Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "ashko"

Nazm MATCHES FOR "ashko"

Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal
Nazm

tumne likkha hai

tum ne likkhaa hai mire KHat mujhe vaapas kar do
Dar ga.ii.n husn-e-dil-aavez kii rusvaa.ii se
mai.n na kahtaa thaa ki tum mujh se mohabbat na karo
yuu.n na khelo mire jazbaat kii ra.anaa.ii se
sab samajhte the hamesha mujhe jaan-e-mahfil
ab miraa haal to puuchho mirii tanhaa.ii se
tum na.ii bazm sajaa logii tumhaaraa kyaa hai
tumhe.n Dhuu.nDe.ngii kahaa.n merii sulagtii raate.n
bhuul hii jaa.ogii do chaar dino.n me.n tum to
do dha.Dakte hu.e be-taab dilo.n kii baate.n
mai.n kahaa.n jaa.uu.ngaa mahruumii-e-dil ko le kar
phuuT kar ro.e.ngii jis vaqt bharii barsaate.n
kaash kuchh pyaar kaa anjaam to sochaa hotaa
chhiin lii merii javaanii se javaanii tum ne
mai.n na kahtaa thaa ki tum mujh se mohabbat na karo
laakh samjhaayaa magar ek na maanii tum ne
tum na maano to bhalaa kaun kahe kaun sune
pyaar puujaa hai parastish hai tijaarat to nahii.n
sone chaa.ndii ke liye ishq ko Thukraa denaa
khel ho saktaa hai me.ayaar-e-mohabbat to nahii.n
tum zar-o-siim kii miizaan me.n tul saktii ho
pyaar biktaa nahii.n chaahat kaa ko.ii mol nahii.n
is se pahle ki mire ishq par ilzaam dharo
dekh lo husn kii fitrat me.n to kuchh jhol nahii.n

Prem Warbartani
Nazm

sultani

kise KHabar ki hazaaro.n maqaam rakhtaa hai
vo faqr jis me.n hai be-parda ruuh-e-quraanii
KHudii ko jab nazar aatii hai qaahirii apnii
yahii maqaam hai kahte hai.n jis ko sultaanii
yahii maqaam hai momin kii quvvato.n kaa 'iyaar
isii maqaam se aadam hai zill-e-sub.haanii
ye jabr-o-qahr nahii.n hai ye 'ishq-o-mastii hai
ki jabr-o-qahr se mumkin nahii.n jahaa.nbaanii
kiyaa gayaa hai Gulaamii me.n mubtalaa tujh ko
ki tujh se ho na sakii faqr kii nigahbaanii
misaal-e-maah chamaktaa thaa jis kaa daaG-e-sujuud
KHariid lii hai fara.ngii ne vo musalmaanii
hu.aa hariif mah-o-aaftaab tuu jis se
rahii na tere sitaaro.n me.n vo daraKHshaanii

Allama Iqbal
Nazm

ishq-o-dosti

ishq ko ek nazar kaafii hai
aagahii pahle se darkaar nahii.n
dostii barso.n kii ham-raazii hai
jaldii-baazii kaa ye baazaar nahii.n

Azeemuddin Ahmad
Nazm

guftugu jo hoti hai sal-e-nau se ambar ki

dil se dil ke milne kii nuqra.ii sadaa.e.n ho.n
ra.ng-e-ishq-o-ulfat kii reshmii havaa.e.n ho.n

Aleena Itrat
Nazm

pahli nazar

haa.e vo pahlii nazar vo us kii aa.nkho.n ke payaam
vo lajaa kar muskuraa kar dast-e-naazuk se salaam
har nazar me.n mai-kade Galtaa.n vo chanchal baa.nkpan
rang-e-gulshan bhii tasadduq yuu.n saraapaa gul-badan
sar pe jhuumar paa.nv me.n paazeb ik zohra-KHisaal
aur mujassam kahkashaa.n us ke dupaTTe kaa jamaal
barq kii tasviir-e-kul shaano.n pe larzaa.n choTiyaa.n
marmarii.n haatho.n me.n apnii dhun me.n gaatii chuu.Diyaa.n
kaan me.n bunde saraapaa aaftab-o-maahtaab
parda-daarii kyaa kahuu.n ruKH par tajallii kii naqaab
chaal me.n aahuu kii shoKHii chaal me.n badmastiyaa.n
har qadam par inqalaab-e-dahr kii rangiiniyaa.n
har takallum ik qayaamat har tabassum barq-rez
aur jis kii saadgii bhii ik fasaana hashr-KHez
baa-takalluf baa-adab sad-naaz vo jannat-badosh
ek din aa.ii mirii pursish ko vo nik.hat-farosh
aa.nkho.n aa.nkho.n me.n diyaa paiGaam-e-ishq-o-be-KHudii
zindagaanii ik sharaab-e-tund ban kar rah ga.ii
thii vo duzdiida nigaah-e-dil-sitaa.n mere liye
aa gayaa thaa mere ghar hii gulsitaa.n mere liye
jaise mil jaa.e KHudaa.ii is tarah masruur thaa
ghar kii raunaq kyaa kahuu.n us vaqt kaa ik tuur thaa
vo tahayyur-KHez vo kaafir nazaare al-amaa.n
shauq-e-mohkam al-amaa.n mub.ham ishaare al-amaa.n
merii jaanib dekh kar ha.ns ha.ns ke sharmaatii rahii
nik.hat-e-gesuu se ik ik saa.ns mahkaatii rahii
niichii nazro.n se vo kuchh kahnaa ba-unvaan-e-hayaa
aap kab tashriif laa.e.nge ye us kii iltijaa
kyaa kahuu.n kaise kahuu.n rah rah ke ye sochaa kiyaa
jab na kuchh bhii ban pa.Daa to dard me.n Duubaa kiyaa
yaas se uTThii nazar aa.nsuu bahaa kar rah ga.ii
aur zabaan-e-haal aaKHir la.Dkha.Daa kar rah ga.ii
al-Garaz hone lagii ruKHsat vo jaan-e-aarzuu
ashk barsaane lagaa aaKHir jahaan-e-aarzuu
us kaa jaanaa thaa ki viiraa.n ho ga.ii merii nazar
le ga.ii hamraah apne raunaq-e-diivaar-o-dar
kis qadar rangiin thii fitrat kii naqqaashii na puuchh
shoKHiyaa.n kartii hu.ii taaro.n kii shahzaadii na puuchh

Hasrat Jaipuri
Nazm

jhonpaDa

ye tan jo hai har ik ke utaare kaa jho.npa.Daa
is se hai ab bhii sab ke sahaare kaa jho.npa.Daa
is se hai baadshah ke nazaare kaa jho.npa.Daa
is me.n hii hai faqiir bichaare kaa jho.npa.Daa
apnaa na mol kaa na ijaare kaa jho.npa.Daa
baabaa ye tan hai dam ke guzaare kaa jho.npa.Daa
is me.n hii bhole-bhaale isii me.n siyaane hai.n
is me.n hii hoshiyaar isii me.n divaane hai.n
is me.n hii dushman is me.n hii apne begaane hai.n
shaa-jho.npa.Daa bhii apne isii me.n namaane hai.n
apnaa na mol hai na ijaare kaa jho.npa.Daa
baabaa ye tan hai dam ke guzaare kaa jho.npa.Daa
is me.n hii log ishq-o-mohabbat ke maare hai.n
is me.n hii shoKH husn ke chaa.nd aur sitaare hai.n
is me.n hii yaar-dost isii me.n piyaare hai.n
shaa-jho.npa.Daa bhii apne isii me.n bichaare hai.n
apnaa na mol hai na ijaare kaa jho.npa.Daa
baabaa ye tan hai dam ke guzaare kaa jho.npa.Daa
is me.n hii ahl-e-daulat-o-mun.im amiir hai.n
is me.n hii rahte saare jahaa.n ke faqiir hai.n
is me.n hii shaah aur isii me.n vaziir hai.n
is me.n hii hai.n saGiir isii me.n kabiir hai.n
itnaa na mol kaa na ijaare kaa jho.npa.Daa
baabaa ye tan hai dam ke guzaare kaa jho.npa.Daa
is me.n hii chor-Thag hai.n isii me.n amol hai.n
is me.n hii ronii shakl isii me.n ThiThol hai.n
is me.n hii baaje aur naqaare-o-Dhol hai.n
shaa-jho.npa.Daa bhii is me.n hii karte kalol hai.n
itnaa na mol kaa na ijaare kaa jho.npa.Daa
baabaa ye tan hai dam ke guzaare kaa jho.npa.Daa
is me.n hii paarsaa hai.n isii me.n tavand hai.n
bedard bhii isii me.n hai aur dardmand hai.n
is me.n hii sab parand isii me.n charand hai.n
shaa-jho.npa.Daa bhii ab isii Dar be band hai.n
itnaa na mol kaa na ijaare kaa jho.npa.Daa
baabaa ye tan hai dam ke guzaare kaa jho.npa.Daa
is jho.npa.De me.n rahte hai.n sab shaah aur vaziir
is me.n vakiil baKHshii o mutasaddi aur amiir
is me.n hii sab Gariib hai.n is me.n hii sab faqiir
shaa-jho.npa.Daa jo kahte hai.n sach hai miyaa.n 'naziir'
itnaa na mol kaa na ijaare kaa jho.npa.Daa
baabaa ye tan hai dam ke guzaare kaa jho.npa.Daa

Nazeer Akbarabadi
Nazm

aurat

kahii.n afsaana-e-ishq-o-mohabbat
kahii.n ruudaad-e-soz-o-saaz bhii hai
yahii taqdiis-e-maryam zabt-e-siitaa
yahii ayyaar-o-shaahid-baaz bhii hai

Shaukat Pardesi
Nazm

dard tanhai ka

niim ke pe.D me.n aTkaa hu.aa chaa.nd
niim ke pe.D se chhan-chhan ke barastaa hu.aa dard
dard yaado.n-bharii tanhaa.ii kaa
dard un yaado.n kii raanaa.ii kaa
dard shabnam ke bayaabaa.n me.n mirii pyaas kii zebaa.ii kaa
dard har lamhe kii jaltii hu.ii pinhaa.ii kaa
ishq-o-ehsaas-e-shakebaa.ii kaa dard
vaqt ke chehre pe hai guzrii hu.ii shaam kii gard
raat ke haath hai.n sard
niim ke pe.D se chhan-chhan ke barastaa hu.aa dard
aur har dard hai maanind
niim ke pe.D pe aTkaa hu.aa chaa.nd

Rahi Masoom Raza
Nazm

jazbaat-e-aftab

gar tamannaa hai ki ho saaraa zamaana apnaa
jazba-e-ishq-o-mohabbat kii nazar paidaa kar

Lala Anoop Chand Aaftab Panipati
Nazm

KHwabon ki rakh

aaj ma.aluum hu.aa aatish-e-hijraa.n kyaa hai
merii palko.n pe mire ashko.n bhii jal jaate hai.n
ham-safar milte hai.n dauraan-e-safar kuchh aise
jo sar-e-manzil-e-maqsuud badal jaate hai.n

Nazm

sangam

prayaag pe bichh.Dii hu.ii bahne.n jo milii hai.n
paanii kii zamii.n par bhii to kaliyaa.n sii khilii hai.n
kuchh ga.ngaa kaa ruknaa
kuchh jamunaa kaa jhuknaa
phir dono.n kaa milnaa
vo phuul se khilnaa
kis shauq se iThlaatii hu.ii saath chalii hai.n
ye ishq-o-mohabbat ke nazzaare azalii hai.n
kahte hai.n ki jannat se bhii aa.ii hai bahan ek
go tiino.n kaa hii asl me.n ghar ek vatan hai
ghar jab se chhuTaa thaa
dil sard hu.aa thaa
vo koh se girnaa
vo dasht me.n phirnaa
raato.n ko vo sunsaan bayaabaan me.n chalnaa
sahme hu.e taaro.n kaa vo siine me.n machalnaa
thaa vo safar dasht me.n maidaan me.n ban me.n
KHaamosh pahaa.Do.n me.n gulistaa.n me.n chaman me.n
ja.ngal se nikalnaa
rukte hu.e chalnaa
kuchh ba.Dh ke palaTnaa
Dar Dar ke simaTnaa
mar mar ke akele ye guzaaraa hai zamaana
jaise ko.ii duniyaa me.n na ho apnaa yagaana
KHaalii kabhii jaatii nahii.n be-lafz sadaa.e.n
aaKHir ko asar kar ga.ii.n KHaamosh du.aa.e.n
jaagaa hai muqaddar
prayaag pe aa kar
ab Gam na sahe.nge
tanhaa na rahe.nge
prayaag pe bahno.n ko milaayaa hai KHudaa ne
muddat me.n ye din aaj dikhaayaa hai KHudaa ne
kyaa josh-e-mohabbat se baGal-giir hu.ii hai.n
vaaraftagii-e-shauq kii tasviir hu.ii hai.n
allaah re mohabbat
sarmaaya-e-raahat
ye kis ko KHabar thii
dil milte hai.n yuu.n bhii
ho.ngii na judaa hashr tak ab aise milii hai.n
KHush bahne.n hai.n yaa paanii pe kaliyaa.n sii khilii hai.n

Hamidullah Afsar
Nazm

ghazal kya hai

hai Gazal me.n zindagii se guftuguu
kahte hai.n urdu kii hai ye aabruu
haa.n Gazal me.n aashiqii kaa aks hai
mai-kade kii raushnii kaa aks hai
sher is ke yaad rakkhe jaate hai.n
bachcho ye har ik ke dil ko bhaate hai.n
'miir'-o-'Gaalib' kii Gazal mash.huur hai
is me.n ishq-o-falsafa kaa nuur hai
hai Gazal hindii me.n iiraanii me.n hai
ik nasha saa is ke shero.n hii me.n hai
sher Gazlo.n kaa har ik aazaad hai
husn aur hikmat se jo aabaad hai
nazm par bachcho Gazal bhaarii hu.ii
is kii shohrat ba.Dh rahii hai aaj bhii
ban ke kyo.n bachcho.n kaa shaa.ir hii rahuu.n
ab Gazal 'haafiz' ko.ii achchhii kahuu.n

Hafiz Karnataki
Nazm

ek Dabba shair ke liye nazm

chho.D de yaar ab khel tamaashe
dekh svaa.ng rachaate apnaa aslii chehra kho baiThegaa
apne aap se jo ik rasmii saa rishta hai
haath us se bhii dho baiThegaa
chho.D de jhuuTii shahvat ke masnuu.ii da.ave
ishq-o-mohabbat ke ye ja.alii na.are
lazzat bhare talaazumo.n ke baazaarii nutfe
jinnaatii tashbiiho.n me.n in chhoTii chhoTii kamiingiyo.n ke giraate haklaate buuTe
be-ma.anii ayyaar daliile.n
maa.nge taa.nge falsafiyo.n ke farzii Tone
chho.D ta.aviiz aur dhaage khel tamaashe
banda ban jaa
ab to man jaa
siidhe mu.nh ab aadam-zaado.n jaisii ham se baate.n kar
varna jo tuu nahii.n hai is kii naql utaarte
teraa mu.nh bhii Te.Dhaa-me.Dhaa ho jaa.egaa
terii in ja.alii nazmo.n kaa Tonaa ulTaa ho jaa.egaa

Sarmad Sahbai
Nazm

nazm

mere in kaakul-e-barham kii hikaayat mat puuchh
aah us naala-e-paiham kii haqiiqat mat puuchh
dekh le chashm-e-basiirat se zamaane kaa nizaam
mujh se ai dost mire Gam kii sadaaqat mat puuchh
lab-e-ra.ngii.n kaa vo e.ajaaz kahaa.n se laa.uu.n
saaz-e-KHaamosh me.n aavaaz kahaa.n se laa.uu.n
daastaan-e-dil-e-barbaad sunaa.uu.n kaise
mujh pe guzrii hai jo uftaad sunaa.uu.n kaise
aatish-e-Gam se sulagtaa hai kaleja meraa
dil-e-naashaad kii fariyaad sunaa.uu.n kaise
haa.e ab taaqat-e-guftaar kahaa.n se laa.uu.n
naGma-e-Gam kaa KHariidaar kahaa.n se laa.uu.n
jaam-o-miinaa me.n bahakte hu.e iimaan ko dekh
bhuuk-o-iflaas se marte hu.e insaan ko dekh
har taraf shor hai fariyaad hai barbaadii hai
ruu-e-garduu.n pe machalte hu.e tuufaa.n ko dekh
ab bataa chashm-e-fusuu.n-kaar kahaa.n se laa.uu.n
mast-o-be-KHud sii vo raftaar kahaa.n se laa.uu.n
par tujhe ishq-o-mohabbat se kahaa.n fursat hai
mai-e-gul-ra.ng kii la.anat se kahaa.n fursat hai
aah mazluum nigaaho.n kaa fasaana sun le
havas-o-hirs kii daulat se kahaa.n fursat hai
dil-e-betaab me.n phir taab kahaa.n se laa.uu.n
apnii aa.nkho.n me.n mai-e-naab kahaa.n se laa.uu.n
apne gulshan kii tabaahii kaa gila kis se karuu.n
shaam-e-Gurbat kii siyaahii kaa gila kis se karuu.n
holiyaa.n KHuun kii khelii ga.ii.n insaano.n me.n
apnii naa-karda-gunaahii kaa gila kis se karuu.n
apnii nii.ndo.n me.n tire KHvaab kahaa.n se laa.uu.n
fursat-e-KHaatir-e-ahbaab kahaa.n se laa.uu.n

Iffat Zeba Kakorvi
Nazm

ghungru khol zara

hai ko.ii jo mujh me.n kahtaa hai
jo dil me.n hai ab bol zaraa
kuchh der ko ghu.ngruu khol zaraa
ye raqs jo tuu kartii hai yahaa.n
is raqs me.n tere vahshat hai
jis shaKHs kii chaahat ulfat hai
vo shaKHs zamii.n kaa baasii hai
vo aam ravayyo.n vaalaa hai
vo terii vafaa kyaa samjhegaa
va.ado.n ko nibhaanaa kyaa jaane
vo ishq divaana kyaa jaane
vo shaKHs jo duniyaa-daar bhii hai
zardaar hai yuu.n naadaar bhii hai
aazaad bhii hai
ab us kii chaahat chho.D ke tuu
KHalvat me.n KHud se bol kabhii
aur KHud me.n KHud ko ghol kabhii
ye ishq kitaabii ishq hai jo
lamho.n kii lazzat detaa hai
phir us kii qiimat letaa hai
is ishq-o-mohabbat me.n pa.D kar
tuu KHud ko yuu.n naashaad na kar
barbaad na kar

Humaira Gul Tishna
Nazm

ilm-o-mohabbat

nahii.n hai sher me.n ishq-o-vafaa sadaaqat kuchh
ko.ii ho 'Gaalib'-o-'iqbaal' ko.ii 'bedil' ho

Jameel Ahmad Jaisi
Nazm

aKHtar shirani

'ishq-o-mastii kii ba-aahang-e-‘KHayaam'-o-'haafiz'
saaz-e-urduu se na niklegii sadaa tere baa'd

Bismil Saeedi
Nazm

tum aur main

hayaat-o-maut tumhii.n se hai merii vaabasta
kisii ke ishq-o-mohabbat ke aasraa tum ho
Gariiq-e-sail-e-mohabbat mujhe kiyaa jis ne
safiina-e-dil-e-muztar ke naaKHudaa tum ho
nigah ko da.avat-e-nazzaara de ke chhup jaanaa
shariik-e-barq kii ik sharmgii.n adaa tum ho

Razia Rana
Nazm

ishq-o-mohabbat

is baaG me.n ik gul hii nahii.n mujh ko piyaaraa
kartaa hai har ik KHaar bhii ulfat kaa ishaaraa
mamnuun na apno.n kaa na Gairo.n kaa rahaa mai.n
chamkaa mirii taqdiir kaa hai aap sitaaraa
hargiz kisii imdaad kaa muhtaaj nahii.n mai.n
ho jaataa hai har mast qalandar kaa guzaaraa
'unvaan mirii nazm kaa hai 'ishq-o-mohabbat
bahtaa nahii.n har samt mirii fikr kaa dhaaraa
jaate hai.n usii samt qadam be-KHabarii me.n
kis maah-laqaa ne mujhe chilman se pukaaraa
ab hind se pahu.nchaa hai mire 'ishq kaa charchaa
taa-hadd-e-karaachi-o-samarqand-o-buKHaaraa
yaksaa.n jo gul-o-KHaar se ik rabt hai mujh ko
kartaa nahii.n gulshan me.n ko.ii mujh se kinaaraa
hai.n mujh se mulaaqaat ke mushtaaq hazaaro.n
kyaa baat kare haasid-e-bad-baKHt bechaara
jis phuul se aa.ii na mujhe 'ishq kii KHushbuu
dil se bhii nikaalaa use nazro.n se utaaraa
dono.n ne Gariibo.n ko kiyaa exploit
jachtaa mirii nazro.n me.n sikandar hai na daaraa
letaa nahii.n mai.n kaam kabhii atomii bam se
mai.n ne jise maaraa use ehsaan se maaraa
vo aur hai.n phir jaate hai.n jo 'ahd se apne
jo qaul diyaa mai.n ne vo mar kar bhii na haaraa
'Gaazii' mire iKHlaas kaa shaana thaa ki jis ne
uljhe hu.e gesuu-e-mohabbat ko sa.nvaaraa

Ghazi Kabuli
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now