Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "KHizaa.o.n"

Nazm MATCHES FOR "KHizaa.o.n"

Nazm

hello best friend

tum musavvir kaa fusuu.n tum ho suKHanvar kaa kamaal
tum KHizaa.o.n se bahut duur bahaaro.n kaa KHayaal
tum ne dekhaa hai masarrat kaa safar Gam kaa zavaal
tum ne ha.nstii hu.ii aa.nkho.n se bhii puuchhe hai.n savaal

Balmohan panday
Nazm

mera KHwab thin jo mohabbaten

mirii aarzuu.o.n ke devtaa
mai.n ajiib thii mai.n ajab rahii
mujhe dasht-e-Gam ko bhii chhaanne kii talab rahii
mirii baat me.n ko.ii raat aa ke Thahar ga.ii
mirii zaat me.n ko.ii zaat aa ke guzar ga.ii
mujhe phir bhii dard ko jaa.nchne kii talab rahii
ka.ii ranj bhii hai.n nadaamato.n se mile hu.e
ka.ii shahr bhii hai.n adaavato.n se bhare hu.e
kisii Gam ke zor se zard hai miraa shahr bhii
mujhe yaad hai kisii shaam-e-Gam kaa vo qahr bhii
ye jo log hai.n ye ba.De ajiib se log hai.n
ye abhii talak na samajh sake
hai kamaal kyaa
hai mohabbato.n kaa junuub kyaa
hai shumaal kyaa
hai uruuj-e-dard-e-habiib kyaa
hai zavaal kyaa
ye samajh sake hii nahii.n
hai ham ko malaal kyaa
mujhe vasl-e-yaar ke falsafe pe yaqiin hai
ye jo hijr hai ye kisii gumaan se kam nahii.n
mirii aa.nkh dasht hai
muddato.n se jo nam nahii.n
sabhii kuchh hai bas yahaa.n tum nahii.n
ai habiib-e-man
ai tabiib-e-jaa.n
ye jo chaashnii hai huruuf me.n
tirii den hai
ye jo naqsh hai.n mirii aa.nkh me.n
hai tiraa karam
jo miThaas hai mirii baat me.n
tirii baat hai
miraa mujh me.n kuchh bhii nahii.n rahaa
tirii zaat hai
ai faqiih-e-shahr tiraa bayaan bhii jhuuT hai
mujhe ishq hai to phir is me.n ko.ii daliil kyaa
mujhe zabt miltaa hai roz gar
to ye dard dard-e-sabiil kyaa
mirii aarzuu.o.n ke devtaa
zaraa dekh le
mirii ruuh vajd kii kaifiyat me.n ghirii hu.ii
mai.n jo saa.ns saa.ns marii hu.ii
tire dar pe kab se pa.Dii hu.ii
kabhii dekh le
kabhii saar le
ye bataa mujhe
hai qusuur kyaa
mire devtaa mire baadshaah
ba.De zaKHm hai.n
ba.De zaKHm hai.n mirii ruuh par
tujhe terii shaan kaa vaasta
mire indimaal ke vaaste
zaraa muskuraa
zaraa muskuraa ki sukuu.n mile
zaraa duur mujh se fishaar ho
mire chaar-suu tiraa pyaar ho
mire jism-o-jaa.n kii KHizaa.o.n me.n bhii bahaar ho
to phir is ke baad vazaahate.n
ye adaavate.n
mujhe kab hai.n raas saKHvaate.n
vahii aafate.n
ye musiibate.n
mirii zaKHm-zaKHm aqiidate.n
mirii dard dard iraadate.n
mai.n haqiiqato.n se kaTii hu.ii mire chaaraagar
mujhe raas aa.ii.n aziyyate.n
miraa KHvaab thii.n jo mohabbate.n

Fauziya rabab
Nazm

tumhaari manzil kahin nahin hai

ye shahr ye bastiyaa.n ye qarye
bas ek be-naam KHauf kii zad me.n aa ga.e hai.n
tumhaarii aa.nkho.n me.n
kin KHizaa.o.n kii zard viiraaniyaa.n basii hai.n
tumhaare ho.nTo.n pe zahr-e-be-ra.ng kii tahe.n kis liye jamii hai.n
tumhaare chehro.n kaa KHaak saa ra.ng
kaun se dard kaa asar hai

Fayyaz tahseen
Nazm

nemul-badal

mujhe ma.aluum hai ki kuchh na badlegaa
na shaaKH-e-hijr par aasaar aa.e.nge KHizaa.o.n ke
KHayaalo.n ke samundar me.n na kuchh tabdiilii aa.egii
na kirdaaro.n ke roz o shab me.n ko.ii farq aa.egaa
magar in nazmo.n Gazlo.n kii kahaanii aur giito.n kii
aatii jaatii lahro.n se
ye meraa KHushk saahil
sairaab to hotaa rahe
mujh ko mere hone kaa ehsaas to hotaa rahe

Malik Ehsan
Nazm

nai sadi tujhe shair salam kahta hai

ga.ii sadii ne to kyaa kyaa zaliil-o-KHvaar kiyaa
jo be-gunaah the un ko bhii sangsaar kiyaa
KHudaa qubuul kare amn kii du.aa.o.n ko
zamii.n pe KHauf ke baadal na ab kabhii chhaa.e.n
na ko.ii aag lage barf ke pahaa.Do.n me.n
KHizaa.o.n se na gulistaa.n ke phuul murjhaa.e.n
na.ii sadii nayaa mausam na.ii havaa denaa
mohabbato.n ke chaman har taraf khilaa denaa
na.ii sadii tujhe shaa.ir salaam kahtaa hai

Nazir Fatehpuri
Nazm

kahani sunao

kahaanii sunaa.o kahaanii sunaa.o
kahaanii na.ii yaa puraanii sunaa.o
kahaanii puraanii vo raajaa.o.n vaalii
vahii shaan-o-shaukat shahanshaaho.n vaalii
vo haathii vo gho.De vo mahle do-mahle
tasavvur se jin kii zaraa dil to bahle
vo zarriin gha.Diyaa.n vo cham-cham zamaane
thaa sone kii chi.Diyaa ye bhaarat hamaaraa
bulandii pe thaa is kii qismat kaa taaraa
ye sab kuchh hame.n aaj naanii sunaa.o
kahaanii sunaa.o kahaanii sunaa.o
kahaanii na.ii yaa puraanii sunaa.o
sunaa.o ki jab thaa KHizaa.o.n kaa mausam
jab apne vatan hii me.n majbuur the ham
Gulaamii kaa thaa daur hindostaa.n me.n
dahakte alaav the jannat-nishaa.n me.n
hukuumat thii Gairo.n kii mahkuum ham the
zamii.n tang thii aasmaanii sitam the
chalii phir jo badlaa.o kii tez aa.ndhii
uThaa ek nehru uThaa ek gaa.ndhii
milii un ko jo kaamraanii sunaa.o
kahaanii sunaa.o kahaanii sunaa.o
kahaanii na.ii yaa puraanii sunaa.o
kahaanii anokhii kahaanii niraalii
kahaanii na.e atomii daur vaalii
sitaaro.n kaa insaa.n kaa tasKHiir karnaa
KHalaa.o.n ko dhartii kii jaagiir karnaa
sunaa.o taraqqii ne kyaa kyaa dikhaayaa
bataa.o jo qadmo.n tale chaa.nd aayaa
karishme jo science ke jalva-gar hai.n
hamaare tumhaare jo zer-e-asar hai.n
haqiiqat ye sab mu.nh-zabaanii sunaa.o
kahaanii sunaa.o kahaanii sunaa.o
kahaanii na.ii yaa puraanii sunaa.o

Haidar Bayabani
Nazm

maqam-e-aKHir-e-shab

na jaane kitnii nigaaho.n se nuur chhiinaa gayaa
dayaar-e-dard ke mahlo.n kii raushnii ke liye
na jaane kitne dilo.n se lahuu nicho.Daa gayaa
na.e KHudaa.o.n ke chehro.n kii taazgii ke liye
na jaane kitne gharo.n ke diye bujhaa.e ga.e
shabo.n ke raaj-dulaaro.n kii zindagii ke liye

Riyaz Anwar
Nazm

hijrat ki nazm

palak ke jhapakte ka.ii saal biite
mai.n vaapas jo lauTii to mai.n ne ye dekhaa
mire ghar kii har chhat Tapakne lagii thii
dar-o-baam kaa rang maddham pa.Daa thaa
vo aa.ngan ki jis me.n mahaktii thii champaa
us aa.ngan kaa har phuul murjhaa gayaa thaa
faqat ek bargad ki tanhaa kha.Daa thaa
vo tanhaa thaa aur jaane kyaa sochtaa thaa
KHizaa.o.n ne har-suu baseraa kiyaa thaa
yahii vo jagah thii jahaa.n meraa bachpan
ka.ii mehrbaa.n narm haatho.n me.n guzraa
yahii.n par mirii tund-KHuu dha.Dkano.n ne
na.e mausamo.n kii bashaarat sunii thii
mirii saarii sub.he.n mirii saarii shaame.n
is aa.ngan kii u.Dtii hu.ii titliyaa.n thii.n
magar ek din aisii saa.at bhii aa.ii
miraa ghar faqat chaar lafzo.n kii andhii aqiidat ke aage
aap hii aap chup-chaap ho kar
sabhii raabto.n se sabhii vaasto.n se alag ho gayaa thaa
bayaaz-e-nazar ke vo mauhuum nuqte
bhii phail ke daa.ere ban chuke hai.n
na.ii zindagii me.n
puraane dino.n kii
haqiiqat faqat kaa.nch kii TuuTtii chuu.Diyaa.n rah ga.ii hai
ki jin ko tashaKHKHus kii haajat nahii.n hai

Shaheen Mufti
Nazm

mera kaghaz kai janmon se safed hai

diyaa bujhaa do
ab a.ndhere se KHatra nahii.n
raushnii ke Dasne kaa
imkaan ziyaada hai
buKHaar kii hiddat me.n bahte vajuud par
ik vajd taarii ho gayaa
ta.Daptii ruuh se ju.Daa laa-shu.uurii haashiya dekh kar
saa.nso.n kii mahak badalne lagii
jism jalne kii badbuu se uktaa.e
kamre kii vahshat mu.nh chhupaa.e
ik kone me.n baiThii aag
sard-guu.n hai
chiiKH kaa dauraaniya
raat ke aaKHirii pahar tak mahduud thaa
KHizaa.o.n kii majmuu.ii hikmat-e-amalii
bahaar shikast khaatii dikhaa.ii dii
din ke saa.e ba.Dhne lage
aur phir phuul ne KHud-kushii kii
jis me.n zindagii kii suu.ii naachtii hai
vo lamha mar gayaa hai
ko.ii qahqaha guu.njtaa hu.aa samaa.ato.n pe thappa.D lagaa
ha.nsne se vahshat bedaar hone lagii
insaanii aavaazo.n kii guu.nj se duur bhaagtii
chanaab kinaare ret par baiThii mai.n
kyaa likhuu.n
siyaahii surKH hai aur
meraa kaaGaz ka.ii janmo.n se safed hai

Omainuz Zahra Sayyad
Nazm

aao mil kar chalen

ek duuje ke dil kii vo sarhad bane.n
jis ke nazdiik bhii Gam bhaTak na sake.n
vo puraanii KHizaa.o.n ke kaa.nTe sabhii
jo dilo.n me.n chubhe rah ga.e the kabhii
un ko mil kar chune.n

Saqib Mahmood
Nazm

khilaune

chune mai.n ne maujo.n se motii javaahir se jyotii bahaaro.n se raag
liye mai.n ne KHosho.n se KHushbuu ke toshe
ulaT kar nigaaho.n se raaho.n ke goshe
ba.Dhaa mai.n chalaa mai.n liye saath saavan kii purvaa chanaaro.n kii aag bahaaro.n ke raag
na kaam aa.e maujo.n ke motii javaahir kii jyotii na KHushbuu na raag
muqaddar me.n paiham nujuum-e-shab-e-Gam
masarrat kaa maatam musiibat kaa aalam
vo saare KHaziine KHizaa.o.n ne chhiine ki siine me.n hai ab chanaaro.n kii aag na KHushbuu na raag
milii.n Gam kii mauje.n masaa.ib kii fauje.n rag-o-pai ke andar samundar ke raag
haqaa.eq ke zindaa.n me.n hairaa.n pareshaa.n
tasavvur taKHayyul tanaffus se naalaa.n
mujhii ko lagaane bujhaane ko paa.ii jahaa.n ne suhaane chanaaro.n kii aag samundar ke raag
magar tere daaman me.n phuulo.n ke maskan me.n suntaa huu.n aksar bahaaro.n ke raag
tire narm KHoshe mohabbat ke toshe
mire bhole-bhaale hasii.n dil ke goshe
mire ranj-o-Gam mere fikr-o-alam ko dikhaate hai.n aakar chanaaro.n kii aag sitaaro.n kii aag

Yusuf Zafar
Nazm

aatish-e-KHufta

KHizaa.n-rasiida hai.n gar bahaare.n
inhii KHizaa.o.n kaa jashn hogaa
zamaane vo bhii to yaad ho.nge
jo roz jashn-e-bahaar hotaa
na jaa.o patto.n pe Tahniyo.n par
jo suukh kar charmaraa ga.ii hai.n
abhii bhii in me.n hai aag pinhaa.n
abhii hai.n sho.ale bhii KHvaab-aagii.n
KHarosh chingaariyo.n kaa KHufta
na chhe.Do in ko
abhii na chhe.Do

Rizwanullah
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

kabhi kabhi

kabhii kabhii mire dil me.n KHayaal aataa hai
ki zindagii tirii zulfo.n kii narm chhaa.nv me.n
guzarne paatii to shaadaab ho bhii saktii thii
ye tiirgii jo mirii ziist kaa muqaddar hai
tirii nazar kii shu.aa.o.n me.n kho bhii saktii thii
ajab na thaa ki mai.n begaana-e-alam ho kar
tire jamaal kii ra.anaa.iyo.n me.n kho rahtaa
tiraa gudaaz-badan terii niim-baaz aa.nkhe.n
inhii hasiin fasaano.n me.n mahv ho rahtaa
pukaartii.n mujhe jab talKHiyaa.n zamaane kii
tire labo.n se halaavat ke ghuu.nT pii letaa
hayaat chiiKHtii phirtii barahna sar aur mai.n
ghanerii zulfo.n ke saa.e me.n chhup ke jii letaa
magar ye ho na sakaa aur ab ye aalam hai
ki tuu nahii.n tiraa Gam terii justujuu bhii nahii.n
guzar rahii hai kuchh is tarah zindagii jaise
ise kisii ke sahaare kii aarzuu bhii nahii.n
zamaane bhar ke dukho.n ko lagaa chukaa huu.n gale
guzar rahaa huu.n kuchh an-jaanii rahguzaaro.n se
muhiib saa.e mirii samt ba.Dhte aate hai.n
hayaat o maut ke pur-haul KHaarzaaro.n se
na ko.ii jaada-e-manzil na raushnii kaa suraaG
bhaTak rahii hai KHalaa.o.n me.n zindagii merii
inhii KHalaa.o.n me.n rah jaa.uu.ngaa kabhii kho kar
mai.n jaantaa huu.n mirii ham-nafas magar yuu.nhii
kabhii kabhii mire dil me.n KHayaal aataa hai

Sahir Ludhianvi
Nazm

waqt

ye kaa.enaat-e-aziim
lagtaa hai
apnii azmat se
aaj bhii mutma.in nahii.n hai
ki lamha lamha
vasii.a-tar aur vasii.a-tar hotii jaa rahii hai
ye apnii baa.nhe.n pasaartii hai
ye kahkashaa.o.n kii u.ngliyo.n se
na.e KHalaa.o.n ko chhuu rahii hai
agar ye sach hai
to har tasavvur kii had se baahar
magar kahii.n par
yaqiinan aisaa ko.ii KHalaa hai
ki jis ko
in kahkashaa.o.n kii u.ngliyo.n ne
ab tak chhu.aa nahii.n hai
KHalaa
jahaa.n kuchh hu.aa nahii.n hai
KHalaa
ki jis ne kisii se bhii ''kun'' sunaa nahii.n hai
jahaa.n abhii tak KHudaa nahii.n hai
vahaa.n
ko.ii vaqt bhii na hogaa
ye kaa.enaat-e-aziim
ik din
chhu.egii
is an-chhu.e KHalaa ko
aur apne saare vajuud se
jab pukaaregii
''kun''
to vaqt ko bhii janam milegaa
agar janam hai to maut bhii hai
mai.n sochtaa huu.n
ye sach nahii.n hai
ki vaqt kii ko.ii ibtidaa hai na intihaa hai
ye Dor lambii bahut hai
lekin
kahii.n to is Dor kaa siraa hai
abhii ye insaa.n ulajh rahaa hai
ki vaqt ke is qafas me.n
paidaa hu.aa
yahii.n vo palaa-ba.Dhaa hai
magar use ilm ho gayaa hai
ki vaqt ke is qafas se baahar bhii ik fazaa hai
to sochtaa hai
vo puuchhtaa hai
ye vaqt kyaa hai

Javed Akhtar
Nazm

la-ilaha-illallah

KHudii kaa sirr-e-nihaa.n laa-ilaaha-illallaah
KHudii hai teG fasaa.n laa-ilaaha-illallaah
ye daur apne baraahiim kii talaash me.n hai
sanam-kada hai jahaa.n laa-ilaaha-illallaah
kiyaa hai tuu ne mataa-e-Guruur kaa saudaa
fareb-e-suud-o-ziyaa.n laa-ilaaha-illallaah
ye maal-o-daulat-e-duniyaa ye rishta o paivand
butaan-e-vahm-o-gumaa.n laa-ilaaha-illallaah
KHirad hu.ii hai zamaan o makaa.n kii zunnaarii
na hai zamaa.n na makaa.n laa-ilaaha-illallaah
ye naGma fasl-e-gul-o-laala kaa nahii.n paaband
bahaar ho ki KHizaa.n laa-ilaaha-illallaah
agarche but hai.n jamaa.at kii aastiino.n me.n
mujhe hai hukm-e-azaa.n laa-ilaaha-illallaah

Allama Iqbal
Nazm

hasan kuza-gar (1)

jahaan-zaad niiche galii me.n tire dar ke aage
ye mai.n soKHtaa-sar hasan-kuuzaa-gar huu.n!
tujhe sub.h baazaar me.n buu.Dhe attaar yuusuf
kii dukkaan par mai.n ne dekhaa
to terii nigaaho.n me.n vo taabnaakii
thii mai.n jis kii hasrat me.n nau saal diivaana phirtaa rahaa huu.n
jahaa.n-zaad nau saal diivaana phirtaa rahaa huu.n!
ye vo daur thaa jis me.n mai.n ne
kabhii apne ranjuur kuuzo.n kii jaanib
palaT kar na dekhaa
vo kuuze mere dast-e-chaabuk ke putle
gil-o-ra.ng-o-roGan kii maKHluuq-e-be-jaa.n
vo sar-goshiy.n me.n ye kahte
hasan kuuza-gar ab kahaa.n hai?
vo ham se KHud apne amal se
KHudaa-vand ban kar KHudaa.o.n ke maanind hai ruu-e-gardaa.n!
jahaa.n-zaad nau saal kaa daur yuu.n mujh pe guzraa
ki jaise kisii shahr-e-madfuun par vaqt guzre
taGaaro.n me.n miTTii
kabhii jis kii KHushbuu se vaarafta hotaa thaa mai.n
sa.ng-basta pa.Dii thii
suraahii-o-miinaa-o-jaam-o-subuu aur faanuus o gul-daa.n
mirii hech-maayaa ma.iishat ke iz.haar-e-fan ke sahaare
shikasta pa.De the
mai.n KHud mai.n hasan kuuza-gar paa-ba-gil KHaak-bar-sar barhana
sar-e-chaak zholiidaa-muu sar-ba-zaanuu
kisii Gam-zada devtaa kii tarah vaahima ke
gil-o-laa se KHvaabo.n ke sayyaal kuuze banaataa rahaa thaa
jahaa.n-zaad nau saal pahle
tuu naadaa.n thii lekin tujhe ye KHabar thii
ki mai.n ne hasan kuuza-gar ne
tirii qaaf kii sii ufuq-taab aa.nkho.n
me.n dekhii hai vo taabnaakii
ki jis se mere jism o jaa.n abr o mahtaab kaa
rah-guzar ban ga.e the
jahaa.n-zaad baGdaad kii KHvaab-guu.n raat
vo ruud-e-dajlaa kaa saahil
vo kashtii vo mallaah kii band aa.nkhe.n
kisii KHasta-jaa.n ra.nj-bar kuuza-gar ke liye
ek hii raat vo kohrbaa thii
ki jis se abhii tak hai paivast us kaa vajuud
us kii jaa.n us kaa paikar
magar ek hii raat kaa zauq dariyaa kii vo lahr niklaa
hasan kuuza-gar jis me.n Duubaa to ubhraa nahii.n hai!

Noon Meem Rashid
Nazm

taswir-e-dard

nahii.n minnat-kash-e-taab-e-shuniidan daastaa.n merii
KHamoshii guftuguu hai be-zabaanii hai zabaa.n merii
ye dastuur-e-zabaa.n-bandii hai kaisaa terii mahfil me.n
yahaa.n to baat karne ko tarastii hai zabaa.n merii
uThaa.e kuchh varaq laale ne kuchh nargis ne kuchh gul ne
chaman me.n har taraf bikhrii hu.ii hai daastaa.n merii
u.Daa lii qumriyo.n ne tuutiyo.n ne andaliibo.n ne
chaman vaalo.n ne mil kar luuT lii tarz-e-fuGaa.n merii
Tapak ai sham.a aa.nsuu ban ke parvaane kii aa.nkho.n se
saraapaa dard huu.n hasrat bharii hai daastaa.n merii
ilaahii phir maza kyaa hai yahaa.n duniyaa me.n rahne kaa
hayaat-e-jaavedaa.n merii na marg-e-naa-gahaa.n merii
miraa ronaa nahii.n ronaa hai ye saare gulistaa.n kaa
vo gul huu.n mai.n KHizaa.n har gul kii hai goyaa KHizaa.n merii
darii.n hasrat saraa umriist afsuun-e-jaras daaram
z faiz-e-dil tapiidan-haa KHarosh-e-be-nafas daaram
riyaaz-e-dahr me.n naa-aashnaa-e-bazm-e-ishrat huu.n
KHushii rotii hai jis ko mai.n vo mahruum-e-masarrat huu.n
mirii big.Dii hu.ii taqdiir ko rotii hai goyaa.ii
mai.n harf-e-zer-e-lab sharminda-e-gosh-e-samaa.at huu.n
pareshaa.n huu.n mai.n musht-e-KHaak lekin kuchh nahii.n khultaa
sikandar huu.n ki aa.iina huu.n yaa gard-e-kuduurat huu.n
ye sab kuchh hai magar hastii mirii maqsad hai qudrat kaa
saraapaa nuur ho jis kii haqiiqat mai.n vo zulmat huu.n
KHaziina huu.n chhupaayaa mujh ko musht-e-KHaak-e-sahraa ne
kisii ko kyaa KHabar hai mai.n kahaa.n huu.n kis kii daulat huu.n
nazar merii nahii.n mamnuun-e-sair-e-arsa-e-hastii
mai.n vo chhoTii sii duniyaa huu.n ki aap apnii vilaayat huu.n
na sahbaa huu.n na saaqii huu.n na mastii huu.n na paimaana
mai.n is mai-KHaana-e-hastii me.n har shai kii haqiiqat huu.n
mujhe raaz-e-do-aalam dil kaa aa.iina dikhaataa hai
vahii kahtaa huu.n jo kuchh saamne aa.nkho.n ke aataa hai
ataa aisaa bayaa.n mujh ko hu.aa ra.ngii.n-bayaano.n me.n
ki baam-e-arsh ke taa.ir hai.n mere ham-zabaano.n me.n
asar ye bhii hai ik mere junuun-e-fitna-saamaa.n kaa
miraa aa.iina-e-dil hai qazaa ke raaz-daano.n me.n
rulaataa hai tiraa nazzaara ai hindostaa.n mujh ko
ki ibrat-KHez hai teraa fasaana sab fasaano.n me.n
diyaa ronaa mujhe aisaa ki sab kuchh de diyaa goyaa
likhaa kalk-e-azal ne mujh ko tere nauha-KHvaano.n me.n
nishaan-e-barg-e-gul tak bhii na chho.D us baaG me.n gulchii.n
tirii qismat se razm-aaraa.iyaa.n hai.n baaGbaano.n me.n
chhupaa kar aastii.n me.n bijliyaa.n rakkhii hai.n garduu.n ne
anaadil baaG ke Gaafil na baiThe.n aashiyaano.n me.n
sun ai Gaafil sadaa merii ye aisii chiiz hai jis ko
vaziifa jaan kar pa.Dhte hai.n taa.ir bostaano.n me.n
vatan kii fikr kar naadaa.n musiibat aane vaalii hai
tirii barbaadiyo.n ke mashvare hai.n aasmaano.n me.n
zaraa dekh us ko jo kuchh ho rahaa hai hone vaalaa hai
dharaa kyaa hai bhalaa ahd-e-kuhan kii daastaano.n me.n
ye KHaamoshii kahaa.n tak lazzat-e-fariyaad paidaa kar
zamii.n par tuu ho aur terii sadaa ho aasmaano.n me.n
na samjhoge to miT jaa.oge ai hindostaa.n vaalo
tumhaarii daastaa.n tak bhii na hogii daastaano.n me.n
yahii aa.iin-e-qudrat hai yahii usluub-e-fitrat hai
jo hai raah-e-amal me.n gaam-zan mahbuub-e-fitrat hai
huvaidaa aaj apne zaKHm-e-pinhaa.n kar ke chho.Duu.ngaa
lahuu ro ro ke mahfil ko gulistaa.n kar ke chho.Duu.ngaa
jalaanaa hai mujhe har sham-e-dil ko soz-e-pinhaa.n se
tirii taariik raato.n me.n charaaGaa.n kar ke chho.Duu.ngaa
magar Guncho.n kii suurat huu.n dil-e-dard-aashnaa paidaa
chaman me.n musht-e-KHaak apnii pareshaa.n kar ke chho.Duu.ngaa
pironaa ek hii tasbiih me.n in bikhre daano.n ko
jo mushkil hai to is mushkil ko aasaa.n kar ke chho.Duu.ngaa
mujhe ai ham-nashii.n rahne de shaGl-e-siina-kaavii me.n
ki mai.n daaG-e-mohabbat ko numaayaa.n kar ke chho.Duu.ngaa
dikhaa duu.ngaa jahaa.n ko jo mirii aa.nkho.n ne dekhaa hai
tujhe bhii suurat-e-aa.iina hairaa.n kar ke chho.Duu.ngaa
jo hai pardo.n me.n pinhaa.n chashm-e-biinaa dekh letii hai
zamaane kii tabii.at kaa taqaazaa dekh letii hai
kiyaa rif.at kii lazzat se na dil ko aashnaa tuu ne
gizaarii umr pastii me.n misaal-e-naqsh-e-paa tuu ne
rahaa dil-basta-e-mahfil magar apnii nigaaho.n ko
kiyaa bairuun-e-mahfil se na hairat-aashnaa tuu ne
fidaa kartaa rahaa dil ko hasiino.n kii adaa.o.n par
magar dekhii na us aa.iine me.n apnii adaa tuu ne
ta.assub chho.D naadaa.n dahr ke aa.iina-KHaane me.n
ye tasviire.n hai.n terii jin ko samjhaa hai buraa tuu ne
saraapaa naala-e-bedaad-e-soz-e-zindagii ho jaa
sapand-aasaa girah me.n baa.ndh rakkhii hai sadaa tuu ne
safaa-e-dil ko kyaa aaraa.ish-e-ra.ng-e-ta.alluq se
kaf-e-aa.iina par baa.ndhii hai o naadaa.n hinaa tuu ne
zamii.n kyaa aasmaa.n bhii terii kaj-biinii pe rotaa hai
Gazab hai satr-e-qur.aa.n ko chaliipaa kar diyaa tuu ne
zabaa.n se gar kiyaa tauhiid kaa daavaa to kyaa haasil
banaayaa hai but-e-pindaar ko apnaa KHudaa tuu ne
ku.e.n me.n tuu ne yuusuf ko jo dekhaa bhii to kyaa dekhaa
are Gaafil jo mutlaq thaa muqayyad kar diyaa tuu ne
havas baalaa-e-mimbar hai tujhe ra.ngii.n-bayaanii kii
nasiihat bhii tirii suurat hai ik afsaana-KHvaanii kii
dikhaa vo husn-e-aalam-soz apnii chashm-e-pur-nam ko
jo ta.Dpaataa hai parvaane ko rulvaataa hai shabnam ko
zaraa nazzaara hii ai bul-havas maqsad nahii.n us kaa
banaayaa hai kisii ne kuchh samajh kar chashm-e-aadam ko
agar dekhaa bhii us ne saare aalam ko to kyaa dekhaa
nazar aa.ii na kuchh apnii haqiiqat jaam se jam ko
shajar hai firqa-aaraa.ii ta.assub hai samar us kaa
ye vo phal hai ki jannat se nikalvaataa hai aadam ko
na uTThaa jazba-e-KHurshiid se ik barg-e-gul tak bhii
ye rif.at kii tamannaa hai ki le u.Dtii hai shabnam ko
phiraa karte nahii.n majruuh-e-ulfat fikr-e-darmaa.n me.n
ye zaKHmii aap kar lete hai.n paidaa apne marham ko
mohabbat ke sharar se dil saraapaa nuur hotaa hai
zaraa se biij se paidaa riyaaz-e-tuur hotaa hai
davaa har dukh kii hai majruuh-e-teG-e-aarzuu rahnaa
ilaaj-e-zaKHm hai aazaad-e-ehsaan-e-rafuu rahnaa
sharaab-e-be-KHudii se taa-falak parvaaz hai merii
shikast-e-ra.ng se siikhaa hai mai.n ne ban ke buu rahnaa
thame kyaa diida-e-giryaa.n vatan kii nauha-KHvaanii me.n
ibaadat chashm-e-shaa.ir kii hai har dam baa-vazuu rahnaa
banaa.e.n kyaa samajh kar shaaKH-e-gul par aashiyaa.n apnaa
chaman me.n aah kyaa rahnaa jo ho be-aabruu rahnaa
jo tuu samjhe to aazaadii hai poshiida mohabbat me.n
Gulaamii hai asiir-e-imtiyaaz-e-maa-o-tuu rahnaa
ye istiGnaa hai paanii me.n niguu.n rakhtaa hai saaGar ko
tujhe bhii chaahiye misl-e-habaab-e-aabjuu rahnaa
na rah apno.n se be-parvaa isii me.n KHair hai terii
agar manzuur hai duniyaa me.n o begaana-KHuu rahnaa
sharaab-e-ruuh-parvar hai mohabbat nau-e-insaa.n kii
sikhaayaa is ne mujh ko mast be-jaam-o-subuu rahnaa
mohabbat hii se paa.ii hai shifaa biimaar qaumo.n ne
kiyaa hai apne baKHt-e-KHufta ko bedaar qaumo.n ne
bayaabaan-e-mohabbat dasht-e-Gurbat bhii vatan bhii hai
ye viiraana qafas bhii aashiyaana bhii chaman bhii hai
mohabbat hii vo manzil hai ki manzil bhii hai sahraa bhii
jaras bhii kaarvaa.n bhii raahbar bhii raahzan bhii hai
maraz kahte hai.n sab is ko ye hai lekin maraz aisaa
chhupaa jis me.n ilaaj-e-gardish-e-charKH-e-kuhan bhii hai
jalaanaa dil kaa hai goyaa saraapaa nuur ho jaanaa
ye parvaana jo sozaa.n ho to sham-e-anjuman bhii hai
vahii ik husn hai lekin nazar aataa hai har shai me.n
ye shiirii.n bhii hai goyaa be-sutuu.n bhii kohkan bhii hai
ujaa.Daa hai tamiiz-e-millat-o-aa.ii.n ne qaumo.n ko
mire ahl-e-vatan ke dil me.n kuchh fikr-e-vatan bhii hai
sukuut-aamoz tuul-e-daastaan-e-dard hai varna
zabaa.n bhii hai hamaare mu.nh me.n aur taab-e-suKHan bhii hai
namii-gardiid ko tah rishta-e-ma.anii rihaa kardam
hikaayat buud be-paayaa.n ba-KHaamoshii adaa kardam

Allama Iqbal
Nazm

kis se mohabbat hai

adaa.e.n le ke aa.ii hai vo fitrat ke KHazaano.n se
jagaa saktii hai mahfil ko nazar ke taazyaano.n se
vo malka hai KHiraaj us ne liye hai.n bostaano.n se
bas ik mai.n ne hii aksar kii hai.n naa-farmaaniyaa.n us kii

Asrarul Haq Majaz
Nazm

KHuda wo waqt na lae

KHudaa vo vaqt na laa.e ki sogvaar ho tuu
sakuu.n kii nii.nd tujhe bhii haraam ho jaa.e
tirii masarrat-e-paiham tamaam ho jaa.e
tirii hayaat tujhe talKH jaam ho jaa.e
Gamo.n se aa.iina-e-dil gudaaz ho teraa
hujuum-e-yaas se betaab ho ke rah jaa.e
vufuur-e-dard se siimaab hoke rah jaa.e
tiraa shabaab faqat KHvaab ho ke rah jaa.e
Guruur-e-husn saraapaa niyaaz ho teraa
taviil raato.n me.n tuu bhii qaraar ko tarse
tirii nigaah kisii Gam-gusaar ko tarse
KHizaa.n-rasiida tamannaa bahaar ko tarse
ko.ii jabii.n na tire sa.ng-e-aastaa.n pe jhuke
ki jins-e-ijz-o-aqiidat se tujh ko shaad kare
fareb-e-vaada-e-fardaa pe e'timaad kare
KHudaa vo vaqt na laa.e ki tujh ko yaad aa.e
vo dil ki tere liye be-qaraar ab bhii hai
vo aa.nkh jis ko tiraa intizaar ab bhii hai

Faiz Ahmad Faiz
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now