Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "desh"

نظم کے متعلقہ نتیجہ "desh"

نظم

یہی جگہ تھی یہی دن تھا اور یہی لمحات
سروں پہ چھائی تھی صدیوں سے اک جو کالی رات
اسی جگہ اسی دن تو ملی تھی اس کو مات
اسی جگہ اسی دن تو ہوا تھا یہ اعلان
اندھیرے ہار گئے زندہ باد ہندوستان
یہیں تو ہم نے کہا تھا یہ کر دکھانا ہے
جو زخم تن پہ ہے بھارت کے اس کو بھرنا ہے
جو داغ ماتھے پہ بھارت کے ہے مٹانا ہے
یہیں تو کھائی تھی ہم سب نے یہ قسم اس دن
یہیں سے نکلے تھے اپنے سفر پہ ہم اس دن
یہیں تھا گونج اٹھا وندے ماترم اس دن
ہے جرأتوں کا سفر وقت کی ہے راہ گزر
نظر کے سامنے ہے ساٹھ میل کا پتھر
کوئی جو پوچھے کیا کیا ہے کچھ کیا ہے اگر
تو اس سے کہہ دو کہ وہ آئے دیکھ لے آ کر
لگایا ہم نے تھا جمہوریت کا جو پودھا
وہ آج ایک گھنیرا سا اونچا برگد ہے
اور اس کے سائے میں کیا بدلا کتنا بدلا ہے
کب انتہا ہے کوئی اس کی کب کوئی حد ہے

جاوید اختر
نظم

دھرتی کی سلگتی چھاتی سے بے چین شرارے پوچھتے ہیں
تم لوگ جنہیں اپنا نہ سکے وہ خون کے دھارے پوچھتے ہیں
سڑکوں کی زباں چلاتی ہے ساگر کے کنارے پوچھتے ہیں
یہ کس کا لہو ہے کون مرا اے رہبر ملک و قوم بتا
یہ جلتے ہوئے گھر کس کے ہیں یہ کٹتے ہوئے تن کس کے ہیں
تقسیم کے اندر طوفاں میں لٹتے ہوئے گلشن کس کے ہیں
بد بخت فضائیں کس کی ہیں برباد نشیمن کس کے ہیں
کچھ ہم بھی سنیں ہم کو بھی سنا
کس کام کے ہیں یہ دین دھرم جو شرم کا دامن چاک کریں
کس طرح کے ہیں یہ دیش بھگت جو بستے گھروں کو خاک کریں
یہ روحیں کیسی روحیں ہیں جو دھرتی کو ناپاک کریں
آنکھیں تو اٹھا نظریں تو ملا
جس رام کے نام پہ خون بہے اس رام کی عزت کیا ہوگی
جس دین کے ہاتھوں لاج لٹے اس دین کی قیمت کیا ہوگی
انسان کی اس ذلت سے پرے شیطان کی ذلت کیا ہوگی
یہ وید ہٹا قرآن اٹھا
یہ کس کا لہو ہے کون مرا
اے رہبر ملک و قوم بتا

ساحر لدھیانوی
نظم

دیار ہند تھا گہوارہ یاد ہے ہم دم
بہت زمانہ ہوا کس کے کس کے بچپن کا
اسی زمین پہ کھیلا ہے رامؔ کا بچپن
اسی زمین پہ ان ننھے ننھے ہاتھوں نے
کسی سمے میں دھنش بان کو سنبھالا تھا
اسی دیار نے دیکھی ہے کرشنؔ کی لیلا
یہیں گھروندوں میں سیتا سلوچنا رادھا
کسی زمانے میں گڑیوں سے کھیلتی ہوں گی
یہی زمیں یہی دریا پہاڑ جنگل باغ
یہی ہوائیں یہی صبح و شام سورج چاند
یہی گھٹائیں یہی برق و رعد و قوس قزح
یہیں کے گیت روایات موسموں کے جلوس
ہوا زمانہ کہ سدھارتھؔ کے تھے گہوارے
انہی نظاروں میں بچپن کٹا تھا وکرمؔ کا
سنا ہے بھرترہریؔ بھی انہیں سے کھیلا تھا
بھرتؔ اگستؔ کپلؔ ویاسؔ پاشیؔ کوٹیلہؔ
جنکؔ وششتؔ منوؔ والمیکؔ وشوامترؔ
کنادؔ گوتمؔ و رامانجؔ کمارلؔ بھٹ
موہن جوڈارو ہڑپا کے اور اجنتا کے
بنانے والے یہیں بلموں سے کھیلے تھے
اسی ہنڈولے میں بھوبھوتؔ و کالیداسؔ کبھی
ہمک ہمک کے جو تتلا کے گنگنائے تھے
سرسوتی نے زبانوں کو ان کی چوما تھا
یہیں کے چاند و سورج کھلونے تھے ان کے
انہیں فضاؤں میں بچپن پلا تھا خسروؔ کا
اسی زمیں سے اٹھے تان سینؔ اور اکبرؔ
رحیمؔ نانکؔ و چیتنیہؔ اور چشتیؔ نے
انہیں فضاؤں میں بچپن کے دن گزارے تھے
اسی زمیں پہ کبھی شاہزادۂ خرمؔ
ذرا سی دل شکنی پر جو رو دیا ہوگا
بھر آیا تھا دل نازک تو کیا عجب اس میں
ان آنسوؤں میں جھلک تاج کی بھی دیکھی ہو
اہلیا بائیؔ دمنؔ پدمنیؔ و رضیہؔ نے
یہیں کے پیڑوں کی شاخوں میں ڈالے تھے جھولے
اسی فضا میں بڑھائی تھی پینگ بچپن کی
انہی نظاروں میں ساون کے گیت گائے تھے
اسی زمین پہ گھٹنوں کے بل چلے ہوں گے
ملکؔ محمد و رسکھانؔ اور تلسیؔ داس
انہیں فضاؤں میں گونجی تھی توتلی بولی
کبیرؔ داس ٹکارامؔ سورؔ و میراؔ کی
اسی ہنڈولے میں ودیاپتیؔ کا کنٹھ کھلا
اسی زمین کے تھے لال میرؔ و غالبؔ بھی
ٹھمک ٹھمک کے چلے تھے گھروں کے آنگن میں
انیسؔ و حالیؔ و اقبالؔ اور وارثؔ شاہ
یہیں کی خاک سے ابھرے تھے پریم چندؔ و ٹیگورؔ
یہیں سے اٹھے تھے تہذیب ہند کے معمار
اسی زمین نے دیکھا تھا بال پن ان کا
یہیں دکھائی تھیں ان سب نے بال لیلائیں
یہیں ہر ایک کے بچپن نے تربیت پائی
یہیں ہر ایک کے جیون کا بال کانڈ کھلا
یہیں سے اٹھتے بگولوں کے ساتھ دوڑے ہیں
یہیں کی مست گھٹاؤں کے ساتھ جھومے ہیں
یہیں کی مدھ بھری برسات میں نہائے ہیں
لپٹ کے کیچڑ و پانی سے بچپنے ان کے
اسی زمین سے اٹھے وہ دیش کے ساونت
اڑا دیا تھا جنہیں کمپنی نے توپوں سے
اسی زمین سے اٹھی ہیں ان گنت نسلیں
پلے ہیں ہند ہنڈولے میں ان گنت بچے
مجھ ایسے کتنے ہی گمنام بچے کھیلے ہیں
اسی زمیں سے اسی میں سپرد خاک ہوئے
زمین ہند اب آرام گاہ ہے ان کی
اس ارض پاک سے اٹھیں بہت سی تہذیبیں
یہیں طلوع ہوئیں اور یہیں غروب ہوئیں
اسی زمین سے ابھرے کئی علوم و فنون
فراز کوہ ہمالہ یہ دور گنگ و جمن
اور ان کی گود میں پروردہ کاروانوں نے
یہیں رموز خرام سکوں نما سیکھے
نسیم صبح تمدن نے بھیرویں چھیڑی
یہیں وطن کے ترانوں کی وہ پویں پھوٹیں
وہ بے قرار سکوں زا ترنم سحری
وہ کپکپاتے ہوئے سوز و ساز کے شعلے
انہی فضاؤں میں انگڑائیاں جو لے کے اٹھے
لوؤں سے جن کے چراغاں ہوئی تھی بزم حیات
جنہوں نے ہند کی تہذیب کو زمانہ ہوا
بہت سے زاویوں سے آئینہ دکھایا تھا
اسی زمیں پہ ڈھلی ہے مری حیات کی شام
اسی زمین پہ وہ صبح مسکرائی ہے
تمام شعلہ و شبنم مری حیات کی صبح
سناؤں آج کہانی میں اپنے بچپن کی
دل و دماغ کی کلیاں ابھی نہ چٹکی تھیں
ہمیشہ کھیلتا رہتا تھا بھائی بہنوں میں
ہمارے ساتھ محلے کی لڑکیاں لڑکے
مچائے رکھتے تھے بالک ادھم ہر ایک گھڑی
لہو ترنگ اچھل پھاند کا یہ عالم تھا
محلہ سر پہ اٹھائے پھرے جدھر گزرے
ہمارے چہچہے اور شور گونجتے رہتے
چہار سمت محلے کے گوشے گوشے میں
فضا میں آج بھی لا ریب گونجتے ہوں گے
اگرچہ دوسرے بچوں کی طرح تھا میں بھی
بظاہر اوروں کے بچپن سا تھا مرا بچپن
یہ سب سہی مرے بچپن کی شخصیت بھی تھی ایک
وہ شخصیت کہ بہت شوخ جس کے تھے خد و خال
ادا ادا میں کوئی شان انفرادی تھی
غرض کچھ اور ہی لچھن تھے میرے بچپن کے
مجھے تھا چھوٹے بڑوں سے بہت شدید لگاؤ
ہر ایک پر میں چھڑکتا تھا اپنی ننھی سی جاں
دل امڈا آتا تھا ایسا کہ جی یہ چاہتا تھا
اٹھا کے رکھ لوں کلیجے میں اپنی دنیا کو
مجھے ہے یاد ابھی تک کہ کھیل کود میں بھی
کچھ ایسے وقفے پر اسرار آ ہی جاتے تھے
کہ جن میں سوچنے لگتا تھا کچھ مرا بچپن
کئی معانئ بے لفظ چھونے لگتے تھے
بطون غیب سے میرے شعور اصغر کو
ہر ایک منظر مانوس گھر کا ہر گوشہ
کسی طرح کی ہو گھر میں سجی ہوئی ہر چیز
مرے محلے کی گلیاں مکاں در و دیوار
چبوترے کنویں کچھ پیڑ جھاڑیاں بیلیں
وہ پھیری والے کئی ان کے بھانت بھانت کے بول
وہ جانے بوجھے مناظر وہ آسماں و زمیں
بدلتے وقت کا آئینہ گرمی و خنکی
غروب مہر میں رنگوں کا جاگتا جادو
شفق کے شیش محل میں گداز پنہاں سے
جواہروں کی چٹانیں سی کچھ پگھلتی ہوئیں
شجر حجر کی وہ کچھ سوچتی ہوئی دنیا
سہانی رات کی مانوس رمزیت کا فسوں
علی الصباح افق کی وہ تھرتھراتی بھویں
کسی کا جھانکنا آہستہ پھوٹتی پو سے
وہ دوپہر کا سمے درجۂ تپش کا چڑھاؤ
تھکی تھکی سی فضا میں وہ زندگی کا اتار
ہوا کی بنسیاں بنسواڑیوں میں بجتی ہوئیں
وہ دن کے بڑھتے ہوئے سائے سہ پہر کا سکوں
سکوت شام کا جب دونوں وقت ملتے ہیں
غرض جھلکتے ہوئے سرسری مناظر پر
مجھے گمان پرستانیت کا ہوتا تھا
ہر ایک چیز کی وہ خواب ناک اصلیت
مرے شعور کی چلمن سے جھانکتا تھا کوئی
لیے ربوبیت کائنات کا احساس
ہر ایک جلوے میں غیب و شہود کا وہ ملاپ
ہر اک نظارہ اک آئینہ خانۂ حیرت
ہر ایک منظر مانوس ایک حیرت زار
کہیں رہوں کہیں کھیلوں کہیں پڑھوں لکھوں
مرے شعور پہ منڈلاتے تھے مناظر دہر
میں اکثر ان کے تصور میں ڈوب جاتا تھا
وفور جذبہ سے ہو جاتی تھی مژہ پر نم
مجھے یقین ہے ان عنصری مناظر سے
کہ عام بچوں سے لیتا تھا میں زیادہ اثر
کسی سمے مری طفلی رہی نہ بے پروا
نہ چھو سکی مری طفلی کو غفلت طفلی
یہ کھیل کود کے لمحوں میں ہوتا تھا احساس
دعائیں دیتا ہو جیسے مجھے سکوت دوام
کہ جیسے ہاتھ ابد رکھ دے دوش طفلی پر
ہر ایک لمحہ کے رخنوں سے جھانکتی صدیاں
کہانیاں جو سنوں ان میں ڈوب جاتا تھا
کہ آدمی کے لیے آدمی کی جگ بیتی
سے بڑھ کے کون سی شے اور ہو ہی سکتی ہے
انہی فسانوں میں پنہاں تھے زندگی کے رموز
انہی فسانوں میں کھلتے تھے راز ہائے حیات
انہیں فسانوں میں ملتی تھیں زیست کی قدریں
رموز بیش بہا ٹھیٹھ آدمیت کے
کہانیاں تھیں کہ صد درس گاہ رقت قلب
ہر اک کہانی میں شائستگی غم کا سبق
وہ عنصر آنسوؤں کا داستان انساں میں
وہ نل دمن کی کتھا سر گزشت ساوتری
شکنتلاؔ کی کہانی بھرتؔ کی قربانی
وہ مرگ بھیشم پتامہ وہ سیج تیروں کی
وہ پانچوں پانڈوں کی سورگ یاترا کی کتھا
وطن سے رخصت سدھارتھؔ رامؔ کا بن باس
وفا کے بعد بھی سیتاؔ کی وہ جلا وطنی
وہ راتوں رات سری کرشنؔ کو اٹھائے ہوئے
بلا کی قید سے بسدیوؔ کا نکل جانا
وہ اندھ کار وہ بارش، بڑھی ہوئی جمنا
غم آفرین کہانی وہ ہیرؔ رانجھاؔ کی
شعور ہند کے بچپن کی یادگار عظیم
کہ ایسے ویسے تخیل کی سانس اکھڑ جائے
کئی محیر ادراک دیو مالائیں
ہت اوپدیش کے قصے کتھا سرت ساگر
کروڑوں سینوں میں وہ گونجتا ہوا آلھا
میں پوچھتا ہوں کسی اور ملک والوں سے
کہانیوں کی یہ دولت یہ بے بہا دولت
فسانے دیکھ لو ان کے نظر بھی آتی ہے
میں پوچھتا ہوں کہ گہوارے اور قوموں کے
بسے ہوئے ہیں کہیں ایسی داستانوں سے
کہانیاں جو میں سنتا تھا اپنے بچپن میں
مرے لیے وہ نہ تھیں محض باعث تفریح
فسانوں سے مرے بچپن نے سوچنا سیکھا
فسانوں سے مجھے سنجیدگی کے درس ملے
فسانوں میں نظر آتی تھی مجھ کو یہ دنیا
غم و خوشی میں رچی پیار میں بسائی ہوئی
فسانوں سے مرے دل نے گھلاوٹیں پائیں
یہی نہیں کہ مشاہیر ہی کے افسانے
ذرا سی عمر میں کرتے ہوں مجھ کو متأثر
محلے ٹولے کے گمنام آدمیوں کے
کچھ ایسے سننے میں آتے تھے واقعات حیات
جوں یوں تو ہوتے تھے فرسودہ اور معمولی
مگر تھے آئینے اخلاص اور شرافت کے
یہ چند آئی گئی باتیں ایسی باتیں تھیں
کہ جن کی اوٹ چمکتا تھا درد انسانی
یہ واردات نہیں رزمیے حیات کے تھے
غرض کہ یہ ہیں مرے بچپنے کی تصویریں
ندیم اور بھی کچھ خط و خال ہیں ان کے
یہ میری ماں کا ہے کہنا کہ جب میں بچہ تھا
میں ایسے آدمی کی گود میں نہ جاتا تھا
جو بد قمار ہو عیبی ہو یا ہو بد صورت
مجھے بھی یاد ہے نو دس برس ہی کا میں تھا
تو مجھ پہ کرتا تھا جادو سا حسن انسانی
کچھ ایسا ہوتا تھا محسوس جب میں دیکھتا تھا
شگفتہ رنگ تر و تازہ روپ والوں کا
کہ ان کی آنچ مری ہڈیاں گلا دے گی
اک آزمائش جاں تھی کہ تھا شعور جمال
اور اس کی نشتریت اس کی استخواں سوزی
غم و نشاط لگاوٹ محبت و نفرت
اک انتشار سکوں اضطراب پیار عتاب
وہ بے پناہ ذکی الحسی وہ حلم و غرور
کبھی کبھی وہ بھرے گھر میں حس تنہائی
وہ وحشتیں مری ماحول خوش گوار میں بھی
مری سرشت میں ضدین کے کئی جوڑے
شروع ہی سے تھے موجود آب و تاب کے ساتھ
مرے مزاج میں پنہاں تھی ایک جدلیت
رگوں میں چھوٹتے رہتے تھے بے شمار انار
ندیم یہ ہیں مرے بال پن کے کچھ آثار
وفور و شدت جذبات کا یہ عالم تھا
کہ کوندے جست کریں دل کے آبگینے میں
وہ بچپنا جسے برداشت اپنی مشکل ہو
وہ بچپنا جو خود اپنی ہی تیوریاں سی چڑھائے
ندیم ذکر جوانی سے کانپ جاتا ہوں
جوانی آئی دبے پاؤں اور یوں آئی
کہ اس کے آتے ہی بگڑا بنا بنایا کھیل
وہ خواہشات کے جذبات کے امڈتے ہوئے
وہ ہونکتے ہوئے بے نام آگ کے طوفاں
وہ پھوٹتا ہوا جوالا مکھی جوانی کا
رگوں میں اٹھتی ہوئی آندھیوں کے وہ جھٹکے
کہ جو توازن ہستی جھنجھوڑ کے رکھ دیں
وہ زلزلے کہ پہاڑوں کے پیر اکھڑ جائیں
بلوغیت کی وہ ٹیسیں وہ کرب نشو و نما
اور ایسے میں مجھے بیاہا گیا بھلا کس سے
جو ہو نہ سکتی تھی ہرگز مری شریک حیات
ہم ایک دوسرے کے واسطے بنے ہی نہ تھے
سیاہ ہو گئی دنیا مری نگاہوں میں
وہ جس کو کہتے ہیں شادیٔ خانہ آبادی
مرے لیے وہ بنی بیوگی جوانی کی
لٹا سہاگ مری زندگی کا مانڈو میں
ندیم کھا گئی مجھ کو نظر جوانی کی
بلائے جان مجھے ہو گیا شعور جمال
تلاش شعلۂ الفت سے یہ ہوا حاصل
کہ نفرتوں کا اگن کنڈ بن گئی ہستی
وہ حلق و سینہ و رگ رگ میں بے پناہ چبھا
ندیم جیسے نگل لی ہو میں نے ناگ پھنی
ز عشق زادم و عشقم کمشت زار و دریغ
خبر نہ برد بہ رستم کسے کہ سہرابم
نہ پوچھ عالم کام و دہن ندیم مرے
ثمر حیات کا جب راکھ بن گیا منہ میں
میں چلتی پھرتی چتا بن گیا جوانی کی
میں کاندھا دیتا رہا اپنے جیتے مردے کو
یہ سوچتا تھا کہ اب کیا کروں کہاں جاؤں
بہت سے اور مصائب بھی مجھ پہ ٹوٹ پڑے
میں ڈھونڈھنے لگا ہر سمت سچی جھوٹی پناہ
تلاش حسن میں شعر و ادب میں دوستی میں
رندھی صدا سے محبت کی بھیک مانگی ہے
نئے سرے سے سمجھنا پڑا ہے دنیا کو
بڑے جتن سے سنبھالا ہے خود کو میں نے ندیم
مجھے سنبھلنے میں تو چالیس سال گزرے ہیں
میری حیات تو وش پان کی کتھا ہے ندیم
میں زہر پی کے زمانے کو دے سکا امرت
نہ پوچھ میں نے جو زہرابۂ حیات پیا
مگر ہوں دل سے میں اس کے لیے سپاس گزار
لرزتے ہاتھوں سے دامن خلوص کا نہ چھٹا
بچا کے رکھی تھی میں نے امانت طفلی
اسے نہ چھین سکی مجھ سے دست برد شباب
بقول شاعر ملک فرنگ ہر بچہ
خود اپنے عہد جوانی کا باپ ہوتا ہے
یہ کم نہیں ہے کہ طفلیٔ رفتہ چھوڑ گئی
دل حزیں میں کئی چھوٹے چھوٹے نقش قدم
مری انا کی رگوں میں پڑے ہوئے ہیں ابھی
نہ جانے کتنے بہت نرم انگلیوں کے نشاں
ہنوز وقت کے بے درد ہاتھ کر نہ سکے
حیات رفتہ کی زندہ نشانیوں کو فنا
زمانہ چھین سکے گا نہ میری فطرت سے
مری صفا مرے تحت الشعور کی عصمت
تخیلات کی دوشیزگی کا رد عمل
جوان ہو کے بھی بے لوث طفل وش جذبات
سیانا ہونے پہ بھی یہ جبلتیں میری
یہ سر خوشی و غم بے ریا یہ قلب گداز
بغیر بیر کے ان بن غرض سے پاک تپاک
غرض سے پاک یہ آنسو غرض سے پاک ہنسی
یہ دشت دہر میں ہمدردیوں کا سرچشمہ
قبولیت کا یہ جذبہ یہ کائنات و حیات
اس ارض پاک پر ایمان یہ ہم آہنگی
ہر آدمی سے ہر اک خواب و زیست سے یہ لگاؤ
یہ ماں کی گود کا احساس سب مناظر میں
قریب و دور زمیں میں یہ بوئے وطینت
نظام شمس و قمر میں پیام حفظ حیات
بہ چشم شام و سحر مامتا کی شبنم سی
یہ ساز و دل میں مرے نغمۂ انالکونین
ہر اضطراب میں روح سکون بے پایاں
زمانۂ گزراں میں دوام کا سرگم
یہ بزم جشن حیات و ممات سجتی ہوئی
کسی کی یاد کی شہنائیاں سی بجتی ہوئی
یہ رمزیت کے عناصر شعور پختہ میں
فلک پہ وجد میں لاتی ہے جو فرشتوں کو
وہ شاعری بھی بلوغ مزاج طفلی ہے
یہ نشتریت ہستی یہ اس کی شعریت
یہ پتی پتی پہ گلزار زندگی کے کسی
لطیف نور کی پرچھائیاں سی پڑتی ہوئی
بہم یہ حیرت و مانوسیت کی سرگوشی
بشر کی ذات کہ مہر الوہیت بہ جبیں
ابد کے دل میں جڑیں مارتا ہوا سبزہ
غم جہاں مجھے آنکھیں دکھا نہیں سکتا
کہ آنکھیں دیکھے ہوئے ہوں میں نے اپنے بچپن کی
مرے لہو میں ابھی تک سنائی دیتی ہیں
سکوت حزن میں بھی گھنگھرؤں کی جھنکاریں
یہ اور بات کہ میں اس پہ کان دے نہ سکوں
اسی ودیعت طفلی کا اب سہارا ہے
یہی ہیں مرہم کافور دل کے زخموں پر
انہی کو رکھنا ہے محفوظ تا دم آخر
زمین ہند ہے گہوارہ آج بھی ہم دم
اگر حساب کریں دس کروڑ بچوں کا
یہ بچے ہند کی سب سے بڑی امانت ہیں
ہر ایک بچے میں ہیں صد جہان امکانات
مگر وطن کا حل و عقد جن کے ہاتھ میں ہے
نظام زندگئ ہند جن کے بس میں ہے
رویہ دیکھ کے ان کا یہ کہنا پڑتا ہے
کسے پڑی ہے کہ سمجھے وہ اس امانت کو
کسے پڑی ہے کہ بچوں کی زندگی کو بچائے
خراب ہونے سے ٹلنے سے سوکھ جانے سے
بچائے کون ان آزردہ ہونہاروں کو
وہ زندگی جسے یہ دے رہے ہیں بھارت کو
کروڑوں بچوں کے مٹنے کا اک المیہ ہے
چرائے جاتے ہیں بچے ابھی گھروں سے یہاں
کہ جسم توڑ دیے جائیں ان کے تاکہ ملے
چرانے والوں کو خیرات ماگھ میلے کی
جو اس عذاب سے بچ جائیں تو گلے پڑ جائیں
وہ لعنتیں کہ ہمارے کروڑوں بچوں کی
ندیم خیر سے مٹی خراب ہو جائے
وہ مفلسی کہ خوشی چھین لے وہ بے برگی
اداسیوں سے بھری زندگی کی بے رنگی
وہ یاسیات نہ جس کو چھوئے شعاع امید
وہ آنکھیں دیکھتی ہیں ہر طرف جو بے نوری
وہ ٹکٹکی کہ جو پتھرا کے رہ گئی ہو ندیم
وہ بے دلی کی ہنسی چھین لے جو ہونٹوں سے
وہ دکھ کہ جس سے ستاروں کی آنکھ بھر آئے
وہ گندگی وہ کثافت مرض زدہ پیکر
وہ بچے چھن گئے ہوں جن سے بچپنے ان کے
ہمیں نے گھونٹ دیا جس کے بچپنے کا گلا
جو کھاتے پیتے گھروں کے ہیں بچے ان کو بھی کیا
سماج پھولنے پھلنے کے دے سکا سادھن
وہ سانس لیتے ہیں تہذیب کش فضاؤں میں
ہم ان کو دیتے ہیں بے جان اور غلط تعلیم
ملے گا علم جہالت نما سے کیا ان کو
نکل کے مدرسوں اور یونیورسٹیوں سے
یہ بد نصیب نہ گھر کے نہ گھاٹ کے ہوں گے
میں پوچھتا ہوں یہ تعلیم ہے کہ مکاری
کروڑوں زندگیوں سے یہ بے پناہ دغا
نصاب ایسا کہ محنت کریں اگر اس پر
بجائے علم جہالت کا اکتساب کریں
یہ الٹا درس ادب یہ سڑی ہوئی تعلیم
دماغ کی ہو غذا یا غذائے جسمانی
ہر اک طرح کی غذا میں یہاں ملاوٹ ہے
وہ جس کو بچوں کی تعلیم کہہ کے دیتے ہیں
وہ درس الٹی چھری ہے گلے پہ بچپن کے
زمین ہند ہنڈولا نہیں ہے بچوں کا
کروڑوں بچوں کا یہ دیس اب جنازہ ہے
ہم انقلاب کے خطروں سے خوب واقف ہیں
کچھ اور روز یہی رہ گئے جو لیل و نہار
تو مول لینا پڑے گا ہمیں یہ خطرہ بھی
کہ بچے قوم کی سب سے بڑی امانت ہیں

فراق گورکھپوری
نظم

دیش سیوا ہی کا بہتا ہے لہو نس نس میں
اب تو کھا بیٹھے ہیں چتوڑ کے گڑھ کی قسمیں
سرفروشی کی ادا ہوتی ہیں یوں ہی رسمیں
بھائی خنجر سے گلے ملتے ہیں سب آپس میں

رام پرشاد بسمل
نظم

ظلم کی رات بہت جلد ٹلے گی اب تو
آگ چولہوں میں ہر اک روز جلے گی اب تو
بھوک کے مارے کوئی بچہ نہیں روئے گا
چین کی نیند ہر ایک شخص یہاں سوئے گا
آندھی نفرت کی چلے گی نہ کہیں اب کے برس
پیار کی فصل اگائے گی زمیں اب کے برس
ہے یقیں اب نہ کوئی شور شرابہ ہوگا
ظلم ہوگا نہ کہیں خون خرابا ہوگا
اوس اور دھوپ کے صدمے نہ سہے گا کوئی
اب مرے دیش میں بے گھر نہ رہے گا کوئی
نئے وعدوں کا جو ڈالا ہے وہ جال اچھا ہے
رہنماؤں نے کہا ہے کہ یہ سال اچھا ہے
دل کے خوش رکھنے کو غالب یہ خیال اچھا ہے

صابر دت
نظم

ایک تو اونچا سب سے ہمالہ
اس پر میرے دیش کا جھنڈا
دھرتی پر آکاش کا دھوکا

نذیر بنارسی
نظم

بھارت کے اے سپوتو ہمت دکھائے جاؤ
دنیا کے دل پہ اپنا سکہ بٹھائے جاؤ
مردہ دلی کا جھنڈا پھینکو زمین پر تم
زندہ دلی کا ہر سو پرچم اڑائے جاؤ
لاؤ نہ بھول کر بھی دل میں خیال پستی
خوش حالئ وطن کا بیڑا اٹھائے جاؤ
تن من مٹائے جاؤ تم نام قومیت پر
راہ وطن میں اپنی جانیں لڑائے جاؤ
کم ہمتی کا دل سے نام و نشاں مٹا دو
جرأت کا لوح دل پر نقشہ جمائے جاؤ
اے ہندوؤ مسلماں آپس میں ان دنوں تم
نفرت گھٹائے جاؤ الفت بڑھائے جاؤ
بکرمؔ کی راج نیتی اکبرؔ کی پالیسی کی
سارے جہاں کے دل پر عظمت بٹھائے جاؤ
جس کشمکش نے تم کو ہے اس قدر مٹایا
تم سے ہو جس قدر تم اس کو مٹائے جاؤ
جن خانہ جنگیوں نے یہ دن تمہیں دکھائے
اب ان کی یاد اپنے دل میں بھلائے جاؤ
بے خوف گائے جاؤ ''ہندوستاں ہمارا''
اور ''وندے ماترم'' کے نعرے لگائے جاؤ
جن دیش سیوکوں سے حاصل ہے فیض تم کو
ان دیش سیوکوں کی جے جے منائے جاؤ
جس ملک کا ہو کھاتے دن رات آب و دانہ
اس ملک پر سروں کی بھیٹیں چڑھائے جاؤ
پھانسی کا جیل کا ڈر دل سے فلکؔ مٹا کر
غیروں کے منہ پہ سچی باتیں سناتے جاؤ

لال چند فلک
نظم

بھارت پیارا دیش ہمارا سب دیشوں سے نیارا ہے
ہر رت ہر اک موسم اس کا کیسا پیارا پیارا ہے
کیسا سہانا کیسا سندر پیارا دیس ہمارا ہے
دکھ میں سکھ میں ہر حالت میں بھارت دل کا سہارا ہے
بھارت پیارا دیش ہمارا سب دیشوں سے نیارا ہے

حامد اللہ افسر
نظم

زمین ہند ہے اور آسمان آزادی
یقین بن گیا اب تو گمان آزادی
سنو بلند ہوئی پھر اذان آزادی
سر نیاز ہے اور آستان آزادی
پہاڑ کٹ گیا نور سحر سے رات ملی
خدا کا شکر غلامی سے تو نجات ملی
ہوائے عیش و طرب بادبان بن کے چلی
زمیں وطن کی نیا آسمان بن کے چلی
نسیم صبح پھر ارجنؔ کا بان بن کے چلی
بہار ہند ترنگا نشان بن کے چلی
سپاہی دیش کا اپنے ہر اک جوان بنا
بل ابروؤں کا کڑکتی ہوئی کمان بنا
نظر نواز ہے رنگ بہار آزادی
ہر ایک ذرہ ہے آئینہ دار آزادی
ہے سر زمین وطن جلوہ زار آزادی
سروں کے ساتھ ہے اب تو وقار آزادی
کہاں ہیں آج وہ شمع وطن کے پروانے
بنے ہیں آج حقیقت انہیں کے افسانے
حجاب اٹھ گئے اب کس کی پردہ داری ہے
غضب کی دیدۂ نرگس میں ہوشیاری ہے
کلی نے مانگ بڑے حسن سے سنواری ہے
حسین پھولوں میں رنگ خود اختیاری ہے
کھٹک کہاں سے ہو اب دل میں کوئی پھانس بھی ہے
خدا کا شکر کہ مرضی کی اب تو سانس بھی ہے
زمین اپنی فضا اپنی آسمان اپنا
حکومت اپنی علم اپنا اور نشان اپنا
ہیں پھول اپنے چمن اپنے باغبان اپنا
اطاعت اپنی سر اپنا ہے آستان اپنا
جمال کعبہ نہیں یا جمال دیر نہیں
سب اپنے ہی نظر آتے ہیں کوئی غیر نہیں

سراج لکھنوی
نظم

سب کچھ ہے اپنے دیس میں روٹی نہیں تو کیا
وعدہ لپیٹ لو جو لنگوٹی نہیں تو کیا

شمسی مینائی
نظم

جی جان سے ہم نے محنت کی اور اول نمبر پاس ہوئے
اسکول سے ہم نے الفت کی ہم اول نمبر پاس ہوئے
پکچر بھی نہیں دیکھی ہم نے ہاکی بھی نہیں کھیلی ہم نے
لے لے کے کتابیں پڑھتے رہے اور خوب پڑھائی کی ہم نے
استاد کی ہم نے عزت کی ہم اول نمبر پاس ہوئے
جی جان سے ہم نے محنت کی ہم اول نمبر پاس ہوئے
دن رات جو کھیلا کرتے تھے وہ بھائی ہمارے فیل ہوئے
دن رات جو گھوما کرتے تھے وہ بھائی ہمارے فیل ہوئے
اس کھیل سے ہم نے نفرت کی ہم اول نمبر پاس ہوئے
جی جان سے ہم نے محنت کی ہم اول نمبر پاس ہوئے
اب پیار سے امی کہتی ہیں اک سوٹ تمہیں بنوا دیں گے
اب پیار سے پاپا کہتے ہیں دلی سے کھلونا لا دیں گے
ماں باپ کی ہم نے خدمت کی ہم اول نمبر پاس ہوئے
جی جان سے ہم نے محنت کی ہم اول نمبر پاس ہوئے
ہر سال رہیں گے ہم اول اور آگے بڑھتے جائیں گے
اس دیش کے ننھے منے ہیں ہم اپنے ہنر دکھلائیں گے
کیا بات ہماری ہمت کی ہم اول نمبر پاس ہوئے
جی جان سے ہم نے محنت کی ہم اول نمبر پاس ہوئے

حسرتؔ جے پوری
نظم

طاقت ہو کسی میں تو مٹائے مری ہستی
ڈائن ہے مرا نام لقب فرقہ پرستی
میں نے بڑی چالاکی سے اک کام کیا ہے
پہلے ہی محبت کا گلا گھونٹ دیا ہے
میں فتنے اٹھا دیتی ہوں ہر اٹھتے قدم سے
اس دیش کے ٹکڑے بھی ہوئے میرے ہی دم سے
سرمایہ پرستوں نے جنم مجھ کو دیا ہے
مذہب کے تعصب نے مجھے گود لیا ہے
ہے ملک کی تقسیم لڑکپن کی کہانی
اس وقت تو بچپن تھا مرا اب ہے جوانی
گھبراتا ہے شیطاں مری تقریر کے فن سے
میں زہر اگلتی ہوں زباں بن کے دہن سے
درکار ہوا جب بھی مجھے خون زیادہ
میں آ گئی اوڑھے ہوئے مذہب کا لبادہ
میں دیش کی قتالہ ہوں اور سب سے بڑی ہوں
بچوں کی بھی گردن پہ چھری بن کے چلی ہوں
گولی کو سکھا دیتی ہوں چلنے کا قرینہ
میں چھید کے رکھ دیتی ہوں مظلوم کا سینہ
ہر سوکھے ہوئے ہونٹ سے لیتی ہوں تری میں
دم توڑنے والوں کی اڑاتی ہوں ہنسی میں
معصوموں کے ماں باپ کا سر میں نے لیا ہے
بچوں کو یتیمی کا لقب میں نے دیا ہے
ہندو کا لہو ہو کہ مسلماں کا لہو ہو
مطلب ہے لہو سے کسی انساں کا لہو ہو
مل جائے تو میں کس کا لہو پی نہیں سکتی
مجبور ہوں بے خون پیے جی نہیں سکتی
ہر فرقے کے لوگوں کا لہو چاٹ رہی ہوں
فصلوں کی طرح سب کے گلے کاٹ رہی ہوں
جس وقت جہاں چاہوں وہاں آگ لگا دوں
جس بستی کو چاہوں اسے ویرانہ بنا دوں
جس شہر کو پھونکا نہ مکیں تھے نہ مکاں تھا
اٹھتا ہوا کچھ دیر اگر تھا تو دھواں تھا
گلشن مرے ہاتھوں یوں ہی تاراج رہے گا
میں زندہ رہوں گی تو مرا راج رہے گا
طاقت ہو کسی میں تو مٹائے مری ہستی
ڈائن ہے مرا نام لقب فرقہ پرستی

نذیر بنارسی
نظم

راہبر دیش بھگتی کا وہ
شاہ تھا اک لنگوٹی کا وہ
پیار کے وہ لٹاتا تھا پھول
تھا اہنسا اسی کا اصول
نرمی سے زندگی تنگ کی
اس نے انگریزوں سے جنگ کی
حوصلے ہو گئے ان کے پست
آن پہنچی جو پندرہ اگست
دل ہر اک شاد ہو ہی گیا
دیش آزاد ہو ہی گیا
دوستی کا سبق دے گیا
مر کے جاوید وہ ہو گیا
پھر کریں یاد اس کے اصول
اور چڑھائیں عقیدت کے پھول

ابرار کرتپوری
نظم

چمنیاں بھتنیوں کی طرح بال کھولے ہوئے
کارخانے گرجتے ہوئے
خون کی اور پسینے کی بو میں شرابور
خون سرمایہ داری کے نالوں میں بہتا ہوا
بھٹیوں میں ابلتا ہوا
سرد سکوں کی صورت میں جمتا ہوا
سونے چاندی میں تبدیل ہوتا ہوا
بنک کی کھڑکیوں میں چراغاں
سڑکیں دن رات چلتی ہوئی
سانس لیتی ہوئی
آدمی خواہشوں کے اندھیرے نشیبوں میں سیلاب کی طرح بہتے ہوئے
چور بازار، سٹا، جواری
ریس کے گھوڑے، سرکار کے منتری
سنیما، لڑکیاں، ایکٹر، مسخرے
ایک اک چیز بکتی ہوئی
گاجریں، مولیاں، ککڑیاں
جسم اور ذہن اور شاعری
علم، حکمت، سیاست
انکھڑیوں اور ہونٹوں کے نیلام گھر
عارضوں کی دکانیں
بازوؤں اور سینوں کے بازار
پنڈلیوں اور رانوں کے گودام
دیش بھگتی کے دلال کھادی کے بیوپاری
عقل، انصاف، پاکیزگی، اور صداقت کے تاجر

علی سردار جعفری
نظم

ہر سو ہے بہار ماہ اگست
ہے دل میں قرار ماہ اگست
اپنا ہے چمن اپنا ہے وطن
اپنا ہے جہان آزادی
ہے ہاتھوں میں آزادی کا علم
ہے سب سے جدا اپنا پرچم
آزاد ہے اب اپنا مسکن
اونچا ہے نشان آزادی
دھرتی کو سجائیں گے ہم سب
گلزار بنائیں گے ہم سب
ہم سب کو ترقی کی ہے لگن
دکھلائیں گے شان آزادی
اس دیش کی ہر شے ہے پیاری
ہر چیز یہاں کی ہے نیازی
کشمیر ہمالہ گنگ و جمن
کرتے ہیں بیان آزادی
بچے ہیں مگر ہمت والے
ہیں آزادی کے رکھوالے
کر دیں گے زمانے کو روشن
ہم لوگ ہیں جان آزادی

شوکت پردیسی
نظم

آج کے ٹوٹے کھنڈروں پر تم کل دیش بساؤ گے
جو ہم لوگوں سے نہ ہوا وہ تم کر کے دکھلاؤ گے

ساحر لدھیانوی
نظم

بھارت ماں کی آنکھ کے تارو
ننھے منے راج دلارو
جیسے میں نے تم کو سنوارا
ویسے ہی تم دیش سنوارو
بھارت ماں کی آنکھ کے تارو

ساحر لدھیانوی
نظم

رشک فردوس ہے تیرا رنگیں چمن
تجھ پہ گلباش کرتے ہیں کوہ و دمن
تیرے ماتھے کی ریکھا ہیں گنگ و جمن
تیری مٹی میں خوابیدہ ہیں فکر و فن
فخر یونان تھی تیری بزم کہن
میرے ہندستاں میرے پیارے وطن
دیوتاؤں کی رشیوں کی یہ سرزمیں
ذرہ ذرہ تری خاک کا ہے حسیں
چومتا ہے قمر روز تیری جبیں
تیرے جلوے نہ ہوں کس لیے دل نشیں
تیرے ذرے میں خورشید کی ہے کرن
میرے ہندستاں میرے پیارے وطن
تیرے قدموں کی زینت ہے گوداوری
ہے ہمالہ کا پربت ترا سنتری
ہے حقیقت میں کشمیر جنت تری
ذرے ذرے میں تیرے ہے اک زندگی
دیش کی شان ہے تاج کا بانکپن
میرے ہندستاں میرے پیارے وطن
کس بلا کی کشش تیرے خاروں میں ہے
اوج فردوس پنہاں بہاروں میں ہے
اک نیا بانکپن کوہساروں میں ہے
دل کشی کس قدر چاند تاروں میں ہے
ہے زمانہ سے اعلیٰ تری انجمن
میرے ہندستاں میرے پیارے وطن
میرا مندر ہے تو میرا کعبہ ہے تو
میرا ملجا ہے تو میرا ماویٰ ہے تو
میری عقبیٰ ہے تو میری دنیا ہے تو
میرا ہے ساز دل میرا نغمہ ہے تو
میری ہر سانس تیرے لیے نغمہ زن
میرے ہندستاں میرے پیارے وطن
سب کو الفت کے مرکز پہ لاؤں گا میں
ایکتا کا دیا پھر جلاؤں گا میں
اپنے ہاتھوں وطن کو سجاؤں گا میں
پریم کے گیت ہر وقت گاؤں گا میں
اس طرح کا بناؤں گا میں سنگٹھن
میرے ہندستاں میرے پیارے وطن
خون سے اپنے دوں گا تجھے زندگی
تیرے پھولوں کو دوں گا نرالی خوشی
ذرے ذرے کو بخشوں گا میں روشنی
سب کو ایسی سناؤں گا میں راگنی
شانتی کی بہاؤں گا گنگ و جمن
میرے ہندستاں میرے پیارے وطن

کنول ڈبائیوی
نظم

پھر وہی ماحول وہی شور شرابہ
وہی کچھ نئے پرانے چہروں کا بول بالا
پھر سے سج گئی تبدیلیوں کی منڈیاں
پر اصل میں کچھ نہیں بدلنے والا
پھر چیختے پھر رہے بد حواس چہرہ
پھر رچے جانیں لگیں ہیں سڈینتر گہرے
پھر سے گونجنے لگیں ہیں فضاؤں میں نعرے
پچھلگو بن گئے ہیں کچھ بھوک کے مارے
پھر سے یہ بتائی جانے لگی بدلاؤ کی باتیں
پھر سے کرسی قبضانے کو ہونے لگیں ہیں گھاتیں
پھر سے آ گیا ہے چناؤ کا موسم پانچ سالہ
پر اصل میں کچھ نہیں بدلنے والا
کچھ آ جائیں گے چہرہ نئے پرانے
بن کے رہنما لگ جائیں گے دیش کو کھانے
پھر شروع ہوگا عام آدمی کی تقدیر سے کھیل
پھر بھیجا جائے گا کچھ ہارے ہوؤں کو جیل
پھر سے نیایے کا ڈھونگ رچایا جائے گا
آدمی کو روٹی کے وعدے سے بہلایا جائے گا
پھر سے ہوگا لوٹ کھسوٹ کا ننگا ناچ
پھر جھوٹھ کو بتایا جائے گا سانچ
مجھے جلائے گی میرے اندر کی آنچ
اور ٹوٹتے سپنے چبھیں گے بن کے کانچ
پھر سے زندگی بننے لگے گی مکڑ جالا
میں جانتا ہوں کہ کچھ نہیں بدلنے والا

مادھو اوانہ
نظم

پتیاں کتنی بھی آئیں جائیں
سوتنترتا دیوس کی ہاردک شبھ کامنائیں
دیش کا کوئی بھی گلی کوچہ رہے
ترنگا ہمیشہ سب سے اونچا رہے
ترنگے میں کیسریا سفید ہرا رنگ ہیں
ترنگے کے رنگ ہمارے دیش کے انگ ہیں
کیسریا سوریہ ہرا وکاس کا پرتیک
سفید شانتی اور دھرم نربھیک
تینوں سے مل کر ترنگا بنتا ہے
سنتلن بنائے رکھنے کے لیے سرکار جنتا ہے
بس ایک رنگ کو گر زیادہ مہتو دیں گے
تو دیش کا سنتلن بگاڑ لیں گے
جب جنتا سرکار ہی سنتلن بگاڑنے لگ جائے
تو پھر دیش کو بس جے شری رام ہی بچائے
سہی کو سہی غلط کو غلط کہنا
دیش بھکتی ذمہ داری کا ہے گہنا
یدی ہم انیتک کو انیتک نہ کہہ پائیں
تو اس سے اچھا ہے کہ ہم گونگے ہو جائیں
آئیے کوشش کریں کی ذمے دار بنیں
آئیے کوشش کریں کی ایمان دار بنیں
دیش زندہ باد ہی رہے گا گر ہم ذمے دار نہ بنیں
دیش زندہ باد ہی رہے گا گر ہم ایمان دار نہ بنیں
دیش زندہ باد ہی رہے گا گر ہم کچھ بھی نہ بنیں
گر کچھ بھی نہ کر سکیں تو بس اتنا کریں
ہم مانوتا کے وردھ کبھی ہتھیار نہ بنیں
وپتیاں کتنی بھی آئیں جائیں
سوتنترتا دیوس کی ہاردک شبھ کامنائیں

سچن دیو ورما
Load More
Best poetry resource in urdu
تلاش
Get App
URD
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
بولیے