Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "dulaare"

نظم کے متعلقہ نتیجہ "dulaare"

نظم

اے دیکھنے والو
اس حسن کو دیکھو
اس راز کو سمجھو
یہ نقش خیالی
یہ فکرت عالی
یہ پیکر تنویر
یہ کرشن کی تصویر
معنی ہے کہ صورت
صنعت ہے کہ فطرت
ظاہر ہے کہ مستور
نزدیک ہے یا دور
یہ نار ہے یا نور
دنیا سے نرالا
یہ بانسری والا
گوکل کا گوالا
ہے سحر کہ اعجاز
کھلتا ہی نہیں راز
کیا شان ہے واللہ
کیا آن ہے واللہ
حیران ہوں کیا ہے
اک شان خدا ہے
بت خانے کے اندر
خود حسن کا بت گر
بت بن گیا آ کر
وہ طرفہ نظارے
یاد آ گئے سارے
جمنا کے کنارے
سبزے کا لہکنا
پھولوں کا مہکنا
گھنگھور گھٹائیں
سرمست ہوائیں
معصوم امنگیں
الفت کی ترنگیں
وہ گوپیوں کے ساتھ
ہاتھوں میں دیئے ہاتھ
رقصاں ہوا برج ناتھ
بنسی میں جو لے ہے
نشہ ہے نہ مے ہے
کچھ اور ہی شے ہے
اک روح ہے رقصاں
اک کیف ہے لرزاں
ایک عقل ہے مے نوش
اک ہوش ہے مدہوش
اک خندہ ہے سیال
اک گریہ ہے خوش حال
اک عشق ہے مغرور
اک حسن ہے مجبور
اک سحر ہے مسحور
دربار میں تنہا
لاچار ہے کرشنا
آ شیام ادھر آ
سب اہل خصومت
ہیں در پئے عزت
یہ راج دلارے
بزدل ہوئے سارے
پردہ نہ ہو تاراج
بیکس کی رہے لاج
آ جا میرے کالے
بھارت کے اجالے
دامن میں چھپا لے
وہ ہو گئی ان بن
وہ گرم ہوا رن
غالب ہے دریودھن
وہ آ گئے جگدیش
وہ مٹ گئی تشویش
ارجن کو بلایا
اپدیش سنایا
غم زاد کا غم کیا
استاد کا غم کیا
لو ہو گئی تدبیر
لو بن گئی تقدیر
لو چل گئی شمشیر
سیرت ہے عدو سوز
صورت نظر افروز
دل کیفیت اندوز
غصے میں جو آ جائے
بجلی ہی گرا جائے
اور لطف پر آئے
تو گھر بھی لٹا جائے
پریوں میں ہے گلفام
رادھا کے لیے شیام
بلرام کا بھیا
متھرا کا بسیا
بندرا میں کنھیا
بن ہو گئے ویراں
برباد گلستاں
سکھیاں ہیں پریشاں
جمنا کا کنارا
سنسان ہے سارا
طوفان ہیں خاموش
موجوں میں نہیں جوش
لو تجھ سے لگی ہے
حسرت ہی یہی ہے
اے ہند کے راجا
اک بار پھر آ جا
دکھ درد مٹا جا
ابر اور ہوا سے
بلبل کی صدا سے
پھولوں کی ضیا سے
جادو اثری گم
شوریدہ سری گم
ہاں تیری جدائی
متھرا کو نہ بھائی
تو آئے تو شان آئے
تو آئے تو جان آئے
آنا نہ اکیلے
ہوں ساتھ وہ میلے
سکھیوں کے جھمیلے

حفیظ جالندھری
نظم

رخصت ہوا وہ باپ سے لے کر خدا کا نام
راہ وفا کی منزل اول ہوئی تمام
منظور تھا جو ماں کی زیارت کا انتظام
دامن سے اشک پونچھ کے دل سے کیا کلام
اظہار بے کسی سے ستم ہوگا اور بھی
دیکھا ہمیں اداس تو غم ہوگا اور بھی
دل کو سنبھالتا ہوا آخر وہ نونہال
خاموش ماں کے پاس گیا صورت خیال
دیکھا تو ایک در میں ہے بیٹھی وہ خستہ حال
سکتا سا ہو گیا ہے یہ ہے شدت ملال
تن میں لہو کا نام نہیں زرد رنگ ہے
گویا بشر نہیں کوئی تصویر سنگ ہے
کیا جانے کس خیال میں گم تھی وہ بے گناہ
نور نظر یہ دیدۂ حسرت سے کی نگاہ
جنبش ہوئی لبوں کو بھری ایک سرد آہ
لی گوشہ ہائے چشم سے اشکوں نے رخ کی راہ
چہرہ کا رنگ حالت دل کھولنے لگا
ہر موئے تن زباں کی طرح بولنے لگا
آخر اسیر یاس کا قفل دہن کھلا
افسانۂ شدائد رنج و محن کھلا
اک دفتر مظالم چرخ کہن کھلا
وا تھا دہان زخم کہ باب سخن کھلا
درد دل غریب جو صرف بیاں ہوا
خون جگر کا رنگ سخن سے عیاں ہوا
رو کر کہا خموش کھڑے کیوں ہو میری جاں
میں جانتی ہوں جس لیے آئے ہو تم یہاں
سب کی خوشی یہی ہے تو صحرا کو ہو رواں
لیکن میں اپنے منہ سے نہ ہرگز کہوں گی ہاں
کس طرح بن میں آنکھوں کے تارے کو بھیج دوں
جوگی بنا کے راج دلارے کو بھیج دوں
دنیا کا ہو گیا ہے یہ کیسا لہو سپید
اندھا کیے ہوئے ہے زر و مال کی امید
انجام کیا ہو کوئی نہیں جانتا یہ بھید
سوچے بشر تو جسم ہو لرزاں مثال بید
لکھی ہے کیا حیات ابد ان کے واسطے
پھیلا رہے ہیں جال یہ کس دن کے واسطے
لیتی کسی فقیر کے گھر میں اگر جنم
ہوتے نہ میری جان کو سامان یہ بہم
ڈستا نہ سانپ بن کے مجھے شوکت و حشم
تم میرے لال تھے مجھے کس سلطنت سے کم
میں خوش ہوں پھونک دے کوئی اس تخت و تاج کو
تم ہی نہیں تو آگ لگا دوں گی راج کو
کن کن ریاضتوں سے گزارے ہیں ماہ و سال
دیکھی تمہاری شکل جب اے میرے نونہال
پورا ہوا جو بیاہ کا ارمان تھا کمال
آفت یہ آئی مجھ پہ ہوئے جب سفید بال
چھٹتی ہوں ان سے جوگ لیا جن کے واسطے
کیا سب کیا تھا میں نے اسی دن کے واسطے
ایسے بھی نامراد بہت آئیں گے نظر
گھر جن کے بے چراغ رہے آہ عمر بھر
رہتا مرا بھی نخل تمنا جو بے ثمر
یہ جائے صبر تھی کہ دعا میں نہیں اثر
لیکن یہاں تو بن کے مقدر بگڑ گیا
پھل پھول لا کے باغ تمنا اجڑ گیا
سرزد ہوئے تھے مجھ سے خدا جانے کیا گناہ
منجدھار میں جو یوں مری کشتی ہوئی تباہ
آتی نظر نہیں کوئی امن و اماں کی راہ
اب یاں سے کوچ ہو تو عدم میں ملے پناہ
تقصیر میری خالق عالم بہل کرے
آسان مجھ غریب کی مشکل اجل کرے
سن کر زباں سے ماں کی یہ فریاد درد خیز
اس خستہ جاں کے دل پہ چلی غم کی تیغ تیز
عالم یہ تھا قریب کہ آنکھیں ہوں اشک ریز
لیکن ہزار ضبط سے رونے سے کی گریز
سوچا یہی کہ جان سے بیکس گزر نہ جائے
ناشاد ہم کو دیکھ کے ماں اور مر نہ جائے
پھر عرض کی یہ مادر ناشاد کے حضور
مایوس کیوں ہیں آپ الم کا ہے کیوں وفور
صدمہ یہ شاق عالم پیری میں ہے ضرور
لیکن نہ دل سے کیجیے صبر و قرار دور
شاید خزاں سے شکل عیاں ہو بہار کی
کچھ مصلحت اسی میں ہو پروردگار کی
یہ جعل یہ فریب یہ سازش یہ شور و شر
ہونا جو ہے سب اس کے بہانے ہیں سر بسر
اسباب ظاہری میں نہ ان پر کرو نظر
کیا جانے کیا ہے پردۂ قدرت میں جلوہ گر
خاص اس کی مصلحت کوئی پہچانتا نہیں
منظور کیا اسے ہے کوئی جانتا نہیں
راحت ہو یا کہ رنج خوشی ہو کہ انتشار
واجب ہر ایک رنگ میں ہے شکر کرد گار
تم ہی نہیں ہو کشتہ نیرنگ روزگار
ماتم کدے میں دہر کے لاکھوں ہیں سوگوار
سختی سہی نہیں کہ اٹھائی کڑی نہیں
دنیا میں کیا کسی پہ مصیبت پڑی نہیں

چکبست برج نرائن
نظم

گو آفت و غم کے مارے ہیں
ہم خاک نہیں ہیں تارے ہیں
اس جگ کے راج دلارے ہیں
مزدور ہیں ہم مزدور ہیں ہم

اسرار الحق مجاز
نظم

ابھی اک سال گزرا ہے یہی موسم یہی دن تھے
مگر میں اپنے کمرے میں بہت افسردہ بیٹھا تھا
نہ کوئی سانولے محبوب کی یادوں کا افسانہ
نہ ایوان زمستاں کی طرف جانے کی کچھ خواہش
کسی نے حال پوچھا تو بہت ہی بے نیازی سے
کہا جی ہاں خدا کا شکر ہے میں خیریت سے ہوں
کوئی یہ پوچھتا کیوں آج کل کوئی غزل لکھی
نہ جانے بات کیا ہے ان دنوں کچھ ایسا لگتا ہے
تمہاری ہر غزل میں میر کا انداز ملتا ہے
ہر اک مصرعے سے جیسے دھیمی دھیمی آنچ اٹھتی ہے
تمہارے شعر پڑھ کر جانے کیوں محسوس ہوتا ہے
کہ کوئی ساز پر مدھم سروں میں گنگناتا ہے
مگر اک بات پوچھوں تم خفا تو ہو نہ جاؤگے
یہ آخر کیا سبب ہے آج کل نظمیں نہیں لکھتے
تمہاری آپ بیتی بھی ابھی تک نا مکمل ہے
اسے تو ناقدان فن نے سنتے ہی سراہا ہے
میں سب سنتا مگر یہ دل ہی دل میں سوچتا رہتا
مرے احباب کیا جانیں کہ مجھ پر کیا گزرتی ہے
مرے افکار پہ یہ کیسی ویرانی سی چھائی ہے
بہت کچھ سوچتا ہوں پھر بھی اب سوچا نہیں جاتا
بہت کچھ چاہتا ہوں پھر بھی کوئی بس نہیں چلتا
مگر اس بے بسی میں بھی مرے دل کی یہ حالت تھی
کبھی جب کوئی اچھی چیز پڑھنے کے لیے ملتی
تو پہروں روح پر اک وجد کی سی کیفیت ہوتی
رگوں میں میری جیسے خوں کی گردش تیز ہو جاتی
لہو کا ایک اک قطرہ یہ کہتا میں تو زندہ ہوں
مری پامالیوں میں پل رہی ہے اک توانائی
یہی عالم رہا تو جانے میں کس روز اٹھ بیٹھوں
بسنت آیا تو یوں آیا کہ میں بھی جیسے اٹھ بیٹھا
سویرا ہوتے ہی ہر سمت سے جھونکے ہواؤں کے
نئی خوشبو لیے مجھ کو جگانے کے لیے آئے
جدھر بھی آنکھ اٹھاتا ہوں شفق کی مسکراہٹ ہے
وہی سورج ہے لیکن اور ہی کچھ جگمگاہٹ ہے
نہ جانے کیسے کیسے پھول اب مجھ کو بلاتے ہیں
نہ جانے کتنے کتنے رنگ سے دل کو لبھاتے ہیں
فضا میں دور تک پھیلے ہوئے وہ کھیت سرسوں کے
یہ کہتے ہیں کہ اب ارماں نکالو اپنے برسوں کے
تمہارے سامنے پھیلا ہوا میدان سارا ہے
کوئی آواز دیتا ہے کہ آؤ تم ہمارے ہو
مری دھرتی کے بیٹے میری دنیا کے دلارے ہو
تمہاری آنکھ میں جو خواب سوئے ہیں وہ میرے ہیں
تمہارے اشک نے جو بیج بوئے ہیں وہ میرے ہیں
اسی وادی میں پھر سے لوٹ کر اب تم کو آنا ہے
تمہاری ہی یہ بستی ہے تمہیں کو پھر بسانا ہے
اب اس بستی میں رکھتے ہی قدم کچھ ایسا لگتا ہے
کہ اس کا ذرہ ذرہ پتہ پتہ کچھ نیا سا ہے
ہر اک رستے پہ جیسے کچھ نئے چہرے سے ملتے ہیں
یہی جی چاہتا ہے جو ملے اب اس سے یہ پوچھیں
تمہارا نام کیا ہے؟ تم کہاں کے رہنے والے ہو
کچھ ایسا جان پڑتا ہے کہ پہلے بھی ملے ہیں ہم
رہے ہیں ساتھ یا اک دوسرے کو جانتے ہیں ہم
اگر تم ساتھ تھے تو تم بھی شاید دوست تھے میرے
مجھے یاد آیا دونوں ساتھ ہی کالج میں پڑھتے تھے
وہ سارے دوستوں کا جمع ہونا میرے کمرے میں
وہ گپ شپ قہقہے وہ اپنے اپنے عشق کے قصے
وہ میرس روڈ کی باتیں وہ چرچے خوب رویوں کے
کبھی آوارہ گردی اپنی ان ویران سڑکوں کی
کبھی باتوں میں راتیں کاٹنا سنسان جاڑوں کی
کبھی وہ چاندنی میں اپنا یوں ہی گھومتے رہنا
کبھی وہ چائے کی میزوں پہ گھنٹوں بیٹھنا سب کا
وہ باتیں علم و حکمت کی کبھی شکوہ شکایت کی
تمہیں تو یاد ہوگا ان میں ہی اک دوست شاعر تھا
ذرا دیکھو تو مجھ کو غور سے شاید وہ میں ہی تھا
بہت دن میں ملے ہیں ہم تو آؤ آج جی بھر کر
ہنسیں بولیں کہیں آوارہ گردی کے لیے نکلیں
چلیں اور چل کے سارے دوستوں کو پھر بلا لائیں
سجائیں آج پھر محفل کہیں پینے پلانے کی
میں تم کو آج اپنی کچھ نئی باتیں بتاؤں گا
میں تم کو آج اپنی کچھ نئی نظمیں سناؤں گا

خلیل الرحمن اعظمی
نظم

سفر نصیب رفیقو قدم بڑھائے چلو
پرانے راہنما لوٹ کر نہ دیکھیں گے
طلوع صبح سے تاروں کی موت ہوتی ہے
شبوں کے راج دلارے ادھر نہ دیکھیں گے

ساحر لدھیانوی
نظم

اے نیچر کے راج دلارے
اے فطرت کی آنکھ کے تارے
محنت کا پھل پانے والے
کاندھے پر ہل لے جانے والے
صدیاں پلٹیں دنیا بدلے
یا ملکوں کا نقشہ بدلے
کچھ سے کچھ ہوں رنگ فضا کے
چرخ سے برسیں آگ کے شعلے
دھیمی ہو یا تند ہوا ہو
عالم ہر وادی کا نیا ہو
چرخ ہزاروں پلٹے کھائے
کیا ممکن جو تجھ کو ستائے
سارے جہاں میں جنگ چھڑی ہو
دنیا بھر میں آگ لگی ہو
کیوں ہو شورش تیری صدا میں
امن ہو جب کھیتوں کی فضا میں
گیت ہی تیرا نغمۂ شادی
تجھ پر صدقے ہر آزادی
سب پر حاوی ہمت تیری
سچی ہے یہ شوکت تیری
وقت کو تو غفلت میں نہ کھوئے
کھیت میں تو کانٹوں کو نہ بوئے
گھاس ہے تیرا بستر مخمل
اوڑھنے کو بوسیدہ کمل
جنگل جھاڑی بستی تیری
شاہ سے بہتر ہستی تیری
تو ہے اور زمانہ تیرا
ہم ہیں اور فسانہ تیرا

ثاقب کانپوری
نظم

جین پارسی سکھ عیسائی ہندو مسلم سارے
تیرے راج دلارے
بنگالی پنجابی اردو ہندی اور ملیالم
ایک گیت کے سرگم
تیری ذات عظیم ہے سب سے تیری بات مہان
میرے ہندوستان میرے ہندوستان

مظفر حنفی
نظم

آؤ بیٹھو پاس ہمارے
شاہی شالو پپی دلارے

جوہر رحمانی
نظم

تو مگر کب تھا کسی راج دلارے کی طرح
آخری وقت میں ٹوٹا تو ستارے کی طرح

شمسی مینائی
نظم

نند کے لال یشودا کے دلارے موہن
ہم تری یاد میں بیتاب ہیں سارے موہن
روتے روتے ہوئی بھگتوں کی ترے عمر بسر
کس مصیبت میں شب و روز گزارے موہن
نام لیوا ترے دنیا سے مٹے جاتے ہیں
جاں بہ لب ہیں تری آنکھوں کے ستارے موہن
جس کو کرتا تھا کلیجے سے گھڑی بھر نہ جدا
چھوڑ رکھا ہے اسے کس کے سہارے موہن
پھر وہی سانولی چھب آئے نظر بھگتوں کو
نند کی گود میں جمنا کے کنارے موہن
نند بابا کی کٹی ہو گئی سونی تجھ بن
پھیکے متھرا کے ہوئے سارے نظارے موہن
درد مندوں کو کلیجے سے لگانے والے
آفتابؔ آج مصیبت میں پکارے موہن

آفتاب رئیس پانی پتی
نظم

گڈو میرے پیارے بیٹے
میرے راج دلارے بیٹے
دیکھو تم غزلیں مت کہنا
بیٹے تم نظمیں مت لکھنا
لکھنا ہی پڑ جائے تو پھر سچ مت لکھنا
دیکھو بیٹا
سچ مت لکھنا
سچ مت لکھنا

مظفر حنفی
نظم

ننھے ننھے پیارے پیارے
چم چم ٹم ٹم نیارے نیارے
ہلکے پھلکے نور کے دھارے
نیل گگن کے راج دلارے
جگ مگ جگ مگ جگ مگ تارے
آ جاؤ تم گھر جو ہمارے
تم ہو ہمارے ہم ہوں تمہارے
آؤ آؤ چھت پر آؤ
آ نہ سکو تو ہاتھ بڑھاؤ
دودھ ملیدہ کھاؤ کھلاؤ
دن میں کہاں چھپتے ہو بتاؤ
جگ مگ جگ مگ جگ مگ تارے
آ جاؤ تم گھر جو ہمارے
تم ہو ہمارے ہم ہوں تمہارے
کونے میں وہ میری چھڑی ہے
اور یہ دس پیسے کی گھڑی ہے
گیند ہماری کتنی بڑی ہے
کھیلنے کو ہر چیز پڑی ہے
جگ مگ جگ مگ جگ مگ تارے
آ جاؤ تم گھر جو ہمارے
تم ہو ہمارے ہم ہوں تمہارے
میں ہوں پڑا خاک کے گھر میں
تم ہو بسے آکاش نگر میں
لاکھ ہو دوری بیچ ڈگر میں
کچھ بھی نہیں وہ میری نظر میں
جگ مگ جگ مگ جگ مگ تارے
آ جاؤ تم گھر جو ہمارے
تم ہو ہمارے ہم ہوں تمہارے
رات میں کیوں آتے ہو
دن میں کہاں چھپ جاتے ہو
اپنے گھر کیا کیا کھاتے ہو
نور کہاں سے پاتے ہو
جگ مگ جگ مگ جگ مگ تارے
آ جاؤ تم گھر جو ہمارے
تم ہو ہمارے ہم ہوں تمہارے
تم کو ہوگی معلومات
مجھ کو بتا دو اتنی بات
کیا ہے دن اور کیا ہے رات
جاڑا گرمی اور برسات
جگ مگ جگ مگ جگ مگ تارے
آ جاؤ تم گھر جو ہمارے
تم ہو ہمارے ہم ہوں تمہارے

ناظم میواتی سہسرامی
نظم

سارے وطن کے راج دلارے
صدر حکومت ذاکر پیارے
بھارت ماں کی آنکھ کے تارے
صدر حکومت ذاکر پیارے
بنیادی تعلیم کے بانی
حب وطن کی زندہ کہانی
علم کے دریا امن کے دھارے
صدر حکومت ذاکر پیارے
معمولی استاد سے بڑھ کر
بن گئے سارے ملک کے رہبر
غم سے کبھی ہمت ہی نہ ہارے
صدر حکومت ذاکر پیارے
دیکھ کے تیری جہد مسلسل
چھٹ گئے خود ہی دکھ کے بادل
پھول بنے غم کے انگارے
صدر حکومت ذاکر پیارے
گاندھی جی کے راز کے محرم
اور جواہر لال کے ہمدم
امن و اماں کے پالن ہارے
صدر حکومت ذاکر پیارے
آزادی کے دیپ جلائے
تو نے وطن سے دور بھگائے
عہد غلامی کے اندھیارے
صدر حکومت ذاکر پیارے
مشترکہ تہذیب کے مظہر
عجز و خلوص اخلاق کے پیکر
سب کی امیدوں کے سہارے
صدر حکومت ذاکر پیارے
تو ہے وطن کا رہبر سچا
کیوں نہ وطن کا بچہ بچہ
نام ترا عزت سے پکارے
صدر حکومت ذاکر پیارے

کیف احمد صدیقی
نظم

میں بھولی اے دیس دلارے
دنیا کی آنکھوں کے تارے
تم تو گئے خود جنگ میں مارے
گاتے گاتے ترانہ پیارے

علی جواد زیدی
نظم

سب بچوں کے راج دلارے
چندا ماما پیارے پیارے
دور سے چمکیں پاس نہ آئیں
ننھی کے وہ دل کو بھائیں
روشن روشن ان کا چہرہ
جس پر دے اک بادل پہرہ
ننھی کی نانی کہتی ہیں
چاند پہ کچھ پریاں رہتی ہیں
پریاں جب بھی پر پھیلائیں
چندا ماما خوش ہو جائیں
چاند پہ جب بادل چھا جائیں
چاند کی پریاں پھر اڑ جائیں

عشرت معین سیما
نظم

زمین ایک مدت سے
ہفت آسماں کی طرف سر اٹھائے ہوئے
رو رہی ہے
زمین اپنے آنسو
بہت اپنی ہی کوکھ میں بو رہی ہے
زمیں دل کشادہ ہے کتنی
فلک کے اتارے ہوئے بوجھ بھی ڈھو رہی ہے
فضا پر بہت دھند چھائی ہوئی ہے
جواں گل بدن شاہزادے
زمیں کے دلارے
اجڑتی ہوئی بزم کے چاند تارے
کٹی گردنوں گولیوں سے چھدے جسم کی
رت سجائے لہو میں نہائے
زمیں کی طرف آ رہے ہیں
زمیں ایک مدت سے
اس کار و بار ستم میں گھری ہے
زمین رو رہی ہے
مگر اس کے آنسو کی تحریر
روشن ہے اتنی
کہ آئندہ موسم اسی زندہ تحریر سے
جگمگاتے رہیں گے
اگر اس کے شہزادے
یوں ہی لہو میں نہاتے رہیں گے
تو اک روز تاریخ
ان کے لیے حشر برپا کرے گی

عین تابش
نظم

تم نے کیا دیکھا ہے طوطا
رنگ ہرا ہے پیارا پیارا
مڑی ہوئی ہے چونچ سرے پر
رنگت اس کی لال ہے خوشتر
دم لمبی اور ہرے ہرے پر
جاتا ہے ہر جا یہ اڑ کر
پتلی سی ٹہنی کے اوپر
بیٹھتا ہے یہ طوطا چڑھ کر
جہاں بھی ہے یہ آتا جاتا
عمدہ عمدہ میوے کھاتا
اس میں ہیں گن پیارے سارے
سب ہیں اس کے چاہنے والے
پیاری باتیں ہیں یہ سناتا
دل کا سب دکھ ہے یہ مٹاتا
تم بھی سمجھ لو یہ اے لڑکو
جو استاد بتائے سیکھو
کام کرو تم ایسے پیارے
گھر بھر کے ہو جاؤ دلارے
ساری دنیا تم کو چاہے
گیت تمہارے گھر گھر گائے
ورنہ تمہاری درگت ہوگی
سب کو تم سے نفرت ہوگی
جوہرؔ کی اس بات کو مانو
دوست اسے تم اپنا جانو

بنے میاں جوہر
نظم

اے نیچر کے راج دلارے
اے فطرت کی آنکھ کے تارے
محنت کا پھل پانے والے
کاندھے پر ہل لے جانے والے
صدیاں پلٹیں دنیا بدلے
یا ملکوں کا نقشہ بدلے
کچھ سے کچھ ہوں رنگ فضا کے
چرخ سے برسیں آگ کے شعلے
دھیمی ہو یا تند ہوا ہو
عالم ہر وادی کا نیا ہو
چرخ ہزاروں پلٹے کھائے
کیا ممکن جو تجھ کو ستائے
سارے جہاں میں جنگ چھڑی ہو
دنیا بھر میں آگ لگی ہو
کیوں ہو شورش تیری صدا میں
امن ہو جب کھیتوں کی فضا میں
گیت ہے تیرا نغمۂ شادی
تجھ پر صدقے ہر آزادی
سب پر حاوی ہمت تیری
سچی ہے یہ شوکت تیری
وقت کو تو غفلت میں نہ کھوئے
کھیت میں تو کانٹوں کو نہ بوئے
گھاس ہے تیرا بستر مخمل
اوڑھنے کو بوسیدہ کمل
جنگل جھاڑی بستی تیری
شاہ سے بہتر ہستی تیری
تو ہے اور زمانہ تیرا
ہم ہیں اور فسانہ تیرا

ثاقب کانپوری
نظم

نند کے لال جسودا کے دلارے موہن
سب کے بگڑے ہوئے سب کام سنوارے موہن

بسمل الہ آبادی
نظم

جب بھی بچھڑی ہوئی دلی کا سماں یاد آیا
بھولی بسری ہوئی یادوں کا جہاں یاد آیا
اپنے آغاز جوانی کا سماں یاد آیا
کوچۂ رود گراں لال کنواں یاد آیا
اسی پھاٹک میں تو گزرا تھا لڑکپن اپنا
ایک اک طفل تو ایک ایک جواں یاد آیا
چاچا کلن کی مٹھائی کی دوکاں یاد آئی
اس کے اوپر کسی مہوش کا مکاں یاد آیا
ہائے وہ نقرئی آواز وہ تیکھے خد و خال
پس چلمن وہ نظاروں کا جہاں یاد آیا
کیا نہ یاد آیا غریب الوطنی میں ہم کو
ایک اک وہم تو ایک ایک گماں یاد آیا
آئی ہمدرد دوا خانے کی جب یاد ہمیں
ایک تابندہ‌ و پائندہ جہاں یاد آیا
الجمعیۃ کے قریں ہو کے تصور جو چلا
حفظ رحمان سا اک مرد جہاں یاد آیا
جس کی تقریر رگ و پے میں اتر جاتی تھی
سب سے تھا جس کا جدا طرز بیاں یاد آیا
کالے صاحب کا احاطہ بھی نظر میں گھوما
محفل شعر و سخن کا بھی سماں یاد آیا
بلیماران سے پہلے گلی قاسم جاں میں
غالبؔ خستہ کا بوسیدہ مکاں یاد آیا
وہیں یاد آیا دوا خانۂ ہندوستانی
خان اجمل سا مسیحائے زماں یاد آیا
کوچۂ داغؔ سے ہو کر جو چلا حسن خیال
شاعر اہل نظر اہل زباں یاد آیا
چاندنی چوک کی یاد آئی جو گہما گہمی
وہ حسیں شام کا پرکیف سماں یاد آیا
کالے برقعوں میں وہ ملبوس حسیناؤں کے غول
چاند کے ٹکڑوں کا اک سیل رواں یاد آیا
گھنٹہ گھر لوگ سمجھتے تھے جسے دلی کی ناک
پوری دلی کا وہ تنہا نگراں یاد آیا
ہو کے فوارے سے جا پہنچا دریبے میں خیال
سونے چاندی کی دکانوں کا جہاں یاد آیا
جامع مسجد نظر آئی تو ادھر کو لپکے
خوانچہ والوں کا انداز بیاں یاد آیا
سیڑھیوں پر وہ کٹوروں کی صدا گونج اٹھی
پیچ کھاتا ہوا حقے کا دھواں یاد آیا
جامع مسجد کے مناروں سے جسے دیکھا تھا
وہ نظارہ کہ جو تھا راحت جاں یاد آیا
کابکوں جیسے مکانات نظر میں گھومے
ایک اک فٹ کا ہر اک پیر و جواں یاد آیا
اک اچٹتی سی نظر لال قلعہ پر بھی پڑی
دل پہ دھچکا سا لگا شاہ جہاں یاد آیا
اردو بازار کی یاد آئی اس انداز کے ساتھ
کہ صحافت کا کوئی بحر رواں یاد آیا
آ گئے یاد وہیں سائلؔ و بیخودؔ کیفیؔ
داغؔ والوں کا پھر انداز بیاں یاد آیا
میر مشتاقؔ کی مردانہ روی یاد آئی
خدمت خلق کا اک عزم جواں یاد آیا
یاد آئی وہیں مولانا سمیع اللہ کی
جیسے با ہمت و پامرد جواں یاد آیا
شاعروں کی جہاں رہتی تھی نشست و برخاست
جگرؔ خستہ کو دیکھا تھا کہاں یاد آیا
بسملؔ و بیدیؔ و محرومؔ و وفاؔ و گلزارؔ
مجمع شاعر و صاحب نظراں یاد آیا
چاوڑی پھر گئی آنکھوں میں جوانی کی طرح
کوچہ ہائے صنم سیم تناں یاد آیا
یک بیک سین جو بدلا تو سماں یاد آیا
دہشت و خوف کا ایک سیل رواں یاد آیا
خاک اڑنے لگی دلی کے گلی کوچوں میں
متفکر سا ہر اک پیر و جواں یاد آیا
چھوڑ کر دلی کو جانے لگے دلی والے
اک ہجوم بہ لب آہ و فغاں یاد آیا
پاؤں تک جن کا نہ دیکھا تھا کھلے سر دیکھا
نوحہ گر قافلۂ لالہ رخاں یاد آیا
قافلے دلی سے جانے لگے بن بن کے جہاں
مقبرے کا وہ ہمایوں کے سماں یاد آیا
تھا قیامت کا وہ منظر کہ تھی نفسی نفسی
حال پر اپنے فلک گریہ کناں یاد آیا
یعنی برسات یہ کہتی تھی کہ برسوں برسوں
کتنا اس دور میں اللہ میاں یاد آیا
اور اک پردہ اٹھا اور سماں یاد آیا
اور اک منظر دل دوز وہاں یاد آیا
غدر کی کھنچ گئی آنکھوں میں مکمل تصویر
ظفرؔ سوختہ تن سوختہ جاں یاد آیا
شاہزادوں کے جو سر پیش ظفرؔ یاد آئے
اپنا غم بھول گئے جب وہ سماں یاد آیا
تیرے خورشید ترے چاند ستارے دلی
چھوٹ کر تجھ سے مہاجر ہیں بچارے دلی
بے وطن ہو کے ترے راج دلارے دلی
جی رہے ہیں تری یادوں کے سہارے دلی

کامل چاند پوری
Load More
Best poetry resource in urdu
تلاش
Get App
URD
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
بولیے