Search result for "ghus" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "ghus"

Nazm MATCHES FOR "ghus"

Nazm

baz-amad --- ek muntaj

dhuup me.n tezii nahii.n
aise aataa hai har ik jho.nkaa havaa kaa jaise
dast-e-shafqat hai ba.Dii umr kii mahbuuba kaa
aur mire shaano.n ko is tarah hilaa jaataa hai
jaise mai.n nii.nd me.n huu.n
aurte.n charKHe liye baiThii hai.n
kuchh kapaas oTtii hai.n
kuchh silaa.ii ke kisii kaam me.n masruuf hai.n yuu.n
jaise ye kaam hai dar-asl har ik shai kii asaas
ek se ek chuhul kartii hai
ko.ii kahtii hai mirii chuu.Diyaa.n khankii.n to khankhaarii mirii saas
ko.ii kahtii hai bharii chaa.ndnii aatii nahii.n raas
raat kii baat sunaatii hai ko.ii ha.ns ha.ns kar
baat kii baat sunaatii hai ko.ii ha.ns ha.ns kar
lazzat-e-vasl hai aazaar, ko.ii kahtii hai
mai.n to ban jaatii huu.n biimaar, ko.ii kahtii hai
mai.n bhii ghus aataa huu.n is shiish-mahal me.n dekho
sab ha.nsii rok ke kahtii hai.n nikaalo is ko

Akhtarul Iman

Nazm

mastana hijDa

tennis ke baal
kastii a.ngiyaa me.n
ghus-ghusaa ke
pistaan ban ga.e the
shahvat ke surKH Dore
surma lagaane vaalii
aa.nkho.n me.n tan ga.e the

Saqi Faruqi

Nazm

wazire chunin

KHudaa kaa ye karnaa hu.aa
ek din
is kii dukaa.n se
iiraan kaa ik vaziir-e-kuhan-saal guzraa
aur is ne chaahaa
ki vo bhii zaraa
apne uljhe hu.e zehn kii
az sar-e-nau safaa.ii karaa le
kiyaa kaasa-e-sar ko naa.ii ne KHaalii
abhii vo use saaf karne lagaa thaa
ki naagaah aa kar kahaa ek KHvaaja-saraa ne:
mai.n bhejaa gayaa huu.n janaab-e-vazaarat-e-panah ko bulaane
aur is par
saraasiima ho kar jo uTThaa vaziir ek dam
rah gayaa paas dallaak ke maGz us kaa
vo be-maGz sar le ke darbaar-e-sultaa.n me.n pahu.nchaa
magar duusre roz is ne
jo naa.ii se aa kar taqaazaa kiyaa
to vo kahne lagaa:
haif
kal shab pa.Dosii kii billii
kisii rauzan-e-dar se ghus kar
janaab-e-vazaarat-e-panah ke
dimaaG-e-falak-taaz ko khaa ga.ii hai
aur ab hukm-e-sarkaar ho to
kisii aur haivaan kaa maGz le kar lagaa duu.n
to dallaak ne rakh diyaa
daaniyaal-e-zamaana ke sar me.n
kisii bail kaa maGz le kar
to logo.n ne dekhaa
janaab-e-vazaarat-e-panah ab
faraasat me.n
daanish me.n
aur kaarobaar-e-vazaarat me.n
pahle se bhii chaaq-o-chauband-tar ho ga.e hai.n

Noon Meem Rashid

Nazm

guDDe miyan ki shadi

musammaat-e-gul duKHtar-e-shaiKH 'KHaar'
ba-mahr-e-muajjal bayaasii hazaar
gulistaa.n kaa motii samundar kaa phuul
kaho bhaa.ii guDDe ye shaadii qubuul

Akhgar Mushtaq Raheem Aabadi

Nazm

baDa shahr aur tanha aadmi

december kaa mahiina aur dillii kii sardii
sitaaro.n kii jhilmilaatii jhurmuT se pare
aasmaan ke ek sunsaan goshe me.n
puunam kaa TheThurtaa hu.aa ko.ii chaa.nd jaise
baadalo.n me.n khaataa hai mutvaatir hachkole
haule haule
tanhaa musaafir
aur duur tak kohre kii chaadar me.n lipTii
bal khaatii sa.Dke.n
dhund kii Gubaar me.n khoyaa hu.aa india gate
ThanD me.n Thokare.n khaataa musaafir
KHush nasiib hai
baadalo.n me.n ghus jaataa hai chaa.nd
merii christmas kii raunaqe.n phailii hai.n tamaam
sitaaro.n se raushan saje dhaje baazaar
laziiz khaano.n kii KHushbu.e.n jahaa.n phailii hai.n har-suu
baazaar kii garm fazaa.o.n me.n
mai kii sarmastii me.n Duubaa hu.aa hai puure shahr kaa shabaab
tanhaa musaafir kii
chand roza masaafat bhii kyaa shai hai yaaro!
ham-vatano.n se duur
apno se duur
jamunaa taT par jaise bin maa.njhii ke naav
boat club ke sard paanii me.n jaise
tairtaa ruktaa hu.aa ko.ii tanhaa hubaab
tanhaa musaafir sochtaa hai
ko.ii hai jis kaa vo haath thaam le haule haule
ko.ii hai jo us ke saath kuchh daur chale haule haule
dhund me.n kho.ii hu.ii manzile.n
taviil sa.Dke.n
aur tanhaa musaafir
jaise puunam kaa TheThurtaa hu.aa ko.ii chaa.nd
baadalo.n me.n khaataa hai mutvaatir hachkole
haule haule

Perwaiz Shaharyar

Nazm

sham ko raste par

mirii aa.nkho.n me.n magar chhaayaa hai baadal ban kar
ek diivaar kaa rauzan isii rauzan se nikal kar kirne.n
mirii aa.nkho.n se lipaTtii hai.n machal uThtii hai.n
aarzu.e.n dil-e-Gam-diida ke aasuuda nihaa.n-KHaane se
aur mai.n sochtaa huu.n nuur ke is parde me.n
kaun be-baak hai aur bholii sii mahbuuba kaun
soch ko rok hai diivaar kii vo kaise chale
kaise jaa pahu.nche kisii KHalvat-e-mahjuub ke maKHmuur sanam-KHaane me.n
vo sanam-KHaana jahaa.n baiThe hai.n do but KHaamosh
aur nigaaho.n se har ik baat kahe jaate hai.n
zehn ko un ke dhundalke ne banaayaa hai ik aisaa akkaas
jo faqat apne hii man-maane manaazir ko giraftaar kare
mai.n kha.Daa dekhtaa huu.n sochtaa huu.n jab dono.n
chho.D kar dil ke sanam-KHaane ko ghar jaa.e.nge
sehn me.n talKH haqiiqat ko kha.Daa paa.e.nge
ek sochegaa mirii jeb ye duniyaa ye samaaj
ek dekhegaa vahaa.n aur hii tayyaarii hai
mujh ko uljhan hai ye kyuu.n mai.n to nahii.n huu.n maujuud
raat kii KHalvat-e-mahjuub ke maKHmuur sanam-KHaane me.n
mirii aa.nkho.n ko nazar aataa hai rauzan kaa dhu.aa.n
aur dil kahtaa hai ye duud-e-dil-e-soKHta hai
ek ghanghor sukuu.n ek ka.Dii tanhaa.ii
meraa andoKHta hai
mujh ko kuchh fikr nahii.n aaj ye duniyaa miT jaa.e
mujh ko kuchh fikr nahii.n aaj ye be-kaar samaaj
apnii paabandii se dam ghuT ke fasaana ban jaa.e
mirii aa.nkho.n me.n to markuuz hai rauzan kaa samaa.n
apnii hastii ko tabaahii se bachaane ke liye
mai.n isii rauzan-e-be-ra.ng me.n ghus jaa.uu.ngaa
lekin aise to vahii but na kahii.n ban jaa.uu.n
jo nigaaho.n se har ik baat kahe jaataa hai
chho.D kar jis ko sanam-KHaane kii mahjuub fazaa
ghar ke bebaak alamnaak siyah-KHaane me.n
aarzuu.o.n pe sitam dekhnaa hai ghulnaa hai
mai.n to rauzan me.n nahii.n jaa.uu.ngaa duniyaa miT jaa.e
aur dam ghuT ke fasaana ban jaa.e
sa.ng-dil KHuun sukhaatii hu.ii be-kaar samaaj
mai.n to ik dhyaan kii karvaT le kar
ishq ke taa.ir-e-aavaara kaa bahruup bharuu.ngaa pal me.n
aur chalaa jaa.uu.ngaa us jangal me.n
jis me.n tuu chho.D ke ik qalb-e-fasurda ko akele chal dii
raasta mujh ko nazar aa.e na aa.e phir kyaa
an-ginat pe.Do.n ke miinaaro.n ko
mai.n to chhuutaa hii chalaa jaa.uu.ngaa
aur phir KHatm na hogii ye talaash
justujuu rauzan-e-diivaar kii marhuun nahii.n ho saktii
mai.n huu.n aazaad mujhe fikr nahii.n hai ko.ii
ek ghanghor sukuu.n ek ka.Dii tanhaa.ii
miraa andoKHta hai

Meeraji

Nazm

rah-e-farar

idhar se na jaa.o
idhar shaah-naadir nahii.n aaj ko.ii bhii lekin
vahii qatl-e-aam aaj bhii ho rahaa hai
ye miiraas hai aap kii merii sab kii
ye sauGaat bairuunii haakim hame.n de ga.e hai.n
chalo saamne ke a.ndhere me.n ghus kar
utar jaa.e.n tah-KHaane kii KHaamushii me.n
ye sab khi.Dkiyaa.n band kar de.n
ko.ii chiiKHne bain karne kii aavaaz ham tak na aa.e
ko.ii KHuun kii chhii.nT daaman pe aakar na baiThe
kabhii tum ne gaa.njaa piyaa hai?
ko.ii bha.ng kaa shauq, ko.ii ja.Dii-buuTii khaa.ii
na koken afyuun kuchh bhii
kabhii ko.ii nashsha nahii.n tum ne chakkhaa
na aGlaam-e-amrd-parastii se rishta rahaa hai
ko.ii tajraba bhii nahii.n zindagii kaa?

Akhtarul Iman

Nazm

katba

qabr me.n utarte hii
mai.n aaraam se daraaz ho gayaa
aur sochaa
yahaa.n mujhe
ko.ii KHalal nahii.n pahu.nchaa.egaa
ye do-gaz zamiin
merii
aur sirf merii milkiyat hai
aur mai.n maze se
miTTii me.n ghultaa miltaa rahaa
vaqt kaa ehsaas
yahaa.n aa kar KHatm ho gayaa
mai.n mutma.in thaa
lekin bahut jald
ye itminaan bhii mujh se chhiin liyaa gayaa
hu.aa yuu.n
ki abhii mai.n
puurii tarah miTTii bhii na hu.aa thaa
ki ek aur shaKHs
merii qabr me.n ghus aayaa
aur ab
merii qabr par
kisii aur kaa
katba nasb hai!!

Mohammad Alvi

Nazm

mufahamat

jab us kaa bosa letaa thaa cigarette kii buu nathno.n me.n ghus jaatii thii
mai.n tambaakuu-noshii ko ik aib samajhtaa aayaa huu.n
lekin ab mai.n aadii huu.n, ye merii zaat kaa hissa hai
vo bhii mere daa.nto.n kii bad-ra.ngii se maanuus hai, in kii aadii hai
jab ham dono.n milte hai.n, lafzo.n se begaana se ho jaate hai.n
kamre me.n kuchh saa.nse.n aur pasiine kii buu, tanhaa.ii rah jaatii hai!
ham dono.n shaayad murda hai.n ehsaas kaa chashma suukhaa hai
yaa phir shaayad aisaa hai ye afsaana bosiida hai
dard-e-zeh se ziist yuu.nhii halkaan ta.Daptii rahtii hai
na.e masiihaa aate hai.n aur suulii par cha.Dh jaate hai.n
ik maTiyaalaa insaan safo.n ko chiir ke aage ba.Dhtaa hai aur mimbar se chillaataa hai
ham masluub ke vaaris hai.n ye KHuun hamaaraa virsa hai
aur vo sab aadarsh, vo sab jo vaj.h-e-malaamat Thahraa thaa
is maTiyaale shaKHs ke gahre me.ade me.n khup jaataa hai
phir tafsiiro.n aur taviilo.n kii shakl me.n baahar aataa hai
ye taaviile.n majbuuro.n kaa ik mauhuum sahaaraa hai.n
yaa shaayad sab kaa sahaaraa hai.n
yuu.nhii me.n aadarsh insaan kaa juuyaa huu.n
sab hii sapne dekhte hai.n KHvaabo.n me.n havaa me.n u.Dte hai.n
phir ik manzil aatii hai jab phuuT phuuT kar rote hai.n
shaaKHo.n kii tarah TuuTte hai.n
ik ruuh-e-jaan-o-dil ko jo duniyaa me.n sab se ba.Dh kar hai paa lete hai.n
phir us se nafrat karte hai.n go phir bhii mohabbat karte hai.n!

Akhtarul Iman

Nazm

chuha

ye chuhaa
balliyo.n ko dekh kar
Daraa sahmaa
shahr kii galiyo.n me.n
ghus jaataa hai
Dhuu.nDtaa rahtaa hai din bhar
apnii vahshat kaa siraa
mubaasharat kii jagah
aavaaragardii kartaa hai

Ahmad Azad

Nazm

qurbani ke bakre

bakre tamaam raah me.n hu.nkaarte chale
ba.nglo.n ke bel-buuTo.n pe mu.nh maarte chale
jis ghar me.n ghus ga.e vahii.n iftaarte chale
aur jab hile jagah se to siskaarte chale
ghar vaale kah rahe hai.n ki baahar nikaal do
bakre musir hai.n is pe ki Deraa hii Daal do

Syed Mohammad Jafri

Nazm

baadh

naddii kii lahre.n
sote sote
jaise ek dam jaag pa.Dii.n
aur jhapaT pa.Dii.n
in giile giile
miTTii baaluu ka.nkar
patthar aur cement ke
pushto.n par
jin se un ko baa.ndh ke
sab ne rakh chho.Daa thaa
lahak lahak kar
naach naach kar
shor machaatii
chaaro.n or
galii galii kuuche kuuche me.n
gharo.n me.n sehno.n me.n kamro.n baaGo.n me.n
kone kone me.n vo
jhaT-paT
ghus aa.ii.n
cha.Dh-dau.Dii.n
ko.ii chiiz na chhuuTii un se
bartan, baasan,
zevar, kap.De
kursii, mez,
kitaabe.n
bhuule-bisre
KHat pattar
tasviire.n
dastaaveze.n
tahriire.n
bekaar pa.Dii chiize.n
vo jin ke hone kaa bhii pata na thaa
lahro.n ne un ko gher liyaa
daaman me.n apne
bhe.nch liyaa
kiicha.D miTTii me.n lat-pat kar Daalaa
aur sab kuchh le kar Duub ga.ii.n!
phir jaise ik-dam aa.ii thii.n,
vaise hii har har kartii
bal khaatii, iThlaatii,
nikal ga.ii.n
2
ai kaash, dilo.n me.n ruuho.n me.n
aisii ik chanchal baa.Dh aa.e
bekaar Daro.n ke Dhero.n par
himmat kii lahre.n bikhraa de
KHud-Garzii ke sanduuqo.n ko
ik jhaTkaa de kar ulTaa de
phaa.De laalach kii poTo.n ko
jaalo.n ko jahl o shaqaavat ke
aur zulm kii gandii mak.Dii ko
chiknii kaalakh ko ta.assub kii
naabuud kare naapaid kare
yuu.n nam kar de dil kii khetii
ummiide.n sab lahraa uTThe.n
gulnaar shaguufe ulfat ke
suukhii jaano.n se phuuT pa.De.n

Sajjad Zaheer

Nazm

ek manzar

baa.ns ke jhunD me.n
chaa.ndnii jab dabe paa.nv daaKHil hu.ii
pattiyo.n ke lihaafo.n me.n dubkii hu.ii so rahii thii havaa
jaag uThii
ik zaraa haT ke taalaab kii god me.n
ghus ke so.ii hu.ii nannhii lahro.n ne aa.nkhe.n malii.n
kulbulaane lagii.n
aur kuhan-saal Tiilo.n pe baiThe hu.e
kuchh kuhan-saal pe.Do.n kii parchhaa.iyaa.n
sar hilaane lagii.n
duur a.ndhere ke taalaab me.n
Dupkii maare hu.e gaa.nv ne
sar nikaalaa aur ik saa.ns lii

Rahi Masoom Raza

Nazm

ajib KHwahishen

manaataa mauj gar chuuhaa mai.n hotaa
sahar se shaam tak phirtaa hii rahtaa
lage jab bhuuk mai.n miiThaa churaataa
maze se bil me.n baiThaa us ko khaataa
mohalle ke sabhii baavarchii-KHaane
bulaa.e.nge mujhe daavat u.Daane
maze se daavate.n har ghar me.n khaataa
dahii maska milaa.ii duudh u.Daataa
agar billii chalii aa.e jhapaT kar
to ghus jaa.uu.ngaa mai.n bil dubak kar

Vaqar Khaleel

Nazm

daryaft

kyaa tum vo udaasii duur kar sakte ho
jo saare aa.ine to.D dene ke baad
diivaaro.n me.n ghus jaatii hai
kyaa tum vo dhu.aa.n baahar nikaal sakte ho
jo saarii tasaaviir jalaane ke baad
halaq me.n bhar jaataa hai
kyaa tum us gul-daan ko jo.D sakte ho
jo kisii jaane vaale ne haath se giraa diyaa ho
kyaa tum vo aavaaze.n vaapas laa sakte ho
jo kisii mo.D ke aaGaaz par Gaa.eb ho jaatii hai.n
kyaa tum ko.ii aisii chiiz
iijaad kar sakte ho
jis se mai.n daryaaft kar lii jaa.uu.n

Fatima Mehru

Nazm

shimla

log garmii me.n shimle jaate hai.n
ThanDe mausam kaa lutf uThaate hai.n
kitnii shaffaaf hai fazaa is kii
kis qadar saaf hai havaa is kii
uudii uudii ghaTaa.e.n chhaatii hai.n
ThanDii ThanDii havaa.e.n aatii hai.n
abhii baadal hai.n aur abhii hai dhuup
dekho qudrat ke ye anokhe ruup
gar safaa.ii ke haal ko dekhe.n
aap shimle kii mall ko dekhe.n
kitnii suthrii hai har dukaan yahaa.n
kitnaa achchhaa hai har makaan yahaa.n
hoTalo.n kii nafaasate.n dekho
koThiyo.n kii imaarate.n dekho
sabza vaadii me.n lahlahaataa hai
phirne vaalo.n kaa jii lubhaataa hai
uu.nche pe.Do.n kii hai bahaar yahaa.n
hai.n kha.De chiil devdaar yahaa.n
hai.n bulandii pe har makaan se ye
baat karte hai.n aasmaan se ye
baadal itne qariib hote hai.n
pyaar se mu.nh zamii.n kaa dhote hai.n
raasta gar kahii.n se paate hai.n
band kamro.n me.n bhii ghus aate hai.n
yuu.n to har manzar is kaa pyaaraa hai
raat kaa aur hii nazaara hai
jab ho.n bijlii ke qumqume raushan
dekho us vaqt shimle kaa joban
qumqume kyaa hai.n kuchh sitaare hai.n
aasmaa.n ne yahaa.n utaare hai.n
sho.ale se u.Dte hai.n fazaa.o.n me.n
sham.e.n aavaara hai.n havaa.o.n me.n

Akhtar Shirani

Nazm

roTi

pa.Dosii kii bakrii ne
phir ghar me.n ghus kar
ko.ii chiiz khaa lii
biivii ne sar pe qayaamat uThaa lii
munne ko
rone me.n jaise mazaa aa rahaa hai
baraabar vo ro.e chalaa jaa rahaa hai
faqiir ab bhii chaukhaT se chipkaa hu.aa hai
vahii roz vaalii du.aa de rahaa hai
roTii ke jalne kii buu
aur ammaa.n kii chiiKHo.n se
ghar bhar gayaa hai
pinjre me.n chakraate miTThuu kii aavaaz
'roTii do
bii-bii jii roTii do'
is shor me.n kho ga.ii hai
roTii tave par bhasam ho ga.ii hai

Mohammad Alvi

Nazm

manzar se bichhaDne ka karb

ham apne manzar se bichh.De
aa.ankho.n me.n us kaa aks liye bhaTak rahe hai.n
ko.ii na.ii rut hame.n panaah dene lagtii hai
to achaanak...
be-du.aa lamho.n ko kuchh nayaa suujhtaa hai
aur saaraa manzar badal jaataa hai
jahaa.n pur-asraar aahaTe.n
hame.n KHauf ke jangal me.n chho.D aatii hai.n
be-manzarii roz ham se shikva kartii hai
sub.h jaagte hai.n
to hamaare chehro.n par shaam hone lagtii hai
ajnabiyyat kii dhund hamaaraa saaya chhiin chukii hai
hamaarii apnii zaat me.n faasle itne gahre ho ga.e
ki ham KHud apnii hii dastaras se baahar ho chuke
ham is manzar me.n nahii.n dafnaa.e jaa sakte
jis me.n ham ne janam liyaa thaa
ham ek muddat se
aa.ankho.n kii gaTh.Dii me.n apne KHvaab baa.ndhe
vaqt kii dahliiz par kha.De chiiKH rahe hai.n
lekin hamaarii aavaaz kisii aur manzar me.n rah ga.ii hai
be-saut pukaar par aasmaan ashk-baar hotaa hai
to hamaarii faslo.n me.n bhuuk chupke se ghus jaatii hai

Muneer Ahmad Firdaus

Nazm

aaya mausam jaDe ka

sar se paa tak jism ko Dhaa.npe.n aayaa mausam jaa.De kaa
lekin phir bhii thar thar kaa.npe.n aayaa mausam jaa.De kaa
pahle dhuup nikaltii thii to ham us se ghabraate the
hotii thii dopahar to bhayyaa kamro.n me.n ghus jaate the
suuraj Dhaltaa luu kam hotii tab ham baahar aate the
garmii se bachne kii KHaatir pa.nkhe KHuub chalaate the
garmii kaa ab zikr nahii.n hai aayaa mausam jaa.De kaa
pa.nkhe kii ab fikr nahii.n hai aayaa mausam jaa.De kaa
garmii se chhuTkaaraa paayaa to baarish ne gher liyaa
kaale kaale baadal chhaa.e din bhii aadhii raat lagaa
rim-jhim rim-jhim rim-jhim rim-jhim paanii phir din raat pa.Daa
ghar se baahar kaam ko jaanaa logo.n ko dushvaar hu.aa
kaalii kaalii raat ga.ii tab aayaa mausam jaa.De kaa
ruKHsat jab barsaat hu.ii tab aayaa mausam jaa.De kaa
ab ko.ii jacket pahne hai ko.ii achkan pahne hai
ko.ii sweater coat alisTar muflar KHuub lapeTe hai
sar par uunii shaal kisii ke ko.ii kambal o.Dhe hai
Garz ki jis ko jo hai mayassar us se jism chhupaa.e hai
kitnaa hii sar se paa tak Dhaa.npe.n aayaa mausam jaa.De kaa
lekin phir bhii thar-thar kaa.npe.n aayaa mausam jaa.De kaa

Murtaza Sahil Tasleemi

Nazm

kya hoga anjam

ek se ek sharaarat suujhe ham ko sub.h-o-shaam
to bolo kyaa hogaa anjaam
khel me.n apnii jaan pa.Dii ho shoKHii me.n ho naam
to bolo kyaa hogaa anjaam
aapaa ke baste me.n ham chupke se miTTii bhar de.n
abbaa kii chhatrii ko jo ham to.D ke char mar kar de.n
aisii baate.n ham ghar me.n karne lag jaa.e.n aam
to bolo kyaa hogaa anjaam
ham ne dil me.n Thaanii ho ki sune.nge aaj kahaanii
farmaa.ish radd kar dii jaa.e aur so jaa.e.n naanii
murGii kaa par kaan me.n de ke sonaa kare.n haraam
to bolo kyaa hogaa anjaam
geography kaa teacher jab aavezaa.n kar de naqsha
ham se phir ye puuchhaa jaa.e zaraa dikhaa.o shimla
jis par ham u.nglii ko rakkhe.n likkhaa ho aasaam
to bolo kyaa hogaa anjaam
KHarbuuzo.n ke khet ke andar ghus jaa.e.n chupke se
rakhvaalaa bhii taa.D rahaa ho piichhe se aa pahu.nche
aur hamaarii gardan apne haatho.n me.n le thaam
to bolo kyaa hogaa anjaam
ek se ek sharaarat suujhe ham ko sub.h-o-shaam
to bolo kyaa hogaa anjaam
khel me.n apnii jaan pa.Dii ho shoKHii me.n ho naam
to bolo kyaa hogaa anjaam

Ujagar Warsi

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now