jangal na sahi

savere aisā lagā

jaise koī darvāze par dastak de rahā hai

uTh kar dekhā to koī nahīñ thā

khaT khaT kī āvāz par dhyān diyā

to khiḌkī ke paT par baiThā nazar aayā ek parinda

choñch se banā rahā thā naqsh-o-nigār

kyoñ bha.ī maiñ ne pūchhā to kahne lagā

kirā.e par chāhiye ek Tahnī jis par banā sakūñ apnā ghoñsla

apnī to jaise-taise kaT hī jā.egī

lekin bāl-bachchoñ kā kyā hogā

aap ke bhaa.ī bandoñ ne kaaT Daale jañgal

aur de diyā des nikālā

savāb kī niyyat se bhale aadmī dālān meñ rakh dete haiñ paanī kī kaTorī aur daana

peT kī aag bujhāne ko thoḌā sā khā pī lete haiñ

chhat bhale na ho khānā to chāhiye hī

kabhī lagtā hai bijlī ke taar chhū kar ḳhud-kushī kar luuñ

yā ūñche mobile Tāvaroñ se Takrā kar jaan de duuñ

jaise kisānoñ ko ḳhud-kushī ke baad sarkār kuchh imdād de detī hai

shāyad koī gosha hameñ bhī allot kar de bachchoñ ke liye

ye sun kar maiñ to chakrā gayā

is taraf to sach-much maiñ ne koī dhyān nahīñ diyā thā

jañgaloñ ko kāTte samay kis ne sochā hogā ki

ye be-zabān kahāñ jā.eñge

maiñ ne haath joḌ kar kahā

in zālimoñ kī taraf se maiñ muāfī māñgtā huuñ

ḳhudā ke vāste ḳhud-kushī kā ḳhayāl dil meñ na laanā

jab tak jī chāhe merī kunDī meñ lage one rome kitchen hī meñ guzāra kar lo

kuchh tañgī sahī lekin intizām ho jā.egā

us ne kahā

mehrbānī magar maiñ kirāya adā karne kā ahal nahīñ

maiñ ne kahā sub.h-shām apnī mīThī bolī sunā diyā karnā bas

mujhe aur kuchh nahīñ chāhiye

us ne kahā

mere dhanye bhaag ki aap jaise hamdard insān se mulāqāt ho ga.ī

lekin har koī to aap jaisā nahīñ

aur phir mere baaqī ham-jinsoñ kā kyā hogā

maiñ ne kahā

unheñ bhī kahīñ na kahīñ sar chhupāne ko jagah mill jā.egī

magar ḳhudārā tum ḳhud-kushī kā irāda tark kar do

ham jhaaḌ lagā.eñge aur un kī hifāzat bhī kareñge

ye sunte hī vo ḳhushī ḳhushī tinke jam.a karne meñ magan ho gayā

aur

maiñ ghar meñ aap ko ye saarā mājrā sunāne chalā aayā

is nanhe se parinde kī khaT khaT ne goyā mere dil-o-dimāġh ke

darvāze khol diye

ye sun kar yā paḌh kar aap bhī apne āñgan meñ ek jhaaḌ to

lagā.eñge nā

yā kunDī meñ ek biij to bo.eñge nā

kam-az-kam ek biij

sawere aisa laga

jaise koi darwaze par dastak de raha hai

uTh kar dekha to koi nahin tha

khaT khaT ki aawaz par dhyan diya

to khiDki ke paT par baiTha nazar aaya ek parinda

chonch se bana raha tha naqsh-o-nigar

kyon bhai main ne puchha to kahne laga

kirae par chahiye ek Tahni jis par bana sakun apna ghonsla

apni to jaise-taise kaT hi jaegi

lekin baal-bachchon ka kya hoga

aap ke bhai bandon ne kaT Dale jangal

aur de diya des nikala

sawab ki niyyat se bhale aadmi dalan mein rakh dete hain pani ki kaTori aur dana

peT ki aag bujhane ko thoDa sa kha pi lete hain

chhat bhale na ho khana to chahiye hi

kabhi lagta hai bijli ke tar chhu kar KHud-kushi kar lun

ya unche mobile Tawaron se Takra kar jaan de dun

jaise kisanon ko KHud-kushi ke baad sarkar kuchh imdad de deti hai

shayad koi gosha hamein bhi allot kar de bachchon ke liye

ye sun kar main to chakra gaya

is taraf to sach-much main ne koi dhyan nahin diya tha

jangalon ko kaTte samay kis ne socha hoga ki

ye be-zaban kahan jaenge

main ne hath joD kar kaha

in zalimon ki taraf se main muafi mangta hun

KHuda ke waste KHud-kushi ka KHayal dil mein na lana

jab tak ji chahe meri kunDi mein lage one rome kitchen hi mein guzara kar lo

kuchh tangi sahi lekin intizam ho jaega

us ne kaha

mehrbani magar main kiraya ada karne ka ahal nahin

main ne kaha subh-sham apni miThi boli suna diya karna bas

mujhe aur kuchh nahin chahiye

us ne kaha

mere dhanye bhag ki aap jaise hamdard insan se mulaqat ho gai

lekin har koi to aap jaisa nahin

aur phir mere baqi ham-jinson ka kya hoga

main ne kaha

unhen bhi kahin na kahin sar chhupane ko jagah mill jaegi

magar KHudara tum KHud-kushi ka irada tark kar do

hum jhaD lagaenge aur un ki hifazat bhi karenge

ye sunte hi wo KHushi KHushi tinke jama karne mein magan ho gaya

aur

main ghar mein aap ko ye sara majra sunane chala aaya

is nanhe se parinde ki khaT khaT ne goya mere dil-o-dimagh ke

darwaze khol diye

ye sun kar ya paDh kar aap bhi apne aangan mein ek jhaD to

lagaenge na

ya kunDi mein ek bij to boenge na

kam-az-kam ek bij