Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "chust"

Nazm MATCHES FOR "chust"

Nazm

ustad ka DanDa

anDaa khaane se lahuu jism me.n ba.Dh jaataa hai
chust hotaa hai badan zehn nikhar jaataa hai

Syeda Farhat
Nazm

madrasa ali-gaDh

KHudaa alii-ga.Dh ke madrase ko tamaam amraaz se shifaa de
bhare hu.e hai.n raiis-zaade amiir-zaade shariif-zaade
latiif o KHush-vaz.a chust o chaalaak o saaf o paakiiza shaad-o-KHurram
tabii.ato.n me.n hai in kii jaudat dilo.n me.n in ke hai.n nek iraade
kamaal-e-mehnat se pa.Dh rahe hai.n kamaal-e-Gairat se pa.Dh rahe hai.n
savaar mashriq raah me.n hai.n to maGribii raah me.n piyaade
har ik hai in me.n kaa be-shak aisaa ki aap use chaahte hai.n jaisaa
dikhaave mahfil me.n qadd-e-ra.anaa jo aap aa.e.n to sar jhukaa de
faqiir maa.nge to saaf kah de.n ki tuu hai mazbuut jaa kamaa khaa
qubuul farmaa.e.n aap daavat to apnaa sarmaaya kul khilaa de
buto.n se in ko nahii.n lagaavaT miso.n kii lete nahii.n vo aahaT
tamaam quvvat hai sarf-e-KHvaandan nazar ke bhole hai.n dil ke saade
nazar bhii aa.e jo zulf-e-pechaa.n to samjhe.n ye ko.ii policy hai
electric light us ko samjhe.n jo barq-vash ko.ii kuude
nikalte hai.n kar ke Gol-bandii ba-naam-e-tahziib o dard-mandii
ye kah ke lete hai.n sab se chande jo tum hame.n do tumhe.n KHudaa de
unhe.n isii baat par yaqii.n hai ki bas yahii asl kaar-e-dii.n hai
isii se hogaa faroG-e-qaumii isii se chamke.nge baap daade
makaan-e-college ke sab makii.n hai.n abhii unhe.n tajrabe nahii.n hai.n
KHabar nahii.n hai ki aage chal kar hai kaisii manzil hai.n kaise jaade
dilo.n me.n in ke hai.n nuur-e-iimaa.n qavii nahii.n hai magar nigahbaa.n
havaa-e-mantiq adaa-e-tiflii ye sham.a aisaa na ho bujhaa de
fareb de kar nikaale matlab sikhaa.e tahqiir-e-diin-o-mazhab
miTaa de aaKHir ko diin-o-maz.hab numuud-e-zaatii ko go ba.Dhaa de
yahii bas 'akbar' kii iltijaa hai janaab baarii me.n ye du.aa hai
uluum o hikmat kaa dars in ko professor de.n samajh KHudaa de

Akbar Allahabadi
Nazm

holi

arbaab-e-bazm bhar to vo shaah apne le kar
sab ham-nashiin hasb-e-dil-KHvaah apne le kar
chaalaak chust kaafir gumraah apne le kar
das biis gul-ruKHo.n ko hamraah apne le kar
yuu.n hii.n bhigone mujh ko vo KHush-jamaal aayaa

Nazeer Akbarabadi
Nazm

dusra tajraba

kal shab ajiib adaa se thaa ik husn mehrbaa.n
vo shabnamii gulaab sii ra.ngat dhulii dhulii
shaano.n pe be-qaraar vo zulfe.n khulii khulii
har KHat-e-jism pairahan-e-chust se ayaa.n
Thahre bhii gar nigaah to Thahre kahaa.n kahaa.n
har zaaviye me.n husn kaa ik taaza baa.nkpan
har daa.ere me.n khilte hu.e phuul kii phaban
aa.nkho.n me.n Dolte hu.e nashshe kii kaifiyat
ruu-e-hasii.n pe ek shikasta sii tamkanat
ho.nTo.n pe an-kahii sii tamannaa kii larzishe.n
baa.nho.n me.n lamha lamha simaTne kii kaavishe.n
siine ke jazr-o-mad me.n samundar saa iztiraab
umDaa hu.aa saa jazba-e-bedaar kaa azaab
KHushbuu tavaaf-e-qaamat-e-zebaa kiye hu.e
shiisha badan kaa azm-e-zuleKHaa liye hu.e
phir yuu.n hu.aa ki chhi.D ga.ii yuusuf kii daastaa.n
phir mai.n thaa aur paakii-e-daaman kaa imtihaa.n
ik saa.np bhii thaa aadam o havvaa ke darmiyaa.n

Himayat Ali Shayar
Nazm

dastur sazi ki koshish

yuu.n to har shaa.ir kii fitrat me.n hai kuchh diivaangii
Gair zimmedaariyaa.n hai.n us kii juzv-e-zindagii
arz-e-sheristaan me.n ye shaa.iraana KHaasiyat
cancer kii tarah se jab phailne ba.Dhne lagii
muKHtalif school jab ja.ngii akhaa.De ban ga.e
fikr-o-fan me.n jab niraajii kaifiyat paidaa hu.ii
mumlikat me.n zaabta ko.ii na jab baaqii rahaa
har jagah qaanuun kii hone lagii be-hurmatii
ek ik tuk-band ustaado.n ke mu.nh aane lagaa
likh ke sub.h-o-shaam nazme.n be-tukii se be-tukii
kuu.De-karkaT kii tarah har suu nazar aane lage.n
Dheriyaa.n hii Dheriyaa.n diivaan-e-KHaas-o-aam kii
had to ye hai ahl-e-machhlii-shahr bhii karne lage
maahii-giirii chho.D kar din raat fikr-e-shaa.irii
jin se bohraan-e-Gizaa state me.n paidaa hu.aa
qaht-e-maahii se ba.Dhii har chaar jaanib bhuk-marii
chand qaumii dard rakhne vaale ahlurraa.e se
qaum kii naa-gufta-ba-haalat na jab dekhii ga.ii
ek dastuur-ul-amal tayyaar karne ke liye
ik kametii 'amn'-saahab kii sadaarat me.n banii
taaki is par chal ke nazm-o-zabt aa.e qaum me.n
taaki kuchh to mo.atadil ho shaa.iro.n kii zindagii
duusre kaamo.n me.n bhii qaumii energy sarf ho
tuk faroshii ke alaava bhii to maqsad ho ko.ii
daur-e-'aflaatuun'-o-'tulsii-das' se 'iqbaal' tak
history kal shaa.iro.n kii is kametii ne pa.Dhii
duusre mulko.n ke aa.iin-o-zavaabit me.n jahaa.n
jo munaasib baat thii vo chhaa.nT kar rakh lii ga.ii
raat din kii saKHt mehnat aur jaa.n-sozii ke ba.ad
is kametii ne report apnii bil-aaKHir pesh kii
KHaaka-e-dastuur-e-qaumii ya.anii vo she.rii report
'amn'-saahab ne raqam kii thii ba-sinf-e-masnavii
is pe raa.e-aamma ma.aluum karne ke liye
shaa.iro.n ko naql dastaavez kii bhejii ga.ii
muKHtalif ahl-e-suKHan ne apne apne taur par
raa.e dii dastuur me.n tarmiim yaa tansiiKH kii
masnavii me.n KHaamiyaa.n Dhuu.nDe.n zabaa.n kii jaa-ba-jaa
ek shaa.ir ne jo the shaagird-e-nuuh-naarvii
saik.Do.n misre badal kar rakh diye kuchh is tarah
nafs-e-mazmuu.n nazr ho kar rah gayaa islaah kii
un kaa kahnaa thaa ki bandish chust honii chaahiye
sher ke andar balaa se ho na fikrii taazgii
na.at-go hazraat kaa kahnaa thaa shaa.ir ke liye
shart avval hai ki ho jaa.e vo kaTTar maz.habii
aaqibat kii baat soche aur munaajaate.n likhe
us ke jan me.n kaar-aamad shaa.irii hai bas vahii
aise shaa.ir jo ki haamii the taraqqii-vaad ke
in kaa kahnaa thaa ki shaa.ir kaa suKHan ho maqsadii
ya.anii pahle se muqarrar-karda mauzuaat par
mumlikat me.n aam kii jaa.e shu.uurii shaa.irii
KHvaah sheristaan me.n is kaa na ho ko.ii vajuud
laaziman dikhlaa.ii jaa.e kashmakash tabqaat kii
ik qabiila jo muKHaalif thaa shu.uurii fikr kaa
thaa taraqqii-vaadiyo.n se jis ko buGz-e-lillaahii
is qabiile kaa ye kahnaa thaa ki shaa.ir kaa kalaam
laaziman ho ik mu.amma qaid-e-ma.anii se barii
jis ko shaa.ir KHud na samjhe nazm kar lene ke ba.ad
jis ko pa.Dh kar gum ho aql-e-maulvii-e-ma.anavii
dekh kar dastuur me.n nazm-o-nasq kaa tazkira
saKHt barham ho ga.e kul shaa.iraan-e-naksalii
in kaa nukta thaa ki shaa.ir fitratan aazaad hai
us pe lag saktii nahii.n paabandiyaa.n tanziim kii
zindagii me.n zaabta laane ke bilkul the KHilaaf
saath naksal-vaadiyo.n ke duusre hazraat bhii
muKHtasar ye hai ki sab ne rad kiyaa dastuur ko
saarii mehnat 'amn'-saahab kii akaarat ho ga.ii
dekh kar naa-aaqibat andeshii-e-ahl-e-suKHan
is tarah goyaa hu.ii un kii mohazzab KHaamushii
me.nDako.n ko taulnaa aasaa.n nahii.n hai jis tarah
shaa.iro.n ko bhii munazzam karnaa mushkil hai yuu.nhii

Raza Naqvi Vahi
Nazm

duri

ammii abbaa kaise hai.n
Te.Dhe hai.n yaa siidhe hai.n
gum-sum rahne vaale hai.n
baate.n karne vaale hai.n
zehn-o-dil ke kaise hai.n
garm hai.n yaa phir ThanDe hai.n
pyaar luTaane vaale hai.n
aa.nkh dikhaane vaale hai.n
naaz uThaane vaale hai.n
Daa.nT pilaane vaale hai.n
dillii me.n kyo.n rahte hai.n
dillii me.n kyaa karte hai.n
khaanaa kaun banaataa hai
un ko kaun khilaataa hai
kin se baate.n karte hai.n
kin kii baate.n sunte hai.n
tanhaa kaise rahte hai.n
tanhaa.ii kyo.n sahte hai.n
kyo.n sunday me.n aate hai.n
uncle jaise lagte hai.n
sunday me.n bhii sote hai.n
chhuTTii ko bhii khote hai.n
ammii un se bolo naa
ho.nT zaraa tum kholo naa
bolo un se paas rahe.n
ham se bhii kuchh baat kare.n
ham logo.n kaa haal sune.n
apnii ko.ii baat kahe.n
bolo naa ki chust rahe.n
aise bhii na sust rahe.n
ham ko le kar shahr chale.n
ghuume.n phire.n aur mauj kare.n
ham me.n kaisii duurii hai
ye kaisii majbuurii hai

Ghazanfar
Nazm

kawak

sab aa.nkhe.n Taa.ngo.n me.n ja.Dii hai.n
rii.Dh kii haDDii ke manko.n me.n kaan lage hai.n
naaf ke uupar ro.e.n ro.e.n me.n ek zabaa.n hai
patluune.n saarii aavaaze.n sun letii hai.n
do patluune.n jhaga.D rahii hai.n
''itnii qiimat kyuu.n letii ho tum me.n aisii kyaa KHuubii hai''
kaise gaahak ho tum aaKHir mol badan kaa de sakte ho
patii-vartaa kaa mol tumhaare paas nahii.n hai
chust nukiilaa brazier ye chiiKH rahaa hai
sharm nahii.n aatii kutto.n ko charch ke aage kha.De hu.e hai.n
rustam Tharra piye kha.Daa hai bus-stop kii chhat ke niiche
aur sohraab se puuchh rahaa hai
''beTaa maal kahaa.n miltaa hai?''
mandir kii chaukhaT par baiThii andhii aa.nkhe.n
aate jaate autaaro.n kii KHufiya jebe.n taak rahii hai.n
haspataal ke uu.nche niiche ziino.n par ik ik murde ko
gaa.ndhii jii dono.n haatho.n se injection dete phirte hai.n
washington vietnam me.n baiThaa barham-putr ke paanii ko whiskey ke jaam me.n ghol rahaa hai
london lanka kii sa.Dko.n pe sar niv.Dhaa.e ghuum rahaa hai
kaa.ngo.n aavaara phirtaa hai paris ke gande chaklo.n me.n
budh ke TuuTe-phuuTe but ke sar par buu.Dhaa kargas
murdo.n kii majlis me.n baiThaa apnii biptaa sunaa rahaa hai
masjid ke saa.e me.n baiThaa kam-sin giida.D
us kii gavaahii me.n kahtaa hai
bechaara kam-sin hai us kii cho.nch se ab tak
duudh kii KHushbuu sii aatii hai
uupar niile khule gagan me.n
ek kabuutar apnii cho.nch me.n ik zaituun kii shaaKH liye u.Dtaa phirtaa hai
aur us shaaKH ke dono.n jaanib
atom bomb ke paat lage hai.n
insaa.n kaa daayaa.n baazuu ik barg-e-KHizaa.n kii tarah laraz kar TuuT rahaa hai
aur us ke baa.e.n baazuu par koh-e-himala dharaa hu.aa hai
jaane phir bhii vo talvaar kii dhaar pe kaise chal saktaa hai
mai.n is bhii.D me.n chauraahe par tanhaa baiThaa soch rahaa huu.n
duniyaa israafiil ke pahle suur ke baa'd yuu.nhii lagtii hai
''gas ke kamre me.n'' shaayad yuu.nhii hotaa hai
pop paal kii Topii mere bheje me.n dha.nstii jaatii hai

Aziz Qaisi
Nazm

tajwiz

sharaafato.n ke sar-o-paa
utaar kar phe.nke.n
chale.n
sa.Dak pe zaraa ghuume.n
fiqre chust kare.n
kisii ko be-vaj.h chhe.De.n
ha.nsii u.Daa.e.n
bulaa.e.n
bulaa ke pyaar kare.n
sataa.e.n
raaste chalte kisii musaafir ko
Galat pataa de.n
sa.Dak ke biich chale.n
Gatta ko paa ke itraa.e.n
lagaa.e.n Thokare.n
footbaal maan kar us ko
lage kisii ke jo jaa vo to
idhar udhar jhaa.nke.n
anjaan bane.n
sune.n na horn ko.ii
aur marte marte bache.n ki
bachte bachte hu.e marte umr biit ga.ii

Sheen Kaaf Nizam
Nazm

wo ek insan

vo ek insaan manhanii saa
thaa jo ba-zaahir
za.iif-o-laaGar
badan ko khaadii kii ek dhotii me.n vo chhupaa.e
chha.Dii uThaa.e
aur apnii ainak ke taar kaano.n me.n thaa pha.nsaa.e
ba.Daa hii chust aur mehnatii thaa
bahut bahaadur vo aadmii thaa

Murtaza Sahil Tasleemi
Nazm

haqiqat-o-afsana

tirii palke.n tirii aa.nkhe.n tire abruu kii lachak
tirii qaamat kii daraazii tirii zulfo.n kii mahak
tire altaaf kaa aalam tirii qurbat kaa jamaal
tire ho.nTo.n kii KHamoshii tirii aa.nkho.n ke savaal
ik chamaktaa hu.aa sho.ala tiraa rangiin badan
ik ta.Daptii hu.ii bijlii tirii aa.nkho.n kii kiran
ek taptaa hu.aa sahraa tirii duurii kaa KHayaal
ek mahkaa hu.aa gulshan hai tiraa roz-e-visaal
ek cha.Dhtaa hu.aa dariyaa hai tuu ik bahtii naav
tere siine kaa tamavvuj tire qaamat kaa bahaa.o
tire andaaz kaa jaaduu tire ishvo.n kaa fusuu.n
sab ke sab ban ga.e mere liye saamaan-e-junuu.n
tere aGmaaz me.n pinhaa.n hai mohabbat kii jhalak
lab-e-iqraar pe inkaar kaa pahra kab tak
chhi.D ga.ii hai jo kabhii pairahan-e-chust kii baat
phir ga.ii hai mirii aa.nkho.n me.n shaguufe kii zaat
mere har ek ishaare ko samajhne vaalaa
qulzum-e-vaqt ke dhaare ko samajhne vaalaa
mere har naaz ko aa.nkho.n pe biThaayaa tuu ne
mere andaaz ko siine se lagaayaa tuu ne
mere atvaar ke saa.nche me.n ba-sad-shauq Dhalaa
aatish-e-Gam me.n mire vaaste chup-chaap jalaa
merii KHaatir Gam-e-duurii bhii gavaaraa hai tujhe
mere iKHlaas kaa duniyaa me.n sahaaraa hai tujhe
merii har baat hai tere liye qaanuun-e-hayaat
teraa mehvar hai zamaane me.n faqat merii zaat
aisaa ma.asuum ko.ii aur zamaane me.n kahaa.n
itnii sachchaa.ii kisii aur fasaane me.n kahaa.n

Niyaz Gulbargavi
Nazm

tu meri nazm hai jaan-e-man

tuu mirii nazm hai
KHud me.n marbuut gum apnii dhun me.n ravaa.n
pech-dar-pech aazaad aur be-niyaaz aur mub.ham
andaruunii-o-bairuunii aahang me.n
apne iz.haar-e-sad-rang me.n
naGmagii a.ng me.n terii aavaaz aur rang me.n
ye uThaan
ye kamaan
ye kamaa.n se nikalte hu.e tiir sab bar-hadaf
tez chust
ramz me.n aur iz.haar-e-bebaak me.n bhii ishaare liye
apne hii isti.aare liye
jo kahaanii kahe
kah ke bhii an-kahii an-sunii hii rahe
vasl-e-ma.anii ke pahluu me.n pahluu-e-tishna-labii hii rahe
kuchh kamii hii rahe
tujh ko paa kar tujhe aur paane kii tajdiid-e-iblaaG ke kaif me.n baar-baar
satr-dar-satr pa.Dhtaa rahuu.n
zulfo.n peshaanii aa.nkho.n se aariz labo.n se tire paa.nv kii aaKHirii por tak
mire lams se
lauh-e-dil par tirii raushnaa.ii pe ik harf aa.e nahii.n
sar-basar to jamii kii jamii hii rahe
saare asraar khulte rahe.n band darvaazo.n par aur asraar ke
aur bhii be-panah ho.n ma.aanii tire ek iqraar aur besh inkaar ke
mai.n ta.aaqub me.n jin ke rahuu.n umr-bhar
tuu mirii nazm hai jaan-e-man

Faisal Azeem
Nazm

sarapa

chust qabaa kaa ye 'aalam hai tan kaa ik ik til hai numaayaa.n
'uryaa.n 'uryaa.n baahe.n jaise lachkiilii shaaKHe.n sandal kii

Kamil Chandpuri
Nazm

banjara

mai.n banjaara
vaqt ke kitne shahro.n se guzraa huu.n
lekin
vaqt ke is ik shahr se jaate jaate mu.D ke dekh rahaa huu.n
soch rahaa huu.n
tum se meraa ye naataa bhii TuuT rahaa hai
tum ne mujh ko chho.Daa thaa jis shahr me.n aa kar
vaqt kaa ab vo shahr bhii mujh se chhuuT rahaa hai
mujh ko vidaa.a karne aa.e hai.n
is nagrii ke saare baasii
vo saare din
jin ke ka.ndhe par sotii hai
ab bhii tumhaarii zulf kii KHushbuu
saare lamhe
jin ke maathe par raushan
ab bhii tumhaare lams kaa Tiikaa
nam aa.nkho.n se
gum-sum mujh ko dekh rahe hai.n
mujh ko in ke dukh kaa pataa hai
in ko mere Gam kii KHabar hai
lekin mujh ko hukm-e-safar hai
jaanaa hogaa
vaqt ke agle shahr mujhe ab jaanaa hogaa

Javed Akhtar
Nazm

KHamosh aawaz

ye to puuchho mujh se chhuT kar
tere dil par kyaa kyaa guzrii
tum bin merii naav to saajan
aisii Duubii phir na ubhrii

Jan Nisar Akhtar
Nazm

shishon ka masiha koi nahin

motii ho ki shiisha jaam ki dur
jo TuuT gayaa so TuuT gayaa
kab ashko.n se ju.D saktaa hai
jo TuuT gayaa so chhuuT gayaa

Faiz Ahmad Faiz
Nazm

KHwab jo bikhar gae

jo marhalo.n me.n saath the vo manzilo.n pe chhuT ga.e
jo raat me.n luTe na the vo dopahar me.n luT ga.e
magan thaa mai.n ki pyaar ke bahut se giit gaa.u.ngaa
zabaan gu.ng ho ga.ii, gale me.n giit ghuT ga.e
kaTii hu.ii hai.n u.ngliyaa.n rubaab Dhuu.nDhtaa huu.n mai.n
jinhe.n sahar nigal ga.ii vo KHvaab Dhuu.nDhtaa huu.n mai.n
kahaa.n ga.ii vo nii.nd kii sharaab Dhuu.nDhtaa huu.n mai.n

Amir Usmani
Nazm

barahwan khilaDi

umr-bhar kaa ye rishta
chhuuT bhii to saktaa hai
aaKHirii whistle ke saath
Duub jaane vaalaa dil
TuuT bhii to saktaa hai
tum bhii iftiKHaar-aarif
baarahve.n khilaa.Dii ho
intizaar karte ho
ek aise lamhe kaa
ek aisii saa.at kaa
jis me.n haadisa ho jaa.e
jis me.n saaneha ho jaa.e
tum bhii iftiKHaar-aarif
tum bhii Duub jaa.oge
tum bhii TuuT jaa.oge

Iftikhar Arif
Nazm

shikast-e-zindan ka KHwab

kyaa hind kaa zindaa.n kaa.np rahaa hai guu.nj rahii hai.n takbiire.n
uktaa.e hai.n shaayad kuchh qaidii aur to.D rahe hai.n zanjiire.n
diivaaro.n ke niiche aa aa kar yuu.n jam.a hu.e hai.n zindaanii
siino.n me.n talaatum bijlii kaa aa.nkho.n me.n jhalaktii shamshiire.n
bhuuko.n kii nazar me.n bijlii hai topo.n ke dahaane ThanDe hai.n
taqdiir ke lab ko jumbish hai dam to.D rahii hai.n tadbiire.n
aa.nkho.n me.n gadaa kii surKHii hai be-nuur hai chehra sultaa.n kaa
taKHriib ne parcham kholaa hai sajde me.n pa.Dii hai.n taamiire.n
kyaa un ko KHabar thii zer-o-zabar rakhte the jo ruuh-e-millat ko
uble.nge zamii.n se maar-e-siyah barse.ngii falak se shamshiire.n
kyaa un ko KHabar thii siino.n se jo KHuun churaayaa karte the
ik roz isii be-ra.ngii se jhalke.ngii hazaaro.n tasviire.n
kyaa un ko KHabar thii ho.nTo.n par jo qufl lagaayaa karte the
ik roz isii KHaamoshii se Tapke.ngii dahaktii taqriire.n
sambhlo ki vo zindaa.n guu.nj uThaa jhapTo ki vo qaidii chhuuT ga.e
uTTho ki vo baiThii.n diivaare.n dau.Do ki vo TuuTii zanjiire.n

Josh Malihabadi
Nazm

apni malka-e-suKHan se

hotaa hai mah-vasho.n kaa vo aalam tire huzuur
jaise charaaG-e-murdaa sar-e-bazm-e-sham-e-tuur
aa kar tirii janaab me.n ai kaar-saaz-e-nuur
palko.n me.n mu.nh chhupaate hai.n jhe.npe hu.e Guruur
aatii hai ek lahr sii chehro.n par aah kii
aa.nkho.n me.n chhuuT jaatii hai.n nabze.n nigaah kii

Josh Malihabadi
Nazm

hubb-e-watan

ai sip.har-e-barii.n ke sayyaaro
ai fazaa-e-zamii.n ke gul-zaaro
ai pahaa.Do.n kii dil-fareb fazaa
ai lab-e-juu kii ThanDii ThanDii havaa
ai anaadil ke naGma-e-saharii
ai shab-e-maahtaab taaro.n bharii
ai nasiim-e-bahaar ke jho.nko
dahr-e-naa-paa.edaar ke dhoko
tum har ik haal me.n ho yuu.n to aziiz
the vatan me.n magar kuchh aur hii chiiz
jab vatan me.n hamaaraa thaa ramnaa
tum se dil baaG baaG thaa apnaa
tum mirii dil-lagii ke saamaa.n the
tum mire dard-e-dil ke darmaa.n the
tum se kaTtaa thaa ra.nj-e-tanhaa.ii
tum se paataa thaa dil shakebaa.ii
aan ik ik tumhaarii bhaatii thii
jo adaa thii vo jii lubhaatii thii
karte the jab tum apnii Gam-KHvaarii
dho.ii jaatii thii.n kulfate.n saarii
jab havaa khaane baaG jaate the
ho ke KHush-haal ghar me.n aate the
baiTh jaate the jab kabhii lab-e-aab
dho ke uThte the dil ke daaG shitaab
koh o sahraa o aasmaan o zamii.n
sab mirii dil-lagii kii shakle.n thii.n
par chhuTaa jis se apnaa mulk o dayaar
jii hu.aa tum se KHud-ba-KHud bezaar
na gulo.n kii adaa KHush aatii hai
na sadaa bulbulo.n kii bhaatii hai
sair-e-gulshan hai jii kaa ik janjaal
shab-e-mahtaab jaan ko hai vabaal
koh o sahraa se taa lab-e-dariyaa
jis taraf jaa.e.n jii nahii.n lagtaa
kyaa hu.e vo din aur vo raate.n
tum me.n aglii sii ab nahii.n baate.n
ham hii Gurbat me.n ho ga.e kuchh aur
yaa tumhaare badal ga.e kuchh taur
go vahii ham hai.n aur vahii duniyaa
par nahii.n ham ko lutf duniyaa kaa
ai vatan ai mire bahisht-e-barii.n
kyaa hu.e tere aasmaan o zamii.n
raat aur din kaa vo samaa.n na rahaa
vo zamii.n aur vo aasmaa.n na rahaa
terii duurii hai morid-e-aalaam
tere chhuTne se chhuT gayaa aaraam
kaaTe khaataa hai baaG bin tere
gul hai.n nazro.n me.n daaG bin tere
miT gayaa naqsh kaamraanii kaa
tujh se thaa lutf zindagaanii kaa
jo ki rahte hai.n tujh se duur sadaa
in ko kyaa hogaa zindagii kaa mazaa
ho gayaa yaa.n to do hii din me.n ye haal
tujh bin ek ek pal hai ik ik saal
sach bataa to sabhii ko bhaataa hai
yaa ki mujh se hii teraa naataa hai
mai.n hii kartaa huu.n tujh pe jaan nisaar
yaa ki duniyaa hai terii aashiq-e-zaar
kyaa zamaane ko tuu aziiz nahii.n
ai vatan tuu to aisii chiiz nahii.n
jin o insaan kii hayaat hai tuu
murG o maahii kii kaa.enaat hai tuu
hai nabaataat kaa numuu tujh se
ruukh tujh bin hare nahii.n hote
sab ko hotaa hai tujh se nashv-o-numaa
sab ko bhaatii hai terii aab-o-havaa
terii ik musht-e-KHaak ke badle
luu.n na hargiz agar bahisht mile
jaan jab tak na ho badan se judaa
ko.ii dushman na ho vatan se havaa

Altaf Hussain Hali
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now