Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "dilrubaa"

Nazm MATCHES FOR "dilrubaa"

Nazm

mujhe bhul ja

mire saaqiyaa mujhe bhuul jaa
mire dilrubaa mujhe bhuul jaa
na vo dil rahaa na vo jii rahaa
na vo daur-e-aish-o-KHushii rahaa
na vo rabt-o-zabt-e-dilii rahaa
na vo auj-e-tishna-labii rahaa
na vo zauq-e-baada-kashii rahaa
mai.n alam-navaaz huu.n aaj-kal
mai.n shikasta-saaz huu.n aaj-kal
mai.n saraapaa raaz huu.n aaj-kal
mujhe ab KHayaal me.n bhii na milaa
mujhe bhuul jaa mujhe bhuul jaa

Shakeel Badayuni
Nazm

KHatun-e-mashriq

husn kaa aaGosh-e-ra.ngii.n dil-fareb-o-dilrubaa
ilm se ban jaa.e aqliidas kaa mahz ik daa.era!

Josh Malihabadi
Nazm

ishaare

shahr ke makaano.n ke
sard saa.ebaano.n ke
dilrubaa thake saa.e
KHvaahisho.n se ghabraa.e
rah-ravo.n se kahte hai.n
raat kitnii viiraa.n hai
maut baal-afshaa.n hai
is ghane andhere me.n
KHvaahisho.n ke Dere me.n
dil ke chor baste hai.n
un ke paas jaane ke
laakh chor raste hai.n

Muneer Niyazi
Nazm

ek laDki

ye diivaanii sii ik la.Dkii
hasii.n bhii dilrubaa bhii hai
abhii ma.asuum hai lekin
vafaa se aashnaa bhii hai
mire ghar kii hai.n diivaare.n
usii ke rang se raushan
usii ke dam se paakiiza
mirii ummiid kaa aa.ngan
jabii.n us kii sahar jaisii
azaa.n detii hu.ii aa.nkhe.n
nazar kaa imtihaa.n letii
shab-e-taariik sii zulfe.n
nigaahe.n zindagii jaisii
adaa.e.n chaa.ndnii jaisii
vafaa us kii mirii KHaatir
asaa-e-muusavii jaisii
taqaddus huur ke jaisaa
saraapaa nuur ke jaisaa
mukammal husn hai us kaa
mire dastuur ke jaisaa
nigaaho.n ke liye merii
ye hai tanviir-e-mustaqbil
ye sub.h-e-nau kii manzil hai
ye hai tasviir-e-mustaqbil
har ik andaaz hai us kaa
dhanak manzar kaa ham-saaya
'valii' ye laaDlii beTii
mirii hastii kaa sarmaaya
ye diivaanii to hai lekin
yahii daanish-nishaa.n hogii
isii kii god me.n pal kar
na.ii duniyaa javaa.n hogii

Waliullah wali
Nazm

gulzar-e-watan

phuulo.n kaa kunj-e-dilkash bhaarat me.n ik banaa.e.n
hubb-e-vatan ke paude is me.n na.e lagaa.e.n
phuulo.n me.n jis chaman ke ho buu-e-jaa.n-nisaarii
hubb-e-vatan kii qalme.n ham is chaman se laa.e.n
KHuun-e-jigar se sii.nche.n har naKHl-e-aarzuu ko
ashko.n se bel-buuTo.n kii aabruu ba.Dhaa.e.n
ek ek gul me.n phuu.nke.n ruuh-e-shamiim-e-vahdat
ik ik kalii ko dil ke daaman se de.n havaa.e.n
firdaus kaa namuuna apnaa ho kunj-e-dilkash
saare jahaa.n kii jis me.n ho.n jalva-gar fazaa.e.n
chhaayaa ho abr-e-rahmat kaashana-e-chaman me.n
rim-jhim baras rahii ho.n chaaro.n taraf ghaTaa.e.n
murGaan-e-baaG ban kar u.Dte phire.n havaa me.n
naGme ho.n ruuh-afzaa aur dil-rubaa sadaa.e.n
hubb-e-vatan ke lab par ho.n jaa.n-fazaa taraane
shaaKHo.n pe giit gaa.e.n phuulo.n pe chahchahaa.e.n
chhaa.ii hu.ii ghaTaa ho mausam tarab-fazaa ho
jho.nke chale.n havaa ke ashjaar lahlahaa.e.n

Suroor Jahanabadi
Nazm

qayamat

ye maanaa raat aa.nkho.n me.n kaTii
ek ek pal but saa ban kar jam gayaa
ik saa.ns to ik sadii ke baad phir se saa.ns lene kaa KHayaal aayaa
ye sab sach hai ki raat ik karb-e-be-paayaa.n thii
lekin karb hii taKHliiq hai
ai pau phaTe ke dilrubaa lamho gavaahii do

Ahmad Nadeem Qasmi
Nazm

mera watan

dil-rubaa laala ho fazaa terii
mujh ko bhaa.ii na ik adaa terii
lutf se ba.Dh ke hai jafaa terii
vaah-re hindostaa.n vafaa terii
mai.n na maanuu.n kabhii tiraa kahnaa
mai.n na baKHshuu.n kabhii KHataa terii
bar-tar-az-KHaar hai tiraa gulshan
zahr se kam nahii.n havaa terii
KHaalii-az-kaifiyat tirii har chiiz
baat har ek be mazaa terii
dard-e-dil me.n ta.Dap ke mar jaa.uu.n
mai.n na Dhuu.nDuu.n kabhii shifaa terii
kaun sii baat terii lutf-aamez
kaun sii chiiz dil-kushaa terii
tujh ko jannat-nishaan kahte hai.n
ham jahannam kii jaan kahte hai.n
tujh ko kas baat par hai naaz bataa
kyaa nahii.n aur mulk tere sivaa
terii aab o havaa latiif sahii
tujh se ba.Dh kar spain kaa KHitta
tujh ko apnii zamiin kaa hai ghamanD
tujh se afzal kahii.n hai america
hasan par apne naaz hai tujh ko
hasan tujh se sivaa etaaliyaa kaa
tujh ko ga.ngaa kaa apnii dhokaa hai
tuu ne dekhaa nahii.n hai siin ko jaa
mausiiqii par tujhe hai naaz bahut
is me.n juz dard-o-Gam dharaa hai kyaa
falsafa teraa agle vaqto.n kaa
falsafa dekh jaa ke europe kaa
tujh me.n phir aan kyaa rahii baaqii
terii mahfil na kuchh na kuchh saaqii
haa.n muravvat kaa tujh me.n naam nahii.n
haa.n uKHuvvat kaa tujh me.n naam nahii.n
tujh se bad-naam ishq saa ustaad
aur mohabbat kaa tujh me.n naam nahii.n
aashtii siikhe tujh se aa ke ko.ii
haa.n KHusuumat kaa tujh me.n naam nahii.n
terii har baat me.n safaa.ii hai
aur kuduurat kaa tujh me.n naam nahii.n
tujh ko aur hurriyat se kyaa nisbat
is zaruurat kaa tujh me.n naam nahii.n
shaad hai.n taire apne begaane
aur shikaayat kaa tujh me.n naam nahii.n
terii tahziib tujh ko maujib-e-faKHr
haa.n jahaalat kaa tujh me.n naam nahii.n
baat duniyaa se hai judaa terii
vaah ai hindostaa.n adaa terii
tere rasm-o-rivaaj ne maaraa
is maraz ke ilaaj ne maaraa
terii Gairat nai kar diyaa barbaad
KHaandaano.n ke laaj ne maaraa
kyaa kare.n har gha.Dii yahii hai fikr
roz kii ehtiyaaj ne maaraa
aa.e din call kaa hai zikr-azkaar
ik zaraa se anaaj ne maaraa
aur sab par vabaa kaa ik turra
is anokhe KHiraaj ne maaraa
baKHt bargashta aarzu.e.n bahut
havas-e-siim-o-aaj nai maaraa
na kare.n kaam kuchh to khaa.e.n kyaa
roz ke kaam-kaaj ne maaraa
tuu to rahne kaa kuchh maqaam nahii.n
tujh me.n insaaniyat kaa naam nahii.n
qaid tuu ne kiyaa hasiino.n ko
mah-jabiino.n ko naazniino.n ko
zevar-e-ilm se rakhaa aarii
tuu ne qudrat ke in nagiino.n ko
iKHtiyaar o pasand kii ai hind
kyaa zaruurat na thii hasiino.n ko
KHuub pahchaanii tuu ne qadr in kii
KHuub samjhaa tuu in KHaziino.n ko
ku.e.n jha.nkvaa.e naazniino.n se
zahr khilvaayaa mah-jabiino.n ko
Duube jaate hai.n kaun aa ke bachaa.e
bahr-e-hastii ke in safiino.n ko
tuu makaa.n thaa makaan ho ke diyaa
KHauf-e-aaraam in makiino.n ko
tujh pe tahziib ta.an kartii hai
tujh pe ilzaam KHalq dhartii hai
aarzuu hai tujhe hukuumat kii
jaah-o-sarvat kii shaan-o-shaukat kii
kyuu.n na ho tujh me.n himmat-e-aalii
dhuum har suu hai terii jur.at kii
to ne kasb-e-funuun-e-ja.ng kiyaa
sab me.n shohrat hai terii quvvat kii
qasme.n khaate hai.n log duniyaa me.n
terii millat tirii uKHuvvat kii
mulk-daarii me.n mulk-giirii me.n
vaah kyaa paidaa qaabiliyyat kii
tuu to ustaad se bhii ba.Dh niklaa
hairat-a.ngez tuu ne mehnat kii
aap aalam me.n tuu hai apnii misaal
aadamiyyat kii aur shujaa.at kii
ham-sarii kii kasii ko taab nahii.n
tiraa aafaaq me.n javaab nahii.n
daaG dil ke kise dikhaa.e.n ham
aisaa mushfiq kahaa.n se laa.e.n ham
dil me.n hai apne ham-nashii.n ik roz
aap ro kar tujhe rulaa.e.n ham
is tabii.at ko kas tarah bahlaa.e.n
dil ko kis chiiz se lagaa.e.n ham
kab talak roz ke kahe.n sadme
kab talak aafate.n uThaa.e.n ham
zahr kyuu.n ai falak na ham khaa le.n
jii se apne guzar na jaa.e.n ham
jo shikaayat ho kyuu.n na lab par aa.e
ek dukh ho use chhupaa.e.n ham
ai tamaddun ke raahat-o-aaraam
haa.e kas tarah tum ko paa.e.n ham
log uThaate hai.n zindagii ke maze
ham uThaate hai.n naa-KHushii ke maze

Meer Syed Nazeer Husain Nashad
Nazm

sabza-e-begana

hasab-nasab hai na taariiKH o jaa-e-paidaa.ish
kahaa.n se aayaa thaa maz.hab na valdiyat ma.aluum
maqaamii chhoTe se KHairaatii aspataal me.n vo
kahii.n se laayaa gayaa thaa vahaa.n ye hai marquum
mariiz raato.n ko chillaataa hai ''mire andar
asiir zaKHmii parinda hai ik, nikaalo ise
guluu-girafta hai ye habs-e-dam hai KHaa.if hai
sitam-rasiida hai mazluum hai bachaa lo ise''
mariiz chiiKHtaa hai dard se karaahtaa hai
ye vietnam, kabhii dominican, kabhii kashmiir
zar-e-kasiir, siyah qaume.n, KHaam madniyaat
kasiif tel ke chashme, avaam, istehsaal
zamii.n kii maut bahaa.im, fizaa.ii ja.ng, sitam
ijaara-daarii, subuk gaam, dilrubaa, atfaal
sarod-o-naGma, adab, sher, amn, barbaadii
janaaza ishq kaa, daf kii sadaa.e.n, murda KHayaal
taraqqii, ilm ke gahvaare, ruuh kaa madfan
KHudaa kaa qatl, ayaa.n zer-e-naaf zohra jamaal
tamaam raat ye be-rabt baate.n kartaa hai
mariiz saKHt pareshaanii kaa sabab hai yahaa.n
Garaz ki jo thaa shikaayat kaa ek daftar thaa
natiija ye hai usii roz muntaqil karke
use ik aur shifaa-KHaane ko ravaana kiyaa
sunaa gayaa hai vahaa.n nafsiyaat ke maahir
tabiib haaziq o nabbaaz doctor kitne
talab kiye ga.e aur sab ne ittifaaq kiyaa
ye ko.ii zehnii maraz hai, mariiz ne shaayad
kabhii parinda ko.ii paalaa hogaa lekin vo
adam-e-tavajjohii yaa ittifaaq se yuu.nhii
bichaara mar gayaa us maut kaa asar hai ye
ajiib chiiz hai taht-e-shu.uur insaa.n kaa
ye aur kuchh nahii.n ehsaas-e-jurm hai jis ne
dil o dimaaG pe qabza kiyaa hai is darja
mariiz qaatil o mujrim samajhtaa hai KHud ko!
kisii kii raa.e thii pasmaa.nda qaum kaa ik fard
mariiz hogaa isii vaaste siyah qaume.n
Gariib ke liye ik taboo ban ga.ii.n afsos
ko.ii ye kahtaa thaa ye asal me.n hai hubb-e-vatan
mariiz chaahtaa thaa ham kafiil ho.n apne
kisii bhii qaum ke aage na haath phailaa.e.n
yahii.n pe tel ke chashme hai.n, vo kare.n daryaaft!
gumaan kuchh ko thaa ye shaKHs ko.ii shaa.er hai
jo chaahtaa thaa jahaa.n-gardii me.n guzaare vaqt
hasiin aurte.n maa.il ho.n lutf-o-aish rahe
qalam ke zor se shohrat mile zamaane me.n
zar-e-kasiir bhii haath aa.e is bahaane se
magar Gariib kii sab koshishe.n ga.ii.n naakaam
shikast-e-paiham o ehsaas-e-naa-rasaa.ii ne
ye haal kar diyaa majruuh hoga.e a.asaab
Garaz ki nukta-rassii me.n guzar gayaa sab vaqt
vo chiiKHtaa hii rahaa dard kii davaa na milii
nashist baa'd nashist aur mu.aa.ene shab o roz
inhii.n me.n vaqt guzartaa gayaa shifaa na milii
phir ek shaam vahaa.n surma-dar-guluu aa.ii
jo us ke vaaste goyaa tabiib-e-haaziq thii
kisii ne phir na sunii dard se bharii aavaaz
karaahtaa thaa jo KHaamosh ho gayaa vo saaz

Akhtarul Iman
Nazm

ahd-e-hazir ki dil-ruba maKHluq

adh-phaTe posTaro.n ke pairaahan
aahanii bilDigo.n ke jismo.n par
kitne dilkash dikhaa.ii dete hai.n
bas kii behis nashisto.n par baiThii
din ke baazaar se KHariidii hu.ii
aarzuu Gam umiid mahruumii
nii.nd kii goliyaa.n gulaab ke phuul
kele amruud santare chaaval
painT gu.Diyaa shamiiz chuuhe-daan
ek ik shai kaa kar rahii hai hisaab
ahd-e-haazir kii dil-rubaa maKHluuq!

Shahryar
Nazm

KHwab

aa.nkh band hote hii
KHvaab jaag jaate hai.n
KHvaab nii.nd kaa jaaduu
kaun kaun aataa hai!
ko.ii ajnabii chehra
ko.ii jaanaa pahchaanaa!
ko.ii dilrubaa la.Dkii
ko.ii dost kii biivii
ko.ii Gair kii aurat!
jism jagmagaate hai.n!
lamha lamha vahshat hai
har gunaah afsaana
dha.Dkano.n kaa nazraana
jab bhii aa.nkh khultii hai
KHud se KHauf aataa hai
tujh se jii churaataa huu.n
KHvaab kaa har ik lamha
mujh ko apnii nazro.n se
jaane kyuu.n giraataa hai
kaash merii aa.nkho.n se
saare KHvaab dhul jaa.e.n

Sabir Dutt
Nazm

holi

pahle zamaana aur thaa mai aur thii daur aur thaa
vo boliyaa.n hii aur thii.n vo Toliyaa.n hii aur thii.n, vo holiyaa.n hii aur thii.n
lekin mire piir-e-muGaa.n
kal to nayaa andaaz thaa
ik daur kaa thaa KHaatma ik daur kaa aaGaaz thaa
tere vafaadaaro.n ne jab khelii.n gulaabii holiyaa.n
nikle banaa kar Toliyaa.n
ha.nste chale gaate chale
apne gulaabii rang se duniyaa ko nahlaate chale
masjid se mu.nh mo.De hu.e
mandir kaa sa.ng-e-aastaa.n chho.De hu.e
girjaa se katraa.e hu.e
jaise ki ho.n ruuhaaniyat kii zindagaanii hii se ghabraa.e hu.e
daur-e-vafaadaarii kaa ye anjaam thaa
fikr-e-gunahgaarii kaa taaza dil-rubaa paiGaam thaa
tere hii kuuche me.n ye sab ahd-e-vafaa to.De ga.e
rishte na.e jo.De ga.e
aur phir gunahgaaro.n ne kyaa rindaana ha.ngaame kiye
us vaqt un ko yaad thaa bas ek tarsaanaa tiraa
mufliso.n naadaaro.n ko lalchaanaa tiraa
jab mai-kade kii god me.n
tere jafaa terii sazaa ke naam par saaGar chale
suukhe hu.e kaase labaalab bhar chale
sab apne lab tar kar chale
phir to.D dii.n vo pyaaliyaa.n jin me.n sadaa pii aa.e the
shiishe chhanaa chhan chhan chhanaa chhan TuuTte
aur ri.nd lazzat luuTte
TuuTe hu.e shiisho.n kaa ik ambaar thaa
shiisho.n ke is ambaar me.n ik vo bhii kohna jaam thaa
jis ko sikandar ke qavii haikal javaa.n
bhaage the poras kii zamii.n ko chho.D kar
un me.n vo kaase bhii to hai.n jin ko arab le aa.e the
apnii abaa se Dhaa.np kar
piine se pahle dekhte the mohtasib ko jhaa.nk kar
lekin kabhii
piine se baaz aate na the faateh jo the
un me.n hai.n aise jaam bhii
jin par paThaano.n ke qavii haatho.n ke dhu.ndle se nishaa.n
kuchh aaj bhii maujuud hai.n
aur un nishaano.n me.n hai KHuu.n maftuuh hindustaan kaa
aur un me.n hai.n vo jaam bhii jin ko muGal le aa.e the
taataar se qandhaar se kaabul se ruknaa-baad se
maftuuh hindustaan me.n
jin ko vo apne qasr-e-aaliishaa.n me.n chhalkaate rahe
teGo.n se khankaate rahe
aur vo hasii.n naazuk subuk halkii suraahii kis kii hai
paris ke mai-KHaano.n me.n ye mash.huur thii
laayaa thaa ik taajir ise jo baa'd me.n faateh banaa
ye halke shiisho.n ke gilaas aur ye na.e halke se paig
jin par likhaa hai ye bane the mulk-e-inglistaan me.n
aur haal kii sadiyo.n me.n chalte rahe
piine ko mil jaatii thii pii lete the ham
lekin tahii-dastii kaa ye aalam thaa dil jalte rahe
ham aaj ghabraa hii ga.e
aur un sabhii shiisho.n ko chaknaachuur kar Daalaa vufuur-e-josh me.n
chhan chhan chhanaa chhan to.D kar
jaise ki barbaadii kii devii chham-chhamaa-chham naachtii
holii manaane ke liye mai-KHaane me.n aa hii ga.e
TuuTe hu.e shiisho.n ke is ambaar par
ham ne jalaa.ii aag yuu.n
zardusht kaa paakiiza dil sachchaa.iyo.n par ha.ns diyaa
jaise ki ye kahne lagaa
jalne do jalne do yuu.nhii shiishe pighalne do yuu.nhii
tere vafaadaaro.n ne yuu.n piir-e-muGaa.n
shab bhar jalaa.ii.n holiyaa.n
na.are vo mastaane lage is josh me.n
dil gir pa.De ehsaas kii aaGosh me.n
aur bol uThe tasliim ai piir-e-muGaa.n jaate hai.n ham
kal phir palaT kar aa.e.nge
us vaqt is mai-KHaane me.n saamaan ho.nge duusre
tere puraane zehn ke me.aar to.De jaa.e.nge
taamiir-e-nau kii jaa.egii
lekin hamaare saal-KHuurda mehrbaa.n piir-e-muGaa.n
tujh ko buraa lagtaa hai kyuu.n
Gairo.n kaa kyaa teraa bhii kyaa
ye mai-kada ham sab kaa hai panchaaytii
tuu kyaa hai teraa KHauf kyaa
kah to diyaa piir-e-muGaa.n kal palaT kar aa.e.nge
hargiz na ham baaz aa.e.nge
kis ko Daraataa hai ki tum is kii sazaa paa jaa.oge
gaate the ham gaate hai.n ham gaa.e.nge ham
hargiz na baaz aa.e.nge ham
jhele.nge jiite jaa.e.nge
pairo.n me.n hai zanjiir lekin TuuT bhii saktii hai ye
haa.n aaj hastii qaid hai kal chhuuT bhii saktii hai ye
gaane de gaane de hame.n
dhuume.n machaane de hame.n
shiishe ko shiishe se la.Daane de hame.n
chhan-chhan-chhanaa-chhan kii sadaa
ba.Dhne de ba.Dhne de abhii
ham mast o be-KHud naachte gaate jalaate to.Dte
ha.nste rahe.n chalte rahe.n
aur tuu bhii KHud piir-e-muGaa.n
holii ke naGme san zaraa aur dekh apnii aa.nkh se
tere vafaadaaro.n ne kyaa khelii.n gulaabii holiyaa.n
mu.nh mai-kade se mo.D kar holii kii ye Tolii chalii
gulzaar me.n
sabze lachaktii Daaliyaa.n gunjaan, sundar jhaa.Diyaa.n
paanii kii sii.nchii kiyaariyaa.n, kaa.nTo.n me.n chubhtii pattiyaa.n
ye sab sahii lekin yahaa.n vo shai kahaa.n
jis ke liye mash.huur hai a.nguur-e-naab
haa.n kyaa kahaa piir-e-muGaa.n
talvo.n ke niiche phuul hai.n in me.n se do ik chun bhii luu.n
KHaalii hai.n gul-daste tire
tujh ko nahii.n ma.aluum abhii
KHaalii ye gul-daste tire KHaalii hii rah jaa.e.nge ab
phuulo.n ne Thaanii hai ki shaaKHo.n hii pe mar jaa.e.nge ab
aur tere kamro.n me.n vo na aa.e.nge ab
mu.nh-band kaliyaa.n ab kahaa.n
jo apnii sundar mohnii muskaan kar de.n raa.egaa.n
aur apnaa gulshan chho.D de.n siine me.n KHushbu.e.n liye
aur ajnabii maahaul me.n
taaq-e-nazar kii kaa.nptii ziinat bane.n
kaliyo.n ke mu.nh ab khul chuke mu.nh-band kaliyaa.n ab kahaa.n
kaliyaa.n kahaa.n ye phuul hai.n
KHaak-e-chaman kii god me.n aaraam-e-jaa.n ye phuul hai.n
aatish-zabaa.n ye phuul hai.n
aur dekh tuu ye phuul kitne shoKH hai.n
jo TuuT kar shaaKHo.n se gir jaate hai.n terii raah me.n
ai dil-kash piir-e-muGaa.n
ye chaahte hai.n rok de.n gulzaar me.n raahe.n tirii
tere liye chaara hii kiyaa ab rah gayaa
in be-hayaa phuulo.n kii aa.nkho.n kaa to paanii bah gayaa
ab hai.n ye un kii jur.ate.n roke.ngi tere raaste
tuu bhii KHudaa ke vaaste
in ko kuchal de piis de
varna KHudaa-na-KHvaasta
ye rok hii le.n raasta
kaliyaa.n nahii.n kaa.nTe hai.n ye
kaa.nTo.n se bhii bad-tar hai.n ye nashtar hai.n ye KHanjar hai.n ye
gulzaar me.n tere qadam kuchh aaj to aa.e nahii.n
tuu ne unhii.n sabzo.n pe kii hai mai-kashii
sadiyo.n se teraa daur hai
gulzaar par hai haq tiraa
tuu Dar gayaa piir-e-muGaa.n
kitnaa bhayaanak KHvaab thaa
ta.abiir kuchh bhii ho magar
tere vafaadaaro.n ne kal
kis aan se kis baan se kis shaan se
khelii.n gulaabii holiyaa.n

Ali Jawad Zaidi
Nazm

shama

aaj us dil-rubaa kii saal girah hai
lekin mai.n us hasiin shaam kaa intizaar nahii.n kar sakaa
kal raat hii jashn manaane us ke dar par pahu.nch gayaa
mere haatho.n me.n surKH gulaab the
aur bahaar kii KHush-buu
aa.nkho.n me.n pyaar thaa
aur bahut se savaal
ho.nTo.n par KHushiyo.n ke giit the
aur tho.Dii sii pyaas
dil-rubaa ke saamne ik sham.a jal rahii thii
KHushii ke is mauqe par
Thiik baarah baje
us ne vahii kiyaa jo saal-girah manaane vaale karte hai.n
qaatil adaa.o.n vaalii ne
be-niyaazii se phuu.nk maar ke
merii mohabbat kii sham.a gul kar dii

Mubashshir Ali Zaidi
Nazm

chuha

hai mire paas ik miraa chuhaa
KHuubsuurat saa dil-rubaa chuhaa
dum bhii chuuhe kii sar bhii chuuhe kaa
hai miraa chuhaa bas niraa chuhaa
billii ko bhii sabaq pa.Dhaataa hai
hai bahut hii pa.Dhaa-likhaa chuhaa
mere chuuhe ko ko.ii kuchh na kahe
miraa chuhaa hai laaDlaa chuhaa
so gayaa dekh kar vo billii ko
log samjhe ki mar gayaa chuhaa
harkate.n us kii sab dilero.n kii
kaam kaa sher naam kaa chuhaa
do hii chuuhe hai.n saarii duniyaa me.n
ik miraa chuhaa ik tiraa chuhaa
chuhaa dekhaa to ro pa.Dii billii
billii dekhii to ha.ns diyaa chuhaa
baat ik bhii sunii na billii ne
umr bhar chiiKHtaa rahaa chuhaa
jitne chuuhe hai.n mere chuuhe hai.n
ye miraa chuhaa vo miraa chuhaa
tere chuuhe ko khaa ga.ii billii
merii billii ko khaa gayaa chuhaa
kal la.Daa.ii hu.ii thii dono.n me.n
mar ga.ii billii bach gayaa chuhaa

Sufi Ghulam Mustafa Tabassum
Nazm

ai aligarh

dilrubaa terii adaa.e.n KHush-nazar teraa jamaal
raushnii detaa hai zehno.n ko tiraa mahr-e-KHayaal

Moazzam Ali Khan
Nazm

intizar hi intizar

ek chaa.ndnii raat thii
husn kii baaraat thii
thaa dhartii par bhii ek chaa.nd chamaktaa hu.aa
saamne us ke ek hasiin dilrubaa
KHuubsuurat naqsh-o-nigaar
aa.nkho.n me.n KHumaar hii KHumaar
palke.n jhuktii.n kabhii uThtii.n
lab-kushaa hote
phir KHamoshii
raat kii dilkashii sameT kar
is chaa.nd kii aaGosh me.n
zam honaa chaahtii thii vo
vo chaa.nd bhii us husn ke sahar me.n Duubaa hu.aa
dekhtaa rahaa dekhtaa rahaa
kaise dil se dil milaa.e
ki aaGosh me.n vo simaT jaa.e
dha.Dkane.n tez hotii ga.ii.n
qaraar ik duuje kaa khotii ga.ii.n
us chaa.nd ne parii-paikar kii jaanib
haath ba.Dhaa diye
apnii aaGosh ko vaa kiyaa aur kahaa
aa.o simaT jaa.o merii baa.nho.n me.n
binaa tumhaare mai.n rah nahii.n saktaa jii nahii.n saktaa
tum ki meraa jiivan ho
vo parii-paikar husn-e-mujassam aage ba.Dhii
us chaa.nd kii dha.Dkano.n me.n mil jaane ke liye
zindagii ke giit gaane ke liye muskuraane ke liye
achaanak Gaiz-o-Gazab kii aa.ii aavaaz
kahaa.n hai chaa.ndnii kahaa.n hai chaa.ndnii
vo husn-e-mujassam
ghar vaalo.n kii Gaiz-o-Gazab kii sun kar aavaaz
tharraa ga.ii kaa.np ga.ii KHauf se
barq-raftaar se sahn se hotii hu.ii
jaa kar apnii KHvaab-gaah me.n
maKHmalii.n bistar par daraaz ho ga.ii
phir raato.n pahro.n vo jaagtii rahii jaagtii rahii
nii.nd chain aaraam kho gayaa sab
rah gayaa to bas ek intizaar
intizaar hii intizaar

Firoza Yasmeen
Nazm

ye jhuki-jhuki si nazar sanam

yuu.n ga.nvaa na ai mirii dil-rubaa ye jo chaar din kaa shabaab hai
ye jhukii-jhukii sii nazar sanam ye savaal hai ki javaab hai

Sada Ambalvi
Nazm

remote

damakte chehre ghanerii zulfe.n
ye sarsaraate havaa.o.n jaise libaas jismo.n kaa baa.nkpan dilrubaa adaa.e.n
ye jhilmilaate makaan ra.ngiin shahr chamkiilii care.n
ye sab manaazir jo raahato.n ke saraab dikhlaa ke
KHvaahisho.n ke latiif paikar taraash kar KHvaab bechte hai.n
bahut hasii.n hai.n
ye kyaa hu.aa bas palak jhapakte hii saare manzar badal ga.e hai.n
ye KHuu.n me.n Duube hu.e manaazir kahaa.n se aa.e
ye maa.n kahaa.n kii hai kaun hai apne beTe kii laash par sar paTak rahii hai
nayaa dhamaaka kahaa.n hu.aa hai
ye kaun hai.n kyaa shahiid hai.n jin ke jismo.n se bam ba.ndhe hai.n
jo in dhamaako.n me.n jaa.n-ba-haq saik.Do.n hu.e hai.n
shahiid vo hai.n
ye kaun saa shahr kyaa jagah hai
jahaa.n pe sailaab ne phir se qahr Dhaayaa
ye zalzala phir kahaa.n pe aayaa
fasaad phir ho gayaa kahii.n par
ye kyaa jagah hai
ye kaun ma.asuum bachchiyo.n ke buriida jismo.n ko Dhuu.nDhtaa hai
ye barbariyat ke sansanii-KHez manzar
bahut hii tafsiil se chal rahe hai.n
kahaa.n kahaa.n se talaash kar ke dikhaa rahe hai.n
mujhe pata hai
ye aalamii gaa.nv kaa hai manzar
are KHudaa ke liye badal do
remote laa.o baTan dabaa.o
ye Thiik hai haa.n ye hii lagaa lo
sajii banii aurato.n ke qisse jo apne jannat-numaa makaano.n me.n
jaal saazish ke bun rahii hai.n
ye bevafaa.ii ke ranjisho.n ke
jo silsile hai.n
chalo phir in me.n hii sar khapaa.e.n
ye bhuul jaa.e.n ki saarii duniyaa me.n vahshato.n kaa hai raqs jaarii

Azra Naqvi
Nazm

do piyaade

sardiyo.n ke mausam me.n pichhlii raat ko chhat par
ham jo ek duuje se chaa.ndnii kii baarish me.n
be-zabaan jazbo.n kii KHushbu.o.n se milte the
husn-e-dilrubaa teraa lafz kii haqiiqat se kitnaa be-ta.alluq thaa
an-kahaa sunaa sab kuchh lamha-e-masarrat thaa
jab se lab-kushaa.ii ke silsile hu.e jaarii
terii merii bahso.n ne
an-kahaa sunaa sab kuchh
mantiqo.n daliilo.n ke vaahimo.n se gadlaayaa
aur phir mohabbat ke sab gulaab sa.nvlaa.e
aaj ajnabiyyat kii be-samar fazaa.o.n me.n
ham ki ek duuje se kitne be-ta.alluq hai.n
avvalii.n rifaaqat kii saarii KHaslate.n kho kar
is bisaat-e-hastii par
sirf do pyaade hai.n

Yusuf Kamran
Nazm

aaina dekhta hun

mai.n jab kabhii
do gha.Dii
Gaur se aa.iina dekhtaa huu.n
to maazii ke
uljhe hu.e roz o shab
kii shanaasaa lakiiro.n
me.n dhundlii tasaaviir
maahaul se be-KHabar boltii hai.n
ki jaise kisii ajnabii shaKHs kii
zindagii kii hasii.n saa.ato.n
dil-rubaa hasrato.n

Akhtar Ziai
Nazm

aansuon ke ratjagon se

saare manzar ek jaise
saarii duniyaa ek sii
naashpaatii ke daraKHto.n se
khajuuro.n kii ghanii shaaKHo.n talak
duniyaa achaanak ek jaisii ho ga.ii hai
misr ke ahraam kii mahzuu.n fazaa.e.n
dam-ba-KHud hai.n kuufa o baGdaad ke baazaar me.n
kaazimain o mash.had-e-e.araaq se nauhe nikal kar
sarhad-e-labnaan tak pahu.nche hu.e hai.n
shahr-e-dillii ke a.ndhere
zulmat-e-lahore se milne lage hai.n
shor kaabul kaa sunaa.ii detaa hai
bartaania kii mahfilo.n me.n
KHvaahish-e-newyark zinda hotii hai
Dhaake kii puraanii dilrubaa galiyo.n me.n
goyaa saarii duniyaa ek jaisii ho ga.ii hai
saare manzar ek se
uj.Dii hu.ii aa.nkho.n me.n saare KHvaab
yaado.n kaa fusuu.n ummiid ke saare fasurda aaftaab
ek ho sakte hai.n
aa.o in se mil-milaa kar ik jahaan-e-taaza-tar paidaa kare.n
in lahuu kii buu.ndo.n se
raste sajaa.e.n
aa.nsu.o.n ke ratjago.n se aarzuu-e-chashm-e-tar paidaa kare.n

Ain Tabish
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now