sadiqain

uñgliyāñ figār us kī ḳhāma ḳhūñ-chakāñ us kā

husn nuur kī sūrat āsmān se utre

harf raushnī Thahre

bahr-e-bekarāñ ġham kā bas gayā rag-o-pai meñ

dard paikar-e-shab meñ kahkashāñ tasavvur meñ

naqsh ban ke ubhre haiñ saf.ha-e-taḳhayyul par

saf.ha-e-taḳhayyul par ḳhūn-e-dil kī tahrīreñ

ḳhūn-e-dil se ubhrī haiñ fikr-o-fan kī tasvīreñ

uñgliyāñ figār us kī ḳhāma ḳhūñ-chakāñ us kā

'arsh ke makīnoñ meñ guftugū qalam kī hai

tazkira junūñ kā hai

zikr rang-e-ḳhūñ kā hai

'arsh kī fazāoñ meñ ġhalġhala suḳhan kā hai

mehr-o-māh gardish meñ mehr-o-māh dāman meñ

mehr-o-māh āñkhoñ meñ us kī jagmagāte haiñ

ḳhvāb chashm-e-bīnā kā ḳhvāb chashm-e-hairat kā

ḳhvāb us ne dekhe bhī ḳhvāb us ne bāñTe bhī

ḳhvāb ḳhūb-sūrat ḳhvāb āgahī kī rif'at kā

ḳhūb-tar safar kā ḳhvāb

ḳhūb-tar jahāñ kā ḳhvāb

husn-e-ḳhūb-tar kā ḳhvāb

naqsh-hā-e-rangā-rang

raushnā.ī ashkoñ kī mash’aloñ kī lau ban kar

chehra-e-mohabbat ko tābnāk kartī hai

zindagī kī rāhoñ meñ raushnī kī mehrābeñ

uñgliyāñ figār us kī ḳhāma ḳhūñ-chakāñ us kā

shā'irī kā sarmāya fikr-o-fan kā sar-chashma

nok-e-ḳhāma se us kī chāñdnī Tapaktī hai

raushnī nikhartī hai tīrgī simaTtī hai

ḳhāma ḳhūñ-chakāñ us kā ik jahān-e-mā'nī hai

uñgliyāñ figār us kī

ḳhair-o-shar kī duniyā meñ ḳhair kī 'alāmat haiñ

uñgliyāñ figār us kī raushnī kī qindīleñ

karb kī haiñ tasvīreñ

jabr kī nafī jin se jahl kī nafī jin se

kufr kī nafī jin se sub.h-o-shām hotī hai

vo safīr-e-dānā.ī vo naqīb-e-bīnā.ī

ḳhāma ḳhūñ-chakāñ us kā husn kā musavvir hai

'ishq kā musāfir hai

ziist kī sadāqat kā vo amīn-o-paiġhambar

vo sahīfa-e-ġham kā mo'tabar musannif hai

uñgliyāñ figār us kī ḳhāma ḳhūñ-chakāñ us kā

ungliyan figar us ki KHama KHun-chakan us ka

husn nur ki surat aasman se utre

harf raushni Thahre

bahr-e-bekaran gham ka bas gaya rag-o-pai mein

dard paikar-e-shab mein kahkashan tasawwur mein

naqsh ban ke ubhre hain safha-e-taKHayyul par

safha-e-taKHayyul par KHun-e-dil ki tahriren

KHun-e-dil se ubhri hain fikr-o-fan ki taswiren

ungliyan figar us ki KHama KHun-chakan us ka

'arsh ke makinon mein guftugu qalam ki hai

tazkira junun ka hai

zikr rang-e-KHun ka hai

'arsh ki fazaon mein ghalghala suKHan ka hai

mehr-o-mah gardish mein mehr-o-mah daman mein

mehr-o-mah aankhon mein us ki jagmagate hain

KHwab chashm-e-bina ka KHwab chashm-e-hairat ka

KHwab us ne dekhe bhi KHwab us ne banTe bhi

KHwab KHub-surat KHwab aagahi ki rif'at ka

KHub-tar safar ka KHwab

KHub-tar jahan ka KHwab

husn-e-KHub-tar ka KHwab

naqsh-ha-e-ranga-rang

raushnai ashkon ki mash’alon ki lau ban kar

chehra-e-mohabbat ko tabnak karti hai

zindagi ki rahon mein raushni ki mehraben

ungliyan figar us ki KHama KHun-chakan us ka

sha'iri ka sarmaya fikr-o-fan ka sar-chashma

nok-e-KHama se us ki chandni Tapakti hai

raushni nikharti hai tirgi simaTti hai

KHama KHun-chakan us ka ek jahan-e-ma'ni hai

ungliyan figar us ki

KHair-o-shar ki duniya mein KHair ki 'alamat hain

ungliyan figar us ki raushni ki qindilen

karb ki hain taswiren

jabr ki nafi jin se jahl ki nafi jin se

kufr ki nafi jin se subh-o-sham hoti hai

wo safir-e-danai wo naqib-e-binai

KHama KHun-chakan us ka husn ka musawwir hai

'ishq ka musafir hai

zist ki sadaqat ka wo amin-o-paighambar

wo sahifa-e-gham ka mo'tabar musannif hai

ungliyan figar us ki KHama KHun-chakan us ka