کی تلاش کا نتیجه | موضو - نظم, صفحہ daa.em

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "daa.em"

نظم کے متعلقہ نتیجہ "daa.em"

نظم

مرے ہونٹوں پہ اس کے آخری بوسے کی لذت ثبت ہے
وہ اس کا آخری بوسہ
جو مستقبل کے ہر اک خوف سے آزاد
اک روشن ستارا تھا
گزرتی رات کے ننگے بدن پر تل کی صورت قائم و دائم
ہمیشہ جاگنے والا ستارا
میں جسے اس آگ برساتے ہوئے سورج کے آگے
جگمگاتا دیکھ سکتا ہوں

امجد اسلام امجد

نظم

ٹوٹے ہوئے دلوں کو جوڑے رفوگری سے
جوڑے تمام گرہیں جذبوں کی سادگی سے
رہ جائیں دوست بن کر آئیں جو اجنبی سے
دائم محبتوں کے آب رواں کا جادو

فرحت احساس

نظم

عمر صرف مہلت ہے
عشق لمحۂ دائم
اعتبار باقی ہے
میرا غم سلامت ہے
تیرا حسن ہے قائم
انتظار باقی ہے

عبد الاحد ساز

نظم

مرا سر تم اپنے ہی زانو پہ رکھ کر
مجھے پوچھتی ہو!
کہ میں کون ہوں
کیا ہوں، کیسے ہوں؟
سارے سوالوں کو مٹھی میں رکھ کر
ذرا میری اک بات سن لو
سنو! یہ تمہارے بدن کا خمار آشنا کیف۔۔۔ نرم و مسلسل
مجھے لذتوں کے عمق میں لیے جا رہا ہے
میں پل پل کبھی
لحظہ لحظہ کبھی
دھیرے دھیرے کبھی
لمحہ لمحہ کبھی
ایک دریا کے پھیلاؤ میں ڈوبتا جا رہا ہوں
شرابور طوفان میں تند لہروں کی صورت
نشیلے سمے
ایک آہنگ کے ساتھ ہچکولے کھاتا ہوا
میں کسی سوچ کی رو میں بہتا چلا جا رہا ہوں
مرا دل، مری جاں:
دونوں ہی موسوم ہیں، اس تموج سے
جو میری نس نس میں پیہم مچلتا ہوا
خون کے زیر و بم کی کہانی سناتا ہوا
بہہ رہا ہے
کہ جس کے ہر ایک لمس کی
لذتوں، ذائقوں میں
تمہارا کوئی خواب ہے
جیسے مہتاب ہے
تم تو میرے بدن کا کوئی پارۂ خاک ہو
تم کوئی غیر ہو؟
میری ہم زاد!
ہم کشتیٔ زیست کے بادباں کی طنابیں ہیں دو
ایک تم، ایک میں
جن کا محتاج ہے بادبان نفس
یہ زمیں، یہ زماں
میرے ہی عہد کی داستاں
ہم سے آباد دائم بساط جہاں
اپنے آنگن کی پھولوں بھری کیاریاں

اظہر غوری ندوی

نظم

نیا سال تم کو مبارک ہو بچو
سدا خوش رہو تم پھلو اور پھولو
خدا کی عنایت رہے تم پہ دائم
ہمیشہ رہو سیدھے رستے پہ قائم
ترقی کرو علم میں اور ہنر میں
بلندی ہو پیدا تمہاری نظر میں
غریبوں کی امداد کرتے رہو تم
دم ان کی محبت کا بھرتے رہو تم
رہو تم ہمیشہ قوی اور توانا
زمانہ پکارے تمہیں کہہ کے دانا
جو بگڑے بھی ہوں کام ان کو سنبھالو
کبھی آج کا کام کل پر نہ ٹالو
بنو نیک نیکی تمہارا چلن ہو
بھلائی کی دھن میں ہمیشہ مگن ہو
رہو سکھ سے دائم نہ دکھ پاس آئے
خدا تم کو بیماریوں سے بچائے
دعا ہے یہ نیرؔ کی تم نام پاؤ
اور اس سال میں کچھ نہ کچھ کر دکھاؤ

محمد شفیع الدین نیر

نظم

برسوں بعد بر نوک زبان رہتا ہے کوئی شعر
پھر ایک دن
اس کے جانے پہچانے ہزار مرتبہ دہرائے ہوئے الفاظ کے اندر
کھل جاتا ہے معانی کا ایک نیا دروازہ
اور رہ جاتے ہیں ہم ہکا بکا
جس مفہوم پر سر دھنتے آئے تھے کل تک کتنا سطحی کتنا ادھورا تھا وہ
شکر کرتے ہیں کہ نہیں پوچھ لیا کسی نے ہم سے اس شعر کا مطلب
ستیہ ناس کر ڈالتے اچھے بھلے شعر کا ان نئے معانی کے بغیر ہم
یہی کچھ ہوتا ہے زندگی میں پیش آنے والے
واقعات و حادثات کے ساتھ بھی
جو کچھ بیت گیا اور بیت رہا ہے ہم پر
دیر تک راز ہی نہیں کھلتا اس کی اہمیت کا
بے مقصد ہو رہا ہے یہ سب کچھ
یا اس کا ہمارے مستقبل اور مقدر سے بھی تعلق ہے کچھ
پھر پردہ سا ہٹتا ہے اور ہو جاتے ہیں ہم غرق حیرت
کتنا محدود تھا ہمارا نقد علم
اور کن مغالطوں میں پڑے ہوئے تھے ہم
مجھے تو خوگر سا بنا دیا ہے روزمرہ کی اس حیرانی و پریشانی نے
نئے سے نیا صدمہ سہنے کو تیار رہتا ہوں صبح و شام
اپنی جہالت کے انکشاف پر
ونڈے کرکٹ تو شوق سے دیکھتے ہیں آپ بھی
یوں سمجھیے کہ مشق تھا گزشتہ کل کا میچ آج کے میچ کی
مشق ہے آج کا میچ آنے والے کل کے لیے
اور کل جو میچ ہوگا اپنی جگہ وہ فائنل ہی کیوں نہ ہو
مشق ہوگا پرسوں کے میچ کی
ہڈیاں گل گئیں اتنی سادہ سی بات سمجھتے سمجھتے
کہ ہر دن طلوع ہوتا ہے اپنے ساتھ ایک نیا سوال ایک نیا چیلنج لے کر
اور مطالبہ کرتا ہے ہم سے ایک نئے جواب ایک نئے طرز عمل کا
نہ تو زندگی ہی جامد ہے نہ زندگی کا خالق خدا
زندگی بہتے دریا کی طرح بدلتی رہتی ہے ہر لحظہ قائم و دائم رہتے ہوئے
اور نت نئی تخلیق میں مصروف خدا بھی نہیں ہوتا کبھی پہلے والا خدا
جب زندگی اور اس کے خالق ہی کی کایا کلپ ہوتی رہتی ہے یوں
تو اشعار ہوں یا واقعات و حادثات بدل جاتا ہے ہر شے کا مفہوم
بھئی، بدل جاتے ہیں ہم خود بدل جاتی ہے ہماری نظر ہمارا احساس
بدل جاتی ہیں وہ محبتیں
جن کے ازلی و ابدی ہونے کی قسمیں کھایا کرتے تھے ہم
بدل جاتی ہیں بے بدل دوستیاں
وہ خواہشیں بدل جاتی ہیں جنہوں نے
ایک عمر پاگل بنائے رکھا ہوتا ہے ہمیں
اور تو اور بدل جاتے ہیں دین اور ایمان
راستے ہی نہیں بدل جاتی ہیں منزلیں
سن رہے ہیں آپ
بھر تو نہیں پائے آپ بھی؟
کدھر چل دیے آپ؟
بدل تو نہیں گئے آپ بھی؟

محمد حنیف رامے

نظم

یہ پیاری اردو کہ جس کا نہیں ہے کوئی بدل
حسین ایسی ہے جیسے جمال تاج محل
ہر ایک دیس نواسی نے پائی یہ میراث
وہ رام ہو کہ کرم سنگھ ہو یا کہ میر غیاث
ہے مسجدوں میں مقدس پوتر مندر میں
ہر اک گلی میں چلن اور گزر ہے ہر گھر میں
وہ جو کہ بولتے ہیں بھانت بھانت کی بولی
تو سنئے ان سے بھی اردو جمع ہو جب ٹولی
کہیں بھی جائیے اردو ضرور پائیں گے
سمجھنے بولنے والے تو مل ہی جائیں گے
ادب میں شعر میں اونچا مقام ہے اس کا
سماج کے سبھی شعبوں میں نام ہے اس کا
زوال اس کو کبھی آئے غیر ممکن ہے
دلوں سے محو یہ ہو جائے غیر ممکن ہے
ہے اس کے نور سے روشن سماج کی دنیا
اسی کے دم سے ہے آباد راج کی دنیا
رہے گا قائم و دائم مدام دنیا میں
چلے گا سکۂ اردو تمام دنیا میں
جو زندہ رہنے کو آئے وہ کیسے ہو برباد
اسدؔ لگاؤ یہ نعرہ کہ اردو زندہ باد

احمد مجددی اسد

نظم

ہمارے دل میں تمہاری خاطر
محبتیں تھیں ازل سے زندہ ابد سے قائم
تمہارا ہاتھوں میں ہاتھ لے کر وہ چوم لینا ثبت کرنا وہ لب ملائم
تمہارے عشق کی ہی مانند
تمہارا دکھ بھی ہمارے دل پر رہا تھا دائم
آہ یک دم بے رخی سے
وہ ہاتھ چھوڑے تمہارا جانا
اور رستوں میں دھول بن کر مرا بکھرنا
تمہیں بلانا
وہ دھول ہونا وہ دھول اڑانا
وہ تپتے صحرا کی ریت پر یوں
پٹخ کے سر کو ملول ہونا
وہ روتے روتے صدا لگانا تمہیں بتانا
کہ اب تلک بے امان رستوں
پہ سرد راتوں کی دھند میں لپٹی
اک سسکتی سی یاد لے کر
تمہارے وعدوں کے آسرے پر
وہ سارے وعدے جو جھوٹ نکلے
مجھے ابھی تک گمان کیوں ہے کہ سچ تھے شاید کبھی بتاؤ وہ جھوٹ تھے ناں
وہیں کھڑی ہے کنولؔ تمہاری
جہاں سے تم نے بدل کے رستہ
پلٹ کے اک بار بھی نہ دیکھا
جہاں سلگتی سی ریت پر میں
دھوپ آنچل کو سر پہ اوڑھے
جولائی کی جھلساتی لو میں
خشک سوکھے ہوئے لبوں پر
کربلا سی وہ پیاس لے کر میں تین دن سے وہیں کھڑی تھی
یہ پوچھنے کو کہ اس شام ایسا کیا ہوا تھا خلاف وعدہ جو تم نہ آئے
تمہیں پتا تھا خبر تھی تم کو
تمہیں گوارا نہیں تھا لیکن
کہ پاس آتے مجھے بتاتے کہ ایسے جانے کا کیا سبب تھا بنا بتائے
لال رنگ کا پہن کے جوڑا
لگا کے مہندی سجا کے خود کو
میں کتنے گھنٹوں سے منتظر تھی مگر وہ گرمی کی شام ہائے
خلاف وعدہ جو تم نہ آئے
کہ میں تو اس شام ہی مر گئی تھی
کبھی تو آتے مجھے بتاتے کہ کیوں گئے ہو
فقط یہ کہتے کہ معاف کر دو
کوئی بھی سکہ وفا کا چاہے ہمارے کاسے میں تم نہ بھرتے فقط بتاتے کہ ان درندوں کے بیچ مجھ سی وہ نرم و نازک اکیلی لڑکی کہ جو پرندوں کے پھڑپھڑانے سے خوف کھاتی جو اونچی آوازوں سے ڈر کر سہم سی جاتی
جو جانتی ہی نہیں تھی دنیا تمہارے جیسے بھیڑیوں سے بھری ہوئی ہے
تو آج سن لو
ہمارے دل میں تمہاری خاطر
محبتوں کا وہ باب جو تھا ازل سے زندہ ابد سے قائم
تمام نفرت میں ڈھل چکا ہے
جہاں کھلے تھے گلاب سارے
وہ باغ چاہت کا جل چکا ہے
وہ راہ تکتی کنولؔ کی آنکھیں بھی بجھ چکی ہیں
اور اس کا دل بھی بدل چکا ہے
اب اس کے دل میں تمہاری خاطر
تمام نفرت تمام نفرت تمام نفرت
اور نفرت کے علاوہ تو کچھ نہیں ہے
نہیں ہے کچھ بھی
اسے بتانا
اسے جلانا اسے رلانا
نہیں نہیں یہ نہیں ہے ممکن ہاں پھر بھی لیکن
وہ آنکھیں میچے ملال ہو کر
عجیب غم سے نڈھال ہو کر
تو مت بتانا کہ نظم کا عنوان کیا تھا
جھوٹی نفرت

کنول ملک

نظم

جن کے پھیرے تھے کھنڈر میں ان ہواؤں نے کہا
وقت کی رفتار کا انجام ویرانی ہے کیوں
اس پہ بولی گرد ہیں اس مسئلے کے رخ کئی
اک یہی پہلو بھلا وجہ پریشانی ہے کیوں
میرے بارے میں بھی سوچو وقت ٹھہرے یا چلے
قائم و دائم ہمیشہ میری یکسانی ہے کیوں

اختر بستوی

نظم

دل سے جو بات نکلتی ہے اثر رکھتی ہے
پر نہیں طاقت پرواز مگر رکھتی ہے
قدسی الاصل ہے رفعت پہ نظر رکھتی ہے
خاک سے اٹھتی ہے گردوں پہ گزر رکھتی ہے
عشق تھا فتنہ گر و سرکش و چالاک مرا
آسماں چیر گیا نالۂ بیباک مرا
پیر گردوں نے کہا سن کے کہیں ہے کوئی
بولے سیارے سر عرش بریں ہے کوئی
چاند کہتا تھا نہیں اہل زمیں ہے کوئی
کہکشاں کہتی تھی پوشیدہ یہیں ہے کوئی
کچھ جو سمجھا مرے شکوے کو تو رضواں سمجھا
مجھ کو جنت سے نکالا ہوا انساں سمجھا
تھی فرشتوں کو بھی حیرت کہ یہ آواز ہے کیا
عرش والوں پہ بھی کھلتا نہیں یہ راز ہے کیا
تا سر عرش بھی انساں کی تگ و تاز ہے کیا
آ گئی خاک کی چٹکی کو بھی پرواز ہے کیا
غافل آداب سے سکان زمیں کیسے ہیں
شوخ و گستاخ یہ پستی کے مکیں کیسے ہیں
اس قدر شوخ کہ اللہ سے بھی برہم ہے
تھا جو مسجود ملائک یہ وہی آدم ہے
عالم کیف ہے دانائے رموز کم ہے
ہاں مگر عجز کے اسرار سے نامحرم ہے
ناز ہے طاقت گفتار پہ انسانوں کو
بات کرنے کا سلیقہ نہیں نادانوں کو
آئی آواز غم انگیز ہے افسانہ ترا
اشک بیتاب سے لبریز ہے پیمانہ ترا
آسماں گیر ہوا نعرۂ مستانہ ترا
کس قدر شوخ زباں ہے دل دیوانہ ترا
شکر شکوے کو کیا حسن ادا سے تو نے
ہم سخن کر دیا بندوں کو خدا سے تو نے
ہم تو مائل بہ کرم ہیں کوئی سائل ہی نہیں
راہ دکھلائیں کسے رہرو منزل ہی نہیں
تربیت عام تو ہے جوہر قابل ہی نہیں
جس سے تعمیر ہو آدم کی یہ وہ گل ہی نہیں
کوئی قابل ہو تو ہم شان کئی دیتے ہیں
ڈھونڈنے والوں کو دنیا بھی نئی دیتے ہیں
ہاتھ بے زور ہیں الحاد سے دل خوگر ہیں
امتی باعث رسوائی پیغمبر ہیں
بت شکن اٹھ گئے باقی جو رہے بت گر ہیں
تھا براہیم پدر اور پسر آزر ہیں
بادہ آشام نئے بادہ نیا خم بھی نئے
حرم کعبہ نیا بت بھی نئے تم بھی نئے
وہ بھی دن تھے کہ یہی مایۂ رعنائی تھا
نازش موسم گل لالۂ صحرائی تھا
جو مسلمان تھا اللہ کا سودائی تھا
کبھی محبوب تمہارا یہی ہرجائی تھا
کسی یکجائی سے اب عہد غلامی کر لو
ملت احمد مرسل کو مقامی کر لو
کس قدر تم پہ گراں صبح کی بیداری ہے
ہم سے کب پیار ہے ہاں نیند تمہیں پیاری ہے
طبع آزاد پہ قید رمضاں بھاری ہے
تمہیں کہہ دو یہی آئین وفاداری ہے
قوم مذہب سے ہے مذہب جو نہیں تم بھی نہیں
جذب باہم جو نہیں محفل انجم بھی نہیں
جن کو آتا نہیں دنیا میں کوئی فن تم ہو
نہیں جس قوم کو پروائے نشیمن تم ہو
بجلیاں جس میں ہوں آسودہ وہ خرمن تم ہو
بیچ کھاتے ہیں جو اسلاف کے مدفن تم ہو
ہو نکو نام جو قبروں کی تجارت کر کے
کیا نہ بیچوگے جو مل جائیں صنم پتھر کے
صفحۂ دہر سے باطل کو مٹایا کس نے
نوع انساں کو غلامی سے چھڑایا کس نے
میرے کعبے کو جبینوں سے بسایا کس نے
میرے قرآن کو سینوں سے لگایا کس نے
تھے تو آبا وہ تمہارے ہی مگر تم کیا ہو
ہاتھ پر ہاتھ دھرے منتظر فردا ہو
کیا کہا بہر مسلماں ہے فقط وعدۂ حور
شکوہ بے جا بھی کرے کوئی تو لازم ہے شعور
عدل ہے فاطر ہستی کا ازل سے دستور
مسلم آئیں ہوا کافر تو ملے حور و قصور
تم میں حوروں کا کوئی چاہنے والا ہی نہیں
جلوۂ طور تو موجود ہے موسیٰ ہی نہیں
منفعت ایک ہے اس قوم کا نقصان بھی ایک
ایک ہی سب کا نبی دین بھی ایمان بھی ایک
حرم پاک بھی اللہ بھی قرآن بھی ایک
کچھ بڑی بات تھی ہوتے جو مسلمان بھی ایک
فرقہ بندی ہے کہیں اور کہیں ذاتیں ہیں
کیا زمانے میں پنپنے کی یہی باتیں ہیں
کون ہے تارک آئین رسول مختار
مصلحت وقت کی ہے کس کے عمل کا معیار
کس کی آنکھوں میں سمایا ہے شعار اغیار
ہو گئی کس کی نگہ طرز سلف سے بے زار
قلب میں سوز نہیں روح میں احساس نہیں
کچھ بھی پیغام محمد کا تمہیں پاس نہیں
جا کے ہوتے ہیں مساجد میں صف آرا تو غریب
زحمت روزہ جو کرتے ہیں گوارا تو غریب
نام لیتا ہے اگر کوئی ہمارا تو غریب
پردہ رکھتا ہے اگر کوئی تمہارا تو غریب
امرا نشۂ دولت میں ہیں غافل ہم سے
زندہ ہے ملت بیضا غربا کے دم سے
واعظ قوم کی وہ پختہ خیالی نہ رہی
برق طبعی نہ رہی شعلہ مقالی نہ رہی
رہ گئی رسم اذاں روح بلالی نہ رہی
فلسفہ رہ گیا تلقین غزالی نہ رہی
مسجدیں مرثیہ خواں ہیں کہ نمازی نہ رہے
یعنی وہ صاحب اوصاف حجازی نہ رہے
شور ہے ہو گئے دنیا سے مسلماں نابود
ہم یہ کہتے ہیں کہ تھے بھی کہیں مسلم موجود
وضع میں تم ہو نصاریٰ تو تمدن میں ہنود
یہ مسلماں ہیں جنہیں دیکھ کے شرمائیں یہود
یوں تو سید بھی ہو مرزا بھی ہو افغان بھی ہو
تم سبھی کچھ ہو بتاؤ تو مسلمان بھی ہو
دم تقریر تھی مسلم کی صداقت بیباک
عدل اس کا تھا قوی لوث مراعات سے پاک
شجر فطرت مسلم تھا حیا سے نمناک
تھا شجاعت میں وہ اک ہستی فوق الادراک
خود گدازی نم کیفیت صہبایش بود
خالی از خویش شدن صورت مینا یش بود
ہر مسلماں رگ باطل کے لیے نشتر تھا
اس کے آئینۂ ہستی میں عمل جوہر تھا
جو بھروسا تھا اسے قوت بازو پر تھا
ہے تمہیں موت کا ڈر اس کو خدا کا ڈر تھا
باپ کا علم نہ بیٹے کو اگر ازبر ہو
پھر پسر قابل میراث پدر کیونکر ہو
ہر کوئی مست مئے ذوق تن آسانی ہے
تم مسلماں ہو یہ انداز مسلمانی ہے
حیدری فقر ہے نے دولت عثمانی ہے
تم کو اسلاف سے کیا نسبت روحانی ہے
وہ زمانے میں معزز تھے مسلماں ہو کر
اور تم خوار ہوئے تارک قرآں ہو کر
تم ہو آپس میں غضب ناک وہ آپس میں رحیم
تم خطا کار و خطا بیں وہ خطا پوش و کریم
چاہتے سب ہیں کہ ہوں اوج ثریا پہ مقیم
پہلے ویسا کوئی پیدا تو کرے قلب سلیم
تخت فغفور بھی ان کا تھا سریر کے بھی
یوں ہی باتیں ہیں کہ تم میں وہ حمیت ہے بھی
خودکشی شیوہ تمہارا وہ غیور و خوددار
تم اخوت سے گریزاں وہ اخوت پہ نثار
تم ہو گفتار سراپا وہ سراپا کردار
تم ترستے ہو کلی کو وہ گلستاں بکنار
اب تلک یاد ہے قوموں کو حکایت ان کی
نقش ہے صفحۂ ہستی پہ صداقت ان کی
مثل انجم افق قوم پہ روشن بھی ہوئے
بت ہندی کی محبت میں برہمن بھی ہوئے
شوق پرواز میں مہجور نشیمن بھی ہوئے
بے عمل تھے ہی جواں دین سے بدظن بھی ہوئے
ان کو تہذیب نے ہر بند سے آزاد کیا
لا کے کعبے سے صنم خانے میں آباد کیا
قیس زحمت کش تنہائی صحرا نہ رہے
شہر کی کھائے ہوا بادیہ پیما نہ رہے
وہ تو دیوانہ ہے بستی میں رہے یا نہ رہے
یہ ضروری ہے حجاب رخ لیلا نہ رہے
گلۂ جور نہ ہو شکوۂ بیداد نہ ہو
عشق آزاد ہے کیوں حسن بھی آزاد نہ ہو
عہد نو برق ہے آتش زن ہر خرمن ہے
ایمن اس سے کوئی صحرا نہ کوئی گلشن ہے
اس نئی آگ کا اقوام کہن ایندھن ہے
ملت ختم رسل شعلہ بہ پیراہن ہے
آج بھی ہو جو براہیم کا ایماں پیدا
آگ کر سکتی ہے انداز گلستاں پیدا
دیکھ کر رنگ چمن ہو نہ پریشاں مالی
کوکب غنچہ سے شاخیں ہیں چمکنے والی
خس و خاشاک سے ہوتا ہے گلستاں خالی
گل بر انداز ہے خون شہدا کی لالی
رنگ گردوں کا ذرا دیکھ تو عنابی ہے
یہ نکلتے ہوئے سورج کی افق تابی ہے
امتیں گلشن ہستی میں ثمر چیدہ بھی ہیں
اور محروم ثمر بھی ہیں خزاں دیدہ بھی ہیں
سیکڑوں نخل ہیں کاہیدہ بھی بالیدہ بھی ہیں
سیکڑوں بطن چمن میں ابھی پوشیدہ بھی ہیں
نخل اسلام نمونہ ہے برومندی کا
پھل ہے یہ سیکڑوں صدیوں کی چمن بندی کا
پاک ہے گرد وطن سے سر داماں تیرا
تو وہ یوسف ہے کہ ہر مصر ہے کنعاں تیرا
قافلہ ہو نہ سکے گا کبھی ویراں تیرا
غیر یک بانگ درا کچھ نہیں ساماں تیرا
نخل شمع استی و در شعلہ دو ریشۂ تو
عاقبت سوز بود سایۂ اندیشۂ تو
تو نہ مٹ جائے گا ایران کے مٹ جانے سے
نشۂ مے کو تعلق نہیں پیمانے سے
ہے عیاں یورش تاتار کے افسانے سے
پاسباں مل گئے کعبے کو صنم خانے سے
کشتئ حق کا زمانے میں سہارا تو ہے
عصر نو رات ہے دھندلا سا ستارا تو ہے
ہے جو ہنگامہ بپا یورش بلغاری کا
غافلوں کے لیے پیغام ہے بیداری کا
تو سمجھتا ہے یہ ساماں ہے دل آزاری کا
امتحاں ہے ترے ایثار کا خودداری کا
کیوں ہراساں ہے صہیل فرس اعدا سے
نور حق بجھ نہ سکے گا نفس اعدا سے
چشم اقوام سے مخفی ہے حقیقت تیری
ہے ابھی محفل ہستی کو ضرورت تیری
زندہ رکھتی ہے زمانے کو حرارت تیری
کوکب قسمت امکاں ہے خلافت تیری
وقت فرصت ہے کہاں کام ابھی باقی ہے
نور توحید کا اتمام ابھی باقی ہے
مثل بو قید ہے غنچے میں پریشاں ہو جا
رخت بر دوش ہوائے چمنستاں ہو جا
ہے تنک مایہ تو ذرے سے بیاباں ہو جا
نغمۂ موج ہے ہنگامۂ طوفاں ہو جا
قوت عشق سے ہر پست کو بالا کر دے
دہر میں اسم محمد سے اجالا کر دے
ہو نہ یہ پھول تو بلبل کا ترنم بھی نہ ہو
چمن دہر میں کلیوں کا تبسم بھی نہ ہو
یہ نہ ساقی ہو تو پھر مے بھی نہ ہو خم بھی نہ ہو
بزم توحید بھی دنیا میں نہ ہو تم بھی نہ ہو
خیمہ افلاک کا استادہ اسی نام سے ہے
نبض ہستی تپش آمادہ اسی نام سے ہے
دشت میں دامن کہسار میں میدان میں ہے
بحر میں موج کی آغوش میں طوفان میں ہے
چین کے شہر مراقش کے بیابان میں ہے
اور پوشیدہ مسلمان کے ایمان میں ہے
چشم اقوام یہ نظارہ ابد تک دیکھے
رفعت شان رفعنا لک ذکرک دیکھے
مردم چشم زمیں یعنی وہ کالی دنیا
وہ تمہارے شہدا پالنے والی دنیا
گرمی مہر کی پروردہ ہلالی دنیا
عشق والے جسے کہتے ہیں بلالی دنیا
تپش اندوز ہے اس نام سے پارے کی طرح
غوطہ زن نور میں ہے آنکھ کے تارے کی طرح
عقل ہے تیری سپر عشق ہے شمشیر تری
مرے درویش خلافت ہے جہانگیر تری
ما سوا اللہ کے لیے آگ ہے تکبیر تری
تو مسلماں ہو تو تقدیر ہے تدبیر تری
کی محمد سے وفا تو نے تو ہم تیرے ہیں
یہ جہاں چیز ہے کیا لوح و قلم تیرے ہیں

علامہ اقبال

نظم

چشم نم جان شوریدہ کافی نہیں
تہمت عشق پوشیدہ کافی نہیں
آج بازار میں پا بہ جولاں چلو
دست افشاں چلو مست و رقصاں چلو
خاک بر سر چلو خوں بداماں چلو
راہ تکتا ہے سب شہر جاناں چلو
حاکم شہر بھی مجمع عام بھی
تیر الزام بھی سنگ دشنام بھی
صبح ناشاد بھی روز ناکام بھی
ان کا دم ساز اپنے سوا کون ہے
شہر جاناں میں اب با صفا کون ہے
دست قاتل کے شایاں رہا کون ہے

فیض احمد فیض

نظم

راستے میں رک کے دم لے لوں مری عادت نہیں
لوٹ کر واپس چلا جاؤں مری فطرت نہیں
اور کوئی ہم نوا مل جائے یہ قسمت نہیں
اے غم دل کیا کروں اے وحشت دل کیا کروں

اسرار الحق مجاز

نظم

دنیا کی محفلوں سے اکتا گیا ہوں یا رب
کیا لطف انجمن کا جب دل ہی بجھ گیا ہو
شورش سے بھاگتا ہوں دل ڈھونڈتا ہے میرا
ایسا سکوت جس پر تقریر بھی فدا ہو
مرتا ہوں خامشی پر یہ آرزو ہے میری
دامن میں کوہ کے اک چھوٹا سا جھونپڑا ہو
آزاد فکر سے ہوں عزلت میں دن گزاروں
دنیا کے غم کا دل سے کانٹا نکل گیا ہو
لذت سرود کی ہو چڑیوں کے چہچہوں میں
چشمے کی شورشوں میں باجا سا بج رہا ہو
گل کی کلی چٹک کر پیغام دے کسی کا
ساغر ذرا سا گویا مجھ کو جہاں نما ہو
ہو ہاتھ کا سرہانا سبزے کا ہو بچھونا
شرمائے جس سے جلوت خلوت میں وہ ادا ہو
مانوس اس قدر ہو صورت سے میری بلبل
ننھے سے دل میں اس کے کھٹکا نہ کچھ مرا ہو
صف باندھے دونوں جانب بوٹے ہرے ہرے ہوں
ندی کا صاف پانی تصویر لے رہا ہو
ہو دل فریب ایسا کوہسار کا نظارہ
پانی بھی موج بن کر اٹھ اٹھ کے دیکھتا ہو
آغوش میں زمیں کی سویا ہوا ہو سبزہ
پھر پھر کے جھاڑیوں میں پانی چمک رہا ہو
پانی کو چھو رہی ہو جھک جھک کے گل کی ٹہنی
جیسے حسین کوئی آئینہ دیکھتا ہو
مہندی لگائے سورج جب شام کی دلہن کو
سرخی لیے سنہری ہر پھول کی قبا ہو
راتوں کو چلنے والے رہ جائیں تھک کے جس دم
امید ان کی میرا ٹوٹا ہوا دیا ہو
بجلی چمک کے ان کو کٹیا مری دکھا دے
جب آسماں پہ ہر سو بادل گھرا ہوا ہو
پچھلے پہر کی کوئل وہ صبح کی موذن
میں اس کا ہم نوا ہوں وہ میری ہم نوا ہو
کانوں پہ ہو نہ میرے دیر و حرم کا احساں
روزن ہی جھونپڑی کا مجھ کو سحر نما ہو
پھولوں کو آئے جس دم شبنم وضو کرانے
رونا مرا وضو ہو نالہ مری دعا ہو
اس خامشی میں جائیں اتنے بلند نالے
تاروں کے قافلے کو میری صدا درا ہو
ہر دردمند دل کو رونا مرا رلا دے
بے ہوش جو پڑے ہیں شاید انہیں جگا دے

علامہ اقبال

نظم

بہ حال ناشتا صد زخم ہا و خون ہا خوردم
بہ ہر دم شوکراں آمیختہ معجون ہا خوردم
تمہیں اس بات سے مطلب ہی کیا اور آخرش کیوں ہو
کسی سے بھی نہیں مجھ کو گلہ اور آخرش کیوں ہو
جو ہے اک ننگ ہستی اس کو تم کیا جان بھی لو گے
اگر تم دیکھ لو مجھ کو تو کیا پہچان بھی لو گے

جون ایلیا

نظم

چند روز اور مری جان فقط چند ہی روز
ظلم کی چھاؤں میں دم لینے پہ مجبور ہیں ہم
اور کچھ دیر ستم سہہ لیں تڑپ لیں رو لیں
اپنے اجداد کی میراث ہے معذور ہیں ہم

فیض احمد فیض

نظم

ہر دم ابدی راحت کا سماں دکھلا کے ہمیں دلگیر نہ کر
للٰلہ حباب آب رواں پر نقش بقا تحریر نہ کر
مایوسی کے رمتے بادل پر امید کے گھر تعمیر نہ کر

اختر شیرانی

نظم

مرا قلم نہیں تسبیح اس مبلغ کی
جو بندگی کا بھی ہر دم حساب رکھتا ہے
مرا قلم نہیں میزان ایسے عادل کی
جو اپنے چہرے پہ دہرا نقاب رکھتا ہے

احمد فراز

نظم

سارے جہاں سے اچھا ہندوستاں ہمارا
ہم بلبلیں ہیں اس کی یہ گلستاں ہمارا
غربت میں ہوں اگر ہم رہتا ہے دل وطن میں
سمجھو وہیں ہمیں بھی دل ہو جہاں ہمارا
پربت وہ سب سے اونچا ہم سایہ آسماں کا
وہ سنتری ہمارا وہ پاسباں ہمارا
گودی میں کھیلتی ہیں اس کی ہزاروں ندیاں
گلشن ہے جن کے دم سے رشک جناں ہمارا
اے آب رود گنگا وہ دن ہے یاد تجھ کو
اترا ترے کنارے جب کارواں ہمارا
مذہب نہیں سکھاتا آپس میں بیر رکھنا
ہندی ہیں ہم وطن ہے ہندوستاں ہمارا
یونان و مصر و روما سب مٹ گئے جہاں سے
اب تک مگر ہے باقی نام و نشاں ہمارا
کچھ بات ہے کہ ہستی مٹتی نہیں ہماری
صدیوں رہا ہے دشمن دور زماں ہمارا
اقبالؔ کوئی محرم اپنا نہیں جہاں میں
معلوم کیا کسی کو درد نہاں ہمارا

علامہ اقبال

نظم

لب پہ آتی ہے دعا بن کے تمنا میری
زندگی شمع کی صورت ہو خدایا میری!
دور دنیا کا مرے دم سے اندھیرا ہو جائے!
ہر جگہ میرے چمکنے سے اجالا ہو جائے!
ہو مرے دم سے یونہی میرے وطن کی زینت
جس طرح پھول سے ہوتی ہے چمن کی زینت

علامہ اقبال

نظم

آتا ہے یاد مجھ کو گزرا ہوا زمانہ
وہ باغ کی بہاریں وہ سب کا چہچہانا
آزادیاں کہاں وہ اب اپنے گھونسلے کی
اپنی خوشی سے آنا اپنی خوشی سے جانا
لگتی ہے چوٹ دل پر آتا ہے یاد جس دم
شبنم کے آنسوؤں پر کلیوں کا مسکرانا
وہ پیاری پیاری صورت وہ کامنی سی مورت
آباد جس کے دم سے تھا میرا آشیانا
آتی نہیں صدائیں اس کی مرے قفس میں
ہوتی مری رہائی اے کاش میرے بس میں

علامہ اقبال

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے