Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "begaane"

Nazm MATCHES FOR "begaane"

Nazm

koi aashiq kisi mahbuba se!

gulshan-e-yaad me.n gar aaj dam-e-baad-e-sabaa
phir se chaahe ki gul-afshaa.n ho to ho jaane do
umr-e-rafta ke kisii taaq pe bisraa hu.aa dard
phir se chaahe ki farozaa.n ho to ho jaane do
jaise begaane se ab milte ho vaise hii sahii
aa.o do chaar gha.Dii mere muqaabil baiTho
garche mil-baiThe.nge ham tum to mulaaqaat ke baa'd
apnaa ehsaas-e-ziyaa.n aur ziyaada hogaa
ham-suKHan ho.nge jo ham dono.n to har baat ke biich
an-kahii baat kaa mauhuum saa parda hogaa
ko.ii iqraar na mai.n yaad dilaa.uu.ngaa na tum
ko.ii mazmuun vafaa kaa na jafaa kaa hogaa
gard-e-ayyaam kii tahriir ko dhone ke liye
tum se goyaa ho.n dam-e-diid jo merii palke.n
tum jo chaaho to suno aur jo na chaaho na suno
aur jo harf kare.n mujh se gurezaa.n aa.nkhe.n
tum jo chaaho to kaho aur jo na chaaho na kaho

Faiz Ahmad Faiz
Nazm

ai ishq-e-junun-pesha

har raah me.n Tapkaa hai
KHuunaaba baham jo thaa
rasto.n me.n luTaayaa hai
vo besh ki kam jo thaa
nai ranj-e-shikast-e-dil
nai jaan kaa andesha
.
kuchh ahl-e-riyaa bhii to
hamraah hamaare the
rahrav the ki rahzan the
jo ruup bhii dhaare the kuchh sahl-talab bhii the
vo bhii hame.n pyaare the
apne the ki begaane
ham KHush the ki saare the

Ahmad Faraz
Nazm

KHushamad

dil KHushaamad se har ik shaKHs kaa kyaa raazii hai
aadmii jin parii o bhuut balaa raazii hai
bhaa.ii farzand bhii KHush baap chachaa raazii hai
shaad masruur Ganii shaah o gadaa raazii hai
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai
apnaa matlab ho to matlab kii KHushaamad kiije
aur na ho kaam to us Dhab kii KHushaamad kiije
auliyaa ambiyaa aur rab kii KHushaamad kiije
apne maqduur Garaz sab kii KHushaamad kiije
jo KHushaamad kare KHalq us se sadaa raazii hai
haq to ye hai kii KHushaamad se KHudaa raazii hai
chaar din jis ko kiyaa jhuk ke KHushaamad se salaam
vo bhii KHush ho gayaa apnaa bhii hu.aa kaam me.n kaam
ba.De aaqil ba.De daanaa ne nikaalaa hai ye daam
KHuub dekhaa to KHushaamad hii kii aamad hai tamaam
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai
bad baKHiil aur saKHii kii bhii KHushaamad kiije
aur jo shaitaan ho to us kii bhii KHushaamad kiije
gar valii ho to valii kii bhii KHushaamad kiije
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai
pyaar se jo.D diye jis kii taraf haath jo aah
vahii.n KHush ho gayaa karte hii vo haatho.n pe nigaah
Gaur se ham ne jo is baat ko dekhaa vallaah
kuchh KHushaamad hii ba.Dii chiiz hai allaah allaah
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii
piine aur pahan.ne khaane kii KHushaamad kiije
hiij.De bhaa.nD zanaane kii KHushaamad kiije
mast o hushiyaar divaane kii KHushaamad kiije
bhole naadaan siyaane kii KHushaamad kiije
jau KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai
aish karte hai.n vahii jin kaa KHushaamad kaa mizaaj
jo nahii.n karte vo rahte hai.n hamesha mohtaaj
haath aataa hai KHushaamad se makaa.n mulk aur taaj
kyaa hii taasiir kii is nusKHe ne paa.ii hai rivaaj
jo KHushaamad kare KHalq us se sadaa raazii hai
haq to ye ki KHushaamad se KHudaa raazii hai
gar bhalaa ho to bhale kii bhii KHushaamad kiije
aur buraa ho to bure kii bhii KHushaamad kiije
paak naapaak si.De kii bhii KHushaamad kiije
kutte billii o gad.he kii bhii KHushaamad kiije
jo KHushaamad kare KHalq us se sadaa raazii hai
haq to ye ki KHushaamad se KHudaa raazii hai
KHuub dekhaa to KHushaamad kii ba.Dii khetii hai
Gair kii apne hii ghar biich ye sukh detii hai
maa.n KHushaamad ke sabab chhaatii lagaa letii hai
naanii daadii bhii KHushaamad se du.aa detii hai
jo KHushaamad kare KHalq us se sadaa raazii hai
haq to ye ki KHushaamad se KHudaa raazii hai
bii-bii kahtii hai miyaa.n aa tire sadqe jaa.uu.n
saas bole kahii.n mat jaa tire sadqe jaa.uu.n
KHaala kahtii hai ki kuchh khaa tire sadqe jaa.uu.n
saalii kahtii hai ki bhayyaa tire sadqe jaa.uu.n
jo KHushaamad kare KHalq us se sadaa raazii hai
haq to ye ki KHushaamad se KHudaa raazii hai
aa pa.Daa hai jo KHushaamad se sarokaar use
Dhuu.nDte phirte hai.n ulfat ke KHariidaar use
aashnaa milte hai.n aur chaahe hai.n sab yaar use
apne begaane Garaz karte hai.n sab pyaar use
jo KHushaamad kare KHalq us se sadaa raazii hai
haq to ye ki KHushaamad se KHudaa raazii hai
ruukhii aur roGnii aabii ko KHushaamad kiije
naan-baa.ii o kabaabii kii KHushaamad kiije
saaqii o jaam sharaabii kii KHushaamad kiije
paarsaa rind KHaraabii kii KHushaamad kiije
jo KHushaamad kare KHalq us se sadaa araazii hai
haq to ye hai ki KHushaamad se KHudaa raazii hai
jo ki karte hai.n KHushaamad vo ba.De hai.n insaa.n
jo nahii.n karte vo rahte hai.n hamesha hairaa.n
haath aate hai.n KHushaamad se hazaaro.n saamaa.n
jis ne ye baat nikaalii hai mai.n us ke qurbaa.n
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai
kau.Dii paise o Take zar kii KHushaamad kiije
la.al o niilam dar o gauhar kii KHushaamad kiije
aur jo patthar ho to patthar kii KHushaamad kiije
nek o bad jitne hai.n yak-sar kii KHushaamad kiije
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai
ham ne har dil kii KHushaamad kii mohabbat dekhii
pyaar iKHlaas o karam mehr muravvat dekhii
dilbaro.n me.n bhii KHushaamad hii kii ulfat dekhii
aashiqo.n mai.n bhii KHushaamad hii kii chaahat dekhii
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai
paarsaa piir hai zaahid hai manaa jaatii hai
juvaariyaa chor daGaabaaz KHaraabaatii hai
maah se maahii talak chyuu.nTii hai yaa haathii hai
ye KHushaamad to miyaa.n sab ke ta.ii.n bhaatii hai
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai
gar na miiThii ho to ka.Dvii bhii KHushaamad kiije
kuchh na ho paas to KHaalii bhii KHushaamad kiije
jaanii dushman ho to us kii KHushaamad kiije
sach agar puuchho to jhuuTii bhii KHushaamad kiije
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai
mard o zan tifl o javaa.n KHurd o kalaa.n piir o faqiir
jitne aalam me.n hai.n mohtaaj o gadaa shaah vaziir
sab ke dil hote hai.n phande me.n KHushaamad ke asiir
to bhii vallaah ba.Dii baat ye kahtaa hai 'naziir'
jo KHushaamad kare KHalq us se sadaa raazii hai
haq to ye hai ki KHushaamad se KHudaa raazii hai

Nazeer Akbarabadi
Nazm

ek buDha

ik buu.Dhaa bistar-e-marg pe hai
biimaar badan laachaar badan
saa.nse.n bhii kuchh bojhal sii hai.n
aur aa.nkhe.n bhii jal-thal sii hai.n
aisaa bhii nahii.n tanhaa hai vo
paanii hai magar pyaasaa hai vo
ghar me.n bahuuve.n beTe bhii hai.n
hai.n potiyaa.n bhii pote bhii hai.n
lekin ko.ii paas nahii.n aataa
sab jhaa.nkte hai.n chale jaate hai.n
jaise ye is kaa ghar hii nahii.n
jaise vo sab begaane hai.n
jis bahuu kaa number hotaa hai
khaane ke nivaale Thuu.ns ke vo
farz apnaa mukammal kartii hai
phir vaqt pe ko.ii ik beTaa
vo jis ko tho.Dii fursat ho
pahle to aa kar Daa.nTtaa hai
detaa hai davaa.ii phir aise
jaise ehsaan kare ko.ii
jaise apmaan kare ko.ii
har din ye buu.Dhaa sochtaa hai
ko.ii baat na.ii ho aaj ke din
ko.ii do miiThe alfaaz kahe
kabhii mahfil us ke paas saje
kabhii ha.nsne kii ko.ii baat chale
magar aisaa pichhle barso.n me.n
kabhii ho paayaa nahii.n ho paayaa
apne us begaane-pan par
apne us viiraane-pan par
ye buu.Dhaa inkishaaf rahtaa hai
ye buu.Dhaa rotaa rahtaa hai
ik buu.Dhaa bistar-e-marg pe hai

Zia Zameer
Nazm

sathi

phuul kii KHushbuu ha.nstii aa.ii
mere basere ko mahkaane
mai.n KHushbuu me.n KHushbuu mujh me.n
us ko mai.n jaanuu.n mujh ko vo jaane
mujh se chhuu kar mujh me.n bas kar
is kii bahaare.n us ke zamaane
laakho.n phuulo.n kii mahkaare.n
rakhte hai.n gulshan viiraane
mujh se alag hai.n mujh se judaa hai.n
mai.n begaana vo begaane
un ko bikheraa un ko u.Daayaa
dast-e-KHizaa.n ne mauj-e-sabaa ne
bhuulaa-bhaTkaa naadaa.n qatra
aa.ankho.n kii putlii ko sajaane
aa.nsuu ban kar dau.Daa aayaa
merii palke.n us ke Thikaane
us kaa thiraknaa us kaa ta.Dapnaa
mere qisse mere fasaane
us kii hastii merii hastii
us ke motii mere KHazaane
baaqii saare gauhar-paare
KHaak ke zarre ret ke daane
parbat kii uu.nchii choTii se
daaman phailaayaa jo ghaTaa ne
ThanDii havaa ke ThanDe jho.nke
be-KHud aavaara mastaane
apnii ThanDak le kar aa.e
merii aag me.n ghul-mil jaane
un kii hastii kaa pairaahan
merii saa.ns ke taane-baane
un ke jhakole merii uma.nge.n
un kii navaa.e.n mere taraane
baaqii saare tuufaano.n ko
jazb kiyaa pahnaa-e-fazaa ne
fitrat kii ye guunaaguunii
gulshan bin vaadii viiraane
kaa.nTe kaliyaa.n nuur a.ndheraa
anjuman.en sham.e.n parvaane
laakho.n shaatir laakho.n mohre
phaile hai.n shatranj ke KHaane
jaantaa huu.n mai.n ye sab kyaa hai.n
sahbaa se KHaalii paimaane
bhuukii miTTii ko sau.npe hai.n
duniyaa ne apne nazraane
jis ne meraa daaman thaamaa
aayaa jo mujh me.n bas jaane
mere tuufaano.n me.n bahne
merii maujo.n me.n lahraane
mere soz-e-dil kii lau se
apne man kii jot jagaane
ziist kii pahnaa.ii me.n phaile
maut kii giiraa.ii ko na jaane
us kaa barbat mere naGme
us ke gesuu mere shaane
merii nazre.n us kii duniyaa
merii saa.nse.n us ke zamaane

Majeed Amjad
Nazm

aao chalen man

aa.o chale.n maa.n ThanDii fazaa.o.n me.n
shahro.n se duur kahii.n chhoTe se gaa.nv me.n
maanaa ye chaa.ndii kii duniyaa hasiin hai
dhartii kii huuro.n kaa jalva hasiin hai
uu.nche uu.nche mahlo.n kaa naGma hasiin hai
kaise yahaa.n ghuumuu.n ki zor nahii.n paa.nv me.n
aa.o chale.n maa.n ThanDii fazaa.o.n me.n
shahro.n se duur kahii.n chhoTe se gaa.nv me.n
chaar taraf apnii taraqqii kaa zor hai
naach rahaa jaise ki jangal me.n mor hai
ba.Dii ba.Dii zinda mashiino.n kaa shor hai
saa.ns ghuTii jaa.e yahaa.n kii havaa.o.n me.n
aa.o chale.n maa.n ThanDii fazaa.o.n me.n
shahro.n se duur kahii.n chhoTe se gaa.nv me.n
sa.Dko.n pe galiyo.n me.n filmii taraana
yaad nahii.n lekin KHushii kaa fasaana
in ko mubaarak mohazzab zamaana
kaun rahe sundar manohar balaa.o.n me.n
aa.o chale.n maa.n ThanDii fazaa.o.n me.n
shahro.n se duur kahii.n chhoTe se gaa.nv me.n
insaan jaise ho.n baasii mazaar ke
phir bhii ha.nse.n ham ko dehaatii pukaar ke
TuuT ga.e taar yahaa.n man ke sitaar ke
jannat hamaarii vahii.n piipal kii chhaa.nv me.n
aa.o chale.n maa.n ThanDii fazaa.o.n me.n
shahro.n se duur kahii.n chhoTe se gaa.nv me.n
abbaa jii aa.e hai.n roTii kamaane
biit rahii kyaa in pe allaah jaane
apne mile.n is tarah jaise begaane
jaan nahii.n ko.ii bhii naqlii adaa.o.n me.n
aa.o chale.n maa.n ThanDii fazaa.o.n me.n
shahro.n se duur kahii.n chhoTe se gaa.nv me.n

Salam Machhli shahri
Nazm

jhonpaDa

ye tan jo hai har ik ke utaare kaa jho.npa.Daa
is se hai ab bhii sab ke sahaare kaa jho.npa.Daa
is se hai baadshah ke nazaare kaa jho.npa.Daa
is me.n hii hai faqiir bichaare kaa jho.npa.Daa
apnaa na mol kaa na ijaare kaa jho.npa.Daa
baabaa ye tan hai dam ke guzaare kaa jho.npa.Daa
is me.n hii bhole-bhaale isii me.n siyaane hai.n
is me.n hii hoshiyaar isii me.n divaane hai.n
is me.n hii dushman is me.n hii apne begaane hai.n
shaa-jho.npa.Daa bhii apne isii me.n namaane hai.n
apnaa na mol hai na ijaare kaa jho.npa.Daa
baabaa ye tan hai dam ke guzaare kaa jho.npa.Daa
is me.n hii log ishq-o-mohabbat ke maare hai.n
is me.n hii shoKH husn ke chaa.nd aur sitaare hai.n
is me.n hii yaar-dost isii me.n piyaare hai.n
shaa-jho.npa.Daa bhii apne isii me.n bichaare hai.n
apnaa na mol hai na ijaare kaa jho.npa.Daa
baabaa ye tan hai dam ke guzaare kaa jho.npa.Daa
is me.n hii ahl-e-daulat-o-mun.im amiir hai.n
is me.n hii rahte saare jahaa.n ke faqiir hai.n
is me.n hii shaah aur isii me.n vaziir hai.n
is me.n hii hai.n saGiir isii me.n kabiir hai.n
itnaa na mol kaa na ijaare kaa jho.npa.Daa
baabaa ye tan hai dam ke guzaare kaa jho.npa.Daa
is me.n hii chor-Thag hai.n isii me.n amol hai.n
is me.n hii ronii shakl isii me.n ThiThol hai.n
is me.n hii baaje aur naqaare-o-Dhol hai.n
shaa-jho.npa.Daa bhii is me.n hii karte kalol hai.n
itnaa na mol kaa na ijaare kaa jho.npa.Daa
baabaa ye tan hai dam ke guzaare kaa jho.npa.Daa
is me.n hii paarsaa hai.n isii me.n tavand hai.n
bedard bhii isii me.n hai aur dardmand hai.n
is me.n hii sab parand isii me.n charand hai.n
shaa-jho.npa.Daa bhii ab isii Dar be band hai.n
itnaa na mol kaa na ijaare kaa jho.npa.Daa
baabaa ye tan hai dam ke guzaare kaa jho.npa.Daa
is jho.npa.De me.n rahte hai.n sab shaah aur vaziir
is me.n vakiil baKHshii o mutasaddi aur amiir
is me.n hii sab Gariib hai.n is me.n hii sab faqiir
shaa-jho.npa.Daa jo kahte hai.n sach hai miyaa.n 'naziir'
itnaa na mol kaa na ijaare kaa jho.npa.Daa
baabaa ye tan hai dam ke guzaare kaa jho.npa.Daa

Nazeer Akbarabadi
Nazm

nazr-e-Khaalida

muddato.n apnii zabaa.n par tere afsaane rahe
tuu rahii begaana lekin ham na begaane rahe

Asrarul Haq Majaz
Nazm

eid ke roz

kaisii nikhrii sii nazar aatii hai fazaa eid ke roz
shaadmaa.n phirte hai.n sab shaah-o-gadaa eid ke roz
kitnii be-fikrii se gaate hai.n gadaa raaho.n me.n
peT KHaalii ho to gaa.e.n bhii na kyaa eid ke roz
kyaa bhalii lagtii hai har piir-o-javaa.n ke mu.nh se
har taraf eid mubaarak kii sadaa eid ke roz
ammii KHush ho.ngii aur eidii bhii vahii paa.egaa
vaqt se pahle jo bedaar hu.aa eid ke roz
chaa.nd untiis ko kyaa niklaa ki aadhii shab se
tailoring shaap me.n ik taa.ntaa ba.ndhaa eid ke roz
kap.De bhii dhul na sake vaqt-e-namaaz aa pahuu.nchaa
laundry vaalo.n pe aafat hai bapaa eid ke roz
daadii ammaa.n ne musalle ko pare Daal diyaa
ghar me.n mehmaano.n kaa vo shor machaa eid ke roz
aa.nkh ojhal hu.ii aur TuuT savayyo.n pe pa.Daa
der se aslam isii taak me.n thaa eid ke roz
iid-gah shaan se Tam Tam pe chale hai.n babban
baap ke kaa.ndho.n pe nanhaa bhii cha.Dhaa eid ke roz
pak.De laaThii ko maTakte chale ramzaanii miyaa.n
piichhe se bachcho.n kaa ik gol chalaa eid ke roz
apne begaane jo ba.Dh ba.Dh ke gale milte ho.n
kyo.n na phir aa.e ibaadat me.n maza eid ke roz
roze ramzaan ke rakhnaa to sabhii bhuul ga.e
kaise bhuule.nge savayyo.n ko bhalaa eid ke roz
saal ke saal rahe yaad-e-KHudaa se Gaafil
ai 'zakii' un ko bhii yaad aayaa KHudaa eid ke roz

Zaki Ahmad
Nazm

nazm

saarii zamii.n ko ghere hu.e hai.n
aaKHir chand gharaane kyo.n
naam nabii kaa lene vaale
ulfat se begaane kyo.n
KHatra hai KHuu.n-KHvaaro.n ko
rang-birangii caro.n ko
america ke pyaaro.n ko
KHatre me.n islaam nahii.n

Habib Jalib
Nazm

mera watan

dil-rubaa laala ho fazaa terii
mujh ko bhaa.ii na ik adaa terii
lutf se ba.Dh ke hai jafaa terii
vaah-re hindostaa.n vafaa terii
mai.n na maanuu.n kabhii tiraa kahnaa
mai.n na baKHshuu.n kabhii KHataa terii
bar-tar-az-KHaar hai tiraa gulshan
zahr se kam nahii.n havaa terii
KHaalii-az-kaifiyat tirii har chiiz
baat har ek be mazaa terii
dard-e-dil me.n ta.Dap ke mar jaa.uu.n
mai.n na Dhuu.nDuu.n kabhii shifaa terii
kaun sii baat terii lutf-aamez
kaun sii chiiz dil-kushaa terii
tujh ko jannat-nishaan kahte hai.n
ham jahannam kii jaan kahte hai.n
tujh ko kas baat par hai naaz bataa
kyaa nahii.n aur mulk tere sivaa
terii aab o havaa latiif sahii
tujh se ba.Dh kar spain kaa KHitta
tujh ko apnii zamiin kaa hai ghamanD
tujh se afzal kahii.n hai america
hasan par apne naaz hai tujh ko
hasan tujh se sivaa etaaliyaa kaa
tujh ko ga.ngaa kaa apnii dhokaa hai
tuu ne dekhaa nahii.n hai siin ko jaa
mausiiqii par tujhe hai naaz bahut
is me.n juz dard-o-Gam dharaa hai kyaa
falsafa teraa agle vaqto.n kaa
falsafa dekh jaa ke europe kaa
tujh me.n phir aan kyaa rahii baaqii
terii mahfil na kuchh na kuchh saaqii
haa.n muravvat kaa tujh me.n naam nahii.n
haa.n uKHuvvat kaa tujh me.n naam nahii.n
tujh se bad-naam ishq saa ustaad
aur mohabbat kaa tujh me.n naam nahii.n
aashtii siikhe tujh se aa ke ko.ii
haa.n KHusuumat kaa tujh me.n naam nahii.n
terii har baat me.n safaa.ii hai
aur kuduurat kaa tujh me.n naam nahii.n
tujh ko aur hurriyat se kyaa nisbat
is zaruurat kaa tujh me.n naam nahii.n
shaad hai.n taire apne begaane
aur shikaayat kaa tujh me.n naam nahii.n
terii tahziib tujh ko maujib-e-faKHr
haa.n jahaalat kaa tujh me.n naam nahii.n
baat duniyaa se hai judaa terii
vaah ai hindostaa.n adaa terii
tere rasm-o-rivaaj ne maaraa
is maraz ke ilaaj ne maaraa
terii Gairat nai kar diyaa barbaad
KHaandaano.n ke laaj ne maaraa
kyaa kare.n har gha.Dii yahii hai fikr
roz kii ehtiyaaj ne maaraa
aa.e din call kaa hai zikr-azkaar
ik zaraa se anaaj ne maaraa
aur sab par vabaa kaa ik turra
is anokhe KHiraaj ne maaraa
baKHt bargashta aarzu.e.n bahut
havas-e-siim-o-aaj nai maaraa
na kare.n kaam kuchh to khaa.e.n kyaa
roz ke kaam-kaaj ne maaraa
tuu to rahne kaa kuchh maqaam nahii.n
tujh me.n insaaniyat kaa naam nahii.n
qaid tuu ne kiyaa hasiino.n ko
mah-jabiino.n ko naazniino.n ko
zevar-e-ilm se rakhaa aarii
tuu ne qudrat ke in nagiino.n ko
iKHtiyaar o pasand kii ai hind
kyaa zaruurat na thii hasiino.n ko
KHuub pahchaanii tuu ne qadr in kii
KHuub samjhaa tuu in KHaziino.n ko
ku.e.n jha.nkvaa.e naazniino.n se
zahr khilvaayaa mah-jabiino.n ko
Duube jaate hai.n kaun aa ke bachaa.e
bahr-e-hastii ke in safiino.n ko
tuu makaa.n thaa makaan ho ke diyaa
KHauf-e-aaraam in makiino.n ko
tujh pe tahziib ta.an kartii hai
tujh pe ilzaam KHalq dhartii hai
aarzuu hai tujhe hukuumat kii
jaah-o-sarvat kii shaan-o-shaukat kii
kyuu.n na ho tujh me.n himmat-e-aalii
dhuum har suu hai terii jur.at kii
to ne kasb-e-funuun-e-ja.ng kiyaa
sab me.n shohrat hai terii quvvat kii
qasme.n khaate hai.n log duniyaa me.n
terii millat tirii uKHuvvat kii
mulk-daarii me.n mulk-giirii me.n
vaah kyaa paidaa qaabiliyyat kii
tuu to ustaad se bhii ba.Dh niklaa
hairat-a.ngez tuu ne mehnat kii
aap aalam me.n tuu hai apnii misaal
aadamiyyat kii aur shujaa.at kii
ham-sarii kii kasii ko taab nahii.n
tiraa aafaaq me.n javaab nahii.n
daaG dil ke kise dikhaa.e.n ham
aisaa mushfiq kahaa.n se laa.e.n ham
dil me.n hai apne ham-nashii.n ik roz
aap ro kar tujhe rulaa.e.n ham
is tabii.at ko kas tarah bahlaa.e.n
dil ko kis chiiz se lagaa.e.n ham
kab talak roz ke kahe.n sadme
kab talak aafate.n uThaa.e.n ham
zahr kyuu.n ai falak na ham khaa le.n
jii se apne guzar na jaa.e.n ham
jo shikaayat ho kyuu.n na lab par aa.e
ek dukh ho use chhupaa.e.n ham
ai tamaddun ke raahat-o-aaraam
haa.e kas tarah tum ko paa.e.n ham
log uThaate hai.n zindagii ke maze
ham uThaate hai.n naa-KHushii ke maze

Meer Syed Nazeer Husain Nashad
Nazm

mumbai

shahr mumbai
mujhe us ne chunaa hai ham-safar apnaa
ye merii saa.ns ke marne talak
saa.e kii tarah saath me.n hogaa
shahr aisaa
jo ujlii raushnii me.n Duubaa rahtaa hai
magar un raushnii ke jhurmuT me.n tiirgii bhii hai
jahaa.n baazaar zinda hai
jahaa.n ruuho.n kaa saudaa raat-din hotaa hii rahtaa hai
jahaa.n apno.n se lagte hai.n na jaane kitne begaane
nazar jis samt bhii phe.nko
yahaa.n uu.nchii imaarat ke sivaa kuchh bhii nahii.n hai
yahaa.n arz-e-du.aa mehr-o-vafaa kuchh bhii nahii.n hai
ka.ii laashe.n bhaTaktii rahtii hai.n be-ruuh nukka.D par
jahaa.n ruktii hai.n lambii gaa.Diyaa.n aa kar
mai.n aksar sochtaa huu.n ye
na jaane kaun baiThaa rahtaa hai un band shiisho.n me.n
shahr-e-mumbai
mujhe us ne chunaa hai ham-safar apnaa
ye merii saa.ns ke marne talak
saa.e kii tarah saath me.n hogaa
shahr aisaa
jo gahrii nii.nd me.n bhii chaltaa rahtaa hai
KHushii se khol kar aa.nkhe.n
jo saare KHvaab buntaa hai
shahr ye ek jangal hai
jahaa.n aa.nkhe.n hii aa.nkhe.n hai.n
hazaaro.n phuul sii aa.nkhe.n hazaaro.n phathrii aa.nkhe.n
hazaaro.n KHushnumaa aa.nkhe.n hazaaro.n maatamii aa.nkhe.n
hazaaro.n aashnaa aa.nkhe.n hazaaro.n ajnabii aa.nkhe.n
sabhii aa.nkho.n kii palko.n par
udaasii aise baiThii hai
ki jaise saa.np ko.ii kunDalii maare hu.e baiThe
vo palke.n jaantii hai.n
kaise apnaa dukh chhupaanaa hai
magar jab Gaur se dekho to yuu.n mahsuus hotaa hai
vo palke.n sabr hai.n aur jabr hai.n
aur qabr hai.n aa.nkhe.n
jahaa.n par dafn hai.n yaade.n kisii marhuum bachche kii
shahr-e-mumbai
mujhe us ne chunaa hai ham-safar apnaa
ye merii saa.ns ke marne talak
saa.e kii tarah saath me.n hogaa
shahr aisaa
jo bahte vaqt ko muTThii me.n rakhtaa hai
isii kii kokh me.n apne paraa.e vaqt kii pahchaan hotii hai
shahr kii god me.n hai ik samundar bhii
jo ghanTo.n dhuup kii chhatrii lagaa.e baiThaa rahtaa hai
hasii.n saahil ke reto.n par
vahii.n par baadalo.n se ek nannhii shaam aatii hai
siraa us shaam kaa raato.n me.n khultaa hai
fazaa kaa shor jab din kii bajaa.e narm hotaa hai
makaa.n kii oT me.n jab chaa.nd piilaa chhupne lagtaa hai
sitaare uu.nghne lagte hai.n jab halkaan ho ho kar
to aapas me.n gale lag kar
samundar ke kinaare rone lagte hai.n
mai.n us bhiige hu.e lamhe kaa ik tanhaa gavaahii huu.n
mai.n manzar kii siyaahii huu.n
mai.n ik aisaa sipaahii huu.n
jise ab zindagii kii aaKHirii ik ja.ng la.Dnii hai
miraa ab saath degaa ye
shahr-e-mumbai
jise mai.n ne chunaa hai ham-safar apnaa
jo merii saa.ns ke marne talak
saa.e kii tarah saath me.n hogaa

Tripurari
Nazm

mira-ji sahib

jab ham ne pa.Dhaa kab chavvan me.n ka.ii na.e to un ko pahchaane
kuchh sikka-band taraqqii-pasand is jur.at par bhii buraa maane
aur ham se ho ga.e begaane
yuu.n bhii ko.ii ham ko kyaa jaane

Jameeluddin Aali
Nazm

dilli aur hum

ye vo dillii hai ki dil se jis ke diivaane hai.n ham
ye vo sham-e-zindagii hai jis ke parvaane hai.n ham
aa.ina hai ham se us ke ahd-e-zarrii.n kii jhalak
us ke tahziib-o-adab ke aa.iina-KHaane hai.n ham
ilm-o-fan ke motiyo.n pe jam gayaa gard-o-Gubaar
KHaak ke zarraat me.n malbuus durdaane hai.n ham
ham pe rahtii hai nigaah-e-shafqat-e-ahl-e-nazar
mahfil-e-sher-o-adab me.n jaane-pahchaane hai.n ham
haazir-e-KHidmat kiyaa hai jauhar-e-qalb-o-dimaaG
kam-nigaaho.n kii nazar me.n phir bhii begaane hai.n ham
ab to KHvesh vaGaira kahte hai.n hame.n kuchh aur hii
jab to ik duniyaa samjho thii ki farzaane hai.n ham
tamkanat 'saudaa' kii 'taalib' 'miir' kaa rakhte hai.n 'dard'
baaG to jaane hai saaraa par na kuchh jaane hai.n ham

Talib Chakwali
Nazm

ishq ki baaten

vo jitne rang malaal ke hai.n
ham kyaa jaane.n kis haal ke hai.n
ham raahii dasht-e-KHayaal ke hai.n
aur saa.il ek visaal ke hai.n
ham hijr kii maar se Darte hai.n
aur ishq kii baate.n karte hai.n
ham aql ke taane-baane hai.n
mat samjho ham mastaane hai.n
in raaho.n se begaane hai.n
bas naam ke hii diivaane hai.n
ham naam-o-numuud pe marte hai.n
aur ishq kii baate.n karte hai.n
ham hosh ke shahr me.n rahte hai.n
aur mauj-e-tarab me.n bahte hai.n
kab kaun saa sadma sahte hai.n
bas KHvaab kaa qissa kahte hai.n
ham jhuuTii aahe.n bharte hai.n
aur ishq kii baate.n karte hai.n

Ashfaq Amir
Nazm

jamuna-ji

naaz kyuu.n ho na tujhe kirshn dulaarii jamunaa
tuu to raadhaa kii sahelii banii pyaarii jamunaa
rutba aalii hai tiraa martaba bhaarii jamunaa
har jagah faiz-e-atam rahtaa hai jaarii jamunaa
hai yaqii.n garm kisii din bharii mahfil hogii
raas-manDal kii vo liilaa lab-e-saahil hogii
miT gayaa lutf tiraa chhin gayaa gahnaa teraa
jab kanhayyaa nahii.n be-lutf hai rahnaa teraa
Gam uThaanaa sitam-o-jaur ko sahnaa teraa
paanii ho ho ke shab-o-roz ye bahnaa teraa
aatish-e-hijr kuchh is darja lagii hai tan me.n
dil na mathuraa me.n bahaltaa hai na bindraaban me.n
baat big.Dii nahii.n ab bhii hai vahii baat tirii
vahii jaa.Daa vahii garmii vahii barsaat tirii
din usii Dha.ng usii rang kii hai raat tirii
kaun kah saktaa hai kuchh bhii nahii.n auqaat tirii
kirshn sadqe hai.n to raadhaa hai.n fidaa.ii jamunaa
har taraf KHalq me.n hai terii dahaa.ii jamunaa
saadii saadii hai ravish vaz.a hai bholii-bhaalii
hai ravaanii bhii Gazab chaal bhii hai matvaalii
niilii maujo.n se pashemaa.n hu.ii.n zulfe.n kaalii
husn-o-aaraa.ish-o-ziinat se ba.Dhii KHush-haalii
allaah-allaah re is naaz-o-adaa kii hastii
tere aage nahii.n kuchh aab-e-baqaa kii hastii
puuchhe raadhaa se ko.ii qadr-e-haqiiqat terii
kirshn se jaa.nche ko.ii KHuubii-e-izzat terii
saarii duniyaa me.n hai phailii hu.ii azmat terii
us ko jannat milii kii jis ne bhii KHidmat terii
apnaa ham-rutba jo paayaa tujhe ga.ngaa-jii ne
apne pahluu me.n biThaayaa tujhe ga.ngaa-jii ne
baa.is naaz hai be-shubah himaala ke liye
sabab-e-faKHr-o-sharf gokul-o-mathuraa ke liye
KHaas ik nemat-e-haq vaadii-o-sahraa ke liye
muKHtasar ye hai ba.Dii chiiz hai duniyaa ke liye
dil kii sar-basta kalii fart-e-KHushii se khul jaa.e
us ko amrit mile jis ko tiraa paanii mil jaa.e
sach hai asraar-e-haqiiqat kaa KHazaana tuu hai
haal-o-mustaqbil-o-maazii kaa zamaana tuu hai
lutf-aagii.n tarab-aamez fasaana tuu hai
sab hai.n begaane agar hai to yagaana tuu hai
saaf aa.iine kii suurat hai safaa.ii terii
bandagii kyuu.n na kare saarii KHudaa.ii terii
nigah-e-fazl-o-tarahhum se ishaaraa kar de
jo na ho kaam kisii se vo KHudaaraa kar de
ranj-o-Gam dard-o-qalaq duur hamaaraa kar de
pyaarii maKHluuq me.n kuchh aur bhii pyaaraa kar de
rahnumaa.ii tirii 'bismil' ke liye sab kuchh hai
naa-KHudaa.ii tirii 'bismil' ke liye sab kuchh hai

Bismil Allahabadi
Nazm

nasri nazm

dil tumhe.n yaad kartaa hai
aa jaa.o
ki un raasto.n par abhii tak
tere qadmo.n ke nishaa.n hai.n
us raaste kii dhuul
paagalo.n kii tarah terii judaa.ii kaa bain kartii hai
aa jaa.o
dil tumhe.n yaad kartaa hai
vo saaya-daar shajar vo phuulo.n kii Daaliyaa.n
jin ke niiche ham ne
kuchh lamhe saath guzaare the
aaj bhii terii yaad me.n nam hai.n
ik anmiT saa sukuut taarii hai
jo har chiiz par taarii hai
tamaam KHushiyaa.n ham par bhaarii hai.n
aa jaa.o
dil tumhe.n yaad kartaa hai
ham zindagii se begaane ho chale hai.n
bichha.D ke tujh se diivaane ho chale hai.n
rotii hai mere saath havaa
bikhar ga.e ho ke tum se judaa
aa jaa.o
dil tumhe.n yaad kartaa hai
kab aa.oge
tab aa.oge jab bujh jaa.e.ngii aa.nkhe.n merii
jab TuuT jaa.e.ngii saa.nse.n merii
aa jaa.o
dil tumhe.n yaad kartaa hai
ki in raasto.n par abhii tak
tere qadmo.n ke nishaa.n hai.n

Farah Shahid
Nazm

kya rishta hai mera

aksar mai.n ne ye sochaa hai
tujh se kyaa rishta hai meraa
is duniyaa me.n kitne chehre
apne bhii begaane bhii hai.n
jaane bhii hai.n anjaane bhii hai.n
chehro.n kii isii jhurmuT me.n hai
teraa chehra aisaa chehra

Kahkeshan Parveen
Nazm

KHwab-nagar

meraa man ik KHvaab-nagar hai
mere man me.n
chaah ke chashme
amn kii nahre.n
aas ke dariyaa
pyaar samundar
har suu bahte rahte hai.n
jin me.n nahaa kar
apne bhii begaane bhii
daanaa.ii kii dhuup me.n leTe
sehr-zada se rahte hai.n

Khalid Suhail
Nazm

hamara ghar

pyaar vafaa ke diip jalaa.e.n
ghar ko apne svarg banaa.e.n
khele.n kuude.n aur muskaa.e.n
dekh ke KHush ho.n jis ko maa.e.n
pahlaa maktab ghar hai hamaaraa
dars usii se ham sab paa.e.n
jis se mile.n phal ilm ke ham ko
is me.n aise paude lagaa.e.n
pahle maa.n aur baap se siikhe.n
phir sab ko aadaab sikhaa.e.n
jo bhii hamaare ghar me.n aa.e
pyaar se us ko dil me.n biThaa.e.n
baat kare.n ham miiThii miiThii
lafzo.n ke ham phuul khilaa.e.n
apne ho.n yaa begaane ho.n
sab ko apnaa dost banaa.e.n
KHush ho.nge maa.n-baap hamaare
aa.o ham aise ban jaa.e.n
aur phir is ke aage chal kar
desh-pujaarii ham kahlaa.e.n
naam ho raushan jis se ghar kaa
aise sundar diip jalaa.e.n

Jauhar Rahmani
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now