کی تلاش کا نتیجه | موضو - نظم, صفحہ bure

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "bure"

نظم کے متعلقہ نتیجہ "bure"

نظم

گاؤں میں پھر اک میلہ آیا
بوڑھے باپ نے کانپتے ہاتھوں سے
بیٹے کی بانہہ کو تھاما
اور بیٹے نے
یہ کیا ہے اور وہ کیا ہے
جتنا بھی بن پایا
سمجھایا
باپ نے بیٹے کے کندھے پر سر رکھا
بیٹے نے پوچھا
نیند آتی ہے
باپ نے مڑ کے
یاد کی پگڈنڈی پر چلتے
بیتے ہوئے
سب اچھے برے
اور کڑوے میٹھے
لمحوں کے پیروں سے اڑتی
دھول کو دیکھا
پھر
اپنے بیٹے کو دیکھا
ہونٹوں پر
اک ہلکی سی مسکان آئی
ہولے سے بولا
ہاں!
مجھ کو اب نیند آتی ہے

جاوید اختر

نظم

کسی کے بعد
اپنے ہاتھوں کی بد صورتی میں کھو گئی ہے وہ
مجھے کہتی ہے تابشؔ! تم نے دیکھا میرے ہاتھوں کو
برے ہیں ناں؟
اگر یہ خوب صورت تھے تو ان میں کوئی بوسہ کیوں نہیں ٹھہرا''
عجب لڑکی ہے
پورے جسم سے کٹ کر فقط ہاتھوں میں زندہ ہے
صراحی دار گردن نرم ہونٹوں تیز نظروں سے وہ بد ظن ہے
کہ ان اپنوں نے ہی اس کو سر بازار پھینکا تھا
کبھی آنکھوں میں ڈوبی
اور کبھی بستر پہ سلوٹ کی طرح ابھری
عجب لڑکی ہے
خود کو ڈھونڈتی ہے
اپنے ہاتھوں کی لکیروں میں
جہاں وہ تھی نہ ہے، آئندہ بھی شاید نہیں ہوگی
وہ جب انگلی گھما کر
فیضؔ کی نظمیں سناتی ہے
تو اس کے ہاتھ سے پورے بدن کا دکھ جھلکتا ہے
وہ ہنستی ہے تو اس کے ہاتھ روتے ہیں
عجب لڑکی ہے
پورے جسم سے کٹ کر فقط ہاتھوں میں زندہ ہے
مجھے کہتی ہے ''تابشؔ! تم نے دیکھا میرے ہاتھوں کو
برے ہیں ناں''؟
میں شاید گر چکا ہوں اپنی نظروں سے
میں چھپنا چاہتا ہوں اس کے تھیلے میں
جہاں سگریٹ ہیں ماچس ہے
جو اس کا حال ماضی اور مستقبل!

عباس تابش

نظم

(۱)
اے سب سے اول اور آخر
جہاں تہاں، حاضر اور ناظر
اے سب داناؤں سے دانا
سارے تواناؤں سے توانا
اے بالا، ہر بالاتر سے
چاند سے سورج سے امبر سے
اے سمجھے بوجھے بن سوجھے
جانے پہچانے بن بوجھے
سب سے انوکھے سب سے نرالے
آنکھ سے اوجھل دل کے اجالے
اے اندھوں کی آنکھ کے تارے
اے لنگڑے لولوں کے سہارے
ناتیوں سے چھوٹوں کے ناتی
ساتھیوں سے بچھڑوں کے ساتھی
ناؤ جہاں کی کھینے والے
دکھ میں تسلی دینے والے
جب اب تب تجھ سا نہیں کوئی
تجھ سے ہیں سب تجھ سا نہیں کوئی
جوت ہے تیری جل اور تھل میں
باس ہے تیری پھول اور پھل میں
ہر دل میں ہے تیرا بسیرا
تو پاس اور گھر دور ہے تیرا
راہ تری دشوار اور سکڑی
نام ترا رہ گیر کی لکڑی
تو ہے ٹھکانا مسکینوں کا
تو ہے سہارا غمگینوں کا
تو ہے اکیلوں کا رکھوالا
تو ہے اندھیرے گھر کا اجالا
لاگو اچھے اور برے کا
خواہاں کھوٹے اور کھرے کا
بید نراسے بیماروں کا
گاہک مندے بازاروں کا
سوچ میں دل بہلانے والے
بپتا میں یاد آنے والے
(۲)
اے بے وارث گھروں کے وارث
بے بازو بے پروں کے وارث
بے آسوں کی آس ہے تو ہی
جاگتے سوتے پاس ہے تو ہی
بس والے ہیں یا بے بس ہیں
تو نہیں جن کا وہ بے کس ہیں
ساتھی جن کا دھیان ہے تیرا
دسرایت کی وہاں نہیں پروا
دل میں ہے جن کے تیری بڑائی
گنتے ہیں وہ پربت کو رائی
بیکس کا غم خوار ہے تو ہی
بری بنی کا یار ہے تو ہی
دکھیا دکھی یتیم اور بیوہ
تیرے ہی ہاتھ ان سب کا ہے کھیوا
تو ہی مرض دے تو ہی دوا دے
تو ہی دوا دارو میں شفا دے
تو ہی پلائے زہر کے پیالے
تو ہی پھر امرت زہر میں ڈالے
تو ہی دلوں میں آگ لگائے
تو ہی دلوں کی لگی بجھائے
چمکارے چمکار کے مارے
مارے مار کے پھر چمکارے
پیار کا تیرے پوچھنا کیا ہے
مار میں بھی اک تیری مزا ہے
(۳)
اے رحمت اور ہیبت والے
شفقت اور دباغت والے
اے اٹکل اور دھیان سے باہر
جان سے اور پہچان سے باہر
عقل سے کوئی پا نہیں سکتا
بھید ترے حکموں میں ہیں کیا کیا
ایک کو تو نے شاد کیا ہے
ایک کے دل کو داغ دیا ہے
اس سے نہ تیرا پیار کچھ ایسا
اس سے نہ تو بیزار کچھ ایسا
ہر دم تیری آن نئی ہے
جب دیکھو تب شان نئی ہے
یہاں پچھوا ہے وہاں پروا ہے
گھر گھر تیرا حکم نیا ہے
پھول کہیں کملائے ہوئے ہیں
اور کہیں پھل آئے ہوئے ہیں
کھیتی ایک کی ہے لہراتی
ایک کا ہر دم خون سکھاتی
ایک پڑے ہیں دھن کو ڈبوئے
ایک ہیں گھوڑے بیچ کے سوئے
ایک نے جب سے ہوش سنبھالا
رنج سے اس کو پڑا نہ پالا
ایک نے اس جنجال میں آ کر
چین نہ دیکھا آنکھ اٹھا کر
مینہ کہیں دولت کا ہے برستا
ہے کوئی پانی تک کو ترستا
ایک کو مرنے تک نہیں دیتے
ایک اکتا گیا لیتے لیتے
حال غرض دنیا کا یہی ہے
غم پہلے اور بعد خوشی ہے
رنج کا ہے دنیا کے گلا کیا
تحفہ یہی لے دے کے ہے یاں کا
یہاں نہیں بنتی رنج سہے بن
رنج نہیں سب ایک سے لیکن
ایک سے یہاں رنج ایک ہے بالا
ایک سے ہے درد ایک نرالا
گھاؤ ہے گو ناسور کی صورت
پر اسے کیا ناسور سے نسبت
تپ وہی دق کی شکل ہے لیکن
دق نہیں رہتی جان لیے بن
دق ہو وہ یا ناسور ہو کچھ ہو
دے نہ جو اب امید کسی کو
روز کا غم کیوں کر سہے کوئی
آس نہ جب باقی رہے کوئی
تو ہی کر انصاف اے مرے مولا
کون ہے جو بے آس ہے جیتا
گو کہ بہت بندے ہیں پر ارماں
کم ہیں مگر مایوس ہیں جو یاں
خواہ دکھی ہے خواہ سکھی ہے
جو ہے اک امید اس کو بندھی ہے
کھیتیاں جن کی کھڑی ہیں سوکھی
آس وہ باندھے بیٹھے ہیں مینہ کی
گھٹا جن کی اساڑی میں ہے
ساونی کی امید نہیں ہے
ڈوب چکی ہے ان کی اگیتی
دیتی ہے ڈھارس ان کو پچھیتی
ایک ہے اس امید پہ جیتا
اب ہوئی بیٹی اب ہوا بیٹا
ایک کو جو اولاد ملی ہے
اس کو امنگ شادیوں کی ہے
رنج ہے یا قسمت میں خوشی ہے
کچھ ہے مگر اک آس بندھی ہے
غم نہیں ان کو غمگیں ہیں
جو دل ناامید نہیں ہیں
کال میں کچھ سختی نہیں ایسی
کال میں ہے جب آس سمیں کی
سہل ہے موجوں سے چھٹکارا
جب کہ نظر آتا ہے کنارا
پر نہیں اٹھ سکتی وہ مصیبت
آئے گی جس کے بعد نہ راحت
شاد ہو اس رہ گیر کا کیا دل؟
مر کے کٹے گی جس کی منزل
ان اجڑوں کو کل پڑے کیوں کر
گھر نہ بسے گا جن کا جنم بھر
ان بچھڑوں کا کیا ہے ٹھکانا؟
جن کو نہ ملنے دے گا زمانہ
اب یہ بلا ٹلتی نہیں ٹالی
مجھ پہ ہے جو تقدیر نے ڈالی
آئیں بہت دنیا میں بہاریں
عیش کی گھر گھر پڑیں پکاریں
پڑے بہت باغوں میں جھولے
ڈھاک بہت جنگل میں پھولے
گئیں اور آئیں چاندنی راتیں
برسیں کھلیں بہت برساتیں
پر نہ کھلی ہرگز نہ کھلے گی
وہ جو کلی مرجھائی تھی دل کی
آس ہی کا بس نام ہے دنیا
جب نہ رہی یہی تو رہا کیا؟
ایسے بدیسی کا نہیں غم کچھ
جس کو نہ ہو ملنے کی قسم کچھ
رونا ان بن باسیوں کا ہے
دیس نکالا جن کو ملا ہے
حکم سے تیرے پر نہیں چارہ
کڑوی میٹھی سب ہے گوارا
زور ہے کیا پتے کا ہوا پر
چاہے جدھر لے جائے اڑا کر
تنکا اک اور سات سمندر
جائے کہاں موجوں سے نکل کر
قسمت ہی میں جب تھی جدائی
پھر ٹلتی کس طرح یہ آئی؟
آج کی بگڑی ہو تو بنے بھی
ازل کی بگڑی خاک بنے گی
تو جو چاہے وہ نہیں ٹلتا
بندے کا یاں بس نہیں چلتا
مارے اور نہ دے تو رونے
تھپکے اور نہ دے تو سونے
ٹھہرے بن آتی ہے نہ بھاگے
تیری زبردستی کے آگے
تجھ سے کہیں گر بھاگنا چاہیں
بند ہیں چاروں کھونٹ کی راہیں
تو مارے اور خواہ نوازے
پڑی ہوئی ہوں میں تیرے دروازے
تجھ کو اپنا جانتی ہوں میں
تجھ سے نہیں تو کس سے کہوں میں
ماں ہی سدا بچہ کو مارے
اور بچہ ماں ماں ہی پکارے
(۴)
اے مرے زور اور قدرت والے
حکمت اور حکومت والے
میں لونڈی تیری دکھیارے
دروازے کی تیری بھکاری
موت کی خواہاں جان کی دشمن
جان اپنی ہے آپ اجیرن
اپنے پرائے کی دھتکاری
میکے اور سسرال پہ بھاری
سہہ کے بہت آزار چلی ہوں
دنیا سے بیزار چلی ہوں
دل پر میرے داغ ہیں جتنے
منہ میں بول نہیں ہیں اتنے
دکھ دل کا کچھ کہہ نہیں سکتی
اس کے سوا کچھ کہہ نہیں سکتی
تجھ پہ ہے روشن سب دکھ دل کا
تجھ سے حقیقت اپنی کہوں کیا
بیاہ کے دم پائی تھی نہ لینے
لینے کے یاں پڑ گئے دینے
خوشی میں بھی دکھ ساتھ نہ آیا
غم کے سوا کچھ ہات نہ آیا
ایک خوشی نے غم یہ دکھائے
ایک ہنسی نے گل ہی کھلائے
کیسا تھا یہ بیاہ نناواں
جوں ہی پڑا اس کا پرچھاواں
چین سے رہنے دیا نہ جی کو
کر دیا ملیامیٹ خوشی کو
رو نہیں سکتی تنگ ہوں یاں تک
اور روؤں تو روؤں کہاں تک
ہنس ہنس دل بہلاؤں کیوں کر
اوسوں پیاس بجھاؤں کیوں کر
ایک کا کچھ جینا نہیں ہوتا
ایک نہ ہنستا بھلا نہ روتا
لیٹے گر سونے کے بہانے
پائنتی کل ہے اور نہ سرہانے
جاگیے تو بھی بن نہیں پڑتی
جاگنے کی آخر کوئی حد بھی
اب کل ہم کو پڑے گی مر کر
گور ہے سونی سیج سے بہتر
بات سے نفرت کام سے وحشت
ٹوٹی آس اور بجھی طبیعت
آبادی جنگل کا نمونہ
دنیا سونی اور گھر سونا
دن ہے بھیانک اور رات ڈرانی
یوں گزری ساری یہ جوانی
بہنیں اور بہنیلیاں میری
ساتھ کی جو تھیں کھیلیاں میری
مل نہ سکیں جی کھول کے مجھ سے
خوش نہ ہوئیں ہنس بول کے مجھ سے
جب آئیں رو دھو کے گئیں وہ
جب گئیں بے کل ہو کے گئیں وہ
کوئی نہیں دل کا بہلاوا
آ نہیں چکتا میرا بلاوا
آٹھ پہر کا ہے یہ جلاپا
کاٹوں گی کس طرح رنڈاپا
تھک گئی دکھ سہتے سہتے
تھم گئے آنسو بہتے بہتے
آگ کھلی دل کی نہ کسی پر
گھل گئی جان اندر ہی اندر
دیکھ کے چپ جانا نہ کسی نے
جان کو پھونکا دل کی لگی نے
دبی تھی بھوبھل میں چنگاری
لی نہ کسی نے خبر ہماری
قوم میں وہ خوشیاں بیاہوں کی
شہر میں وہ دھوئیں ساہوں کی
تہواروں کا آئے دن آنا
اور سب کا تہوار منانا
وہ چیت اور پھاگن کی ہوائیں
وہ ساون بھادوں کی گھٹائیں
وہ گرمی کی چاندنی راتیں
وہ ارمان بھری برساتیں
کس سے کہوں کس طور سے کاٹیں
خیر کٹیں جس طور سے کاٹیں
چاؤ کے اور خوشیوں کے سمے سب
آتے ہیں خوش کل جان کو ہو جب
رنج میں ہیں سامان خوشی کے
اور جلانے والے ہی کے
گھر برکھا اور پیا بدیسی
آئیو برکھا کہیں نہ ایسی
دن یہ جوانی کے کٹے ایسے
باغ میں پنچھی قید ہو جیسے
رت گئی ساری سر ٹکراتے
اڑ نہ سکے پر ہوتے سارے
کسی نے ہوگی کچھ کل پائی
مجھے تو شادی راس نہ آئی
آس بندھی لیکن نہ ملا کچھ
پھول آیا اور پھل نہ لگا کچھ
رہ گیا دے کر چاند دکھائی
چاند ہوا پر عید نہ آئی
پھل کی خاطر برچھی کھائی
پھل نہ ملا اور جان گنوائی
ریت میں ذرے دیکھ چمکتے
دوڑ پڑی میں جھیل سمجھ کے
چاروں کھونٹ نظر دوڑائی
پر پانی کی بوند نہ پائی

الطاف حسین حالی

نظم

ماں باپ اور استاد سب ہیں خدا کی رحمت
ہے روک ٹوک ان کی حق میں تمہارے نعمت
کڑوی نصیحتوں میں ان کی بھرا ہے امرت
چاہو اگر بڑائی تو کہنا بڑوں کا مانو
ماں باپ کا عزیزو مانا نہ جس نے کہنا
دشوار ہے جہاں میں عزت سے اس کا رہنا
ڈر ہے پڑے نہ صدمہ ذلت کا اس کا سہنا
چاہو اگر بڑائی تو کہنا بڑوں کا مانو
تم کو خبر نہیں کچھ اپنے بھلے برے کی
جتنی ہے عمر چھوٹی اتنی ہے عقل چھوٹی
ہے بہتری اسی میں ہے جو بڑوں کی مرضی
چاہو اگر بڑائی تو کہنا بڑوں کا مانو

الطاف حسین حالی

نظم

کلیجہ پھنک رہا ہے اور زباں کہنے سے عاری ہے
بتاؤں کیا تمہیں کیا چیز یہ سرمایہ داری ہے
یہ وہ آندھی ہے جس کی رو میں مفلس کا نشیمن ہے
یہ وہ بجلی ہے جس کی زد میں ہر دہقاں کا خرمن ہے
یہ اپنے ہاتھ میں تہذیب کا فانوس لیتی ہے
مگر مزدور کے تن سے لہو تک چوس لیتی ہے
یہ انسانی بلا خود خون انسانی کی گاہک ہے
وبا سے بڑھ کے مہلک موت سے بڑھ کر بھیانک ہے
نہ دیکھے ہیں برے اس نے نہ پرکھے ہیں بھلے اس نے
شکنجوں میں جکڑ کر گھونٹ ڈالے ہیں گلے اس نے
بلائے بے اماں ہے طور ہی اس کے نرالے ہیں
کہ اس نے غیظ میں اجڑے ہوئے گھر پھونک ڈالے ہیں
قیامت اس کے غمزے جان لیوا ہیں ستم اس کے
ہمیشہ سینۂ مفلس پہ پڑتے ہیں قدم اس کے
کہیں یہ خوں سے فرد مال و زر تحریر کرتی ہے
کہیں یہ ہڈیاں چن کر محل تعمیر کرتی ہے
غریبوں کا مقدس خون پی پی کر بہکتی ہے
محل میں ناچتی ہے رقص گاہوں میں تھرکتی ہے
بظاہر چند فرعونوں کا دامن بھر دیا اس نے
مگر گل باغ عالم کو جہنم کر دیا اس نے
درندے سر جھکا دیتے ہیں لوہا مان کر اس کا
نظر سفاک تر اس کی نفس مکروہ تر اس کا
جدھر چلتی ہے بربادی کے ساماں ساتھ چلتے ہیں
نحوست ہم سفر ہوتی ہے شیطاں ساتھ چلتے ہیں
یہ اکثر لوٹ کر معصوم انسانوں کو راہوں میں
خدا کے زمزمے گاتی ہے چھپ کر خانقاہوں میں
یہ ڈائن ہے بھری گودوں سے بچے چھین لیتی ہے
یہ غیرت چھین لیتی ہے حمیت چھین لیتی ہے
یہ انسانوں سے انسانوں کی فطرت چھین لیتی ہے
یہ آشوب ہلاکت فتنۂ اسکندر و دارا
زمیں کے دیوتاؤں کی کنیز انجمن آرا
ہمیشہ خون پی کر ہڈیوں کے رتھ میں چلتی ہے
زمانہ چیخ اٹھتا ہے یہ جب پہلو بدلتی ہے
گرجتی گونجتی یہ آج بھی میداں میں آتی ہے
مگر بد مست ہے ہر ہر قدم پر لڑکھڑاتی ہے
مبارک دوستو لبریز ہے اب اس کا پیمانہ
اٹھاؤ آندھیاں کمزور ہے بنیاد کاشانہ

اسرار الحق مجاز

نظم

برے لوگوں کے پاس
وہ سب کچھ ہوتا ہے
جس سے پیدا کیا جا سکے
اچھے اور سچے عشق کا
کبھی نہ ٹوٹنے والا بھرم

نعمان شوق

نظم

دل خوشامد سے ہر اک شخص کا کیا راضی ہے
آدمی جن پری و بھوت بلا راضی ہے
بھائی فرزند بھی خوش باپ چچا راضی ہے
شاد مسرور غنی شاہ و گدا راضی ہے
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے
اپنا مطلب ہو تو مطلب کی خوشامد کیجے
اور نہ ہو کام تو اس ڈھب کی خوشامد کیجے
اولیا انبیا اور رب کی خوشامد کیجے
اپنے مقدور غرض سب کی خوشامد کیجے
جو خوشامد کرے خلق اس سے سدا راضی ہے
حق تو یہ ہے کی خوشامد سے خدا راضی ہے
چار دن جس کو کیا جھک کے خوشامد سے سلام
وہ بھی خوش ہو گیا اپنا بھی ہوا کام میں کام
بڑے عاقل بڑے دانا نے نکالا ہے یہ دام
خوب دیکھا تو خوشامد ہی کی آمد ہے تمام
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے
بد بخیل اور سخی کی بھی خوشامد کیجے
اور جو شیطان ہو تو اس کی بھی خوشامد کیجے
گر ولی ہو تو ولی کی بھی خوشامد کیجے
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے
پیار سے جوڑ دئیے جس کی طرف ہاتھ جو آہ
وہیں خوش ہو گیا کرتے ہی وہ ہاتھوں پہ نگاہ
غور سے ہم نے جو اس بات کو دیکھا واللہ
کچھ خوشامد ہی بڑی چیز ہے اللہ اللہ
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی
پینے اور پہننے کھانے کی خوشامد کیجے
ہیجڑے بھانڈ زنانے کی خوشامد کیجے
مست و ہشیار دوانے کی خوشامد کیجے
بھولے نادان سیانے کی خوشامد کیجے
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے
عیش کرتے ہیں وہی جن کا خوشامد کا مزاج
جو نہیں کرتے وہ رہتے ہیں ہمیشہ محتاج
ہاتھ آتا ہے خوشامد سے مکاں ملک اور تاج
کیا ہی تاثیر کی اس نسخے نے پائی ہے رواج
جو خوشامد کرے خلق اس سے سدا راضی ہے
حق تو یہ کہ خوشامد سے خدا راضی ہے
گر بھلا ہو تو بھلے کی بھی خوشامد کیجے
اور برا ہو تو برے کی بھی خوشامد کیجے
پاک ناپاک سڑے کی بھی خوشامد کیجے
کتے بلی و گدھے کی بھی خوشامد کیجے
جو خوشامد کرے خلق اس سے سدا راضی ہے
حق تو یہ کہ خوشامد سے خدا راضی ہے
خوب دیکھا تو خوشامد کی بڑی کھیتی ہے
غیر کی اپنے ہی گھر بیچ یہ سکھ دیتی ہے
ماں خوشامد کے سبب چھاتی لگا لیتی ہے
نانی دادی بھی خوشامد سے دعا دیتی ہے
جو خوشامد کرے خلق اس سے سدا راضی ہے
حق تو یہ کہ خوشامد سے خدا راضی ہے
بی بی کہتی ہے میاں آ ترے صدقے جاؤں
ساس بولے کہیں مت جا ترے صدقے جاؤں
خالہ کہتی ہے کہ کچھ کھا ترے صدقے جاؤں
سالی کہتی ہے کہ بھیا ترے صدقے جاؤں
جو خوشامد کرے خلق اس سے سدا راضی ہے
حق تو یہ کہ خوشامد سے خدا راضی ہے
آ پڑا ہے جو خوشامد سے سروکار اسے
ڈھونڈتے پھرتے ہیں الفت کے خریدار اسے
آشنا ملتے ہیں اور چاہے ہیں سب یار اسے
اپنے بیگانے غرض کرتے ہیں سب پیار اسے
جو خوشامد کرے خلق اس سے سدا راضی ہے
حق تو یہ کہ خوشامد سے خدا راضی ہے
روکھی اور روغنی آبی کو خوشامد کیجے
نان بائی و کبابی کی خوشامد کیجے
ساقی و جام شرابی کی خوشامد کیجے
پارسا رند خرابی کی خوشامد کیجے
جو خوشامد کرے خلق اس سے سدا اراضی ہے
حق تو یہ ہے کہ خوشامد سے خدا راضی ہے
جو کہ کرتے ہیں خوشامد وہ بڑے ہیں انساں
جو نہیں کرتے وہ رہتے ہیں ہمیشہ حیراں
ہاتھ آتے ہیں خوشامد سے ہزاروں ساماں
جس نے یہ بات نکالی ہے میں اس کے قرباں
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے
کوڑی پیسے و ٹکے زر کی خوشامد کیجے
لعل و نیلم در و گوہر کی خوشامد کیجے
اور جو پتھر ہو تو پتھر کی خوشامد کیجے
نیک و بد جتنے ہیں یک سر کی خوشامد کیجے
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے
ہم نے ہر دل کی خوشامد کی محبت دیکھی
پیار اخلاص و کرم مہر مروت دیکھی
دلبروں میں بھی خوشامد ہی کی الفت دیکھی
عاشقوں میں بھی خوشامد ہی کی چاہت دیکھی
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے
پارسا پیر ہے زاہد ہے منا جاتی ہے
جواریا چور دغاباز خراباتی ہے
ماہ سے ماہی تلک چیونٹی ہے یا ہاتھی ہے
یہ خوشامد تو میاں سب کے تئیں بھاتی ہے
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے
گر نہ میٹھی ہو تو کڑوی بھی خوشامد کیجے
کچھ نہ ہو پاس تو خالی بھی خوشامد کیجے
جانی دشمن ہو تو اس کی خوشامد کیجے
سچ اگر پوچھو تو جھوٹی بھی خوشامد کیجے
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے
مرد و زن طفل و جواں خورد و کلاں پیر و فقیر
جتنے عالم میں ہیں محتاج و گدا شاہ وزیر
سب کے دل ہوتے ہیں پھندے میں خوشامد کے اسیر
تو بھی واللہ بڑی بات یہ کہتا ہے نظیرؔ
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے

نظیر اکبرآبادی

نظم

اے رہبر منزل تری رفتار کے صدقے
اے مہر منور ترے انوار کے صدقے
اے بندۂ حق گو تری گفتار کے صدقے
اے صاحب ایماں ترے کردار کے صدقے
تو بندہ و صاحب بھی تھا محتاج و غنی بھی
جلووں کا امیں بھی ترے لب پہ ارنی بھی
ہر چہرۂ مردم کے خد و خال برے تھے
دیکھو جسے اس شخص کے اعمال برے تھے
ملا کے بھی پنڈت کے بھی اعمال برے تھے
جو جھوٹ نے پھیلائے تھے وہ جال برے تھے
سچا ترا دن اور تری رات بھی سچی
سچا ترا سودا تیری ہر بات بھی سچی
اس در کا پجاری کوئی اس در کا پجاری
مغرب کا پجاری کوئی خاور کا پجاری
مینا کا پجاری کوئی ساغر کا پجاری
قبروں کا پجاری کوئی بنجر کا پجاری
کثرت تھی یہاں شرک کی توحید نہیں تھی
روزوں کا بھلاوا تھا مگر عید نہیں تھی
تو ہندو و مسلم کے گناہوں سے تھا واقف
مذہب کی سسکتی ہوئی آہوں سے تھا واقف
تو شعبدہ بازوں کی نگاہوں سے تھا واقف
تو منزل توحید کی راہوں سے تھا واقف
در حق کے کبھی بندۂ حاجی پہ کھلے ہیں
گنگا میں نہا کر بھی کبھی پاپ دھلے ہیں
تو نے یہ کہا سب سے بڑا حکم رضائی
تو نے یہ کہا سانچ کی قیمت نہیں پائی
تو نے یہ کہا سو کے یہ سب عمر گنوائی
تو نے یہ کہا جھوٹ ہے سب زہد ریائی
پر معنی و پر مغز ہیں نیکی کے اشارے
ہر حال میں ہر رنگ میں رہبر ہیں ہمارے
میں مست مئے عشق ہوں تن ریش قلندر
تیرتھ ہے اگر کوئی تو اس من کے ہے اندر
جاؤں میں کہاں سجدے کو من میرا ہے مندر
ہے عزم مرا فاتح دارا و سکندر
گاتے ہیں جسے دیوتا بھی چودہ رتن بھی
رقصاں ہے اسی در پہ میری جان بھی تن بھی
جو درس دیا تو نے وہ عظمت کا امیں ہے
وہ پریم کی اخلاق کی خاتم کا نگیں ہے
کندن جو نہ ہو جائے وہ سونا ہی نہیں ہے
حق گو ہے جو دنیا ہی میں جنت کا مکیں ہے
سر جھکتے ہیں سب کے تری سرکار میں آ کر
ہم سجدہ کناں ہیں ترے دربار میں آ کر

عرش ملسیانی

نظم

نہ کچھ مجھ میں طاقت تھی جس آن اماں
نہ اچھے برے کی تھی پہچان اماں
تمہیں سب طرح تھیں نگہبان اماں
تمہیں کو تھا ہر دم مرا دھیان اماں
مری پیاری اماں مری جان اماں
مجھے پیار سے دودھ تم نے پلایا
تھپک کر محبت سے تم نے سلایا
بہت دن مجھے گودیوں میں پھرایا
مجھے سکھ دیا آپ ہے دکھ اٹھایا
مری پیاری اماں مری جان اماں
کبھی اپنی گودی میں مجھ کو لٹانا
کبھی میٹھی باتوں سے مجھ کو ہنسانا
کبھی پیار کرنا گلے سے لگانا
نہ بھولوں گا میں عمر بھر وہ زمانہ
مری پیاری اماں مری جان اماں
جو دکھ سے کبھی نیند مجھ کو نہ آئی
تو اس فکر میں رات تم نے گنوائی
کبھی کچھ دوائی کھلائی پلائی
کبھی کوئی میٹھی سی لوری سنائی
مری پیاری اماں مری جان اماں
تمہیں نے ہے اچھا طریقہ سکھایا
تمہیں نے ہے رستہ خدا کا بتایا
تمہیں نے گناہوں سے مجھ کو بچایا
تمہیں نے مجھے آدمی ہے بنایا
مری پیاری اماں مری جان اماں
بہت کی مرے ساتھ تم نے محبت
اٹھائی مرے واسطے سخت محنت
اگر دے خدا مجھ کو عمر اور دولت
تمہاری بجا لاؤں ہر طرح خدمت
مری پیاری اماں مری جان اماں

محمد حسین آزاد

نظم

تم ہی اچھے تھے کسی سے کبھی تکرار نہ کی
تم کہ تکرار کے خوگر بھی نہ تھے
تم ہی اچھے تھے
جو منجملۂ ارباب نظر رہتے تھے
شہر پر حوصلہ میں
شیوۂ اہل ہنر پر کبھی تنقید نہ کی
اتنے بے بس تھے کہ جب وقت پڑا
اپنی بھی تائید نہ کی
ہم برے لوگ ہیں سچ کہتے ہیں
ہم برے لوگ ہیں خوش نودیٔ ارباب اثر کے باغی
کبھی قطرے کو سمندر نہ لکھا
کسی ذرے کو بھی صحرا نہ کہا
قرض آئینہ چکانے کے لئے عکس سے محروم ہوئے
اور انساں سے محبت کا صلہ
اک سزا یافتہ مجرم کی طرح زندہ ہیں

سلیم کوثر

نظم

لہو میں خوف سہی دل میں وسوسے ہی سہی
وبا سے جنگ کے یہ روز و شب برے ہی سہی
مگر امید کی لو پھر سے ٹمٹمائی ہے
کواڑ کھول کے دیکھو بہار آئی ہے

رحمان فارس

نظم

ہم سب کچھ کر سکتے ہیں مگر یہ سوچ کے پھر رہ جاتے ہیں
تم لاکھ برے ہو اپنے ہو اپنوں سے بغاوت کون کرے

ابوالفطرت میر زیدی

نظم

نظر اٹھاؤ سفیر لیلیٰ برے تماشوں کا شہر دیکھو
یہ میرا قریہ یہ وحشتوں کا امین قریہ
تمہیں دکھاؤں
یہ صحن مسجد تھا یاں پہ آیت فروش بیٹھے دعائیں خلقت کو بیچتے تھے
یہاں عدالت تھی اور قاضی امان دیتے تھے رہزنوں کو
اور اس جگہ پر وہ خانقاہیں تھیں آب و آتش کی منڈیاں تھیں
جہاں پہ امرد پرست بیٹھے صفائے دل کی نمازیں پڑھ کر
خیال دنیا سے جاں ہٹاتے
سفیر لیلیٰ میں کیا بتاؤں کہ اب تو صدیاں گزر چکی ہیں
مگر سنو اے غریب سایہ کہ تم شریفوں کے راز داں ہو
یہی وہ دن تھے میں بھول جاؤں تو مجھ پہ لعنت
یہی وہ دن تھے سفیر لیلیٰ ہماری بستی میں چھ طرف سے فریب اترے
دروں سے آگے گھروں کے بیچوں پھر اس سے چولہوں کی ہانڈیوں میں
جوان و پیر و زنان قریہ خوشی سے رقصاں
تمام رقصاں
ہجوم طفلاں تھا یا تماشے تھے بوزنوں کے
کہ کوئی دیوار و در نہ چھوڑا
وہ ان پہ چڑھ کر شریف چہروں کی گردنوں کو پھلانگتے تھے
دراز قامت لحیم بونے
رضائے باہم سے کولھووں میں جتے ہوئے تھے
خراستے تھے وہ زرد غلہ تو اس کے پسنے سے خون بہتا تھا پتھروں سے
مگر نہ آنکھیں کہ دیکھ پائیں نہ ان کی ناکیں کہ سونگھتے وہ
فقط وہ بیلوں کی چکیاں تھیں سروں سے خالی
فریب کھاتے تھے خون پیتے تھے اور نیندیں تھیں بجوؤں کی
سفیر لیلیٰ یہ داستاں ہے اسی کھنڈر کی
اسی کھنڈر کے تماش بینوں فریب خوردوں کی داستاں ہے
مگر سنو اجنبی شناسا
کبھی نہ کہنا کہ میں نے قرنوں کے فاصلوں کو نہیں سمیٹا
فصیل قریہ کے سر پہ پھینکی گئی کمندیں نہیں اتاریں
تمہیں دکھاؤں تباہ بستی کے ایک جانب بلند ٹیلہ
بلند ٹیلے پہ بیٹھے بیٹھے ہونقوں سا
کبھی تو روتا تھا اپنی آنکھوں پہ ہاتھ رکھ کر کبھی مسلسل میں اونگھتا تھا
میں اونگھتا تھا کہ سانس لے لوں
مگر وہ چولہوں پہ ہانڈیوں میں فریب پکتے
سیاہ سانپوں کی ایسی کایا کلپ ہوئی تھی کہ میری آنکھوں پہ جم گئے تھے
سو یاں پہ بیٹھا میں آنے والے دھوئیں کی تلخی بتا رہا تھا
خبر کے آنسو بہا رہا تھا
مگر میں تنہا سفیر لیلیٰ
فقط خیالوں کی بادشاہی مری وراثت
تمام قریے کا ایک شاعر تمام قریے کا اک لعیں تھا
یہی سبب ہے سفیر لیلیٰ میں یاں سے نکلا تو کیسے گھٹنوں کے بل اٹھا تھا
نصیب ہجرت کو دیکھتا تھا
سفر کی سختی کو جانتا تھا
یہ سبز قریوں سے صدیوں پیچھے کی منزلوں کا سفر تھا مجھ کو
جو گرد صحرا میں لپٹے خاروں کی تیز نوکوں پہ جلد کرنا تھا اور
وہ ایسا سفر نہیں تھا جہاں پہ سائے کا رزق ہوتا
جہاں ہواؤں کا لمس ملتا
فرشتے آواز الااماں میں مرے لیے ہی
اجل کی رحمت کو مانگتے تھے
یہی وہ لمحے تھے جب شفق کے طویل ٹیلوں پہ چلتے چلتے
میں دل کے زخموں کو ساتھ لے کر
سفر کے پربت سے پار اترا

علی اکبر ناطق

نظم

وحشت کی اماوس میں تمہاری یاد چھپی ہے
اور تمہاری یاد میں بہت سارے خوف
بالکل اچانک
بغیر کسی وجہ کے
سینے میں دھڑدھڑاتے دل کو
ساکت و جامد کرنے والے خوف
یہ وہ ایسے ویسے اچھے برے
مارنے والے توڑنے والے خوف
بھیانک قسم کے خوف
عجیب قسم کے خوف
کینچلی بدلنے والے خوف
اور پتا نہیں کیسے کیسے خوف
تم نے سنا نہیں
میں تم سے محبت کر کے بہت سے خوفوں میں گھر گئی ہوں
میں تھک گئی ہوں

نجمہ نسیم

نظم

برق رفتاری پہ اپنی رشک کرتا تھا جہاں
سوئے آزادی ہمارا قافلہ تھا تیز گام
سیکھنا ہے لیکن اب مے خانۂ تعمیر میں
جنبش نبض تمنا و خرام دور جام
منزل مقصود تک یہ قوم جا سکتی نہیں
جس کے قبضے میں نہیں اسپ سیاست کی لگام
ہم کو بچنا چاہئے ہر اس برے اقدام سے
جس سے ہو مطعون دنیا میں وطن کا نیک نام
اتحاد و آشتی ہر دم رہیں پیش نظر
جا گزیں دل میں رہے ذوق عمل بالالتزام
دور آزادی کا گوہر عیش ہے عیش حلال
دل یہ کہتا ہے کہ یوں پابند ہونا ہے حرام
دل کی تلقینات پر پہلے عمل فرمائیے
شوق سے پھر جشن آزادی مناتے جائیے
عیش کے ساماں بھی ہوں اور فرض کا احساس بھی
جشن بھی ہو غم زدوں کی ناز برداری بھی ہو
داخل آداب مے نوشی ہو ساقی کا ادب
مستیاں ہوں مستیوں کے ساتھ ہشیاری بھی ہو
کچھ پئیں اور کچھ بچائیں تشنہ کاموں کے لیے
سادگی کا ناز بھی انداز پرکاری بھی ہو
حال کی خاطر خرد کوشی ہے مستحسن مگر
بہر مستقبل جنون ذوق بیداری بھی ہو
نرم رفتاری ہو وقت سیر گل زار طرب
راہ پرخار عمل میں گرم رفتاری بھی ہو
اس خوشی کے وقت کتنے دل ہیں غم سے پائمال
لطف آ جائے اگر ان سب کی غم خواری بھی ہو
رونے والوں کی ہنسی کو پہلے واپس لائیے
شوق سے پھر جشن آزادی مناتے جائیے

عرش ملسیانی

نظم

انہی دو سے آباد ہر اک کا گھر ہے
کمانا ہے فن اور بچانا ہنر ہے
یہ بات آج ہی سوچنا ہے ضروری
کسے ہے خبر آنے والے دنوں کی
برے وقت میں کام آئیں گے اکثر
رکھو گے اگر چار پیسے بچا کر
بچت ہی سے مل جل کے بنتی ہے دولت
بچت ہی سے بڑھتی ہے ملکوں کی طاقت
یہ فصلیں یہ بازار یہ کارخانے
بچت نے سنوارے ہیں بگڑے زمانے
ذرا جا کے گھر دیکھ لو چیونٹیوں کا
وہ دانوں کا کرتی ہیں کیسے ذخیرہ
یوں ہی قطرہ قطرہ سمندر بنے گا
یوں ہی لمحہ لمحہ مقدر بنے گا
بچت کی جو بچپن سے ڈالو گے عادت
بڑے ہو کے پاؤ گے دنیا میں راحت

عبد الاحد ساز

نظم

رات ہو دن ہو شور یا چپی
سخت بستر ہو سلوٹوں والا
آنکھ جلتی ہو برے سپنوں سے
سر پہ منڈلاتی ہو کالی چھایا

اشوک لال

نظم

گھر سے جا کر روز سویرے
مکتب آ کر روز سویرے
جو نغمے گاتے ہو اکثر
گا کر لہراتے ہو اکثر
ہے تو وہ بھی حمد خدا کی
حمد خدائے ارض و سما کی
لیکن وہ تعریف بھی کیا ہے
صرف زباں پر جس کی صدا ہے
معنی ہیں یہ حمد خدا کے
حمد خدائے ارض و سما کے
رب کے نام میں ہے جو نیکی
وہ ہم میں پیدا ہو نیکی
نام ہوں رب کے جس سے روشن
کام ہوں رب کے جس سے روشن
کرتا ہے وہ احساں سب پر
کیا عاقل کیا ناداں سب پر
ہم بھی ڈالیں خوئے احساں
ہم میں بھی ہو بوئے احساں
راجہ یا کنگال ہو کوئی
گورا ہو یا لال ہو کوئی
اس کی نظر میں سبھی برابر
اس کے گھر میں سبھی برابر
ہم بھی برابر جانیں سب کو
ہم بھی برابر مانیں سب کو
رعب نہ مانیں دھن دولت کا
فرق نہ جانیں دھن دولت کا
مظلوموں کا حامی ہے وہ
معصوموں کا حامی ہے وہ
ہم بھی لوگوں کے کام آئیں
ان کے ہر دکھ کو اپنائیں
ہندو مسلم سکھ عیسائی
امی ابا بہنا بھائی
یہ تو ہیں سب نام ہمارے
دیکھتا ہے وہ کام ہمارے
اچھا کام ہے اس کو پیارا
نیک انجام ہے اس کو پیارا
ہم بھی سب کا رتبہ مانیں
ہم بھی سب کو اچھا جانیں
جن لوگوں کے کام ہیں اچھے
کاموں کے انجام ہیں اچھے
برے بھلے سے واقف ہے وہ
کھلے ڈھکے سے واقف ہے وہ
ہم بھی اپنا علم بڑھائیں
قدرت کے رازوں کو پائیں
ظالم سے ہے بیر خدا کو
پرمیشور کو ان داتا کو
بس پھر ہم پر فرض یہی ہے
زیبؔ کی تم سے عرض یہی ہے
اپنوں پر کیا بیگانوں پر
رحم کرو سب انسانوں پر
اچھے انساں بن کے دکھا دو
حمد کے معنی سب کو بتا دو

زیب عثمانیہ

نظم

سنو یہ نظم کبھی نہیں ہو سکتی
اور تم جانتے ہو
جب جذبے ادھورے رہ جائیں
تو زمینیں بنجر ہو جاتی ہیں
وقت گزرا کہاں
زخم ویسے ہی ابھی رستے ہیں
دل بھر آیا اس جگہ
جہاں محبت نا محبت سے ملی
جب وجود ایک سوال بنا
جب روح نے جسم کا ساتھ چھوڑ دیا
جب دعاؤں میں تاثیر نہ رہی
قدم بڑھے تو بہت خلوص سے تھے
جانتے تھے کہ راہ کٹھن ہے
سفر دشوار ہے
بس اک آس تھی
کہ یہ سفر رائیگاں تو نہیں
ہم اکیلے تو نہیں
ہمارے ساتھ چلنے کی چاہ میں
ہمارا سفر بھی ہے
مگر نہیں جانتے تھے
کہ ہم تو اپنے آپ سے جدا ہو گئے
ہم نہ جان سکے
کہ مٹی سے وہ مہک ہی اٹھ گئی
جو دل کو دل سے ملاتی ہے
سو اب تک لکھی گئی ہر نظم
نامکمل ہی تو ہے
کسی پیر دانا نے کہا تھا
بہت سی ناگوار آوازیں
تمہارے دھیان کو بھٹکائے گیں
مگر تم پیچھے مڑ کے مت دیکھنا
ورنہ پتھر کے ہو جاؤ گے
سو اے پیر دانا
میں نہیں دیکھتی پیچھے مڑ کے
جب آوازیں میرے دل کو ہدف بناتی ہیں
میں جانتی ہوں
یہ آوازیں مجھے تنگ کرنے کے لئے ہیں
یہ مجھے روکنا چاہتی ہیں آگے بڑھنے سے
دنیا کے ہر برے مقصد کے آڑے آتی ہیں
یہ آوازیں
یہ کانٹوں بھری آوازیں
جو لہولہان کر دیتی ہیں خلوص بھرے دل کو
جیسے کھولتا ہوا پانی جلا دیتا ہے کھال کو
ایسے ہی جلایا ہے ان آوازوں نے
دنیا سے ہر احساس کو
لیکن
میں نے بچایا اپنے سچ کو
اور چلتی جا رہی ہوں
سب سے الگ
سن کے انجان رہنے کا عمل کچھ اتنا آسان تو نہیں
بس ایک دیوانگی ہے
جو مجھے بے چین کیے ہوئے ہے
ایک عجب سی کھوج ہے
جو گھٹن بن گئے ہیں سانس لینے کے عمل میں
مگر تو کہاں ہے پیر دانا
تو جو رہنما تھا
مصیبت کے ماروں کا
کہاں بھٹک رہا ہے
تو کیا کل یگ کی وہ گھڑی آ گئی
کہ پیر دانا کو شکار کر لے گئیں
نا گوار آوازیں
افسوس صد افسوس

انجلا ہمیش

نظم

ہم بھلے یا برے
تیری فن کاریاں

پنڈت ودیا رتن عاصی

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے