Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "KHafaa"

Nazm MATCHES FOR "KHafaa"

Nazm

andesha

baat niklegii to phir duur talak jaa.egii
log be-vaj.h udaasii kaa sabab puuchhe.nge
ye bhii puuchhe.nge ki tum itnii pareshaa.n kyuu.n ho
jagmagaate hu.e lamho.n se gurezaa.n kyuu.n ho
u.ngliyaa.n uTThe.ngii suukhe hu.e baalo.n kii taraf
ik nazar dekhe.nge guzre hu.e saalo.n kii taraf
chuu.Diyo.n par bhii ka.ii tanz kiye jaa.e.nge
kaa.npte haatho.n pe bhii fiqre kase jaa.e.nge
phir kahe.nge ki ha.nsii me.n bhii KHafaa hotii hai.n
ab to 'ruuhii' kii namaaze.n bhii qazaa hotii hai.n
log zaalim hai.n har ik baat kaa ta.ana de.nge
baato.n baato.n me.n miraa zikr bhii le aa.e.nge
in kii baato.n kaa zaraa saa bhii asar mat lenaa
varna chehre ke ta.assur se samajh jaa.e.nge
chaahe kuchh bhii ho savaalaat na karnaa un se
mere baare me.n ko.ii baat na karnaa un se
baat niklegii to phir duur talak jaa.egii

Kafeel Aazar Amrohvi
Nazm

intisab

aaj ke naam
aur
aaj ke Gam ke naam
aaj kaa Gam ki hai zindagii ke bhare gulsitaa.n se KHafaa
zard patto.n kaa ban
zard patto.n kaa ban jo miraa des hai
dard kii anjuman jo miraa des hai
clerko.n kii afsurda jaano.n ke naam
kirm-KHurda dilo.n aur zabaano.n ke naam
post-mano.n ke naam
taa.nge vaalo.n kaa naam
rail-baano.n ke naam
kaar-KHaano.n ke bhuuke jiyaalo.n ke naam
baadshaah-e-jahaa.n vaalii-e-maa-sivaa, naa.eb-ul-allaah fil-arz
dahqaa.n ke naam
jis ke Dhoro.n ko zaalim ha.nkaa le ga.e
jis kii beTii ko Daaku uThaa le ga.e
haath bhar khet se ek a.ngusht paTvaar ne kaaT lii hai
duusrii maaliye ke bahaane se sarkaar ne kaaT lii hai
jis kii pag zor vaalo.n ke paa.nv-tale
dhajjiyaa.n ho ga.ii hai
un dukhii maa.o.n ke naam
raat me.n jin ke bachche bilakte hai.n aur
nii.nd kii maar khaa.e hu.e baazu.o.n me.n sambhalte nahii.n
dukh bataate nahii.n
minnato.n zaariyo.n se bahalte nahii.n

Faiz Ahmad Faiz
Nazm

kisi ko udas dekh kar

tumhe.n udaas saa paataa huu.n mai.n ka.ii din se
na jaane kaun se sadme uThaa rahii ho tum
vo shoKHiyaa.n vo tabassum vo qahqahe na rahe
har ek chiiz ko hasrat se dekhtii ho tum
chhupaa chhupaa ke KHamoshii me.n apnii bechainii
KHud apne raaz kii tash.hiir ban ga.ii ho tum
merii umiid agar miT ga.ii to miTne do
umiid kyaa hai bas ik pesh-o-pas hai kuchh bhii nahii.n
mirii hayaat kii Gamgiiniyo.n kaa Gam na karo
Gam-e-hayaat Gam-e-yak-nafas hai kuchh bhii nahii.n
tum apne husn kii ra.anaa.iyo.n pe rahm karo
vafaa fareb hai tuul-e-havas hai kuchh bhii nahii.n
mujhe tumhaare taGaaful se kyuu.n shikaayat ho
mirii fanaa mire ehsaas kaa taqaazaa hai
mai.n jaantaa huu.n ki duniyaa kaa KHauf hai tum ko
mujhe KHabar hai ye duniyaa ajiib duniyaa hai
yahaa.n hayaat ke parde me.n maut paltii hai
shikast-e-saaz kii aavaaz ruuh-e-naGma hai
mujhe tumhaarii judaa.ii kaa ko.ii ranj nahii.n
mire KHayaal kii duniyaa me.n mere paas ho tum
ye tum ne Thiik kahaa hai tumhe.n milaa na karuu.n
magar mujhe ye bataa do ki kyuu.n udaas ho tum
KHafaa na honaa mirii jur.at-e-taKHaatub par
tumhe.n KHabar hai mirii zindagii kii aas ho tum
miraa to kuchh bhii nahii.n hai mai.n ro ke jii luu.ngaa
magar KHudaa ke liye tum asiir-e-Gam na raho
hu.aa hii kyaa jo zamaane ne tum ko chhiin liyaa
yahaa.n pe kaun hu.aa hai kisii kaa socho to
mujhe qasam hai mirii dukh-bharii javaanii kii
mai.n KHush huu.n merii mohabbat ke phuul Thukraa do
mai.n apnii ruuh kii har ik KHushii miTaa luu.ngaa
magar tumhaarii masarrat miTaa nahii.n saktaa
mai.n KHud ko maut ke haatho.n me.n sau.np saktaa huu.n
magar ye baar-e-masaa.ib uThaa nahii.n saktaa
tumhaare Gam ke sivaa aur bhii to Gam hai.n mujhe
najaat jin se mai.n ik lahza paa nahii.n saktaa
ye uu.nche uu.nche makaano.n kii Dev.Dhiyo.n ke tale
har ek gaam pe bhuuke bhikaariyo.n kii sadaa
har ek ghar me.n hai aflaas aur bhuuk kaa shor
har ek samt ye insaaniyat kii aah-o-bukaa
ye kaar-KHaano.n me.n lohe kaa shor-o-Gul jis me.n
hai dafn laakho.n Gariibo.n kii ruuh kaa naGma
ye shaah-raaho.n pe ra.ngiin saa.Diyo.n kii jhalak
ye jho.npa.Do.n me.n Gariibo.n ke be-kafan laashe
ye maal-road pe caro.n kii rel-pel kaa shor
ye pTriyo.n pe Gariibo.n ke zard-ruu bachche
galii galii me.n ye bikte hu.e javaa.n chehre
husain aa.ankho.n me.n afsurdagii sii chhaa.ii hu.ii
ye ja.ng aur ye mere vatan ke shoKH javaa.n
KHariidii jaatii hai.n uThtii javaaniyaa.n jin kii
ye baat baat pe qaanuun o zaabte kii giraft
ye zillate.n ye Gulaamii ye daur-e-majbuurii
ye Gam bahut hai.n mirii zindagii miTaane ko
udaas rah ke mire dil ko aur ranj na do

Sahir Ludhianvi
Nazm

wo kaise log hote hain jinhen hum dost kahte hain

vo kaise log hote hai.n jinhe.n ham dost kahte hai.n
na ko.ii KHuun kaa rishta na ko.ii saath sadiyo.n kaa
magar ehsaas apno.n saa vo anjaane dilaate hai.n
vo kaise log hote hai.n jinhe.n ham dost kahte hai.n
KHafaa jab zindagii ho to vo aa ke thaam lete hai.n
rulaa detii hai jab duniyaa to aa kar muskuraate hai.n
vo kaise log hote hai.n jinhe.n ham dost kahte hai.n
akele raaste pe jab mai.n kho jaa.uu.n to milte hai.n
safar mushkil ho kitnaa bhii magar vo saath jaate hai.n
vo kaise log hote hai.n jinhe.n ham dost kahte hai.n
nazar ke paas ho.n na ho.n magar phir bhii tasallii hai
vahii mehmaan KHvaabo.n ke jo dil ke paas rahte hai.n
vo kaise log hote hai.n jinhe.n ham dost kahte hai.n
mujhe masruur karte hai.n vo lamhe aaj bhii 'irfaan'
ki jin me.n dosto.n ke saath ke pal yaad aate hai.n
vo kaise log hote hai.n jinhe.n ham dost kahte hai.n

Irfan Ahmad mir
Nazm

baiTha hai mere samne wo

baiThaa hai mere saamne vo
jaane kisii soch me.n pa.Daa hai
achchhii aa.nkhe.n milii hai.n us ko
vahshat karnaa bhii aa gayaa hai
bichh jaa.uu.n mai.n us ke raaste me.n
phir bhii kyaa is se faa.eda hai
ham dono.n hii ye to jaante hai.n
vo mere liye nahii.n banaa hai
mere liye us ke haath kaafii
us ke liye saaraa falsafa hai
merii nazro.n se hai pareshaa.n
KHud apnii kashish se hii KHafaa hai
sab baat samajh rahaa hai lekin
gum-sum saa mujh ko dekhtaa hai
jaise mele me.n ko.ii bachcha
apnii maa.n se bichha.D gayaa hai
us ke siine me.n chhup ke ro.uu.n
meraa dil to ye chaahtaa hai
kaisaa KHush-ra.ng phuul hai vo
jo us ke labo.n pe khil rahaa hai
yaa rab vo mujhe kabhii na bhuule
merii tujh se yahii du.aa hai

Fahmida Riaz
Nazm

jugnu

rukii rukii sii safe.n malgajii ghaTaa.o.n kii
utaar par hai sar-e-sahn raqs piipal kaa
vo kuchh nahii.n hai ab ik jumbish-e-KHafii ke sivaa
KHud apnii kaifiyat-e-niil-guu.n me.n har lahza
ye shaam Duubtii jaatii hai chhuptii jaatii hai
hijaab-e-vaqt sire se hai be-his-o-harakat
rukii rukii dil-e-fitrat kii dha.Dkane.n yak-laKHt
ye ra.ng-e-shaam ki gardish hii aasmaa.n me.n nahii.n
bas ek vaqfa-e-taariik, lamha-e-shahlaa
samaa me.n jumbish-e-mub.ham sii kuchh hu.ii fauran
tulii ghaTaa ke tale bhiige bhiige patto.n se
harii harii ka.ii chi.ngaariyaa.n sii phuuT pa.Dii.n
ki jaise khultii jhapaktii ho.n be-shumaar aa.nkhe.n
ajab ye aa.nkh-micholii thii nuur-o-zulmat kii
suhaanii narm lave.n dete an-ginat jugnuu
ghanii siyaah KHunuk pattiyo.n ke jhurmuT se
misaal-e-chaadar-e-shab-taab jagmagaane lage
ki thartharaate hu.e aa.nsu.o.n se saaGar-e-shaam
chhalak chhalak pa.De jaise baGair saan gumaan
butuun-e-shaam me.n in zinda qumqumo.n kii damak
kisii kii so.ii hu.ii yaad ko jagaatii thii
vo be-panaah ghaTaa vo bharii bharii barsaat
vo scene dekh ke aa.nkhe.n mirii bhar aatii thii.n
mirii hayaat ne dekhii hai.n biis barsaate.n
mire janam hii ke din mar ga.ii thii maa.n merii
vo maa.n ki shakl bhii jis maa.n kii mai.n na dekh sakaa
jo aa.nkh bhar ke mujhe dekh bhii sakii na vo maa.n
mai.n vo pisar huu.n jo samjhaa nahii.n ki maa.n kyaa hai
mujhe khilaa.iyo.n aur daa.iyo.n ne paalaa thaa
vo mujh se kahtii thii.n jab ghir ke aatii thii barsaat
jab aasmaan me.n har suu ghaTaa.e.n chhaatii thii.n
ba-vaqt-e-shaam jab u.Dte the har taraf jugnuu
diye dikhaate hai.n ye bhuulii-bhaTkii ruuho.n ko
maza bhii aataa thaa mujh ko kuchh un kii baato.n me.n
mai.n un kii baato.n me.n rah rah ke kho bhii jaataa thaa
par is ke saath hii dil me.n kasak sii hotii thii
kabhii kabhii ye kasak huuk ban ke uThtii thii
yatiim dil ko mire ye KHayaal hotaa thaa!
ye shaam mujh ko banaa detii kaash ik jugnuu
to maa.n kii bhaTkii hu.ii ruuh ko dikhaataa raah
kahaa.n kahaa.n vo bichaarii bhaTak rahii hogii
kahaa.n kahaa.n mirii KHaatir bhaTak rahii hogii
ye soch kar mirii haalat ajiib ho jaatii
palak kii oT me.n jugnuu chamakne lagte the
kabhii kabhii to mirii hichkiyaa.n sii ba.ndh jaatii.n
ki maa.n ke paas kisii tarah mai.n pahu.nch jaa.uu.n
aur us ko raah dikhaataa hu.aa mai.n ghar laa.uu.n
dikhaa.uu.n apne khilaune dikhaa.uu.n apnii kitaab
kahuu.n ki pa.Dh ke sunaa to mirii kitaab mujhe
phir is ke baa'd dikhaa.uu.n use mai.n vo copy
ki te.Dhii-me.Dhii lakiire.n banii thii.n kuchh jis me.n
ye harf the jinhe.n mai.n ne likkhaa thaa pahle-pahal
aur us ko raah dikhaataa hu.aa mai.n ghar laa.uu.n
dikhaa.uu.n phir use aa.ngan me.n vo gulaab kii bel
sunaa hai jis ko usii ne kabhii lagaayaa thaa
ye jab ki baat hai jab merii umr hii kyaa thii
nazar se guzrii thii.n kal chaar paa.nch barsaate.n

Firaq Gorakhpuri
Nazm

ahl-e-dil aur bhi hain

kyaa hu.aa gar mire yaaro.n kii zabaane.n chup hai.n
mere shaahid mire yaaro.n ke sivaa aur bhii hai.n
ahl-e-dil aur bhii hai.n ahl-e-vafaa aur bhii hai.n
ek ham hii nahii.n duniyaa se KHafaa aur bhii hai.n
ham pe hii KHatm nahii.n maslak-e-shoriida-sirii
chaak-dil aur bhii hai.n chaak-qabaa aur bhii hai.n

Sahir Ludhianvi
Nazm

hubb-e-watan

hu.e yasrib kii samt jab raahii
sayyed-e-abtahii ke hamraahii
rishte ulfat ke saare to.D chale
aur bilkul vatan ko chho.D chale
go vatan se chale the ho ke KHafaa
par vatan me.n thaa sab kaa jii aTkaa
dil-lagii ke bahut mile saamaan
par na bhuule vatan ke registaan
dil me.n aaTho.n pahar khaTakte the
sa.ng-reze zamiin-e-bat.haa ke
ghar jafaa.o.n se jin kii chhuuTaa thaa
dil se rishta na un kaa TuuTaa thaa

Altaf Hussain Hali
Nazm

suna hai maine

galii me.n jaatii ho
jaate hii lauT aatii ho
kahii.n kii chiiz
kahii.n rakh ke bhuul jaatii ho
kitchen me.n!
roz ko.ii pyaalii to.D detii ho
masaala piis kar
sil yuu.nhii chho.D detii ho
nasiihato.n se KHafaa
mashvaro.n se uljhan sii
kamar me.n dard kii lahre.n
rago.n me.n ai.nThan sii

Nida Fazli
Nazm

naya janm

abhii ik saal guzraa hai yahii mausam yahii din the
magar mai.n apne kamre me.n bahut afsurda baiThaa thaa
na ko.ii saa.nvle mahbuub kii yaado.n kaa afsaana
na aivaan-e-zamistaa.n kii taraf jaane kii kuchh KHvaahish
kisii ne haal puuchhaa to bahut hii be-niyaazii se
kahaa jii haa.n KHudaa kaa shukr hai mai.n KHairiyat se huu.n
ko.ii ye puuchhtaa kyuu.n aaj kal ko.ii Gazal likkhii
na jaane baat kyaa hai in dino.n kuchh aisaa lagtaa hai
tumhaarii har Gazal me.n miir kaa andaaz miltaa hai
har ik misre se jaise dhiimii dhiimii aa.nch uThtii hai
tumhaare sher pa.Dh kar jaane kyuu.n mahsuus hotaa hai
ki ko.ii saaz par maddham suro.n me.n gungunaataa hai
magar ik baat puuchhuu.n tum KHafaa to ho na jaa.oge
ye aaKHir kyaa sabab hai aaj kal nazme.n nahii.n likhte
tumhaarii aap-biitii bhii abhii tak naa-mukammal hai
ise to naaqidaan-e-fan ne sunte hii saraahaa hai
mai.n sab suntaa magar ye dil hii dil me.n sochtaa rahtaa
mire ahbaab kyaa jaane.n ki mujh par kyaa guzartii hai
mire afkaar pe ye kaisii viiraanii sii chhaa.ii hai
bahut kuchh sochtaa huu.n phir bhii ab sochaa nahii.n jaataa
bahut kuchh chaahtaa huu.n phir bhii ko.ii bas nahii.n chaltaa
magar is bebasii me.n bhii mire dil kii ye haalat thii
kabhii jab ko.ii achchhii chiiz pa.Dhne ke liye miltii
to pahro.n ruuh par ik vajd kii sii kaifiyat hotii
rago.n me.n merii jaise KHuu.n kii gardish tez ho jaatii
lahuu kaa ek ik qatra ye kahtaa mai.n to zinda huu.n
mirii paamaaliyo.n me.n pal rahii hai ik tavaanaa.ii
yahii aalam rahaa to jaane mai.n kis roz uTh baiThuu.n
basant aayaa to yuu.n aayaa ki mai.n bhii jaise uTh baiThaa
saveraa hote hii har samt se jho.nke havaa.o.n ke
na.ii KHushbuu liye mujh ko jagaane ke liye aa.e
jidhar bhii aa.nkh uThaataa huu.n shafaq kii muskuraahaT hai
vahii suuraj hai lekin aur hii kuchh jagmagaahaT hai
na jaane kaise kaise phuul ab mujh ko bulaate hai.n
na jaane kitne kitne rang se dil ko lubhaate hai.n
fazaa me.n duur tak phaile hu.e vo khet sarso.n ke
ye kahte hai.n ki ab armaa.n nikaalo apne barso.n ke
tumhaare saamne phailaa hu.aa maidaan saaraa hai
ko.ii aavaaz detaa hai ki aa.o tum hamaare ho
mirii dhartii ke beTe merii duniyaa ke dulaare ho
tumhaarii aa.nkh me.n jo KHvaab so.e hai.n vo mere hai.n
tumhaare ashk ne jo biij bo.e hai.n vo mere hai.n
isii vaadii me.n phir se lauT kar ab tum ko aanaa hai
tumhaarii hii ye bastii hai tumhii.n ko phir basaanaa hai
ab is bastii me.n rakhte hii qadam kuchh aisaa lagtaa hai
ki is kaa zarra zarra patta patta kuchh nayaa saa hai
har ik raste pe jaise kuchh na.e chehre se milte hai.n
yahii jii chaahtaa hai jo mile ab us se ye puuchhe.n
tumhaaraa naam kyaa hai? tum kahaa.n ke rahne vaale ho
kuchh aisaa jaan pa.Dtaa hai ki pahle bhii mile hai.n ham
rahe hai.n saath yaa ik duusre ko jaante hai.n ham
agar tum saath the to tum bhii shaayad dost the mere
mujhe yaad aayaa dono.n saath hii college me.n pa.Dhte the
vo saare dosto.n kaa jam.a honaa mere kamre me.n
vo gap shap qahqahe vo apne apne ishq ke qisse
vo miiras road kii baate.n vo charche KHuub-ruuyo.n ke
kabhii aavaaragardii apnii un viiraan sa.Dko.n kii
kabhii baato.n me.n raate.n kaaTnaa sunsaan jaa.Do.n kii
kabhii vo chaandnii me.n apnaa yuu.n hii ghuumte rahnaa
kabhii vo chaa.e kii mezo.n pe ghanTo.n baiThnaa sab kaa
vo baate.n ilm-o-hikmat kii kabhii shikve-shikaayat kii
tumhe.n to yaad hogaa un me.n hii ik dost shaa.ir thaa
zaraa dekho to mujh ko Gaur se shaayad vo mai.n hii thaa
bahut din me.n mile hai.n ham to aa.o aaj jii bhar kar
ha.nse.n bole.n kahii.n aavaaragardii ke liye nikle.n
chale.n aur chal ke saare dosto.n ko phir bulaa laa.e.n
sajaa.e.n aaj phir mahfil kahii.n piine pilaane kii
mai.n tum ko aaj apnii kuchh na.ii baate.n bataa.uu.ngaa
mai.n tum ko aaj apnii kuchh na.ii nazme.n sunaa.uu.ngaa

Khalilur Rahman Azmi
Nazm

aaghaz

kin KHayaalaat me.n yuu.n rahtii ho kho.ii kho.ii
chaa.e kaa paanii patiilii me.n ubal jaataa hai
raakh ko haath lagaatii ho to jal jaataa hai
ek bhii kaam saliiqe se nahii.n ho paataa
ek bhii baat mohabbat se nahii.n kahtii ho
apnii har ek sahelii se KHafaa rahtii ho
raat bhar naavile.n pa.Dhtii ho na jaane kis kii
ek jampar nahii.n sii paa.ii ho kitne din se
bhaa.ii kaa haath bhii Gusse se jhaTak detii ho
mez par yuu.n hii kitaabo.n ko paTak detii ho
kin KHayaalaat me.n yuu.n rahtii ho kho.ii kho.ii

Kafeel Aazar Amrohvi
Nazm

zindagi

tamtamaa.e hu.e aariz pe ye ashko.n kii qataar
mujh se is darja KHafaa aap se itnii bezaar
mai.n ne kab terii mohabbat se kiyaa hai inkaar

Jan Nisar Akhtar
Nazm

dast-e-tah-e-sang-amada

bezaar fazaa darpa-e-aazaar sabaa hai
yuu.n hai ki har ik hamdam-e-deriina KHafaa hai
haa.n baada-kasho aayaa hai ab rang pe mausam
ab sair ke qaabil ravish-e-aab-o-havaa hai
umDii hai har ik samt se ilzaam kii barsaat
chhaa.ii hu.ii har daa.ng malaamat kii ghaTaa hai
vo chiiz bharii hai ki sulagtii hai suraahii
har kaasa-e-mai zahr-e-halaahal se sivaa hai
haa.n jaam uThaa.o ki ba-yaad-e-lab-e-shiirii.n
ye zahr to yaaro.n ne ka.ii baar piyaa hai
is jazba-e-dil kii na sazaa hai na jazaa hai
maqsuud-e-rah-e-shauq vafaa hai na jafaa hai
ehsaas-e-Gam-e-dil jo Gam-e-dil kaa sila hai
us husn kaa ehsaas hai jo terii ataa hai
har sub.h-e-gulistaa.n hai tiraa ruu-e-bahaarii.n
har phuul tirii yaad kaa naqsh-e-kaf-e-paa hai
har bhiigii hu.ii raat tirii zulf kii shabnam
Dhaltaa hu.aa suuraj tire ho.nTo.n kii fazaa hai
har raah pahu.nchtii hai tirii chaah ke dar tak
har harf-e-tamannaa tire qadmo.n kii sadaa hai
ta.aziir-e-siyaasat hai na Gairo.n kii KHataa hai
vo zulm jo ham ne dil-e-vahshii pe kiyaa hai
zindaan-e-rah-e-yaar me.n paaband hu.e ham
zanjiir-ba-kaf hai na ko.ii band-bapaa hai
''majbuurii o davaa-e-giraftaarii-e-ulfat
dast-e-tah-e-sa.ng-aamada paimaan-e-vafaa hai''

Faiz Ahmad Faiz
Nazm

shararti laDke aur qawwali

apne teacher ko nachaa.e.n to maza aa jaa.e
un kii ainak ko churaa.e.n to maza aa jaa.e
un ke DanDe ko chhupaa.e.n to maza aa jaa.e
aaj jii bhar ke sataa.e.n to maza aa jaa.e
kaun saa din hai jo teacher ne nahii.n maaraa hai
ham ne har kaam kiyaa phir bhii to phaTkaaraa hai
un kaa Gussa hai ki dahkaa hu.aa a.ngaaraa hai
aag me.n aag lagaa.e.n to maza aa jaa.e
mu.nh pe chaa.nTe bhii diye ham ne banaayaa murGaa
ham ne school se har roz ye tamGa paayaa
kitne jallaad hai.n teacher are allaah allaah
ham bhii mu.nh un kaa cha.Dhaa.e.n to maza aa jaa.e
vo pa.Dhaate hai.n to ausaan KHataa hote hai.n
haq pa.Dhaa.ii ke ye dushvaar adaa hote hai.n
ham agar rote hai.n phir aur KHafaa hote hai.n
aaj un ko bhii rulaa.e.n to maza aa jaa.e
un kii kursii pe chalo aa.o paTaaKHe baa.ndhe.n
jab vo aa.e.n to paTaaKHo.n kaa ta.Dapnaa dekhe.n
ham bhii shaagird-e-sitam-gaar hai.n itnaa maane.n
piichhe piichhe hii bhagaa.e.n to mazaa aa jaa.e
un kii jo chiiz hai chupke se chhupaa de.n aa.o
paan bii.Dii kii jo Dibiyaa hai u.Daa de.n aa.o
ham sharaarat ke na.e jaal bichhaa de.n aa.o
vo kisii jaal me.n aa.e.n to mazaa aa jaa.e
vo agar saamne aa jaa.e.n to mil kar chiiKHe.n
vo kahe.n chup raho ham aur bhii ha.ns kar chiiKHe.n
aur vo aa.nKHe.n dikhaa.e.n to aka.D kar chiiKHe.n
un ko diivaana banaa.e.n to maza aa jaa.e

Hasrat Jaipuri
Nazm

tanhai

rahbaro.n se shikva hai
shauq se KHafaa hote
haa.n magar taGaaful me.n
jur.at-aazmaa hote

Rahi Masoom Raza
Nazm

yakum may

qaabil-e-izzat hai.n is duniyaa ke mehnat-kash avaam
mulk kii daulat hai.n ye, vaajib hai in kaa ehtiraam
us ke ye member hai.n labour-union hai jis kaa naam
in kii mehnat ke diye jaa.e.nge in ko puure daam
ye nahii.n hogaa KHafaa ho kar dihaa.Dii kaaT dii
aadhe raste laa.e aur engine se gaa.Dii kaaT dii

Syed Mohammad Jafri
Nazm

surayya ki guDiya

vo naadaan gu.Diyaa KHafaa ho ga.ii
vo ro.ii vo chillaa.ii aur so ga.ii

Sufi Ghulam Mustafa Tabassum
Nazm

hamare kamre mein pattiyon ki mahak ne

cigarette ke raqs karte dhu.e.n se mil kar,
ajiib maahaul kar diyaa hai
aur is pe ab ye gha.Dii kii Tik-Tik ne,
dil udaasii se bhar diyaa hai
kisii zamaane me.n ham ne,
'naasir', 'faraaz', 'mohsin', 'jamaal', 'sarvat' ke sher apnii chahaktii diivaar par likhe the
ab is me.n siilan kyuu.n aa ga.ii hai....?
hamaaraa bistar ki jis me.n ko.ii shikan nahii.n hai, usii pe kab se,
(vo daa.e.n jaanib, mai.n baa.e.n jaanib....)
na jaane kab se daraaz hai.n ham....!!!
mai.n us se shaayad KHafaa nahii.n huu.n,
use bhii ko.ii gila nahii.n hai
magar hamaarii KHamiida pushte.n jo pichhlii kitnii hii saa.ato.n se
bas ek duuje ko tak rahii hai.n....
vo thak ga.ii hai

Fariha Naqvi
Nazm

zimmedari

saare teachers bhii rahte hai.n ba-har-haal KHafaa
mai.n kisii vaqt unhe.n KHush hii nahii.n kar paataa

Asna Badr
Nazm

aage mat socho

sunte ho ik baar vahaa.n phir ho aa.o
ek baar phir us kii chaukhaT par jaa.o
darvaaze par dhiire dhiire dastak do
jab vo saamne aa.e to parnaam karo
mai.n kuchh bhuul gayaa huu.n shaayad us se kaho
kyaa bhuulaa huu.n yaad nahii.n aataa kah do
us se puuchho ''kyaa tum batlaa saktii ho''
vo ha.ns de to kah do jo kahnaa chaaho
aur KHafaa ho jaa.e to aage mat socho

Mohammad Alvi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now