Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ".bate"

Nazm MATCHES FOR ".bate"

Nazm

aurat aur namak

izzat kii bahut sii qisme.n hai.n
ghuu.nghaT thappa.D gandum
izzat ke taabuut me.n qaid kii meKHe.n Tho.nkii ga.ii hai.n
ghar se le kar footpath tak hamaaraa nahii.n
izzat hamaare guzaare kii baat hai
izzat ke neze se hame.n daaGaa jaataa hai
izzat kii kanii hamaarii zabaan se shuruu.a hotii hai
ko.ii raat hamaaraa namak chakh le
to ek zindagii hame.n be-zaa.iqa roTii kahaa jaataa hai
ye kaisaa baazaar hai
ki ra.ng-saaz hii phiikaa pa.Daa hai
KHalaa kii hathelii pe pata.nge.n mar rahii hai.n
mai.n qaid me.n bachche jantii huu.n
jaa.ez aulaad ke liye zamiin khilanDarii honii chaahiye
tum Dar me.n bachche jantii ho isii liye aaj tumhaarii ko.ii nasl nahii.n
tum jism ke ek band se pukaarii jaatii ho
tumhaarii haisiyat me.n to chaal rakh dii ga.ii hai
ek KHuubsuurat chaal
chhoTii muskuraahaT tumhaare labo.n pe taraash dii ga.ii hai
tum sadiyo.n se nahii.n ro.ii.n
kyaa maa.n aisii hotii hai
tumhaare bachche phiike kyo.n pa.De hai.n

Sara Shagufta
Nazm

mere pyare watan

mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan
gul-posh terii vaadiyaa.n
farhat-nishaa.n raahat-rasaa.n
tere chaman-zaaro.n pe hai
gulzaar-e-jannat kaa gumaa.n
har shaaKH phuulo.n kii chha.Dii
har naKHl-e-tuubaa hai yahaa.n
kausar ke chashme jaa-ba-jaa
tasniim har aab-e-ravaa.n
har barg ruuh-e-taazgii
har phuul jaan-e-gulsitaa.n
har baaG baaG-e-dil-kashii
har baaG baaG-e-be-KHizaa.n
dilkash charaagaahe.n tirii
Dhoro.n ke jin me.n kaarvaa.n
anjum-sifat gulhaa-e-nau
har taKHta-e-gul aasmaa.n
naqsh-e-surayyaa jaa-ba-jaa
har har ravish ik kahkashaa.n
terii bahaare.n daa.imii
terii bahaare.n jaavedaa.n
tujh me.n hai ruuh-e-zindagii
paiham ravaa.n paiham davaa.n
dariyaa vo tere tund-KHuu
jhiile.n vo terii be-karaa.n
shaam-e-avadh ke lab pe hai
husn-e-azal kii daastaa.n
kahtii hai raaz-e-sarmadii
sub.h-e-banaras kii zabaa.n
u.Dtaa hai haft-aflaak par
un kaar-KHaano.n kaa dhu.aa.n
jin me.n hai.n laakho.n mehnatii
san.at-garii ke paasbaa.n
terii banaras kii zarii
rashk-e-hariir-o-parniyaa.n
biidar kii fankaarii me.n hai.n
san.at kii sab baariikiyaa.n
azmat tire iqbaal kii
tere pahaa.Do.n se ayaa.n
dariyaa.o.n kaa paanii, tarii
taqdiis kaa andaaza-daa.n
kyaa 'bhaarte.ndu' ne kiyaa
ga.ngaa kii lahro.n kaa bayaa.n
'iqbaal' aur chakbast hai.n
azmat ke terii naGma-KHvaa.n
'josh' o 'firaaq' o 'pant' hai.n
tere adab ke tarjumaa.n
'tulsii' o 'KHusrav' hai.n terii
taariif me.n ratb-ul-lisaa.n
gaate hai.n naGma mil ke sab
uu.nchaa rahe teraa nishaa.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tere nazaaro.n ke nagii.n
duniyaa kii KHaatam me.n nahii.n
saare jahaa.n me.n muntaKHab
kashmiir kii arz-e-hasii.n
fitrat kaa ra.ngii.n mo.ajaza
firdaus bar-ruu-e-zamii.n
firdaus bar-ruu-e-zamii.n
haa.n haa.n hamii.n ast o hamii.n
sarsabz jis ke dasht hai.n
jis ke jabal hai.n surmagii.n
meve ba-kasrat hai.n jahaa.n
shiirii.n misaal-e-a.ngbii.n
har za.afaraa.n ke phuul me.n
aks-e-jamaal-e-huura.ii.n
vo maalve kii chaa.ndnii
gum jis me.n ho.n duniyaa-o-dii.n
is KHitta-e-naira.ng me.n
har ik fazaa husn-aafrii.n
har shai me.n husn-e-zindagii
dilkash makaa.n dilkash zamii.n
har mard mard-e-KHuub-ruu
har ek aurat naaznii.n
vo taaj kii KHush-paikarii
har zaaviye se dil-nashii.n
san.at-garo.n ke daur kii
ik yaadgaar-e-marmarii.n
hotii hai jo har shaam ko
faiz-e-shafaq se ahmarii.n
dariyaa kii maujo.n se alag
yaa ik bat-e-nazzaara-bii.n
yaa taa.er-e-nuurii ko.ii
parvaaz karne ke qarii.n
yaa ahl-e-duniyaa se alag
ik aabid-e-uzlat-guzii.n
naqsh-e-ajantaa kii qasam
jachtaa nahii.n arzha.ng-e-chii۔n
shaan-e-ellora dekh kar
jhuktii hai aazar kii jabii.n
chittau.D ho yaa aagara
aise nahii.n qil.e kahii.n
but-gar ho yaa naqqaash ho
tuu sab kii azmat kaa amii.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
dilkash tire dasht o chaman
ra.ngii.n tire shahr o chaman
tere javaa.n raa.anaa javaa.n
tere hasii.n gul pairahan
ik anjuman duniyaa hai ye
tuu is me.n sadr-e-anjuman
tere muGannii KHush-navaa
shaa.er tire shiirii.n-suKHan
har zarra ik maah-e-mubii.n
har KHaar rashk-e-nastarii.n
Guncha tire sahraa kaa hai
ik naafa-e-mushk-e-KHutan
ka.nkar hai.n tere be-bahaa
patthar tire laal-e-yaman
bastii se jangal KHuub-tar
baaGo.n se husn afroz ban
vo mor vo kabk-e-darii
vo chauk.Dii bharte hiran
ra.ngii.n-adaa vo titliyaa.n
baa.nbnii me.n vo naago.n ke phan
vo sher jin ke naam se
larze me.n aa.e ahrman
kheto.n kii barkat se ayaa.n
faizaan-e-rabb-e-zul-minan
chashmo.n ke shiirii.n aab se
lazzat-kashaa.n kaam-o-dahan
taabinda teraa ahd-e-nau
raushan tiraa ahd-e-kuhan
kitno.n ne tujh par kar diyaa
qurbaan apnaa maal dhan
kitne shahiido.n ko mile
tere liye daar-o-rasan
kitno.n ko teraa ishq thaa
kitno.n ko thii terii lagan
tere jafaa-kash mehnatii
rakhte hai.n azm-e-kohkan
tere sipaahii suurmaa
be-misl yaktaa-e-zaman
'bhisham' saa jin me.n hausla
'arjun' saa jin me.n baa.nkpan
aalim jo faKHr-e-ilm hai.n
fankaar naazaa.n jin pe fan
'raa.e' o 'bos' o 'shergil'
'dinkar,' 'jigar' 'maithli-sharan'
'vallathol' 'maahir', bhaartii
'bachchan', 'mahaadevii' 'suman'
'krishnan', 'niraalaa', 'prem-chand'
'tagore' o 'aazaad' o 'raman'
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
khetii tirii har ik harii
dilkash tirii KHush-manzarii
terii bisaat-e-KHaak ke
zarre hai.n mahr-o-mushtarii
jhelum kaveri naag vo
ga.ngaa kii vo ga.ngotarii
vo narbadaa kii tamkanat
vo shaukat-e-godaavarii
paakiizgii sarjuu kii vo
jamunaa kii vo KHush-gauharii
dullarba aab-e-niil-guu.n
kashmiir kii niilam-parii
dilkash papiihe kii sadaa
koyal kii taane.n mad-bharii
tiitar kaa vo haq sirrahu
tuutii kaa vo vird-e-harii
suufii tire har daur me.n
karte rahe paiGambarii
'chishtii' o 'nanak' se milii
faqr-o-Ginaa ko bartarii
adl-e-jahaa.ngiirii me.n thii
muzmar re.aayaa-parvarii
vo nau-ratan jin se hu.ii
tahziib-e-daur-e-akbarii
rakhte the afGaan-o-muGal
ik saulat-e-askandarii
raanaa.on ke iqbaal kii
hotii hai kis se ham-sarii
saava.nt vo yodhdhaa tire
tere jiyaale vo jarii
niiatii vidur kii aaj tak
kartii hai terii rahbarii
ab tak hai mash.huur-e-zamaa.n
'chanakya' kii daanish-varii
vayaas aur vishvamitr se
muniyo.n kii shaan-e-qaisarii
paatanjalii o saa.nkh se
rishiyo.n kii hikmat-parvarii
baKHshe tujhe in.aam-e-nau
har daur charKH-e-chambarii
KHush-gauharii de aab ko
aur KHaak ko KHush-jauharii
zarro.n ko mahr-afshaaniyaa.n
qatro.n ko dariyaa-gustarii
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tuu rahbar-e-nau-e-bashar
tuu amn kaa paiGaam-bar
paale hai.n tuu ne god me.n
saahib-KHirad saahib-e-nazar
afzal-tarii.n in sab me.n hai
baapuu kaa naam-e-mo'tabar
har lafz jis kaa dil-nashii.n
har baat jis kii pur-asar
jis ne lagaayaa dahr me.n
na.ara ye be-KHauf-o-KHatar
be-kaar hai.n tiir-o-sinaa.n
be-suud hai.n teG-o-tabar
hinsaa kaa rasta jhuuT hai
haq hai ahinsaa kii Dagar
darmaa.n hai ye har dard kaa
ye har maraz kaa chaara-gar
ja.ngaah-e-aalam me.n ko.ii
is se nahii.n behtar sipar
kartaa huu.n mai.n tere liye
ab ye du.aa-e-muKHtasar
raunaq pe ho.n tere chaman
sarsabz ho.n tere shajar
naKHl-e-umiid-e-behtarii
har fasl me.n ho baarvar
koshish ho duniyaa me.n ko.ii
KHitta na ho zer-o-zabar
teraa har ik baasii rahe
neko-sifat neko-siyar
har zan saliiqa-ma.nd ho
har mard ho saahib-hunar
jab tak hai.n ye arz o falak
jab tak hai.n ye shams o qamar
mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan

Arsh Malsiyani
Nazm

taj-mahal

yaa ko.ii bat-e-mast hai jo tair chukii hai
aa kar abhii dariyaa ke kinaare pe rukii hai

Mahshar Badayuni
Nazm

subh

sub.h hone lagii hai
magar apne bistar me.n vo be-KHabar ab bhii be-sudh pa.Dii hai
use kyaa KHabar hai
ki do laakh saalo.n se chaltii hu.ii
andromeda ke kuchh suurajo.n kii shu.aa.e.n
zamii.n par pahu.nch kar hamaarii shu.aa.o.n me.n shaamil hu.ii hai.n
to is sub.h kaa chehra raushan hu.aa hai
ye do laakh saalo.n kaa lambaa safar
jis me.n ham sapiens
jangalo.n ke a.ndhero.n me.n ba.Dhte hu.e
apne cousino.n kii qismat ke rab ban ga.e
un se itnaa la.De
un kii naapaidgii kaa sabab ban ga.e
itne saalo.n me.n ham
Gaar se jho.np.Dii jho.np.Dii se qabiilo.n kii suurat baTe
aur qabiilo.n se shahro.n me.n Dhalne lage hai.n
ye do laakh saalo.n se niklii hu.ii raushnii apne suuraj me.n aa kar milii hai
to duniyaa kii ain us jagah par jahaa.n is kaa ghar hai
vahaa.n
sub.h ban.ne lagii hai
zamii.n par kisii din kii pahlii gha.Dii hai
zamii.n ghuum kar apne baabaa kii jaanib mu.Dii hai
magar apne bistar me.n vo be-KHabar ab bhii be-sudh pa.Dii hai

Sohaib Mugheera Siddiqi
Nazm

ai hijr-zada shab

ai hijr-zada shab
aa tuu hii mire siine se lag jaa ki bate Gam
ehsaas ko tanhaa.ii kii manzil se mile rah
aavaaz kii gumnaam zamiino.n ko mile nam
aa kuchh to ghaTe Gam
is saa.at-e-mahjuur kii fariyaad ho maddham
kyuu.n nauha-ba-lb phirtii hai mahruum-e-muKHaatab
ai hijr-zada shab

Amjad Islam Amjad
Nazm

be-rozgar

to
aur ik baar
phir
meraa
selection
ho nahii.n paayaa
merii
har ek
naakaamii pe
rassii muskuraatii hai
KHushii se
ai.nTHtii hai
aur
na.e bal pa.Dte jaate hai.n
mujhe apnaa galaa ghuTtaa hu.aa mahsuus hotaa hai
mai.n
apnii
chhat se
jab
niiche galii me.n
jhaa.nktaa huu.n
to
ye lagtaa hai
sa.Dak mujh ko
uchhal kar
khii.nch le jaa.egii
apne sa.ng
Daraa detaa hai ye ehsaas
aur
mujh ko pasiine se lahuu kii gandh aatii hai
agar
mai.n duur se bhii
rail kii
aavaaz suntaa huu.n
to
ko.ii
ajnabii
haibat mujhe jhakjhor detii hai
aziyyat
KHuun ke
katro.n me.n
yuu.n karvaT badaltii hai
ki mai.n Tuk.Do.n me.n baTte ruuh ko mahsuus kartaa huu.n
mere kamre kaa
cieling-fan
ha.nstaa hai
merii jaanib
lapaktaa hai
mai.n Dar se
kaa.np jaataa huu.n
simaT kar
baiTh jaataa huu.n
kisii kone me.n kamre ke
yuu.n lagtaa hai
ka.ii sadiyo.n kaa lambaa faasla tai kar ke mai.n ne sub.h paa.ii hai
magar
mai.n sochtaa huu.n
kab talak aaKHir
mai.n
apne aap ko
KHud se bachaa.u.ngaa
mahz
ik aur naakaamii
mai.n ab ke TuuT jaa.uu.ngaa
badan se chhuuT jaa.uu.ngaa

Siraj Faisal Khan
Nazm

chaar baTe das

twinkle twinkle little star
ham se hai ammii ko pyaar
ammii paas bulaatii hai.n
laDDuu kam jab pa.Dte hai.n
sab kaa jii bahlaatii hai.n
aapas me.n ham la.Dte hai.n

Qateel Shifai
Nazm

watan

mirii jaan ho ki miraa badan
tiraa jalva-gaah hai ai vatan
tirii KHaak un kaa KHamiir hai
mire KHuun me.n ye jhalak tirii
mirii nabz me.n ye chipak tirii
mirii saa.ns tirii safiir hai
tirii KHaak jag kaa KHulaasa hai
teraa husn ek tamaashaa hai
tirii phailii god ki baaG hai
tirii KHaak-e-paak zaliil hai
to Gulaamiyo.n kii daliil hai
tirii paud sharm kaa daaG hai
tujhe maa-sivaa se giraa diyaa
hame.n maa-sivaa ne miTaa diyaa
hu.e tafraqo.n se tamaam ham
tujhe jab talak ki bhulaa rakhaa
hame.n vaqt ne bhii miTaa rakhaa
bane ghar me.n apne Gulaam ham
tire KHuun hai.n ye phaTe phaTe
tire puut hai.n ye baTe baTe
tire dil jigar hai.n ye be-vafaa
tiraa kuchh lahuu hii safed hai
ki ajab tarah kaa ye bhed hai
nahii.n bhaa.ii bhaa.ii se aashnaa
nahii.n Gair kaa hame.n kuchh gilaa
ki Gulaamiyo.n kaa ye phal milaa
hame.n tafarqe ke junuun se
tire duudh me.n mirii pyaarii maa.n
nahii.n dard kii ko.ii bijliyaa.n
ki milaa de KHuun ko KHuun se
hame.n bhaa.iyo.n se Guruur hai.n
tire jahl-o-vahm me.n chuur hai.n
ki jo kaam hai.n so KHataa ke hai.n
kahii.n zaat-paat kii laag hai
kahii.n diin-dharm kii aag hai
kahii.n bair muft KHudaa ke hai.n
jinhe.n piit hai unhe.n jiit hai
yahii jag me.n jiit kii riit hai
tire puut apno.n se Gair hai.n
hame.n Gairiyat ye miTaanii hai
hame.n jiit aap pe paanii hai
usii ghar ke Gair se Gair hai.n
tire puut bhaa.ii hai.n bhaa.ii huu.n
tire dil se sab hii fidaa.ii rahuu.n
ki tuu aap apnii misaal ho
tire zor kii yahii dhaak ho
ki jahaa.n buraa.ii se paak ho
tiraa ilm haq kaa kamaal ho

Azmatullah Khan
Nazm

naya daur

chakkii ke baaTo.n ke beach ab kuchh nahii.n aataa
shaant pa.De rahte hai.n jaise mar ga.e huu.n be-shak patthar the
sil-baTTe bichha.D ga.e hai.n ka.ii saalo.n se mile nahii.n
aur chakkii ke baa.nT bhii ek arse se hile nahii.n
ab chakkii aur sil-baTTe kii kaTar kaTar kii jagah
mixer grinder kii ghan ghan sunaa.ii detii hai bas

Sachin Dev Verma
Nazm

intishaar se ghabra kar

sameTo in bikhartii saa.ato.n ko
band muTThii khol kar aazaad kar do
saarii samto.n ko
nigaaho.n kii hado.n se sab manaazir haTte jaate hai.n
saraabo.n ke samundar ke kinaare kaTte jaate hai.n
saraabo.n ke samundar ke musaafir chhoTii chhoTii Tuk.Diyo.n me.n baTte jaate hai.n
havaa ke ho.nT in alfaaz ko dohraate jaate hai.n
sameTo in bikhartii saa.ato.n ko
band muTThii khol kar aazaad kar do
saarii samto.n ko

Shahryar
Nazm

diwar-e-chin

kahaa.n se phailaa hu.aa hai ye silsila kahaa.n tak
guzar gayaa sail himmato.n kaa
banaa ke ye kos kos sadiyo.n kii rahguzar sii
pahaa.D chillaa cha.Dhii kamaano.n se tiir phe.nke.n
to aasmaa.n gir pa.De zamii.n par
ravaa.n-davaa.n vaqt ke bahaa.o me.n
ek lambii daraa.D jaise pa.Dii hu.ii hai
aziim diivaar sar uThaa.e kha.Dii hu.ii hai
jhuke hu.e aasmaan ke niiche
jo is sahiife ko aks-dar-aks baa.nTtaa hai
ye razmiya jo lahuu kii shaffaaf raushnii se
likhaa gayaa hai
zamii.n pe chi.ngaariyaa.n u.Daate hu.e vo aa.e
jo baazu.o.n se bulandiyo.n kaa KHiraaj
lete rahe
shikam ko anaaj de kar
mashaqqate.n jin kii baa.ndiyaa.n thii.n
lahuu ke namkiin zaa.iqe
raqs karte rahte the
jin ke ho.nTo.n ke aastaa.n par
ka.Daktii aavaaz jabr ke chaabuko.n kii bijlii
inhii pahaa.Do.n pe kau.ndtii thii
yahii.n pe mehnat ke naqsh-gar ne
lahuu ke paanii me.n sang guu.ndhe
sadaa-e-tiisha uThii to koho.n se phuuT niklii.n
baqaa kii nahre.n
zamii.n ko us kii bulandiyo.n kii taraf uThaayaa
ufuq ko baa.ndhaa ufuq se us ne
qadiim quvvat ke raKHsh ne das hazaar lii masaafato.n me.n
fanaa ke taataariyo.n ke lashkar ko maat de dii
yahii.n pe mehnat ke naqsh-gar ne
silo.n ko pahnaa diye salaasil
baTe hu.e KHudgiraft qilo.n kii baa.D to.Dii
isii ne koho.n ke sar pe gaa.Dhaa
haziimato.n nusrato.n kaa parcham
kushuud kar ke jise u.Daayaa
ka.ii zamaano.n ke vaariso.n ne
jo u.D rahaa hai
nasheb ko aasmaa.n kii jaanib u.Daa rahaa hai
jo kal ko kal se milaa rahaa hai

Aftab Iqbal Shamim
Nazm

muntazim

hamaare jaise ajiib logo.n kii ranjisho.n kaa
malaal kis ko
zamiin kartii hai bain
aa.nsuu falak bahaataa hai chupke chupke
fazaa me.n siskii sii tairtii hai
hai.n sar-ba-zaanuu.n tamaam manzar
kahii.n chhinii hai kisii kii gu.Diyaa
kahii.n phaTii hai.n na.ii kitaabe.n
kisii kii shah-rag pe ko.ii jhapTaa
kisii kii galiyo.n me.n KHuun bikhraa
sunaa hai ham ne
ki is shujaa.at pe tamGa milegaa us ko
ba.Dii nafaasat se us ne chhaa.nTe hai.n apne reva.D
maveshii saare baTe hu.e hai.n
ye rang o zaat o nasl un ke bane taviile
sab apnii KHushiyo.n Gamo.n ko baa.nTe.nge apnii had me.n

Shahnaz Nabi
Nazm

imroz

nahii.n bat-e-mai-e-saaqii na barbat-e-mutrib
bisaat-e-gul nahii.n aaGosh-e-gul-ezaar nahii.n

Meem Hasan Lateefi
Nazm

nishat-ussaniya

ye maanaa ki saare mazaahir hai.n fitrii
magar ko.ii puuchhe havaa.o.n se
be-mehr kyuu.n laatii hai patte
harii Daaliyo.n se
zamii.n karvaTe.n kyuu.n badaltii hai
laave ugaltii hai kyuu.n
bastiyaa.n raakh hotii hai.n
bah jaate hai.n gaa.nv ke gaa.nv
jab taish me.n dau.Dtaa hai samundar hade.n bhuul kar
bijliyaa.n TuuT pa.Dtii hai.n kyuu.n KHirmano.n par
gahan chaa.nd suuraj pe chhaataa hai kyuu.n
ruu-ba-ruu hone ko kyuu.n machal uThte hai.n
faaslo.n me.n baTe
duur-uftaada sayyaare
taare zamii.n chuum lete hai.n kyuu.n
isii kurra-e-arz par

Shahnaz Nabi
Nazm

nazm

diivaar-giir gha.Dii me.n Thahre vaqt
sai.nka.Do.n kitaabo.n
be-tahaashaa kap.Do.n
aur
anginat juuto.n me.n baTe vajuud ko
tartiib dete
saa.nse.n ukha.Dtii hai.n
to sub.h kaa alarm
be-tartiib KHvaabo.n ke biich
musalsal shor karne lagtaa hai
raat-bhar jaage hu.o.n
ke liye baal banaa kar
na.ii sub.h kaa aaGaaz
kitnaa mushkil hotaa hai
is kaa andaaza
KHudaa
aur
Time-Table incharge
dono.n hii nahii.n lagaa paate
aur dohraane ke liye
hame.n phir se
pichhlaa din sau.np dete hai.n

Ehtisham Ali
Nazm

bhakkar

bhakkar ke baazaar ko dekhaa
sahraa me.n gulzaar ko dekhaa
majbuuro.n ke peT ko dekhaa
qaa.id-e-aazam gate ko dekhaa
kyaa samjhe kyaa jaane dekhaa
sab ko siina taane dekhaa
shalvaaro.n se 'aarii dekhaa
tah-bando.n ko jaarii dekhaa
kaliyo.n ko sharmaate dekhaa
khul kar Dholaa gaate dekhaa
hotel vaale 'arsh pe dekhe
hotel saare farsh pe dekhe
gaahak aur byopaarii dekhe
duble dekhe bhaarii dekhe
saaf aur phaile phaile dekhe
kap.De maile maile dekhe
la.Dke chhail-chhabiile dekhe
har-suu ret ke Tiile dekhe
TuuTe phuuTe naale dekhe
muKHlis taa.nge vaale dekhe
bastii rastii bastii dekhii
mulko.n kii bhii hastii dekhii
galii galii dil-afzaa dekhii
thal vaalo.n kii duniyaa dekhii
mazduuro.n kii mahfil dekhii
duur se kap.De kii mil dekhii
begam dekhii baa.ndii dekhii
dhan vaalo.n kii chaa.ndii dekhii
daulat 'izzat vaalii dekhii
jeb Gariib kii KHaalii dekhii
rahm ke taalib bande dekhe
zardaaro.n ke phande dekhe
'ilm-o-adab ke paale dekhe
shohrat ke matvaale dekhe
shaa'ir she'r sunaate dekhe
saame' sardii khaate dekhe
dil ba.Dhte dil ghaTte dekhe
murG baTere baTte dekhe
haal me.n do.ng.Daa pa.Dte dekhe
bhuuke sher ko la.Dte dekhe
ik tasviir niraalii dekhii
daane bhuunne vaalii dekhii
sho'la dekhaa shabnam dekhii
phuulo.n me.n KHushbuu kam dekhii
duniyaa aa.nkhe.n malte dekhii
vaqt kii chakkii chalte dekhii
naasuuro.n ko riste dekhaa
insaano.n ko piste dekhaa
kuchh shatranj kii baazii dekhii
kuchh mehmaan-navaazii dekhii

Abul Fitrat Meer Zaidi
Nazm

KHuda ki anty-people policy

ye sab kuchh ham jo karte hai.n
gunaaho.n par gunaahe.n
KHudaa hii chaahtaa hogaa ki ham aisaa kare.n
baGair us kii razaa ke ko.ii pattaa hil nahii.n saktaa
kahii.n dahqaa.n ke kheto.n me.n bhii baarish ho nahii.n saktii
kisii a.ndhere jangal me.n ko.ii jugnuu chamakne se bhii qaasir hai
ye sab kuchh ham jo karte hai.n
gunaaho.n par gunaahe.n
KHudaa hii chaahtaa hogaa ki ham aisaa kare.n
ki ham sab aadam-o-havvaa kii aulaade.n
zamii.n par muKHtalif KHaano.n me.n is tarah baTe hai.n
kahii.n maz.hab kii diivaare.n kahii.n par zaat kaa jhag.Daa
nigaaho.n par bhii ta.aziire.n
dilo.n aur paa.nv me.n bhii hai.n zanjiire.n
ye sab kuchh ham jo karte hai.n
gunaaho.n par gunaahe.n
to aa.o phir kisii maidaan me.n chal kar
KHudaa kii anty-people policy par
Gam-o-Gusse kaa ham iz.haar hii kar de.n
KHudaa apnii du.aa.e.n kyaa KHabar suntaa na suntaa ho
use hushiyaar hii kar de.n

Sarfaraz Khalid
Nazm

hamesha der kar deta hun

hamesha der kar detaa huu.n mai.n har kaam karne me.n
zaruurii baat kahnii ho ko.ii va.ada nibhaanaa ho
use aavaaz denii ho use vaapas bulaanaa ho
hamesha der kar detaa huu.n mai.n
madad karnii ho us kii yaar kii Dhaaras ba.ndhaanaa ho
bahut deriina rasto.n par kisii se milne jaanaa ho
hamesha der kar detaa huu.n mai.n
badalte mausamo.n kii sair me.n dil ko lagaanaa ho
kisii ko yaad rakhnaa ho kisii ko bhuul jaanaa ho
hamesha der kar detaa huu.n mai.n
kisii ko maut se pahle kisii Gam se bachaanaa ho
haqiiqat aur thii kuchh us ko jaa ke ye bataanaa ho
hamesha der kar detaa huu.n mai.n har kaam karne me.n.....

Muneer Niyazi
Nazm

bhali si ek shakl thi

bhale dino.n kii baat hai
bhalii sii ek shakl thii
na ye ki husn-e-taam ho
na dekhne me.n aam sii

Ahmad Faraz
Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now