Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "jyotshii"

Nazm MATCHES FOR "jyotshii"

Nazm

jyotishi din mahinon ka qissa suno

jyotishii din mahiino.n kaa qissa suno
jab gharo.n se nikaltii hu.ii la.Dkiyaa.n apne ghar jaa.e.ngii
apne raste kii ho jaa.e.ngii
aur tahmiina-e-be-KHabar har galii kii KHabar
har galii ik na.e ghar pe jaa kar uchaT jaa.egii
ai merii ruuh ke baadbaa.n
dukh khule paaniyo.n kaa safar umr-bhar
jyotshii din mahiino.n kaa qissa suno
jyotishii roz har roz suuraj khule paaniyo.n se nikaalaa gayaa
rose suuraj khule paaniyo.n me.n utaaraa gayaa
jyotishii din mahiino.n kii vahshat se aagaah mai.n
jyotishii is aziyyat se aagaah mai.n
jyotishii mere hone kaa qissa suno
jyotishii saa.np aa.nkho.n ne dekhaa to mai.n sau gayaa
mor paa.nv ne dekhaa to mai.n sau gayaa
jyotishii mere sone kaa qissa suno
jyotishii merii aa.nkho.n me.n tahmiina-e-be-KHabar ke liye an-ginat KHvaab hai.n
KHvaab vahshat ke aadaab hai.n
sub.h suuraj kaa farmaan hai
aur suuraj khule paaniyo.n me.n utaaraa gayaa

Mohammad Anvar Khalid
Nazm

sipahi ka marsiya

uTTho ab maaTii se uTTho
jaago mere laal
ab jaago mere laal
tumrii sej javaan kaaran
dekho aa.ii rain a.ndhyaaran
niile shaal do-shaale le kar
jin me.n in dukhiyan akhiyan ne
Dher kiye hai.n itne motii
itne motii jin kii jyotii
daan se tumraa
jag jag laagaa
naam chamakne
uTTho ab maaTii se uTTho
jaago mere laal
ab jaago mere laal
ghar ghar bikhraa bhor kaa kundan
ghor-a.ndheraa apnaa aa.ngan
jaane kab se raah take hai.n
baalii dulhaniyaa baa.nke viiran
suunaa tumraa raaj pa.Daa hai
dekho kitnaa kaaj pa.Daa hai
bairii biraaje raaj-si.nghaasan
tum maaTii me.n laal
uTTho ab maaTii se uTTho, jaago mere laal
haT na karo maaTii se uTTho, jaago mere laal
ab jaago mere laal

Faiz Ahmad Faiz
Nazm

main aur meri tanhai

ham samundar se milne zaraa der se pahu.nche
raat samundar se ziyaadaa gahrii ho rahii thii
ham na.nge paa.nv saahil ke saath
bahut duur tak chale
dino.n ke baa'd sarshaarii ne apnaa chehraa dikhaayaa thaa
aur hamaarii bhuulii hu.ii dhun gungunaa.ii thii
samundar hamaarii KHaamoshii me.n Duubne hii vaalaa thaa
jab hamaaraa giit patvaar hu.aa
ajnabii qadmo.n ke nishaan chunte hu.e
KHayaal aayaa
chahal-qadmii karte hu.e vo do saa.e kyaa hu.e
ye lahre.n jin ke paa.nv churaa laa.ii hai.n
tabhii ham ne apne juuto.n me.n jhaa.nk kar dekhaa
saahil abhii puurii tarah nahii.n phislaa thaa
ham ne sochaa
samundar ko ab so jaanaa chaahiye
raat kii KHunkii hamaarii rago.n me.n utar chukii thii
jab ham vaapsii ke liye mu.De
samundar ba.Dii garm-joshii ke saath hame.n ruKHsat karne aayaa

Anjum Saleemi
Nazm

kya de sakte ho?

kisii ko kyaa de sakte ho tum!
chaa.nd kisii ko de sakte ho?
taare?
yaa phir jagmag jugnuu kisii ko de sakte ho?
suukhii shaaKH ko haraa saa patta
pyaas ko shabnam kaa ik qatra
bujhii bujhii sii aa.nkh ko jyotii
bhuuk ko roTii
de sakte ho?
mujhe bataa.o:
dhuup ko saayaa de sakte ho?
dasht ko dariyaa de sakte ho?
tiin sau pai.nsaTh dino.n me.n mujh ko
ik din achchhaa de sakte ho

Kumar Pashi
Nazm

ishq-o-dosti

Gaur-o-fikr is ke sadaa hai.n ham-dast
milne-julne se hai paidaa hotii
garm-joshii kii hai mai se sarmast
dostii hai mirii dekhii bhaalii

Azeemuddin Ahmad
Nazm

ab KHub hansega diwana

(1)
garm-joshii
ab suuraj sar par aa dhamkegaa
ThanDaa lohaa chamkegaa
aur dhuup javaa.n ho jaa.egii
saThiyaa.e hu.e farzaano.n par
ab ziist giraa.n ho jaa.egii
har asl ayaa.n ho jaa.egii
ab KHuub ha.nsegaa diivaana

Hafeez Jalandhari
Nazm

diwali

dosto kyaa kyaa divaalii me.n nashaat-o-aish hai
sab muhayyaa hai jo is ha.ngaam ke shaayaan hai
is tarah hai.n kuucha-o-baazaar par naqsh-o-nigaar
ho ayaa.n husn-e-nigaarisataa.n kii jin se KHuub re
garm-joshii apnii baa-jaam-e-charaaGaa.n lutf se
kyaa hii raushan kar rahii hai har taraf roGan kii mai
maa.il-e-sair-e-charaaGaa.n naKHl har jaa dam-ba-dam
haasil-e-nazzaaraa husn-e-sham-e-ruuyaa.n pai-ba-pai
aashiqaa.n kahte hai.n maashuuqo.n se baa-ijz-o-niyaaz
hai agar manzuur kuchh lenaa to haazir hai.n ruupe
gar mukarrar arz karte hai.n to kahte hai.n vo shoKH
ham se lete ho miyaa.n takraar-o-hujjat taa-ba-kai
kahte hai.n ahl-e-qimaar aap me.n garm iKHtilaat
ham to Dab me.n sau rupe rakhte hai.n tum rakhte ho kai
jiit kaa pa.Dtaa hai jis kaa daano.n vo kahtaa hai yuu.n
suu-e-dast-e-raast hai mere ko.ii farKHanda-pai
hai dasahre me.n bhii yuu.n go farhat-o-ziinat 'naziir'
par diivaalii bhii ajab paakiiza-tar tyauhaar hai

Nazeer Akbarabadi
Nazm

din diwangat hue

shiish par suurya ko jo sambhaale rahe
nain me.n jyotii kaa diip baale rahe
aur jin ke dilo.n me.n ujaale rahe
ab vahii din kisii raat kii bhuumii par
ek girtii hu.ii shaam kii chhat hu.e
din diva.ngat hu.e

Kunwar Bechain
Nazm

mulaqat

baad ek muddat ke
ajnabii se chehro.n me.n
KHvaab KHvaab aa.nkho.n me.n
dard kii samaa.at me.n
be-dilii kii saa.at me.n
ek ajnabii suurat
aashnaa nazar aa.ii
KHvaab KHvaab aa.nkho.n me.n
raushnii sii lahraa.ii
dard kii samaa.at ne
dil kii kuchh KHabar paa.ii
us ne garm-joshii se haath bhii milaayaa thaa
baad ek muddat ke mai.n bhii muskuraayaa thaa
us ne mere shaane ko chuum hii liyaa aaKHir
mai.n bhii ek lamhe ko jhuum hii liyaa aaKHir
aa.o ik zaraa sii der lawn hii me.n Tahle.nge
jo bhii kahnaa sun.naa hai ho sakaa to kah le.nge
shaayad ek muddat kii bekalii bhii kal paa.e
aur hamaarii qismat se chaa.nd bhii nikal aa.e
ik udaas sannaaTaa aur shab zamistaa.n kii
be-suKHan kahii ham ne baat dard-e-pinhaa.n kii
chaa.nd ne bhii chupke se kuchh kahaa to thaa ham se
mere uljhe baalo.n se us kii zulf-e-barham se
vo thii chaa.nd thaa mai.n thaa
yuu.n to kitne chehre the
apnii zaat ke andar
ham sabhii akele the
sard sard ik chehra
zard zard ik chehra
gard gard ik chehra
dard-yaafta chehre hijr-yaafta chehre
jaise ruu-ba-ruu apne aa.iine se rakkhe the

Pirzada Qasim
Nazm

nannhi laDli

o naT-khaT nannhii laaDlii
tujhe dekhe teraa maamaa chandaa-maamaa
har raat ko chandaa aa.e
aur duudh malaa.ii laa.e
chaa.ndii kii thaalii me.n
sone kii pyaalii me.n
tujhe khilaa.e chandaa muskaa.e
o naT-khaT nannhii laaDlii
yuu.n teraa mukh.Daa damke
juu.n nabh par chandaa chamke
vo ambar kaa motii hai
tuu dhartii kii jyotii hai
terii jyotii jug-jug lahraa.e
o naT-khaT laaDlii

Sahir Ludhianvi
Nazm

pyar kya hai

pyaar insaan kii zaruurat hai
duur dil se kare kuduurat hai
pyaar ulfat vafaa muravvat hai
pyaar hamdardii-o-uKHuvvat hai
pyaar kii chaah har bashar ko hai
justujuu us kii har nazar ko hai
buu.Dhe bachche javaan yaa biimaar
har-nafas kii talab banaa hai pyaar
pyaar kuchh is qadar zaruurii hai
zindagii pyaar bin adhuurii hai
pyaar hai do dilo.n kaa mel nahii.n
buz-dilo.n ke ye bas kaa khel nahii.n
pyaar to aasmaa.n kii vus.at hai
pyaar saare jahaa.n kii rif.at hai
pyaar kii mehrbaaniyo.n ke tale
uu.nche uu.nche pahaa.D bhii hai.n kha.De
pyaar dariyaa.o.n kii ravaanii hai
pyaar ik an-kahii kahaanii hai
pyaar ik be-bahaa KHazaana hai
ye haqiiqat hai kab fasaana hai
pyaar chuu.Dii kii har khanak me.n hai
pyaar ghu.nghruu kii har jhanak me.n hai
pyaar naarii kii maa.ng kii bindii
pyaar urdu zabaa.n hai aur hindii
pyaar chanchal javaa.n hasii.n raate.n
pyaar ma.asuum-o-shoKH-tar baate.n
pyaar andhe kii aa.nkh kii jyotii
pyaar nirbal ke haath kaa motii

Haleema Sadiya Shagufta
Nazm

diwali

diivaalii ke diip jalaa.e.n aa jaa.o
raushan raushan giit sunaa.e.n aa jaa.o
goshe goshe me.n taz.iin-o-zebaa.ii
saaf kare.n har dil kii mailii a.ngnaa.ii
fitrat ne bhii mastii me.n lii a.ng.Daa.ii
KHushiyo.n kaa sa.ngiit sunaa.e.n aa jaa.o
diivaalii ke diip jalaa.e.n aa jaa.o
raushan raushan giit sunaa.e.n aa jaa.o
aashaa.o.n kii manzil par sab common ho
nafrat jaa.e pyaar kii jyotii raushan ho
prem nagar me.n chaahe daav pe jiivan ho
bhed-bhaav pe tiir chalaa.e.n aa jaa.o
diivaalii ke diip jalaa.e.n aa jaa.o
raushan raushan giit sunaa.e.n aa jaa.o
raushniyo.n ke jaal bhii kitne sundar hai.n
diipak maalaa.e.n ghar ghar kaa zevar hai.n
phul-jha.Diyo.n jaise chehro.n par tevar hai.n
har zulmat ko aaj miTaa.e.n aa jaa.o
diivaalii ke diip jalaa.e.n aa jaa.o
raushan raushan giit sunaa.e.n aa jaa.o
haar chuke har baazii ab raavan vaale
lakshmii kii puujaa karte hai.n dhan vaale
apnii duniyaa ham bechaare man vaale
aatish-baazii chamkaa.e.n aa jaa.o
diivaalii ke diip jalaa.e.n aa jaa.o
raushan raushan giit sunaa.e.n aa jaa.o
sab ke liye KHush-haalii kaa ye saal rahe
har insaa.n kii qismat me.n zar maal rahe
na ko.ii ab is dhartii par ka.ngaal rahe
har qismat par nuur banaa.e.n aa jaa.o
diivaalii ke diip jalaa.e.n aa jaa.o
raushan raushan giit sunaa.e.n aa jaa.o

Abrar Kiratpuri
Nazm

diwangi

yaa ko.ii martuub mausam
yaa ki shabnam me.n nahaa.ii
sii.Dhiyo.n se chaa.nd tak bhiigii hu.ii ik raat
shab-e-sehraa
mulaa.em garam-joshii se banii duniyaa
halaavat aur hiddat se banii duniyaa
siina-e-shaa.ir me.n ik maGruur parcham
ek la.Dkii
ek duniyaa

Ekram Khawar
Nazm

chaTTan

bachpan se maa.n kii dii hu.ii
siikh par chalii huu.n mai.n
aaj bhii chal rahii huu.n
aur aage bhii chalnaa chaahtii huu.n
par kabhii kabhii mahsuus hotaa hai
thakan kaa ek bojh apne dil aur dimaaG par
aksar zehn me.n uThte hai.n ka.ii savaal
kyaa haasil honaa hai mujhe is raah par
kab tak yuu.n hii chaltii rahuu.ngii
apne chaaro.n jaanib jab dekhtii huu.n
jhuuT kii uu.nchii imaarate.n
to KHayaal aataa hai
meraa sach to sahraa me.n u.Dtii
KHaak saa hai
meraa vajuud yak-ba-yak anaasir kaa Dher lagtaa hai
aur mai.n KHud se hii ghabraa jaatii huu.n saham jaatii huu.n
phir yaad aatii hai
maa.n kii bachpan me.n dii hu.ii siikh
saphal vahii hote hai.n jo sachche hote hai
ye KHayaal aate hii na.e josh me.n
apne thake bikhre TuuTe badan ko sameT kar
KHaak se chaTTaan kii shakl iKHtiyaar kartii huu.n
aur tayyaar kartii huu.n KHud ko ek baar phir
jhuuT kii imaarato.n se ja.ng karne ke liye

Jyoti Azad Khatri
Nazm

ye bose

tum mujhe maqruuz kar dete ho
apne boso.n se
miraa baal baal ba.ndh gayaa hai
is qarze me.n
roz bilaa-naaGaa
ye bose jaise apnii yaad-daasht
kho dete hai.n
jab aahista aahista mai.n
apnii u.ngliyaa.n phertii huu.n
un ke sabt kiye hu.e nishaano.n par
ye merii poro.n par
apnii ko.ii lams nahii.n chho.Dte
un kii garm-joshii aur tapish
mere chehre par sarsaraane ke bajaa.e
havaa.o.n kii tundii se jaa miltii hai
aur
un patto.n se
jin ko paalaa maar gayaa ho

Azra Abbas
Nazm

karb

roz jab sub.h ko
apne ghar se nikaltaa huu.n mai.n
raaste me.n ko.ii dost mil jaa.e
yaa jaan-pahchaan vaalaa
mai.n ba.Dii garm-joshii se us kii taraf
ba.Dh ke jaataa huu.n
aadaab kartaa huu.n
aur muskuraataa bhii huu.n
(jaise mai.n aaj ke din
aur ghar pe sab KHairiyat hai)
mujh ko har har qadam par
ka.ii tarah ke log milte hai.n
jo uu.nchii dukaano.n pe baiThe hu.e hai.n
ka.ii aise afraad
mai.n jaantaa huu.n vo kitne Gabii hai.n
magar kursiyo.n par DaTe hai.n
unhe.n log
jhuk jhuk ke tasliim karte hai.n
(vo log
jo un se behtar hai.n
tahziib-o-shaa.istagii me.n
daanish-o-aagahii me.n
magar is ko kyaa kiije
un kii qismat me.n
vo KHaas kursii nahii.n hai
ki jis par ko.ii masKHara baiTh jaa.e
to us ko ko.ii masKHara kah na paa.e

Khalilur Rahman Azmi
Nazm

kaTh-putli

mere KHvaabo.n kii pata.ng mujh se
kartii hai an-ginat savaal
aksar ruuThii rahtii hai mujh se
kabhii aa.nkho.n se kabhii nii.ndo.n se
chaahtii thii khulaa aasmaa.n
uu.nchii aur uu.nchii u.Daan
par paglii naadaa.n vo kyaa jaane
Dor to us kii hai aur kisii ke haath
KHud to vo sirf kaTh-putlii hai

Jyoti Azad Khatri
Nazm

ek kahani

kitnii garm-joshii thii kitnii girya-o-zaarii
kitnii sard-mehrii thii kitnii sargiraanii thii

Masud Husain Khan
Nazm

tawanai

Gizaa se tavaanaa.ii tan ko mile
hai.n lambe tavaanaa.ii ke silsile
tavaanaa.ii jiivan kii jyotii bhii hai
ye harkii o poshiida hotii bhii hai
tavaanaa.ii taaqat kaa zariya bane
ye har kaam kaa ik vasiila bane
mashiino.n kii bas ahmiyat aaj hai
ki barqii tavaanaa.ii kaa raaj hai
tavaanaa.ii jis ko kahe.n jauharii
bane is se hathiyaar sab itemi
haraarat hai suurat tavaanaa.ii kii
na ho baat kyuu.n-kar ye gahraa.ii kii
hai 'haafiz' tavaanaa.ii se zindagii
karo qadr har pal tavaanaa.ii kii

Hafiz Karnataki
Nazm

basant ki aamad

chho.D Gaflat aur mahv-e-garm-joshii tuu bhii ho
arsa-e-hastii me.n garm-e-taaza-koshii tuu bhii ho

Mela Ram Wafa
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now