Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "davaam"

نظم کے متعلقہ نتیجہ "davaam"

نظم

تمہاری ارجمند امی کو میں بھولا بہت دن میں
میں ان کی رنگ کی تسکین سے نمٹا بہت دن میں
وہی تو ہیں جنہوں نے مجھ کو پیہم رنگ تھکوایا
وہ کس رگ کا لہو ہے جو میاں میں نے نہیں تھوکا
لہو اور تھوکنا اس کا ہے کاروبار بھی میرا
یہی ہے ساکھ بھی میری یہی معیار بھی میرا
میں وہ ہوں جس نے اپنے خون سے موسم کھلائے ہیں
نجانے وقت کے کتنے ہی عالم آزمائے ہیں
میں اک تاریخ ہوں اور میری جانے کتنی فصلیں ہیں
مری کتنی ہی فرعیں ہیں مری کتنی ہی اصلیں ہیں
حوادث ماجرا ہی ہم رہے ہیں اک زمانے سے
شداید سانحہ ہی ہم رہے ہیں اک زمانے سے
ہمیشہ سے بپا اک جنگ ہے ہم اس میں قائم ہیں
ہماری جنگ خیر و شر کے بستر کی ہے زائیدہ
یہ چرخ جبر کے دوار ممکن کی ہے گرویدہ
لڑائی کے لیے میدان اور لشکر نہیں لازم
سنان و گرز و شمشیر و تبر خنجر نہیں لازم
بس اک احساس لازم ہے کہ ہم بعدین ہیں دنوں
کہ نفی عین عین و سر بہ سر ضدین ہیں دونوں
Luis Urbina نے میری عجب کچھ غم گساری کی
بصد دل دانشی گزران اپنی مجھ پہ طاری کی
بہت اس نے پلائی اور پینے ہی نہ دی مجھ کو
پلک تک اس نے مرنے کے لیے جینے نہ دی مجھ کو
''میں تیرے عشق میں رنجیدہ ہوں ہاں اب بھی کچھ کچھ ہوں
مجھے تیری خیانت نے غضب مجروح کر ڈالا
مگر طیش شدیدانہ کے بعد آخر زمانے میں
رضا کی جاودانہ جبر کی نوبت بھی آ پہنچی''

جون ایلیا
نظم

سلسلۂ روز و شب نقش گر حادثات
سلسلۂ روز و شب اصل حیات و ممات
سلسلۂ روز و شب تار حریر دو رنگ
جس سے بناتی ہے ذات اپنی قبائے صفات
سلسلۂ روز و شب ساز ازل کی فغاں
جس سے دکھاتی ہے ذات زیر و بم ممکنات
تجھ کو پرکھتا ہے یہ مجھ کو پرکھتا ہے یہ
سلسلۂ روز و شب صیرفی کائنات
تو ہو اگر کم عیار میں ہوں اگر کم عیار
موت ہے تیری برات موت ہے میری برات
تیرے شب و روز کی اور حقیقت ہے کیا
ایک زمانے کی رو جس میں نہ دن ہے نہ رات
آنی و فانی تمام معجزہ ہائے ہنر
کار جہاں بے ثبات کار جہاں بے ثبات
اول و آخر فنا باطن و ظاہر فنا
نقش کہن ہو کہ نو منزل آخر فنا
ہے مگر اس نقش میں رنگ ثبات دوام
جس کو کیا ہو کسی مرد خدا نے تمام
مرد خدا کا عمل عشق سے صاحب فروغ
عشق ہے اصل حیات موت ہے اس پر حرام
تند و سبک سیر ہے گرچہ زمانے کی رو
عشق خود اک سیل ہے سیل کو لیتا ہے تھام
عشق کی تقویم میں عصر رواں کے سوا
اور زمانے بھی ہیں جن کا نہیں کوئی نام
عشق دم جبرئیل عشق دل مصطفی
عشق خدا کا رسول عشق خدا کا کلام
عشق کی مستی سے ہے پیکر گل تابناک
عشق ہے صہبائے خام عشق ہے کاس الکرام
عشق فقیہہ حرام عشق امیر جنود
عشق ہے ابن السبیل اس کے ہزاروں مقام
عشق کے مضراب سے نغمۂ تار حیات
عشق سے نور حیات عشق سے نار حیات
اے حرم قرطبہ عشق سے تیرا وجود
عشق سراپا دوام جس میں نہیں رفت و بود
رنگ ہو یا خشت و سنگ چنگ ہو یا حرف و صوت
معجزۂ فن کی ہے خون جگر سے نمود
قطرۂ خون جگر سل کو بناتا ہے دل
خون جگر سے صدا سوز و سرور و سرود
تیری فضا دل فروز میری نوا سینہ سوز
تجھ سے دلوں کا حضور مجھ سے دلوں کی کشود
عرش معلی سے کم سینۂ آدم نہیں
گرچہ کف خاک کی حد ہے سپہر کبود
پیکر نوری کو ہے سجدہ میسر تو کیا
اس کو میسر نہیں سوز و گداز سجود
کافر ہندی ہوں میں دیکھ مرا ذوق و شوق
دل میں صلوٰۃ و درود لب پہ صلوٰۃ و درود
شوق مری لے میں ہے شوق مری نے میں ہے
نغمۂ اللہ ہو میرے رگ و پے میں ہے
تیرا جلال و جمال مرد خدا کی دلیل
وہ بھی جلیل و جمیل تو بھی جلیل و جمیل
تیری بنا پائیدار تیرے ستوں بے شمار
شام کے صحرا میں ہو جیسے ہجوم نخیل
تیرے در و بام پر وادی ایمن کا نور
تیرا منار بلند جلوہ گہ جبرئیل
مٹ نہیں سکتا کبھی مرد مسلماں کہ ہے
اس کی اذانوں سے فاش سر کلیم و خلیل
اس کی زمیں بے حدود اس کا افق بے ثغور
اس کے سمندر کی موج دجلہ و دنیوب و نیل
اس کے زمانے عجیب اس کے فسانے غریب
عہد کہن کو دیا اس نے پیام رحیل
ساقی ارباب ذوق فارس میدان شوق
بادہ ہے اس کا رحیق تیغ ہے اس کی اصیل
مرد سپاہی ہے وہ اس کی زرہ لا الہ
سایۂ شمشیر میں اس کی پنہ لا الہ
تجھ سے ہوا آشکار بندۂ مومن کا راز
اس کے دنوں کی تپش اس کی شبوں کا گداز
اس کا مقام بلند اس کا خیال عظیم
اس کا سرور اس کا شوق اس کا نیاز اس کا ناز
ہاتھ ہے اللہ کا بندۂ مومن کا ہاتھ
غالب و کار آفریں کار کشا کارساز
خاکی و نوری نہاد بندۂ مولا صفات
ہر دو جہاں سے غنی اس کا دل بے نیاز
اس کی امیدیں قلیل اس کے مقاصد جلیل
اس کی ادا دل فریب اس کی نگہ دل نواز
آج بھی اس دیس میں عام ہے چشم غزال
اور نگاہوں کے تیر آج بھی ہیں دل نشیں
بوئے یمن آج بھی اس کی ہواؤں میں ہے
رنگ حجاز آج بھی اس کی نواؤں میں ہے
دیدۂ انجم میں ہے تیری زمیں آسماں
آہ کہ صدیوں سے ہے تیری فضا بے اذاں
کون سی وادی میں ہے کون سی منزل میں ہے
عشق بلا خیز کا قافلۂ سخت جاں
دیکھ چکا المنی شورش اصلاح دیں
جس نے نہ چھوڑے کہیں نقش کہن کے نشاں
حرف غلط بن گئی عصمت پیر کنشت
اور ہوئی فکر کی کشتئ نازک رواں
چشم فرانسیس بھی دیکھ چکی انقلاب
جس سے دگر گوں ہوا مغربیوں کا جہاں
ملت رومی نژاد کہنہ پرستی سے پیر
لذت تجدیدہ سے وہ بھی ہوئی پھر جواں
روح مسلماں میں ہے آج وہی اضطراب
راز خدائی ہے یہ کہہ نہیں سکتی زباں
نرم دم گفتگو گرم دم جستجو
رزم ہو یا بزم ہو پاک دل و پاک باز
نقطۂ پرکار حق مرد خدا کا یقیں
اور یہ عالم تمام وہم و طلسم و مجاز
عقل کی منزل ہے وہ عشق کا حاصل ہے وہ
حلقۂ آفاق میں گرمئ محفل ہے وہ
کعبۂ ارباب فن سطوت دین مبیں
تجھ سے حرم مرتبت اندلسیوں کی زمیں
ہے تہ گردوں اگر حسن میں تیری نظیر
قلب مسلماں میں ہے اور نہیں ہے کہیں
آہ وہ مردان حق وہ عربی شہسوار
حامل خلق عظیم صاحب صدق و یقیں
جن کی حکومت سے ہے فاش یہ رمز غریب
سلطنت اہل دل فقر ہے شاہی نہیں
جن کی نگاہوں نے کی تربیت شرق و غرب
ظلمت یورپ میں تھی جن کی خرد راہ بیں
جن کے لہو کے طفیل آج بھی ہیں اندلسی
خوش دل و گرم اختلاط سادہ و روشن جبیں
دیکھیے اس بحر کی تہہ سے اچھلتا ہے کیا
گنبد نیلوفری رنگ بدلتا ہے کیا
وادی کہسار میں غرق شفق ہے سحاب
لعل بدخشاں کے ڈھیر چھوڑ گیا آفتاب
سادہ و پرسوز ہے دختر دہقاں کا گیت
کشتئ دل کے لیے سیل ہے عہد شباب
آب روان کبیر تیرے کنارے کوئی
دیکھ رہا ہے کسی اور زمانے کا خواب
عالم نو ہے ابھی پردۂ تقدیر میں
میری نگاہوں میں ہے اس کی سحر بے حجاب
پردہ اٹھا دوں اگر چہرۂ افکار سے
لا نہ سکے گا فرنگ میری نواؤں کی تاب
جس میں نہ ہو انقلاب موت ہے وہ زندگی
روح امم کی حیات کشمکش انقلاب
صورت شمشیر ہے دست قضا میں وہ قوم
کرتی ہے جو ہر زماں اپنے عمل کا حساب
نقش ہیں سب ناتمام خون جگر کے بغیر
نغمہ ہے سودائے خام خون جگر کے بغیر

علامہ اقبال
نظم

کیوں تعجب ہے مری صحرا نوردی پر تجھے
یہ تگا پوئے دمادم زندگی کی ہے دلیل
اے رہين خانہ تو نے وہ سماں دیکھا نہیں
گونجتی ہے جب فضائے دشت میں بانگ رحیل
ریت کے ٹیلے پہ وہ آہو کا بے پروا خرام
وہ حضر بے برگ و ساماں وہ سفر بے سنگ و ميل
وہ نمود‌ اختر سیماب پا ہنگام صبح
یا نمایاں بام گردوں سے جبین جبرئيل
وہ سکوت‌ شام صحرا میں غروب آفتاب
جس سے روشن تر ہوئی چشم جہاں بين خليل
اور وہ پانی کے چشمے پر مقام کارواں
اہل ایماں جس طرح جنت میں گرد سلسبيل
تازہ ویرانے کی سودائے محبت کو تلاش
اور آبادی میں تو زنجيري کشت و نخيل
پختہ تر ہے گردش پیہم سے جام زندگی
ہے یہی اے بے خبر راز دوام زندگی

علامہ اقبال
نظم

قلب و نظر کی زندگی دشت میں صبح کا سماں
چشمۂ آفتاب سے نور کی ندیاں رواں!
حسن ازل کی ہے نمود چاک ہے پردۂ وجود
دل کے لیے ہزار سود ایک نگاہ کا زیاں!
سرخ و کبود بدلیاں چھوڑ گیا سحاب شب!
کوہ اضم کو دے گیا رنگ برنگ طیلساں!
گرد سے پاک ہے ہوا برگ نخیل دھل گئے
ریگ نواح کاظمہ نرم ہے مثل پرنیاں
آگ بجھی ہوئی ادھر، ٹوٹی ہوئی طناب ادھر
کیا خبر اس مقام سے گزرے ہیں کتنے کارواں
آئی صدائے جبرئیل تیرا مقام ہے یہی
اہل فراق کے لیے عیش دوام ہے یہی
کس سے کہوں کہ زہر ہے میرے لیے مئے حیات
کہنہ ہے بزم کائنات تازہ ہیں میرے واردات!
کیا نہیں اور غزنوی کارگہ حیات میں
بیٹھے ہیں کب سے منتظر اہل حرم کے سومنات!
ذکر عرب کے سوز میں، فکر عجم کے ساز میں
نے عربی مشاہدات، نے عجمی تخیلات
قافلۂ حجاز میں ایک حسین بھی نہیں
گرچہ ہے تاب دار ابھی گیسوئے دجلہ و فرات!
عقل و دل و نگاہ کا مرشد اولیں ہے عشق
عشق نہ ہو تو شرع و دیں بتکدۂ تصورات!
صدق خلیل بھی ہے عشق صبر حسین بھی ہے عشق!
معرکۂ وجود میں بدر و حنین بھی ہے عشق!
آیۂ کائنات کا معنئ دیر یاب تو!
نکلے تری تلاش میں قافلہ ہائے رنگ و بو!
جلوتیان مدرسہ کور نگاہ و مردہ ذوق
جلوتیان میکدہ کم طلب و تہی کدو!
میں کہ مری غزل میں ہے آتش رفتہ کا سراغ
میری تمام سرگزشت کھوئے ہوؤں کی جستجو!
باد صبا کی موج سے نشو و نمائے خار و خس!
میرے نفس کی موج سے نشو و نمائے آرزو!
خون دل و جگر سے ہے میری نوا کی پرورش
ہے رگ ساز میں رواں صاحب ساز کا لہو!
فرصت کشمکش میں ایں دل بے قرار را
یک دو شکن زیادہ کن گیسوئے تابدار را
لوح بھی تو، قلم بھی تو، تیرا وجود الکتاب!
گنبد آبگینہ رنگ تیرے محیط میں حباب!
عالم آب و خاک میں تیرے ظہور سے فروغ
ذرۂ ریگ کو دیا تو نے طلوع آفتاب!
شوکت سنجر و سلیم تیرے جلال کی نمود!
فقر جنیدؔ و بایزیدؔ تیرا جمال بے نقاب!
شوق ترا اگر نہ ہو میری نماز کا امام
میرا قیام بھی حجاب !میرا سجود بھی حجاب!
تیری نگاہ ناز سے دونوں مراد پا گئے
عقل، غیاب و جستجو! عشق، حضور و اضطراب!
تیرہ و تار ہے جہاں گردش آفتاب سے!
طبع زمانہ تازہ کر جلوۂ بے حجاب سے!
تیری نظر میں ہیں تمام میرے گزشتہ روز و شب
مجھ کو خبر نہ تھی کہ ہے علم تخیل بے رطب!
تازہ مرے ضمیر میں معرکۂ کہن ہوا!
عشق تمام مصطفی! عقل تمام بو لہب!
گاہ بحیلہ می برد، گاہ بزور می کشد
عشق کی ابتدا عجب عشق کی انتہا عجب!
عالم سوز و ساز میں وصل سے بڑھ کے ہے فراق
وصل میں مرگ آرزو! ہجر میں لذت طلب!
عین وصال میں مجھے حوصلۂ نظر نہ تھا
گرچہ بہانہ جو رہی میری نگاہ بے ادب!
گرمئ آرزو فراق! شورش ہائے و ہو فراق!
موج کی جستجو فراق! قطرہ کی آبرو فراق!

علامہ اقبال
نظم

وہ میری ماں میں کبھی جس کی پیٹھ پر نہ چڑھا
وہ میری ماں کبھی کچھ جس کے کان میں نہ رکھا
وہ ماں کبھی جو مجھے کردھنی پنہا نہ سکی
جو تال ہاتھ سے دے کر مجھے نچا نہ سکی
جو میرے ہاتھ سے اک دن دوا بھی پی نہ سکی
کہ مجھ کو زندگی دینے میں جان ہی دے دی
وہ ماں نہ دیکھ سکا زندگی میں جس کی چاہ
اسی کی بھٹکتی ہوئی روح کو دکھاتا راہ

فراق گورکھپوری
نظم

جو مٹنے والے ہیں ان کے لئے دوام لکھوں
ثنا یزید کی اور شمر پر سلام لکھوں

حبیب جالب
نظم

دیار ہند تھا گہوارہ یاد ہے ہم دم
بہت زمانہ ہوا کس کے کس کے بچپن کا
اسی زمین پہ کھیلا ہے رامؔ کا بچپن
اسی زمین پہ ان ننھے ننھے ہاتھوں نے
کسی سمے میں دھنش بان کو سنبھالا تھا
اسی دیار نے دیکھی ہے کرشنؔ کی لیلا
یہیں گھروندوں میں سیتا سلوچنا رادھا
کسی زمانے میں گڑیوں سے کھیلتی ہوں گی
یہی زمیں یہی دریا پہاڑ جنگل باغ
یہی ہوائیں یہی صبح و شام سورج چاند
یہی گھٹائیں یہی برق و رعد و قوس قزح
یہیں کے گیت روایات موسموں کے جلوس
ہوا زمانہ کہ سدھارتھؔ کے تھے گہوارے
انہی نظاروں میں بچپن کٹا تھا وکرمؔ کا
سنا ہے بھرترہریؔ بھی انہیں سے کھیلا تھا
بھرتؔ اگستؔ کپلؔ ویاسؔ پاشیؔ کوٹیلہؔ
جنکؔ وششتؔ منوؔ والمیکؔ وشوامترؔ
کنادؔ گوتمؔ و رامانجؔ کمارلؔ بھٹ
موہن جوڈارو ہڑپا کے اور اجنتا کے
بنانے والے یہیں بلموں سے کھیلے تھے
اسی ہنڈولے میں بھوبھوتؔ و کالیداسؔ کبھی
ہمک ہمک کے جو تتلا کے گنگنائے تھے
سرسوتی نے زبانوں کو ان کی چوما تھا
یہیں کے چاند و سورج کھلونے تھے ان کے
انہیں فضاؤں میں بچپن پلا تھا خسروؔ کا
اسی زمیں سے اٹھے تان سینؔ اور اکبرؔ
رحیمؔ نانکؔ و چیتنیہؔ اور چشتیؔ نے
انہیں فضاؤں میں بچپن کے دن گزارے تھے
اسی زمیں پہ کبھی شاہزادۂ خرمؔ
ذرا سی دل شکنی پر جو رو دیا ہوگا
بھر آیا تھا دل نازک تو کیا عجب اس میں
ان آنسوؤں میں جھلک تاج کی بھی دیکھی ہو
اہلیا بائیؔ دمنؔ پدمنیؔ و رضیہؔ نے
یہیں کے پیڑوں کی شاخوں میں ڈالے تھے جھولے
اسی فضا میں بڑھائی تھی پینگ بچپن کی
انہی نظاروں میں ساون کے گیت گائے تھے
اسی زمین پہ گھٹنوں کے بل چلے ہوں گے
ملکؔ محمد و رسکھانؔ اور تلسیؔ داس
انہیں فضاؤں میں گونجی تھی توتلی بولی
کبیرؔ داس ٹکارامؔ سورؔ و میراؔ کی
اسی ہنڈولے میں ودیاپتیؔ کا کنٹھ کھلا
اسی زمین کے تھے لال میرؔ و غالبؔ بھی
ٹھمک ٹھمک کے چلے تھے گھروں کے آنگن میں
انیسؔ و حالیؔ و اقبالؔ اور وارثؔ شاہ
یہیں کی خاک سے ابھرے تھے پریم چندؔ و ٹیگورؔ
یہیں سے اٹھے تھے تہذیب ہند کے معمار
اسی زمین نے دیکھا تھا بال پن ان کا
یہیں دکھائی تھیں ان سب نے بال لیلائیں
یہیں ہر ایک کے بچپن نے تربیت پائی
یہیں ہر ایک کے جیون کا بال کانڈ کھلا
یہیں سے اٹھتے بگولوں کے ساتھ دوڑے ہیں
یہیں کی مست گھٹاؤں کے ساتھ جھومے ہیں
یہیں کی مدھ بھری برسات میں نہائے ہیں
لپٹ کے کیچڑ و پانی سے بچپنے ان کے
اسی زمین سے اٹھے وہ دیش کے ساونت
اڑا دیا تھا جنہیں کمپنی نے توپوں سے
اسی زمین سے اٹھی ہیں ان گنت نسلیں
پلے ہیں ہند ہنڈولے میں ان گنت بچے
مجھ ایسے کتنے ہی گمنام بچے کھیلے ہیں
اسی زمیں سے اسی میں سپرد خاک ہوئے
زمین ہند اب آرام گاہ ہے ان کی
اس ارض پاک سے اٹھیں بہت سی تہذیبیں
یہیں طلوع ہوئیں اور یہیں غروب ہوئیں
اسی زمین سے ابھرے کئی علوم و فنون
فراز کوہ ہمالہ یہ دور گنگ و جمن
اور ان کی گود میں پروردہ کاروانوں نے
یہیں رموز خرام سکوں نما سیکھے
نسیم صبح تمدن نے بھیرویں چھیڑی
یہیں وطن کے ترانوں کی وہ پویں پھوٹیں
وہ بے قرار سکوں زا ترنم سحری
وہ کپکپاتے ہوئے سوز و ساز کے شعلے
انہی فضاؤں میں انگڑائیاں جو لے کے اٹھے
لوؤں سے جن کے چراغاں ہوئی تھی بزم حیات
جنہوں نے ہند کی تہذیب کو زمانہ ہوا
بہت سے زاویوں سے آئینہ دکھایا تھا
اسی زمیں پہ ڈھلی ہے مری حیات کی شام
اسی زمین پہ وہ صبح مسکرائی ہے
تمام شعلہ و شبنم مری حیات کی صبح
سناؤں آج کہانی میں اپنے بچپن کی
دل و دماغ کی کلیاں ابھی نہ چٹکی تھیں
ہمیشہ کھیلتا رہتا تھا بھائی بہنوں میں
ہمارے ساتھ محلے کی لڑکیاں لڑکے
مچائے رکھتے تھے بالک ادھم ہر ایک گھڑی
لہو ترنگ اچھل پھاند کا یہ عالم تھا
محلہ سر پہ اٹھائے پھرے جدھر گزرے
ہمارے چہچہے اور شور گونجتے رہتے
چہار سمت محلے کے گوشے گوشے میں
فضا میں آج بھی لا ریب گونجتے ہوں گے
اگرچہ دوسرے بچوں کی طرح تھا میں بھی
بظاہر اوروں کے بچپن سا تھا مرا بچپن
یہ سب سہی مرے بچپن کی شخصیت بھی تھی ایک
وہ شخصیت کہ بہت شوخ جس کے تھے خد و خال
ادا ادا میں کوئی شان انفرادی تھی
غرض کچھ اور ہی لچھن تھے میرے بچپن کے
مجھے تھا چھوٹے بڑوں سے بہت شدید لگاؤ
ہر ایک پر میں چھڑکتا تھا اپنی ننھی سی جاں
دل امڈا آتا تھا ایسا کہ جی یہ چاہتا تھا
اٹھا کے رکھ لوں کلیجے میں اپنی دنیا کو
مجھے ہے یاد ابھی تک کہ کھیل کود میں بھی
کچھ ایسے وقفے پر اسرار آ ہی جاتے تھے
کہ جن میں سوچنے لگتا تھا کچھ مرا بچپن
کئی معانئ بے لفظ چھونے لگتے تھے
بطون غیب سے میرے شعور اصغر کو
ہر ایک منظر مانوس گھر کا ہر گوشہ
کسی طرح کی ہو گھر میں سجی ہوئی ہر چیز
مرے محلے کی گلیاں مکاں در و دیوار
چبوترے کنویں کچھ پیڑ جھاڑیاں بیلیں
وہ پھیری والے کئی ان کے بھانت بھانت کے بول
وہ جانے بوجھے مناظر وہ آسماں و زمیں
بدلتے وقت کا آئینہ گرمی و خنکی
غروب مہر میں رنگوں کا جاگتا جادو
شفق کے شیش محل میں گداز پنہاں سے
جواہروں کی چٹانیں سی کچھ پگھلتی ہوئیں
شجر حجر کی وہ کچھ سوچتی ہوئی دنیا
سہانی رات کی مانوس رمزیت کا فسوں
علی الصباح افق کی وہ تھرتھراتی بھویں
کسی کا جھانکنا آہستہ پھوٹتی پو سے
وہ دوپہر کا سمے درجۂ تپش کا چڑھاؤ
تھکی تھکی سی فضا میں وہ زندگی کا اتار
ہوا کی بنسیاں بنسواڑیوں میں بجتی ہوئیں
وہ دن کے بڑھتے ہوئے سائے سہ پہر کا سکوں
سکوت شام کا جب دونوں وقت ملتے ہیں
غرض جھلکتے ہوئے سرسری مناظر پر
مجھے گمان پرستانیت کا ہوتا تھا
ہر ایک چیز کی وہ خواب ناک اصلیت
مرے شعور کی چلمن سے جھانکتا تھا کوئی
لیے ربوبیت کائنات کا احساس
ہر ایک جلوے میں غیب و شہود کا وہ ملاپ
ہر اک نظارہ اک آئینہ خانۂ حیرت
ہر ایک منظر مانوس ایک حیرت زار
کہیں رہوں کہیں کھیلوں کہیں پڑھوں لکھوں
مرے شعور پہ منڈلاتے تھے مناظر دہر
میں اکثر ان کے تصور میں ڈوب جاتا تھا
وفور جذبہ سے ہو جاتی تھی مژہ پر نم
مجھے یقین ہے ان عنصری مناظر سے
کہ عام بچوں سے لیتا تھا میں زیادہ اثر
کسی سمے مری طفلی رہی نہ بے پروا
نہ چھو سکی مری طفلی کو غفلت طفلی
یہ کھیل کود کے لمحوں میں ہوتا تھا احساس
دعائیں دیتا ہو جیسے مجھے سکوت دوام
کہ جیسے ہاتھ ابد رکھ دے دوش طفلی پر
ہر ایک لمحہ کے رخنوں سے جھانکتی صدیاں
کہانیاں جو سنوں ان میں ڈوب جاتا تھا
کہ آدمی کے لیے آدمی کی جگ بیتی
سے بڑھ کے کون سی شے اور ہو ہی سکتی ہے
انہی فسانوں میں پنہاں تھے زندگی کے رموز
انہی فسانوں میں کھلتے تھے راز ہائے حیات
انہیں فسانوں میں ملتی تھیں زیست کی قدریں
رموز بیش بہا ٹھیٹھ آدمیت کے
کہانیاں تھیں کہ صد درس گاہ رقت قلب
ہر اک کہانی میں شائستگی غم کا سبق
وہ عنصر آنسوؤں کا داستان انساں میں
وہ نل دمن کی کتھا سر گزشت ساوتری
شکنتلاؔ کی کہانی بھرتؔ کی قربانی
وہ مرگ بھیشم پتامہ وہ سیج تیروں کی
وہ پانچوں پانڈوں کی سورگ یاترا کی کتھا
وطن سے رخصت سدھارتھؔ رامؔ کا بن باس
وفا کے بعد بھی سیتاؔ کی وہ جلا وطنی
وہ راتوں رات سری کرشنؔ کو اٹھائے ہوئے
بلا کی قید سے بسدیوؔ کا نکل جانا
وہ اندھ کار وہ بارش، بڑھی ہوئی جمنا
غم آفرین کہانی وہ ہیرؔ رانجھاؔ کی
شعور ہند کے بچپن کی یادگار عظیم
کہ ایسے ویسے تخیل کی سانس اکھڑ جائے
کئی محیر ادراک دیو مالائیں
ہت اوپدیش کے قصے کتھا سرت ساگر
کروڑوں سینوں میں وہ گونجتا ہوا آلھا
میں پوچھتا ہوں کسی اور ملک والوں سے
کہانیوں کی یہ دولت یہ بے بہا دولت
فسانے دیکھ لو ان کے نظر بھی آتی ہے
میں پوچھتا ہوں کہ گہوارے اور قوموں کے
بسے ہوئے ہیں کہیں ایسی داستانوں سے
کہانیاں جو میں سنتا تھا اپنے بچپن میں
مرے لیے وہ نہ تھیں محض باعث تفریح
فسانوں سے مرے بچپن نے سوچنا سیکھا
فسانوں سے مجھے سنجیدگی کے درس ملے
فسانوں میں نظر آتی تھی مجھ کو یہ دنیا
غم و خوشی میں رچی پیار میں بسائی ہوئی
فسانوں سے مرے دل نے گھلاوٹیں پائیں
یہی نہیں کہ مشاہیر ہی کے افسانے
ذرا سی عمر میں کرتے ہوں مجھ کو متأثر
محلے ٹولے کے گمنام آدمیوں کے
کچھ ایسے سننے میں آتے تھے واقعات حیات
جوں یوں تو ہوتے تھے فرسودہ اور معمولی
مگر تھے آئینے اخلاص اور شرافت کے
یہ چند آئی گئی باتیں ایسی باتیں تھیں
کہ جن کی اوٹ چمکتا تھا درد انسانی
یہ واردات نہیں رزمیے حیات کے تھے
غرض کہ یہ ہیں مرے بچپنے کی تصویریں
ندیم اور بھی کچھ خط و خال ہیں ان کے
یہ میری ماں کا ہے کہنا کہ جب میں بچہ تھا
میں ایسے آدمی کی گود میں نہ جاتا تھا
جو بد قمار ہو عیبی ہو یا ہو بد صورت
مجھے بھی یاد ہے نو دس برس ہی کا میں تھا
تو مجھ پہ کرتا تھا جادو سا حسن انسانی
کچھ ایسا ہوتا تھا محسوس جب میں دیکھتا تھا
شگفتہ رنگ تر و تازہ روپ والوں کا
کہ ان کی آنچ مری ہڈیاں گلا دے گی
اک آزمائش جاں تھی کہ تھا شعور جمال
اور اس کی نشتریت اس کی استخواں سوزی
غم و نشاط لگاوٹ محبت و نفرت
اک انتشار سکوں اضطراب پیار عتاب
وہ بے پناہ ذکی الحسی وہ حلم و غرور
کبھی کبھی وہ بھرے گھر میں حس تنہائی
وہ وحشتیں مری ماحول خوش گوار میں بھی
مری سرشت میں ضدین کے کئی جوڑے
شروع ہی سے تھے موجود آب و تاب کے ساتھ
مرے مزاج میں پنہاں تھی ایک جدلیت
رگوں میں چھوٹتے رہتے تھے بے شمار انار
ندیم یہ ہیں مرے بال پن کے کچھ آثار
وفور و شدت جذبات کا یہ عالم تھا
کہ کوندے جست کریں دل کے آبگینے میں
وہ بچپنا جسے برداشت اپنی مشکل ہو
وہ بچپنا جو خود اپنی ہی تیوریاں سی چڑھائے
ندیم ذکر جوانی سے کانپ جاتا ہوں
جوانی آئی دبے پاؤں اور یوں آئی
کہ اس کے آتے ہی بگڑا بنا بنایا کھیل
وہ خواہشات کے جذبات کے امڈتے ہوئے
وہ ہونکتے ہوئے بے نام آگ کے طوفاں
وہ پھوٹتا ہوا جوالا مکھی جوانی کا
رگوں میں اٹھتی ہوئی آندھیوں کے وہ جھٹکے
کہ جو توازن ہستی جھنجھوڑ کے رکھ دیں
وہ زلزلے کہ پہاڑوں کے پیر اکھڑ جائیں
بلوغیت کی وہ ٹیسیں وہ کرب نشو و نما
اور ایسے میں مجھے بیاہا گیا بھلا کس سے
جو ہو نہ سکتی تھی ہرگز مری شریک حیات
ہم ایک دوسرے کے واسطے بنے ہی نہ تھے
سیاہ ہو گئی دنیا مری نگاہوں میں
وہ جس کو کہتے ہیں شادیٔ خانہ آبادی
مرے لیے وہ بنی بیوگی جوانی کی
لٹا سہاگ مری زندگی کا مانڈو میں
ندیم کھا گئی مجھ کو نظر جوانی کی
بلائے جان مجھے ہو گیا شعور جمال
تلاش شعلۂ الفت سے یہ ہوا حاصل
کہ نفرتوں کا اگن کنڈ بن گئی ہستی
وہ حلق و سینہ و رگ رگ میں بے پناہ چبھا
ندیم جیسے نگل لی ہو میں نے ناگ پھنی
ز عشق زادم و عشقم کمشت زار و دریغ
خبر نہ برد بہ رستم کسے کہ سہرابم
نہ پوچھ عالم کام و دہن ندیم مرے
ثمر حیات کا جب راکھ بن گیا منہ میں
میں چلتی پھرتی چتا بن گیا جوانی کی
میں کاندھا دیتا رہا اپنے جیتے مردے کو
یہ سوچتا تھا کہ اب کیا کروں کہاں جاؤں
بہت سے اور مصائب بھی مجھ پہ ٹوٹ پڑے
میں ڈھونڈھنے لگا ہر سمت سچی جھوٹی پناہ
تلاش حسن میں شعر و ادب میں دوستی میں
رندھی صدا سے محبت کی بھیک مانگی ہے
نئے سرے سے سمجھنا پڑا ہے دنیا کو
بڑے جتن سے سنبھالا ہے خود کو میں نے ندیم
مجھے سنبھلنے میں تو چالیس سال گزرے ہیں
میری حیات تو وش پان کی کتھا ہے ندیم
میں زہر پی کے زمانے کو دے سکا امرت
نہ پوچھ میں نے جو زہرابۂ حیات پیا
مگر ہوں دل سے میں اس کے لیے سپاس گزار
لرزتے ہاتھوں سے دامن خلوص کا نہ چھٹا
بچا کے رکھی تھی میں نے امانت طفلی
اسے نہ چھین سکی مجھ سے دست برد شباب
بقول شاعر ملک فرنگ ہر بچہ
خود اپنے عہد جوانی کا باپ ہوتا ہے
یہ کم نہیں ہے کہ طفلیٔ رفتہ چھوڑ گئی
دل حزیں میں کئی چھوٹے چھوٹے نقش قدم
مری انا کی رگوں میں پڑے ہوئے ہیں ابھی
نہ جانے کتنے بہت نرم انگلیوں کے نشاں
ہنوز وقت کے بے درد ہاتھ کر نہ سکے
حیات رفتہ کی زندہ نشانیوں کو فنا
زمانہ چھین سکے گا نہ میری فطرت سے
مری صفا مرے تحت الشعور کی عصمت
تخیلات کی دوشیزگی کا رد عمل
جوان ہو کے بھی بے لوث طفل وش جذبات
سیانا ہونے پہ بھی یہ جبلتیں میری
یہ سر خوشی و غم بے ریا یہ قلب گداز
بغیر بیر کے ان بن غرض سے پاک تپاک
غرض سے پاک یہ آنسو غرض سے پاک ہنسی
یہ دشت دہر میں ہمدردیوں کا سرچشمہ
قبولیت کا یہ جذبہ یہ کائنات و حیات
اس ارض پاک پر ایمان یہ ہم آہنگی
ہر آدمی سے ہر اک خواب و زیست سے یہ لگاؤ
یہ ماں کی گود کا احساس سب مناظر میں
قریب و دور زمیں میں یہ بوئے وطینت
نظام شمس و قمر میں پیام حفظ حیات
بہ چشم شام و سحر مامتا کی شبنم سی
یہ ساز و دل میں مرے نغمۂ انالکونین
ہر اضطراب میں روح سکون بے پایاں
زمانۂ گزراں میں دوام کا سرگم
یہ بزم جشن حیات و ممات سجتی ہوئی
کسی کی یاد کی شہنائیاں سی بجتی ہوئی
یہ رمزیت کے عناصر شعور پختہ میں
فلک پہ وجد میں لاتی ہے جو فرشتوں کو
وہ شاعری بھی بلوغ مزاج طفلی ہے
یہ نشتریت ہستی یہ اس کی شعریت
یہ پتی پتی پہ گلزار زندگی کے کسی
لطیف نور کی پرچھائیاں سی پڑتی ہوئی
بہم یہ حیرت و مانوسیت کی سرگوشی
بشر کی ذات کہ مہر الوہیت بہ جبیں
ابد کے دل میں جڑیں مارتا ہوا سبزہ
غم جہاں مجھے آنکھیں دکھا نہیں سکتا
کہ آنکھیں دیکھے ہوئے ہوں میں نے اپنے بچپن کی
مرے لہو میں ابھی تک سنائی دیتی ہیں
سکوت حزن میں بھی گھنگھرؤں کی جھنکاریں
یہ اور بات کہ میں اس پہ کان دے نہ سکوں
اسی ودیعت طفلی کا اب سہارا ہے
یہی ہیں مرہم کافور دل کے زخموں پر
انہی کو رکھنا ہے محفوظ تا دم آخر
زمین ہند ہے گہوارہ آج بھی ہم دم
اگر حساب کریں دس کروڑ بچوں کا
یہ بچے ہند کی سب سے بڑی امانت ہیں
ہر ایک بچے میں ہیں صد جہان امکانات
مگر وطن کا حل و عقد جن کے ہاتھ میں ہے
نظام زندگئ ہند جن کے بس میں ہے
رویہ دیکھ کے ان کا یہ کہنا پڑتا ہے
کسے پڑی ہے کہ سمجھے وہ اس امانت کو
کسے پڑی ہے کہ بچوں کی زندگی کو بچائے
خراب ہونے سے ٹلنے سے سوکھ جانے سے
بچائے کون ان آزردہ ہونہاروں کو
وہ زندگی جسے یہ دے رہے ہیں بھارت کو
کروڑوں بچوں کے مٹنے کا اک المیہ ہے
چرائے جاتے ہیں بچے ابھی گھروں سے یہاں
کہ جسم توڑ دیے جائیں ان کے تاکہ ملے
چرانے والوں کو خیرات ماگھ میلے کی
جو اس عذاب سے بچ جائیں تو گلے پڑ جائیں
وہ لعنتیں کہ ہمارے کروڑوں بچوں کی
ندیم خیر سے مٹی خراب ہو جائے
وہ مفلسی کہ خوشی چھین لے وہ بے برگی
اداسیوں سے بھری زندگی کی بے رنگی
وہ یاسیات نہ جس کو چھوئے شعاع امید
وہ آنکھیں دیکھتی ہیں ہر طرف جو بے نوری
وہ ٹکٹکی کہ جو پتھرا کے رہ گئی ہو ندیم
وہ بے دلی کی ہنسی چھین لے جو ہونٹوں سے
وہ دکھ کہ جس سے ستاروں کی آنکھ بھر آئے
وہ گندگی وہ کثافت مرض زدہ پیکر
وہ بچے چھن گئے ہوں جن سے بچپنے ان کے
ہمیں نے گھونٹ دیا جس کے بچپنے کا گلا
جو کھاتے پیتے گھروں کے ہیں بچے ان کو بھی کیا
سماج پھولنے پھلنے کے دے سکا سادھن
وہ سانس لیتے ہیں تہذیب کش فضاؤں میں
ہم ان کو دیتے ہیں بے جان اور غلط تعلیم
ملے گا علم جہالت نما سے کیا ان کو
نکل کے مدرسوں اور یونیورسٹیوں سے
یہ بد نصیب نہ گھر کے نہ گھاٹ کے ہوں گے
میں پوچھتا ہوں یہ تعلیم ہے کہ مکاری
کروڑوں زندگیوں سے یہ بے پناہ دغا
نصاب ایسا کہ محنت کریں اگر اس پر
بجائے علم جہالت کا اکتساب کریں
یہ الٹا درس ادب یہ سڑی ہوئی تعلیم
دماغ کی ہو غذا یا غذائے جسمانی
ہر اک طرح کی غذا میں یہاں ملاوٹ ہے
وہ جس کو بچوں کی تعلیم کہہ کے دیتے ہیں
وہ درس الٹی چھری ہے گلے پہ بچپن کے
زمین ہند ہنڈولا نہیں ہے بچوں کا
کروڑوں بچوں کا یہ دیس اب جنازہ ہے
ہم انقلاب کے خطروں سے خوب واقف ہیں
کچھ اور روز یہی رہ گئے جو لیل و نہار
تو مول لینا پڑے گا ہمیں یہ خطرہ بھی
کہ بچے قوم کی سب سے بڑی امانت ہیں

فراق گورکھپوری
نظم

مری صدا ہے گل شمع شام آزادی
سنا رہا ہوں دلوں کو پیام آزادی
لہو وطن کے شہیدوں کا رنگ لایا ہے
اچھل رہا ہے زمانے میں نام آزادی
مجھے بقا کی ضرورت نہیں کہ فانی ہوں
مری فنا سے ہے پیدا دوام آزادی
جو راج کرتے ہیں جمہوریت کے پردے میں
انہیں بھی ہے سر و سودائے خام آزادی
بنائیں گے نئی دنیا کسان اور مزدور
یہی سجائیں گے دیوان عام آزادی
فضا میں جلتے دلوں سے دھواں سا اٹھتا ہے
ارے یہ صبح غلامی یہ شام آزادی
یہ مہر و ماہ یہ تارے یہ بام ہفت افلاک
بہت بلند ہے ان سے مقام آزادی
فضائے شام و سحر میں شفق جھلکتی ہے
کہ جام میں ہے مئے لالہ فام آزادی
سیاہ خانۂ دنیا کی ظلمتیں ہیں دو رنگ
نہاں ہے صبح اسیری میں شام آزادی
سکوں کا نام نہ لے ہے وہ قید بے میعاد
ہے پے بہ پے حرکت میں قیام آزادی
یہ کاروان ہیں پسماندگان منزل کے
کہ رہروؤں میں یہی ہیں امام آزادی
دلوں میں اہل زمیں کے ہے نیو اس کی مگر
قصور خلد سے اونچا ہے بام آزادی
وہاں بھی خاک نشینوں نے جھنڈے گاڑ دیئے
ملا نہ اہل دول کو مقام آزادی
ہمارے زور سے زنجیر تیرگی ٹوٹی
ہمارا سوز ہے ماہ تمام آزادی
ترنم سحری دے رہا ہے جو چھپ کر
حریف صبح وطن ہے یہ شام آزادی
ہمارے سینے میں شعلے بھڑک رہے ہیں فراقؔ
ہماری سانس سے روشن ہے نام آزادی

فراق گورکھپوری
نظم

اوروں کا ہے پیام اور میرا پیام اور ہے
عشق کے درد مند کا طرز کلام اور ہے
طائر زیر دام کے نالے تو سن چکے ہو تم
یہ بھی سنو کہ نالہ طائر بام اور ہے
آتی تھی کوہ سے صدا راز حیات ہے سکوں
کہتا تھا مور ناتواں لطف خرام اور ہے
جذب حرم سے ہے فروغ انجمن حجاز کا
اس کا مقام اور ہے اس کا نظام اور ہے
موت ہے عیش جاوداں ذوق طلب اگر نہ ہو
گردش آدمی ہے اور گردش جام اور ہے
شمع سحر یہ کہہ گئی سوز ہے زندگی کا ساز
غم کدۂ نمود میں شرط دوام اور ہے
بادہ ہے نيم رس ابھی شوق ہے نارسا ابھی
رہنے دو خم کے سر پہ تم خشت کلیسیا ابھی

علامہ اقبال
نظم

میں اجنبی میں بے نشاں
میں پا بہ گل
نہ رفعت مقام ہے نہ شہرت دوام ہے
یہ لوح دل یہ لوح دم
نہ اس پہ کوئی نقش ہے نہ اس پہ کوئی نام ہے

مجید امجد
نظم

اسی اک ذرے کی تابانی سے
کسی سوئے ہوئے رقاص کے دست و پا میں
کانپ اٹھتے ہیں مہ و سال کے نیلے گرداب
اسی اک ذرے کی حیرانی سے
شعر بن جاتے ہیں اک کوزہ گر پیر کے خواب
اسی اک ذرۂ لافانی سے
خشت بے مایہ کو ملتا ہے دوام
بام و در کو وہ سحر جس کی کبھی رات نہ ہو!
آدمی کس سے مگر بات کرے؟
مو قلم، ساز گل تازہ تھرکتے پاؤں
آدمی سوچتا رہ جاتا ہے،
اس قدر بار کہاں، کس کے لیے، کیسے اٹھاؤں
اور پھر کس کے لیے بات کروں؟

ن م راشد
نظم

یہ اندھیری رات یہ ساری فضا سوئی ہوئی
پتی پتی منظر خاموش میں کھوئی ہوئی
موجزن ہے بحر ظلمت تیرگی کا جوش ہے
شام ہی سے آج قندیل فلک خاموش ہے
چند تارے ہیں بھی تو بے نور پتھرائے ہوئے
جیسے باسی ہار میں ہوں پھول کمہلائے ہوئے
کھپ گیا ہے یوں گھٹا میں چاندنی کا صاف رنگ
جس طرح مایوسیوں میں دب کے رہ جائے امنگ
امڈی ہے کالی گھٹا دنیا ڈبونے کے لئے
یا چلی ہے بال کھولے رانڈ رونے کے لئے
جتنی ہے گنجان بستی اتنی ہی ویران ہے
ہر گلی خاموش ہے ہر راستہ سنسان ہے
اک مکاں سے بھی مکیں کی کچھ خبر ملتی نہیں
چلمنیں اٹھتی نہیں زنجیر در ہلتی نہیں
سو رہے ہیں مست و بے خود گھر کے کل پیر و جواں
ہو گئی ہیں بند حسن و عشق میں سرگوشیاں
ہاں مگر اک سمت اک گوشے میں کوئی نوحہ گر
لے رہی ہے کروٹوں پر کروٹیں دل تھام کر
دل سنبھلتا ہی نہیں ہے سینۂ صد چاک میں
پھول سا چہرہ اٹا ہے بیوگی کی خاک میں
اڑ چلی ہے رنگ رخ بن کر حیات مستعار
ہو رہا ہے قلب مردہ میں جوانی کا فشار
حسرتیں دم توڑتی ہیں یاس کی آغوش میں
سیکڑوں شکوے مچلتے ہیں لب خاموش میں
عمر آمادہ نہیں مردہ پرستی کے لئے
بار ہے یہ زندہ میت دوش ہستی کے لئے
چاہتی ہے لاکھ قابو دل پہ پاتی ہی نہیں
ہائے رے ظالم جوانی بس میں آتی ہی نہیں
تھرتھرا کر گرتی ہے جب سونے بستر پر نظر
لے کے اک کروٹ پٹک دیتی ہے وہ تکیہ پہ سر
جب کھنک اٹھتی ہیں سوتی لڑکیوں کی چوڑیاں
آہ بن کر اٹھنے لگتا ہے کلیجہ سے دھواں
ہو گئی بیوہ کی خاطر نیند بھی جیسے حرام
مختصر سا عہد وصلت دے گیا سوز دوام
دوپہر کی چھاؤں دور شادمانی ہو گیا
پیاس بھی بجھنے نہ پائی ختم پانی ہو گیا
لے رہی ہے کروٹوں پر کروٹیں با اضطرار
آگ میں پارہ ہے یا بستر پہ جسم بے قرار
پڑ گئی اک آہ کر کے رو کے اٹھ بیٹھی کبھی
انگلیوں میں لے کے زلف خم بہ خم اینٹھی کبھی
آ کے ہونٹوں پر کبھی مایوس آہیں تھم گئیں
اور کبھی سونی کلائی پر نگاہیں جم گئیں
اتنی دنیا میں کہیں اپنی جگہ پاتی نہیں
یاس اس حد کی کہ شوہر کی بھی یاد آتی نہیں
آ رہے ہیں یاد پیہم ساس نندوں کے سلوک
پھٹ رہا ہے غم سے سینہ اٹھ رہی ہے دل میں ہوک
اپنی ماں بہنوں کا بھی آنکھیں چرانا یاد ہے
ایسی دنیا میں کسی کا چھوڑ جانا یاد ہے
باغباں تو قبر میں ہے کون اب دیکھے بہار
خود اسی کو تیر اس کے کرنے والے ہیں شکار
جب نظر آتا نہیں دیتا کوئی بیکس کا ساتھ
زہر کی شیشی کی جانب خودبخود بڑھتا ہے ہاتھ
دل تڑپ کر کہہ رہا ہے جلد اس دنیا کو چھوڑ
چوڑیاں توڑیں تو پھر زنجیر ہستی کو بھی توڑ
دم اگر نکلا تو کھوئی زندگی مل جائے گی
یہ نہیں تو خیر تنہا قبر ہی مل جائے گی
واں تجھے ذلت کی نظروں سے نہ دیکھے گا کوئی
چاہے ہنسنا چاہے رونا پھر نہ روکے گا کوئی
واں سب اہل درد ہیں سب صاحب انصاف ہیں
رہبر آگے جا چکا راہیں بھی تیری صاف ہیں
دل انہیں باتوں میں الجھا تھا کہ دم گھبرا گیا
ہاتھ لے کر زہر کی شیشی لبوں تک آ گیا
تلملاتی آنکھ جھپکاتی جھجکتی ہانپتی
پی گئی کل زہر آخر تھرتھراتی کانپتی
موت نے جھٹکا دیا کل عضو ڈھیلے ہو گئے
سانس اکھڑی، نبض ڈوبی، ہونٹ نیلے ہو گئے
آنکھ جھپکی اشک ٹپکا ہچکی آئی کھو گئی
موت کی آغوش میں اک آہ بھر کر سو گئی
اور کر اک آہ سلگے ہند کی رسموں کا دام
اے جوانا مرگ بیوہ تجھ پہ کیفیؔ کا سلام

کیفی اعظمی
نظم

روحوں کو دوام دینے والو
جسموں کی سبیل کچھ نکالو
شعلہ کوئی مستعار دے دو
یا لاش کو اب مزار دے دو

عزیز قیسی
نظم

کہیں بہ نام خوشامد یہ بک گئے بے دام
کہیں پہ بولی تھی اونچی تو ہو گئے نیلام

ناصرہ زبیری
نظم

وہ ایک لمحہ کہ تاریخ جس سے روشن ہے
متاع خاک اسی کے لہو کا خرمن ہے
دوام فصل بہاراں ثبات گلشن ہے

حسن عابدی
نظم

تری شان کون گھٹا سکے اسے خود خدا نے بڑھا دیا
کہ تجھے بقائے دوام دی تجھے منصب شہدا دیا

اقبال سہیل
نظم

کھلاڑیوں کے خود نوشت دستخط کے واسطے کتابچے لیے ہوئے
کھڑی ہیں منتظر حسین لڑکیاں
ڈھلکتے آنچلوں سے بے خبر حسین لڑکیاں
مہیب پھاٹکوں کے ڈولتے کوارٹر چیخ اٹھے
ابل پڑے الجھتے بازوؤں چٹختی پسلیوں کے پر ہراس قافلے
گرے بڑھے مڑے بھنور ہجوم کے
کھڑی ہیں یہ بھی راستے پہ اک طرف بیاض آرزو بکف
نظر نظر میں نارسا پرستشوں کی داستاں
لرز رہا ہے دم بدم کمان آبروؤں کا خم
کوئی جب ایک ناز بے نیاز سے کتابچوں پہ کھینچتا چلا گیا
حروف کج تراش کی لکیر سی
تو تھم گئیں لبوں پہ مسکراہٹیں شریر سی
کسی عظیم شخصیت کی تمکنت
حنائی انگلیوں پہ کانپتے ورق پہ جھک گئی
تو زرنگار پلوؤں سے جھانکتی کلائیوں کی تیز نبض رک گئی
وہ بالر ایک مہوشوں کے جمگھٹے میں گھر گیا وہ صفحۂ بیاض پر
بصد غرور کلک گوہریں پھریں
حسین جھلملاہٹوں کے درمیاں وکٹ گری
میں اجنبی میں بے نشاں میں پا بہ گل
نہ رفعت مقام ہے نہ شہرت دوام ہے یہ لوح دل پہ لوح دل
نہ اس پہ کوئی نقش ہے نہ اس پہ کوئی نام ہے

مجید امجد
نظم

نغمہ زار درد کی جانب چلے ہم
ایک بھی ذرہ نہ کچلا جائے اس رفتار سے
نغمہ زار درد کی جانب چلے ہم
کنج میں پیڑوں کے سورج جھانکتا تھا
کوہساروں سبزہ زاروں میں جھمکتی روشنی کا جشن تھا
جشن جاری ہی رہے گا تا ابد
جاری رہے
نغمہ زار درد کی جانب چلے ہم
لعل و مرمر سے گندھا قالب
اور اس کے محور اس کے قریب
بجلیوں جیسا مصفا اک وجود
چار سو بکھرے ہوئے خاموش سونے آسماں
ہم کہاں ہیں ہم کہاں نغمہ زار درد ہے یہ ہم کہاں
اتنا بے آواز جیسے
آتما اپنی شعاعیں
ریشے ریشے سے بدن کے کھینچ لے
آہستگی سے بے گزند
اور دوری بے فغاں ہو جسم کی اور روح کی
کیا سبک رفتار کر دیتی ہے ہم کو بے دلی بے حاصلی
جیسے اک بادل کا ٹکڑا
اپنی چھاگل پھینک دے اونچی فضا میں
پیاسے ذروں کی طرف
پھر ہلکے پھلکے پنکھ پھیلائے اڑے
ہلکورے لے
اک مٹتی بنتی رنگ کی تحریر سی
سیراب ذرے اس کو دیکھیں
اور پکار اٹھیں
وہ کافوری سا شعلہ عظمت نا رس
دوام درد ہے وہ سرخ نرمل روشنی
لو سانس کے سرچشمے سوکھے ہر شکایت مٹ گئی
کیا شکایت سانس کے سر چشمہ سے ان کو رہی
جو سانس لیتے ہیں یہاں
موج بے ہنگام خندہ
کیسے پھوٹی میرے لب سے
کوئی شکتی ہم میں ہے
جو یوں ہمیں پامال کر ہنس سکے
یہ ہمیں آغاز ہی سے ختم کرنے پر تلی تھی
چاہے پھر خود ہی مجاور بن سکے انجام کار
احتجاج اس کا جو اک شکتی ہے مجھ میں
کس قدر پر شور ہے
کس قدر پر زور ہے
نغمہ زار درد سے آگے لئے جاتا مجھ کو
ان فضاؤں میں جہاں
بازگشت اک گیت بن جاتی ہے اس کی
جیسے سب ٹیلے چٹانیں اور کہستاں
سانس کے چشمے میں شامل ہیں
دھڑکتے ذی نفس اور ہم نوا

شفیق فاطمہ شعریٰ
نظم

اے دل کافر عجز سے منکر آج ترا سر خم کیوں ہے
تیری ہٹیلی شریانوں میں یہ بے بس ماتم کیوں ہے
آنکھ تو رونا بھول گئی تھی پھر ہر منظر نم کیوں ہے
مت روکو بہنے دو آنسو کسی کو کرتے ہیں پرنام
آپ جھکا ہے جھکنے دو سر چھپا تھا اس میں کوئی سلام
شاید اس کے حضور میں ہو تم جس کو کہتے ہیں انجام
وہ ہستی کی سرحد آخر ہوا جہاں ہر سفر تمام
بے بس ہے انساں بے بس ہے تکتی رہ گئی روتی شام
اٹھ گیا کوئی بھری دنیا سے باقی رہے خدا کا نام
یا پھر کاغذ پر پرچھائیں ملے گا جس کو ثبت دوام
یہ ٹکڑے انسانی دل کے شاعر اور شاعر کا کلام
ناز کروں گی خوش بختی میں میں نے فراقؔ کو دیکھا تھا
اجڑے گھر میں وہ تہذیبوں کے سنگم پر بیٹھا تھا
گرم ہم آغوشی صدیوں کی ہوگی کتنی پیار بھری
جس کی بانہوں میں کھیلی تھی اس کی سوچ کی سندرتا
شعر کا دل شفاف تھا اتنا' جیسے آئینۂ تاریخ
کیا بھر پور وصال تھا جس نے اس شاعر کو جنم دیا
گر تاریخ نے پاگل ہو کر خود اپنا سر پھوڑا ہے
خون اچھالا ہے گلیوں میں اپنا ہنڈولہ توڑا ہے
چھینٹ نہ تھی دامن پر اس کے کون گھاٹ دھو بیٹھا تھا
جسے سمجھتے ہو نا ممکن وہ اس انساں جیسا تھا
انساں بھی اتنا معمولی جیسے اپنا ہمسایہ
اپنے شعر سنانا اس کا اور خود حیراں ہو جانا
باتوں میں معصوم مہک تھی آنکھوں میں بے چین لپک
خاموشی کے وقفے یوں' جیسے اس نے کچھ دیکھا تھا
پیڑ بہت جھیلی تھی اس نے اتنی بات تو ظاہر تھی
لہجہ میں شوخی تھی جیسے راکھ میں چمکے انگارہ
سنگم کے پانی پر میں نے دیکھی تھی کیسی تصویر
اڑا لہک کر اک جل پنچھی کھینچ گیا پانی پہ لکیر
جمنا کی نیلی گہرائی بھید بھری چپ سے بوجھل
گنگا کے دھارے کی جنبش اجلی طاقت اور بے کل
اس پانی میں عکس ڈالتا آسمان کا اک ٹکڑا
مٹی کے بت ہرے ناریل چندن لگا کوئی مکھڑا
وہ دھاروں پر ناؤ کھیتا سوکھا پنجر مانجھی کا
دان کے پیسے گنتا پنڈت تانبہ سورج سانجھی کا
جمنا' پر مینار قلعہ کے گنبد کا ترچھا سایہ
پاکستان سے آئے مہاجر گیندے کی ٹوٹی مالا
پانی میں چپو کی شپ شپ باتوں کے ٹوٹے ٹکڑے
یہیں کہیں پر ہم سے اوجھل سرسوتی بھی بہتی ہے
جو سمجھی جو آگے سمجھوں چھلک رہا ہے دل کا جام
وہ منظر جو خود سے بڑا تھا اس کا گھیرا تمہارے نام
یہ کمرے کا ماند اجالا باہر ہوک پپہیے کی
کھڑکی پر بوندوں کی دستک سانسیں بھرتی خاموشی
پوری بات نہیں بتلاتا گونگے آنسو رو دینا
تیری دھرتی سہہ نہ سکے گی اتنے حسن کو کھو دینا
تنہا اور اپاہج بوڑھے تجھے نہ مرنے دیں گے لوگ
ابھی تو جیون بانجھ نہیں ہے پھر تجھ کو جنمیں گے لوگ

فہمیدہ ریاض
نظم

میں مطمئن چاند سے نہیں ہوں
کہ چاند کو بھی دوام کب ہے

سعید وارثی
Load More
Best poetry resource in urdu
تلاش
Get App
URD
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
بولیے