کی تلاش کا نتیجه | موضو - نظم, صفحہ chust

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "chust"

نظم کے متعلقہ نتیجہ "chust"

نظم

انڈا کھانے سے لہو جسم میں بڑھ جاتا ہے
چست ہوتا ہے بدن ذہن نکھر جاتا ہے

سیدہ فرحت

نظم

خدا علی گڑھ کے مدرسے کو تمام امراض سے شفا دے
بھرے ہوئے ہیں رئیس زادے امیر زادے شریف زادے
لطیف و خوش وضع چست و چالاک و صاف و پاکیزہ شاد و خرم
طبیعتوں میں ہے ان کی جودت دلوں میں ان کے ہیں نیک ارادے
کمال محنت سے پڑھ رہے ہیں کمال غیرت سے پڑھ رہے ہیں
سوار مشرق راہ میں ہیں تو مغربی راہ میں پیادے
ہر اک ہے ان میں کا بے شک ایسا کہ آپ اسے چاہتے ہیں جیسا
دکھاوے محفل میں قد رعنا جو آپ آئیں تو سر جھکا دے
فقیر مانگے تو صاف کہہ دیں کہ تو ہے مضبوط جا کما کھا
قبول فرمائیں آپ دعوت تو اپنا سرمایہ کل کھلا دے
بتوں سے ان کو نہیں لگاوٹ مسوں کی لیتے نہیں وہ آہٹ
تمام قوت ہے صرف خواندن نظر کے بھولے ہیں دل کے سادے
نظر بھی آئے جو زلف پیچاں تو سمجھیں یہ کوئی پالیسی ہے
الکٹرک لائٹ اس کو سمجھیں جو برق وش کوئی کودے
نکلتے ہیں کر کے غول بندی بنام تہذیب و درد مندی
یہ کہہ کے لیتے ہیں سب سے چندے جو تم ہمیں دو تمہیں خدا دے
انہیں اسی بات پر یقیں ہے کہ بس یہی اصل کار دیں ہے
اسی سے ہوگا فروغ قومی اسی سے چمکیں گے باپ دادے
مکان کالج کے سب مکیں ہیں ابھی انہیں تجربے نہیں ہیں
خبر نہیں ہے کہ آگے چل کر ہے کیسی منزل ہیں کیسے جادے
دلوں میں ان کے ہیں نور ایماں قوی نہیں ہے مگر نگہباں
ہوائے منطق ادائے طفلی یہ شمع ایسا نہ ہو بجھا دے
فریب دے کر نکالے مطلب سکھائے تحقیر دین و مذہب
مٹا دے آخر کو دین و مذہب نمود ذاتی کو گو بڑھا دے
یہی بس اکبرؔ کی التجا ہے جناب باری میں یہ دعا ہے
علوم و حکمت کا درس ان کو پروفیسر دیں سمجھ خدا دے

اکبر الہ آبادی

نظم

ارباب بزم بھر تو وہ شاہ اپنے لے کر
سب ہم نشین حسب دل خواہ اپنے لے کر
چالاک چست کافر گمراہ اپنے لے کر
دس بیس گل رخوں کو ہم راہ اپنے لے کر
یوں ہیں بھگونے مجھ کو وہ خوش جمال آیا

نظیر اکبرآبادی

نظم

کل شب عجیب ادا سے تھا اک حسن مہرباں
وہ شبنمی گلاب سی رنگت دھلی دھلی
شانوں پہ بے قرار وہ زلفیں کھلی کھلی
ہر خط جسم پیرہن چست سے عیاں
ٹھہرے بھی گر نگاہ تو ٹھہرے کہاں کہاں
ہر زاویے میں حسن کا اک تازہ بانکپن
ہر دائرے میں کھلتے ہوئے پھول کی پھبن
آنکھوں میں ڈولتے ہوئے نشے کی کیفیت
روئے حسیں پہ ایک شکستہ سی تمکنت
ہونٹوں پہ ان کہی سی تمنا کی لرزشیں
بانہوں میں لمحہ لمحہ سمٹنے کی کاوشیں
سینے کے جزر و مد میں سمندر سا اضطراب
امڈا ہوا سا جذبۂ بیدار کا عذاب
خوشبو طواف قامت زیبا کیے ہوئے
شیشہ بدن کا عزم زلیخا لیے ہوئے
پھر یوں ہوا کہ چھڑ گئی یوسف کی داستاں
پھر میں تھا اور پاکئ دامن کا امتحاں
اک سانپ بھی تھا آدم و حوا کے درمیاں

حمایت علی شاعر

نظم

یوں تو ہر شاعر کی فطرت میں ہے کچھ دیوانگی
غیر ذمہ داریاں ہیں اس کی جزو زندگی
ارض شعرستان میں یہ شاعرانہ خاصیت
کینسر کی طرح سے جب پھیلنے بڑھنے لگی
مختلف اسکول جب جنگی اکھاڑے بن گئے
فکر و فن میں جب نراجی کیفیت پیدا ہوئی
مملکت میں ضابطہ کوئی نہ جب باقی رہا
ہر جگہ قانون کی ہونے لگی بے حرمتی
ایک اک تک بند استادوں کے منہ آنے لگا
لکھ کے صبح و شام نظمیں بے تکی سے بے تکی
کوڑے کرکٹ کی طرح ہر سو نظر آنے لگیں
ڈھیریاں ہی ڈھیریاں دیوان خاص و عام کی
حد تو یہ ہے اہل مچھلی شہر بھی کرنے لگے
ماہی گیری چھوڑ کر دن رات فکر شاعری
جن سے بحران غذا اسٹیٹ میں پیدا ہوا
قحط ماہی سے بڑھی ہر چار جانب بھک مری
چند قومی درد رکھنے والے اہل الرائے سے
قوم کی نا گفتہ بہ حالت نہ جب دیکھی گئی
ایک دستور العمل تیار کرنے کے لیے
اک کمیٹی امنؔ صاحب کی صدارت میں بنی
تاکہ اس پر چل کے نظم و ضبط آئے قوم میں
تاکہ کچھ تو معتدل ہو شاعروں کی زندگی
دوسرے کاموں میں بھی قومی انرجی صرف ہو
تک فروشی کے علاوہ بھی تو مقصد ہو کوئی
دور افلاطونؔ و تلسیؔ داس سے اقبالؔ تک
ہسٹری کل شاعروں کی اس کمیٹی نے پڑھی
دوسرے ملکوں کے آئین و ضوابط میں جہاں
جو مناسب بات تھی وہ چھانٹ کر رکھ لی گئی
رات دن کی سخت محنت اور جاں سوزی کے بعد
اس کمیٹی نے رپورٹ اپنی بالآخر پیش کی
خاکۂ دستور قومی یعنی وہ شعری رپورٹ
امنؔ صاحب نے رقم کی تھی بہ صنف مثنوی
اس پہ رائے عامہ معلوم کرنے کے لیے
شاعروں کو نقل دستاویز کی بھیجی گئی
مختلف اہل سخن نے اپنے اپنے طور پر
رائے دی دستور میں ترمیم یا تنسیخ کی
مثنوی میں خامیاں ڈھونڈیں زباں کی جا بہ جا
ایک شاعر نے جو تھے شاگرد نوح ناروی
سیکڑوں مصرعے بدل کر رکھ دیے کچھ اس طرح
نفس مضموں نذر ہو کر رہ گیا اصلاح کی
ان کا کہنا تھا کہ بندش چست ہونی چاہیے
شعر کے اندر بلا سے ہو نہ فکری تازگی
نعت گو حضرات کا کہنا تھا شاعر کے لیے
شرط اول ہے کہ ہو جائے وہ کٹر مذہبی
عاقبت کی بات سوچے اور مناجاتیں لکھے
اس کے جن میں کار آمد شاعری ہے بس وہی
ایسے شاعر جو کہ حامی تھے ترقی واد کے
ان کا کہنا تھا کہ شاعر کا سخن ہو مقصدی
یعنی پہلے سے مقرر کردہ موضوعات پر
مملکت میں عام کی جائے شعوری شاعری
خواہ شعرستان میں اس کا نہ ہو کوئی وجود
لازماً دکھلائی جائے کشمکش طبقات کی
اک قبیلہ جو مخالف تھا شعوری فکر کا
تھا ترقی وادیوں سے جس کو بغض للہی
اس قبیلے کا یہ کہنا تھا کہ شاعر کا کلام
لازماً ہو اک معمہ قید معنی سے بری
جس کو شاعر خود نہ سمجھے نظم کر لینے کے بعد
جس کو پڑھ کر گم ہو عقل مولویٔ معنوی
دیکھ کر دستور میں نظم و نسق کا تذکرہ
سخت برہم ہو گئے کل شاعران نکسلی
ان کا نکتہ تھا کہ شاعر فطرتاً آزاد ہے
اس پہ لگ سکتی نہیں پابندیاں تنظیم کی
زندگی میں ضابطہ لانے کے بالکل تھے خلاف
ساتھ نکسل وادیوں کے دوسرے حضرات بھی
مختصر یہ ہے کہ سب نے رد کیا دستور کو
ساری محنت امنؔ صاحب کی اکارت ہو گئی
دیکھ کر نا عاقبت اندیشئ اہل سخن
اس طرح گویا ہوئی ان کی مہذب خامشی
مینڈکوں کو تولنا آساں نہیں ہے جس طرح
شاعروں کو بھی منظم کرنا مشکل ہے یوں ہی

رضا نقوی واہی

نظم

امی ابا کیسے ہیں
ٹیڑھے ہیں یا سیدھے ہیں
گم صم رہنے والے ہیں
باتیں کرنے والے ہیں
ذہن و دل کے کیسے ہیں
گرم ہیں یا پھر ٹھنڈے ہیں
پیار لٹانے والے ہیں
آنکھ دکھانے والے ہیں
ناز اٹھانے والے ہیں
ڈانٹ پلانے والے ہیں
دلی میں کیوں رہتے ہیں
دلی میں کیا کرتے ہیں
کھانا کون بناتا ہے
ان کو کون کھلاتا ہے
کن سے باتیں کرتے ہیں
کن کی باتیں سنتے ہیں
تنہا کیسے رہتے ہیں
تنہائی کیوں سہتے ہیں
کیوں سنڈے میں آتے ہیں
انکل جیسے لگتے ہیں
سنڈے میں بھی سوتے ہیں
چھٹی کو بھی کھوتے ہیں
امی ان سے بولو نا
ہونٹ ذرا تم کھولو نا
بولو ان سے پاس رہیں
ہم سے بھی کچھ بات کریں
ہم لوگوں کا حال سنیں
اپنی کوئی بات کہیں
بولو نا کہ چست رہیں
ایسے بھی نہ سست رہیں
ہم کو لے کر شہر چلیں
گھومیں پھریں اور موج کریں
ہم میں کیسی دوری ہے
یہ کیسی مجبوری ہے

غضنفر

نظم

سب آنکھیں ٹانگوں میں جڑی ہیں
ریڑھ کی ہڈی کے منکوں میں کان لگے ہیں
ناف کے اوپر روئیں روئیں میں ایک زباں ہے
پتلونیں ساری آوازیں سن لیتی ہیں
دو پتلونیں جھگڑ رہی ہیں
''اتنی قیمت کیوں لیتی ہو تم میں ایسی کیا خوبی ہے''
کیسے گاہک ہو تم آخر مول بدن کا دے سکتے ہو
پتی ورتا کا مول تمہارے پاس نہیں ہے
چست نکیلا بریزیر یہ چیخ رہا ہے
شرم نہیں آتی کتوں کو چرچ کے آگے کھڑے ہوئے ہیں
رستم ٹھرہ پئے کھڑا ہے بس اسٹاپ کی چھت کے نیچے
اور سہراب سے پوچھ رہا ہے
''بیٹا مال کہاں ملتا ہے؟''
مندر کی چوکھٹ پر بیٹھی اندھی آنکھیں
آتے جاتے اوتاروں کی خفیہ جیبیں تاک رہی ہیں
ہسپتال کے اونچے نیچے زینوں پر اک اک مردے کو
گاندھی جی دونوں ہاتھوں سے انجکشن دیتے پھرتے ہیں
واشنگٹن وتنام میں بیٹھا برہم پتر کے پانی کو وہسکی کے جام میں گھول رہا ہے
لندن لنکا کی سڑکوں پہ سر نیوڑھائے گھوم رہا ہے
کانگوں آوارہ پھرتا ہے پیرس کے گندے چکلوں میں
بدھ کے ٹوٹے پھوٹے بت کے سر پر بوڑھا کرگس
مردوں کی مجلس میں بیٹھا اپنی بپتا سنا رہا ہے
مسجد کے سائے میں بیٹھا کمسن گیدڑ
اس کی گواہی میں کہتا ہے
بیچارہ کم سن ہے اس کی چونچ سے اب تک
دودھ کی خوشبو سی آتی ہے''
اوپر نیلے کھلے گگن میں
ایک کبوتر اپنی چونچ میں اک زیتون کی شاخ لیے اڑتا پھرتا ہے
اور اس شاخ کے دونوں جانب
ایٹم بم کے پات لگے ہیں
انساں کا دایاں بازو اک برگ خزاں کی طرح لرز کر ٹوٹ رہا ہے
اور اس کے بائیں بازو پر کوہ ہمالیہ دھرا ہوا ہے
جانے پھر بھی وہ تلوار کی دھار پہ کیسے چل سکتا ہے
میں اس بھیڑ میں چوراہے پر تنہا بیٹھا سوچ رہا ہوں
دنیا اسرافیل کے پہلے صور کے بعد یوں ہی لگتی ہے
''گیس کے کمرے ''میں شاید یوں ہی ہوتا ہے
پوپ پال کی ٹوپی میرے بھیجے میں دھنستی جاتی ہے

عزیز قیسی

نظم

شرافتوں کے سر و پا
اتار کر پھینکیں
چلیں
سڑک پہ ذرا گھومیں
فقرے چست کریں
کسی کو بے وجہ چھیڑیں
ہنسی اڑائیں
بلائیں
بلا کے پیار کریں
ستائیں
راستے چلتے کسی مسافر کو
غلط پتا دیں
سڑک کے بیچ چلیں
غتہ کو پا کے اترائیں
لگائیں ٹھوکریں
فٹ بال مان کر اس کو
لگے کسی کے جو جا وہ تو
ادھر ادھر جھانکیں
انجان بنیں
سنیں نہ ہارن کوئی
اور مرتے مرتے بچیں کہ
بچتے بچتے ہوئے مرتے عمر بیت گئی

شین کاف نظام

نظم

وہ ایک انسان منحنی سا
تھا جو بظاہر
ضعیف و لاغر
بدن کو کھادی کی ایک دھوتی میں وہ چھپائے
چھڑی اٹھائے
اور اپنی عینک کے تار کانوں میں تھا پھنسائے
بڑا ہی چست اور محنتی تھا
بہت بہادر وہ آدمی تھا

مرتضیٰ ساحل تسلیمی

نظم

تری پلکیں تری آنکھیں ترے ابرو کی لچک
تری قامت کی درازی تری زلفوں کی مہک
ترے الطاف کا عالم تری قربت کا جمال
ترے ہونٹوں کی خموشی تری آنکھوں کے سوال
اک چمکتا ہوا شعلہ ترا رنگین بدن
اک تڑپتی ہوئی بجلی تری آنکھوں کی کرن
ایک تپتا ہوا صحرا تری دوری کا خیال
ایک مہکا ہوا گلشن ہے ترا روز وصال
ایک چڑھتا ہوا دریا ہے تو اک بہتی ناؤ
تیرے سینے کا تموج ترے قامت کا بہاؤ
ترے انداز کا جادو ترے عشوؤں کا فسوں
سب کے سب بن گئے میرے لئے سامان جنوں
تیرے اغماض میں پنہاں ہے محبت کی جھلک
لب اقرار پہ انکار کا پہرہ کب تک
چھڑ گئی ہے جو کبھی پیرہن چست کی بات
پھر گئی ہے مری آنکھوں میں شگوفے کی ذات
میرے ہر ایک اشارے کو سمجھنے والا
قلزم وقت کے دھارے کو سمجھنے والا
میرے ہر ناز کو آنکھوں پہ بٹھایا تو نے
میرے انداز کو سینے سے لگایا تو نے
میرے اطوار کے سانچے میں بصد شوق ڈھلا
آتش غم میں مرے واسطے چپ چاپ جلا
میری خاطر غم دوری بھی گوارا ہے تجھے
میرے اخلاص کا دنیا میں سہارا ہے تجھے
میری ہر بات ہے تیرے لئے قانون حیات
تیرا محور ہے زمانے میں فقط میری ذات
ایسا معصوم کوئی اور زمانے میں کہاں
اتنی سچائی کسی اور فسانے میں کہاں

نیاز گلبرگوی

نظم

تو مری نظم ہے
خود میں مربوط گم اپنی دھن میں رواں
پیچ در پیچ آزاد اور بے نیاز اور مبہم
اندرونی و بیرونی آہنگ میں
اپنے اظہار صد رنگ میں
نغمگی انگ میں تیری آواز اور رنگ میں
یہ اٹھان
یہ کمان
یہ کماں سے نکلتے ہوئے تیر سب بر ہدف
تیز چست
رمز میں اور اظہار بے باک میں بھی اشارے لیے
اپنے ہی استعارے لیے
جو کہانی کہے
کہہ کے بھی ان کہی ان سنی ہی رہے
وصل معنی کے پہلو میں پہلوئے تشنہ لبی ہی رہے
کچھ کمی ہی رہے
تجھ کو پا کر تجھے اور پانے کی تجدید ابلاغ کے کیف میں بار بار
سطر در سطر پڑھتا رہوں
زلفوں پیشانی آنکھوں سے عارض لبوں سے ترے پاؤں کی آخری پور تک
مرے لمس سے
لوح دل پر تری روشنائی پہ اک حرف آئے نہیں
سربسر تو جمی کی جمی ہی رہے
سارے اسرار کھلتے رہیں بند دروازوں پر اور اسرار کے
اور بھی بے پنہ ہوں معانی ترے ایک اقرار اور بیش انکار کے
میں تعاقب میں جن کے رہوں عمر بھر
تو مری نظم ہے جان من

فیصل عظیم

نظم

چست قبا کا یہ عالم ہے تن کا اک اک تل ہے نمایاں
عریاں عریاں باہیں جیسے لچکیلی شاخیں صندل کی

کامل چاند پوری

نظم

میں بنجارہ
وقت کے کتنے شہروں سے گزرا ہوں
لیکن
وقت کے اس اک شہر سے جاتے جاتے مڑ کے دیکھ رہا ہوں
سوچ رہا ہوں
تم سے میرا یہ ناتا بھی ٹوٹ رہا ہے
تم نے مجھ کو چھوڑا تھا جس شہر میں آ کر
وقت کا اب وہ شہر بھی مجھ سے چھوٹ رہا ہے
مجھ کو وداع کرنے آئے ہیں
اس نگری کے سارے باسی
وہ سارے دن
جن کے کندھے پر سوتی ہے
اب بھی تمہاری زلف کی خوشبو
سارے لمحے
جن کے ماتھے پر روشن
اب بھی تمہارے لمس کا ٹیکا
نم آنکھوں سے
گم سم مجھ کو دیکھ رہے ہیں
مجھ کو ان کے دکھ کا پتا ہے
ان کو میرے غم کی خبر ہے
لیکن مجھ کو حکم سفر ہے
جانا ہوگا
وقت کے اگلے شہر مجھے اب جانا ہوگا

جاوید اختر

نظم

یہ تو پوچھو مجھ سے چھٹ کر
تیرے دل پر کیا کیا گزری
تم بن میری ناؤ تو ساجن
ایسی ڈوبی پھر نہ ابھری

جاں نثار اختر

نظم

موتی ہو کہ شیشہ جام کہ در
جو ٹوٹ گیا سو ٹوٹ گیا
کب اشکوں سے جڑ سکتا ہے
جو ٹوٹ گیا سو چھوٹ گیا

فیض احمد فیض

نظم

جو مرحلوں میں ساتھ تھے وہ منزلوں پہ چھٹ گئے
جو رات میں لٹے نہ تھے وہ دوپہر میں لٹ گئے
مگن تھا میں کہ پیار کے بہت سے گیت گاؤں گا
زبان گنگ ہو گئی، گلے میں گیت گھٹ گئے
کٹی ہوئی ہیں انگلیاں رباب ڈھونڈھتا ہوں میں
جنہیں سحر نگل گئی وہ خواب ڈھونڈھتا ہوں میں
کہاں گئی وہ نیند کی شراب ڈھونڈھتا ہوں میں

عامر عثمانی

نظم

عمر بھر کا یہ رشتہ
چھوٹ بھی تو سکتا ہے
آخری وسل کے ساتھ
ڈوب جانے والا دل
ٹوٹ بھی تو سکتا ہے
تم بھی افتخار عارف
بارہویں کھلاڑی ہو
انتظار کرتے ہو
ایک ایسے لمحے کا
ایک ایسی ساعت کا
جس میں حادثہ ہو جائے
جس میں سانحہ ہو جائے
تم بھی افتخار عارف
تم بھی ڈوب جاؤ گے
تم بھی ٹوٹ جاؤ گے

افتخار عارف

نظم

کیا ہند کا زنداں کانپ رہا ہے گونج رہی ہیں تکبیریں
اکتائے ہیں شاید کچھ قیدی اور توڑ رہے ہیں زنجیریں
دیواروں کے نیچے آ آ کر یوں جمع ہوئے ہیں زندانی
سینوں میں تلاطم بجلی کا آنکھوں میں جھلکتی شمشیریں
بھوکوں کی نظر میں بجلی ہے توپوں کے دہانے ٹھنڈے ہیں
تقدیر کے لب کو جنبش ہے دم توڑ رہی ہیں تدبیریں
آنکھوں میں گدا کی سرخی ہے بے نور ہے چہرہ سلطاں کا
تخریب نے پرچم کھولا ہے سجدے میں پڑی ہیں تعمیریں
کیا ان کو خبر تھی زیر و زبر رکھتے تھے جو روح ملت کو
ابلیں گے زمیں سے مار سیہ برسیں گی فلک سے شمشیریں
کیا ان کو خبر تھی سینوں سے جو خون چرایا کرتے تھے
اک روز اسی بے رنگی سے جھلکیں گی ہزاروں تصویریں
کیا ان کو خبر تھی ہونٹوں پر جو قفل لگایا کرتے تھے
اک روز اسی خاموشی سے ٹپکیں گی دہکتی تقریریں
سنبھلو کہ وہ زنداں گونج اٹھا جھپٹو کہ وہ قیدی چھوٹ گئے
اٹھو کہ وہ بیٹھیں دیواریں دوڑو کہ وہ ٹوٹی زنجیریں

جوش ملیح آبادی

نظم

ہوتا ہے مہ وشوں کا وہ عالم ترے حضور
جیسے چراغ مردہ سر بزم شمع طور
آ کر تری جناب میں اے کار‌ ساز نور
پلکوں میں منہ چھپاتے ہیں جھینپے ہوئے غرور
آتی ہے ایک لہر سی چہروں پر آہ کی
آنکھوں میں چھوٹ جاتی ہیں نبضیں نگاہ کی

جوش ملیح آبادی

نظم

اے سپہر بریں کے سیارو
اے فضائے زمیں کے گل زارو
اے پہاڑوں کی دل فریب فضا
اے لب جو کی ٹھنڈی ٹھنڈی ہوا
اے عنادل کے نغمۂ سحری
اے شب ماہتاب تاروں بھری
اے نسیم بہار کے جھونکو
دہر ناپائیدار کے دھوکو
تم ہر اک حال میں ہو یوں تو عزیز
تھے وطن میں مگر کچھ اور ہی چیز
جب وطن میں ہمارا تھا رمنا
تم سے دل باغ باغ تھا اپنا
تم مری دل لگی کے ساماں تھے
تم مرے درد دل کے درماں تھے
تم سے کٹتا تھا رنج تنہائی
تم سے پاتا تھا دل شکیبائی
آن اک اک تمہاری بھاتی تھی
جو ادا تھی وہ جی لبھاتی تھی
کرتے تھے جب تم اپنی غم خواری
دھوئی جاتی تھیں کلفتیں ساری
جب ہوا کھانے باغ جاتے تھے
ہو کے خوش حال گھر میں آتے تھے
بیٹھ جاتے تھے جب کبھی لب آب
دھو کے اٹھتے تھے دل کے داغ شتاب
کوہ و صحرا و آسمان و زمیں
سب مری دل لگی کی شکلیں تھیں
پر چھٹا جس سے اپنا ملک و دیار
جی ہوا تم سے خود بہ خود بیزار
نہ گلوں کی ادا خوش آتی ہے
نہ صدا بلبلوں کی بھاتی ہے
سیر گلشن ہے جی کا اک جنجال
شب مہتاب جان کو ہے وبال
کوہ و صحرا سے تا لب دریا
جس طرف جائیں جی نہیں لگتا
کیا ہوئے وہ دن اور وہ راتیں
تم میں اگلی سی اب نہیں باتیں
ہم ہی غربت میں ہو گئے کچھ اور
یا تمہارے بدل گئے کچھ طور
گو وہی ہم ہیں اور وہی دنیا
پر نہیں ہم کو لطف دنیا کا
اے وطن اے مرے بہشت بریں
کیا ہوئے تیرے آسمان و زمیں
رات اور دن کا وہ سماں نہ رہا
وہ زمیں اور وہ آسماں نہ رہا
تیری دوری ہے مورد آلام
تیرے چھٹنے سے چھٹ گیا آرام
کاٹے کھاتا ہے باغ بن تیرے
گل ہیں نظروں میں داغ بن تیرے
مٹ گیا نقش کامرانی کا
تجھ سے تھا لطف زندگانی کا
جو کہ رہتے ہیں تجھ سے دور سدا
ان کو کیا ہوگا زندگی کا مزا
ہو گیا یاں تو دو ہی دن میں یہ حال
تجھ بن ایک ایک پل ہے اک اک سال
سچ بتا تو سبھی کو بھاتا ہے
یا کہ مجھ سے ہی تیرا ناتا ہے
میں ہی کرتا ہوں تجھ پہ جان نثار
یا کہ دنیا ہے تیری عاشق زار
کیا زمانے کو تو عزیز نہیں
اے وطن تو تو ایسی چیز نہیں
جن و انسان کی حیات ہے تو
مرغ و ماہی کی کائنات ہے تو
ہے نباتات کا نمو تجھ سے
روکھ تجھ بن ہرے نہیں ہوتے
سب کو ہوتا ہے تجھ سے نشو و نما
سب کو بھاتی ہے تیری آب و ہوا
تیری اک مشت خاک کے بدلے
لوں نہ ہرگز اگر بہشت ملے
جان جب تک نہ ہو بدن سے جدا
کوئی دشمن نہ ہو وطن سے ہوا

الطاف حسین حالی

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے