کی تلاش کا نتیجه | موضو - نظم, صفحہ ghus

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "ghus"

نظم کے متعلقہ نتیجہ "ghus"

نظم

دھوپ میں تیزی نہیں
ایسے آتا ہے ہر اک جھونکا ہوا کا جیسے
دست شفقت ہے بڑی عمر کی محبوبہ کا
اور مرے شانوں کو اس طرح ہلا جاتا ہے
جیسے میں نیند میں ہوں
عورتیں چرخے لیے بیٹھی ہیں
کچھ کپاس اوٹتی ہیں
کچھ سلائی کے کسی کام میں مصروف ہیں یوں
جیسے یہ کام ہے دراصل ہر اک شے کی اساس
ایک سے ایک چہل کرتی ہے
کوئی کہتی ہے مری چوڑیاں کھنکیں تو کھنکھاری مری ساس
کوئی کہتی ہے بھری چاندنی آتی نہیں راس
رات کی بات سناتی ہے کوئی ہنس ہنس کر
بات کی بات سناتی ہے کوئی ہنس ہنس کر
لذت وصل ہے آزار، کوئی کہتی ہے
میں تو بن جاتی ہوں بیمار، کوئی کہتی ہے
میں بھی گھس آتا ہوں اس شیش محل میں دیکھو
سب ہنسی روک کے کہتی ہیں نکالو اس کو

اختر الایمان

نظم

ٹینس کے بال
کستی انگیا میں
گھس گھسا کے
پستان بن گئے تھے
شہوت کے سرخ ڈورے
سرمہ لگانے والی
آنکھوں میں تن گئے تھے

ساقی فاروقی

نظم

خدا کا یہ کرنا ہوا
ایک دن
اس کی دکاں سے
ایران کا اک وزیر کہن سال گزرا
اور اس نے چاہا
کہ وہ بھی ذرا
اپنے الجھے ہوئے ذہن کی
از سر نو صفائی کرا لے
کیا کاسۂ سر کو نائی نے خالی
ابھی وہ اسے صاف کرنے لگا تھا
کہ ناگاہ آ کر کہا ایک خواجہ سرا نے:
میں بھیجا گیا ہوں جناب وزارت پنہ کو بلانے
اور اس پر
سراسیمہ ہو کر جو اٹھا وزیر ایک دم
رہ گیا پاس دلاک کے مغز اس کا
وہ بے مغز سر لے کے دربار سلطاں میں پہنچا
مگر دوسرے روز اس نے
جو نائی سے آ کر تقاضا کیا
تو وہ کہنے لگا:
حیف
کل شب پڑوسی کی بلی
کسی روزن در سے گھس کر
جناب وزارت پنہ کے
دماغ فلک تاز کو کھا گئی ہے
اور اب حکم سرکار ہو تو
کسی اور حیوان کا مغز لے کر لگا دوں
تو دلاک نے رکھ دیا
دانیال زمانہ کے سر میں
کسی بیل کا مغز لے کر
تو لوگوں نے دیکھا
جناب وزارت پنہ اب
فراست میں
دانش میں
اور کاروبار وزارت میں
پہلے سے بھی چاق و چوبند تر ہو گئے ہیں

ن م راشد

نظم

مسماۃ گل دختر شیخ خارؔ
بہ مہر معجل بیاسی ہزار
گلستاں کا موتی سمندر کا پھول
کہو بھائی گڈے یہ شادی قبول

اخگر مشتاق رحیم آبادی

نظم

دسمبر کا مہینہ اور دلی کی سردی
ستاروں کی جھلملاتی جھرمٹ سے پرے
آسمان کے ایک سنسان گوشے میں
پونم کا ٹھٹھرتا ہوا کوئی چاند جیسے
بادلوں میں کھاتا ہے متواتر ہچکولے
ہولے ہولے
تنہا مسافر
اور دور تک کہرے کی چادر میں لپٹی
بل کھاتی سڑکیں
دھند کی غبار میں کھویا ہوا انڈیا گیٹ
ٹھنڈ میں ٹھوکریں کھاتا مسافر
خوش نصیب ہے
بادلوں میں گھس جاتا ہے چاند
میری کرسمس کی رونقیں پھیلی ہیں تمام
ستاروں سے روشن سجے دھجے بازار
لذیذ کھانوں کی خوشبوئیں جہاں پھیلی ہیں ہر سو
بازار کی گرم فضاؤں میں
مے کی سرمستی میں ڈوبا ہوا ہے پورے شہر کا شباب
تنہا مسافر کی
چند روزہ مسافت بھی کیا شے ہے یارو!
ہم وطنوں سے دور
اپنوں سے دور
جمنا تٹ پر جیسے بن مانجھی کے ناؤ
بوٹ کلب کے سرد پانی میں جیسے
تیرتا رکتا ہوا کوئی تنہا حباب
تنہا مسافر سوچتا ہے
کوئی ہے جس کا وہ ہاتھ تھام لے ہولے ہولے
کوئی ہے جو اس کے ساتھ کچھ دور چلے ہولے ہولے
دھند میں کھوئی ہوئی منزلیں
طویل سڑکیں
اور تنہا مسافر
جیسے پونم کا ٹھٹھرتا ہوا کوئی چاند
بادلوں میں کھاتا ہے متواتر ہچکولے
ہولے ہولے

پرویز شہریار

نظم

مری آنکھوں میں مگر چھایا ہے بادل بن کر
ایک دیوار کا روزن اسی روزن سے نکل کر کرنیں
مری آنکھوں سے لپٹتی ہیں مچل اٹھتی ہیں
آرزوئیں دل غم دیدہ کے آسودہ نہاں خانے سے
اور میں سوچتا ہوں نور کے اس پردے میں
کون بے باک ہے اور بھولی سی محبوبہ کون
سوچ کو روک ہے دیوار کی وہ کیسے چلے
کیسے جا پہنچے کسی خلوت محجوب کے مخمور صنم خانے میں
وہ صنم خانہ جہاں بیٹھے ہیں دو بت خاموش
اور نگاہوں سے ہر اک بات کہے جاتے ہیں
ذہن کو ان کے دھندلکے نے بنایا ہے اک ایسا عکاس
جو فقط اپنے ہی من مانے مناظر کو گرفتار کرے
میں کھڑا دیکھتا ہوں سوچتا ہوں جب دونوں
چھوڑ کر دل کے صنم خانے کو گھر جائیں گے
صحن میں تلخ حقیقت کو کھڑا پائیں گے
ایک سوچے گا مری جیب یہ دنیا یہ سماج
ایک دیکھے گا وہاں اور ہی تیاری ہے
مجھ کو الجھن ہے یہ کیوں میں تو نہیں ہوں موجود
رات کی خلوت محجوب کے مخمور صنم خانے میں
مری آنکھوں کو نظر آتا ہے روزن کا دھواں
اور دل کہتا ہے یہ دود دل سوختہ ہے
ایک گھنگھور سکوں ایک کڑی تنہائی
میرا اندوختہ ہے
مجھ کو کچھ فکر نہیں آج یہ دنیا مٹ جائے
مجھ کو کچھ فکر نہیں آج یہ بیکار سماج
اپنی پابندی سے دم گھٹ کے فسانہ بن جائے
مری آنکھوں میں تو مرکوز ہے روزن کا سماں
اپنی ہستی کو تباہی سے بچانے کے لیے
میں اسی روزن بے رنگ میں گھس جاؤں گا
لیکن ایسے تو وہی بت نہ کہیں بن جاؤں
جو نگاہوں سے ہر اک بات کہے جاتا ہے
چھوڑ کر جس کو صنم خانے کی محجوب فضا
گھر کے بیباک المناک سیہ خانے میں
آرزوؤں پہ ستم دیکھنا ہے گھلنا ہے
میں تو روزن میں نہیں جاؤں گا دنیا مٹ جائے
اور دم گھٹ کے فسانہ بن جائے
سنگ دل خون سکھاتی ہوئی بیکار سماج
میں تو اک دھیان کی کروٹ لے کر
عشق کے طائر آوارہ کا بہروپ بھروں گا پل میں
اور چلا جاؤں گا اس جنگل میں
جس میں تو چھوڑ کے اک قلب فسردہ کو اکیلے چل دی
راستہ مجھ کو نظر آئے نہ آئے پھر کیا
ان گنت پیڑوں کے میناروں کو
میں تو چھوتا ہی چلا جاؤں گا
اور پھر ختم نہ ہوگی یہ تلاش
جستجو روزن دیوار کی مرہون نہیں ہو سکتی
میں ہوں آزاد مجھے فکر نہیں ہے کوئی
ایک گھنگھور سکوں ایک کڑی تنہائی
مرا اندوختہ ہے

میراجی

نظم

ادھر سے نہ جاؤ
ادھر شاہ نادر نہیں آج کوئی بھی لیکن
وہی قتل عام آج بھی ہو رہا ہے
یہ میراث ہے آپ کی میری سب کی
یہ سوغات بیرونی حاکم ہمیں دے گئے ہیں
چلو سامنے کے اندھیرے میں گھس کر
اتر جائیں تہہ خانے کی خامشی میں
یہ سب کھڑکیاں بند کر دیں
کوئی چیخنے بین کرنے کی آواز ہم تک نہ آئے
کوئی خون کی چھینٹ دامن پہ آکر نہ بیٹھے
کبھی تم نے گانجا پیا ہے؟
کوئی بھنگ کا شوق، کوئی جڑی بوٹی کھائی
نہ کوکین افیون کچھ بھی
کبھی کوئی نشہ نہیں تم نے چکھا
نہ اغلام امرد پرستی سے رشتہ رہا ہے
کوئی تجربہ بھی نہیں زندگی کا؟

اختر الایمان

نظم

قبر میں اترتے ہی
میں آرام سے دراز ہو گیا
اور سوچا
یہاں مجھے
کوئی خلل نہیں پہنچائے گا
یہ دو گز زمین
میری
اور صرف میری ملکیت ہے
اور میں مزے سے
مٹی میں گھلتا ملتا رہا
وقت کا احساس
یہاں آ کر ختم ہو گیا
میں مطمئن تھا
لیکن بہت جلد
یہ اطمینان بھی مجھ سے چھین لیا گیا
ہوا یوں
کہ ابھی میں
پوری طرح مٹی بھی نہ ہوا تھا
کہ ایک اور شخص
میری قبر میں گھس آیا
اور اب
میری قبر پر
کسی اور کا
کتبہ نصب ہے!!

محمد علوی

نظم

جب اس کا بوسہ لیتا تھا سگریٹ کی بو نتھنوں میں گھس جاتی تھی
میں تمباکو نوشی کو اک عیب سمجھتا آیا ہوں
لیکن اب میں عادی ہوں، یہ میری ذات کا حصہ ہے
وہ بھی میرے دانتوں کی بد رنگی سے مانوس ہے، ان کی عادی ہے
جب ہم دونوں ملتے ہیں، لفظوں سے بیگانہ سے ہو جاتے ہیں
کمرے میں کچھ سانسیں اور پسینے کی بو، تنہائی رہ جاتی ہے!
ہم دونوں شاید مردہ ہیں احساس کا چشمہ سوکھا ہے
یا پھر شاید ایسا ہے یہ افسانہ بوسیدہ ہے
درد زہ سے زیست یونہی ہلکان تڑپتی رہتی ہے
نئے مسیحا آتے ہیں اور سولی پر چڑھ جاتے ہیں
اک مٹیالا انسان صفوں کو چیر کے آگے بڑھتا ہے اور منبر سے چلاتا ہے
ہم مصلوب کے وارث ہیں یہ خون ہمارا ورثہ ہے
اور وہ سب آدرش، وہ سب جو وجہ ملامت ٹھہرا تھا
اس مٹیالے شخص کے گہرے معدے میں کھپ جاتا ہے
پھر تفسیروں اور تاویلوں کی شکل میں باہر آتا ہے
یہ تاویلیں مجبوروں کا اک موہوم سہارا ہیں
یا شاید سب کا سہارا ہیں
یونہی میں آدرش انسان کا جویا ہوں
سب ہی سپنے دیکھتے ہیں خوابوں میں ہوا میں اڑتے ہیں
پھر اک منزل آتی ہے جب پھوٹ پھوٹ کر روتے ہیں
شاخوں کی طرح ٹوٹتے ہیں
اک روح جان و دل کو جو دنیا میں سب سے بڑھ کر ہے پا لیتے ہیں
پھر اس سے نفرت کرتے ہیں گو پھر بھی محبت کرتے ہیں!

اختر الایمان

نظم

یہ چوہا
بلیوں کو دیکھ کر
ڈرا سہما
شہر کی گلیوں میں
گھس جاتا ہے
ڈھونڈتا رہتا ہے دن بھر
اپنی وحشت کا سرا
مباشرت کی جگہ
آوارہ گردی کرتا ہے

احمد آزاد

نظم

بکرے تمام راہ میں ہنکارتے چلے
بنگلوں کے بیل بوٹوں پہ منہ مارتے چلے
جس گھر میں گھس گئے وہیں افطارتے چلے
اور جب ہلے جگہ سے تو سسکارتے چلے
گھر والے کہہ رہے ہیں کہ باہر نکال دو
بکرے مصر ہیں اس پہ کہ ڈیرہ ہی ڈال دو

سید محمد جعفری

نظم

ندی کی لہریں
سوتے سوتے
جیسے ایک دم جاگ پڑیں
اور جھپٹ پڑیں
ان گیلے گیلے
مٹی بالو کنکر
پتھر اور سیمنٹ کے
پشتوں پر
جن سے ان کو باندھ کے
سب نے رکھ چھوڑا تھا
لہک لہک کر
ناچ ناچ کر
شور مچاتی
چاروں اور
گلی گلی کوچے کوچے میں
گھروں میں صحنوں میں کمروں باغوں میں
کونے کونے میں وہ
جھٹ پٹ
گھس آئیں
چڑھ دوڑیں
کوئی چیز نہ چھوٹی ان سے
برتن، باسن،
زیور، کپڑے
کرسی، میز،
کتابیں
بھولے بسرے
خط پتر
تصویریں
دستاویزیں
تحریریں
بے کار پڑی چیزیں
وہ جن کے ہونے کا بھی پتہ نہ تھا
لہروں نے ان کو گھیر لیا
دامن میں اپنے
بھینچ لیا
کیچڑ مٹی میں لت پت کر ڈالا
اور سب کچھ لے کر ڈوب گئیں!
پھر جیسے اک دم آئی تھیں،
ویسے ہی ہر ہر کرتی
بل کھاتی، اٹھلاتی،
نکل گئیں
2
اے کاش، دلوں میں روحوں میں
ایسی اک چنچل باڑھ آئے
بے کار ڈروں کے ڈھیروں پر
ہمت کی لہریں بکھرا دے
خود غرضی کے صندوقوں کو
اک جھٹکا دے کر الٹا دے
پھاڑے لالچ کی پوٹوں کو
جالوں کو جہل و شقاوت کے
اور ظلم کی گندی مکڑی کو
چکنی کالکھ کو تعصب کی
نابود کرے ناپید کرے
یوں نم کر دے دل کی کھیتی
امیدیں سب لہرا اٹھیں
گل نار شگوفے الفت کے
سوکھی جانوں سے پھوٹ پڑیں

سجاد ظہیر

نظم

بانس کے جھنڈ میں
چاندنی جب دبے پاؤں داخل ہوئی
پتیوں کے لحافوں میں دبکی ہوئی سو رہی تھی ہوا
جاگ اٹھی
اک ذرا ہٹ کے تالاب کی گود میں
گھس کے سوئی ہوئی ننھی لہروں نے آنکھیں ملیں
کلبلانے لگیں
اور کہن سال ٹیلوں پہ بیٹھے ہوئے
کچھ کہن سال پیڑوں کی پرچھائیاں
سر ہلانے لگیں
دور اندھیرے کے تالاب میں
ڈبکی مارے ہوئے گاؤں نے
سر نکالا اور اک سانس لی

راہی معصوم رضا

نظم

مناتا موج گر چوہا میں ہوتا
سحر سے شام تک پھرتا ہی رہتا
لگے جب بھوک میں میٹھا چراتا
مزے سے بل میں بیٹھا اس کو کھاتا
محلے کے سبھی باورچی خانے
بلائیں گے مجھے دعوت اڑانے
مزے سے دعوتیں ہر گھر میں کھاتا
دہی مسکہ ملائی دودھ اڑاتا
اگر بلی چلی آئے جھپٹ کر
تو گھس جاؤں گا میں بل دبک کر

وقار خلیل

نظم

کیا تم وہ اداسی دور کر سکتے ہو
جو سارے آئنے توڑ دینے کے بعد
دیواروں میں گھس جاتی ہے
کیا تم وہ دھواں باہر نکال سکتے ہو
جو ساری تصاویر جلانے کے بعد
حلق میں بھر جاتا ہے
کیا تم اس گلدان کو جوڑ سکتے ہو
جو کسی جانے والے نے ہاتھ سے گرا دیا ہو
کیا تم وہ آوازیں واپس لا سکتے ہو
جو کسی موڑ کے آغاز پر غائب ہو جاتی ہیں
کیا تم کوئی ایسی چیز
ایجاد کر سکتے ہو
جس سے میں دریافت کر لی جاؤں

فاطمہ مہرو

نظم

لوگ گرمی میں شملے جاتے ہیں
ٹھنڈے موسم کا لطف اٹھاتے ہیں
کتنی شفاف ہے فضا اس کی
کس قدر صاف ہے ہوا اس کی
اودی اودی گھٹائیں چھاتی ہیں
ٹھنڈی ٹھنڈی ہوائیں آتی ہیں
ابھی بادل ہیں اور ابھی ہے دھوپ
دیکھو قدرت کے یہ انوکھے روپ
گر صفائی کے حال کو دیکھیں
آپ شملے کی مال کو دیکھیں
کتنی ستھری ہے ہر دکان یہاں
کتنا اچھا ہے ہر مکان یہاں
ہوٹلوں کی نفاستیں دیکھو
کوٹھیوں کی عمارتیں دیکھو
سبزہ وادی میں لہلہاتا ہے
پھرنے والوں کا جی لبھاتا ہے
اونچے پیڑوں کی ہے بہار یہاں
ہیں کھڑے چیل دیودار یہاں
ہیں بلندی پہ ہر مکان سے یہ
بات کرتے ہیں آسمان سے یہ
بادل اتنے قریب ہوتے ہیں
پیار سے منہ زمیں کا دھوتے ہیں
راستہ گر کہیں سے پاتے ہیں
بند کمروں میں بھی گھس آتے ہیں
یوں تو ہر منظر اس کا پیارا ہے
رات کا اور ہی نظارہ ہے
جب ہوں بجلی کے قمقمے روشن
دیکھو اس وقت شملے کا جوبن
قمقمے کیا ہیں کچھ ستارے ہیں
آسماں نے یہاں اتارے ہیں
شعلے سے اڑتے ہیں فضاؤں میں
شمعیں آوارہ ہیں ہواؤں میں

اختر شیرانی

نظم

پڑوسی کی بکری نے
پھر گھر میں گھس کر
کوئی چیز کھا لی
بیوی نے سر پہ قیامت اٹھا لی
منے کو
رونے میں جیسے مزا آ رہا ہے
برابر وہ روئے چلا جا رہا ہے
فقیر اب بھی چوکھٹ سے چپکا ہوا ہے
وہی روز والی دعا دے رہا ہے
روٹی کے جلنے کی بو
اور اماں کی چیخوں سے
گھر بھر گیا ہے
پنجرے میں چکراتے مٹھو کی آواز
روٹی دو
بی بی جی روٹی دو'
اس شور میں کھو گئی ہے
روٹی توے پر بھسم ہو گئی ہے

محمد علوی

نظم

ہم اپنے منظر سے بچھڑے
آنکھوں میں اس کا عکس لئے بھٹک رہے ہیں
کوئی نئی رت ہمیں پناہ دینے لگتی ہے
تو اچانک۔۔۔
بے دعا لمحوں کو کچھ نیا سوجھتا ہے
اور سارا منظر بدل جاتا ہے
جہاں پر اسرار آہٹیں
ہمیں خوف کے جنگل میں چھوڑ آتی ہیں
بے منظری روز ہم سے شکوہ کرتی ہے
صبح جاگتے ہیں
تو ہمارے چہروں پر شام ہونے لگتی ہے
اجنبیت کی دھند ہمارا سایہ چھین چکی ہے
ہماری اپنی ذات میں فاصلے اتنے گہرے ہو گئے
کہ ہم خود اپنی ہی دسترس سے باہر ہو چکے
ہم اس منظر میں نہیں دفنائے جا سکتے
جس میں ہم نے جنم لیا تھا
ہم ایک مدت سے
آنکھوں کی گٹھڑی میں اپنے خواب باندھے
وقت کی دہلیز پر کھڑے چیخ رہے ہیں
لیکن ہماری آواز کسی اور منظر میں رہ گئی ہے
بے صوت پکار پر آسمان اشک بار ہوتا ہے
تو ہماری فصلوں میں بھوک چپکے سے گھس جاتی ہے

منیر احمد فردوس

نظم

سر سے پا تک جسم کو ڈھانپیں آیا موسم جاڑے کا
لیکن پھر بھی تھر تھر کانپیں آیا موسم جاڑے کا
پہلے دھوپ نکلتی تھی تو ہم اس سے گھبراتے تھے
ہوتی تھی دوپہر تو بھیا کمروں میں گھس جاتے تھے
سورج ڈھلتا لو کم ہوتی تب ہم باہر آتے تھے
گرمی سے بچنے کی خاطر پنکھے خوب چلاتے تھے
گرمی کا اب ذکر نہیں ہے آیا موسم جاڑے کا
پنکھے کی اب فکر نہیں ہے آیا موسم جاڑے کا
گرمی سے چھٹکارا پایا تو بارش نے گھیر لیا
کالے کالے بادل چھائے دن بھی آدھی رات لگا
رم جھم رم جھم رم جھم رم جھم پانی پھر دن رات پڑا
گھر سے باہر کام کو جانا لوگوں کو دشوار ہوا
کالی کالی رات گئی تب آیا موسم جاڑے کا
رخصت جب برسات ہوئی تب آیا موسم جاڑے کا
اب کوئی جیکٹ پہنے ہے کوئی اچکن پہنے ہے
کوئی سوئیٹر کوٹ السٹر مفلر خوب لپیٹے ہے
سر پر اونی شال کسی کے کوئی کمبل اوڑھے ہے
غرض کہ جس کو جو ہے میسر اس سے جسم چھپائے ہے
کتنا ہی سر سے پا تک ڈھانپیں آیا موسم جاڑے کا
لیکن پھر بھی تھر تھر کانپیں آیا موسم جاڑے کا

مرتضیٰ ساحل تسلیمی

نظم

ایک سے ایک شرارت سوجھے ہم کو صبح و شام
تو بولو کیا ہوگا انجام
کھیل میں اپنی جان پڑی ہو شوخی میں ہو نام
تو بولو کیا ہوگا انجام
آپا کے بستے میں ہم چپکے سے مٹی بھر دیں
ابا کی چھتری کو جو ہم توڑ کے چر مر کر دیں
ایسی باتیں ہم گھر میں کرنے لگ جائیں عام
تو بولو کیا ہوگا انجام
ہم نے دل میں ٹھانی ہو کہ سنیں گے آج کہانی
فرمائش رد کر دی جائے اور سو جائیں نانی
مرغی کا پر کان میں دے کے سونا کریں حرام
تو بولو کیا ہوگا انجام
جیوگرفی کا ٹیچر جب آویزاں کر دے نقشہ
ہم سے پھر یہ پوچھا جائے ذرا دکھاؤ شملہ
جس پر ہم انگلی کو رکھیں لکھا ہو آسام
تو بولو کیا ہوگا انجام
خربوزوں کے کھیت کے اندر گھس جائیں چپکے سے
رکھوالا بھی تاڑ رہا ہو پیچھے سے آ پہنچے
اور ہماری گردن اپنے ہاتھوں میں لے تھام
تو بولو کیا ہوگا انجام
ایک سے ایک شرارت سوجھے ہم کو صبح و شام
تو بولو کیا ہوگا انجام
کھیل میں اپنی جان پڑی ہو شوخی میں ہو نام
تو بولو کیا ہوگا انجام

اجاگر وارثی

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے