mere hamraaz

maiñ bahut der se dālān meñ chupkī baiThī

sard dīvār se sar apnā Tikā kar tujh ko

sochtī huuñ ki tū is vaqt kahāñ par hogā

kisī jalte hue chūlhe kī taraf haath baḌhā.e

yā kisī narm se kambal meñ hī pairoñ ko chhupā.e

kisī kone meñ kahīñ par tū akelā baiThā

apnī āñkhoñ ke darīchoñ ko muqaffal kar ke

mujhe lagtā hai mujhe soch rahā hogā tū

ki vo is vaqt kisī nazm meñ khoī shāyad

mirī tasvīr se mauzū'-e-suḳhan vā kartī

kisī pechīda zaḳhāmat se bhare novel ke

chand jumloñ kī samā'at se hirāsāñ ho kar

ḳhud se laḌte hue aurāq ulaTtī hogī

maiñ bhaTak kar kahīñ is or nikal ā.ūñgā

vo yahī soch ke ab chhat pe Tahaltī hogī

mire hoñToñ ke tabassum pe fidā ik laḌkī

mirī āñkhoñ ke ishāroñ se bahalne vaalī

jaane ab ruuTh ke vo kaise bahaltī hogī

mire ham-rāz mirī soch meñ rahne vaale

mire ruḳhsār pe bahte hue paanī kī qasam

aa mujhe dekh tire hijr meñ kyā haal huā

vo jo nazmoñ se suḳhan kartī bahal jaatī thī

jo kabhī girtī to ḳhud gir ke sañbhal jaatī thī

jis ko hañste hue chehroñ se mohabbat thī kabhī

jis kī rangīn tabī'at kā thā shaidā.ī tū

us ne sūraj kī shu'ā'oñ se 'adāvat kar lī

apnī rangīn mizājī se baġhāvat kar lī

sard rātoñ meñ vo be-ḳhauf jagā kartī hai

ab ujāloñ meñ añdheroñ kī du'ā kartī hai

main bahut der se dalan mein chupki baiThi

sard diwar se sar apna Tika kar tujh ko

sochti hun ki tu is waqt kahan par hoga

kisi jalte hue chulhe ki taraf hath baDhae

ya kisi narm se kambal mein hi pairon ko chhupae

kisi kone mein kahin par tu akela baiTha

apni aankhon ke darichon ko muqaffal kar ke

mujhe lagta hai mujhe soch raha hoga tu

ki wo is waqt kisi nazm mein khoi shayad

meri taswir se mauzu'-e-suKHan wa karti

kisi pechida zaKHamat se bhare nowel ke

chand jumlon ki sama'at se hirasan ho kar

KHud se laDte hue auraq ulaTti hogi

main bhaTak kar kahin is or nikal aaunga

wo yahi soch ke ab chhat pe Tahalti hogi

mere honTon ke tabassum pe fida ek laDki

meri aankhon ke ishaaron se bahalne wali

jaane ab ruTh ke wo kaise bahalti hogi

mere ham-raaz meri soch mein rahne wale

mere ruKHsar pe bahte hue pani ki qasam

aa mujhe dekh tere hijr mein kya haal hua

wo jo nazmon se suKHan karti bahal jati thi

jo kabhi girti to KHud gir ke sanbhal jati thi

jis ko hanste hue chehron se mohabbat thi kabhi

jis ki rangin tabi'at ka tha shaidai tu

us ne suraj ki shu'a'on se 'adawat kar li

apni rangin mizaji se baghawat kar li

sard raaton mein wo be-KHauf jaga karti hai

ab ujalon mein andheron ki du'a karti hai