کی تلاش کا نتیجه | موضو - نظم, صفحہ ruus

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "ruus"

نظم کے متعلقہ نتیجہ "ruus"

نظم

۱
سیاہ پیڑ ہیں اب آپ اپنی پرچھائیں
زمیں سے تا مہ و انجم سکوت کے مینار
جدھر نگاہ کریں اک اتھاہ گم شدگی
اک ایک کر کے فسردہ چراغوں کی پلکیں
جھپک گئیں جو کھلی ہیں جھپکنے والی ہیں
جھلک رہا ہے پڑا چاندنی کے درپن میں
رسیلے کیف بھرے منظروں کا جاگتا خواب
فلک پہ تاروں کو پہلی جماہیاں آئیں
۲
تمولیوں کی دوکانیں کہیں کہیں ہیں کھلی
کچھ اونگھتی ہوئی بڑھتی ہیں شاہراہوں پر
سواریوں کے بڑے گھنگھروؤں کی جھنکاریں
کھڑا ہے اوس میں چپ چاپ ہر سنگار کا پیڑ
دلہن ہو جیسے حیا کی سگندھ سے بوجھل
یہ موج نور یہ بھرپور یہ کھلی ہوئی رات
کہ جیسے کھلتا چلا جائے اک سفید کنول
سپاہ روس ہے اب کتنی دور برلن سے
جگا رہا ہے کوئی آدھی رات کا جادو
چھلک رہی ہے خم غیب سے شراب وجود
فضائے نیم شبی نرگس خمار آلود
کنول کی چٹکیوں میں بند ہے ندی کا سہاگ
۳
یہ رس کا سیج یہ سکمار یہ سکومل گات
نین کمل کی جھپک کام روپ کا جادو
یہ رسمسائی پلک کی گھنی گھنی پرچھائیں
فلک پہ بکھرے ہوئے چاند اور ستاروں کی
چمکتی انگلیوں سے چھڑ کے ساز فطرت کے
ترانے جاگنے والے ہیں تم بھی جاگ اٹھو
۴
شعاع مہر نے یوں ان کو چوم چوم لیا
ندی کے بیچ کمدنی کے پھول کھل اٹھے
نہ مفلسی ہو تو کتنی حسین ہے دنیا
یہ جھائیں جھائیں سی رہ رہ کے ایک جھینگر کی
حنا کی ٹیٹو میں نرم سرسراہٹ سی
فضا کے سینے میں خاموش سنسناہٹ سی
یہ کائنات اب اک نیند لے چکی ہوگی
۵
یہ محو خواب ہیں رنگین مچھلیاں تہہ آب
کہ حوض صحن میں اب ان کی چشمکیں بھی نہیں
یہ سرنگوں ہیں سر شاخ پھول گڑہل کے
کہ جیسے بے بجھے انگارے ٹھنڈے پڑ جائیں
یہ چاندنی ہے کہ امڈا ہوا ہے رس ساگر
اک آدمی ہے کہ اتنا دکھی ہے دنیا میں
۶
قریب چاند کے منڈلا رہی ہے اک چڑیا
بھنور میں نور کے کروٹ سے جیسے ناؤ چلے
کہ جیسے سینۂ شاعر میں کوئی خواب پلے
وہ خواب سانچے میں جس کے نئی حیات ڈھلے
وہ خواب جس سے پرانا نظام غم بدلے
کہاں سے آتی ہے مدمالتی لتا کی لپٹ
کہ جیسے سیکڑوں پریاں گلابیاں چھڑکائیں
کہ جیسے سیکڑوں بن دیویوں نے جھولے پر
ادائے خاص سے اک ساتھ بال کھول دیئے
لگے ہیں کان ستاروں کے جس کی آہٹ پر
اس انقلاب کی کوئی خبر نہیں آتی
دل نجوم دھڑکتے ہیں کان بجتے ہیں
۷
یہ سانس لیتی ہوئی کائنات یہ شب ماہ
یہ پر سکوں یہ پراسرار یہ اداس سماں
یہ نرم نرم ہواؤں کے نیلگوں جھونکے
فضا کی اوٹ میں مردوں کی گنگناہٹ ہے
یہ رات موت کی بے رنگ مسکراہٹ ہے
دھواں دھواں سے مناظر تمام نم دیدہ
خنک دھندلکے کی آنکھیں بھی نیم خوابیدہ
ستارے ہیں کہ جہاں پر ہے آنسوؤں کا کفن
حیات پردۂ شب میں بدلتی ہے پہلو
کچھ اور جاگ اٹھا آدھی رات کا جادو
زمانہ کتنا لڑائی کو رہ گیا ہوگا
مرے خیال میں اب ایک بج رہا ہوگا
۸
گلوں نے چادر شبنم میں منہ لپیٹ لیا
لبوں پہ سو گئی کلیوں کی مسکراہٹ بھی
ذرا بھی سنبل ترکی لٹیں نہیں ہلتیں
سکوت نیم شبی کی حدیں نہیں ملتیں
اب انقلاب میں شاید زیادہ دیر نہیں
گزر رہے ہیں کئی کارواں دھندلکے میں
سکوت نیم شبی ہے انہیں کے پاؤں کی چاپ
کچھ اور جاگ اٹھا آدھی رات کا جادو
۹
نئی زمین نیا آسماں نئی دنیا
نئے ستارے نئی گردشیں نئے دن رات
زمیں سے تا بہ فلک انتظار کا عالم
فضائے زرد میں دھندلے غبار کا عالم
حیات موت نما انتشار کا عالم
ہے موج دود کہ دھندلی فضا کی نبضیں ہیں
تمام خستگی و ماندگی یہ دور حیات
تھکے تھکے سے یہ تارے تھکی تھکی سی یہ رات
یہ سرد سرد یہ بے جان پھیکی پھیکی چمک
نظام ثانیہ کی موت کا پسینا ہے
خود اپنے آپ میں یہ کائنات ڈوب گئی
خود اپنی کوکھ سے پھر جگمگا کے ابھرے گی
بدل کے کیچلی جس طرح ناگ لہرائے
۱۰
خنک فضاؤں میں رقصاں ہیں چاند کی کرنیں
کہ آبگینوں پہ پڑتی ہے نرم نرم پھوار
یہ موج غفلت معصوم یہ خمار بدن
یہ سانس نیند میں ڈوبی یہ آنکھ مدماتی
اب آؤ میرے کلیجے سے لگ کے سو جاؤ
یہ پلکیں بند کرو اور مجھ میں کھو جاؤ

فراق گورکھپوری

نظم

اے جوانان وطن روح جواں ہے تو اٹھو
آنکھ اس محشر نو کی نگراں ہے تو اٹھو
خوف بے حرمتی و فکر زیاں ہے تو اٹھو
پاس ناموس نگاران جہاں ہے تو اٹھو
اٹھو نقارۂ افلاک بجا دو اٹھ کر
ایک سوئے ہوئے عالم کو جگا دو اٹھ کر
ایک اک سمت سے شبخون کی تیاری ہے
لطف کا وعدہ ہے اور مشق جفا کاری ہے
محفل زیست پہ فرمان قضا جاری ہے
شہر تو شہر ہے گاؤں پہ بھی بمباری ہے
یہ فضا میں جو گرجتے ہوئے طیارے ہیں
برسر دوش ہوا موت کے ہرکارے ہیں
اس طرف ہاتھوں میں شمشیریں ہی شمشیریں ہیں
اس طرف ذہن میں تدبیریں ہی تدبیریں ہیں
ظلم پر ظلم ہیں تعزیروں پہ تعزیریں ہیں
سر پہ تلوار ہے اور پاؤں میں زنجیریں ہیں
ایک ہو ایک کہ ہنگامۂ محشر ہے یہی
عرصۂ زیست کا ہنگامۂ اکبر ہے یہی
اپنی سرحد پہ جو اغیار چلے آتے ہیں
شعلہ افشاں و شرر بار چلے آتے ہیں
خون پیتے ہوئے سرشار چلے آتے ہیں
تم جو اٹھ جاؤ تو بے کار چلے آتے ہیں
خوں جو بہہ نکلا ہے اس خوں میں بہا دو ان کو
ان کی کھودی ہوئی خندق میں گرا دو ان کو
رنگ گلہائے گلستان وطن تم سے ہے
سورش نعرۂ رندان وطن تم سے ہے
نشۂ نرگس خوبان وطن تم سے ہے
عفت ماہ جبینان وطن تم سے ہے
تم ہو غیرت کے امیں تم ہو شرافت کے امیں
اور یہ خطرے میں ہیں احساس تمہیں ہے کہ نہیں
یہ درندے یہ شرافت کے پرانے دشمن
تم کہ ہو حامل آداب و روایات کہن
جادہ پیما کے لیے خضر ہو تم یہ رہزن
تم ہو خرمن کے نگہبان یہ برق خرمن
خطۂ پاک میں زنہار نہ آنے پائیں
آ ہی جائیں جو یہ زندہ تو نہ جانے پائیں
مرد و زن پیر و جواں ان کے مظالم کے شکار
خون معصوم میں ڈوبی ہوئی ان کی تلوار
یہ قیامت کے ہوس ناک غضب کے خوں خار
ان کے عصیاں کی نہ حد ہے نہ جرائم کا شمار
یہ ترحم سے نہ دیکھیں گے کسی کی جانب
ان کی توپوں کے دہن کر دو انہی کی جانب
یہ تو ہیں فتنۂ بیدار دبا دو ان کو
یہ مٹا دیں گے تمدن کو مٹا دو ان کو
پھونک دو ان کو جھلس دو کہ جلا دو ان کو
شان شایان وطن ہو یہ بتا دو ان کو
یاد ہے تم کو کن اسلاف کی تم یادیں ہو
تم تو خالد کے پسر بھیم کی اولادیں ہو
تم تو تنہا بھی نہیں ہو کئی دم ساز بھی ہیں
روس کے مرد بھی ہیں چین کے جاں باز بھی ہیں
کچھ نہ کچھ ساتھ فرنگی کے فسوں ساز بھی ہیں
اور ہم جیسے بہت زمزمہ پرداز بھی ہیں
دور انسان کے سر سے یہ مصیبت کر دو
آگ دوزخ کی بجھا دو اسے جنت کر دو

اسرار الحق مجاز

نظم

خیابان سعدی میں
روسی کتابوں کی دکان پر ہم کھڑے تھے
مجھے روس کے چیدہ صنعت گروں کے
نئے کارناموں کی اک عمر سے تشنگی تھی!
مجھے روسیوں کے سیاسی ''ہمہ اوست'' سے کوئی رغبت نہیں ہے
مگر ذرے ذرے میں
انساں کے جوہر کی تابندگی دیکھنے کی تمنا ہمیشہ رہی ہے!
اور اس شام تو مرسدہ کی عروسی تھی
اس شوخ دیوانی لڑکی کی خاطر
مجھے ایک نازک سی سوغات کی جستجو تھی

ن م راشد

نظم

افق روس سے پھوٹی ہے نئی صبح کی ضو
شب کا تاریک جگر چاک ہوا جاتا ہے

ساحر لدھیانوی

نظم

ماسکو، پیرس اور لندن میں
دیکھے میں نے تین شرابی
سرخ تھیں آنکھیں روح گلابی

علی سردار جعفری

نظم

ایک شوہر روس کا اک چین کا رکھتی تھی وہ
اپنے بستر پر جنوبی ایشیا رکھتی تھی وہ

خالد عرفان

نظم

مجھے ہر اک بات کی خبر ہے
جو ہو چکی ہے
جو ہو رہی ہے
جو ہونے والی ہے آج لیکن
میں صرف اس بات کے بھنور میں اتر رہا ہوں
جو ہونے والی ہے
جس کو سرگوشیوں کا اک بے کراں سمندر
اگلنے والا ہے
کارواں جس کا اب حکایت کی سر زمینوں پہ چلنے والا ہے
جس کو ہر داستاں گلے سے لگانے والی ہے
جس کی ہاں میں ہر ایک ہاں ہاں ملانے والی ہے
آؤ لوگو
طلب کے ساحل پہ خامشی کی دبیز چادر لپیٹ کر سونے والے لوگو
شاید اندوہ کے اندھیرے میں خوف کی خار دار چادر لپیٹ کر رونے والے لوگو
سنو کہ جو بات ہونے والی ہے اس کا آغاز ہو رہا ہے
سنو کہ یہ بات آپ کی ہے
سنو کی یہ بات روس اور چین کی نہیں ہے
وہاں تو اس کو ہوئے زمانہ گزر چکا ہے
یہ بات ویتنام اور کمبوڈیا کی بھی اب نہیں رہی ہے
وہاں تو اب اس کی شکل اک داستاں کی صورت میں ڈھل چکی ہے
وہاں سے یہ بات چل چکی ہے
یہ بات اب تم کرو گے تم
جن کے وہم میں بھی نہ تھا کہ اک دن
اسے تمہارے لہو لہو لب ادا کریں گے
یہی تو اس بات کا کرشمہ ہے معجزہ ہے
کہ ابتدا اس کی جب بھی ہوگی
وہی کریں گے
جو انتہا کے حقیر ہوں گے
مگر بہت با ضمیر ہوں گے
مجھے تمہارے
مجھے تمہارے حقیر اور با ضمیر ہونے میں شک نہیں ہے
کہ میں بھی تم میں سے ایک ہوں اور جانتا ہوں
کہ تم جو مدت سے خامشی کی دبیز چادر لپیٹ کر سو رہے ہو
کیا ہو
کہ تم جو اندوہ کے اندھیرے میں خوف کی خار دار چادر
لپیٹ کر رو رہے ہو کیا ہوا
سنو کہ جو بات ہونے والی تھی ہو رہی ہے
میں اس کا آغاز کر چکا ہوں
اٹھو اپنے لہو لہو لب
مری صدا کے لبوں پہ رکھ دو

ظہور نظر

نظم

نہ خدا کا ہے اسے ڈر نہ ہے انسان کا ڈر
نہ اسے رکھشا چلاتے ہوئے حیوان کا ڈر
نہ پولس کا ہے اسے خوف نہ چالان کا ڈر
ہے اگر ڈر تو اسی مرد مسلمان کا ڈر
اونٹ گاڑی پہ سجائے جو جلوس آتا ہے
جس طرح متحد اقوام میں روس آتا ہے

سید محمد جعفری

نظم

ہند ہو یا پاک ہو یا روس ہو یا بحر روم
جس طرف اٹھتی ہیں نظریں ہیں وہاں فتنوں کی دھوم
آدمی کے فعل سے سہمے ہیں اب ماہ و نجوم
اے غم دل کیا کروں اے وحشت دل کیا کروں

نذیر فتح پوری

نظم

صاحب ملک علم مالک رام
مالک ملک حلم مالک رام
مولد‌ پاک پھالیہ کی زمیں
ہیر و رانجھا کی سر زمیں کے قریں
شہر گجرات میں رہے ہے یہ مقیم
ارض لاہور میں ہوئی تعلیم
نیکی و خیر و خلق میں فیاض
دوستی کے بہت بڑے نباض
کارواں کارگاہ حکمت کے
لعل اک معدن محبت کے
طلبا کے شفیق و یاور ہیں
بحر تحقیق کے شناور ہیں
اکمل و افضل و علیم و خطیب
اکرم و اعظم و شریف و نحیف
صاحب فقر و بندۂ درویش
دوستوں کے بڑے عقیدے کیش
ان کے مسلک میں بے ریائی ہے
ان کی رندی میں پارسائی ہے
نثر میں ان کی نظم کی بو باس
نظم کی انتہا کے رمز‌‌ شناس
کس قدر آن بان ہے ان کی
بے نیازانہ شان ہے ان کی
اب بھی چہرے پہ ہے شباب کا نور
سربسر علم کی شراب کا نور
بات کرنے میں پھول جھڑتے ہیں
کبھی لڑتے نہ یہ جھگڑتے ہیں
علم کی جستجو پہ جان نثار
بہر تحقیق روز و شب بیدار
راہ تحقیق پہ چلے ہیں مدام
چھان ڈالے عراق و مصر و شام
جرمنی روس بلجیم لندن
ہر جگہ دیکھے علم کے معدن
کارواں علم کا ہے تیز خرام
اور اس کے امیر مالک رام
صاحب علم و صاحب اخلاق
دوستی میں یہ فرد خلق میں طاق
آشتی اور علم کا اک گنج
ان سے پہنچا نہیں کسی کو رنج
رمز داں ہیں یہ فکر غالب کے
ہیں مصنف یہ ذکر غالب کے
محترم دوست عرش فرشی کے
ہیں مرتب یہ نذر عرشی کے
ہیں بہ ہر رنگ عالموں کے حبیب
نذر ذاکر انہوں نے دی ترتیب
عربی فارسی ہو یا اردو
ان کی باتوں میں سب کی ہے خوشبو
ان کی تصنیف عورت اور اسلام
پائے گی دہر میں بقائے دوام
خوب لکھا تلامذہ کا حال
خاندان اسد کا حسن مقال
گل رعنا ہے نسخۂ ارتنگ
یہ بھی با کیف ہے گل صد رنگ
برتنا بم کہ ارمغاں بہ‌ دہم
بس غنیمت کہ قلب و جاں بدہم
علم را دادہ از نظر تمکیں
رہنمائے براہ علم و یقیں
ذہن فرخندہ مغز تابندہ
باد در شہر علم پایندہ
رو راز حرص و آز و طمع و ہوس
نیک خو نیک قلب و نیک نفس
شہر نا مردمان و ہد آزاد
بس ہمیں مرد است خوش اطوار
ملک معنی کا بادشاہ ہے یہ
شہر انشا کا کج کلاہ ہے یہ
ختم ہے عرش اب دعا پہ کلام
یہ رہیں با مراد و شاد مدام
حسن سیرت کی شمع جلتی رہے
شاخ امید اور پھلتی رہے
زندگی کو ملے نشاط تمام
پر ہمیشہ رہے سرور کا جام
نور خورشید کی طرح دمکے
علم و تحقیق کی ضیا چمکے
علم کی روشنی بڑھاتے رہیں
ہم کو بھی کچھ نہ کچھ سکھاتے رہیں

عرش ملسیانی

نظم

کتنے ہی لوگ آئے ہیں درشن کے واسطے
طائر جو مر گیا ہے نشیمن کے واسطے
برطانیہ سے روس سے جاپان و مصر سے
ہر اک سفیر پھول چڑھانے کو آ گیا
لو چوڑیاں اتار للیتا بھی آ گئی
بیٹا چتا کو آگ لگانے کو آ گیا

سلیمان خطیب

نظم

ہم نے محبوب کے ایوان میں جا کر دیکھا
چین میں مصر میں ایران میں جا کر دیکھا
روس میں شام میں سوڈان میں جا کر دیکھا
اور پھر خانۂ سلطان میں جا کر دیکھا
نوش و خوردن ہے نوشتہ ترے دیوانے کا

محمد یوسف پاپا

نظم

وہ خاک بوئے تھے حالات نے شرر جس میں
اب اس میں پھول تمنا کے کھلنے والے ہیں
ہوئے تھے جن کے سبب چاک چاک سینۂ دل
وہ چاک اب انہیں ہاتھوں سے سلنے والے ہیں
جو دوست الجھے تھے آپس میں دشمنوں کی طرح
پھر ایک بار وہ آپس میں ملنے والے ہیں
دیار روس ہمارا سلام جاں ہو قبول
کہ راہ شوق کو آساں بنا دیا تو نے
یہ دور آج کا تو معجزوں کا دور نہیں
مگر وہ معجزہ ہم کو دکھا دیا تو نے
کہ جس سے دور و قریب ایک نور پھیل گیا
چراغ کشتہ کو ایسے جلا دیا تو نے
یہ تاشقند سے پیغام دل نواز آیا
کہ ابتلا کا زمانہ گزر گیا یارو!
بہت رہا جسے دعویٔ ساحل آشوبی
سنا یہ ہے کہ وہ دریا اتر گیا یارو!
کچھ اس طرح سے کسی نے دیا لہو اپنا
کہ ارض شرق کا چہرہ نکھر گیا یارو!
وہ خاک جس پہ مرے رہنما نے جاں دی ہے
مرا سلام اسی دل نواز خاک کے نام
نوائے خامہ ہو منسوب آج سے پیارو
شہید امن کی روداد تابناک کے نام
مرے جنون وفا کا یہی پیام ہے آج
سخنوران و ادیبان ہند و پاک کے نام

جگن ناتھ آزاد

نظم

اب دھن دولت عام ہوا ہے
ختم ہے غم آرام ہوا ہے
روس سے بڑھ کر کام ہوا ہے
بیتا دکھ کا زمانہ پیارے

علی جواد زیدی

نظم

خواہ چھوٹی ذات کا بندر ہے یا ڈھبوس ہے
جس نے بھیجا ہے خلا میں اس کو وہ تو روس ہے
وہ زمیں والوں کا اک بھیجا ہوا جاسوس ہے
ڈگڈگی کی شکل کی اشیا سے وہ مانوس ہے
چونکہ آدھی ڈگڈگی کی شکل میں ہے کیپسیول
ناچتے ہیں ڈگڈگی کے بل پہ بندر یا اصول

سید محمد جعفری

نظم

ہوتے ہیں اہل قلم ہی ملک و ملت کا نشاں
دور ماضی کے تمدن کی یہی ہیں داستاں
اور دور حال کے حالات کے ہیں ترجماں
بلکہ کہہ سکتے ہیں ان کو قوم کے روح رواں

پریم لال شفا دہلوی

نظم

پیچھے بیوی ہے گود میں بچہ
سر پہ گھر بار ہے یہی بس ہے
سوز الفت سے میرا کشتہ دل
قائم النار ہے یہی بس ہے
ایسے بندر کی دوستی ہی کیا
تو جو بیزار ہے یہی بس ہے
میرے کھانے کو بیسنی روٹی
اور آچار ہے یہی بس ہے
تن پہ کپڑا اگر نہیں نہ سہی
سر پہ دستار ہے یہی بس ہے
روس کی ہم کو اب نہیں حاجت
ٹوٹی اک کار ہے یہی بس ہے
اب زیادہ نہ گلفشانی کر
دیکھ بازار ہے یہی بس ہے
کچھ تو چلتی رہے رقیبوں سے
جوتی پیزار ہے یہی بس ہے
ہم کو سیزر ملے ملے نہ ملے
چار مینار ہے یہی بس ہے

عصمت اللہ عصمت بیگ

نظم

نہ چین و روس نہ ایران اور امریکہ
وبا نے کفر کو دیکھا نہ دین کو دیکھا

حنا رضوی

نظم

کوئی بھی رت ہو اس کی چھب
فضا کا رنگ روپ تھی
وہ گرمیوں کی چھاؤں تھی
وہ سردیوں کی دھوپ تھی

احمد فراز

نظم

کیوں زیاں کار بنوں سود فراموش رہوں
فکر فردا نہ کروں محو غم دوش رہوں
نالے بلبل کے سنوں اور ہمہ تن گوش رہوں
ہم نوا میں بھی کوئی گل ہوں کہ خاموش رہوں
جرأت آموز مری تاب سخن ہے مجھ کو
شکوہ اللہ سے خاکم بدہن ہے مجھ کو
ہے بجا شیوۂ تسلیم میں مشہور ہیں ہم
قصۂ درد سناتے ہیں کہ مجبور ہیں ہم
ساز خاموش ہیں فریاد سے معمور ہیں ہم
نالہ آتا ہے اگر لب پہ تو معذور ہیں ہم
اے خدا شکوۂ ارباب وفا بھی سن لے
خوگر حمد سے تھوڑا سا گلہ بھی سن لے
تھی تو موجود ازل سے ہی تری ذات قدیم
پھول تھا زیب چمن پر نہ پریشاں تھی شمیم
شرط انصاف ہے اے صاحب الطاف عمیم
بوئے گل پھیلتی کس طرح جو ہوتی نہ نسیم
ہم کو جمعیت خاطر یہ پریشانی تھی
ورنہ امت ترے محبوب کی دیوانی تھی
ہم سے پہلے تھا عجب تیرے جہاں کا منظر
کہیں مسجود تھے پتھر کہیں معبود شجر
خوگر پیکر محسوس تھی انساں کی نظر
مانتا پھر کوئی ان دیکھے خدا کو کیونکر
تجھ کو معلوم ہے لیتا تھا کوئی نام ترا
قوت بازوئے مسلم نے کیا کام ترا
بس رہے تھے یہیں سلجوق بھی تورانی بھی
اہل چیں چین میں ایران میں ساسانی بھی
اسی معمورے میں آباد تھے یونانی بھی
اسی دنیا میں یہودی بھی تھے نصرانی بھی
پر ترے نام پہ تلوار اٹھائی کس نے
بات جو بگڑی ہوئی تھی وہ بنائی کس نے
تھے ہمیں ایک ترے معرکہ آراؤں میں
خشکیوں میں کبھی لڑتے کبھی دریاؤں میں
دیں اذانیں کبھی یورپ کے کلیساؤں میں
کبھی ایفریقا کے تپتے ہوئے صحراؤں میں
شان آنکھوں میں نہ جچتی تھی جہانداروں کی
کلمہ پڑھتے تھے ہمیں چھاؤں میں تلواروں کی
ہم جو جیتے تھے تو جنگوں کی مصیبت کے لیے
اور مرتے تھے ترے نام کی عظمت کے لیے
تھی نہ کچھ تیغ زنی اپنی حکومت کے لیے
سر بکف پھرتے تھے کیا دہر میں دولت کے لیے
قوم اپنی جو زرو و مال جہاں پر مرتی
بت فروشی کے عوض بت شکنی کیوں کرتی
ٹل نہ سکتے تھے اگر جنگ میں اڑ جاتے تھے
پاؤں شیروں کے بھی میداں سے اکھڑ جاتے تھے
تجھ سے سرکش ہوا کوئی تو بگڑ جاتے تھے
تیغ کیا چیز ہے ہم توپ سے لڑ جاتے تھے
نقش توحید کا ہر دل پہ بٹھایا ہم نے
زیر خنجر بھی یہ پیغام سنایا ہم نے
تو ہی کہہ دے کہ اکھاڑا در خیبر کس نے
شہر قیصر کا جو تھا اس کو کیا سر کس نے
توڑے مخلوق خدا وندوں کے پیکر کس نے
کاٹ کر رکھ دئیے کفار کے لشکر کس نے
کس نے ٹھنڈا کیا آتشکدۂ ایراں کو
کس نے پھر زندہ کیا تذکرۂ یزداں کو
کون سی قوم فقط تیری طلب گار ہوئی
اور تیرے لیے زحمت کش پیکار ہوئی
کس کی شمشیر جہانگیر جہاں دار ہوئی
کس کی تکبیر سے دنیا تری بیدار ہوئی
کس کی ہیبت سے صنم سہمے ہوئے رہتے تھے
منہ کے بل گر کے ہو اللہ احد کہتے تھے
آ گیا عین لڑائی میں اگر وقت نماز
قبلہ رو ہو کے زمیں بوس ہوئی ہوئی قوم حجاز
ایک ہی صف میں کھڑے ہو گئے محمود و ایاز
نہ کوئی بندہ رہا اور نہ کوئی بندہ نواز
بندہ و صاحب و محتاج و غنی ایک ہوئے
تیری سرکار میں پہنچے تو سبھی ایک ہوئے
محفل کون و مکاں میں سحر و شام پھرے
مئے توحید کو لے کر صفت جام پھرے
کوہ میں دشت میں لے کر ترا پیغام پھرے
اور معلوم ہے تجھ کو کبھی ناکام پھرے
دشت تو دشت ہیں دریا بھی نہ چھوڑے ہم نے
بحر ظلمات میں دوڑا دئیے گھوڑے ہم نے
صفحۂ دہر سے باطل کو مٹایا ہم نے
نوع انساں کو غلامی سے چھڑایا ہم نے
تیرے کعبے کو جبینوں سے بسایا ہم نے
تیرے قرآن کو سینوں سے لگایا ہم نے
پھر بھی ہم سے یہ گلہ ہے کہ وفادار نہیں
ہم وفادار نہیں تو بھی تو دل دار نہیں
امتیں اور بھی ہیں ان میں گنہ گار بھی ہیں
عجز والے بھی ہیں مست مئے پندار بھی ہیں
ان میں کاہل بھی ہیں غافل بھی ہیں ہشیار بھی ہیں
سیکڑوں ہیں کہ ترے نام سے بے زار بھی ہیں
رحمتیں ہیں تری اغیار کے کاشانوں پر
برق گرتی ہے تو بے چارے مسلمانوں پر
بت صنم خانوں میں کہتے ہیں مسلمان گئے
ہے خوشی ان کو کہ کعبے کے نگہبان گئے
منزل دہر سے اونٹوں کے حدی خوان گئے
اپنی بغلوں میں دبائے ہوئے قرآن گئے
خندہ زن کفر ہے احساس تجھے ہے کہ نہیں
اپنی توحید کا کچھ پاس تجھے ہے کہ نہیں
یہ شکایت نہیں ہیں ان کے خزانے معمور
نہیں محفل میں جنہیں بات بھی کرنے کا شعور
قہر تو یہ ہے کہ کافر کو ملیں حور و قصور
اور بے چارے مسلماں کو فقط وعدۂ حور
اب وہ الطاف نہیں ہم پہ عنایات نہیں
بات یہ کیا ہے کہ پہلی سی مدارات نہیں
کیوں مسلمانوں میں ہے دولت دنیا نایاب
تیری قدرت تو ہے وہ جس کی نہ حد ہے نہ حساب
تو جو چاہے تو اٹھے سینۂ صحرا سے حباب
رہرو دشت ہو سیلی زدۂ موج سراب
طعن اغیار ہے رسوائی ہے ناداری ہے
کیا ترے نام پہ مرنے کا عوض خواری ہے
بنی اغیار کی اب چاہنے والی دنیا
رہ گئی اپنے لیے ایک خیالی دنیا
ہم تو رخصت ہوئے اوروں نے سنبھالی دنیا
پھر نہ کہنا ہوئی توحید سے خالی دنیا
ہم تو جیتے ہیں کہ دنیا میں ترا نام رہے
کہیں ممکن ہے کہ ساقی نہ رہے جام رہے
تیری محفل بھی گئی چاہنے والے بھی گئے
شب کی آہیں بھی گئیں صبح کے نالے بھی گئے
دل تجھے دے بھی گئے اپنا صلہ لے بھی گئے
آ کے بیٹھے بھی نہ تھے اور نکالے بھی گئے
آئے عشاق گئے وعدۂ فردا لے کر
اب انہیں ڈھونڈ چراغ رخ زیبا لے کر
درد لیلیٰ بھی وہی قیس کا پہلو بھی وہی
نجد کے دشت و جبل میں رم آہو بھی وہی
عشق کا دل بھی وہی حسن کا جادو بھی وہی
امت احمد مرسل بھی وہی تو بھی وہی
پھر یہ آرزدگئ غیر سبب کیا معنی
اپنے شیداؤں پہ یہ چشم غضب کیا معنی
تجھ کو چھوڑا کہ رسول عربی کو چھوڑا
بت گری پیشہ کیا بت شکنی کو چھوڑا
عشق کو عشق کی آشفتہ سری کو چھوڑا
رسم سلمان و اویس قرنی کو چھوڑا
آگ تکبیر کی سینوں میں دبی رکھتے ہیں
زندگی مثل بلال حبشی رکھتے ہیں
عشق کی خیر وہ پہلی سی ادا بھی نہ سہی
جادہ پیمائی تسلیم و رضا بھی نہ سہی
مضطرب دل صفت قبلہ نما بھی نہ سہی
اور پابندی آئین وفا بھی نہ سہی
کبھی ہم سے کبھی غیروں سے شناسائی ہے
بات کہنے کی نہیں تو بھی تو ہرجائی ہے
سر فاراں پہ کیا دین کو کامل تو نے
اک اشارے میں ہزاروں کے لیے دل تو نے
آتش اندوز کیا عشق کا حاصل تو نے
پھونک دی گرمئ رخسار سے محفل تو نے
آج کیوں سینے ہمارے شرر آباد نہیں
ہم وہی سوختہ ساماں ہیں تجھے یاد نہیں
وادیٔ نجد میں وہ شور سلاسل نہ رہا
قیس دیوانۂ نظارۂ محمل نہ رہا
حوصلے وہ نہ رہے ہم نہ رہے دل نہ رہا
گھر یہ اجڑا ہے کہ تو رونق محفل نہ رہا
اے خوشا آں روز کہ آئی و بصد ناز آئی
بے حجابانہ سوئے محفل ما باز آئی
بادہ کش غیر ہیں گلشن میں لب جو بیٹھے
سنتے ہیں جام بکف نغمۂ کو کو بیٹھے
دور ہنگامۂ گلزار سے یکسو بیٹھے
تیرے دیوانے بھی ہیں منتظر ہو بیٹھے
اپنے پروانوں کو پھر ذوق خود افروزی دے
برق دیرینہ کو فرمان جگر سوزی دے
قوم آوارہ عناں تاب ہے پھر سوئے حجاز
لے اڑا بلبل بے پر کو مذاق پرواز
مضطرب باغ کے ہر غنچے میں ہے بوئے نیاز
تو ذرا چھیڑ تو دے تشنۂ مضراب ہے ساز
نغمے بیتاب ہیں تاروں سے نکلنے کے لیے
طور مضطر ہے اسی آگ میں جلنے کے لیے
مشکلیں امت مرحوم کی آساں کر دے
مور بے مایہ کو ہمدوش سلیماں کر دے
جنس نایاب محبت کو پھر ارزاں کر دے
ہند کے دیر نشینوں کو مسلماں کر دے
جوئے خوں می چکد از حسرت دیرینۂ ما
می تپد نالہ بہ نشتر کدۂ سینۂ ما
بوئے گل لے گئی بیرون چمن راز چمن
کیا قیامت ہے کہ خود پھول ہیں غماز چمن
عہد گل ختم ہوا ٹوٹ گیا ساز چمن
اڑ گئے ڈالیوں سے زمزمہ پرداز چمن
ایک بلبل ہے کہ ہے محو ترنم اب تک
اس کے سینے میں ہے نغموں کا تلاطم اب تک
قمریاں شاخ صنوبر سے گریزاں بھی ہوئیں
پتیاں پھول کی جھڑ جھڑ کے پریشاں بھی ہوئیں
وہ پرانی روشیں باغ کی ویراں بھی ہوئیں
ڈالیاں پیرہن برگ سے عریاں بھی ہوئیں
قید موسم سے طبیعت رہی آزاد اس کی
کاش گلشن میں سمجھتا کوئی فریاد اس کی
لطف مرنے میں ہے باقی نہ مزہ جینے میں
کچھ مزہ ہے تو یہی خون جگر پینے میں
کتنے بیتاب ہیں جوہر مرے آئینے میں
کس قدر جلوے تڑپتے ہیں مرے سینے میں
اس گلستاں میں مگر دیکھنے والے ہی نہیں
داغ جو سینے میں رکھتے ہوں وہ لالے ہی نہیں
چاک اس بلبل تنہا کی نوا سے دل ہوں
جاگنے والے اسی بانگ درا سے دل ہوں
یعنی پھر زندہ نئے عہد وفا سے دل ہوں
پھر اسی بادۂ دیرینہ کے پیاسے دل ہوں
عجمی خم ہے تو کیا مے تو حجازی ہے مری
نغمہ ہندی ہے تو کیا لے تو حجازی ہے مری

علامہ اقبال

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے