Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "behis"

Nazm MATCHES FOR "behis"

Nazm

aadat

saa.ns lenaa bhii kaisii aadat hai
jiye jaanaa bhii kyaa rivaayat hai
ko.ii aahaT nahii.n badan me.n kahii.n
ko.ii saaya nahii.n hai aa.ankho.n me.n
paa.nv behis hai.n chalte jaate hai.n
ik safar hai jo bahtaa rahtaa hai
kitne barso.n se kitnii sadiyo.n se
jiye jaate hai.n jiye jaate hai.n

Gulzar
Nazm

jugnu

rukii rukii sii safe.n malgajii ghaTaa.o.n kii
utaar par hai sar-e-sahn raqs piipal kaa
vo kuchh nahii.n hai ab ik jumbish-e-KHafii ke sivaa
KHud apnii kaifiyat-e-niil-guu.n me.n har lahza
ye shaam Duubtii jaatii hai chhuptii jaatii hai
hijaab-e-vaqt sire se hai be-his-o-harakat
rukii rukii dil-e-fitrat kii dha.Dkane.n yak-laKHt
ye ra.ng-e-shaam ki gardish hii aasmaa.n me.n nahii.n
bas ek vaqfa-e-taariik, lamha-e-shahlaa
samaa me.n jumbish-e-mub.ham sii kuchh hu.ii fauran
tulii ghaTaa ke tale bhiige bhiige patto.n se
harii harii ka.ii chi.ngaariyaa.n sii phuuT pa.Dii.n
ki jaise khultii jhapaktii ho.n be-shumaar aa.nkhe.n
ajab ye aa.nkh-micholii thii nuur-o-zulmat kii
suhaanii narm lave.n dete an-ginat jugnuu
ghanii siyaah KHunuk pattiyo.n ke jhurmuT se
misaal-e-chaadar-e-shab-taab jagmagaane lage
ki thartharaate hu.e aa.nsu.o.n se saaGar-e-shaam
chhalak chhalak pa.De jaise baGair saan gumaan
butuun-e-shaam me.n in zinda qumqumo.n kii damak
kisii kii so.ii hu.ii yaad ko jagaatii thii
vo be-panaah ghaTaa vo bharii bharii barsaat
vo scene dekh ke aa.nkhe.n mirii bhar aatii thii.n
mirii hayaat ne dekhii hai.n biis barsaate.n
mire janam hii ke din mar ga.ii thii maa.n merii
vo maa.n ki shakl bhii jis maa.n kii mai.n na dekh sakaa
jo aa.nkh bhar ke mujhe dekh bhii sakii na vo maa.n
mai.n vo pisar huu.n jo samjhaa nahii.n ki maa.n kyaa hai
mujhe khilaa.iyo.n aur daa.iyo.n ne paalaa thaa
vo mujh se kahtii thii.n jab ghir ke aatii thii barsaat
jab aasmaan me.n har suu ghaTaa.e.n chhaatii thii.n
ba-vaqt-e-shaam jab u.Dte the har taraf jugnuu
diye dikhaate hai.n ye bhuulii-bhaTkii ruuho.n ko
maza bhii aataa thaa mujh ko kuchh un kii baato.n me.n
mai.n un kii baato.n me.n rah rah ke kho bhii jaataa thaa
par is ke saath hii dil me.n kasak sii hotii thii
kabhii kabhii ye kasak huuk ban ke uThtii thii
yatiim dil ko mire ye KHayaal hotaa thaa!
ye shaam mujh ko banaa detii kaash ik jugnuu
to maa.n kii bhaTkii hu.ii ruuh ko dikhaataa raah
kahaa.n kahaa.n vo bichaarii bhaTak rahii hogii
kahaa.n kahaa.n mirii KHaatir bhaTak rahii hogii
ye soch kar mirii haalat ajiib ho jaatii
palak kii oT me.n jugnuu chamakne lagte the
kabhii kabhii to mirii hichkiyaa.n sii ba.ndh jaatii.n
ki maa.n ke paas kisii tarah mai.n pahu.nch jaa.uu.n
aur us ko raah dikhaataa hu.aa mai.n ghar laa.uu.n
dikhaa.uu.n apne khilaune dikhaa.uu.n apnii kitaab
kahuu.n ki pa.Dh ke sunaa to mirii kitaab mujhe
phir is ke baa'd dikhaa.uu.n use mai.n vo copy
ki te.Dhii-me.Dhii lakiire.n banii thii.n kuchh jis me.n
ye harf the jinhe.n mai.n ne likkhaa thaa pahle-pahal
aur us ko raah dikhaataa hu.aa mai.n ghar laa.uu.n
dikhaa.uu.n phir use aa.ngan me.n vo gulaab kii bel
sunaa hai jis ko usii ne kabhii lagaayaa thaa
ye jab ki baat hai jab merii umr hii kyaa thii
nazar se guzrii thii.n kal chaar paa.nch barsaate.n

Firaq Gorakhpuri
Nazm

jawab-e-shikwa

aah jab dil se nikaltii hai asar rakhtii hai
gulshan-e-ziist jalaane ko sharar rakhtii hai
top talvaar na ye teG-o-tabar rakhtii hai
bint-e-havvaa kii tarah tiir-e-nazar rakhtii hai
itnaa pur-soz hu.aa naala-e-saffaak miraa
kar gayaa dil pe asar shikva-e-bebaak miraa
ye kahaa sun ke sasur ne ki kahii.n hai ko.ii
saas chupke se ye bolii.n ki yahii.n hai ko.ii
saaliyaa.n kahne lagii.n qurb-o-qarii.n hai ko.ii
saale ye bole ki marduud-o-la.ii.n hai ko.ii
kuchh jo samjhaa hai to ham-zulf ke behtar samjhaa
mujh ko begam kaa sataayaa hu.aa shauhar samjhaa
apne haalaat pe tum Gaur zaraa kar lo agar
jald khul jaa.egii phir saarii haqiiqat tum par
mai.n ne ugne na diyaa zehn me.n nafrat kaa shajar
tum pe Daalii hai sadaa mai.n ne mohabbat kii nazar
kah ke sartaaj tumhe.n sar pe biThaayaa mai.n ne
tum to beTe the faqat baap banaayaa mai.n ne
mai.n ne sasuraal me.n har shaKHs kii izzat kii hai
saas sasure nahii.n nando.n kii bhii KHidmat kii hai
jeTh devar se jeThaanii se mohabbat kii hai
mai.n ne din raat mashaqqat hii mashaqqat kii hai
phir bhii ho.nTo.n pe ko.ii shikva gila kuchh bhii nahii.n
mere din raat kii mehnat kaa sila kuchh bhii nahii.n
sub.h-dam bachcho.n ko tayyaar karaatii huu.n mai.n
naashta sab ke liye roz banaatii huu.n mai.n
baasii tum khaate nahii.n taaza pakaatii huu.n mai.n
chho.Dne bachcho.n ko school bhii jaatii huu.n mai.n
mai.n ki insaan huu.n insaan nahii.n jin ko.ii
merii taqdiir me.n chhuTTii kaa nahii.n din ko.ii
vo bhii din the ki dulhan ban ke mai.n jab aa.ii thii
saath me.n jiine kii marne kii qasam khaa.ii thii
pyaar aa.ankho.n me.n thaa aavaaz me.n shahnaa.ii thii
kabhii mahbuub tumhaarii yahii harjaa.ii thii
apne ghar ke liye ye hastii miTaa dii mai.n ne
zindagii raah-e-mohabbat me.n luTaa dii mai.n ne
kis qadar tum pe giraa.n ek faqat naarii hai
daal roTii jise denaa bhii tumhe.n bhaarii hai
mujh se kab pyaar hai aulaad tumhe.n pyaarii hai
tum hii kah do yahii aa.iin-e-vafaadaarii hai
ghar to biivii se hai biivii jo nahii.n ghar bhii nahii.n
ye double bed ye takiya nahii.n chaadar bhii nahii.n
mai.n ne maanaa ki vo pahlii sii javaanii na rahii
har shab-e-vasl na.ii ko.ii kahaanii na rahii
qulzum-e-husn me.n pahlii sii ravaanii na rahii
ab mai.n pahle kii tarah raat kii raanii na rahii
apnii aulaad kii KHaatir mai.n javaa.n huu.n ab bhii
jis ke qadmo.n me.n hai jannat vahii maa.n huu.n ab bhii
the jo ajdaad tumhaare na thaa un kaa ye shi.aar
tum ho biivii se pareshaan vo biivii pe nisaar
tum kyaa karte ho har vaqt ye jo tum bezaar
tum ho guftaar ke Gaazii vo saraapaa kirdaar
apne ajdaad kaa tum ko to ko.ii paas nahii.n
ham to behis hai.n magar tum bhii to hassaas nahii.n
nahii.n jin mardo.n ko parvaa-e-nasheman tum ho
achchhii lagtii hai jise roz hii uljhan tum ho
ban ga.e apnii grihastii ke jo dushman tum ho
ho ke Gairo.n pe fidaa biivii se bad-zan tum ho
phir se aabaad na.ii ko.ii bhii vaadii kar lo
kisii kalbisnii se ab duusrii shaadii kar lo

Nashtar Amrohvi
Nazm

raat aur rail

phir chalii hai rail station se lahraatii hu.ii
niim-shab kii KHaamushii me.n zer-e-lab gaatii hu.ii
Dagmagaatii jhuumtii siiTii bajaatii kheltii
vaadii o kohsaar kii ThanDii havaa khaatii hu.ii
tez jho.nko.n me.n vo chham chham kaa suruud-e-dil-nashii.n
aa.ndhiyo.n me.n me.nh barasne kii sadaa aatii hu.ii
jaise maujo.n kaa tarannum jaise jal-pariyo.n ke giit
ek ik lai me.n hazaaro.n zamzame gaatii hu.ii
naunihaalo.n ko sunaatii miiThii miiThii loriyaa.n
naazniino.n ko sunahre KHvaab dikhlaatii hu.ii
Thokare.n khaa kar lachaktii gungunaatii jhuumtii
sarKHushii me.n ghu.ngru.o.n kii taal par gaatii hu.ii
naaz se har mo.D par khaatii hu.ii sau pech-o-KHam
ik dulhan apnii adaa se aap sharmaatii hu.ii
raat kii taariikiyo.n me.n jhilmilaatii kaa.nptii
pTriyo.n par duur tak siimaab jhalkaatii hu.ii
jaise aadhii raat ko niklii ho ik shaahii baraat
shaadyaano.n kii sadaa se vajd me.n aatii hu.ii
muntashir kar ke fazaa me.n jaa-ba-jaa chi.ngaariyaa.n
daaman-e-mauj-e-havaa me.n phuul barsaatii hu.ii
tez-tar hotii hu.ii manzil-ba-manzil dam-ba-dam
rafta rafta apnaa aslii ruup dikhlaatii hu.ii
siina-e-kohsaar par cha.Dhtii hu.ii be-iKHtiyaar
ek naagan jis tarah mastii me.n lahraatii hu.ii
ik sitaara TuuT kar jaise ravaa.n ho arsh se
rif.at-e-kohsaar se maidaan me.n aatii hu.ii
ik baguule kii tarah ba.Dhtii hu.ii maidaan me.n
ja.ngalo.n me.n aa.ndhiyo.n kaa zor dikhlaatii hu.ii
raasa-bar-andaam kartii anjum-e-shab-taab ko
aashiyaa.n me.n taa.ir-e-vahshii ko chau.nkaatii hu.ii
yaad aa jaa.e puraane devtaa.o.n kaa jalaal
un qayaamat-KHeziyo.n ke saath bal khaatii hu.ii
ek raKHsh-e-be-inaa.n kii barq-raftaarii ke saath
KHandaqo.n ko phaa.ndtii Tiilo.n se katraatii hu.ii
murG-zaaro.n me.n dikhaatii juu-e-shiirii.n kaa KHiraam
vaadiyo.n me.n abr ke maanind ma.nDlaatii hu.ii
ik pahaa.Dii par dikhaatii aabshaaro.n kii jhalak
ik bayaabaa.n me.n charaaG-e-tuur dikhlaatii hu.ii
justujuu me.n manzil-e-maqsuud kii diivaana-vaar
apnaa sar dhuntii fazaa me.n baal bikhraatii hu.ii
chhe.Dtii ik vajd ke aalam me.n saaz-e-sarmadii
Gaiz ke aalam me.n mu.nh se aag barsaatii hu.ii
re.ngtii mu.Dtii machaltii tilmilaatii haa.nptii
apne dil kii aatish pinhaa.n ko bha.Dkaatii hu.ii
KHud-ba-KHud ruuThii hu.ii biphrii hu.ii bikhrii hu.ii
shor-e-paiham se dil-e-giitii ko dha.Dkaatii hu.ii
pul pe dariyaa ke damaa-dam kau.ndtii lalkaartii
apnii is tuufan-a.ngezii pe itraatii hu.ii
pesh kartii biich naddii me.n charaaGaa.n kaa samaa.n
saahilo.n par ret ke zarro.n ko chamkaatii hu.ii
mu.nh me.n ghustii hai sura.ngo.n ke yakaayak dau.D kar
dandanaatii chiiKHtii chi.nghaa.Dtii gaatii hu.ii
aage aage justujuu-aamez nazre.n Daaltii
shab ke haibatnaak nazzaaro.n se ghabraatii hu.ii
ek mujrim kii tarah sahmii hu.ii simTii hu.ii
ek muflis kii tarah sardii me.n tharraatii hu.ii
Tez-e-raftaar ke sikke jamaatii jaa-ba-jaa
dasht o dar me.n zindagii kii lahar dau.Daatii hu.ii
Daal kar guzre manaazir par andhere kaa naqaab
ik nayaa manzar nazar ke saamne laatii hu.ii
safha-e-dil se miTaatii ahd-e-maazii ke nuquush
haal o mustaqbil ke dilkash KHvaab dikhlaatii hu.ii
Daaltii be-his chaTaano.n par haqaarat kii nazar
koh par ha.nstii falak ko aa.nkh dikhlaatii hu.ii
daaman-e-taariki-e-shab kii u.Daatii dhajjiyaa.n
qasr-e-zulmat par musalsal tiir barsaatii hu.ii
zad me.n ko.ii chiiz aa jaa.e to us ko piis kar
irtiqaa-e-zindagii ke raaz batlaatii hu.ii
zo.am me.n peshaani-e-sahraa pe Thokar maartii
phir subuk-raftaariyo.n ke naaz dikhlaatii hu.ii
ek sarkash fauj kii suurat alam khole hu.e
ek tuufaanii garaj ke saath Daraatii hu.ii
ek ik harkat se andaaz-e-baGaavat aashkaar
azmat-e-insaaiyat ke zamzame gaatii hu.ii
har qadam par top kii sii ghan-garaj ke saath saath
goliyo.n kii sansanaahaT kii sadaa aatii hu.ii
vo havaa me.n saika.Do.n ja.ngii duhal bajte hu.e
vo bigul kii jaa.n-fazaa.n aavaaz lahraatii hu.ii
al-Garaz u.Dtii chalii jaatii hai be-KHauf-o-KHatar
shaa.ir-e-aatish-nafas kaa KHuun khaulaatii hu.ii

Asrarul Haq Majaz
Nazm

zawal ki had

laa-yaanii hai.n marg o ziist
be-ma.anii hai.n sab alfaaz
be-his hai maKHluuq-e-KHudaa
har insaa.n ik saaya hai
shaadii Gam ik dhokaa hai
dil aa.nkhe.n lab haath dimaaG
ek vabaa kii zad me.n hai.n
apne zavaal kii had me.n hai.n

Shahryar
Nazm

hum

bisaat be-jumbish aur be-his hai
apne mohro.n se laa-ta.alluq hai
us ko is se Garaz nahii.n hai
ki kaun jiitaa hai
aur kis ne shikast khaa.ii

Zia Jalandhari
Nazm

mujhe kahna hai

nahii.n mai.n yuu.n nahii.n kahtaa
ki ye duniyaa jahannam aur ham sab is kaa ii.ndhan hai.n
nahii.n yuu.n bhii nahii.n kahtaa
ki ham jannat ke baasii hai.n
saro.n par laa-javrdii shaamiyaane aur pairo.n me.n
niraale zaa.eqo.n vaale phalo.n ke pe.D shiir o shahad kii nahre.n machaltii hai.n
mujhe to bas yahii kuchh aam sii kuchh chhoTii chhoTii baate.n kahnii hai.n
mujhe kahnaa hai
is dhartii pe gulshan bhii hai.n sahraa bhii
mahaktii narm miTTii bhii
aur us kii kokh me.n KHvaabo.n kaa jaaduu aane vaalii nit na.ii faslo.n kii KHushbuu bhii
chaTaKHtii aur taptii saKHt be-his KHuun kii pyaasii chaTaane.n bhii
mujhe kahnaa hai
ham sab apnii dhartii kii
buraa.ii aur bhalaa.ii saKHtiyo.n aur narmiyo.n achchhaa.iyo.n kotaahiyo.n har ra.ng
har pahluu ke maz.har hai.n
hame.n insaan kii maanind
KHair o shar mohabbat aur nafrat dushmanii aur dostii ke saath jiinaa hai
isii dhartii kaa shahad o sam
isii dhartii ke khaT-miTh jaane pahchaane maze kaa jaam piinaa hai
mujhe bas itnaa kahnaa hai
ki ham ko aasmaano.n yaa KHalaa.o.n kii ko.ii maKHluuq mat samjho

Bashar Nawaz
Nazm

din guzarta nazar nahin aata

na intizaar na aahaT na tamannaa na umiid
zindagii hai ki yuu.n behis hotii jaatii hai

Meena Kumari Naz
Nazm

lahu pukarta hai

zamii.n ke siine se aur aastiin-e-qaatil se
guluu-e-kushta se behis zabaan-e-KHanjar se
sadaa lapaktii hai har samt harf-e-haq kii tarah
magar vo kaan jo bahre hai.n sun nahii.n sakte
magar vo qalb jo sa.ngii.n hai.n hil nahii.n sakte
ki un me.n ahl-e-havas kii sadaa kaa siisa hai
vo jhukte rahte hai.n lab-haa-e-iqtidaar kii samt
vo sunte rahte hai.n bas hukm-e-haakimaan-e-jahaa.n
tavaaf karte hai.n arbaab-e-giir-o-daar ke gird

Ali Sardar Jafri
Nazm

raat

raat kitnii behis hai
us kii aastiino.n me.n
kitne saa.np palte hai.n
taa-sahar gunaaho.n ke
kaise daur chalte hai.n
raat jaise guu.ngii hai
dekhtii hai saaraa kuchh
aur kuchh nahii.n kahtii

Hamida Shaheen
Nazm

girya-e-mast

behis mire ahbaab hai.n
kaash un ko bataa.e ko.ii hamdam
haasil jo KHushii aaj hu.ii hai mire dil ko
shaayad vo tabassum me.n sameTii hii na jaatii
ho.nTo.n pe tabassum bhii bahut KHuub hai lekin
aa.nkho.n me.n tarashshoh kii fazaa aur hii kuchh hai
us bazm me.n rone kaa maza aur hii kuchh hai

Qateel Shifai
Nazm

baghawat kaun kare

jo luT kar aa.e hai.n un ko sabr aate aate aa.egaa
lekin is behis duniyaa me.n ehsaas-e-haqiiqat kaun kare

Abul Fitrat Meer Zaidi
Nazm

ahd-e-hazir ki dil-ruba maKHluq

adh-phaTe posTaro.n ke pairaahan
aahanii bilDigo.n ke jismo.n par
kitne dilkash dikhaa.ii dete hai.n
bas kii behis nashisto.n par baiThii
din ke baazaar se KHariidii hu.ii
aarzuu Gam umiid mahruumii
nii.nd kii goliyaa.n gulaab ke phuul
kele amruud santare chaaval
painT gu.Diyaa shamiiz chuuhe-daan
ek ik shai kaa kar rahii hai hisaab
ahd-e-haazir kii dil-rubaa maKHluuq!

Shahryar
Nazm

baDe shahar ka KHwab

lamha lamha ulajhte rahe
sachche jhuuTe sapno.n se
ba.De shahar kaa KHvaab liye, har pal nayaa azaab liye
bhaagte rahe tamaam umr, pesh-e-nazar saraab liye
laa-haasilii kaa KHvaab liye
gho.De ke aage ghaas ho jaise
har saa.ns na.ii aas ho jaise
jiine kii uma.ng me.n
marte rahe, marte rahe
jannat paa.nv kii chho.D ke, ThanDak gaa.nv kii chho.D ke
ruuh jaltii rahii tamaam umr, badan kii chitaa me.n
zindagii azaab liye
ba.De shahar kaa KHvaab liye
jalte rahe, tapte rahe, ba.De ban.ne ke firaaq me.n
shortcut lete rahe
raato.n-raat, amiir ban.ne kii taak me.n
ham chalte rahe, chalte rahe
ba.De shahar kii chaah me.n, jaane kaise kaise gunaah kiye
yahaa.n tak ki aa.nkhe.n hamaarii pathraa ga.ii.n, paa.nv hamaare shal hu.e
insaaniyat ham se chhin ga.ii, ham darindo.n ke misl hu.e
KHushiyo.n kii talaash me.n, ham jiite-jii laash hu.e
is qadar behis-o-bad-havaas hu.e, ham KHud se hii udaas hu.e
ba.Daa shahr ba.Daa shahr, ba.Daa shahr ba.Daa shahr
be-iimaaniyo.n kii Dagar, bad-unvaaniyo.n kaa nagar
sach hai terii chaah me.n, jaane kitne tabaah hu.e
saaraa gaa.nv apno.n se KHaalii ho gayaa
maatamii fazaa me.n, ab har taraf hasrat-o-yaas hai
phir bhii ba.De shahar kii pyaas hai ki kabhii bujhtii nahii.n
ek KHilqat hai ki kabhii ruktii nahii.n!
ek hijrat hai ki kabhii ruktii nahii.n!
zindagii kisii se haar jaa.e, ye kabhii mumkin nahii.n
zindagii kisii se maat khaa.e, ye bhii ab mumkin nahii.n
zindagii ruktii nahii.n!!
zindagii jhuktii nahii.n!!

Perwaiz Shaharyar
Nazm

meri hi koi baat

baahar ek aavaaz hai
tamaam aavaazo.n se muKHtalif
fazaa kii murda shiryaano.n me.n
ek taaza sachchaa.ii bhar dene vaalii aavaaz
be-his makaano.n ma.nDlaatii hu.ii
mere darvaaze par dastak detii hu.ii
kabhii maddham kabhii tez
ek bechain dastak
mujh se kuchh kahnaa chaahtii hai
mujh tak pahu.nchaanaa chaahtii hai
tho.De hii faasle par kha.De ek mausam kii baat
shaayad merii hii ko.ii baat
lekin mai.n darvaaze tak kaise jaa.uu.n
use kaise kholuu.n
baahar kha.De mausam ko andar kaise laa.uu.n
mai.n to arsa hu.aa
apne haath paa.nv
ba-taur-e-zamaanat rakh chukaa huu.n
kis jurm me.n
kis ke paas rakh chukaa huu.n
bilkul bhuul chukaa huu.n

Javed Shaheen
Nazm

pattharon ka mughanni

pattharo.n kii isii anjuman kaa muGannii huu.n mai.n
aur bedard be-his sitamgaar patthar sune.nge kabhii

Waheed Akhtar
Nazm

to aisa kyun nahin karte

to aisaa kyuu.n nahii.n kahte
ki mai.n sapno.n ke is arza.ng ko
suuraj kii jaltii bhaTTiyo.n me.n phe.nk duu.n sab kuchh jalaa Daaluu.n
kisii la.ngar-shikasta naav kii maanind dhaare par ravaa.n ho jaa.uu.n
har ik mauj ke hamraah Duubuu.n aur ubhar aa.uu.n
to aisaa kyuu.n na kar paa.e
vo jo kuchh meraa hissa thaa
miraa virsa thaa
mujh se chhiin lete aur mujhe jangal ke behis pe.D kii maanind ugaa dete
jo har mausam ke hamraah apnaa pairaahan badaltaa hai
havaa ke jho.nke dete hai.n ijaazat jis taraf ba.Dhne kii ba.Dhtaa hai
zamii.n kii narmiyo.n ko dekh kar apnii ja.De.n paivast kartaa hai

Bashar Nawaz
Nazm

sitam-gar

tum mujh par vaarid hu.e
ik sitamgar kii tarah
may kii vo shaam thii
mujhe aaj bhii yaad hai
safed rang kii shirt pahne
haath me.n aKHbaar rol kiye
tum pinDaal kii kursii par biraajmaan the
pahlii nazar me.n tum aam se the
jaise tum aashiq ho aur mai.n mahbuub
merii nazar kaa lams tumhe.n KHaasaa KHaas kar gayaa
dekho
kahaanii ne palTaa khaayaa
tum muhib ban ga.e aur mai.n diivaanii kahlaa.ii
mere aate hii tum simaT ga.e
tab se aaj tak vaise hii merii ruuh me.n
ek ko.npal kii tarah simTe baiThe ho
mai.n muntazir huu.n
kab ehsaas kaa naazuk parinda a.ng.Daa.ii le
tum apnii baa.nhe.n phailaa.e
isii pinDaal kii isii kursii par
gahrii KHaamoshii se shor karte hu.e
merii taraf ba.Dho
ki dekhne vaalo.n ko paakiiza mohabbat
raqs kartii dikhaa.ii de
jis me.n na numaa.ish ho na havas
bas ik suruur ho
aur mai.n
mai.n zamiin ke isii be-bas be-his Tuk.De par aa.nkhe.n muu.nde tumhe.n dekhtii rahuu.n
pachhtaave kaa jaal aaj tak mujhe lapeT me.n jak.De hai
mai.n kisii asiir-zaadii kii tarah
apnii qaid ko taqdiir kaa likhaa jaan kar KHush huu.n
mai.n iz.haar-o-iqraar se barii
apnii KHvaahish par hayaa kii chaadar Daale
mohabbat kaa tauq gale me.n laTkaa.e
KHamoshii ko labo.n par sajaa.e
naa-ummiidii ko shikast dete hu.e
guu.ngii bahrii andhii mohabbat par iktifaa kiye hu.e huu.n
ki asiir KHvaahish-o-farmaa.ish kaa haq nahii.n rakhte

Saira Iqbal
Nazm

ehtijaj

aman kii chaadar me.n
baaruud aur mohlik hathiyaaro.n kii gaTh.Dii baa.ndh ke
duniyaa bhar me.n bhejne vaale behis logo
apnii saazish-gaah se baahar jhaa.nk ke dekho
chehre par jaanii-pahchaanii be-maqsad sii kuchh tahriire.n
thake hu.e pairo.n me.n bhaagte rasto.n kii saakit zanjiire.n
jaise aazaadii ke ghar me.n qaid ho.n do na.ngii tasviire.n
KHushk labo.n par pyaas bharii talKHii ke saare zaa.iqe likkhe
KHaalii peT ko aa.nkho.n kii dahliiz pe rakkhe
saamne ek sa.Dak ke mo.D pe
do zinda saa.e rote hai.n
chehre mohre rang aur nasl me.n
bilkul tum jaise hote hai.n
maile jism par andar kaa ahvaal sajaa.e
haatho.n ko kashkol banaa.e
aane jaane vaalo.n se kahte rahte hai.n
baabaa ko.ii kaam karaa lo
aur us ke badle me.n ham ko
roTii laa do
bhuuk miTaa do

Saleem Kausar
Nazm

touch screen

mai.n apnii shaa.irii
ik diary me.n note kartaa thaa
ko.ii ehsaas mujh me.n nazm bhartaa
yaa ko.ii misra utartaa thaa
to sab se pahle mujh ko
note-book darkaar hotii thii
jahaa.n kaaGaz kii hiddat se
qalam kii raushnaa.ii kii haraarat se
Gazal tayyaar hotii thii
binaa is dhiimii dhiimii aa.nch ke
mere liye har nazm hii dushvaar hotii thii
phir ik din mujh ko chaachaa-zaad bhaa.ii ne ye batlaayaa
vo KHud bhii naujavaa.n urdu kaa shaa.ir hai
vo apnii shaa.irii cell-phone me.n mahfuuz kartaa hai
so jab chaahe use pa.Dhtaa hai
auro.n se share karke unhe.n mahzuuz kartaa hai
use bijlii ke aane jaane se
kuchh farq pa.Dtaa hii nahii.n
na hii use din raat se kuchh lenaa denaa hai
use jab shaa.irii karnii ho
to kaaGaz qalam kii khoj me.n
lamha talak zaa.e.a nahii.n kartaa
jahaa.n vo sher apnaa note kartaa hai
a.ndheraa bhii vahaa.n saaya nahii.n kartaa
so us kii baat sun kar
mai.n ne apnii Diary sambhaal lii
aur apne mobile me.n misra likhte likhte
dost kii ik kaal lii
phir kaal ghanTo.n tak chalii
be-kaar kii KHvaahish vo misra puuraa karne kii
mere andar palii
lekin vo phir jaatii rahii
phir yuu.n hu.aa jab bhii ko.ii ilhaam
mere dar ko khaTkaataa rahaa
jab kaifiyat ko.ii mere ehsaas tak aatii rahii
mai.n us samay
cell-phone ko Dhuu.nDaa kiyaa
lekin vahaa.n ehsaas ko ik rabt me.n
tahriir kar paane se pahle
biiso.n be-rabt behis notifications
merii screen par zaahir hu.e
aur ham hamesha ke liye kuchh likhne se qaasir hu.e
gum ho ga.e in be-hiso.n kii fauj me.n
aa.ii na merii shaa.irii phir mauj me.n
ab sochtaa huu.n kyaa puraanii diary behtar nahii.n
diivaan meraa phone ke andar nahii.n
touch screen ke us paar hai
shaayad mere alfaaz kii yak-bastagii ko
sirf kaaGaz kii tapish darkaar hai

Bilal Aswad
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now