Font by Mehr Nastaliq Web

aaj ik aur baras biit gayā us ke baĔhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "krishan chander"

Nazm MATCHES FOR "krishan chander"

Nazm

chahaton ka jahan hai urdu

chaahato.n kaa jahaan hai urdu
raahato.n kaa nishaan hai urdu
ishq kaa e'tibaar aur vaqaar
husn kii aan-baan hai urdu
dil-fazaa zau-kada sabaahat kaa
aur malaahat kii kaan hai urdu
nasr kaa hai KHiraam-e-KHush-ha.ngaam
shaa.irii kii u.Daan hai urdu
zinda hai apnaa zauq-o-shauq is se
aarzuu.o.n kii jaan hai urdu
lutf hastii kaa rang mastii kaa
KHushnumaa kaarvaan hai urdu
zikr-e-aaraa.ish-e-KHam-e-kaakul
kaif-e-hindostaan hai urdu
daftar-e-ittihaad-o-yak-jehtii
pyaar kii daastaan hai urdu
ektaa hai anektaa me.n bhii
dost-daarii kaa maan hai urdu
'Gaalib'-o-'miir' is ke shaidaa the
jin kii ruuh-e-ravaan hai urdu
'aatish' o 'momin' o 'naziir' o 'jigar'
jin kii ra.ngii.n zabaan hai urdu
is ke aashiq 'nasiim' aur chakbast
jin ke jazbo.n kii shaan shaan hai urdu
dost is ke 'suruur' aur 'sarshaar'
is liye shaadmaan hai urdu
dard-ma.nd is ke 'premchand' rahe
jin ke baa.is javaan hai urdu
is ke mushtaaq 'mullaa' aur 'firaaq'
jin ke dil kaa bayaan hai urdu
na.ara-zan 'josh' kaa KHarosh is me.n
josh kii tarjumaan hai urdu
'faiz' o 'iqbaal' o kirshn-chandar se
vus.at-e-be-karaan hai urdu
dhuum 'mahruum' kii hu.ii is me.n
aur 'munavaar' kii aan hai urdu
'raashid' o 'miiraa-jii' kii albelii
shoKH-adaa raazdaan hai urdu
fitnat-o-fan kii daulat-e-bedaar
'krishn-mohan' kii jaan hai urdu

Krishna Mohan
Nazm

nazr-e-ghaalib

vaa.e taqdiir mai.n gadhaa na hu.aa
ham-navaa krishn chandr kaa na hu.aa
master kii palak jhapakte hii
haazirii de ke mai.n ravaana hu.aa
vahii aayaa savaal parche me.n
ek din kaa bhii jo pa.Dhaa na hu.aa
khel bhii ham sake na jii bhar ke
khelne kaa bhii haq adaa na hu.aa
muddato.n apne master jii se
madrase me.n bhii saamnaa na hu.aa
mai.n vo daadaa huu.n sab ko maar ke bhii
aaj tak qaabil-e-sazaa na hu.aa
'kaif' maidaan-e-sher-go.ii me.n
ko.ii 'Gaalib' saa duusraa na hu.aa

Kaif Ahmed Siddiqui
Nazm

shri-krishn

hai.n jasodhaa ke liye ziinat-e-aaGosh kahii.n
gopiyo.n ke bhii tasavvur se hai.n ruu-posh kahii.n

Chandar Bhan Kaifi Dehelvi
Nazm

pyar hai wo

nannhii munnii duudh kii KHushbuu lu.nDhaatii guDhliyo.n chaltii mohabbat baa.nTtii
tutlaahaTo.n kaa qaafila-saalaar hai vo
ras se bhaarii ho.nT chandan sii mahaktii zulf amrit se bhare
ulTe kaToro.n lajlajii lazzat se bojhal Tahniyo.n kaa KHandaqo.n qoso.n
tikono.n kaa alam-bardaar hai vo
jhuktii kamro.n barf se baalo.n badan ke dukhte jo.Do.n jannatii pairo.n
kii KHaatir suurat-e-dastaar hai vo
sub.h-e-taKHliiq-o-tasavvur hai javaanii kii do-pahrii
visaal-e-ziist kaa tyauhaar hai vo
pyaar hai vo

Bimal Krishn Ashk
Nazm

shartiya laDka

kaise kaise vahm palte hai.n bashar ke zehn me.n bhii
chand jur.e sher kaa KHuu.n-nosh karnaa raat ko maithan se pahle
yaa kushaada chaa.ndnii me.n kaif-e-andoz-e-visaal-e-shauq honaa
vaj.h-e-aulaad-e-nariina
aur phir buqraat ne bhii ye kahaa thaa
mard apne daa.e.n KHusiye par jo rassii baa.ndh le milne se pahle
us kii aurat shartya la.Dkaa janegii
lekin is andaaz kii harza-saraa.ii
kab kisii ke kaam aa.ii
kaise kaise vahm palte hai.n bashar ke zehn me.n bhii

Krishna Mohan
Nazm

jab tarsil baTan tak pahunchi

kal, tiraa naama
jo miltaa thaa hame.n
us ke alfaaz tale
muddate.n, ma.aanii kii tashriiho.n me.n
lutf kaa sail-e-ravaa.n rahtaa thaa
raate.n bistar pe
nasha KHvaab kaa rakh detii thii.n
itr me.n Duubii hu.ii dhuup kii paimaa.ish par
chaa.ndnii nii.nd, ko lorii kii thapak detii thii
zehn me.n sub.h o masaa
ik ajab farhat-e-nau-rasta safar kartii thii
lekin ab... qurbate.n hai.n baham
samaa.at ko ..magar...
phone kii ghanTii ko sun.ne ko tarastii KHvaahish
munqata raabita paane ke liye koshaa.n hai
u.ngliyaa.n rahtii hai.n
ek ek button par raqsaa.n
yahii maamuul hai muddat se
magar, telephone
ek KHaamosh sadaa detaa hai
silsila lamho.n kaa
sadiyo.n saa banaa detaa hai

Hanif Tarin
Nazm

shikayat

KHudaayaa sab ko judaa tuu ne zindagii baKHshii
kalii ko loch diyaa phuul ko ha.nsii baKHshii
ja.De hazaaro.n guhar kahkashaa.n kii zulfo.n me.n
sahar ko nuur diyaa shab ko chaa.ndnii baKHshii
ru-pahlii sub.h ke lab ko ataa kiye naGme
sunahrii shaam ke ho.nTo.n ko baa.nsurii baKHshii
zamii.n pe Guncha-o-gul ko mahak inaayat kii
falak pe maah-o-surayyaa ko raushnii baKHshii
har ek zarra-e-sahraa ko dii jilaa tuu ne
har ek qatra-e-shabnam ko aarsii baKHshii
taraa.iyo.n me.n maveshii charaane vaalo.n ko
galaa suriilaa diyaa raag raagnii baKHshii
kisaan menD pe baiThe jo dhuup khaate hai.n
unhe.n zamiin kii daulat harii-bharii baKHshii
shabaab-o-husn kii saaGar-ba-kaf hasiina ko
labo.n kii naazukii zulfo.n kii barhamii baKHshii
javaaniyo.n kii hasii.n niim baaz aa.nkho.n ko
sharaab tho.Dii sii dii kuchh Gunuudgii baKHshii
jo mutriba ko ataa kii sadaa-e-daa.uudii
to rind-e-mast ko miinaa-e-ahmarii baKHshii
jo shaa.iro.n pe suKHan kii kitaab naazil kii
to vaa.izo.n ko zamii.n kii payambarii baKHshii
vo jin kaa jhuuT hai pesha fareb-e-maz.hab hai
tirii KHudaa.ii ne un ko tavangarii baKHshii
hazaaro.n murtashiyo.n ko tirii mashiyyat ne
tilaa.ii baKHt diyaa ziist nuqra.ii baKHshii
buland-o-surKH makaano.n me.n rahne vaalo.n ko
suruur-o-kaif inaayat kiyaa KHushii baKHshii
magar azal me.n KHataa kyaa 'salaam' ne kii thii
ki is Gariib kii qismat ko muflisii baKHshii

Salam Sandelvi
Nazm

chand

vo niile aasmaan par safed halqa
jise sab chaa.nd kahte hai.n
jise hind-o-paak ke bachche maamaa samajhte hai.n salaam karte hai.n
jise sho.araa
hasiin chehro.n se ta.abiir karte hai.n
vo niile aasmaan par safed halqa
chamaktaa hai jo ghaTtaa ba.Dhtaa bhii hai
KHalaa kii mu.nDero.n pe chaltaa bhii hai
KHayaal-e-mahbuub se
shab-e-tanhaa.ii ko jagmagaataa bhii hai aa.nsuu.o.n me.n jhilmilaataa bhii hai
vo niile aasmaan par safed halqa
ziyaa jis kii yaado.n kaa darpan dikhaatii rahii
javaa.n dil kii dha.Dkan jagaatii rahii
KHayaalo.n me.n
kisii ko bulaatii rahii jazbaat gudgudaatii rahii
vo niile aasmaan par safed halqa
talaash me.n jis kii ghire
buto.n kii tarah be-kahe be-sune
hayaat-o-maut se be-KHabar
hazaaro.n sciencedaa.n us pe jaane ko koshaa.n rahe
vo niile aasmaan par safed halqa
dikhaa.ii dene ke baavajuud bhii jo sab kaa
bas ik KHayaal thaa tasavvur thaa
achaanak ek din
usii insaa.n ke qadmo.n ke niiche aa gayaa
vo niile aasmaan par safed halqa
na jis par ko.ii zindagii hai
na husn-e-fitrat kii ridaa yaa o.Dhnii hai
jahaa.n sirf KHaamushii hai
vo niile aasmaan par safed halqa
haqiiqat jis kii sab samajh me.n aa ga.ii phir bhii
kisii shaa.ir ne kyo.n apne mahbuub kii us se misaal dii
nazar me.n us kii vo hasii.n bhii kyaa chaa.nd jaisaa hai jahaa.n kuchh bhii nahii.n
jahaa.n hai bas chand lamho.n kii chaa.ndnii

Javed Rasheed Amir
Nazm

miTTi ka git

miTTii kii ye sundar kaayaa miTTii kii hii saarii maayaa
kankar patthar sonaa chaa.ndii solah aane miTTii ke
miTTii ke sab chehre-mohre miTTii ke sab nange paa.nv
miTTii kii ye zulfe.n ghanerii sab ke shaane miTTii ke
miTTii kii nannhii sii kyaarii miTTii kii mahkii phulvaarii
miTTii ke ye phuul ye kaliyaa.n sab ke dahaane miTTii ke
miTTii ke sab khet hamaare miTTii kii pagDanDii bhii
miTTii ke hariyaale paude daane daane miTTii ke
miTTii ke sab panghaT apne miTTii kii sab sakhiyaa.n
miTTii ke chamkiile gagre kaun ye jaane miTTii ke
miTTii kii maa.n bahne.n apnii miTTii ke hai.n bachche-baale
jhuulaa jhuule.n sab miTTii kaa sab ke taraane miTTii ke
miTTii kii sii mohnii suurat miTTii kii ye apnii gu.Diyaa
miTTii ke sab dul.han duulhaa taane-baane miTTii ke
miTTii ke sab daadii daadaa miTTii ke sab naanii naanaa
miTTii ke sab aa.nkho.n vaale andhe kaane sab miTTii ke
miTTii ke sab mahal do-mahle miTTii kii chhoTii sii kuTiyaa
miTTii ke sab ye diye ye sham'e.n sab parvaane miTTii ke
miTTii kii sab galiyaa.n apnii miTTii ke sab gaa.nv hamaare
miTTii ke sab shahr base hai.n sab viiraane miTTii ke
miTTii ke sab saaqii-o-dilbar miTTii ke sab shiisha-o-saaGar
miTTii ke sab jaam-o-subuu hai.n sab paimaane miTTii ke
miTTii ke sab devtaa devii miTTii ke sab girjaa masjid
kyaa siitaa kyaa kaalii maataa sab afsaane miTTii ke
miTTii kii miiThii sii bansii miTTii kii chanchal raadhaa
miTTii se kirshan kanhaiyyaa sab ke gaane miTTii ke
miTTii kaa baazaar lagaa hai kore kore se bartan
kis kii suraahii kis kaa pyaala sab paimaane miTTii ke
miTTii ke chuulhe par naache so.ndhii roTii miTTii kii
jo kuchh chakkii chaak me.n piise daane daane miTTii ke
miTTii kii KHushbuu me.n basaa hai miTTii kaa ye zarra zarra
miTTii ko miTTii hii pukaare hiile-bahaane miTTii ke
jhan-jhan jhan-jhan jhan-jhan bajtii kau.Dii miTTii kii
khan-khan khan-khan giit sunaate aane aane miTTii ke
taak dhinnaa-dhin taak dhinnaa-dhin bolaa tabla miTTii kaa
naacho naacho naacho naacho sab raqsaane miTTii ke
dhamaa-dhamaa dhuu dhamaa-dhamaa dhuu dhamkaa miTTii kaa taa.nDav
us ke piichhe yaahuu yaahuu sab mastaane miTTii ke
dha.D-dha.D dha.D-dha.D dha.Dak rahii hai har har chhaatii miTTii kii
sarsar sarsar sarak rahe hai.n saare shaane miTTii ke
miTTii miTTii miTTii baaje baaje kuuch kaa naqqaaraa
ghar chal ghar chal ghar chal ghar chal o man-maane miTTii ke
miTTii miTTii miTTii miTTii miTTii lorii gaatii hai
so jaa so jaa so jaa so jaa o diivaane miTTii ke
miTTii kii chaadar me.n chhupe.nge qabr banegii miTTii kii

Khalilur Rahman Azmi
Nazm

yaad nagar

mai.n os ban ke baras jaa.uu.n tere sabze par
mai.n giit ban ke tirii vaadiyo.n me.n kho jaa.uu.n
bas ek baar bulaa le mujhe vatan mere
ki terii KHaak ke daaman me.n chhup ke so jaa.uu.n

Shafiq Fatima Shera
Nazm

basti ki laDkiyon ke nam

chal ai nasiim-e-sahraa ruuh-o-ravaan-e-sahraa
meraa payaam le jaa suu-e-butaan-e-sahraa
sahraa.ii mahvasho.n kii KHidmat me.n jaa ke kahnaa
bhuule nahii.n tumhe.n ham ai duKHtaraan-e-sahraa
gar bas chale to aa.e.n aur dard-e-dil sunaa.e.n
tum ko gale lagaa.e.n ham phir miyaan-e-sahraa
tum najd me.n pareshaa.n shahro.n me.n ham hai.n hairaa.n
allaah kii amaa.n ho tum par butaan-e-sahraa
tum is tarah Gamo.n se behaal ho rahii ho
ham is taraf hai.n muztar daaman-kushaan-e-sahraa
ham paas aa.e.n kyuu.n kar tum ko bulaa.e.n kyuu.n kar
ye dukh miTaa.e.n kyuu.n kar vaamaa.ndgaan-e-sahraa
betaab hai.n alam se be-KHvaab ranj-o-Gam se
kyaa puuchhtii ho ham se ai dil-baraan-e-sahraa
tum yaad kar rahii ho bedaad kar rahii ho
barbaad kar rahii ho ai gul-ruKHaan-e-sahraa
ye kyaa kahaa ki tum ho ra.ngiiniyo.n ke KHuugar
Gamgii.n hai.n tum se ba.Dh kar ai Gam-kushaan-e-sahraa
ye raat ye ghaTaa.e.n ye shor ye havaa.e.n
bichh.De hu.e mile.nge kyuu.nkar miyaan-e-sahraa
shahro.n kii zindagii se ham ta.ng aa chuke hai.n
sahraa me.n phir bulaa lo ai sakinaan-e-sahraa
yaad-e-sumuum ho yaa sarsar ke tund tuufaa.n
Darte nahii.n kisii se dil-daadgaan-e-sahraa
aabaadiyo.n me.n haasil aazaadiyaa.n nahii.n hai.n
aa jaa.o tum hii u.D kar o taa.iraan-e-sahraa
sahraa kii vus.ato.n me.n ham ko na bhuul jaanaa
o duKHtaraan-e-sahraa o aahuvaan-e-sahraa
ai abr chup na rahnaa meraa fasaana kahnaa
mil jaa.e gar kahii.n vo sarv-e-ravaan-e-sahraa
dashtii kii dhun me.n saaqii ik naGma-e-iiraaqii
haa.n phir sunaa ba-yaad-e-gul-chehargaan-e-sahraa
aa.nkho.n me.n bas rahaa hai naqsh-e-butaan-e-sahraa
o daastaa.n-saraa chhe.D ik daastaan-e-sahraa
mastaana jaa rahaa hai phir karvaan-e-sahraa
haa.n jhuum kar hudii-KHvaa.n ik daastaan-e-sahraa
dehaat kii fazaa.e.n aa.nkho.n me.n phir rahii hai.n
dil me.n samaa rahii hai yaad-e-butaan-e-sahraa
nazro.n pe chhaa rahaa hai vo chaa.ndnii kaa manzar
sahraa me.n kheltii thii.n jab huuryaan-e-sahraa
vo chaa.ndnii kaa mausam vo be-KHudii kaa aalam
vo nuur kaa samundar reg-e-ravaan-e-sahraa
jalve mah-e-javaa.n ke vo ra.ng-e-kaarvaa.n ke
vo naGme saarbaa.n ke raqsaa.n miyaan-e-sahraa
kyuu.nkar na yaad aa.e.n vo siim-guu.n fazaa.e.n
vo aasmaan-e-sahraa maah-e-ravaan-e-sahraa
vo kam-sino.n ke gaane vo khel vo taraane
be-fikrii ke fasaane vird-e-zabaan-e-sahraa
kheto.n me.n ghuumte the har gul ko chuumte the
mastii me.n jhuumte the jab mai-kashaan-e-sahraa
vo gaa.nv vo fazaa.e.n vo fasl vo havaa.e.n
vo khet vo ghaTaa.e.n vo aasmaan-e-sahraa
phir yaad aa rahii hai.n phir dil dukhaa rahii hai.n
majnuu.n banaa rahii hai.n lailaa-vashaan-e-sahraa
raato.n ko chhup ke aanaa aur shaane ko hilaanaa
hai yaad vo jagaanaa ham ko miyaan-e-sahraa
vo un kii shoKH aa.nkhe.n vo un kii saada nazre.n
be-KHud banaa rahii hai.n doshiizgaan-e-sahraa
vo ishq-pesha huu.n mai.n jis ke javaan naGme
gaataa hai chaa.ndnii me.n har naujavaan-e-sahraa
ik badviyat kaa aashiq sahraa.iyat se be-KHud
'aKHtar' bhii apnii dhun me.n hai ik javaan-e-sahraa

Akhtar Shirani
Nazm

parchhaiyan

1
ye shaam ik aa.iina-e-niil-guu.n ye nam ye mahak
ye manzaro.n kii jhalak khet baaG dariyaa gaa.nv
vo kuchh sulagte hu.e kuchh sulagne vaale alaav
siyaahiyo.n kaa dabe-paa.nv aasmaa.n se nuzuul
laTo.n ko khol de jis tarah shaam kii devii
puraane vaqt ke bargad kii ye udaas jaTaa.e.n
qariib o duur ye go dhuul kii ubhartii ghaTaa.e.n
ye kaa.enaat kaa Thahraa.o ye athaah sukuut
ye niim-tiirah fazaa roz-e-garm kaa taabuut
dhu.aa.n dhu.aa.n sii zamii.n hai ghulaa ghulaa saa falak
2
ye chaa.ndnii ye havaa.e.n ye shaaKH-e-gul kii lachak
ye daur-e-baada ye saaz-e-KHamosh fitrat ke
sunaa.ii dene lagii jagmagaate siino.n me.n
dilo.n ke naazuk o shaffaaf aabgiino.n me.n
tire KHayaal kii pa.Dtii hu.ii kiran kii khanak
3
ye raat chhantii havaa.o.n kii so.ndhii so.ndhii mahak
ye khet kartii hu.ii chaa.ndnii kii narm damak
sugandh raat kii raanii kii jab machaltii hai
fazaa me.n ruuh-e-tarab karvaTe.n badaltii hai
ye ruup sar se qadam tak hasiin jaise gunaah
ye aarizo.n kii damak ye fusuun-e-chashm-e-siyaah
ye dhaj na de jo ajantaa kii san.ato.n ko panaah
ye siina pa.D hii ga.ii dev lok kii bhii nigaah
ye sar-zamiin se aakaash kii parastish-gaah
utaarte hai.n tirii aartii sitaara o maah
sajal badan kii bayaa.n kis tarah ho kaifiyyat
sarasvatii ke bajaate hu.e sitaar kii gat
jamaal-e-yaar tire gulsitaa.n kii rah rah ke
jabiin-e-naaz tirii kahkashaa.n kii rah rah ke
dilo.n me.n aa.iina-dar-aa.iina suhaanii jhalak
4
ye chhab ye ruup ye joban ye saj ye dhaj ye lahak
chamakte taaro.n kii kirno.n kii narm narm phuvaar
ye rasmasaate badan kaa uThaan aur ye ubhaar
fazaa ke aa.iina me.n jaise lahlahaa.e bahaar
ye be-qaraar ye be-iKHtiyaar josh-e-numuud
ki jaise nuur kaa favvaara ho shafaq-aaluud
ye jalve paikar-e-shab-taab ke ye bazm-e-shohuud
ye mastiyaa.n ki mai-e-saaf-o-durd sab be-buud
KHajil ho laal-e-yaman uzv uzv kii vo Dalak
5
bas ik sitaara-e-shi.ngaraf kii jabii.n pe jhamak
vo chaal jis se labaalab gulaabiyaa.n chhalke.n
sakuu.n-numaa KHam-e-abru ye adh-khulii.n palke.n
har ik nigaah se aiman kii bijliyaa.n lapke.n
ye aa.nkh jis me.n ka.ii aasmaa.n dikhaa.ii pa.De.n
u.Daa de.n hosh vo kaano.n kii saada saada lave.n
ghaTaa.e.n vajd me.n aa.e.n ye gesu.o.n kii laTak
6
ye kaif-o-ra.ng-e-nazaara ye bijliyo.n kii lapak
ki jaise krishn se raadhaa kii aa.nkh ishaare kare
vo shoKH ishaare ki rabbaaniyat bhii jaa.e jhapak
jamaal sar se qadam tak tamaam sho.ala hai
sukuun jumbish o ram tak tamaam sho.ala hai
magar vo sho.ala ki aa.nkho.n me.n Daal de ThanDak
7
ye raat nii.nd me.n Duube hu.e se hai.n diipak
fazaa me.n bujh ga.e u.D u.D ke jugnu.o.n ke sharaar
kuchh aur taaro.n kii aa.nkho.n kaa ba.Dh chalaa hai KHumaar
fasurda chhiTkii hu.ii chaa.ndnii kaa dhundlaa Gubaar
ye bhiigii bhiigii uudaahaT ye bhiigaa bhiigaa nuur
ki jaise chashma-e-zulmaat me.n jale kaafuur
ye Dhaltii raat sitaaro.n ke qalb kaa ye gudaaz
KHunuk fazaa me.n tiraa shabnamii tabassum-e-naaz
jhalak jamaal kii ta.abiir KHvaab aa.iina-saaz
jahaa.n se jism ko dekhe.n tamaam naaz-o-niyaaz
jahaa.n nigaah Thahar jaa.e raaz-andar-raaz
sukuut-e-niim-shabii lahlahe badan kaa nikhaar
ki jaise nii.nd kii vaadii me.n jaagtaa sansaar
hai bazm-e-maah ki parchhaa.iyo.n kii bastii hai
fazaa kii oT se vo KHaamushii barastii hai
ki buu.nd buu.nd se paidaa ho gosh o dil me.n khanak
8
kisii KHayaal me.n hai Garq chaa.ndnii kii chamak
havaa.e.n nii.nd ke kheto.n se jaise aatii ho.n
hayaat o maut me.n sargoshiyaa.n sii hotii hai.n
karo.Do.n saal ke jaage sitaare nam-diida
siyaah gesu.o.n ke saa.np niim-KHvaabiida
ye pichhlii raat ye rag rag me.n narm narm kasak

Firaq Gorakhpuri
Nazm

makashafa

suno agar tum KHatm karnaa hii chaahte ho
to aadmii ko aadmii se karne vaale aadmii ko KHatm kar do
us se vo sab kuchh chhiin lo
jo tumhaare paas bahut pahle bhii nahii.n thaa
aur baa'd me.n bhii nahii.n hai
jab aag aur barf kii taasiir ek hii hai
to dono.n kii alag alag shakl
tumhe.n kyaa de saktii hai
yaa tum is se kyaa le sakte ho
sivaa.e is ke ki tum aag ko KHatm kar do
aur barf ko bhii KHatm kar do
magar jo aag aur barf tumhaarii ruuh me.n kahii.n rakhii hu.ii thii
yaa to tum ne kabhii lams nahii.n kiyaa
yaa jo aadmii ruuh me.n rakhaa hu.aa thaa
use to tum ne kabhii nahii.n chhu.aa
phir maaluum nahii.n us kaa kaun saa jism
tumhaare haath lagaa
ki tum ne us ke Tuk.De Tuk.De kar ke
use rishto.n me.n taqsiim kar diyaa
maa.n baap beTaa beTii bhaa.ii bahan
aur un par hukuumat karne vaale
badtariin mahkuum bhii tum hii nikle
ya.anii kisii maa.n baap ne
apne beTe aur beTii kii aag ko janm de ke
kabhii is par gha.Dii-bhar sar rakh ke sonaa chaahaa
to use sone nahii.n diyaa gayaa
phir jab bhaa.ii bahan alag alag
apnii aag aur barf kii tijaarat ko nikle
to is me.n aadmii hii shaamil nahii.n thaa
yaa shaayad aadmii kaa hii naam KHasaara rakhaa gayaa
phir bhii jab tumhaaraa bisaat bhar honaa hii
tumhaaraa muqaddar Thahraa
to yaad karo ki vo tum hii the yaa tum nahii.n the
yaa jise KHudaa ke aaKHirii javaab me.n
aavaaz dii ga.ii pukaaraa gayaa
is se ba.Dh ke bhii ko.ii dukh kyaa ho saktaa hai ki
bichh.Dii hu.ii zindagii ke bichh.De hu.e pe.D yaad na rahe.n
phir bhii zaraa mu.D ke dekho to sahii
ki kahii.n suuraj savaa-neze pe to nahii.n aa chukaa
kaa.enaat kahaa.n hai
zamiin to kaa.enaat se KHaalii hai
binaa kaa.enaat ke bhii ko.ii zamiin zamiin ho saktii hai
binaa suuraj ke bhii ko.ii dhuup dhuup ho saktii hai
binaa chaa.nd ke bhii ko.ii chaa.ndnii chaa.ndnii ho saktii hai
ya.anii ko.ii din din nahii.n
ya.anii ko.ii raat raat nahii.n
ya.anii ko.ii aab-o-havaa aab-o-havaa nahii.n
ya.anii ko.ii mausam mausam nahii.n
ya.anii zamiin par zamiin hii nahii.n aur bahut kuchh hai
agar darvaaza ko kholne aur band karne vaalaa hii na ho to
ko.ii khulaa darvaaza band darvaaza se bhii ziyaada band hotaa hai
ko.ii shahr chaaro.n taraf se khulaa ho aur band bhii ho
to samajh lo ki is me.n rahne vaale rahte hu.e bhii nahii.n rahte
is me.n ko.ii maKHluuq rahtii hai
zamiin ke kisii mulk me.n bhii taariiKH kii viiraanii ke sivaa
ko.ii aabaad nahii.n
jab aadmii ke mu.nh aa.nkh naak aur kaan ke hote hu.e bhii
aadmii kii shakl nahii.n bantii
to ko.ii aavaaz aavaaz hote hu.e bhii aavaaz kaise ho saktii hai
to bolte hu.e bhii kaise bol saktaa hai
to ko.ii dekhte hu.e bhii kaise dekh saktaa hai
to ko.ii suu.nghte hu.e bhii kaise suu.ngh saktaa hai
to ko.ii sunte hu.e bhii kaise sun saktaa hai
suno ummiid to maut ke haath me.n ek kaam hai
jise vo tumhaarii gardan me.n shikanja kar ke aage hii aage chaltii chalii jaatii hai
aur tum ke us piichhe kashaa.n kashaa.n khi.nche chale jaate ho
magar vo duniyaa to ab kahii.n nahii.n rahii
vo to tumhaarii zamiin me.n yaa tum me.n kahii.n gum ho ga.ii

Ahmad Hamesh
Nazm

mere pyare watan

mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan
gul-posh terii vaadiyaa.n
farhat-nishaa.n raahat-rasaa.n
tere chaman-zaaro.n pe hai
gulzaar-e-jannat kaa gumaa.n
har shaaKH phuulo.n kii chha.Dii
har naKHl-e-tuubaa hai yahaa.n
kausar ke chashme jaa-ba-jaa
tasniim har aab-e-ravaa.n
har barg ruuh-e-taazgii
har phuul jaan-e-gulsitaa.n
har baaG baaG-e-dil-kashii
har baaG baaG-e-be-KHizaa.n
dilkash charaagaahe.n tirii
Dhoro.n ke jin me.n kaarvaa.n
anjum-sifat gulhaa-e-nau
har taKHta-e-gul aasmaa.n
naqsh-e-surayyaa jaa-ba-jaa
har har ravish ik kahkashaa.n
terii bahaare.n daa.imii
terii bahaare.n jaavedaa.n
tujh me.n hai ruuh-e-zindagii
paiham ravaa.n paiham davaa.n
dariyaa vo tere tund-KHuu
jhiile.n vo terii be-karaa.n
shaam-e-avadh ke lab pe hai
husn-e-azal kii daastaa.n
kahtii hai raaz-e-sarmadii
sub.h-e-banaras kii zabaa.n
u.Dtaa hai haft-aflaak par
un kaar-KHaano.n kaa dhu.aa.n
jin me.n hai.n laakho.n mehnatii
san.at-garii ke paasbaa.n
terii banaras kii zarii
rashk-e-hariir-o-parniyaa.n
biidar kii fankaarii me.n hai.n
san.at kii sab baariikiyaa.n
azmat tire iqbaal kii
tere pahaa.Do.n se ayaa.n
dariyaa.o.n kaa paanii, tarii
taqdiis kaa andaaza-daa.n
kyaa 'bhaarte.ndu' ne kiyaa
ga.ngaa kii lahro.n kaa bayaa.n
'iqbaal' aur chakbast hai.n
azmat ke terii naGma-KHvaa.n
'josh' o 'firaaq' o 'pant' hai.n
tere adab ke tarjumaa.n
'tulsii' o 'KHusrav' hai.n terii
taariif me.n ratb-ul-lisaa.n
gaate hai.n naGma mil ke sab
uu.nchaa rahe teraa nishaa.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tere nazaaro.n ke nagii.n
duniyaa kii KHaatam me.n nahii.n
saare jahaa.n me.n muntaKHab
kashmiir kii arz-e-hasii.n
fitrat kaa ra.ngii.n mo.ajaza
firdaus bar-ruu-e-zamii.n
firdaus bar-ruu-e-zamii.n
haa.n haa.n hamii.n ast o hamii.n
sarsabz jis ke dasht hai.n
jis ke jabal hai.n surmagii.n
meve ba-kasrat hai.n jahaa.n
shiirii.n misaal-e-a.ngbii.n
har za.afaraa.n ke phuul me.n
aks-e-jamaal-e-huura.ii.n
vo maalve kii chaa.ndnii
gum jis me.n ho.n duniyaa-o-dii.n
is KHitta-e-naira.ng me.n
har ik fazaa husn-aafrii.n
har shai me.n husn-e-zindagii
dilkash makaa.n dilkash zamii.n
har mard mard-e-KHuub-ruu
har ek aurat naaznii.n
vo taaj kii KHush-paikarii
har zaaviye se dil-nashii.n
san.at-garo.n ke daur kii
ik yaadgaar-e-marmarii.n
hotii hai jo har shaam ko
faiz-e-shafaq se ahmarii.n
dariyaa kii maujo.n se alag
yaa ik bat-e-nazzaara-bii.n
yaa taa.er-e-nuurii ko.ii
parvaaz karne ke qarii.n
yaa ahl-e-duniyaa se alag
ik aabid-e-uzlat-guzii.n
naqsh-e-ajantaa kii qasam
jachtaa nahii.n arzha.ng-e-chiiŪ”n
shaan-e-ellora dekh kar
jhuktii hai aazar kii jabii.n
chittau.D ho yaa aagara
aise nahii.n qil.e kahii.n
but-gar ho yaa naqqaash ho
tuu sab kii azmat kaa amii.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
dilkash tire dasht o chaman
ra.ngii.n tire shahr o chaman
tere javaa.n raa.anaa javaa.n
tere hasii.n gul pairahan
ik anjuman duniyaa hai ye
tuu is me.n sadr-e-anjuman
tere muGannii KHush-navaa
shaa.er tire shiirii.n-suKHan
har zarra ik maah-e-mubii.n
har KHaar rashk-e-nastarii.n
Guncha tire sahraa kaa hai
ik naafa-e-mushk-e-KHutan
ka.nkar hai.n tere be-bahaa
patthar tire laal-e-yaman
bastii se jangal KHuub-tar
baaGo.n se husn afroz ban
vo mor vo kabk-e-darii
vo chauk.Dii bharte hiran
ra.ngii.n-adaa vo titliyaa.n
baa.nbnii me.n vo naago.n ke phan
vo sher jin ke naam se
larze me.n aa.e ahrman
kheto.n kii barkat se ayaa.n
faizaan-e-rabb-e-zul-minan
chashmo.n ke shiirii.n aab se
lazzat-kashaa.n kaam-o-dahan
taabinda teraa ahd-e-nau
raushan tiraa ahd-e-kuhan
kitno.n ne tujh par kar diyaa
qurbaan apnaa maal dhan
kitne shahiido.n ko mile
tere liye daar-o-rasan
kitno.n ko teraa ishq thaa
kitno.n ko thii terii lagan
tere jafaa-kash mehnatii
rakhte hai.n azm-e-kohkan
tere sipaahii suurmaa
be-misl yaktaa-e-zaman
'bhisham' saa jin me.n hausla
'arjun' saa jin me.n baa.nkpan
aalim jo faKHr-e-ilm hai.n
fankaar naazaa.n jin pe fan
'raa.e' o 'bos' o 'shergil'
'dinkar,' 'jigar' 'maithli-sharan'
'vallathol' 'maahir', bhaartii
'bachchan', 'mahaadevii' 'suman'
'krishnan', 'niraalaa', 'prem-chand'
'tagore' o 'aazaad' o 'raman'
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
khetii tirii har ik harii
dilkash tirii KHush-manzarii
terii bisaat-e-KHaak ke
zarre hai.n mahr-o-mushtarii
jhelum kaveri naag vo
ga.ngaa kii vo ga.ngotarii
vo narbadaa kii tamkanat
vo shaukat-e-godaavarii
paakiizgii sarjuu kii vo
jamunaa kii vo KHush-gauharii
dullarba aab-e-niil-guu.n
kashmiir kii niilam-parii
dilkash papiihe kii sadaa
koyal kii taane.n mad-bharii
tiitar kaa vo haq sirrahu
tuutii kaa vo vird-e-harii
suufii tire har daur me.n
karte rahe paiGambarii
'chishtii' o 'nanak' se milii
faqr-o-Ginaa ko bartarii
adl-e-jahaa.ngiirii me.n thii
muzmar re.aayaa-parvarii
vo nau-ratan jin se hu.ii
tahziib-e-daur-e-akbarii
rakhte the afGaan-o-muGal
ik saulat-e-askandarii
raanaa.on ke iqbaal kii
hotii hai kis se ham-sarii
saava.nt vo yodhdhaa tire
tere jiyaale vo jarii
niiatii vidur kii aaj tak
kartii hai terii rahbarii
ab tak hai mash.huur-e-zamaa.n
'chanakya' kii daanish-varii
vayaas aur vishvamitr se
muniyo.n kii shaan-e-qaisarii
paatanjalii o saa.nkh se
rishiyo.n kii hikmat-parvarii
baKHshe tujhe in.aam-e-nau
har daur charKH-e-chambarii
KHush-gauharii de aab ko
aur KHaak ko KHush-jauharii
zarro.n ko mahr-afshaaniyaa.n
qatro.n ko dariyaa-gustarii
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tuu rahbar-e-nau-e-bashar
tuu amn kaa paiGaam-bar
paale hai.n tuu ne god me.n
saahib-KHirad saahib-e-nazar
afzal-tarii.n in sab me.n hai
baapuu kaa naam-e-mo'tabar
har lafz jis kaa dil-nashii.n
har baat jis kii pur-asar
jis ne lagaayaa dahr me.n
na.ara ye be-KHauf-o-KHatar
be-kaar hai.n tiir-o-sinaa.n
be-suud hai.n teG-o-tabar
hinsaa kaa rasta jhuuT hai
haq hai ahinsaa kii Dagar
darmaa.n hai ye har dard kaa
ye har maraz kaa chaara-gar
ja.ngaah-e-aalam me.n ko.ii
is se nahii.n behtar sipar
kartaa huu.n mai.n tere liye
ab ye du.aa-e-muKHtasar
raunaq pe ho.n tere chaman
sarsabz ho.n tere shajar
naKHl-e-umiid-e-behtarii
har fasl me.n ho baarvar
koshish ho duniyaa me.n ko.ii
KHitta na ho zer-o-zabar
teraa har ik baasii rahe
neko-sifat neko-siyar
har zan saliiqa-ma.nd ho
har mard ho saahib-hunar
jab tak hai.n ye arz o falak
jab tak hai.n ye shams o qamar
mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan

Arsh Malsiyani
Nazm

badnam ho raha hun

faryaadii-e-jafaa-e-ayyaam ho rahaa huu.n
paamaal-e-jaur-e-baKHt-e-naakaam ho rahaa huu.n
sargashta-e-KHayaal-e-anjaam ho rahaa huu.n
bastii kii la.Dkiyo.n me.n badnaam ho rahaa huu.n
bad-naam ho rahaa huu.n
salmaa se dil lagaa kar
bastii kii la.Dkiyo.n me.n badnaam ho rahaa huu.n
salmaa se dil lagaa kar salmaa se dil lagaa kar
us huur-vash ke Gam me.n duniyaa-o-dii.n ga.nvaa kar
hosh-o-havaas kho kar sabr-o-sukuu.n luTaa kar
baiThe biThaa.e dil me.n Gam kii KHalish basaa kar
har chiiz ko bhulaa kar
salmaa se dil lagaa kar
bastii kii la.Dkiyo.n me.n badnaam ho rahaa huu.n
kahtii hai.n sab ye kis kii ta.Dpaa ga.ii hai suurat
salmaa kii shaayad is ke man bhaa ga.ii hai suurat
aur us ke Gam me.n itnii murjhaa ga.ii hai suurat
murjhaa ga.ii hai suurat kumhlaa ga.ii hai suurat
sa.nvlaa ga.ii hai suurat
salmaa se dil lagaa kar
bastii kii la.Dkiyo.n me.n badnaam ho rahaa huu.n
panghaT pe jab ki saarii hotii hai.n jam.a aa kar
gaagar ko apnii rakh kar, ghu.nghaT uThaa uThaa kar
ye qissa chhe.Dtii hai.n mujh ko bataa bataa kar
salmaa se baate.n karte dekhaa hai is ko jaa kar
ham ne nazar bachaa kar
salmaa se dil lagaa kar
bastii kii la.Dkiyo.n me.n badnaam ho rahaa huu.n
raato.n ko giit gaane jab mil kar aatii hai.n sab
taalaab ke kinaare dhuume.n machaatii hai.n sab
ja.ngal kii chaa.ndnii me.n ma.ngal manaatii hai.n sab
to mere aur salmaa ke giit gaatii hai.n sab
aur ha.nstii jaatii hai.n sab
salmaa se dil lagaa kar
bastii kii la.Dkiyo.n me.n badnaam ho rahaa huu.n
kheto.n se lauTtii hai.n jab din chhupe makaa.n ko
tab raaste me.n baaham vo merii daastaa.n ko
dohraa ke chhe.Dtii hai.n salmaa ko merii jaa.n ko
aur vo hayaa kii maarii sii letii hai zabaa.n ko
ki chhe.De is bayaa.n ko
salmaa se dil lagaa kar
bastii kii la.Dkiyo.n me.n badnaam ho rahaa huu.n
kahtii hai rahm khaa kar yuu.n ek maah-e-tal.at
ye shahrii naujavaa.n thaa kis darja KHuub-suurat
aa.nkho.n me.n bas rahii hai ab bhii vo pahlii ra.ngat
do din me.n aah kyaa hai kyaa ho ga.ii hai haalat
allaah terii qudarat
salmaa se dil lagaa kar
bastii kii la.Dkiyo.n me.n badnaam ho rahaa huu.n
us sham.a-ruu kaa jab se parvaana ban gayaa huu.n
bastii kii la.Dkiyo.n me.n afsaana bin gayaa huu.n
har maah-vash ke lab kaa paimaana ban gayaa huu.n
diivaana ho rahaa huu.n diivaana ban gayaa huu.n
diivaana ban gayaa huu.n
salmaa se dil lagaa kar
bastii kii la.Dkiyo.n me.n badnaam ho rahaa huu.n
un kii zabaa.n pe merii jitnii kahaaniyaa.n hai.n
kyaa jaane.n ye ki dil kii sab mehrbaaniyaa.n hai.n
kam-sin hai.n be-KHabar hai.n uThtii javaaniyaa.n hai.n
kyaa samjhe.n Gam ke haatho.n kyuu.n sar-giraaniyaa.n hai.n
kyuu.n KHuu.n-fishaaniyaa.n hai.n
salmaa se dil lagaa kar
bastii kii la.Dkiyo.n me.n badnaam ho rahaa huu.n
har ik ke rahm kaa yuu.n iz.haar ho rahaa hai
bechaare ko ye kaisaa aazaar ho rahaa hai
dekhe to ko.ii jaane biimaar ho rahaa hai
kis darja zindagii se bezaar ho rahaa hai
naa-chaar ho rahaa hai
salmaa se dil lagaa kar
bastii kii la.Dkiyo.n me.n badnaam ho rahaa huu.n
ik puuchhtii hai aa kar tum be-qaraar kyuu.n ho
kuchh to hame.n bataa.o yuu.n dil-figaar kyuu.n ho
kyaa rog hai kaho to tum ashk-baar kyuu.n ho
diivaane kyuu.n hu.e ho diivaana vaar kyuu.n ho
baa-haal-e-zaar kyuu.n ho
salmaa se dil lagaa kar
bastii kii la.Dkiyo.n me.n badnaam ho rahaa huu.n
jaa.uu.n shikaar ko gar baa-hamrahaan-e-sahraa
kheto.n se ghuurtii hai.n yuu.n duKHtaraan-e-sahraa
bijlii kii raushnii ko jaise miyaan-e-sahraa
taariik shab me.n dekhe.n kuchh aahuvaan-e-sahraa
hairat kushaan-e-sahraa
salmaa se dil lagaa kar
bastii kii la.Dkiyo.n me.n badnaam ho rahaa huu.n
ik shoKH chhe.Dtii hai is tarah paas aa kar
dekho vo jaa rahii hai salmaa nazar bachaa kar
sharmaa ke muskuraa kar aa.nchal se mu.nh chhupaa kar
jaa.o naa piichhe piichhe do baate.n kar lo jaa kar
kheto.n me.n chhup chhupaa kar
salmaa se dil lagaa kar
bastii kii la.Dkiyo.n me.n badnaam ho rahaa huu.n
goyaa hame.n hasad se kuchh naazniin nigaahe.n
salmaa kii bhaa ga.ii hai.n kyuu.n dil-nashii.n nigaahe.n
un se zyaada dilkash hai.n ye hasii.n nigaahe.n
al-qissa ek dil hai sau KHashmagii.n nigaahe.n
shauq aafrii.n nigaahe.n
salmaa se dil lagaa kar
bastii kii la.Dkiyo.n me.n badnaam ho rahaa huu.n
ik shoKH taaza daarad sasuraal se ghar aa kar
sakhiyo.n se puuchhtii hai jis dam mujhe bataa kar
ye kaun hai to zaalim kahtii hai.n muskuraa kar
tum is kaa haal puuchho salmaa ke dil se jaa kar
ye giit use sunaa kar
salmaa se dil lagaa kar
bastii kii la.Dkiyo.n me.n badnaam ho rahaa huu.n

Akhtar Shirani
Nazm

kisan

jhuTpuTe kaa narm-rau dariyaa shafaq kaa iztiraab
khetiyaa.n maidaan KHaamoshii Guruub-e-aaftaab

Josh Malihabadi
Nazm

mere KHwab

kuchh kisaan kanyaa.e.n
sabz o surKH shiisho.n kii
chuu.Diyaa.n kalaa.ii me.n
aur galaT kii chaa.ndii kii
ha.nsuliyo.n se gardan me.n
niim chaa.nd ke halqe
choliyo.n pe lahngo.n par
zard zard miTTii ke
zard bel-buuTe se
maile maile aa.nchal par
baaliyo.n ke bose hai.n
un ke haath me.n ha.nsie
giit gaane lagte hai.n
jhuum jhuum kar paude
apnaa sar jhukaate hai.n
nau-javaan laThyaare
khet kii mu.nDero.n par
prem giit gaate hai.n
ai mire hasii.n-KHvaabo
tum inhe.n bahaaro.n kii
ko.npalo.n se phuuTe ho
ek kaar-KHaane me.n
chand nau-javaano.n ne
anjuman banaa.ii hai
aur is me.n lenin kii
ik kitaab pa.Dhte hai.n
sun rahii hai.n diivaare.n
ha.ns rahii hai taariikii
nau-javaan baiThe hai.n
aur kitaab pa.Dhte hai.n
ek ek jumle par
chau.nk chau.nk pa.Dte hai.n
ek ek fiqre par
apnaa sar hilaate hai.n
gaah aah bharte hai.n
gaah muskuraate hai.n
mai.n ne un ke siino.n me.n
ai mire hasii.n-KHvaabo
tum ko naachte dekhaa
mai.n ne tum ko dekhaa hai
jab siyaah mehraabe.n
aasmaa.n pe bantii hai.n
jab sukuut kii pariyaa.n
kahkashaa.n pe chaltii hai.n
gesu.o.n kii nik.hat se
jab havaa mahaktii hai.n
jab fazaa chahaktii hai
mere garm ho.nTo.n par
pyaar thartharaate hai.n
aur merii mahbuuba
apne ra.ng-e-aariz se
bijliyaa.n banaatii hai
aur merii nazro.n me.n
ik jahaan miTtaa hai
ik jahaan bantaa hai
ik zamiin haTtii hai
ik zamiin aatii hai

Ali Sardar Jafri
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now