کی تلاش کا نتیجه | موضو - نظم, صفحہ slide

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "slide"

نظم کے متعلقہ نتیجہ "slide"

نظم

پارک کی پہلی دھوپ سے ملنے
انگلی سے انگلی کو تھامے
سب کو ہیلو ہیلو کرتی
واکی ٹاکی دادی پوتی
سہج سہج چلتی ہیں دادی
آگے پیچھے پھرتی پوتی
رکتی چلتی چلتی رکتی
واکی ٹاکی دادی پوتی
گھس آیا شاید کوئی کنکر
پوتی کی چپل کے اندر
دادی جھک کے جھاڑ رہی ہیں
پوتی کو پھٹکار رہی ہیں
کتنا کہا تھا جوتا پہنو
لیکن تم کس کی سنتی ہو
سوری دادی دادی سوری
کل سے جوتا ہی پہنوں گی
پوتی آنکھیں مٹکاتی ہے
دادی کو یوں بہلاتی ہے
پارک میں جا کر بیٹھ گئی ہیں
دھوپ سے خود کو سینک رہی ہیں
لیکن پوتی کیوں بیٹھے گی
پارک میں آئی ہے دوڑے گی
جھولا سی سو اور سلائڈ
لیکن دادی بنی ہیں گائیڈ
یہ نہ کرو یہ کیا کرتی ہو
ہے ہے جو تم گر جاتی تو
تتلی کے پر توڑ رہی ہو
توبہ توبہ کتنی بری ہو
دامن میں پھر بھر لیے پتھر
پھینکو ورنہ دوں گی تھپڑ
دادی نے جو دی اک جھڑکی
لال بھبھوکا ہو گئی پوتی
اب دونوں چپ دونوں روٹھی
ان کی تولو ہو گئی کٹی
آیا تبھی غبارے والا
ٹن ٹن گھنٹی خوب بجاتا
نیلے پیلے کتنے سارے
بادل چھونے والے غبارے
لیکن کیسے پائے گی پوتی
دادی سے تو ہوئی ہے کٹی
سوچ سوچ کے دھیرے دھیرے
بولی غبارے والے سے
مجھ کو ایک غبارہ دے دو
پیسے دادی جان سے لے لو
ان سے میری ہوئی ہے کٹی
لیکن ہیں تو میری دادی
سن کے ہنس دیں بولیں دادی
لے جیتی تو میں ہی ہاری
بھیا ایک غبارہ دے دو
اس آفت کی پرکالہ کو
فتنہ ہے شیطان کی نانی
پھر بھی جان سے دل سے پیاری
لے کے غبارہ ہنستی ہنستی
گھر کو چلیں وہ پکڑے انگلی
رکتی چلتی چلتی رکتی
واکی ٹاکی دادی پوتی

بلقیس ظفیر الحسن

نظم

پتھر کے کمرے میں اس نے
مٹی دھات نمک کو
ایٹم
اور اس سے بھی چھوٹے ذروں میں بانٹا
اک اونچی میز پہ لیٹے وقت کو کلوروفارم سونگھا کر
اس کے ایک ایک عضو کو کاٹا
صدیوں
برسوں اور مہینوں
اک اک پل میں
ایک تکونے چمٹے سے
ایک سلائڈ پر میری کچھ سانسیں رکھیں
شیشے کی نلکی سے
میری گردن کو ہلایا

مصحف اقبال توصیفی

نظم

دلیل صبح روشن ہے ستاروں کی تنک تابی
افق سے آفتاب ابھرا گیا دور گراں خوابی
عروق مردۂ مشرق میں خون زندگی دوڑا
سمجھ سکتے نہیں اس راز کو سینا و فارابی
مسلماں کو مسلماں کر دیا طوفان مغرب نے
تلاطم ہائے دریا ہی سے ہے گوہر کی سیرابی
عطا مومن کو پھر درگاہ حق سے ہونے والا ہے
شکوہ ترکمانی ذہن ہندی نطق اعرابی
اثر کچھ خواب کا غنچوں میں باقی ہے تو اے بلبل
نوا را تلخ ترمی زن چو ذوق نغمہ کم یابی
تڑپ صحن چمن میں آشیاں میں شاخساروں میں
جدا پارے سے ہو سکتی نہیں تقدیر سیمابی
وہ چشم پاک ہیں کیوں زینت بر گستواں دیکھے
نظر آتی ہے جس کو مرد غازی کی جگر تابی
ضمیر لالہ میں روشن چراغ آرزو کر دے
چمن کے ذرے ذرے کو شہید جستجو کر دے
سرشک چشم مسلم میں ہے نیساں کا اثر پیدا
خلیل اللہ کے دریا میں ہوں گے پھر گہر پیدا
کتاب ملت بیضا کی پھر شیرازہ بندی ہے
یہ شاخ ہاشمی کرنے کو ہے پھر برگ و بر پیدا
ربود آں ترک شیرازی دل تبریز و کابل را
صبا کرتی ہے بوئے گل سے اپنا ہم سفر پیدا
اگر عثمانیوں پر کوہ غم ٹوٹا تو کیا غم ہے
کہ خون صد ہزار انجم سے ہوتی ہے سحر پیدا
جہاں بانی سے ہے دشوار تر کار جہاں بینی
جگر خوں ہو تو چشم دل میں ہوتی ہے نظر پیدا
ہزاروں سال نرگس اپنی بے نوری پہ روتی ہے
بڑی مشکل سے ہوتا ہے چمن میں دیدہ ور پیدا
نوا پیرا ہو اے بلبل کہ ہو تیرے ترنم سے
کبوتر کے تن نازک میں شاہیں کا جگر پیدا
ترے سینے میں ہے پوشیدہ راز زندگی کہہ دے
مسلماں سے حدیث سوز و ساز زندگی کہہ دے
خدائے لم یزل کا دست قدرت تو زباں تو ہے
یقیں پیدا کر اے غافل کہ مغلوب گماں تو ہے
پرے ہے چرخ نیلی فام سے منزل مسلماں کی
ستارے جس کی گرد راہ ہوں وہ کارواں تو ہے
مکاں فانی مکیں فانی ازل تیرا ابد تیرا
خدا کا آخری پیغام ہے تو جاوداں تو ہے
حنا بند عروس لالہ ہے خون جگر تیرا
تری نسبت براہیمی ہے معمار جہاں تو ہے
تری فطرت امیں ہے ممکنات زندگانی کی
جہاں کے جوہر مضمر کا گویا امتحاں تو ہے
جہان آب و گل سے عالم جاوید کی خاطر
نبوت ساتھ جس کو لے گئی وہ ارمغاں تو ہے
یہ نکتہ سر گزشت ملت بیضا سے ہے پیدا
کہ اقوام زمین ایشیا کا پاسباں تو ہے
سبق پھر پڑھ صداقت کا عدالت کا شجاعت کا
لیا جائے گا تجھ سے کام دنیا کی امامت کا
یہی مقصود فطرت ہے یہی رمز مسلمانی
اخوت کی جہانگیری محبت کی فراوانی
بتان رنگ و خوں کو توڑ کر ملت میں گم ہو جا
نہ تورانی رہے باقی نہ ایرانی نہ افغانی
میان شاخساراں صحبت مرغ چمن کب تک
ترے بازو میں ہے پرواز شاہین قہستانی
گماں آباد ہستی میں یقیں مرد مسلماں کا
بیاباں کی شب تاریک میں قندیل رہبانی
مٹایا قیصر و کسریٰ کے استبداد کو جس نے
وہ کیا تھا زور حیدر فقر بوذر صدق سلمانی
ہوئے احرار ملت جادہ پیما کس تجمل سے
تماشائی شگاف در سے ہیں صدیوں کے زندانی
ثبات زندگی ایمان محکم سے ہے دنیا میں
کہ المانی سے بھی پایندہ تر نکلا ہے تورانی
جب اس انگارۂ خاکی میں ہوتا ہے یقیں پیدا
تو کر لیتا ہے یہ بال و پر روح الامیں پیدا
غلامی میں نہ کام آتی ہیں شمشیریں نہ تدبیریں
جو ہو ذوق یقیں پیدا تو کٹ جاتی ہیں زنجیریں
کوئی اندازہ کر سکتا ہے اس کے زور بازو کا
نگاہ مرد مومن سے بدل جاتی ہیں تقدیریں
ولایت پادشاہی علم اشیا کی جہانگیری
یہ سب کیا ہیں فقط اک نکتۂ ایماں کی تفسیریں
براہیمی نظر پیدا مگر مشکل سے ہوتی ہے
ہوس چھپ چھپ کے سینوں میں بنا لیتی ہے تصویریں
تمیز بندہ و آقا فساد آدمیت ہے
حذر اے چیرہ دستاں سخت ہیں فطرت کی تعزیریں
حقیقت ایک ہے ہر شے کی خاکی ہو کہ نوری ہو
لہو خورشید کا ٹپکے اگر ذرے کا دل چیریں
یقیں محکم عمل پیہم محبت فاتح عالم
جہاد زندگانی میں ہیں یہ مردوں کی شمشیریں
چہ باید مرد را طبع بلندے مشرب نابے
دل گرمے نگاہ پاک بینے جان بیتابے
عقابی شان سے جھپٹے تھے جو بے بال و پر نکلے
ستارے شام کے خون شفق میں ڈوب کر نکلے
ہوئے مدفون دریا زیر دریا تیرنے والے
طمانچے موج کے کھاتے تھے جو بن کر گہر نکلے
غبار رہ گزر ہیں کیمیا پر ناز تھا جن کو
جبینیں خاک پر رکھتے تھے جو اکسیر گر نکلے
ہمارا نرم رو قاصد پیام زندگی لایا
خبر دیتی تھیں جن کو بجلیاں وہ بے خبر نکلے
حرم رسوا ہوا پیر حرم کی کم نگاہی سے
جوانان تتاری کس قدر صاحب نظر نکلے
زمیں سے نوریان آسماں پرواز کہتے تھے
یہ خاکی زندہ تر پایندہ تر تابندہ تر نکلے
جہاں میں اہل ایماں صورت خورشید جیتے ہیں
ادھر ڈوبے ادھر نکلے ادھر ڈوبے ادھر نکلے
یقیں افراد کا سرمایۂ تعمیر ملت ہے
یہی قوت ہے جو صورت گر تقدیر ملت ہے
تو راز کن فکاں ہے اپنی آنکھوں پر عیاں ہو جا
خودی کا رازداں ہو جا خدا کا ترجماں ہو جا
ہوس نے کر دیا ہے ٹکڑے ٹکڑے نوع انساں کو
اخوت کا بیاں ہو جا محبت کی زباں ہو جا
یہ ہندی وہ خراسانی یہ افغانی وہ تورانی
تو اے شرمندۂ ساحل اچھل کر بے کراں ہو جا
غبار آلودۂ رنگ و نسب ہیں بال و پر تیرے
تو اے مرغ حرم اڑنے سے پہلے پرفشاں ہو جا
خودی میں ڈوب جا غافل یہ سر زندگانی ہے
نکل کر حلقۂ شام و سحر سے جاوداں ہو جا
مصاف زندگی میں سیرت فولاد پیدا کر
شبستان محبت میں حریر و پرنیاں ہو جا
گزر جا بن کے سیل تند رو کوہ و بیاباں سے
گلستاں راہ میں آئے تو جوئے نغمہ خواں ہو جا
ترے علم و محبت کی نہیں ہے انتہا کوئی
نہیں ہے تجھ سے بڑھ کر ساز فطرت میں نوا کوئی
ابھی تک آدمی صید زبون شہریاری ہے
قیامت ہے کہ انساں نوع انساں کا شکاری ہے
نظر کو خیرہ کرتی ہے چمک تہذیب حاضر کی
یہ صناعی مگر جھوٹے نگوں کی ریزہ کاری ہے
وہ حکمت ناز تھا جس پر خرد مندان مغرب کو
ہوس کے پنجۂ خونیں میں تیغ کارزاری ہے
تدبر کی فسوں کاری سے محکم ہو نہیں سکتا
جہاں میں جس تمدن کی بنا سرمایہ داری ہے
عمل سے زندگی بنتی ہے جنت بھی جہنم بھی
یہ خاکی اپنی فطرت میں نہ نوری ہے نہ ناری ہے
خروش آموز بلبل ہو گرہ غنچے کی وا کر دے
کہ تو اس گلستاں کے واسطے باد بہاری ہے
پھر اٹھی ایشیا کے دل سے چنگاری محبت کی
زمیں جولاں گہہ اطلس قبایان تتاری ہے
بیا پیدا خریدا راست جان نا توانے را
پس از مدت گزار افتاد برما کاروانے را
بیا ساقی نوائے مرغ زار از شاخسار آمد
بہار آمد نگار آمد نگار آمد قرار آمد
کشید ابر بہاری خیمہ اندر وادی و صحرا
صدائے آبشاراں از فراز کوہسار آمد
سرت گردم توہم قانون پیشیں ساز دہ ساقی
کہ خیل نغمہ پردازاں قطار اندر قطار آمد
کنار از زاہداں برگیر و بیباکانہ ساغر کش
پس از مدت ازیں شاخ کہن بانگ ہزار آمد
بہ مشتاقاں حدیث خواجۂ بدرو حنین آور
تصرف ہائے پنہانش بچشم آشکار آمد
دگر شاخ خلیل از خون ما نمناک می گردد
ببازار محبت نقد ما کامل عیار آمد
سر خاک شہیرے برگ ہائے لالہ می پاشم
کہ خونش بانہال ملت ما سازگار آمد
بیا تا گل بفیشانیم و مے در ساغر اندازیم
فلک را سقف بشگافیم و طرح دیگر اندازیم

علامہ اقبال

نظم

دل خوشامد سے ہر اک شخص کا کیا راضی ہے
آدمی جن پری و بھوت بلا راضی ہے
بھائی فرزند بھی خوش باپ چچا راضی ہے
شاد مسرور غنی شاہ و گدا راضی ہے
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے
اپنا مطلب ہو تو مطلب کی خوشامد کیجے
اور نہ ہو کام تو اس ڈھب کی خوشامد کیجے
اولیا انبیا اور رب کی خوشامد کیجے
اپنے مقدور غرض سب کی خوشامد کیجے
جو خوشامد کرے خلق اس سے سدا راضی ہے
حق تو یہ ہے کی خوشامد سے خدا راضی ہے
چار دن جس کو کیا جھک کے خوشامد سے سلام
وہ بھی خوش ہو گیا اپنا بھی ہوا کام میں کام
بڑے عاقل بڑے دانا نے نکالا ہے یہ دام
خوب دیکھا تو خوشامد ہی کی آمد ہے تمام
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے
بد بخیل اور سخی کی بھی خوشامد کیجے
اور جو شیطان ہو تو اس کی بھی خوشامد کیجے
گر ولی ہو تو ولی کی بھی خوشامد کیجے
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے
پیار سے جوڑ دئیے جس کی طرف ہاتھ جو آہ
وہیں خوش ہو گیا کرتے ہی وہ ہاتھوں پہ نگاہ
غور سے ہم نے جو اس بات کو دیکھا واللہ
کچھ خوشامد ہی بڑی چیز ہے اللہ اللہ
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی
پینے اور پہننے کھانے کی خوشامد کیجے
ہیجڑے بھانڈ زنانے کی خوشامد کیجے
مست و ہشیار دوانے کی خوشامد کیجے
بھولے نادان سیانے کی خوشامد کیجے
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے
عیش کرتے ہیں وہی جن کا خوشامد کا مزاج
جو نہیں کرتے وہ رہتے ہیں ہمیشہ محتاج
ہاتھ آتا ہے خوشامد سے مکاں ملک اور تاج
کیا ہی تاثیر کی اس نسخے نے پائی ہے رواج
جو خوشامد کرے خلق اس سے سدا راضی ہے
حق تو یہ کہ خوشامد سے خدا راضی ہے
گر بھلا ہو تو بھلے کی بھی خوشامد کیجے
اور برا ہو تو برے کی بھی خوشامد کیجے
پاک ناپاک سڑے کی بھی خوشامد کیجے
کتے بلی و گدھے کی بھی خوشامد کیجے
جو خوشامد کرے خلق اس سے سدا راضی ہے
حق تو یہ کہ خوشامد سے خدا راضی ہے
خوب دیکھا تو خوشامد کی بڑی کھیتی ہے
غیر کی اپنے ہی گھر بیچ یہ سکھ دیتی ہے
ماں خوشامد کے سبب چھاتی لگا لیتی ہے
نانی دادی بھی خوشامد سے دعا دیتی ہے
جو خوشامد کرے خلق اس سے سدا راضی ہے
حق تو یہ کہ خوشامد سے خدا راضی ہے
بی بی کہتی ہے میاں آ ترے صدقے جاؤں
ساس بولے کہیں مت جا ترے صدقے جاؤں
خالہ کہتی ہے کہ کچھ کھا ترے صدقے جاؤں
سالی کہتی ہے کہ بھیا ترے صدقے جاؤں
جو خوشامد کرے خلق اس سے سدا راضی ہے
حق تو یہ کہ خوشامد سے خدا راضی ہے
آ پڑا ہے جو خوشامد سے سروکار اسے
ڈھونڈتے پھرتے ہیں الفت کے خریدار اسے
آشنا ملتے ہیں اور چاہے ہیں سب یار اسے
اپنے بیگانے غرض کرتے ہیں سب پیار اسے
جو خوشامد کرے خلق اس سے سدا راضی ہے
حق تو یہ کہ خوشامد سے خدا راضی ہے
روکھی اور روغنی آبی کو خوشامد کیجے
نان بائی و کبابی کی خوشامد کیجے
ساقی و جام شرابی کی خوشامد کیجے
پارسا رند خرابی کی خوشامد کیجے
جو خوشامد کرے خلق اس سے سدا اراضی ہے
حق تو یہ ہے کہ خوشامد سے خدا راضی ہے
جو کہ کرتے ہیں خوشامد وہ بڑے ہیں انساں
جو نہیں کرتے وہ رہتے ہیں ہمیشہ حیراں
ہاتھ آتے ہیں خوشامد سے ہزاروں ساماں
جس نے یہ بات نکالی ہے میں اس کے قرباں
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے
کوڑی پیسے و ٹکے زر کی خوشامد کیجے
لعل و نیلم در و گوہر کی خوشامد کیجے
اور جو پتھر ہو تو پتھر کی خوشامد کیجے
نیک و بد جتنے ہیں یک سر کی خوشامد کیجے
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے
ہم نے ہر دل کی خوشامد کی محبت دیکھی
پیار اخلاص و کرم مہر مروت دیکھی
دلبروں میں بھی خوشامد ہی کی الفت دیکھی
عاشقوں میں بھی خوشامد ہی کی چاہت دیکھی
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے
پارسا پیر ہے زاہد ہے منا جاتی ہے
جواریا چور دغاباز خراباتی ہے
ماہ سے ماہی تلک چیونٹی ہے یا ہاتھی ہے
یہ خوشامد تو میاں سب کے تئیں بھاتی ہے
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے
گر نہ میٹھی ہو تو کڑوی بھی خوشامد کیجے
کچھ نہ ہو پاس تو خالی بھی خوشامد کیجے
جانی دشمن ہو تو اس کی خوشامد کیجے
سچ اگر پوچھو تو جھوٹی بھی خوشامد کیجے
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے
مرد و زن طفل و جواں خورد و کلاں پیر و فقیر
جتنے عالم میں ہیں محتاج و گدا شاہ وزیر
سب کے دل ہوتے ہیں پھندے میں خوشامد کے اسیر
تو بھی واللہ بڑی بات یہ کہتا ہے نظیرؔ
جو خوشامد کرے خلق اس سے سدا راضی ہے
حق تو یہ ہے کہ خوشامد سے خدا راضی ہے

نظیر اکبرآبادی

نظم

ہم محبت کے نہاں خانوں میں بسنے والے
اپنی پامالی کے افسانوں پہ ہنسنے والے
ہم سمجھتے ہیں نشان سر منزل پایا
ہم محبت کے کے خرابوں کے مکیں
کنج ماضی میں ہیں باراں زدہ طائر کی طرح آسودہ
اور کبھی فتنۂ ناگاہ سے ڈر کر چونکیں
تو رہیں سد نگاہ نیند کے بھاری پردے

ن م راشد

نظم

اے فلسفہ گو،
کہاں وہ رویائے آسمانی؟
کہاں یہ نمرود کی خدائی!
تو جال بنتا رہا ہے، جن کے شکستہ تاروں سے اپنے موہوم فلسفے کے
ہم اس یقیں سے' ہم اس عمل سے' ہم اس محبت سے'
آج مایوس ہو چکے ہیں!
کوئی یہ کس سے کہے کہ آخر
گواہ کس عدل بے بہا کے تھے عہد تاتار کے خرابے؟
عجم، وہ مرز طلسم و رنگ و خیال و نغمہ
عرب، وہ اقلیم شیر و شہد و شراب و خرما
فقط نواسنج تھے در و بام کے زیاں کے،
جو ان پہ گزری تھی
اس سے بد تر دنوں کے ہم صید ناتواں ہیں!
کوئی یہ کس سے کہے:
در و بام،
آہن و چوب و سنگ و سیماں کے
حسن پیوند کا فسوں تھے
بکھر گیا وہ فسوں تو کیا غم؟
اور ایسے پیوند سے امید وفا کسے تھی!

ن م راشد

نظم

جنہیں زیر کر نہ سکا ستم ہوئے صید سلسلۂ کرم
تری نیکیوں نے تری قسم سر خود سری کو جھکا دیا

اقبال سہیل

نظم

شاہد بزم سخن ناظورۂ معنی طراز
اے خدائے ریختہ پیغمبر سوز و گداز
یوسف ملک معانی پیر کنعان سخن
ہے تری ہر بیت اہل درد کو بیت الحزن
اے شہید جلوۂ معنی فقیر بے نیاز
اس طرح کس نے کہی ہے داستان سوز و ساز
ہے ادب اردو کا نازاں جس پہ وہ ہے تیری ذات
سر زمین شعر پر اے چشمۂ آب حیات
تفتہ دل آشفتہ سر آتش نوا بے خویشتن
آہ تیری سینہ سوز اور نالہ تیرا دل شکن
ختم تجھ پر ہو گیا لطف بیان عاشقی
مرحبا اے واقف راز نہان عاشقی
سر زمین شعر کعبہ اور تو اس کا خلیل
شاخ طوبائے سخن پر ہمنوائے جبرئیل
جوش استغنا ترا تیرے لیے وجہ نشاط
شان خودداری تری آئینہ دار احتیاط
بزم سے گزرا کمال فقر دکھلاتا ہوا
تاج شاہی پائے استغنا سے ٹھکراتا ہوا
تھا دماغ و دل میں صہبائے قناعت کا سرور
تھی جواب سطوت شاہی تری طبع غیور
موجۂ بحر قناعت تیری ابرو کی شکن
تخت شاہی پر حصیر فقر تیرا خندہ زن
تھا یہ جوہر تیری فطری شاعری کے رتبہ داں
عزت فن تھی تری نازک مزاجی میں نہاں
ملتفت کرتا تجھے کیا اغنیا کا کر و فر
تھا تری رگ رگ میں درویشوں کی صحبت کا اثر
دل ترا زخموں سے بزم عاشقی میں چور ہے
جس سخن کو دیکھیے رستا ہوا ناسور ہے
بزم گاہ حسن میں اک پرتو فیض جمال
صید گاہ عشق میں ہے ایک صید خستہ حال
دیکھنا ہو گر تجھے دیکھے ترے افکار میں
ہے تری تصویر تیرے خونچکاں اشعار میں
سیر کے قابل ہے دل صد پارہ اس نخچیر کا
جس کے ہر ٹکڑے میں ہو پیوست پیکاں تیر کا
آسمان شعر پر چمکے ہیں سیارے بہت
اپنی اپنی روشنی دکھلا گئے تارے بہت
عہد گل ہے اور وہی رنگینیٔ گل زار ہے
خاک ہند اب تک اگر دیکھو تجلی زار ہے
اور بھی ہیں معرکے میں شہسوار یکہ تاز
اور بھی ہیں میکدے میں ساقیان دل نواز
ہیں تو پیمانے وہی لیکن وہ مے ملتی نہیں
نغمہ سنجوں میں کسی سے تیری لے ملتی نہیں
صاحبان ذوق کے سینوں میں تھی جس کی کھٹک
تیرتے ہیں دل میں وہ سر تیز نشتر آج تک
کاروان رفتہ کو تھا تیری یکتائی پہ ناز
عصر موجودہ نے بھی مانا ہے تیرا امتیاز
ہو گئے ہیں آج تجھ کو ایک سو بائیس سال
تو نہیں زندہ ہے دنیا میں مگر تیرا کمال
حق ہے ہم پر یاد کر کے تجھ کو رونا چاہئے
ماتم اپنی نا شناسی کا بھی ہونا چاہئے
ڈھونڈتے ہیں قبر کا بھی اب نشاں ملتا نہیں
اے زمیں تجھ میں ہمارا آسماں ملتا نہیں

مرزا محمد ہادی عزیز لکھنوی

نظم

الغرض اک نہ اک غم گل و خار
فلسفے کا خمار عشق کا بار
دل کو اک صبح و شام کا آزار
حسرت صلح و حسرت پیکار
صید ابلیس و کشتۂ یزداں

مصطفی زیدی

نظم

اے یار غیاب مجید امجدؔ
خاموش شکار رشک و حسد
بے تشہیری کے صید زبوں
کب جھنگ میں آ کر تجھ سے کہوں
لے وہ سچ واپس آیا ہے
جو جس کا حق ہو ایک نہ ایک دن اس نے پورا پایا ہے

جمیل الدین عالی

نظم

میں زندہ تھا
مگر میں تیرے سرخ نیلگوں سفید بلبلے میں قید تھا
ہوا وسیع تھی مگر حدود سے رہا نہ تھی
نہ میرے پر شکستہ تھے نہ میری سانس کم
تھا بلبلے کی کائنات میں مرا ہی دم قدم
مگر مری اڑان سرخ نیلگوں سفید مقبرے کے
آخری خطوط سے سوا نہ تھی
میں حال کے اتھاہ پانیوں میں غرق
یا گذشتہ وقت کے بھنور کے دست آتشیں میں ایک صید زرد تھا

شمس الرحمن فاروقی

نظم

خوش ہیں ایسے لوگ دنیا میں جو خوش خوراک ہیں
اور ان لوگوں کے دسترخوان ہیبت ناک ہیں
ان کے دسترخوان پہ خوشبو مثالی چائے کی
چار انڈے چھ سلائس دس پیالی چائے کی
ہو گئے جب چائے کی لذت سے دل برداشتہ
کھا لیے آدھا کلو انگور بعد از ناشتہ
جب کہیں موقع ملا تھوڑا سا بسکٹ کھا لیا
نوش جاں فرما لیا پھر پان سگریٹ چھالیا
دوپہر میں چھ چپاتی چار انڈے آملیٹ
چار چھ شامی کباب اور اک نہاری کے پلیٹ
کوفتے حسب لیاقت ایک لسی کا گلاس
کھا گئے اور پی گئے موصوف بے خوف و ہراس
دعوتوں کے جال پھیلائے ہوئے ہیں ہر طرف
کہہ دیا کھانے سے پہلے ہی تکلف بر طرف
رات کو تھوڑی سی جیلی کچھ مربہ آم کا
کچھ پپیتا لے لیا پھر ہاضمے کے نام کا
دو پراٹھے لے لئے کچھ دیر سستانے کے بعد
''اک ترے آنے سے پہلے اک ترے جانے کے بعد''

خالد عرفان

نظم

ہاں اے مصاف ہستی! مت پوچھ مجھ سے کیا ہوں
اک عرصۂ بلا ہوں اک لقمۂ فنا ہوں
مجبوریوں نے ڈالا گردن میں میری پھندا
خود کردۂ وفا ہوں جاں دادۂ رضا ہوں
صیاد حادثے کا کرتا ہے میرا پیچھا
مرغ بریدہ پر ہوں صید شکستہ پا ہوں
ہے ذات میری مجمع ساری برائیوں کا
کہنے کو میں بڑا ہوں لیکن بہت برا ہوں
آزادیوں کی مجھ پر تہمت ہی ہے سراسر
میں قیدیٔ ہوس ہوں میں بندۂ ہوا ہوں
اک بات ہو بتاؤں اک درد ہو سناؤں
روؤں بھلا کہاں تک کب تک پڑا کراہوں
کم بخت دل کچھ ایسا میں ساتھ لے کے آیا
اک لمحہ جس کے ہاتھوں دنیا میں سکھ نہ پایا
جو جوش اس میں اٹھا حالات نے دبایا
جو شعلہ اس میں بھڑکا تقدیر نے بجھایا
امید کا یہ غنچہ کھلتے کبھی نہ دیکھا
یہ آرزو کا پودا پھلتا نظر نہ آیا
گو اس میں موجزن تھی قوم و وطن کی الفت
لیکن غرض نے اس کو کچھ اور ہی سکھایا
ہوتی نہیں رسائی امید کے افق تک
طول امل نے اس کو اک جال میں پھنسایا
کی رہبری خرد نے ہر چند رہنمائی
اس جہد پر بھی لیکن کھلتی نہیں سچائی
پایا نہ میں نے اب تک مقصد کا اپنے ساحل
کی بحر معرفت میں دن رات آشنائی
اس جستجو میں میں نے کی سیر طور و ایمن
پربت کو گھر بنایا جنگل سے لو لگائی
مندر کو جا کے دیکھا گرجا میں جا کے ڈھونڈا
مسجد کو چھان مارا اس کی نہ دید پائی
جوگی کا روپ دھارا بن میں کیا گزارا
تن پر بھبھوت مل کر دھونی بہت رمائی
جپ تپ میں عمر اپنی میں نے بسر کی اکثر
بن بن کے پیر راہب جا خانقاہ بسائی
صوفی بھی بن کے دیکھا اور رند بے ریا بھی
کر نعرۂ انا الحق اک کھلبلی مچائی
پھرتی ہیں ماری ماری مشتاق جلوہ آنکھیں
پر اک جھلک سے بڑھ کر دیتا نہیں دکھائی
اٹھ جا نظر سے میری ہاں اے حجاب ہستی
حسن ازل نہاں ہے زیر نقاب ہستی
یہ زندگیٔ انساں اک خواب ہے پریشاں
بیدارئ عدم ہے تعبیر خواب ہستی
دیکھیں اگر تو کیوں کر ہم جلوۂ معارف
تو ظلمت نظر ہے اے آفتاب ہستی
تسکیں کو زہر قاتل آب و ہوائے عالم
راحت کا دشمن جاں ہر انقلاب ہستی
اے تشنۂ حقیقت دھوکے میں تو نہ آنا
اک دام پر خطر ہے موج سراب ہستی
چاہے اگر رہائی پیش از فنا فنا ہو
پاداش جرم ہستی ہے یہ عذاب ہستی

غلام بھیک نیرنگ

نظم

تجھ کو بھی کچھ خبر ہے دنیا بنانے والے
یہ کارگاہ ہستی بازار اوج و پستی
لے دیکھ ہو رہی ہے بے چینیوں کی بستی
تجھ کو بھی کچھ خبر ہے دنیا بنانے والے
2
پھولوں کے چاک داماں غنچوں میں سوز پنہاں
گلشن بہار میں بھی بے کیف و درد ساماں
سوز دروں نہیں ہے جوش جنوں نہیں ہے
دل ہی سے عاشقی تھی دل ہی میں خوں نہیں ہے
پیمانے اٹھ گئے ہیں میخانے اٹھ گئے ہیں
ویرانیاں سلامت دیوانے اٹھ گئے ہیں
تجھ کو بھی کچھ خبر ہے دنیا بنانے والے
3
معمور غم ہے دنیا دار الم ہے دنیا
دام تونگری میں صید ستم ہے دنیا
آرے سے چل رہے ہیں نقشے بدل رہے ہیں
انساں کا خون پی کر انسان پل رہے ہیں
مفقود خرمی ہے ہر بزم ماتمی ہے
اس غم کدے کی ہر شے گویا جہنمی ہے
تجھ کو بھی کچھ خبر ہے دنیا بنانے والے
4
اے کار ساز عالم اے بے نیاز عالم
معمور سوز غم ہے کب سے یہ ساز عالم
مایوس ہو چکے ہیں ہمت ہی کھو چکے ہیں
انساں بھلائیوں کی قسمت کو رو چکے ہیں
برباد ہو رہے ہیں ناشاد ہو رہے ہیں
بندے ترے سراپا فریاد ہو رہے ہیں
تجھ کو بھی کچھ خبر ہے دنیا بنانے والے
5
حیوان بھی نہیں ہیں انسان بھی نہیں ہیں
انساں نما درندے شیطان بھی نہیں ہیں
یہ زہد کی دکانیں یہ معصیت کی کانیں
یہ واعظوں کے منہ میں چلتی ہوئی زبانیں
فرعون ہو رہے ہیں ملعون ہو رہے ہیں
مذہب فروش ملا قارون ہو رہے ہیں
تجھ کو بھی کچھ خبر ہے دنیا بنانے والے
6
اے بے نیاز ہستی اے کار ساز ہستی
کب تک رہے گا یوں ہی پوشیدہ راز ہستی
کوئی نہیں ہمارا کوئی نہیں سہارا
کس سمت بہہ رہی ہے یہ زندگی کی دھارا
فکر دوا نہیں ہے ذکر دعا نہیں ہے
دل کہہ رہا ہے اب تو کوئی خدا نہیں ہے
تجھ کو بھی کچھ خبر ہے تجھ کو بھی کچھ خبر ہے

قیصر امراوتوی

نظم

تھمی ہوئی ہے دیر سے بارش
دیر سے اک کاغذ کی کشتی
تیر رہی ہے پانی میں
کشتی جس کاغذ سے بنی ہے
اس پر کوئی پھول بنا ہے
پھول جو اس دنیا کا نہیں ہے
دو چینٹے کشتی کے مسافر بنے ہوئے ہیں
ڈگ مگ ڈگ مگ
ڈگ مگ ڈگ مگ
کاغذ اب گلنے بھی لگا ہے
کشتی سائیڈ اسٹینڈ والی اک سائیکل جیسے
ایک طرف کو جھکی ہوئی ہے
ایک بھی جھونکا
اس کشتی پر ایک قیامت لا سکتا ہے

سوپنل تیواری

نظم

لب جوئے مے خامشی
اور صید فغاں کوئی حرف تکلم
کہیں رہ گزر پر مرے چشم و لب
اور آواز سے روشنی کی کشاکش
بہت فاصلہ ہے مرے اور میرے تصور کے ساحل میں
اس سے پرے اک جہان دگر ہے

بلراج کومل

نظم

اندھیرا ہر طرف چھایا ہوا ہے
اندھیرا ہی ازل ہے اور اندھیرا ہی ابد کی جوت ہے شاید
اسی تاریک چادر کی تہوں میں
عدم کے خواب سے تاریخ جاگی
اسی تاریک چادر میں تمدن مسکرایا کھلکھلایا جگمگایا
یہی تاریک چادر خاور تہذیب کا مشرق بنی آخر
یہی تاریک چادر اوڑھ کر حیوانیت نے روپ دھارن کر لئے لاکھوں
اسی تاریک چادر میں سمٹ کر گم ہوئی ہستی
یہی مشرق یہی مغرب
اندھیرا ہی ازل ہے اور اندھیرا ہی ابد کی جوت ہے شاید
اندھیرے کی اسی دیوار چیں کو
کبھی سقراطؔ کی حکمت نے ڈھایا
کبھی عیسیٰ کے خون گرم و تازہ نے کیا رنگیں
کبھی گوتم کی موسیقی کے سایوں نے اسے گھیرا
کبھی ضرب محمد نے کیا ٹکڑے
حسین ابن علی کے خون ناحق کے تھپیڑوں سے کبھی کانپی کبھی لرزی
فضا میں ایک چنگاری سی تڑپی
اور اس کے بعد اس کے بعد
چھائی پھر وہی منحوس تاریکی وہی منحوس تاریکی
اندھیرا ہی ازل ہے اور اندھیرا ہی ابد کی جوت ہے شاید
اندھیرے کی جبین آہنی سے
یہ کیسی جوت پھوٹی مسکرائی جگمگائی
یہ کس کی مسکراہٹ سے بنی انسانیت گلشن
یہ کس نے ہند کی تاریک دنیا کو کیا روشن
دکھی دنیا ستاروں سے بنی دلہن
ضمیر زندگی میں کروٹیں لینے لگی اک مستقل دھڑکن
ورق تاریخ نے تیزی سے الٹے
تغیر لے کے ساز و برگ تعمیر جہاں آیا
بنی آدم کی دنیا کو سجانے
دل سقراط و عیسیٰ جھوم اٹھے
جبین بدھ سے نکلی اک نئی جوت
اندھیرے ہی سے پھوٹا اک نیا سوت
اندھیرا اپنی ہستی کھو رہا ہے
اندھیرا نور میں حل ہو رہا ہے
نئے دیپک کی جوتی مسکرائی
جہاں کو کر دیا روشن
جہاں کو مانوتا کو زندگی کو قلب و جاں کو کر دیا روشن
سیہ خانے میں اپنا جال لے آئے نئے خاکے
نئی دنیا بنانے کی تمنا کے نئے خاکے
کہ پھر ظالم اندھیرا جنگجو حاسد اندھیرا
لئے تاریکیوں کے جال آیا
نگار امن کے دیپک پہ ٹوٹا
کبھی کرنوں کبھی دیپک کو لوٹا
زمیں سے آسماں تک موج خوں ہے
ابھی تک آدمی صید زبوں ہے
اندھیرا ہی ازل ہے اور اندھیرا ہی ابد کی جوت ہے شاید
اگر سقراط کا دیپک ہے روشن
سراج ابن مریم گر ابد تک بجھ نہیں سکتا
کوئی جھونکا اگر شمع شہید کربلا کو چھو نہیں سکتا
تو اے تاریک دنیا تو اے مایوس انساں
بجھا سکتی نہیں ہے کوئی آندھی
یوں ہی روشن رہے گی شمع گاندھی

ذکیہ سلطانہ نیر

نظم

دھوپ کی سرگوشی سے
زمین کی بھربھری مٹی مرتعش ہوئی
سفیدی سرخی میں ڈھلی
یا پھر زرخیزی بنجر ہوئی
حیرت تذبذب کا شکار ہے
تھکن زندگی سے بڑھ رہی ہے
اکھڑتی سانسوں کی
الوداعی مہک سے
کمرہ اداس ہے
سائیڈ ٹیبل پہ دھرے پین
اور ڈایری
منتظر ہیں
شاید
کہ آخری شام ان پہ درج کی جائے
پلکوں کے پیچھے
چھپی آنکھوں کے خواب نیلے ہو چکے ہیں
انتظار کی آخری کروٹ سے سنجیدہ سی ہنسی کی آمیزش
لہو رنگ
آنسوؤں میں گھل کر سو گئی ہے
دھوپ کا ذائقہ حفظ کرنا آسان نہیں ہوتا

عمین الزہراء سید

نظم

پامال فقر و ذلت ہیں عز و شان والے
صید غم و الم ہیں تیر و کمان والے
بے نام و بے نشاں ہیں نام و نشان والے
بے تاب و بے توان ہیں تاب و توان والے
اب ان پہ رحم فرما او آسمان والے
ہیں سخت مشکلوں میں ہندوستان والے

احمق پھپھوندوی

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے