Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "mainaa"

نظم کے متعلقہ نتیجہ "mainaa"

نظم

سنا ہے جنگلوں كا بھی کوئی دستور ہوتا ہے
سنا ہے شیر كا جب پیٹ بھر جائے تو وو حملہ نہیں کرتا
درختوں کی گھنی چھاؤں میں جا کر لیٹ جاتا ہے
ہوا کے تیز جھونکے جب درختوں کو ہلاتے ہیں
تو مینا اپنے بچے چھوڑ کر
کوے کے انڈوں کو پروں سے تھام لیتی ہے
سنا ہے گھونسلے سے کوئی بچہ گر پڑے تو سارا جنگل جاگ جاتا ہے
سنا ہے جب کسی ندی کے پانی میں
بئے کے گھونسلے كا گندمی سایہ لرزتا ہے
تو ندی کی روپہلی مچھلیاں اس کو پڑوسن مان لیتی ہیں
کبھی طوفان آ جائے، کوئی پل ٹوٹ جائے تو
کسی لکڑی کے تختے پر
گلہری، سانپ، بکری اور چیتا ساتھ ہوتے ہیں
سنا ہے جنگلوں كا بھی کوئی دستور ہوتا ہے
خداوندا! جلیل واماں معتبر! دانا واماں بینا منصف واماں اکبر!
مرے اس شہر میں اب جنگلوں ہی كا کوئی قانون نافذ کر!
کوئی دستور نافذ کر

زہرا نگاہ
نظم

لمبے وقت سے سوچ رہا ہوں
جانے کیوں ایسا ہوں میں
ملنے سے گھبراتا ہوں میں جھوٹ نہیں کہہ پاتا ہوں
اس کے شکوے اس کی شکایت جھگڑے سے ڈر جاتا ہوں
ادھر ادھر کی باتیں مجھ کو ذرا نہ خوش کر پاتی ہیں
جانے کیوں ایسا ہوں میں
دوست نہیں بن پاتے میرے
رشتے نہیں سنبھلتے ہیں
بے جا محبت بے جا تکلف
دونوں اوچھے لگتے ہیں
اوروں کی کمیوں کو بالکل
اچھا نہیں کہہ پاتا ہوں
جانے کیوں ایسا ہوں میں
اچھے بھلے کاموں میں اکثر
دیر بہت کر دیتا ہوں
امی سے باتیں کرنی ہوں بیٹی کے اسکول ہو جانا
کوئی نیا ناول پڑھنا ہو کوئی کہانی لکھنی ہو
سب کو ٹالتا رہتا ہوں
جانے کیوں ایسا ہوں میں
بھیڑ بھرے شہروں سے مجھ کو
وحشت سی ہو جاتی ہے
گاؤں جنگل سنسان جگہیں
اکثر خوش آ جاتی ہیں
کوئی الھڑ چہرہ دیکھوں من کو وہ بھا جاتا ہے
جانے کیوں ایسا ہوں میں
پیڑوں کے پیراہن دیکھوں پھولوں کی خوشبو کو سونگھوں
رنگ برنگی تتلیاں پکڑوں ہلکی ہلکی بوندیں بھی
ٹھنڈی نرم ہوائیں جب جب چپکے سے چھو جاتی ہیں
یا کوئل کی بولی سن لوں من بیاکل ہو جاتا ہے
جانے کیوں ایسا ہوں میں
نٹ بنجارن سنیاسی اور کھیل تماشے والے لوگ
کھنڈر ویرانہ جلتی دھوپ پھولی سرسوں دھان کے کھیت
لال پتنگ اور پیلی مینا اندر دھنش اور ندی کی دھار
آتے ہیں جب خواب میں میرے دیوانہ ہو جاتا ہوں
جانے کیوں ایسا ہوں میں
بہت مجھے اچھا کہتے ہیں برا بھی کوئی کہتا ہے
سامنے میری مدح سرائی پیچھے گالی دیتا ہے
ہمدردی ہے کوئی دکھاتا کوئی سازش کرتا ہے
پھر بھی چپ چپ سا رہتا ہوں جیسے بہت انجان ہوں میں
جانے کیوں ایسا ہوں میں
تھوڑی سی آزادی مجھ کو تھوڑا بہت وقت کا زیاں
کبھی کبھار کی اچھی باتیں کسی کسی کا سچا پیار
چھوٹی موٹی کوئی شرارت کھلکھلا کر ہنسنا بھی
یہ سب خوش کر جاتے ہیں جب تو
لگتا ہے کہ زندہ ہوں
جانے کیوں ایسا ہوں میں

ابوبکر عباد
نظم

پہلے ایسا ہوتا تھا
بھانت بھانت کے بندر
شہر کی فصیلوں پر
محفلیں جماتے تھے
گھر میں کود آتے تھے
ہاتھ میں سے بچوں کے
روٹی نوچ جاتے تھے
اب تو وہ مداری بھی
خالی ہاتھ آتا ہے
بھیک مانگ کر گھر گھر
گھر کو لوٹ جاتا ہے
اب گھروں میں چڑیوں کا
شور کیوں نہیں ہوتا
رات کو کوئی الو
پیڑ پر نہیں روتا
پیڑ پر نہیں روتا
لڑتے لڑتے چڑیاں کیوں
فرش پر نہیں گرتیں
بلیاں چھتوں پر کیوں
گھومتی نہیں پھرتیں
اب نہ کوئی بلبل ہے
اور نہ کوئی مینا ہے
اب نہ کوئی تیتر ہے
اور نہ کوئی طوطا ہے
کس سے پوچھنے جائیں
مور کیسا ہوتا ہے
ٹولیاں کبوتر کی
کھو گئیں فضاؤں میں
تتلیوں کے رنگیں پر
بہہ گئے ہواؤں میں
منہ اندھیرے اب مرغا
بانگ کیوں نہیں دیتا
گھر میں کوئی بکری کا
نام کیوں نہیں لیتا
کیا ہوئے درختوں پر
گھونسلے پرندوں کے
کوئی بھی نہیں کہتا
قصے اب درندوں کے
ننھے ننھے چوزوں پر
چیل کا جھپٹنا اب
دیکھنے کہاں جائیں
راستے میں سانڈوں کا
پہروں لڑتے رہنا اب
دیکھنے کہاں جائیں
چھپکلی کی جیتی دم
اب تھرکتی کیا پائیں
رنگ بدلتے گرگٹ کو
مارتے کہاں جائیں
گائے بھینس کا ریوڑ
اب ادھر نہیں آتا
اونٹ ٹیڑھا‌ میڑھا سا
اب نظر نہیں آتا
اب نہ گھوڑے ہاتھی ہیں
اور نہ وہ براتی ہیں
اب گلی میں کتوں کا
بھونکنا نہیں ہوتا
رات چھت پہ سوتے ہیں
بھوت دیکھ کر کوئی
چونکنا نہیں ہوتا
اب جدھر بھی جاتے ہیں
آدمی کو پاتے ہیں

محمد علوی
نظم

نقش یاں جس کے میاں ہاتھ لگا پیسے کا
اس نے تیار ہر اک ٹھاٹھ کیا پیسے کا
گھر بھی پاکیزہ عمارت سے بنا پیسے کا
کھانا آرام سے کھانے کو ملا پیسے کا
کپڑا تن کا بھی ملا زیب فزا پیسے کا
جب ہوا پیسے کا اے دوستو آ کر سنجوگ
عشرتیں پاس ہوئیں دور ہوئے من کے روگ
کھائے جب مال پوے دودھ دہی موہن بھوگ
دل کو آنند ہوئے بھاگ گئے روگ اور دھوگ
ایسی خوبی ہے جہاں آنا ہوا پیسے کا
ساتھ اک دوست کے اک دن جو میں گلشن میں گیا
واں کے سرو و سمن و لالہ و گل کو دیکھا
پوچھا اس سے کہ یہ ہے باغ بتاؤ کس کا
اس نے تب گل کی طرح ہنس دیا اور مجھ سے کہا
مہرباں مجھ سے یہ تم پوچھا ہو کیا پیسے کا
یہ تو کیا اور جو ہیں اس سے بڑے باغ و چمن
ہیں کھلے کیاریوں میں نرگس و نسرین و سمن
حوض فوارے ہیں بنگلوں میں بھی پردے چلون
جا بجا قمری و بلبل کی صدا شور افگن
واں بھی دیکھا تو فقط گل ہے کھلا پیسے کا
واں کوئی آیا لیے ایک مرصع پنجڑا
لال دستار و دوپٹا بھی ہرا جوں طوطا
اس میں اک بیٹھی وہ مینا کہ ہو بلبل بھی فدا
میں نے پوچھا یہ تمہارا ہے رہا وہ چپکا
نکلی منقار سے مینا کے صدا پیسے کا
واں سے نکلا تو مکاں اک نظر آیا ایسا
در و دیوار سے چمکے تھا پڑا آب طلا
سیم چونے کی جگہ اس کی تھا اینٹوں میں لگا
واہ وا کر کے کہا میں نے یہ ہوگا کس کا
عقل نے جب مجھے چپکے سے کہا پیسے کا
روٹھا عاشق سے جو معشوق کوئی ہٹ کا بھرا
اور وہ منت سے کسی طور نہیں ہے منتا
خوبیاں پیسے کی اے یارو کہوں میں کیا کیا
دل اگر سنگ سے بھی اس کا زیادہ تھا کڑا
موم سا ہو گیا جب نام سنا پیسے کا
جس گھڑی ہوتی ہے اے دوستو پیسے کی نمود
ہر طرح ہوتی ہے خوش وقتئ و خوبی بہبود
خوش دلی تازگی اور خرمی کرتی ہے درود
جو خوشی چاہیئے ہوتی ہے وہیں آ موجود
دیکھا یارو تو یہ ہے عیش و مزا پیسے کا
پیسے والے نے اگر بیٹھ کے لوگوں میں کہا
جیسا چاہوں تو مکاں ویسا ہی ڈالوں بنوا
حرف تکرار کسی کی جو زباں پر آیا
اس نے بنوا کے دیا جلدی سے ویسا ہی دکھا
اس کا یہ کام ہے اے دوستو یا پیسے کا
ناچ اور راگ کی بھی خوب سی تیاری ہے
حسن ہے ناز ہے خوبی ہے طرح داری ہے
ربط ہے پیار ہے اور دوستی ہے یاری ہے
غور سے دیکھا تو سب عیش کی بسیاری ہے
روپ جس وقت ہوا جلوہ نما پیسے کا
دام میں دام کے یارو جو مرا دل ہے اسیر
اس لیے ہوتی ہے یہ میری زباں سے تقریر
جی میں خوش رہتا ہے اور دل بھی بہت عیش پذیر
جس قدر ہو سکا میں نے کیا تحریر نظیرؔ
وصف آگے میں لکھوں تا بہ کجا پیسے کا

نظیر اکبرآبادی
نظم

طوطا چھیڑے تھپ تھپ طبلہ مینا گیت سنائے
الو جب مردنگ بجائے کوا شور مچائے
ککڑوں کوں کی تان لگا کے مرغا گائے خیال
قمری اپنی ٹھمری گائے مرغی دیوے تال
مور اپنی دم کو پھیلا کر کتھک ناچ دکھائے
طوطا چھیڑے تھپ تھپ طبلہ مینا گیت سنائے
چڑیا باجی سبھا میں ناچے خوشی سے چھم چھم چھم
موٹی بطخ چونچ سے ڈھولک پیٹے دھم دھم دھم
بیا بجائے منجیرے اور بھونرا بھجن اڑائے
طوطا چھیڑے تھپ تھپ طبلہ مینا گیت سنائے
بلبل گل کی یاد میں رو رو گائے دیپک راگ
مست پپیہا دور سے نغموں کی بھڑکائے آگ
کوئل پہن کے پائل ساری محفل میں اٹھلائے
طوطا چھیڑے تھپ تھپ طبلہ مینا گیت سنائے
رنگ برنگی چڑیاں اب چھیڑیں ایسی قوالی
پتا پتا بوٹا بوٹا تال میں دیوے تالی
پھوپھی چیل وجد میں آ کر اونچی تان لگائے
طوطا چھیڑے تھپ تھپ طبلہ مینا گیت سنائے
انگلستان کا سارس آ کر ناچے راک این رول
مرغابی سے بولے میڈم انگلش گانا بول
دیکھو دیکھو کتنی پیاری محفل ہے یہ ہائے
طوطا چھیڑے تھپ تھپ طبلہ مینا گیت سنائے

راجہ مہدی علی خاں
نظم

آئی مینا ساڑی لے کر
بکرا آیا ڈاڑھی لے کر
ہاتھی آئے گاڑی لے کر
بھالو کچی تاڑی لے کر

مظفر حنفی
نظم

کوا کوئل مینا مور
تیتر تلیر، چیل چکور
سب نے مل کر دھوم مچائی
ٹوٹ بٹوٹ نے بین بجائی

صوفی غلام مصطفےٰ تبسم
نظم

اک جنگل میں ہوئے اکٹھے
سارے جانوروں کے بچے
بھیڑ نے اپنا للا بھیجا
گائے نے بھی بچھڑا بھیجا
کتے کا پلا بھی آیا
الو کا پٹھا بھی آیا
بکری نے بھی میمنے بھیجے
اور بلی نے بلوٹے بھیجے
مرغی کے چوزے بھی آئے
بطخ کے بچے بھی آئے
گھوڑے کا چالاک بچھیرا
بھینس کے کڑے کے ساتھ آیا
باز کبوتر کوا چڑیا
ہاتھی اونٹ عقاب اور شکرا
بندر شیر ہرن اور کچھوا
تیتر مور بٹیر اور بگلا
طوطا مینا فاختہ سب نے
اپنے اپنے بچے بھیجے
کہیں تھیں چیں چیں کہیں چیاؤں
کہیں تھی میں میں کہیں میاؤں
سب نے مل کر شور مچایا
اک خخیایا اک ممیایا
کوئی چیخا کوئی بھونکا
الو بھی سوتے میں چونکا
خوب یہ جلسہ چمکا یعنی
بات نہ سمجھا کوئی کسی کی

خاطر غزنوی
نظم

نجمی فہمی عظمیٰ رعنا
آؤ دیکھیں چڑیا خانہ
جن کے نام سنا کرتے ہو
آج انہیں نزدیک سے دیکھو
ایک سے ایک پرندے دیکھو
آدم خور درندے دیکھو
مور سروں پر تاج سجائے
ناچ رہے ہیں پر پھیلائے
بلبل دیکھو طوطا دیکھو
کوئل دیکھو مینا دیکھو
خوش آواز پپیہا دیکھو
حد حد اور گوریا دیکھو
بھونرا دیکھو تتلی دیکھو
شیر کی خالہ بلی دیکھو
زیبرا گھوڑا ٹٹو خچر
باز کبوتر کوا تیتر
وہ دیکھو خرگوش گلہری
بارہ سنگھا اور وہ ہرنی
بن مانس اور بھالو بھی ہے
نیولا اور کنگارو بھی ہے
بندر کی نقالی دیکھو
پیٹ رہے ہیں تالی دیکھو
دو دو ہاتھی جھوم رہے ہیں
دور گدھے بھی گھوم رہے ہیں
شیروں کا غرانا دیکھو
تندوے کا بل کھانا دیکھو
وہ دیکھو افریقی گینڈا
اور یہ ہندوستانی چیتا
پھن کاڑھے اک ناگن بھی ہے
لومڑی اک مکارن بھی ہے
بزدل گیدڑ لکڑ بگھا
کون بنے گا لیڈر اس کا
دل کش طائر آبی دیکھو
کیسی ہے مرغابی دیکھو
مچھلی کو لہراتے دیکھو
مینڈک کو ٹراتے دیکھو
ایک مگرمچھ جاگ رہا ہے
دیکھ کے کچھوا بھاگ رہا ہے
آج فراغؔ انکل نے دیکھا
کلکتے کا چڑیا خانہ

فراغ روہوی
نظم

۱
ایک تھی چڑیا
ایک تھا کوا
ایک تھی مینا
ایک تھا طوطا
ایک تھی بلی
ایک تھا کتا
ایک تھی مرغی
ایک تھا بکرا
چڑیا کوا
مینا طوطا
بلی کتا
مرغی بکرا
یہ سب ساتھ رہا کرتے تھے
دکھ سکھ ساتھ سہا کرتے تھے
۲
اچھی چڑیا بھولی بھولی
اک دن ان سب سے بولی
آؤ چل کر کام کریں کچھ
کام کریں کچھ نام کریں کچھ
خالی رہ کر وقت نہ کھوئیں
کھیت میں چل کر گیہوں بوئیں
جب یہ سب گیہوں پک جائیں
تب ہم سب مل جل کر کھائیں
۳
چڑیا کی جب بات سنی یہ
کوا بولا میں نہیں بوتا
مینا بولی میں نہیں بوتی
طوطا بولا میں نہیں بوتا
بلی بولی میں نہیں بوتی
کتا بولا میں نہیں بوتا
مرغی بولی میں نہیں بوتی
بکرا بولا میں نہیں بوتا
سب نے کہا جب ہم نہیں بوتے
چڑیا نے وہ آپ ہی بویا
۴
تھوڑے دنوں میں وقت وہ آیا
کھیت یہ گیہوں کا پھل لایا
چڑیا بولی چل کر کاٹیں
گیہوں سے گھر اپنا پاٹیں
ان سب نے جب کام سنا یہ
کوا بولا مجھ سے نہ ہوگا
مینا بولی میں نہ کروں گی
طوطا بولا مجھ سے نہ ہوگا
بلی بولی میں نہ کروں گی
کتا بولا مجھ سے نہ ہوگا
مرغی بولی میں نہ کروں گی
بکرا بولا مجھ سے نہ ہوگا
جب نہ کسی نے کام کیا یہ
چڑیا نے کھیت آپ ہی کاٹا
۵
گیہوں گھر میں کاٹ کے ڈالے
پھر سب سے یوں بولی چڑیا
آؤ یہ ہم چکی میں پیسیں
پس کر یہ ہو جائیں گے آٹا
چکی اور آٹے کی سن کر
ان میں سے ہر اک گھبرایا
سب سے پہلے کوا بولا
آٹا یہ مجھ سے نہ پسے گا
مینا بولی طوطا بولا
آٹا یہ مجھ سے نہ پسے گا
مینا بولی طوطا بولا
آٹا یہ ہم سے نہ پسے گا
بلی بولی کتا بولا
آٹا یہ ہم سے نہ پسے گا
مرغی بولی بکرا بولا
آٹا یہ ہم سے نہ پسے گا
جب نہ کسی نے پیسا آٹا
چڑیا نے وہ آپ ہی پیسا
۶
سارے گیہوں پیس چکی وہ
پھر ان سے یوں بولی چڑیا
آؤ پکائیں مل کر روٹی
کام یہ ہو جائے تو ہے اچھا
بات یہ سن کر کوا بولا
مجھ سے نہیں پک سکتی یہ روٹی
مینا بولی طوطا بولا
ہم سے نہیں پک سکتی یہ روٹی
بلی بولی کتا بولا
ہم سے نہیں پک سکتی یہ روٹی
مرغی بولی بکرا بولا
ہم سے نہیں پک سکتی یہ روٹی
جب نہ کسی نے کام کیا یہ
چڑیا نے روٹی بھی پکا لی
۷
روٹی جب چڑیا نے پکا لی
پوچھا کون یہ کھائے گا روٹی
کوا بولا میں کھاؤں گا
سب روٹی چٹ کر جاؤں گا
مینا بولی میں کھاؤں گی
طوطا بولا میں کھاؤں گا
بلی بولی میں کھاؤں گی
کتا بولا میں کھاؤں گا
مرغی بولی میں کھاؤں گی
بکرا بولا میں کھاؤں گا
سب نے کہا ہم کھائیں گے روٹی
ساری چٹ کر جائیں گے روٹی
دل میں وہ نہ ذرا شرمائے
جھٹ پٹ روٹی کھانے آئے
۸
اب تو ان سے چڑیا بولی
روٹی یہ تم کو نہ ملے گی
کام سے تم سب گھبراتے ہو
پھر یہ روٹی کیوں کھاتے ہو
پھر یہ روٹی کیوں کھاتے ہو
بات یہ سن کر سب گھبرائے
سب شرمائے سب پچھتائے
چڑیا اور سب اس کے بچے
مل کر کھانا کھانے بیٹھے
سب نے مل کر کھانا کھایا
سب نے مل کر گانا گایا
کام کا پھل چڑیا نے پایا
کام نے ان کا کام بنایا
چاند میں بیٹھی تارا رانی
اے لو بچو ختم کہانی

محمد شفیع الدین نیر
نظم

گیت خوشی کے مل کر گاؤ
ننھی منی چڑیو آؤ
چڑیا کی شادی ہے آج
چڑیا کی شادی ہے آج
لو وہ بجنے لگی شہنائی
مینا گیت سناتی آئی
چڑیا کی شادی ہے آج
چڑیا کی شادی ہے آج
بلبل نے ہے سہرا گایا
ناچ کبوتر نے دکھلایا
چڑیا کی شادی ہے آج
چڑیا کی شادی ہے آج
مہماں آئے کرو سواگت
اب ہوگی شادی کی دعوت
چڑیا کی شادی ہے آج
چڑیا کی شادی ہے آج
مرغی تحفہ انڈا لائی
مرغے نے دی آ کے بدھائی
چڑیا کی شادی ہے آج
چڑیا کی شادی ہے آج
طوطا میٹھے پھل لے آیا
اجلا کر کنٹاس بھی آیا
چڑیا کی شادی ہے آج
چڑیا کی شادی ہے آج
چلے براتی ہنستے گاتے
دولہا دلہن جی کو لبھاتے
چڑیا کی شادی ہے آج
چڑیا کی شادی ہے آج

سیدہ فرحت
نظم

وہ چڑیا وہ طوطا وہ مینا وہ مور
وہ کوئل وہ بلبل وہ قمری چکور
وہ جھیلوں کی لہریں وہ دریا کا زور
وہ جھرنوں کا گرنا وہ پانی کا شور
وہ سرسبز اس کے پہاڑ اور بن
یہ میرا وطن ہے یہ میرا وطن
وہ غلے وہ میوے وہ ترکاریاں
وہ خوش رنگ پھولوں کی گلکاریاں
وہ سرسبز باغوں کی پھلواریاں
وہ سیراب اور خوش نما کیاریاں
زمینیں وہ زرخیز دل کش چمن
یہ میرا وطن ہے یہ میرا وطن
وہ بکھری ہوئی دھوپ دن کی بہار
وہ نکھری ہوئی چاندنی خوش گوار
وہ روشن ستارے وہ شب کا سنگھار
وہ صحن چمن میں کھلا لالہ زار
وہ مہتاب کی پیاری پیاری کرن
یہ میرا وطن ہے یہ میرا وطن
پہاڑوں کے منظر بنوں کا سماں
وہ ان میں ہزاروں ہی چشمے رواں
کہاں تک بیاں اس کی ہوں خوبیاں
ہے فردوس کا اس چمن پر گماں
یہ باغ ارم ہے یہ باغ عدن
یہ میرا وطن ہے یہ میرا وطن

محمد شفیع الدین نیر
نظم

نئی نئی دنیا لگتی تھی نئے نئے سے لوگ
کھلتی کلیاں صبح سویرے کیسے مدھم مدھم
حیرت ہوتی پھول پہ کیسے جم جاتی ہے شبنم
چڑیوں کی آواز سناتی گھنگرو جیسی چھم چھم
بارش کی بوندیں گرتیں پیڑوں پہ رم جھم رم جھم
برگد کی داڑھی کو پکڑے بچے پینگ بڑھاتے
کوے مینا کوئل چڑیاں مل کر شور مچاتے
ماں کے ہاتھوں کی اک خوشبو بستی تھی روٹی میں
بنا شکر لگتا تھا میٹھا ٹھنڈا ٹھنڈا پانی
تھا کتنا معصوم سا بچپن بات نہ ہم نے جانی
وہ پنچھی میٹھی آوازیں نور سی اجلی بھور
پھسل گئی کیوں ہاتھ سے اپنے وہ سپنوں کی ڈور

کوثر جہاں کوثر
نظم

جنگل جنگل پڑی پکار
چوہے نے چھاپہ اخبار
نیلے پیلے صفحے چار
تصویریں چالیس ہزار
اس پر خبروں کی بھر مار
ایک کے اوپر ایک سوار
رشتے ناطوں کے جھگڑے
طوطے مینا کی تکرار
پھول سجائے بلبل نے
خوب رہا مینا بازار
بندر کی تصویروں پر
شہد کی مکھی کی یلغار
گیدڑ نے اعلان کیا
سارس گیا سمندر پار
زرافے کی گردن میں
کھیلوں کی خبروں کے ہار
ہاتھی دنگل جیت گیا
شیر چلا کرنے کو شکار
بکرے دنبے اور ہرن
کھڑے ہوئے ہیں نمبردار
کوئل سائے میں خوش ہے
بھینسے گرمی سے بیزار
مہنگائی میں مندہ ہے
بھالو سیٹھ کا کاروبار
لومڑ کھو گیا رستے میں
امی روئیں زار و زار
سہی معمہ حل کر کے
بکری جیتی پانچ ہزار
لیکن جنگل میں کیا ہے
گاہک آئے بس دو چار
کتر کتر کر کھا گیا آخر
چوہا سب ردی اخبار
چوہے نے چھاپہ اخبار

عابد حسن
نظم

ٹوانکل ٹوانکل لٹل اسٹار
ہاؤ آئی ونڈر وہاٹ یو آر
ٹوانکل ٹوانکل لٹل اسٹار
ننھے منے راج کمار
تیری باتوں کی جھنکار
میری خوشیوں کا سنسار
چندا کھیلے میرے دوار
جگ مگ جگ مگ در دیوار
یوں مہکا ہے سب گھر یار
جیسے پھولوں کا بازار
میں ہوں نیا تو پتوار
تیرے ابو کھیون ہار
تجھ پر یوں برساؤں پیار
جیسے برکھا رت کی پھوار
ٹوانکل ٹوانکل لٹل اسٹار
میرے اچھے راج کمار
اور میں امی کیا کیا ہوں
چڑیا طوطا مینا ہوں
میری اچھی امی جی
مجھ کو پڑھنے بھیجوگی
جب میں پڑھ کر آؤں گا
میں بھی لکھ کر لاؤں گا
پڑھیے امی پھر اک بار
ٹوانکل ٹوانکل لٹل اسٹار
ہاؤ آئی ونڈر وہاٹ یو آر

بزمی بھارتی
نظم

ہم سارے اسکول کے بچے
چڑیا گھر کی سیر کو پہنچے
اس کا ہر اک راز نیا ہے
جنگل کا انداز نیا ہے
نیولا چوہا بندر دیکھا
لومڑ گھوڑا کتا دیکھا
جنگل کے راجا کو دیکھا
پنجرے میں بے چارہ بیٹھا
ساتھ ہی اک تالاب بڑا تھا
اس میں مگرمچھ ایک پڑا تھا
چھوٹے چھوٹے ساتھ تھے پھرتے
اک دوجے پر آ آ گرتے
دور سے اک چنگھاڑ سی آئی
ہاتھی نے پھر شکل دکھائی
کنگارو بھی ہم نے دیکھا
اود بلاؤ بھی اچھا تھا
دیکھا ہم نے بھالو آیا
گھوم رہا تھا کالا سایا
کالا تھا یا گورا گورا
عقل سے لیکن تھا وہ کورا
ریچھ عجب انداز سے آئے
آ کر اچھے ناچ دکھائے
گینڈے کی بھی بات عجب ہے
ڈھال عجب ہے چال عجب ہے
آہوئے تاتار بھی دیکھا
بارہ سنگا ساتھ وہیں تھا
بندر کے اوصاف کو دیکھا
ہم نے پھر زراف کو دیکھا
سارس مور اور سانپ جہاں تھے
بکری اور خرگوش وہاں تھے
طوطا مینا تیتر کوا
اور تھی رنگا رنگ کی چڑیا
باز بھی دیکھا چیل بھی دیکھی
ہم نے تو ابابیل بھی دیکھی
ان سے ہم نے لطف اٹھایا
ان کو دیکھ کے دل بہلایا
دیکھ کے چڑیا گھر جب آئے
دل میں خوشی کے پھول کھلے تھے

بیتاب علی پوری
نظم

پیاری امی مجھے بتاؤ
بادل پانی کہاں سے لائے
چاند اجالا کہاں سے پائے
بجلی کیسے چم چم چمکے
پانی کیسے چھم چھم برسے
پیاری امی مجھے بتاؤ
بیج سے کیسے کونپل پھوٹے
کیسے لگتے پھر گل بوٹے
پیڑ کہاں سے کھاتے کھانا
کیا ہے ان کا آب و دانہ
پیاری امی مجھے بتاؤ
موٹر کیسے چل جاتی ہے
بجلی کیسے جل جاتی ہے
نل میں پانی آئے کیسے
ٹیپ ریکارڈر لگائے کیسے
پیاری امی مجھے بتاؤ
طوطا مینا اڑتے کیسے
ان کے پاس ہو جادو جیسے
جب ہم کوئی چیز گرائے
اوپر سے کیوں نیچے آئے
پیاری امی مجھے بتاؤ
اچھی امی مجھے بتاؤ

حیدر بیابانی
نظم

مینا لائی تال مکھانا
نیل کنٹھ لائے نذرانہ
چڑیاں آئیں لے کر دانہ
جلتے پر لایا پروانہ

مظفر حنفی
نظم

کل اپنے پائین باغ میں ہم نے مینا پکڑی تھی
کالے مخمل جیسے اس کے پر تھے چونچ سنہری تھی

مظفر حنفی
نظم

میرے منے بھیا سو جا
میرے منے بھیا سو جا
سو جا چاند ستارے سو جا
سو جا پیارے پیارے سو جا
میرے منے بھیا سو جا
چڑیا سوئی کوا سویا
مینا سوئی طوطا سویا
بلی سوئی کتا سویا
مرغی سوئی بکرا سویا
میرے منے بھیا سو جا
اوں اوں اوں اوں کرتے سو جا
ہوں ہوں ہوں ہوں کرتے سو جا
روں روں روں روں کرتے سو جا
آغوں آغوں کرتے سو جا
میرے منے بھیا سو جا
سو جا بھولے بھالے سو جا
سو جا پریم کے پالے سو جا
سو جا گھر کے اجالے سو جا
لے آرام ذرا لے سو جا
میرے منے بھیا سو جا
میرے منے بھیا سو جا

محمد شفیع الدین نیر
Load More
Best poetry resource in urdu
تلاش
Get App
URD
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
بولیے