karbal ke jaan-nisaron pe mera salam ho

karbal ke jāñ-nisāroñ pe merā salām ho

ibn-e-'alī ke pyāroñ pe merā salām ho

merā salām ‘aun-o-mohammad ke vāste

zainab ke shīr-ḳhvāroñ pe merā salām ho

ḳhuuñ de ke surḳh-rū kiyā dīn-e-matīn ko

muslim ke be-sahāroñ pe merā salām ho

niklī jo be-karāñ 'alī asġhar ke halq se

un ḳhuun kī phuvāroñ pe merā salām ho

chhalnī huā hai tīroñ se mashkīza haa.e haa.e

tishna-labī ke māroñ pe merā salām ho

merā salām hazrat-e-'abbās ke liye

zohra ke dil-figāroñ pe merā salām ho

chhīne ga.e jo zainab-o-bāno ke kaan se

un saare goshvāroñ pe merā salām ho

merā salām 'ābid-e-bīmār ke liye

suġhrā kī un pukāroñ pe merā salām ho

kuufa ke regzāroñ se karbal kī ḳhaak tak

bikhre hue sitāroñ pe merā salām ho

merā salām shabbar-o-shabbīr ke liye

yā'nī nabī ke pyāroñ pe merā salām ho

apnoñ meñ rah ke 'nūr' jo kahlā.e ajnabī

un saare be-sahāroñ pe merā salām ho

karbal ke jaan-nisaron pe mera salam ho

ibn-e-'ali ke pyaron pe mera salam ho

mera salam ‘aun-o-mohammad ke waste

zainab ke shir-KHwaron pe mera salam ho

KHun de ke surKH-ru kiya din-e-matin ko

muslim ke be-sahaaron pe mera salam ho

nikli jo be-karan 'ali asghar ke halq se

un KHun ki phuwaron pe mera salam ho

chhalni hua hai tiron se mashkiza hae hae

tishna-labi ke maron pe mera salam ho

mera salam hazrat-e-'abbas ke liye

zohra ke dil-figaron pe mera salam ho

chhine gae jo zainab-o-bano ke kan se

un sare goshwaron pe mera salam ho

mera salam 'abid-e-bimar ke liye

sughra ki un pukaron pe mera salam ho

kufa ke regzaron se karbal ki KHak tak

bikhre hue sitaron pe mera salam ho

mera salam shabbar-o-shabbir ke liye

ya'ni nabi ke pyaron pe mera salam ho

apnon mein rah ke 'nur' jo kahlae ajnabi

un sare be-sahaaron pe mera salam ho