Search result for "desh-bhagat" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "desh-bhagat"

Nazm MATCHES FOR "desh-bhagat"

Nazm

dharti ki sulagti chhati se bechain sharare puchhte hain

dhartii kii sulagtii chhaatii se bechain sharaare puuchhte hai.n
tum log jinhe.n apnaa na sake vo KHuun ke dhaare puuchhte hai.n
sa.Dko.n kii zabaa.n chillaatii hai saagar ke kinaare puuchhte hai.n
ye kis kaa lahuu hai kaun maraa ai rahbar-e-mulk-o-qaum bataa
ye jalte hu.e ghar kis ke hai.n ye kaTte hu.e tan kis ke hai.n
taqsiim ke andar tuufaa.n me.n luTte hu.e gulshan kis ke hai.n
bad-baKHt fazaa.e.n kis kii hai.n barbaad nasheman kis ke hai.n
kuchh ham bhii sune.n ham ko bhii sunaa
kis kaam ke hai.n ye diin-dharm jo sharm kaa daaman chaak kare.n
kis tarah ke hai.n ye desh-bhagat jo baste gharo.n ko KHaak kare.n
ye ruuhe.n kaisii ruuhe.n hai.n jo dhartii ko naapaak kare.n
aa.nkhe.n to uThaa nazre.n to milaa
jis raam ke naam pe KHuun bahe us raam kii 'izzat kyaa hogii
jis diin ke haatho.n laaj luTe is diin kii qiimat kyaa hogii
insaan kii is zillat se pare shaitaan kii zillat kyaa hogii
ye ved haTaa qur.aan uThaa
ye kis kaa lahuu hai kaun miraa
ai rahbar-e-mulk-o-qaum bataa

Sahir Ludhianvi

Nazm

gandhi ji

raahbar desh-bhagtii kaa vo
shaah thaa ik la.ngoTii kaa vo
pyaar ke vo luTaataa thaa phuul
thaa ahinsaa usii kaa usuul
narmii se zindagii ta.ng kii
us ne a.ngrezo.n se ja.ng kii
hausle ho ga.e un ke past
aan pahu.nchii jo pa.ndrah august
dil har ik shaad ho hii gayaa
desh aazaad ho hii gayaa
dostii kaa sabaq de gayaa
mar ke jaaved vo ho gayaa
phir kare.n yaad us ke usuul
aur cha.Dhaa.e.n aqiidat ke phuul

Abrar Kiratpuri

Nazm

nazm

pahle to des bhaarat amn-o-amaa.n kaa ghar thaa
rahte the sab ikaTThe ko.ii na KHauf Dar thaa
kyaa ho gayaa hai ab ye jhag.De kii hai samaa.ii
kuchh bhuul ho ga.ii hai sadaa apnii hii ga.nvaa.ii
apne hii bhaa.iyo.n par aafat jo Dhaa rahii hai.n
aapas me.n phuuT kar ke izzat ga.nvaa rahii hai.n
amn-o-amaa.n kii duniyaa barbaad kar rahe hai.n
naahaq-o-naaravaa hii fariyaad kar rahe hai.n
suntaa hai kaun apnii ham kis ko ye sunaa.e.n
ye bhuul hai saraasar kis tarah ye bataa.e.n
vahdat ke falsafa ko ham ne miTaa diyaa hai
duniyaa hai chand roza ye bhii bhulaa diyaa hai
kuchh yaad bhii hai.n tum ko ek bramhaa ke ma.anii
hai laa-shariik vaahid parvardigaar ya.anii
saare jahaa.n me.n hastii us kii zuhuur us kaa
aa.nkho.n me.n nuur us kaa dil me.n suruur us kaa
kasrat kii ek-saanii vahdat kaa hai namuuna
har zarra se ayaa.n hai ulfat kaa ye namuuna
ahl-e-vatan se apnii ab iltijaa yahii hai
baaz aa.e.n jhuuTii zid se bas mudda.aa yahii hai

Nazm

tarana-e-desh-bhagti

ham pe bedaad vo karte hai.n to hairat kaisii
ishq hai jis ko vatan se use raahat kaisii
KHuun rag-rag me.n ta.Daptaa thaa nikalne ke liye
teG-e-qaatil ne nikaalii mirii hasrat kaisii
jo gadaayaan-e-vatan hai.n unhe.n aaraam kahaa.n
aish maqsuum me.n un ke kahaa.n ishrat kaisii
jin ke dil dard-e-vatan se sadaa naashaad rahe
kyaa KHabar un ko ki hotii hai masarrat kaisii
Gair KHuu.n chuus rahe the hame.n ma.aluum na thaa
sone vaalo.n pe thii chhaa.ii hu.ii Gaflat kaisii
har-nafas apnaa sharar-baar hai dushman ke liye
mushta.il dil me.n hu.ii aatish-e-Gairat kaisii
Thaan lii qaid Gulaamii se nikal jaane kii
dil jo aazaad hai sayyaad hiraasat kaisii
KHidmat-e-mulk kii KHaatir jo ho naazil ham par
ye to aaraam hai raahat hai musiibat kaisii
jaan dene ko jo tayyaar hai.n bhaarat ke liye
un ko talvaar kaa Dar daar kii dahshat kaisii
desh-bhagtii kaa jo 'saabir' ne taraana gaayaa
kyaa kahe.n ham ko mayassar hu.ii farhat kaisii

Nau Bahar Sabir

Nazm

amn ka tehwar

kal jo sapne the adhuure aaj puure ho.nge vo
aaj ham jamhuuriyat kaa giit gaa.e.nge zaruur
amn kii sham.e.n jalii.n har suu ujaalaa ho gayaa
miT ga.e hai.n zulm kii taariikiyo.n ke sab Guruur
kah do saarii zulmato.n se talKHiyo.n se ho.n vo duur
kyo.n ki arzaa.n ho ga.ii hai dahr me.n sahbaa-e-nuur
aaj phir taariikiyo.n ke miT hii jaa.e.nge nishaa.n
diip KHushiyo.n ke jale.nge bastii-e-Gam-KHvaar me.n
KHud-baKHud manzil khi.nchii aa.egii qadmo.n ke tale
azm-e-nau kii KHuu bhii shaamil hogii jab atvaar me.n
muttahid hai kitnaa bhaarat dahr ko batlaa.e.nge
azmat-e-jamhuuriyat duniyaa ko ham dikhlaa.e.nge
ek hii diivaar ke saa.e me.n hai.n dair-o-haram
haa.n vahii bhaarat hai ye jo amn kii tasviir hai
gautam-o-gaa.ndhii javaahar-laal aur aazaad ne
dekhaa thaa jo KHvaab pahro.n us kii ye ta.abiir hai
kah do duniyaa se hasii.n kirdaar bhii ab siikh le
aa.e ham se amn ke atvaar bhii ab siikh le
aaj vo din hai ki jis din ke liye the KHuu.n bahe
chandr-shekhar aur bhagat-singh aur phir gaa.ndhii ke KHuun
aur haa.n jauhar alii muKHtaar-o-sayyad the vahii
thaa sadaa jin ke dilo.n se sar kaTaane kaa junuun
desh kii KHaatir hu.aa jin kaa janam aur maut bhii
maut jin kii maut pe rotii rahii rotii rahii

Khayal Ansari

Nazm

zindabaad ai watan

zindaabaad ai vatan zindaabaad ai vatan
tujh se aabaad hai zindagii kaa chaman

Fazal Haq Azimabadi

Nazm

jashn-e-azadi-e-hind hai ye

desh bhagto.n ko shardhaanjlii ho
desh bhaarat kii izzat bachaa lii

Syeda Farhat

Nazm

election ke din

ye ham se bhii ba.Dh kar adaakaar hai.n
ye jo des-bhagTii ke autaar hai.n

Syeda Farhat

Nazm

sipahi ki sharik-e-zindagi

vatan kii anjuman me.n sham' ban ke raushnii dii hai
pighal kar qaum ko mai.n ne ba.Dii aasuudgii dii hai
mire zabt-e-fuGaa.n ne mulk ke dil ko KHushii dii hai
KHudaa ne mujh ko himmat muskuraahaT saadgii dii hai
shariik-e-zindagii huu.n desh bhaarat ke sipaahii kii

Bano Tahira Sayeed

Nazm

surweillance

ye chhoTii ba.Dii aa.nkho.n kii chitkabrii machhliyaa.n
apne tez nukiile Da.nk liye ba.Dhtii hai.n merii taraf
aur mai.n bhaagtaa huu.n musalsal piichhe kii taraf
jaise sharp shooter ko dekh bhaagtaa hai ko.ii target
musalsal piichhe kii taraf bhaagte hu.e mai.n maa.ngtaa huu.n du.aa
aaKHirii coach kii diivaar tak pahu.nchne se pahle
aa jaa.e ko.ii station
khul jaa.e ko.ii darvaaza
aur mai.n jhaTke se kuud kar paa sakuu.n najaat

Rahul Jha

Nazm

bambai

chimniyaa.n bhutniyo.n kii tarah baal khole hu.e
kaar-KHaane garajte hu.e
KHuun kii aur pasiine kii buu me.n sharaabor
KHuun sarmaaya-daarii ke naalo.n me.n bahtaa hu.aa
bhaTTiyo.n me.n ubaltaa hu.aa
sard sikko.n kii suurat me.n jamtaa hu.aa
sone chaa.ndii me.n tabdiil hotaa hu.aa
ba.nk kii khi.Dkiyo.n me.n charaaGaa.n
sa.Dke.n din raat chaltii hu.ii
saa.ns letii hu.ii
aadmii KHvaahisho.n ke a.ndhere nashebo.n me.n sailaab kii tarah bahte hu.e
chor-baazaar, saTTaa, ju.aarii
race ke gho.De, sarkaar ke mantarii
cinema, la.Dkiyaa.n, actor, masKHare
ek ik chiiz biktii hu.ii
gaajare.n, muuliyaa.n, kak.Diyaa.n
jism aur zehn aur shaa.erii
ilm, hikmat, siyaasat
a.nkh.Diyo.n aur ho.nTo.n ke niilaam-ghar
aarizo.n kii dukaane.n
baazu.o.n aur siino.n ke baazaar
pi.nDliyo.n aur raano.n ke godaam
desh-bhagtii ke dalaal khaadii ke byopaarii
aql, insaaf, paakiizgii, aur sadaaqat ke taajir

Ali Sardar Jafri

Nazm

bhaarat mata

dhartii jo ham ko detii ann
vahii to hai bhaarat kaa dhan
sonaa ugle apnii dhartii
barse umaD umaD kar har ghan
lahraa.e jhanDaa ye tira.ngaa
gaate jaa.e.n ham jan man gan
desh kaa mere naam ho uu.nchaa
chaahe bhaarat kaa har ik jan
bhaarat maataa kii jai bole.n
is par vaare.n apnaa tan-man

Betab Alipuri

Nazm

bachchon ka nara

ham hai.n bhaarat ke santaan
hinduu ho.n yaa musalmaan
sikh ho.n chaahe ho.n iisaa.ii
aapas me.n hai.n bhaa.ii bhaa.ii
bhaarat pyaaraa desh hamaaraa
ham sab kii aa.nkho.n kaa taaraa
is kii god me.n gangaa jamunaa
jo saakaar kare.n sab sapnaa
gaa.ndhii nehru aur aazaad
dete the ye aashirvaad
bachche phuule.n phale.n hamaare
naqsh-e-qadam par chale.n hamaare
ho.n aazaadii ke matvaale
bhaarat ke ho.n ye rakhvaale
dushman se jab vo Takraa.e.n
apne desh kii shaan ba.Dhaa.e.n
aa.o mil kar pyaar kare.n ham
bhaarat kaa upkaar kare.n ham

Fazal Haq Azimabadi

Nazm

hamara bhaarat

pyaaraa desh hamaaraa bhaarat
saare jag se nyaaraa bhaarat
koh-e-himaala is kaa darbaa.n
duudh kii har-jaa bahtii nadiyaa.n
mast fazaa me.n amrit barse
pyaarii dhartii sonaa agle
sab mausam hai.n paavan is me.n
sardii garmii saavan is me.n
o.Dhe himaala barf kii chaadar
is ke charan dhotaa hai saagar
pag pag par yuu.n jiit hai is kii
pyaar mohabbat riit hai is kii
hindii is me.n urdu is me.n
bhaashaa bhaashaa jaaduu is me.n
jaan luTaa de.nge ham is par
shaan ba.Dhaa.e.nge sab mil kar
kabhii na hogaa sar KHam is kaa
sah ra.ngaa hai parcham is kaa

Abrar Kiratpuri

Nazm

hindostan

meraa pyaaraa hindostaan
kitnii uu.nchii is kii shaan
hinduu muslim sikh 'iisaa.ii
in sab se hai is kii aan
bhaarat-vaasii karte hai.n
is par jaan-o-dil qurbaan
jaan luTaa de.nge is par
sab ke dil me.n hai armaan
mil kar sab ye naa'ra lagaa.o
meraa bhaarat des mahaan
meraa bhaarat des mahaan

Faisal Qadri Gunnauri

Nazm

hindostan

har maz.hab kii uu.nchii shaan
jis se banaa hai desh mahaan
sab ko detaa prem kaa daan
prem pyaar kii hai ye khaan
hinduu muslim sikh iisaa.ii
bodh aur jainii kii hai aan
paaTh yahii hai pahlaa bas
ban jaa.o saare insaan
viir bano ai pyaare bachcho
tum bhaarat kii ho santaan
kisii ko ko.ii kashT nahii.n
sab so.e hai.n chaadar taan
har maz.hab kaa aadar kartaa meraa bhaarat hindostaan

Betab Alipuri

Nazm

jaisa mera des

phuulo.n kaa har samt mahaknaa
kaliyo.n kaa har roz chaTaknaa
baaGo.n me.n bulbul kaa chahaknaa
mevo.n kaa shaaKHo.n se nikalnaa
jaisaa meraa des hai 'afsar' aisaa ko.ii des nahii.n
kaise kaise achchhe dariyaa
vo un kaa iThlaa ke chalnaa
do bahne.n hai.n ga.ngaa jamunaa
duniyaa me.n saanii nahii.n in kaa
jaisaa meraa meraa des hai afsar aisaa ko.ii des nahii.n
shabnam ne phuulo.n ko nikhaaraa
suuraj ne kuchh aur nikhaaraa
kaisaa samaa.n hai pyaaraa pyaaraa
ik gulshan hai bhaarat pyaaraa
jaisaa meraa des hai 'afsar' aisaa ko.ii des nahii.n

Hamidullah Afsar

Nazm

prem ke dhaare

masjid mandir aur gurudvaare
ham sab kii aa.nkho.n ke taare

Bismillah Adeem

Nazm

des ke bachcho

des ke bachcho pyaare bachcho
sab kii aa.nkh ke taare bachcho
tum se shaan vatan kii pyaare
tum ho aan vatan kii pyaare
tum hii des ke rakhvaale ho
tum dhartii ke ujiyaale ho
har suu aaj a.ndheraa dekho
buGz-o-hasad kaa Deraa dekho
bhaa.ii bhaa.ii se la.Dtaa hai
haa.e ye kaisaa din aaya hai
nafrat kii ik aag lagii hai
dhartii Gam se Dol rahii hai
aa.o tum bhii diip jalaa.o
a.ndhiyaare ko duur bhagaa.o
giit kuchh aise mil kar gaa.o
pyaar kii dil me.n jot jalaa.o

Syed Muzaffar Aalam Ziya Azeemabadi

Nazm

latifa

khelte khelte ko.ii bachcha
ek din ik ku.n.e.n pe jaa pahu.nchaa
apnii suurat use nazar aa.ii
jhaa.nk kar us ne us me.n jab dekhaa
kam-samajh aur bevaquuf thaa vo
samjhaa ko.ii ku.n.e.n me.n hai baiThaa
Dar ke bhaagaa vo apne ghar kii taraf
raah me.n mil ga.e use abbaa
bolaa ko.ii ku.n.e.n me.n baiThaa hai
dekh kar jis ko Dar ke mai.n bhaagaa
abbaa aa.e ku.n.e.n pe Gusse me.n
dekh kar us me.n apnaa hii saaya
bole jhu.njhlaa ke kyuu.n miyaa.n saahab
daa.Dhii rakh kar ye harakat-e-bejaa
ik to bachcho.n ko tum Daraate ho
us pe aa.nkhe.n hame.n dikhaate ho

Abdullah Nasir

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now