Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ".fes"

Nazm MATCHES FOR ".fes"

Nazm

dusre darje ki pichhli qatar ka aadmi

gosht machhlii sabziyaa.n baniye kaa ration duudh ghii
mujh ko khaatii hai.n ye chiize.n mai.n ne kab khaayaa inhe.n
meraa ghar rahtaa hai mujh me.n ghar me.n mai.n rahtaa nahii.n
biivii bachcho.n ke phaTe kap.Do.n me.n huu.n
aur na.e jo.Do.n kii KHushiyo.n me.n chhupaa jo karb hai vo bhii huu.n mai.n
fees me.n school kii copy kitaabo.n me.n bhii mai.n
mai.n hii huu.n chuulhe kii gas
mai.n hii huu.n stove kaa gas
mere juute jo.nk kii maanind mere paa.nv se lipTe hu.e hai.n
chuuste hai.n meraa KHuun
meraa scooter mere kaa.ndho.n pe baiThaa hai
mai.n us ke tyro.n me.n lipTaa huu.n aur ghistaa huu.n

Shakeel Azmi
Nazm

daftar-e-shadi ka muntazim

fees letaa hai dil milaane kii
aur isii kaam par ''guzaaraa'' hai

Sarfaraz Shahid
Nazm

doctor

agarche hai.n apnii jagah saare kaam
magar doctor kaa hai apnaa maqaam
zaraa dard me.n mubtalaa ho.n agar
pukaare hai.n sab doctor doctor
kahii.n par agar ho buraa haadisa
to phir kaam aataa hai ye naaKHudaa
kahii.n operation kahii.n surgery
bhalaa kis se hogii ye chaaragarii
badan kaa har ik zaKHm bharne ko hai.n
masiihaa hii ye kaam karne ko hai.n
magar kaam ye zimmedaarii kaa hai
aur ehsaas iimaan-daarii kaa hai
hai is kaam me.n yuu.n to mehnat ba.Dii
KHudaa in ko detaa hai izzat ba.Dii
ba.De ho ke sochaa hai mai.n ne yahii
ki mai.n doctor hii banuu.ngii kabhii
Gariibo.n se mai.n fees luu.ngii nahii.n
kabhii ye gunaah mai.n karuu.ngii nahii.n
mirii ye du.aa sun le mere KHudaa
mujhe aisii KHidmat ke laa.eq banaa

Asna Badr
Nazm

kaise samjhaen nani ko

das ruupa.e fii botal paanii
hakkaa-bakkaa rah ga.ii naanii
apnaa bachpan yaad kiyaa to
arzaanii sii thii arzaanii
baarah aane ser aslii ghii
gyaarah aane tola chaa.ndii
kele the do paise darjan
chaaval paa.nch aane pa.nserii
biscope ticket ek aana
ek aTThannii kaa paajaama
schoolo.n me.n fees nahii.n thii
collage do ruupa.e maahaana
naanaa kii tanKHvaah jo puuchhii
kul pai.ntaaliis ruupaya niklii
pai.ntaaliis hazaar ke lag-bhag
paate hai.n abbuu aur ammii

Muzaffar Hanfi
Nazm

do ka pahaDa

zehn me.n apne ilm bhare.n
do kaa pahaa.Daa yaad kare.n
do aikam do do donaa chaar
sab se ulfat sab se pyaar
do tiyaa chhe aur do chauke aaTh
pa.Dh likh kar tum karnaa ThaaT
do panje das do chhakke baarah
bhaarat KHushiyo.n kaa gahvaara
do sat chaudah do aThe sola
yaad karo ai munnaa raaja
do nam aThaarah do dahaam biis
KHatm pahaa.Daa laa.o fees

Abrar Kiratpuri
Nazm

raegan subh ki chita par

ham jo kabhii kabhii hote hai.n
aur akasr nahii.n hote
KHvaab kii aulaad hai.n
takmiil ik sahraa kaa naam hai
jis ke safar ke liye
jitnii naslo.n kii umr chaahe
utnii nasle.n abhii paidaa nahii.n hu.ii.n
aur vo jo mere sahraa kaa saraab thaa
mai.n ne apne apne zinda lamho.n ko
us ke naam kar diyaa
vo kaun thaa
vo marte hu.e mazduuro.n kii uma.ng nahii.n thaa
aur vo Gariib taalib-e-ilm kii vo fees nahii.n thaa
jo ek ek paise se mil kar bantii hai
aur vo ku.nvaarii beTii kaa vo jahez bhii nahii.n thaa
jo KHushii ke mazbuut taale kii iklautii kunjii ban jaataa
vo kaun thaa
vo tanhaa.ii se maziid tanhaa.ii tak safar kaa vo darmiyaan thaa
jo sirf bahruup hotaa hai
KHvaab ne bahruup se shaadii kar lii
aur mai.n ne apne zinda lamho.n ko
bahruup ke naam kar diyaa
jis kaa naam KHud-farebii hai
ruup aur bahruup ke darmiyaan bahtii hai
vo jo dhund kii lakiir ke us paar
bahruup kii duniyaa me.n chalaa gayaa
lauT kar na aayaa
aur mai.n ne lauT kar na aane vaalo.n ke naam
asl ke zamaane kar diye

Tanveer Anjum
Nazm

KHud-faramoshi

chalaa thaa ghar se ki bachche kii fees denii thii
kahaa thaa biivii ne bech aa.uu.n baaliyaa.n us kii
ki ghar kaa KHarch chale aur davaa bhii aa jaa.e
savaal ye hai ki kyaa ilm ne diyaa ab tak
bajaa.e kal ke agar aaj mar ga.e to kyaa
zamii.n pe kitne masaa.il hai.n aadmii ke liye
KHayaal aayaa chalo aaj jab ki zinda hai.n
cha.Dhaa ke aa.e.nge do phuul gor-e-maadar pe
ki chaa.nd me.n to kisii maa.n kii qabr kyaa hogii
na jaane kyaa hu.aa jab ghar pahu.nch gayaa apne
bataayaa biivii ne phir aaj pii ke aayaa huu.n

Sulaiman Areeb Haidarabadi
Nazm

tanKHwah ki tariKH

chand kitaabe.n ik biivii do bachche hai.n
kyaa kyaa kuchh is chhoTii sii duniyaa me.n hai
is chhoTii sii duniyaa kaa mai.n haakim huu.n
biivii bachche sab mere mahkuum hai.n par
ghuurte rahte hai.n ye apne haakim ko
hasrat yaas-bharii nazro.n se shaam-o-sahar
chhoTii chhoTii aa.nkho.n me.n hai.n KHvaab ba.De
in ba.De KHvaabo.n ko jab mai.n suntaa huu.n
hairat ke 'aalam me.n sar ko dhuntaa huu.n
aane vaalii hai taariiKH jo tanKHvaah kii
sochtaa huu.n is maah vo sab kuchh le luu.ngaa
jin ke KHvaab sajaa rakkhe hai.n bachcho.n ne
biivii kii taakiid hai jin ke baare me.n
ghar ke kuchh saamaan jo ab ke lene hai.n
tel masaale aur raashan bhii laanaa hai
bijlii kaa bill gas cylinder duudh kaa KHarch
bachcho.n ke school ke juute lene hai.n
ammii aur abbuu kii davaa.ii laanii hai
aur bharnii hai fees bhii saarii Tuition kii
chand kitaabe.n apnii bhii bulvaanii hai
jin ke kuchh na.e edition aa.e hai.n
miir-o-Gaalib ke she'ro.n kii kuchh sharhe.n
manTo aur bedii ke kuchh afsaane hai.n
'faaruuqii' kii aur 'hanfii' kii tanqiide.n
kuchh siirat kuchh qur.aa.n kii tafsiire.n hai.n
lekin jab tanKHvaah kii aatii hai taariiKH
tab mujh ko ehsaas ye hone lagtaa hai
ye tanKHvaah jo ab ke milne vaalii hai
ye milne se pahle hii baT jaatii hai

Farooq Noor
Nazm

kaise samjhaen nani ko

bioscope ticket ek aanaa
ek aTThannii kaa paajaama
schoolo.n me.n fees nahii.n thii
college do ruupa.e maahaana

Muzaffar Hanfi
Nazm

kale dhan par qawwali

ho fees muqaddama la.Dne kii yaa rishvat Thekaa dene kii
har ek demand kare keval do number me.n hii lene kii
ik number kaa kyaa karnaa jii jab chaah sabhii ko do kii hai
sab barakat number do kii hai sab barakat number do kii hai

Sada Ambalvi
Nazm

shairi ka janaza

ek shab to tab’-e-mauzuu.n ne u.Daa dii nii.nd bhii
aur dimaaG o qalb kii rag rag pha.Dakne lag ga.ii
zehn par chhaane lagii.n phir shaa'irii kii badliyaa.n
‘aalam-e-mash.huud kaa chhupne lagaa phir aasmaa.n
aamad-e-mauzuu.n thii yaa ba.Dhtaa hu.aa sailaab thaa
she’r kaaGaz par nikharne ke liye betaab thaa
ik talaatum saa bapaa thaa bahr-e-ehsaasaat me.n
be-sabaatii hukmraa.n thii ‘aalam-e-isbaat me.n
tab' kahtii thii zamaane bhar kii aa.nkhe.n khol duu.n
zarra-o-KHurshiid miizaan-e-suKHan me.n taul duu.n
zarre zarre ko sunaa duu.n aaj paiGaam-e-hayaat
ik ishaare se badal duu.n ye nizaam-e-kaa.enaat
gumbad-e-garduu.n pe ab taKH.iil kii parvaaz thii
dil kii dha.Dkan jaise israafiil kii aavaaz thii
KHaama thaa yaa ki ko.ii raKHsh-e-sabaa-raftaar thaa
jo taKHayyul kii havaa se barsar-e-paikaar thaa
daf'atan do narm-o-naazuk haath shaano.n se lage
barq-e-KHirman-soz jaise aashiyaane par gire
mu.D ke dekhaa to kha.Daa hai ek tifl-e-KHurd-saal
jis kii aa.nkho.n me.n tamanna jis kii nazro.n me.n savaal
madrase kii fees pencil pen kitaabe.n copiyaa.n
mushtamil thaa chand ashyaa par nigaaho.n kaa bayaa.n
aur phir us tifl kii suurat pe gahrii soch thii
jo mujhe ik daa’vat-e-fikr-o-amal sii de ga.ii
mai.n ne dekhaa zehn me.n ik ge.nd hai laTTuu bhii hai
aur pencil chhiilne kaa KHushnumaa chaaquu bhii hai
KHuubsuurat hat hai ik KHushnumaa poshaak hai
zehn kii gardish kaa mehvar Traa.ikal kaa chaak hai
TikTikii sii baa.ndh kar kuchh der tak dekhaa kiyaa
mai.n isii 'aalam me.n phir mahsuus yuu.n karne lagaa
ik jamuudii kaifiyat chhaane lagii idraak par
'arsh se girtaa ho jaise ko.ii farsh-e-KHaak par
zehn se josh-e-suKHan kaa rang kam hone lagaa
tab’-e-mauzuu.n kaa sar-e-tasliim KHam hone lagaa
ek maayuusii dimaaG-o-qalb par chhaane lagii
aur jamaahii par jamaahii nii.nd sii aane lagii
phir palaT kar kii nazar apnii adhuurii nazm par
ek bijlii sii girii mere dimaaG-o-qalb par
maut kii thii hukmraanii paikar-e-ehsaas par
shaa'irii kaa thaa janaaza bistar-e-qirtaas par

Barq Aashiyanvi
Nazm

mohabbat ho gai tum se

sabhii baate.n sunii tum ne
phir aa.nkhe.n pher lii.n tum ne

Zubair Ali Tabish
Nazm

saqi-nama

hu.aa KHema-zan kaarvaan-e-bahaar
iram ban gayaa daaman-e-koh-saar
gul o nargis o sosan o nastaran
shahiid-e-azal laala-KHuunii.n kafan
jahaa.n chhup gayaa parda-e-ra.ng me.n
lahuu kii hai gardish rag-e-sang me.n
fazaa niilii niilii havaa me.n suruur
Thaharte nahii.n aashiyaa.n me.n tuyuur
vo juu-e-kohistaa.n uchaktii hu.ii
aTaktii lachaktii saraktii hu.ii
uchhaltii phisaltii sambhaltii hu.ii
ba.De pech khaa kar nikaltii hu.ii
ruke jab to sil chiir detii hai ye
pahaa.Do.n ke dil chiir detii hai ye
zaraa dekh ai saaqii-e-laala-faam
sunaatii hai ye zindagii kaa payaam
pilaa de mujhe vo mai-e-parda-soz
ki aatii nahii.n fasl-e-gul roz roz
vo mai jis se raushan zamiir-e-hayaat
vo mai jis se hai masti-e-kaa.enaat
vo mai jis me.n hai soz-o-saaz-e-azal
vo mai jis se khultaa hai raaz-e-azal
uThaa saaqiyaa parda is raaz se
la.Daa de mamuule ko shahbaaz se
zamaane ke andaaz badle ga.e
nayaa raag hai saaz badle ga.e
hu.aa is tarah faash raaz-e-fara.ng
ki hairat me.n hai shiisha-baaz-e-fara.ng
puraanii siyaasat-garii KHvaar hai
zamii.n miir o sultaa.n se be-zaar hai
gayaa daur-e-sarmaaya-daarii gayaa
tamaashaa dikhaa kar madaarii gayaa
giraa.n KHvaab chiinii sambhalne lage
himaala ke chashme ubalne lage
dil-e-tuur-e-siinaa-o-faaraan do-niim
tajallii kaa phir muntazir hai kaliim
musalmaa.n hai tauhiid me.n garam-josh
magar dil abhii tak hai zunnaar-posh
tamaddun tasavvuf sharii.at-e-kalaam
butaan-e-ajam ke pujaarii tamaam
haqiiqat KHuraafaat me.n kho ga.ii
ye ummat rivaayaat me.n kho ga.ii
lubhaataa hai dil ko kalaam-e-KHatiib
magar lazzat-e-shauq se be-nasiib
bayaa.n is kaa mantiq se suljhaa hu.aa
luGat ke bakhe.Do.n me.n uljhaa hu.aa
vo suufii ki thaa KHidmat-e-haq me.n mard
mohabbat me.n yaktaa hamiiyat me.n fard
ajam ke KHayaalaat me.n kho gayaa
ye saalik maqaamaat me.n kho gayaa
bujhii ishq kii aag andher hai
musalmaa.n nahii.n raakh kaa Dher hai
sharaab-e-kuhan phir pilaa saaqiyaa
vahii jaam gardish me.n laa saaqiyaa
mujhe ishq ke par lagaa kar u.Daa
mirii KHaak jugnuu banaa kar u.Daa
KHirad ko Gulaamii se aazaad kar
javaano.n ko piiro.n kaa ustaad kar
harii shaaKH-e-millat tire nam se hai
nafas is badan me.n tire dam se hai
ta.Dapne pha.Dakne kii taufiiq de
dil-e-murtazaa soz-e-siddiiq de
jigar se vahii tiir phir paar kar
tamannaa ko siino.n me.n bedaar kar
tire aasmaano.n ke taaro.n kii KHair
zamiino.n ke shab zinda-daaro.n kii KHair
javaano.n ko soz-e-jigar baKHsh de
miraa ishq merii nazar baKHsh de
mirii naav girdaab se paar kar
ye saabit hai to is ko sayyaar kar
btaa mujh ko asraar-e-marg-o-hayaat
ki terii nigaaho.n me.n hai kaa.enaat
mire diida-e-tar kii be-KHvaabiyaa.n
mire dil kii poshiida betaabiyaa.n
mire naala-e-niim-shab kaa niyaaz
mirii KHalvat o anjuman kaa gudaaz
uma.nge.n mirii aarzuu.e.n mirii
ummiide.n mirii justuju.e.n mirii
mirii fitrat aa.iina-e-rozgaar
Gazaalaan-e-afkaar kaa murG-zaar
miraa dil mirii razm-gaah-e-hayaat
gumaano.n ke lashkar yaqii.n kaa sabaat
yahii kuchh hai saaqii mataa-e-faqiir
isii se faqiirii me.n huu.n mai.n amiir
mire qaafile me.n luTaa de ise
luTaa de Thikaane lagaa de ise
damaa-dam ravaa.n hai yam-e-zindagii
har ik shai se paidaa ram-e-zindagii
isii se hu.ii hai badan kii numuud
ki sho'le me.n poshiida hai mauj-e-duud
giraa.n garche hai sohbat-e-aab-o-gil
KHush aa.ii ise mehnat-e-aab-o-gil
ye saabit bhii hai aur sayyaar bhii
anaasir ke phando.n se be-zaar bhii
ye vahdat hai kasrat me.n har dam asiir
magar har kahii.n be-chugo.n be-naziir
ye aalam ye but-KHaana-e-shash-jihaat
isii ne taraashaa hai ye somnaat
pasand is ko takraar kii KHuu nahii.n
ki tuu mai.n nahii.n aur mai.n tuu nahii.n
man o tuu se hai anjuman-aafrii.n
magar ain-e-mahfil me.n KHalvat-nashii.n
chamak us kii bijlii me.n taare me.n hai
ye chaa.ndii me.n sone me.n paare me.n hai
usii ke bayaabaa.n usii ke babuul
usii ke hai.n kaa.nTe usii ke hai.n phuul
kahii.n us kii taaqat se kohsaar chuur
kahii.n us ke phande me.n jibra.iil o huur
kahii.n jaza hai shaahiin siimaab ra.ng
lahuu se chakoro.n ke aaluuda chang
kabuutar kahii.n aashiyaane se duur
pha.Daktaa hu.aa jaal me.n naa-subuur
fareb-e-nazar hai sukuun o sabaat
ta.Daptaa hai har zarra-e-kaa.enaat
Thahartaa nahii.n kaarvaan-e-vajuud
ki har lahz hai taaza shaan-e-vajuud
samajhtaa hai tuu raaz hai zindagii
faqat zauq-e-parvaaz hai zindagii
bahut us ne dekhe hai.n past o buland
safar us ko manzil se ba.Dh kar pasand
safar zindagii ke liye barg o saaz
safar hai haqiiqat hazar hai majaaz
ulajh kar sulajhne me.n lazzat use
ta.Dapne pha.Dakne me.n raahat use
hu.aa jab use saamnaa maut kaa
kaThin thaa ba.Daa thaamnaa maut kaa
utar kar jahaan-e-makaafaat me.n
rahii zindagii maut kii ghaat me.n
mazaaq-e-du.ii se banii zauj zauj
uThii dasht o kohsaar se fauj fauj
gul is shaaKH se TuuTte bhii rahe
isii shaaKH se phuuTte bhii rahe
samajhte hai.n naadaa.n use be-sabaat
ubhartaa hai miT miT ke naqsh-e-hayaat
ba.Dii tez jaulaa.n ba.Dii zuud-ras
azal se abad tak ram-e-yak-nafs
zamaana ki zanjiir-e-ayyaam hai
damo.n ke ulaT-pher kaa naam hai
ye mauj-e-nafs kyaa hai talvaar hai
KHudii kyaa hai talvaar kii dhaar hai
KHudii kyaa hai raaz-daruun-hayaat
KHudii kyaa hai bedaari-e-kaa.enaat
KHudii jalva badmast o KHalvat-pasand
samundar hai ik buu.nd paanii me.n band
a.ndhere ujaale me.n hai taabnaak
man o tuu me.n paidaa man o tuu se paak
azal us ke piichhe abad saamne
na had us ke piichhe na had saamne
zamaane ke dariyaa me.n bahtii hu.ii
sitam us kii maujo.n ke sahtii hu.ii
tajassus kii raahe.n badaltii hu.ii
damaa-dam nigaahe.n badaltii hu.ii
subuk us ke haatho.n me.n sa.ng-e-giraa.n
pahaa.D us kii zarbo.n se reg-e-ravaa.n
safar us kaa anjaam o aaGaaz hai
yahii us kii taqviim kaa raaz hai
kiran chaa.nd me.n hai sharar sang me.n
ye be-ra.ng hai Duub kar rang me.n
ise vaasta kyaa kam-o-besh se
nasheb o faraaz o pas-o-pesh se
azal se hai ye kashmakash me.n asiir
hu.ii KHaak-e-aadam me.n suurat-paziir
KHudii kaa nasheman tire dil me.n hai
falak jis tarah aa.nkh ke til me.n hai
KHudii ke nigahbaa.n ko hai zahr-naab
vo naa.n jis se jaatii rahe us kii aab
vahii naa.n hai us ke liye arjumand
rahe jis se duniyaa me.n gardan buland
KHudii faal-e-mahmuud se darguzar
KHudii par nigah rakh ayaazii na kar
vahii sajda hai laa.iq-e-ehtimaam
ki ho jis se har sajda tujh par haraam
ye aalam ye ha.ngaama-e-ra.ng-o-saut
ye aalam ki hai zer-e-farmaan-e-maut
ye aalam ye but-KHaana-e-chashm-o-gosh
jahaa.n zindagii hai faqat KHurd o nosh
KHudii kii ye hai manzil-e-avvalii.n
musaafir ye teraa nasheman nahii.n
tirii aag is KHaak-daa.n se nahii.n
jahaa.n tujh se hai tuu jahaa.n se nahii.n
ba.Dhe jaa ye koh-e-giraa.n to.D kar
tilism-e-zamaan-o-makaa.n to.D kar
KHudii sher-e-maulaa jahaa.n us kaa said
zamii.n us kii said aasmaa.n us kaa said
jahaa.n aur bhii hai.n abhii be-numuud
ki KHaalii nahii.n hai zamiir-e-vajuud
har ik muntazir terii yalGaar kaa
tirii shauKHi-e-fikr-o-kirdaar kaa
ye hai maqsad gardish-e-rozgaar
ki terii KHudii tujh pe ho aashkaar
tuu hai faatah-e-aalam-e-KHuub-o-zisht
tujhe kyaa bataa.uu.n tirii sarnavisht
haqiiqat pe hai jaama-e-harf-e-ta.ng
haqiiqat hai aa.iina-e-guftaar-e-za.ng
farozaa.n hai siine me.n sham-e-nafas
magar taab-e-guftaar rakhtii hai bas
agar yak-sar-e-muu-e-bartar param
faroG-e-tajallii ba-sozad param

Allama Iqbal
Nazm

man ka KHwab

mai.n so.ii jo ik shab to dekhaa ye KHvaab
ba.Dhaa aur jis se miraa iztiraab
ye dekhaa ki mai.n jaa rahii huu.n kahii.n
a.ndheraa hai aur raah miltii nahii.n
laraztaa thaa Dar se miraa baal baal
qadam kaa thaa dahshat se uThnaa muhaal
jo kuchh hausla paa ke aage ba.Dhii
to dekhaa qataar ek la.Dko.n kii thii
zamurrad sii poshaak pahne hu.e
diye sab ke haatho.n me.n jalte hu.e
vo chup-chaap the aage piichhe ravaa.n
KHudaa jaane jaanaa thaa un ko kahaa.n
isii soch me.n thii ki meraa pisar
mujhe is jamaa.at me.n aayaa nazar
vo piichhe thaa aur tez chaltaa na thaa
diyaa us ke haatho.n me.n jaltaa na thaa
kahaa mai.n ne pahchaan kar merii jaa.n
mujhe chho.D kar aa ga.e tum kahaa.n
judaa.ii me.n rahtii huu.n mai.n be-qaraar
pirotii huu.n har roz ashko.n ke haar
na parvaa hamaarii zaraa tum ne kii
ga.e chho.D achchhii vafaa tum ne kii
jo bachche ne dekhaa miraa pech-o-taab
diyaa us ne mu.nh pher kar yuu.n javaab
rulaatii hai tujh ko judaa.ii mirii
nahii.n is me.n kuchh bhii bhalaa.ii mirii
ye kah kar vo kuchh der tak chup rahaa
diyaa phir dikhaa kar ye kahne lagaa
samajhtii hai tuu ho gayaa kyaa ise?
tire aa.n.su.o.n ne bujhaayaa ise!

Allama Iqbal
Nazm

aaKHiri lamha

magar mai.n aaj bahut duur jaane vaalaa huu.n
bas aur chand nafas ko tumhaare paas huu.n mai.n
tumhe.n jo paa ke KHushii hai tum us KHushii pe na jaa.o
tumhe.n ye ilm nahii.n kis qadar udaas huu.n mai.n
kyaa tum ko KHabar is duniyaa kii kyaa tum ko pata is duniyaa kaa
ma.asuum dilo.n ko dukh denaa sheva hai is duniyaa kaa
Gam apnaa nahii.n Gam is kaa hai kal jaane tumhaaraa kyaa hogaa
parvaan cha.Dhogii tum kaise jiine kaa sahaaraa kyaa hogaa
aa.o ki tarastii baa.nho.n me.n ik baar to tum ko bhar luu.n mai.n
kal tum jo ba.Dii ho jaa.ogii jab tum ko shu.uur aa jaa.egaa
kitne hii savaalo.n kaa dhaaraa ehsaas se Takraa jaa.egaa
sochogii ki duniyaa tabqo.n me.n taqsiim hai kyuu.n ye pher hai kyaa
insaan kaa insaa.n bairii hai ye zulm hai kyaa andher hai kyaa
ye nasl hai kyaa ye zaat hai kyaa ye nafrat kii ta.aliim hai kyuu.n
daulat to bahut hai mulko.n me.n daulat kii magar taqsiim hai kyuu.n
taariiKH bataa.egii tum ko insaa.n se kahaa.n par bhuul hu.ii
sarmaa.e ke haatho.n logo.n kii kis tarah mohabbat dhuul hu.ii
sadiyo.n se baraabar mehnat-kash haalaat se la.Dte aa.e hai.n
chhaa.ii hai jo ab tak dhartii par us raat se la.Dte aa.e hai.n
duniyaa se abhii tak miT na sakaa par raaj ijaara-daarii kaa
Gurbat hai vahii aflaas vahii ronaa hai vahii bekaarii kaa
mehnat kii abhii tak qadr nahii.n mehnat kaa abhii tak mol nahii.n
Dhuu.nDe nahii.n miltii.n vo aa.nkhe.n jo aa.nkhe.n ho kashkol nahii.n
sochaa thaa ki kal is dhartii par ik rang nayaa chhaa jaa.egaa
insaan hazaar barso.n kii mehnat kaa samar paa jaa.egaa
jiine kaa baraabar haq sab ko jab miltaa vo pal aa na sakaa
jis kal kii KHaatir jiite-jii marte rahe vo kal aa na sakaa
lekin ye la.Daa.ii KHatm nahii.n ye ja.ng na hogii band kabhii
sau zaKHm bhii khaa kar maidaa.n se haTte nahii.n jur.at-ma.nd kabhii

Jan Nisar Akhtar
Nazm

meri jaan ab bhi apna husn wapas pher de mujhko

mirii jaa.n ab bhii apnaa husn vaapas pher de mujh ko
abhii tak dil me.n tere ishq kii qindiil raushan hai
tire jalvo.n se bazm-e-zindagii jannat-ba-daaman hai
mirii ruuh ab bhii tanhaa.ii me.n tujh ko yaad kartii hai
har ik taar-e-nafas me.n aarzuu bedaar hai ab bhii
har ik be-ra.ng saa.at muntazir hai terii aamad kii
nigaahe.n bichh rahii hai.n raasta zar-kaar hai ab bhii
magar jaan-e-hazii.n sadme sahegii aaKHirash kab tak
tirii be-mehriyo.n par jaan degii aaKHirash kab tak
tirii aavaaz me.n so.ii hu.ii shiiriiniyaa.n aaKHir
mire dil kii fasurda KHalvato.n me.n jaa na paa.e.ngii
ye ashko.n kii faraavaanii se dhundlaa.ii hu.ii aa.nkhe.n
tirii raanaa.iyo.n kii tamkanat ko bhuul jaa.e.ngii
pukaare.nge tujhe to lab ko.ii lazzat na paa.e.nge
guluu me.n terii ulfat ke taraane suukh jaa.e.nge
mabaadaa yaad-haa-e-ahd-e-maazii mahv ho jaa.e.n
ye paariina fasaane mauj-haa-e-Gam me.n kho jaa.e.n
mire dil kii taho.n se terii suurat dhul ke bah jaa.e
hariim-e-ishq kii sham-e-daraKHshaa.n bujh ke rah jaa.e
mabaadaa ajnabii duniyaa kii zulmat gher le tujh ko
mirii jaa.n ab bhii apnaa husn vaapas pher de mujh ko

Faiz Ahmad Faiz
Nazm

ai raushniyon ke shahr

aaj miraa dil fikr me.n hai
ai raushniyo.n ke shahr
shab-KHuu.n se mu.nh pher na jaa.e armaano.n kii rau
KHair ho terii lailaa.o.n kii un sab se kah do
aaj kii shab jab diye jalaa.e.n uu.nchii rakkhe.n lau

Faiz Ahmad Faiz
Nazm

mujhe ghar yaad aata hai

simaT kar kis liye nuqta nahii.n bantii zamii.n kah do
ye kaisaa pher hai taqdiir kaa ye pher to shaayad nahii.n lekin
ye phailaa aasmaa.n us vaqt kyuu.n dil ko lubhaataa hai

Meeraji
Nazm

tasalsul

ilm ne aaj kurede hai.n vo zulmaat ke Dher
vaqt ne jis pe biThaa.e the fanaa ke pahre
jaag uThe suur-e-saraafiil se guu.nge bahre
taa-abad jin ke muqaddar me.n thii duniyaa andher
ye magar azmat-e-insaa.n hai ki taqdiir ke pher?

Ahmad Faraz
Nazm

aana hai to aa rah mein kuchh pher nahin hai

aanaa hai to aa raah me.n kuchh pher nahii.n hai
bhagvaan ke ghar der hai andher nahii.n hai

Sahir Ludhianvi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now