پھر باجی جان بھڑوے نے جھگڑا کیا شروع

پھر باجی جان بھڑوے نے جھگڑا کیا شروع

میں چاہتی تھی ختم ہو الٹا ہوا شروع

حسن و شباب یار کا پھٹنا ہوا شروع

گویاں غضب کہ ہو گیا فتنہ نیا شروع

ان کو یہ خبط مجھ سے ہو آغاز داستاں

میں اس خیال میں کہ کریں دل ربا شروع

مانا کہ ہم نے سوت کو کروا دیا حقیر

یہ تو بتاؤ کس نے یہ جھگڑا کیا شروع

دولہا کی تاک جھانک نے بیگم جھکا دیا

جا جا کے چوک کر دیا پھر جھانکنا شروع

انجام جب بخیر ہو تب جانوں خیر ہے

دہلا رہا ہے دل کو موئی بات کا شروع

ہم کو نہ چھیڑو کہہ دیا رو رو کے ورنہ ہم

کر دیں گے دولہا یار رہے کوسنا شروع

پھر شیخ جی نے پاؤں نکالے ہیں پیٹ سے

پھر وہ شرارتیں موا کرنے لگا شروع

کیا جانے آگے چل کے وہ بھڑوا کرے گا کیا

اچھا نہیں نگوڑے کا جب اے بوا شروع

کیوں کر نہ نور حسن سے ہو چودھویں کا چاند

دلہن کا چودھواں ہوا نام خدا شروع

محسنؔ نہیں وہ فتنۂ خوابیدہ ہے بوا

مجھ کو یہ ڈر ہے حشر نہ کر دے موا شروع