rumuz-e-jawani

javānī nā-shakebā nardbān-e-'arsh-e-ā'zam hai

javānī rāhat-afzā bā'is-e-husn-e-do-'ālam hai

javānī imtihāñ hai zindagī ke dars-e-'ibrat kā

javānī ek tohfa hai razā-e-rabbul-'izzat kā

javānī zindagī ke saaz kā dil-kash tarāna hai

javānī ek muhmal ek bā-mā'nā fasāna hai

javānī rāz-dār-e-kun-fakāñ hai sirr-e-ādam hai

javānī inqalāb-angez hai pahnā-e-‘ālam hai

javānī dushman-e-insāñ hai ġhammāz-e-haqīqat hai

javānī maslak-e-dushvār sar-tā-pā musībat hai

javānī ashk kī sūrat baras jaatī hai āñkhoñ se

javānī laakh laatī hai balā.eñ sar pe insāñ ke

javānī ik gul-e-maḳhsūs hai bustān-e-'ālam kā

isī gulshan meñ aa kar imtihāñ hotā hai aadam kā

javānī chupke chupke ruuh par qabza jamātī hai

suhāne giit gaatī hai rag-o-pai meñ samātī hai

javānī ek ā.īna hai 'aks-e-zindagānī kā

ye pahlū dūsrā pahlū hai bazm-e-āsmānī kā

javānī kī kiran har aañkh ko ḳhīra banātī hai

ye taaza gul khilātī hai ġhalat rāheñ dikhātī hai

javānī ek TeḌhā rāsta hai rāh-e-hastī kā

jahāñ ehsās hotā hī nahīñ kuchh auj-o-pastī kā

javānī ek parda hai jo mustaqbil chhupātā hai

bahut se be-ḳhabar logoñ ko dīvāne banātā hai

javānī ek dariyā hai jo chaḌhte hī utartā hai

jo is meñ Dūbtā hai jā ke pastī meñ ubhartā hai

javānī ek TeḌhā rāsta hai bazm-e-fānī kā

jahāñ miltā hai parvāna hayāt-e-jāvedānī kā

javānī muzhda-e-pīrī muraqqa' hai 'ibādat kā

isī ke baa'd kuchh ehsās hotā hai riyāzat kā

javānī ḳhuun apne daur meñ aksar rulātī hai

ba-āsānī ye farzānoñ ko dīvāna banātī hai

javānī aisī manzil hai jahāñ andesha-e-ġham hai

kare insān jitnā ġhaur is par vo 'razī' kam hai

jawani na-shakeba nardban-e-'arsh-e-a'zam hai

jawani rahat-afza ba'is-e-husn-e-do-'alam hai

jawani imtihan hai zindagi ke dars-e-'ibrat ka

jawani ek tohfa hai raza-e-rabbul-'izzat ka

jawani zindagi ke saz ka dil-kash tarana hai

jawani ek muhmal ek ba-ma'na fasana hai

jawani raaz-dar-e-kun-fakan hai sirr-e-adam hai

jawani inqalab-angez hai pahna-e-‘alam hai

jawani dushman-e-insan hai ghammaz-e-haqiqat hai

jawani maslak-e-dushwar sar-ta-pa musibat hai

jawani ashk ki surat baras jati hai aankhon se

jawani lakh lati hai balaen sar pe insan ke

jawani ek gul-e-maKHsus hai bustan-e-'alam ka

isi gulshan mein aa kar imtihan hota hai aadam ka

jawani chupke chupke ruh par qabza jamati hai

suhane git gati hai rag-o-pai mein samati hai

jawani ek aaina hai 'aks-e-zindagani ka

ye pahlu dusra pahlu hai bazm-e-asmani ka

jawani ki kiran har aankh ko KHira banati hai

ye taza gul khilati hai ghalat rahen dikhati hai

jawani ek TeDha rasta hai rah-e-hasti ka

jahan ehsas hota hi nahin kuchh auj-o-pasti ka

jawani ek parda hai jo mustaqbil chhupata hai

bahut se be-KHabar logon ko diwane banata hai

jawani ek dariya hai jo chaDhte hi utarta hai

jo is mein Dubta hai ja ke pasti mein ubharta hai

jawani ek TeDha rasta hai bazm-e-fani ka

jahan milta hai parwana hayat-e-jawedani ka

jawani muzhda-e-piri muraqqa' hai 'ibaadat ka

isi ke ba'd kuchh ehsas hota hai riyazat ka

jawani KHun apne daur mein aksar rulati hai

ba-asani ye farzanon ko diwana banati hai

jawani aisi manzil hai jahan andesha-e-gham hai

kare insan jitna ghaur is par wo 'razi' kam hai