میں باغی ہوں نظام زندگی کا

مجھے دیر و حرم سے واسطا کیا

نظر میں دونوں عالم میری دھوکا

فریب و وہم ہے ہستی سراپا

زیاں ہے یہ بساط دہر سارا

میں باغی ہوں نظام زندگی کا

اٹھو میں نوجواں تیغ آزما ہوں

بچو میں جوش طوفان بلا ہوں

چلو میں بحر غم کا نا خدا ہوں

بڑھو میں عزم منزل آشنا ہوں

میں باغی ہوں نظام زندگی کا

کڑکتی رعد ہے میری جوانی

قیامت سوز شعلوں کی روانی

بھنور گرداب شورش ناگہانی

اجل مزدور کا دل آگ پانی

میں باغی ہوں نظام زندگی کا

میں زہر آلود مار آستیں ہوں

میں دیپک کا سرود آتشیں ہوں

عمل کے لا مکانوں کا مکیں ہوں

میں اک مجبور سا انساں نہیں ہوں

میں باغی ہوں نظام زندگی کا

سنو میری صدا بانگ سحر ہے

مرا دل بجلیوں کا مستقر ہے

عمارت کی زمیں زیر و زبر ہے

نئی تعمیر پر میری نظر ہے

میں باغی ہوں نظام زندگی کا