Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "daa.em"

Nazm MATCHES FOR "daa.em"

Nazm

aaKHiri bosa

mire ho.nTo.n pe us ke aaKHirii bose kii lazzat sabt hai
vo us kaa aaKHirii bosa
jo mustaqbil ke har ik KHauf se aazaad
ik raushan sitaaraa thaa
guzartii raat ke na.nge badan par til kii suurat qaa.em-o-daa.em
hamesha jaagne vaalaa sitaaraa
mai.n jise is aag barsaate hu.e suuraj ke aage
jagmagaataa dekh saktaa huu.n

Amjad Islam Amjad
Nazm

tarana-e-reKHta

TuuTe hu.e dilo.n ko jo.De rafuugarii se
jo.De tamaam girhe.n jazbo.n kii saadgii se
rah jaa.e.n dost ban kar aa.e.n jo ajnabii se
daa.em mohabbato.n ke aab-e-ravaa.n kaa jaaduu

Farhat Ehsas
Nazm

intizar baqi hai

umr sirf mohlat hai
ishq lamha-e-daa.em
e'tibaar baaqii hai
meraa Gam salaamat hai
teraa husn hai qaa.em
intizaar baaqii hai

Abdul Ahad Saaz
Nazm

aTuT ang

miraa sar tum apne hii zaanuu pe rakh kar
mujhe puuchhtii ho!
ki me.n kaun huu.n
kyaa huu.n, kaise huu.n?
saare savaalo.n ko muTThii me.n rakh kar
zaraa merii ik baat san lo
suno! ye tumhaare badan kaa KHumaar-aashnaa kaif... narm o musalsal
mujhe lazzato.n ke umuq me.n liye jaa rahaa hai
mai.n pal pal kabhii
lahza lahza kabhii
dhiire dhiire kabhii
lamha lamha kabhii
ek dariyaa ke phailaav me.n Duubtaa jaa rahaa huu.n
sharaabor tuufaan me.n tund lahro.n kii suurat
nashiile samay
ek aaha.ng ke saath hachkole khaataa hu.aa
mai.n kisii soch kii rau me.n bahtaa chalaa jaa rahaa huu.n
miraa dil, mirii jaa.n:
dono.n hii mausuum hai.n, us tamavvuj se
jo merii nas nas me.n paiham machaltaa hu.aa
KHuun ke zer-o-bam kii kahaanii sunaataa hu.aa
bah rahaa hai
ki jis ke har ek lams kii
lazzato.n, zaa.iqo.n me.n
tumhaaraa ko.ii KHvaab hai
jaise mahtaab hai
tum to mere badan kaa ko.ii paara-e-KHaak ho
tum ko.ii Gair ho?
merii ham-zaad!
ham kashtii-e-ziist ke baadbaa.n kii tanaabe.n hai.n do
ek tum, ek mai.n
jin kaa mohtaaj hai baadbaan-e-nafas
ye zamii.n, ye zamaa.n
mere hii ahd kii daastaa.n
ham se aabaad daa.em bisaat-e-jahaa.n
apne aa.ngan kii phuulo.n-bharii kiyaariyaa.n

Azhar Ghauri Nadwi
Nazm

naya sal mubarak

nayaa saal tum ko mubaarak ho bachcho
sadaa KHush raho tum phalo aur phuulo
KHudaa kii inaayat rahe tum pe daa.em
hamesha raho siidhe raste pe qaa.em
taraqqii karo ilm me.n aur hunar me.n
bulandii ho paidaa tumhaarii nazar me.n
Gariibo.n kii imdaad karte raho tum
dam un kii mohabbat kaa bharte raho tum
raho tum hamesha qavii aur tavaanaa
zamaana pukaare tumhe.n kah ke daanaa
jo big.De bhii ho.n kaam un ko sambhaalo
kabhii aaj kaa kaam kal par na Taalo
bano nek nekii tumhaaraa chalan ho
bhalaa.ii kii dhun me.n hamesha magan ho
raho sukh se daa.em na dukh paas aa.e
KHudaa tum ko biimaariyo.n se bachaa.e
du.aa hai ye 'nayyar' kii tum naam paa.o
aur is saal me.n kuchh na kuchh kar dikhaa.o

Mohammad Shafiuddin Nayyar
Nazm

mashq

barso.n baa'd bar-nok-e-zabaan rahtaa hai ko.ii sher
phir ek din
us ke jaane pahchaane hazaar martaba dohraa.e hu.e alfaaz ke andar
khul jaataa hai ma.aanii kaa ek nayaa darvaaza
aur rah jaate hai.n ham hakka-bakkaa
jis mafhuum par sar dhunte aa.e the kal tak kitnaa sat.hii kitnaa adhuuraa thaa vo
shukr karte hai.n ki nahii.n puuchh liyaa kisii ne ham se is sher kaa matlab
satya-naas kar Daalte achchhe bhale sher kaa in na.e ma.aanii ke baGair ham
yahii kuchh hotaa hai zindagii me.n pesh aane vaale
vaaqi.aat o haadsaat ke saath bhii
jo kuchh biit gayaa aur biit rahaa hai ham par
der tak raaz hii nahii.n khultaa us kii ahmiyat kaa
be-maqsad ho rahaa hai ye sab kuchh
yaa is kaa hamaare mustaqbil aur muqaddar se bhii ta'alluq hai kuchh
phir parda saa haTtaa hai aur ho jaate hai.n ham Garq-e-hairat
kitnaa mahduud thaa hamaaraa naqd-e-ilm
aur kin muGaalito.n me.n pa.De hu.e the ham
mujhe to KHuugar saa banaa diyaa hai roz-marra kii is hairaanii o pareshaanii ne
na.e se nayaa sadma sahne ko tayyaar rahtaa huu.n sub.h o shaam
apnii jahaalat ke inkishaaf par
one-day cricket to shauq se dekhte hai.n aap bhii
yuu.n samajhiye ki mashq thaa guzishta kal kaa match aaj ke match kii
mashq hai aaj kaa match aane vaale kal ke liye
aur kal jo match hogaa apnii jagah vo final hii kyuu.n na ho
mashq hogaa parso.n ke match kii
haDDiyaa.n gal ga.ii.n itnii saada sii baat samajhte samajhte
ki har din tuluu hotaa hai apne saath ek nayaa savaal ek nayaa challenge le kar
aur mutaaliba kartaa hai ham se ek na.e javaab ek na.e tarz-e-amal kaa
na to zindagii hii jaamid hai na zindagii kaa KHaaliq KHudaa
zindagii bahte dariyaa kii tarah badaltii rahtii hai har lahza qaa.em-o-daa.em rahte hu.e
aur nit-na.ii taKHliiq me.n masruuf KHudaa bhii nahii.n hotaa kabhii pahle vaalaa KHudaa
jab zindagii aur us ke KHaaliq hii kii kaayaa kalp hotii rahtii hai yuu.n
to ash.aar ho.n yaa vaaqi.aat o haadsaat badal jaataa hai hir shai kaa mafhuum
bha.ii, badal jaate hai.n ham KHud badal jaatii hai hamaarii nazar hamaaraa ehsaas
badal jaatii hai.n vo mohabbate.n
jin ke azlii o abadii hone kii qasme.n khaayaa karte the ham
badal jaatii hai.n be-badal dostiyaa.n
vo KHvaahishe.n badal jaatii hai.n jinho.n ne
ek umr paagal banaa.e rakhaa hotaa hai hame.n
aur to aur badal jaate hai.n diin aur iimaan
raaste hii nahii.n badal jaatii hai.n manzile.n
sun rahe hai.n aap
bhar to nahii.n paa.e aap bhii?
kidhar chal diye aap?
badal to nahii.n ga.e aap bhii?

Mohammad Haneef Rame
Nazm

urdu

ye pyaarii urdu ki jis kaa nahii.n hai ko.ii badal
hasiin aisii hai jaise jamaal-e-taaj-mahal
har ek des-nivaasii ne paa.ii ye miiraas
vo raam ho ki karam singh ho yaa ki miir-Giyaas
hai masjido.n me.n muqaddas pavitra mandir me.n
har ik galii me.n chalan aur guzar hai har ghar me.n
vo jo ki bolte hai.n bhaa.nt bhaa.nt kii bolii
to suniye un se bhii urdu jam.a ho jab Tolii
kahii.n bhii jaa.iye urdu zaruur paa.e.nge
samajhne bolne vaale to mil hii jaa.e.nge
adab me.n sher me.n uu.nchaa maqaam hai is kaa
samaaj ke sabhii shobo.n me.n naam hai is kaa
zavaal is ko kabhii aa.e Gair mumkin hai
dilo.n se mahv ye ho jaa.e Gair mumkin hai
hai is ke nuur se raushan samaaj kii duniyaa
isii ke dam se hai aabaad raaj kii duniyaa
rahegaa qaa.em-o-daa.em mudaam duniyaa me.n
chalegaa sikka-e-urdu tamaam duniyaa me.n
jo zinda rahne ko aa.e vo kaise ho barbaad
'asad' lagaa.o ye na.ara ki urdu zindabaad

Ahmad Mujaddadi Asad
Nazm

jhuTi nafrat

hamaare dil me.n tumhaarii KHaatir
mohabbate.n thii.n azal se zinda abad se qaa.em
tumhaaraa haatho.n me.n haath le kar vo chuum lenaa sabt karnaa vo lab mulaa.em
tumhaare 'ishq kii hii maanind
tumhaaraa dukh bhii hamaare dil par rahaa thaa daa.em
aah yak-dam be-ruKHii se
vo haath chho.De tumhaaraa jaanaa
aur rasto.n me.n dhuul ban kar miraa bikharnaa
tumhe.n bulaanaa
vo dhuul honaa vo dhuul u.Daanaa
vo tapte sahraa kii ret par yuu.n
paTaKH ke sar ko maluul honaa
vo rote rote sadaa lagaanaa tumhe.n bataanaa
ki ab talak be-amaan rasto.n
pe sard raato.n kii dhund me.n lipTii
ik sisaktii sii yaad le kar
tumhaare vaa'do.n ke aasare par
vo saare vaa'de jo jhuuT nikle
mujhe abhii tak gumaan kyo.n hai ki sach the shaayad kabhii bataa.o vo jhuuT the naa.n
vahii.n kha.Dii hai 'ka.nval' tumhaarii
jahaa.n se tum ne badal ke rasta
palaT ke ik baar bhii na dekhaa
jahaa.n sulagtii sii ret par mai.n
dhuup aa.nchal ko sar pe o.Dhe
july kii jhulsaatii luu me.n
KHushk suukhe hu.e labo.n par
karbalaa sii vo pyaas le kar mai.n tiin din se vahii.n kha.Dii thii
ye puuchhne ko ki us shaam aisaa kyaa hu.aa thaa KHilaaf-e-vaa’da jo tum na aa.e
tumhe.n pataa thaa KHabar thii tum ko
tumhe.n gavaaraa nahii.n thaa lekin
ki paas aate mujhe bataate ki aise jaane kaa kyaa sabab thaa binaa bataa.e
laal rang kaa pahan ke jo.Daa
lagaa ke meh.ndii sajaa ke KHud ko
mai.n kitne ghanTo.n se muntazir thii magar vo garmii kii shaam haa.e
KHilaaf-e-vaa’da jo tum na aa.e
ki mai.n to us shaam hii mar ga.ii thii
kabhii to aate mujhe bataate ki kyo.n ga.e ho
faqat ye kahte ki mu'aaf kar do
ko.ii bhii sikka vafaa kaa chaahe hamaare kaase me.n tum na bharte faqat bataate ki un darindo.n ke biich mujh sii vo narm-o-naazuk akelii la.Dkii ki jo parindo.n ke pha.Dpha.Daane se KHauf khaatii jo uu.nchii aavaazo.n se Dar kar saham sii jaatii
jo jaantii hii nahii.n thii duniyaa tumhaare jaise bhe.Diyo.n se bharii hu.ii hai
to aaj sun lo
hamaare dil me.n tumhaarii KHaatir
mohabbato.n kaa vo baab jo thaa azal se zinda abad se qaa.em
tamaam nafrat me.n Dhal chukaa hai
jahaa.n khile the gulaab saare
vo baaG chaahat kaa jal chukaa hai
vo raah taktii 'ka.nval' kii aa.nkhe.n bhii bujh chukii hai.n
aur us kaa dil bhii badal chukaa hai
ab us ke dil me.n tumhaarii KHaatir
tamaam nafrat tamaam nafrat tamaam nafrat
aur nafrat ke 'alaava to kuchh nahii.n hai
nahii.n hai kuchh bhii
use bataanaa
use jalaanaa use rulaanaa
nahii.n nahii.n ye nahii.n hai mumkin haa.n phir bhii lekin
vo aa.nkhe.n miiche malaal ho kar
'ajiib Gam se niDhaal ho kar
to mat bataanaa ki nazm kaa 'unvaan kyaa thaa
jhuuTii nafrat

Kanval Malik
Nazm

waqt ke qadam

jin ke phere the kha.nDar me.n in havaa.o.n ne kahaa
vaqt kii raftaar kaa anjaam viiraanii hai kyo.n
is pe bolii gard hai.n is mas.ale ke ruKH ka.ii
ik yahii pahluu bhalaa vaj.h-e-pareshaanii hai kyo.n
mere baare me.n bhii socho vaqt Thahre yaa chale
qaa.em-o-daa.em hamesha merii yaksaanii hai kyo.n

Akhtar Bastavi
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

aaj bazar mein pa-ba-jaulan chalo

chashm-e-nam jaan-e-shoriida kaafii nahii.n
tohmat-e-ishq-e-poshiida kaafii nahii.n
aaj baazaar me.n paa-ba-jaulaa.n chalo
dast-afshaa.n chalo mast o raqsaa.n chalo
KHaak-bar-sar chalo KHuu.n-ba-daamaa.n chalo
raah taktaa hai sab shahr-e-jaanaa.n chalo
haakim-e-shahr bhii majma-e-aam bhii
tiir-e-ilzaam bhii sang-e-dushnaam bhii
sub.h-e-naashaad bhii roz-e-naakaam bhii
un kaa dam-saaz apne sivaa kaun hai
shahr-e-jaanaa.n me.n ab baa-safaa kaun hai
dast-e-qaatil ke shaayaa.n rahaa kaun hai

Faiz Ahmad Faiz
Nazm

aawara

raaste me.n ruk ke dam le luu.n mirii aadat nahii.n
lauT kar vaapas chalaa jaa.uu.n mirii fitrat nahii.n
aur ko.ii ham-navaa mil jaa.e ye qismat nahii.n
ai Gam-e-dil kyaa karuu.n ai vahshat-e-dil kyaa karuu.n

Asrarul Haq Majaz
Nazm

ek aarzu

duniyaa kii mahfilo.n se uktaa gayaa huu.n yaa rab
kyaa lutf anjuman kaa jab dil hii bujh gayaa ho
shorish se bhaagtaa huu.n dil Dhuu.nDtaa hai meraa
aisaa sukuut jis par taqriir bhii fidaa ho
martaa huu.n KHaamushii par ye aarzuu hai merii
daaman me.n koh ke ik chhoTaa saa jho.npa.Daa ho
aazaad fikr se huu.n uzlat me.n din guzaaruu.n
duniyaa ke Gam kaa dil se kaa.nTaa nikal gayaa ho
lazzat sarod kii ho chi.Diyo.n ke chahchaho.n me.n
chashme kii shorisho.n me.n baajaa saa baj rahaa ho
gul kii kalii chaTak kar paiGaam de kisii kaa
saaGar zaraa saa goyaa mujh ko jahaa.n-numaa ho
ho haath kaa sirhaanaa sabze kaa ho bichhaunaa
sharmaa.e jis se jalvat KHalvat me.n vo adaa ho
maanuus is qadar ho suurat se merii bulbul
nanhe se dil me.n us ke khaTkaa na kuchh miraa ho
saf baa.ndhe dono.n jaanib buuTe hare hare ho.n
naddii kaa saaf paanii tasviir le rahaa ho
ho dil-fareb aisaa kohsaar kaa nazaara
paanii bhii mauj ban kar uTh uTh ke dekhtaa ho
aaGosh me.n zamii.n kii soyaa hu.aa ho sabza
phir phir ke jhaa.Diyo.n me.n paanii chamak rahaa ho
paanii ko chhuu rahii ho jhuk jhuk ke gul kii Tahnii
jaise hasiin ko.ii aa.iina dekhtaa ho
meh.ndii lagaa.e suuraj jab shaam kii dulhan ko
surKHii liye sunahrii har phuul kii qabaa ho
raato.n ko chalne vaale rah jaa.e.n thak ke jis dam
ummiid un kii meraa TuuTaa hu.aa diyaa ho
bijlii chamak ke un ko kuTiyaa mirii dikhaa de
jab aasmaa.n pe har suu baadal ghiraa hu.aa ho
pichhle pahr kii koyal vo sub.h kii mo.azzin
mai.n us kaa ham-navaa huu.n vo merii ham-navaa ho
kaano.n pe ho na mere dair o haram kaa ehsaa.n
rauzan hii jho.npa.Dii kaa mujh ko sahar-numaa ho
phuulo.n ko aa.e jis dam shabnam vazuu karaane
ronaa miraa vazuu ho naala mirii du.aa ho
is KHaamushii me.n jaa.e.n itne buland naale
taaro.n ke qaafile ko merii sadaa diraa ho
har dardmand dil ko ronaa miraa rulaa de
behosh jo pa.De hai.n shaayad unhe.n jagaa de

Allama Iqbal
Nazm

daraKHt-e-zard

ba-haal-e-naa-shitaa sad-zaKHm-haa o KHuun-haa KHuudam
ba-har-dam shukaraa.n aameKHta ma.ajuun-haa KHuudam
tumhe.n is baat se matlab hii kyaa aur aaKHirash kyuu.n ho
kisii se bhii nahii.n mujh ko gila aur aaKHirash kyuu.n ho
jo hai ik na.ng-e-hastii us ko tum kyaa jaan bhii loge
agar tum dekh lo mujh ko to kyaa pahchaan bhii loge

Jaun Eliya
Nazm

chand roz aur meri jaan

chand roz aur mirii jaan faqat chand hii roz
zulm kii chhaa.nv me.n dam lene pe majbuur hai.n ham
aur kuchh der sitam sah le.n ta.Dap le.n ro le.n
apne ajdaad kii miiraas hai maazuur hai.n ham

Faiz Ahmad Faiz
Nazm

ai ishq hamein barbaad na kar

har dam abadii raahat kaa samaa.n dikhlaa ke hame.n dil-giir na kar
lillaah habaab-e-aab-e-ravaa.n par naqsh-e-baqaa tahriir na kar
maayuusii ke ramte baadal par ummiid ke ghar ta.amiir na kar

Akhtar Shirani
Nazm

muhasara

miraa qalam nahii.n tasbiih us maballiG kii
jo bandagii kaa bhii har dam hisaab rakhtaa hai
miraa qalam nahii.n miizaan aise aadil kii
jo apne chehre pe dohraa naqaab rakhtaa hai

Ahmad Faraz
Nazm

tarana-e-hindi

saare jahaa.n se achchhaa hindostaa.n hamaaraa
ham bulbule.n hai.n is kii ye gulsitaa.n hamaaraa
Gurbat me.n ho.n agar ham rahtaa hai dil vatan me.n
samjho vahii.n hame.n bhii dil ho jahaa.n hamaaraa
parbat vo sab se uu.nchaa ham-saaya aasmaa.n kaa
vo santarii hamaaraa vo paasbaa.n hamaaraa
godii me.n kheltii hai.n is kii hazaaro.n nadiyaa.n
gulshan hai jin ke dam se rashk-e-jinaa.n hamaaraa
ai aab-ruud-e-ga.ngaa vo din hai yaad tujh ko
utraa tire kinaare jab kaarvaa.n hamaaraa
maz.hab nahii.n sikhaataa aapas me.n bair rakhnaa
hindii hai.n ham vatan hai hindostaa.n hamaaraa
yuunaan o misr o ruumaa sab miT ga.e jahaa.n se
ab tak magar hai baaqii naam-o-nishaa.n hamaaraa
kuchh baat hai ki hastii miTtii nahii.n hamaarii
sadiyo.n rahaa hai dushman daur-e-zamaa.n hamaaraa
'iqbaal' ko.ii mahram apnaa nahii.n jahaa.n me.n
maaluum kyaa kisii ko dard-e-nihaa.n hamaaraa

Allama Iqbal
Nazm

bachche ki dua

lab pe aatii hai du.aa ban ke tamannaa merii
zindagii sham.a kii suurat ho KHudaayaa merii!
duur duniyaa kaa mire dam se a.ndheraa ho jaa.e!
har jagah mere chamakne se ujaalaa ho jaa.e!
ho mire dam se yuu.nhii mere vatan kii ziinat
jis tarah phuul se hotii hai chaman kii ziinat

Allama Iqbal
Nazm

parinde ki fariyaad

aataa hai yaad mujh ko guzraa hu.aa zamaana
vo baaG kii bahaare.n vo sab kaa chahchahaanaa
aazaadiyaa.n kahaa.n vo ab apne gho.nsle kii
apnii KHushii se aanaa apnii KHushii se jaanaa
lagtii hai choT dil par aataa hai yaad jis dam
shabnam ke aa.n.su.o.n par kaliyo.n kaa muskuraanaa
vo pyaarii pyaarii suurat vo kaamanii sii muurat
aabaad jis ke dam se thaa meraa aashiyaanaa
aatii nahii.n sadaa.e.n us kii mire qafas me.n
hotii mirii rihaa.ii ai kaash mere bas me.n

Allama Iqbal
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now