ek udas

aaj phir shaam se pahle hī utar aa.egā

mere chehre pe ik afsurda udāsī kā sukūt

raat bhar dard kī chādar meñ lapeTe ḳhud ko

subah raushan hai maiñ ye kah ke dilāse dūñgī

chāñd jab thak ke sitāroñ se lipaT jā.egā

raat chupke se mirī aañkh meñ Dhal jā.egī

phir kahīñ duur se aatī huī gumnām sadā

band khiḌkī ke kisī shīshe se Takrā.egī

raat ke be-karāñ sannāTe se vahshat khā kar

chand bikhre hue ḳhvāboñ ko maiñ yakjā kar ke

apnī āñkhoñ se kahīñ duur chhupā ā.ūñgī

mere siine pe aziyyat kā nishāñ de kar ke

raat chup-chāp dabe paañv guzar jaatī hai

apne bistar pe paḌī haule se karvaT le kar

bhīgte takiye pe sar rakh ke maiñ āhista se

sochtī huuñ ki mohabbat kī haqīqat kyā hai

jin ke chehroñ se jhalaktī hai thakan rātoñ kī

korī āñkhoñ meñ guzar jaatī haiñ rāteñ jin kī

apnī āñkhoñ meñ vo gumnām udāsī le kar

kyā faqat ashk bahāne ke liye aate haiñ

aaj phir sham se pahle hi utar aaega

mere chehre pe ek afsurda udasi ka sukut

raat bhar dard ki chadar mein lapeTe KHud ko

subah raushan hai main ye kah ke dilase dungi

chand jab thak ke sitaron se lipaT jaega

raat chupke se meri aankh mein Dhal jaegi

phir kahin dur se aati hui gumnam sada

band khiDki ke kisi shishe se Takraegi

raat ke be-karan sannaTe se wahshat kha kar

chand bikhre hue KHwabon ko main yakja kar ke

apni aankhon se kahin dur chhupa aaungi

mere sine pe aziyyat ka nishan de kar ke

raat chup-chap dabe panw guzar jati hai

apne bistar pe paDi haule se karwaT le kar

bhigte takiye pe sar rakh ke main aahista se

sochti hun ki mohabbat ki haqiqat kya hai

jin ke chehron se jhalakti hai thakan raaton ki

kori aankhon mein guzar jati hain raaten jin ki

apni aankhon mein wo gumnam udasi le kar

kya faqat ashk bahane ke liye aate hain