کی تلاش کا نتیجه | موضو - نظم, صفحہ behis

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "behis"

نظم کے متعلقہ نتیجہ "behis"

نظم

سانس لینا بھی کیسی عادت ہے
جئے جانا بھی کیا روایت ہے
کوئی آہٹ نہیں بدن میں کہیں
کوئی سایہ نہیں ہے آنکھوں میں
پاؤں بے حس ہیں چلتے جاتے ہیں
اک سفر ہے جو بہتا رہتا ہے
کتنے برسوں سے کتنی صدیوں سے
جئے جاتے ہیں جئے جاتے ہیں

گلزار

نظم

رکی رکی سی صفیں ملگجی گھٹاؤں کی
اتار پر ہے سر صحن رقص پیپل کا
وہ کچھ نہیں ہے اب اک جنبش خفی کے سوا
خود اپنی کیفیت نیلگوں میں ہر لحظہ
یہ شام ڈوبتی جاتی ہے چھپتی جاتی ہے
حجاب وقت سرے سے ہے بے حس و حرکت
رکی رکی دل فطرت کی دھڑکنیں یک لخت
یہ رنگ شام کہ گردش ہی آسماں میں نہیں
بس ایک وقفۂ تاریک، لمحۂ شہلا
سما میں جنبش مبہم سی کچھ ہوئی فوراً
تلی گھٹا کے تلے بھیگے بھیگے پتوں سے
ہری ہری کئی چنگاریاں سی پھوٹ پڑیں
کہ جیسے کھلتی جھپکتی ہوں بے شمار آنکھیں
عجب یہ آنکھ مچولی تھی نور و ظلمت کی
سہانی نرم لویں دیتے ان گنت جگنو
گھنی سیاہ خنک پتیوں کے جھرمٹ سے
مثال چادر شب تاب جگمگانے لگے
کہ تھرتھراتے ہوئے آنسوؤں سے ساغر شام
چھلک چھلک پڑے جیسے بغیر سان گمان
بطون شام میں ان زندہ قمقموں کی دمک
کسی کی سوئی ہوئی یاد کو جگاتی تھی
وہ بے پناہ گھٹا وہ بھری بھری برسات
وہ سین دیکھ کے آنکھیں مری بھر آتی تھیں
مری حیات نے دیکھی ہیں بیس برساتیں
مرے جنم ہی کے دن مر گئی تھی ماں میری
وہ ماں کہ شکل بھی جس ماں کی میں نہ دیکھ سکا
جو آنکھ بھر کے مجھے دیکھ بھی سکی نہ وہ ماں
میں وہ پسر ہوں جو سمجھا نہیں کہ ماں کیا ہے
مجھے کھلائیوں اور دائیوں نے پالا تھا
وہ مجھ سے کہتی تھیں جب گھر کے آتی تھی برسات
جب آسمان میں ہر سو گھٹائیں چھاتی تھیں
بوقت شام جب اڑتے تھے ہر طرف جگنو
دیئے دکھاتے ہیں یہ بھولی بھٹکی روحوں کو
مزہ بھی آتا تھا مجھ کو کچھ ان کی باتوں میں
میں ان کی باتوں میں رہ رہ کے کھو بھی جاتا تھا
پر اس کے ساتھ ہی دل میں کسک سی ہوتی تھی
کبھی کبھی یہ کسک ہوک بن کے اٹھتی تھی
یتیم دل کو مرے یہ خیال ہوتا تھا!
یہ شام مجھ کو بنا دیتی کاش اک جگنو
تو ماں کی بھٹکی ہوئی روح کو دکھاتا راہ
کہاں کہاں وہ بچاری بھٹک رہی ہوگی
کہاں کہاں مری خاطر بھٹک رہی ہوگی
یہ سوچ کر مری حالت عجیب ہو جاتی
پلک کی اوٹ میں جگنو چمکنے لگتے تھے
کبھی کبھی تو مری ہچکیاں سی بندھ جاتیں
کہ ماں کے پاس کسی طرح میں پہنچ جاؤں
اور اس کو راہ دکھاتا ہوا میں گھر لاؤں
دکھاؤں اپنے کھلونے دکھاؤں اپنی کتاب
کہوں کہ پڑھ کے سنا تو مری کتاب مجھے
پھر اس کے بعد دکھاؤں اسے میں وہ کاپی
کہ ٹیڑھی میڑھی لکیریں بنی تھیں کچھ جس میں
یہ حرف تھے جنہیں میں نے لکھا تھا پہلے پہل
اور اس کو راہ دکھاتا ہوا میں گھر لاؤں
دکھاؤں پھر اسے آنگن میں وہ گلاب کی بیل
سنا ہے جس کو اسی نے کبھی لگایا تھا
یہ جب کہ بات ہے جب میری عمر ہی کیا تھی
نظر سے گزری تھیں کل چار پانچ برساتیں

فراق گورکھپوری

نظم

آہ جب دل سے نکلتی ہے اثر رکھتی ہے
گلشن زیست جلانے کو شرر رکھتی ہے
توپ تلوار نہ یہ تیغ و تبر رکھتی ہے
بنت حوا کی طرح تیر نظر رکھتی ہے
اتنا پر سوز ہوا نالۂ سفاک مرا
کر گیا دل پہ اثر شکوۂ بے باک مرا
یہ کہا سن کے سسر نے کہ کہیں ہے کوئی
ساس چپکے سے یہ بولیں کہ یہیں ہے کوئی
سالیاں کہنے لگیں قرب و قریں ہے کوئی
سالے یہ بولے کہ مردود و لعیں ہے کوئی
کچھ جو سمجھا ہے تو ہم زلف کے بہتر سمجھا
مجھ کو بیگم کا ستایا ہوا شوہر سمجھا
اپنے حالات پہ تم غور ذرا کر لو اگر
جلد کھل جائے گی پھر ساری حقیقت تم پر
میں نے اگنے نہ دیا ذہن میں نفرت کا شجر
تم پہ ڈالی ہے سدا میں نے محبت کی نظر
کہہ کے سرتاج تمہیں سر پہ بٹھایا میں نے
تم تو بیٹے تھے فقط باپ بنایا میں نے
میں نے سسرال میں ہر شخص کی عزت کی ہے
ساس سسرے نہیں نندوں کی بھی خدمت کی ہے
جیٹھ دیور سے جٹھانی سے محبت کی ہے
میں نے دن رات مشقت ہی مشقت کی ہے
پھر بھی ہونٹوں پہ کوئی شکوہ گلہ کچھ بھی نہیں
میرے دن رات کی محنت کا صلہ کچھ بھی نہیں
صبح دم بچوں کو تیار کراتی ہوں میں
ناشتہ سب کے لئے روز بناتی ہوں میں
باسی تم کھاتے نہیں تازہ پکاتی ہوں میں
چھوڑنے بچوں کو اسکول بھی جاتی ہوں میں
میں کہ انسان ہوں انسان نہیں جن کوئی
میری تقدیر میں چھٹی کا نہیں دن کوئی
وہ بھی دن تھے کہ دلہن بن کے میں جب آئی تھی
ساتھ میں جینے کی مرنے کی قسم کھائی تھی
پیار آنکھوں میں تھا آواز میں شہنائی تھی
کبھی محبوب تمہاری یہی ہرجائی تھی
اپنے گھر کے لیے یہ ہستی مٹا دی میں نے
زندگی راہ محبت میں لٹا دی میں نے
کس قدر تم پہ گراں ایک فقط ناری ہے
دال روٹی جسے دینا بھی تمہیں بھاری ہے
مجھ سے کب پیار ہے اولاد تمہیں پیاری ہے
تم ہی کہہ دو یہی آئین وفاداری ہے
گھر تو بیوی سے ہے بیوی جو نہیں گھر بھی نہیں
یہ ڈبل بیڈ یہ تکیہ نہیں چادر بھی نہیں
میں نے مانا کہ وہ پہلی سی جوانی نہ رہی
ہر شب وصل نئی کوئی کہانی نہ رہی
قلزم حسن میں پہلی سی روانی نہ رہی
اب میں پہلے کی طرح رات کی رانی نہ رہی
اپنی اولاد کی خاطر میں جواں ہوں اب بھی
جس کے قدموں میں ہے جنت وہی ماں ہوں اب بھی
تھے جو اجداد تمہارے نہ تھا ان کا یہ شعار
تم ہو بیوی سے پریشان وہ بیوی پہ نثار
تم کیا کرتے ہو ہر وقت یہ جو تم بیزار
تم ہو گفتار کے غازی وہ سراپا کردار
اپنے اجداد کا تم کو تو کوئی پاس نہیں
ہم تو بے حس ہیں مگر تم بھی تو حساس نہیں
نہیں جن مردوں کو پروائے نشیمن تم ہو
اچھی لگتی ہے جسے روز ہی الجھن تم ہو
بن گئے اپنی گرہستی کے جو دشمن تم ہو
ہو کے غیروں پہ فدا بیوی سے بد ظن تم ہو
پھر سے آباد نئی کوئی بھی وادی کر لو
کسی کل بسنی سے اب دوسری شادی کر لو

نشتر امروہوی

نظم

پھر چلی ہے ریل اسٹیشن سے لہراتی ہوئی
نیم شب کی خامشی میں زیر لب گاتی ہوئی
ڈگمگاتی جھومتی سیٹی بجاتی کھیلتی
وادی و کہسار کی ٹھنڈی ہوا کھاتی ہوئی
تیز جھونکوں میں وہ چھم چھم کا سرود دل نشیں
آندھیوں میں مینہ برسنے کی صدا آتی ہوئی
جیسے موجوں کا ترنم جیسے جل پریوں کے گیت
ایک اک لے میں ہزاروں زمزمے گاتی ہوئی
نونہالوں کو سناتی میٹھی میٹھی لوریاں
نازنینوں کو سنہرے خواب دکھلاتی ہوئی
ٹھوکریں کھا کر لچکتی گنگناتی جھومتی
سر خوشی میں گھنگروؤں کی تال پر گاتی ہوئی
ناز سے ہر موڑ پر کھاتی ہوئی سو پیچ و خم
اک دلہن اپنی ادا سے آپ شرماتی ہوئی
رات کی تاریکیوں میں جھلملاتی کانپتی
پٹریوں پر دور تک سیماب جھلکاتی ہوئی
جیسے آدھی رات کو نکلی ہو اک شاہی برات
شادیانوں کی صدا سے وجد میں آتی ہوئی
منتشر کر کے فضا میں جا بجا چنگاریاں
دامن موج ہوا میں پھول برساتی ہوئی
تیز تر ہوتی ہوئی منزل بمنزل دم بہ دم
رفتہ رفتہ اپنا اصلی روپ دکھلاتی ہوئی
سینۂ کہسار پر چڑھتی ہوئی بے اختیار
ایک ناگن جس طرح مستی میں لہراتی ہوئی
اک ستارہ ٹوٹ کر جیسے رواں ہو عرش سے
رفعت کہسار سے میدان میں آتی ہوئی
اک بگولے کی طرح بڑھتی ہوئی میدان میں
جنگلوں میں آندھیوں کا زور دکھلاتی ہوئی
رعشہ بر اندام کرتی انجم شب تاب کو
آشیاں میں طائر وحشی کو چونکاتی ہوئی
یاد آ جائے پرانے دیوتاؤں کا جلال
ان قیامت خیزیوں کے ساتھ بل کھاتی ہوئی
ایک رخش بے عناں کی برق رفتاری کے ساتھ
خندقوں کو پھاندتی ٹیلوں سے کتراتی ہوئی
مرغ زاروں میں دکھاتی جوئے شیریں کا خرام
وادیوں میں ابر کے مانند منڈلاتی ہوئی
اک پہاڑی پر دکھاتی آبشاروں کی جھلک
اک بیاباں میں چراغ طور دکھلاتی ہوئی
جستجو میں منزل مقصود کی دیوانہ وار
اپنا سر دھنتی فضا میں بال بکھراتی ہوئی
چھیڑتی اک وجد کے عالم میں ساز سرمدی
غیظ کے عالم میں منہ سے آگ برساتی ہوئی
رینگتی مڑتی مچلتی تلملاتی ہانپتی
اپنے دل کی آتش پنہاں کو بھڑکاتی ہوئی
خودبخود روٹھی ہوئی بپھری ہوئی بکھری ہوئی
شور پیہم سے دل گیتی کو دھڑکاتی ہوئی
پل پہ دریا کے دما دم کوندتی للکارتی
اپنی اس طوفان انگیزی پہ اتراتی ہوئی
پیش کرتی بیچ ندی میں چراغاں کا سماں
ساحلوں پر ریت کے ذروں کو چمکاتی ہوئی
منہ میں گھستی ہے سرنگوں کے یکایک دوڑ کر
دندناتی چیختی چنگھاڑتی گاتی ہوئی
آگے آگے جستجو آمیز نظریں ڈالتی
شب کے ہیبت ناک نظاروں سے گھبراتی ہوئی
ایک مجرم کی طرح سہمی ہوئی سمٹی ہوئی
ایک مفلس کی طرح سردی میں تھراتی ہوئی
تیزئی رفتار کے سکے جماتی جا بجا
دشت و در میں زندگی کی لہر دوڑاتی ہوئی
ڈال کر گزرے مناظر پر اندھیرے کا نقاب
اک نیا منظر نظر کے سامنے لاتی ہوئی
صفحۂ دل سے مٹاتی عہد ماضی کے نقوش
حال و مستقبل کے دل کش خواب دکھلاتی ہوئی
ڈالتی بے حس چٹانوں پر حقارت کی نظر
کوہ پر ہنستی فلک کو آنکھ دکھلاتی ہوئی
دامن تاریکئ شب کی اڑاتی دھجیاں
قصر ظلمت پر مسلسل تیر برساتی ہوئی
زد میں کوئی چیز آ جائے تو اس کو پیس کر
ارتقائے زندگی کے راز بتلاتی ہوئی
زعم میں پیشانی صحرا پہ ٹھوکر مارتی
پھر سبک رفتاریوں کے ناز دکھلاتی ہوئی
ایک سرکش فوج کی صورت علم کھولے ہوئے
ایک طوفانی گرج کے ساتھ ڈراتی ہوئی
ایک اک حرکت سے انداز بغاوت آشکار
عظمت انسانیت کے زمزمے گاتی ہوئی
ہر قدم پر توپ کی سی گھن گرج کے ساتھ ساتھ
گولیوں کی سنسناہٹ کی صدا آتی ہوئی
وہ ہوا میں سیکڑوں جنگی دہل بجتے ہوئے
وہ بگل کی جاں فزا آواز لہراتی ہوئی
الغرض اڑتی چلی جاتی ہے بے خوف و خطر
شاعر آتش نفس کا خون کھولاتی ہوئی

اسرار الحق مجاز

نظم

لا یعنی ہیں مرگ و زیست
بے معنی ہیں سب الفاظ
بے حس ہے مخلوق خدا
ہر انساں اک سایہ ہے
شادی غم اک دھوکا ہے
دل آنکھیں لب ہاتھ دماغ
ایک وبا کی زد میں ہیں
اپنے زوال کی حد میں ہیں

شہریار

نظم

بساط بے جنبش اور بے حس ہے
اپنے مہروں سے لا تعلق ہے
اس کو اس سے غرض نہیں ہے
کہ کون جیتا ہے
اور کس نے شکست کھائی

ضیا جالندھری

نظم

نہیں میں یوں نہیں کہتا
کہ یہ دنیا جہنم اور ہم سب اس کا ایندھن ہیں
نہیں یوں بھی نہیں کہتا
کہ ہم جنت کے باسی ہیں
سروں پر لاجوردی شامیانے اور پیروں میں
نرالے ذائقوں والے پھلوں کے پیڑ شیر و شہد کی نہریں مچلتی ہیں
مجھے تو بس یہی کچھ عام سی کچھ چھوٹی چھوٹی باتیں کہنی ہیں
مجھے کہنا ہے
اس دھرتی پہ گلشن بھی ہیں صحرا بھی
مہکتی نرم مٹی بھی
اور اس کی کوکھ میں خوابوں کا جادو آنے والی نت نئی فصلوں کی خوشبو بھی
چٹختی اور تپتی سخت بے حس خون کی پیاسی چٹانیں بھی
مجھے کہنا ہے
ہم سب اپنی دھرتی کی
برائی اور بھلائی سختیوں اور نرمیوں اچھائیوں کوتاہیوں ہر رنگ
ہر پہلو کے مظہر ہیں
ہمیں انسان کی مانند
خیر و شر محبت اور نفرت دشمنی اور دوستی کے ساتھ جینا ہے
اسی دھرتی کا شہد و سم
اسی دھرتی کے کھٹ مٹھ جانے پہچانے مزے کا جام پینا ہے
مجھے بس اتنا کہنا ہے
کہ ہم کو آسمانوں یا خلاؤں کی کوئی مخلوق مت سمجھو

بشر نواز

نظم

نہ انتظار نہ آہٹ نہ تمنا نہ امید
زندگی ہے کہ یوں بے حس ہوتی جاتی ہے

مینا کماری ناز

نظم

زمیں کے سینے سے اور آستین قاتل سے
گلوئے کشتہ سے بے حس زبان خنجر سے
صدا لپکتی ہے ہر سمت حرف حق کی طرح
مگر وہ کان جو بہرے ہیں سن نہیں سکتے
مگر وہ قلب جو سنگیں ہیں ہل نہیں سکتے
کہ ان میں اہل ہوس کی صدا کا سیسہ ہے
وہ جھکتے رہتے ہیں لب ہائے اقتدار کی سمت
وہ سنتے رہتے ہیں بس حکم حاکمان جہاں
طواف کرتے ہیں ارباب گیر و دار کے گرد

علی سردار جعفری

نظم

رات کتنی بے حس ہے
اس کی آستینوں میں
کتنے سانپ پلتے ہیں
تا سحر گناہوں کے
کیسے دور چلتے ہیں
رات جیسے گونگی ہے
دیکھتی ہے سارا کچھ
اور کچھ نہیں کہتی

حمیدہ شاہین

نظم

بے حس مرے احباب ہیں
کاش ان کو بتائے کوئی ہمدم
حاصل جو خوشی آج ہوئی ہے مرے دل کو
شاید وہ تبسم میں سمیٹی ہی نہ جاتی
ہونٹوں پہ تبسم بھی بہت خوب ہے لیکن
آنکھوں میں ترشح کی فضا اور ہی کچھ ہے
اس بزم میں رونے کا مزہ اور ہی کچھ ہے

قتیل شفائی

نظم

جو لٹ کر آئے ہیں ان کو صبر آتے آتے آئے گا
لیکن اس بے حس دنیا میں احساس حقیقت کون کرے

ابوالفطرت میر زیدی

نظم

ادھ پھٹے پوسٹروں کے پیراہن
آہنی بلڈنگوں کے جسموں پر
کتنے دل کش دکھائی دیتے ہیں
بس کی بے حس نشستوں پر بیٹھی
دن کے بازار سے خریدی ہوئی
آرزو غم امید محرومی
نیند کی گولیاں گلاب کے پھول
کیلے امردو سنترے چاول
پینٹ گڑیا شمیز چوہے دان
ایک اک شے کا کر رہی ہے حساب
عہد حاضر کی دل ربا مخلوق!

شہریار

نظم

لمحہ لمحہ الجھتے رہے
سچے جھوٹے سپنوں سے
بڑے شہر کا خواب لیے، ہر پل نیا عذاب لیے
بھاگتے رہے تمام عمر، پیش نظر سراب لیے
لا حاصلی کا خواب لیے
گھوڑے کے آگے گھاس ہو جیسے
ہر سانس نئی آس ہو جیسے
جینے کی امنگ میں
مرتے رہے، مرتے رہے
جنت پاؤں کی چھوڑ کے، ٹھنڈک گاؤں کی چھوڑ کے
روح جلتی رہی تمام عمر، بدن کی چتا میں
زندگی عذاب لیے
بڑے شہر کا خواب لیے
جلتے رہے تپتے رہے، بڑے بننے کے فراق میں
شارٹ کٹ لیتے رہے
راتوں رات، امیر بننے کی تاک میں
ہم چلتے رہے، چلتے رہے
بڑے شہر کی چاہ میں، جانے کیسے کیسے گناہ کیے
یہاں تک کہ آنکھیں ہماری پتھرا گئیں، پاؤں ہمارے شل ہوئے
انسانیت ہم سے چھن گئی، ہم درندوں کے مثل ہوئے
خوشیوں کی تلاش میں، ہم جیتے جی لاش ہوئے
اس قدر بے حس و بد حواس ہوئے، ہم خود سے ہی اداس ہوئے
بڑا شہر بڑا شہر، بڑا شہر بڑا شہر
بے ایمانیوں کی ڈگر، بد عنوانیوں کا نگر
سچ ہے تیری چاہ میں، جانے کتنے تباہ ہوئے
سارا گاؤں اپنوں سے خالی ہو گیا
ماتمی فضا میں، اب ہر طرف حسرت و یاس ہے
پھر بھی بڑے شہر کی پیاس ہے کہ کبھی بجھتی نہیں
ایک خلقت ہے کہ کبھی رکتی نہیں!
ایک ہجرت ہے کہ کبھی رکتی نہیں!
زندگی کسی سے ہار جائے، یہ کبھی ممکن نہیں
زندگی کسی سے مات کھائے، یہ بھی اب ممکن نہیں
زندگی رکتی نہیں!!
زندگی جھکتی نہیں!!

پرویز شہریار

نظم

باہر ایک آواز ہے
تمام آوازوں سے مختلف
فضا کی مردہ شریانوں میں
ایک تازہ سچائی بھر دینے والی آواز
بے حس مکانوں منڈلاتی ہوئی
میرے دروازے پر دستک دیتی ہوئی
کبھی مدھم کبھی تیز
ایک بے چین دستک
مجھ سے کچھ کہنا چاہتی ہے
مجھ تک پہنچانا چاہتی ہے
تھوڑے ہی فاصلے پر کھڑے ایک موسم کی بات
شاید میری ہی کوئی بات
لیکن میں دروازے تک کیسے جاؤں
اسے کیسے کھولوں
باہر کھڑے موسم کو اندر کیسے لاؤں
میں تو عرصہ ہوا
اپنے ہاتھ پاؤں
بطور ضمانت رکھ چکا ہوں
کس جرم میں
کس کے پاس رکھ چکا ہوں
بالکل بھول چکا ہوں

جاوید شاہین

نظم

پتھروں کی اسی انجمن کا مغنی ہوں میں
اور بے درد بے حس ستم گار پتھر سنیں گے کبھی

وحید اختر

نظم

تو ایسا کیوں نہیں کہتے
کہ میں سپنوں کے اس ارژنگ کو
سورج کی جلتی بھٹیوں میں پھینک دوں سب کچھ جلا ڈالوں
کسی لنگر شکستہ ناؤ کی مانند دھارے پر رواں ہو جاؤں
ہر اک موج کے ہم راہ ڈوبوں اور ابھر آؤں
تو ایسا کیوں نہ کر پائے
وہ جو کچھ میرا حصہ تھا
مرا ورثہ تھا
مجھ سے چھین لیتے اور مجھے جنگل کے بے حس پیڑ کی مانند اگا دیتے
جو ہر موسم کے ہم راہ اپنا پیراہن بدلتا ہے
ہوا کے جھونکے دیتے ہیں اجازت جس طرف بڑھنے کی بڑھتا ہے
زمیں کی نرمیوں کو دیکھ کر اپنی جڑیں پیوست کرتا ہے

بشر نواز

نظم

تم مجھ پر وارد ہوئے
اک ستم گر کی طرح
مئی کی وہ شام تھی
مجھے آج بھی یاد ہے
سفید رنگ کی شرٹ پہنے
ہاتھ میں اخبار رول کئے
تم پنڈال کی کرسی پر براجمان تھے
پہلی نظر میں تم عام سے تھے
جیسے تم عاشق ہو اور میں محبوب
میری نظر کا لمس تمہیں خاصا خاص کر گیا
دیکھو
کہانی نے پلٹا کھایا
تم محب بن گئے اور میں دیوانی کہلائی
میرے آتے ہی تم سمٹ گئے
تب سے آج تک ویسے ہی میری روح میں
ایک کونپل کی طرح سمٹے بیٹھے ہو
میں منتظر ہوں
کب احساس کا نازک پرندہ انگڑائی لے
تم اپنی بانہیں پھیلائے
اسی پنڈال کی اسی کرسی پر
گہری خاموشی سے شور کرتے ہوئے
میری طرف بڑھو
کہ دیکھنے والوں کو پاکیزہ محبت
رقص کرتی دکھائی دے
جس میں نہ نمائش ہو نہ ہوس
بس اک سرور ہو
اور میں
میں زمین کے اسی بے بس بے حس ٹکڑے پر آنکھیں موندے تمہیں دیکھتی رہوں
پچھتاوے کا جال آج تک مجھے لپیٹ میں جکڑے ہے
میں کسی اسیر زادی کی طرح
اپنی قید کو تقدیر کا لکھا جان کر خوش ہوں
میں اظہار و اقرار سے بری
اپنی خواہش پر حیا کی چادر ڈالے
محبت کا طوق گلے میں لٹکائے
خموشی کو لبوں پر سجائے
نا امیدی کو شکست دیتے ہوئے
گونگی بہری اندھی محبت پر اکتفا کئے ہوئے ہوں
کہ اسیر خواہش و فرمائش کا حق نہیں رکھتے

سائرہ اقبال

نظم

امن کی چادر میں
بارود اور مہلک ہتھیاروں کی گٹھڑی باندھ کے
دنیا بھر میں بھیجنے والے بے حس لوگو
اپنی سازش گاہ سے باہر جھانک کے دیکھو
چہرے پر جانی پہچانی بے مقصد سی کچھ تحریریں
تھکے ہوئے پیروں میں بھاگتے رستوں کی ساکت زنجیریں
جیسے آزادی کے گھر میں قید ہوں دو ننگی تصویریں
خشک لبوں پر پیاس بھری تلخی کے سارے ذائقے لکھے
خالی پیٹ کو آنکھوں کی دہلیز پہ رکھے
سامنے ایک سڑک کے موڑ پہ
دو زندہ سائے روتے ہیں
چہرے مہرے رنگ اور نسل میں
بالکل تم جیسے ہوتے ہیں
میلے جسم پر اندر کا احوال سجائے
ہاتھوں کو کشکول بنائے
آنے جانے والوں سے کہتے رہتے ہیں
بابا کوئی کام کرا لو
اور اس کے بدلے میں ہم کو
روٹی لا دو
بھوک مٹا دو

سلیم کوثر

نظم

میں اپنی شاعری
اک ڈایری میں نوٹ کرتا تھا
کوئی احساس مجھ میں نظم بھرتا
یا کوئی مصرعہ اترتا تھا
تو سب سے پہلے مجھ کو
نوٹ بک درکار ہوتی تھی
جہاں کاغذ کی حدت سے
قلم کی روشنائی کی حرارت سے
غزل تیار ہوتی تھی
بنا اس دھیمی دھیمی آنچ کے
میرے لیے ہر نظم ہی دشوار ہوتی تھی
پھر اک دن مجھ کو چاچا زاد بھائی نے یہ بتلایا
وہ خود بھی نوجواں اردو کا شاعر ہے
وہ اپنی شاعری سیل فون میں محفوظ کرتا ہے
سو جب چاہے اسے پڑھتا ہے
اوروں سے شیئر کرکے انہیں محظوظ کرتا ہے
اسے بجلی کے آنے جانے سے
کچھ فرق پڑتا ہی نہیں
نہ ہی اسے دن رات سے کچھ لینا دینا ہے
اسے جب شاعری کرنی ہو
تو کاغذ قلم کی کھوج میں
لمحہ تلک ضائع نہیں کرتا
جہاں وہ شعر اپنا نوٹ کرتا ہے
اندھیرا بھی وہاں سایہ نہیں کرتا
سو اس کی بات سن کر
میں نے اپنی ڈائری سنبھال لی
اور اپنے موبائل میں مصرعہ لکھتے لکھتے
دوست کی اک کال لی
پھر کال گھنٹوں تک چلی
بیکار کی خواہش وہ مصرعہ پورا کرنے کی
میرے اندر پلی
لیکن وہ پھر جاتی رہی
پھر یوں ہوا جب بھی کوئی الہام
میرے در کو کھٹکاتا رہا
جب کیفیت کوئی میرے احساس تک آتی رہی
میں اس سمے
سیل فون کو ڈھونڈا کیا
لیکن وہاں احساس کو اک ربط میں
تحریر کر پانے سے پہلے
بیسوں بے ربط بے حس نوٹی فیکیشن
میری اسکرین پر ظاہر ہوئے
اور ہم ہمیشہ کے لیے کچھ لکھنے سے قاصر ہوئے
گم ہو گئے ان بے حسوں کی فوج میں
آئی نہ میری شاعری پھر موج میں
اب سوچتا ہوں کیا پرانی ڈایری بہتر نہیں
دیوان میرا فون کے اندر نہیں
ٹچ اسکرین کے اس پار ہے
شاید میرے الفاظ کی یک بستگی کو
صرف کاغذ کی تپش درکار ہے

بلال اسود

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے