in kapḌoñ kā tarz-e-rang-āmezī

vo america ho yā europe har ik jā is kā charchā hai

hamārī dast-bāfī kā jahāñ meñ bol-bālā hai

mubārak 'tāhira' hafta manānā dast-kāroñ ko

ḳhudā ābād rakkhe mulk ke in honhāroñ ko

ye dasti parcha-bafi hamare ghar ki san'at hai

ye san'at iftiKHar-e-qaum hai bhaarat ki 'azmat hai

yahi san'at hamein baKHshegi KHushiyan aur KHush-haali

isi fan se hamare ghar mein hogi farigh-ul-baali

hamari dast-bafi bha gai hai zauq walon ko

bahut marghub hain kapDe hamare mah-jamalon ko

banawaT mein numayan chand sadiyon ke KHazane hain

ellora ke namune hain ajanta ke fasane hain

kahin hain naqsh mughlon rajputon ki saqafat ke

kahin manzar hain dilkash hind ki qaumi wajahat ke

zaban-zad ho rahi hai aaj-kal in ki dil-awezi

baDa dilkash hai in kapDon ka tarz-e-rang-amezi

wo america ho ya europe har ek ja is ka charcha hai

hamari dast-bafi ka jahan mein bol-baala hai

mubarak 'tahira' hafta manana dast-karon ko

KHuda aabaad rakkhe mulk ke in honhaaron ko