Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "kun"

Nazm MATCHES FOR "kun"

Nazm

tulu-e-islam

daliil-e-sub.h-e-raushan hai sitaaro.n kii tunuk-taabii
ufuq se aaftaab ubhraa gayaa daur-e-giraa.n-KHvaabii
uruuq-murda-e-mashriq me.n KHuun-e-zindagii dau.Daa
samajh sakte nahii.n is raaz ko siinaa o faaraabii
musalmaa.n ko musalmaa.n kar diyaa tuufaan-e-maGrib ne
talaatum-haa-e-dariyaa hii se hai gauhar kii sairaabii
ataa momin ko phir dargaah-e-haq se hone vaalaa hai
shikoh-e-turkamaanii zehn hindii nutq aaraabii
asar kuchh KHvaab kaa Guncho.n me.n baaqii hai tuu ai bulbul
navaa-raa talKH-tarmii zan chuu zauq-e-naGma kam-yaabii
ta.Dap sehn-e-chaman me.n aashiyaa.n me.n shaaKH-saaro.n me.n
judaa paare se ho saktii nahii.n taqdiir-e-siimaabii
vo chashm-e-paak hai.n kyuu.n ziinat-e-bar-gustavaa.n dekhe
nazar aatii hai jis ko mard-e-Gaazii kii jigar-taabii
zamiir-e-laala me.n raushan charaaG-e-aarzuu kar de
chaman ke zarre zarre ko shahiid-e-justujuu kar de
sarishk-e-chashm-e-muslim me.n hai naisaa.n kaa asar paidaa
KHaliilullaah ke dariyaa me.n ho.nge phir guhar paidaa
kitaab-e-millat-e-baizaa kii phir shiiraaza-bandii hai
ye shaaKH-e-haashmii karne ko hai phir barg-o-bar paidaa
rabuud aa.n turk shiiraazii dil-e-tabrez-o-kaabul raa
sabaa kartii hai buu-e-gul se apnaa ham-safar paidaa
agar usmaaniyo.n par koh-e-Gam TuuTaa to kyaa Gam hai
ki KHuun-e-sad-hazaar-anjum se hotii hai sahar paidaa
jahaa.nbaanii se hai dushvaar-tar kaar-e-jahaa.n-biinii
jigar KHuu.n ho to chashm-e-dil me.n hotii hai nazar paidaa
hazaaro.n saal nargis apnii be-nuurii pe rotii hai
ba.Dii mushkil se hotaa hai chaman me.n diida-var paidaa
navaa-pairaa ho ai bulbul ki ho tere tarannum se
kabuutar ke tan-e-naazuk me.n shaahii.n kaa jigar paidaa
tire siine me.n hai poshiida raaz-e-zindagii kah de
musalmaa.n se hadiis-e-soz-o-saaz-e-zindagii kah de
KHudaa-e-lam-yazal kaa dast-e-qudrat tuu zabaa.n tuu hai
yaqii.n paidaa kar ai Gaafil ki maGluub-e-gumaa.n tuu hai
pare hai charKH-e-niilii-faam se manzil musalmaa.n kii
sitaare jis kii gard-e-raah ho.n vo kaarvaa.n to hai
makaa.n faanii makii.n faanii azal teraa abad teraa
KHudaa kaa aaKHirii paiGaam hai tuu jaavedaa.n tuu hai
Hinaa-band-e-uruus-e-laala hai KHuun-e-jigar teraa
tirii nisbat baraahiimii hai memaar-e-jahaa.n tuu hai
tirii fitrat amii.n hai mumkinaat-e-zindagaanii kii
jahaa.n ke jauhar-e-muzmar kaa goyaa imtihaa.n to hai
jahaan-e-aab-o-gil se aalam-e-jaaved kii KHaatir
nubuvvat saath jis ko le ga.ii vo armuGaa.n tuu hai
ye nukta sarguzisht-e-millat-e-baizaa se hai paidaa
ki aqvaam-e-zamiin-e-asia kaa paasbaa.n tuu hai
sabaq phir pa.Dh sadaaqat kaa adaalat kaa shujaa.at kaa
liyaa jaa.egaa tujh se kaam duniyaa kii imaamat kaa
yahii maqsuud-e-fitrat hai yahii ramz-e-musalmaanii
uKHuvvat kii jahaa.ngiirii mohabbat kii faraavaanii
butaan-e-ra.ng-o-KHuu.n ko to.D kar millat me.n gum ho jaa
na tuuraanii rahe baaqii na iiraanii na afGaanii
miyaan-e-shaaKH-saaraa.n sohbat-e-murG-e-chaman kab tak
tire baazuu me.n hai parvaaz-e-shaahiin-e-qahastaanii
gumaa.n-aabaad hastii me.n yaqii.n mard-e-musalmaa.n kaa
bayaabaa.n kii shab-e-taariik me.n qindiil-e-rohbaanii
miTaayaa qaisar o kisraa ke istibdaad ko jis ne
vo kyaa thaa zor-e-haidar faqr-e-buu-zar sidq-e-salmaanii
hu.e ahraar-e-millat jaada-paimaa kis tajammul se
tamaashaa.ii shigaaf-e-dar se hai.n sadiyo.n ke zindaanii
sabaat-e-zindagii iimaan-e-mohkam se hai duniyaa me.n
ki almaanii se bhii paa.enda-tar niklaa hai tuuraanii
jab is a.ngaara-e-KHaakii me.n hotaa hai yaqii.n paidaa
to kar letaa hai ye baal-o-par-e-ruuh-ul-amii.n paidaa
Gulaamii me.n na kaam aatii hai.n shamshiire.n na tadbiire.n
jo ho zauq-e-yaqii.n paidaa to kaT jaatii hai.n zanjiire.n
ko.ii andaaza kar saktaa hai us ke zor-e-baazuu kaa
nigaah-e-mard-e-momin se badal jaatii hai.n taqdiire.n
vilaayat paadshaahii ilm-e-ashiyaa kii jahaa.ngiirii
ye sab kyaa hai.n faqat ik nukta-e-iimaa.n kii tafsiire.n
baraahiimii nazar paidaa magar mushkil se hotii hai
havas chhup chhup ke siino.n me.n banaa letii hai tasviire.n
tamiiz-e-bandaa-o-aaqaa fasaad-e-aadmiyat hai
hazar ai chiira-dastaa.n saKHt hai.n fitrat kii ta.aziire.n
haqiiqat ek hai har shai kii KHaakii ho ki nuurii ho
lahuu KHurshiid kaa Tapke agar zarre kaa dil chiire.n
yaqii.n mohkam amal paiham mohabbat faatah-e-aalam
jihaad-e-zindagaanii me.n hai.n ye mardo.n kii shamshiire.n
che baayad mard raa tab-e-buland mashrab-e-naabe
dil-e-garme nigaah-e-paak-biine jaan-e-betaabe
uqaabii shaan se jhapTe the jo be-baal-o-par nikle
sitaare shaam ke KHuun-e-shafaq me.n Duub kar nikle
hu.e madfuun-e-dariyaa zer-e-dariyaa tairne vaale
tamaa.nche mauj ke khaate the jo ban kar guhar nikle
Gubaar-e-rahguzar hai.n kiimiyaa par naaz thaa jin ko
jabiine.n KHaak par rakhte the jo iksiir-gar nikle
hamaaraa narm-rau qaasid payaam-e-zindagii laayaa
KHabar detii thii.n jin ko bijliyaa.n vo be-KHabar nikle
haram rusvaa hu.aa piir-e-haram kii kam-nigaahii se
javaanaan-e-tataarii kis qadar saahab-nazar nikle
zamii.n se nuuryaan-e-aasmaa.n-parvaaz kahte the
ye KHaakii zinda-tar paa.enda-tar taabinda-tar nikle
jahaa.n me.n ahl-e-iimaa.n suurat-e-KHurshiid jiite hai.n
idhar Duube udhar nikle udhar Duube idhar nikle
yaqii.n afraad kaa sarmaaya-e-taamiir-e-millat hai
yahii quvvat hai jo suurat-gar-e-taqdiir-e-millat hai
tuu raaz-e-kun-fakaa.n hai apnii aa.nkho.n par ayaa.n ho jaa
KHudii kaa raaz-daa.n ho jaa KHudaa kaa tarjumaa.n ho jaa
havas ne kar diyaa hai Tuk.De Tuk.De nau-e-insaa.n ko
uKHuvvat kaa bayaa.n ho jaa mohabbat kii zabaa.n ho jaa
ye hindii vo KHuraasaanii ye afGaanii vo tuuraanii
tuu ai sharminda-e-saahil uchhal kar be-karaa.n ho jaa
Gubaar-aaluuda-e-ra.ng-o-nasab hai.n baal-o-par tere
tuu ai murG-e-haram u.Dne se pahle par-fishaa.n ho jaa
KHudii me.n Duub jaa Gaafil ye sirr-e-zindagaanii hai
nikal kar halqa-e-shaam-o-sahar se jaavedaa.n ho jaa
masaaf-e-zindagii me.n siirat-e-faulaad paidaa kar
shabistaan-e-mohabbat me.n hariir o parniyaa.n ho jaa
guzar jaa ban ke sail-e-tund-rau koh o bayaabaa.n se
gulistaa.n raah me.n aa.e to juu-e-naGma-KHvaa.n ho jaa
tire ilm o mohabbat kii nahii.n hai intihaa ko.ii
nahii.n hai tujh se ba.Dh kar saaz-e-fitrat me.n navaa ko.ii
abhii tak aadmii said-e-zabuun-e-shahryaarii hai
qayaamat hai ki insaa.n nau-e-insaa.n kaa shikaarii hai
nazar ko KHiira kartii hai chamak tahziib-e-haazir kii
ye sannaa.ii magar jhuuTe niguu.n kii reza-kaarii hai
vo hikmat naaz thaa jis par KHirad-mandaan-e-maGrib ko
havas ke panja-e-KHuunii.n me.n teG-e-kaar-zaarii hai
tadabbur kii fusuu.n-kaarii se mohkam ho nahii.n saktaa
jahaa.n me.n jis tamaddun kii binaa sarmaaya-daarii hai
amal se zindagii bantii hai jannat bhii jahannam bhii
ye KHaakii apnii fitrat me.n na nuurii hai na naarii hai
KHarosh-aamoz bulbul ho girah Gunche kii vaa kar de
ki tuu is gulsitaa.n ke vaaste baad-e-bahaarii hai
phir uTThii asia ke dil se chi.ngaarii mohabbat kii
zamii.n jaulaa.n-gah-e-atlas qabaayaan-e-tataarii hai
bayaa paidaa KHariidaa raast jaan-e-naa-tavaan-e-raa
pas az muddat guzaar uftaad barmaa kaarvaane raa
bayaa saaqii navaa-e-murG-zaar az shaaKH-saar aamad
bahaar aamad nigaar aamad nigaar aamad qaraar aamad
kashiid abr-e-bahaarii KHema andar vaadii o sahraa
sadaa-e-aabshaaraa.n az faraaz-e-koh-saar aamad
sarat gardam toham qaanuun peshii.n saaz dah saaqii
ki KHail-e-naGma-pardaazaa.n qataar andar qataar aamad
kanaar az zaahidaa.n bar-giir o bebaakaana saaGar-kash
pas az muddat azii.n shaaKH-e-kuhan baa.ng-e-hazaar aamad
ba-mushtaaqaa.n hadiis-e-KHvaajaa-e-badro hunain aavar
tasarruf-haa-e-pinhaanash ba-chashm-e-aashkaar aamad
digar shaaKH-e-KHaliil az KHuun-e-maa namnaak mii gardad
ba-baazaar-e-mohabbat naqd-e-maa kaamil ayyaar aamad
sar-e-KHaak-e-shahiire barg-haa-e-laala mii paasham
ki KHuunash baa-nihaal-e-millat-e-maa saazgaar aamad
bayaa taa-gul baa-afmaishaaniim o mai dar saaGar andaazem
falak raa saqf ba-shagaafem o tarh-e-diigar andaazem

Allama Iqbal
Nazm

waqt

ye vaaqiye
haadse
tasaadum
har ek Gam
aur har ik masarrat
har ik aziyyat
har ek lazzat
har ik tabassum
har ek aa.nsuu
har ek naGma
har ek KHushbuu
vo zaKHm kaa dard ho
ki vo lams kaa ho jaaduu
KHud apnii aavaaz ho ki maahaul kii sadaa.e.n
ye zehn me.n bantii aur biga.Dtii hu.ii fazaa.e.n
vo fikr me.n aa.e zalzale ho.n ki dil kii halchal
tamaam ehsaas
saare jazbe
ye jaise patte hai.n
bahte paanii kii sat.h par
jaise tairte hai.n
abhii yahaa.n hai.n
abhii vahaa.n hai.n
aur ab hai.n ojhal
dikhaa.ii detaa nahii.n hai lekin
ye kuchh to hai
jo ki bah rahaa hai
ye kaisaa dariyaa hai
kin pahaa.Do.n se aa rahaa hai
ye kis samundar ko jaa rahaa hai
ye vaqt kyaa hai

Javed Akhtar
Nazm

KHizr-e-rah

shaa'ir
saahil-e-dariyaa pe mai.n ik raat thaa mahv-e-nazar
gosha-e-dil me.n chhupaa.e ik jahaan-e-iztiraab
shab sukuut-afzaa havaa aasuuda dariyaa narm sair
thii nazar hairaa.n ki ye dariyaa hai yaa tasviir-e-aab
jaise gahvaare me.n so jaataa hai tifl-e-shiir-KHvaar
mauj-e-muztar thii kahii.n gahraa.iyo.n me.n mast-e-KHvaab
raat ke afsuu.n se taa.ir aashiyaano.n me.n asiir
anjum-e-kam-zau giraftaar-e-tilism-e-maahtaab
dekhtaa kyaa huu.n ki vo paik-e-jahaa.n-paimaa KHizr
jis kii piirii me.n hai maanind-e-sahar ra.ng-e-shabaab
kah rahaa hai mujh se ai juuyaa-e-asraar-e-azal
chashm-e-dil vaa ho to hai taqdiir-e-aalam be-hijaab
dil me.n ye sun kar bapaa ha.ngaama-e-mahshar hu.aa
mai.n shahiid-e-justujuu thaa yuu.n suKHan-gustar hu.aa
ai tirii chashm-e-jahaa.n-bii.n par vo tuufaa.n aashkaar
jin ke hangaame abhii dariyaa me.n sote hai.n KHamosh
kashtii-e-miskiin-o-jaan-e-paak-o-diivaar-e-yatiim
ilm-e-muusaa bhii hai tire saamne hairat-farosh
chho.D kar aabaadiyaa.n rahtaa hai tuu sahraa-navard
zindagii terii hai be-roz-o-shab-o-fardaa-o-dosh
zindagii kaa raaz kyaa hai saltanat kyaa chiiz hai
aur ye sarmaaya-o-mehnat me.n hai kaisaa KHarosh
ho rahaa hai asia kaa KHirqa-e-deriina chaak
naujavaa.n aqvaam-e-nau-daulat ke hai.n pairaaya-posh
garche askandar rahaa mahruum-e-aab-e-zindagii
fitrat-e-askandarii ab tak hai garm-e-naa.o-nosh
bechtaa hai haashmii naamuus diin-e-mustafaa
KHaak-o-KHuu.n me.n mil rahaa hai turkamaan-e-saKHt-kosh
aag hai aulaad-e-ibraahiim hai namruud hai
kyaa kisii ko phir kisii kaa imtihaa.n maqsuud hai
javaab-e-KHizr
sahraa-navardii

Allama Iqbal
Nazm

ek laDka

dayaar-e-sharq kii aabaadiyo.n ke uu.nche Tiilo.n par
kabhii aamo.n ke baaGo.n me.n kabhii kheto.n kii me.nDo.n par
kabhii jhiilo.n ke paanii me.n kabhii bastii kii galiyo.n me.n
kabhii kuchh niim uryaa.n kam-sino.n kii ra.ng-raliyo.n me.n
sahar-dam jhuTpuTe ke vaqt raato.n ke a.ndhere me.n
kabhii melo.n me.n naaTak-Toliyo.n me.n un ke Dere me.n
ta.aaqub me.n kabhii gum titliyo.n ke suunii raaho.n me.n
kabhii nanhe parindo.n kii nahufta KHvaab-gaaho.n me.n
barhana paa.nv jaltii ret yaKH-basta havaa.o.n me.n
gurezaa.n bastiyo.n se madraso.n se KHaanqaaho.n me.n
kabhii ham-sin hasiino.n me.n bahut KHush-kaam o dil-rafta
kabhii pechaa.n baguula saa.n kabhii jyuu.n chashm-e-KHuu.n-basta
havaa me.n tairtaa KHvaabo.n me.n baadal kii tarah u.Dtaa
parindo.n kii tarah shaaKHo.n me.n chhup kar jhuultaa mu.Dtaa
mujhe ik la.Dkaa aavaara-manush aazaad sailaanii
mujhe ik la.Dkaa jaise tund chashmo.n kaa ravaa.n paanii
nazar aataa hai yuu.n lagtaa hai jaise ye balaa-e-jaa.n
miraa ham-zaad hai har gaam par har mo.D par jaulaa.n
ise ham-raah paataa huu.n ye saa.e kii tarah meraa
ta.aaqub kar rahaa hai jaise mai.n mafruur mulzim huu.n
ye mujh se puuchhtaa hai aKHtar-ul-iimaan tum hii ho

Akhtarul Iman
Nazm

zauq o shauq

qalb o nazar kii zindagii dasht me.n sub.h kaa samaa.n
chashma-e-aaftaab se nuur kii naddiyaa.n ravaa.n!
husn-e-azal kii hai numuud chaak hai parda-e-vajuud
dil ke liye hazaar suud ek nigaah kaa ziyaa.n!
surKH o kabuud badliyaa.n chho.D gayaa sahaab-e-shab!
koh-e-izam ko de gayaa ra.ng-ba-ra.ng tailisaa.n!
gard se paak hai havaa barg-e-naKHiil dhul ga.e
reg-e-navaah-e-kaazima narm hai misl-e-parniyaa.n
aag bujhii hu.ii idhar, TuuTii hu.ii tanaab udhar
kyaa KHabar is maqaam se guzre hai.n kitne kaarvaa.n
aa.ii sadaa-e-jibra.iil teraa maqaam hai yahii
ahl-e-firaaq ke liye aish-e-davaam hai yahii
kis se kahuu.n ki zahr hai mere liye mai-e-hayaat
kohna hai baz-e-kaa.inaat taaza hai.n mere vaardaat!
kyaa nahii.n aur Gaznavii kaargah-e-hayaat me.n
baiThe hai.n kab se muntazir ahl-e-haram ke somnaat!
zikr-e-arab ke soz me.n, fikr-e-ajam ke saaz me.n
ne arabii mushaahidaat, ne ajamii taKHaiyyulaat
qaafilaa-e-hijaaz me.n ek husain bhii nahii.n
garche hai taab-daar abhii gesuu-e-dajla-o-furaat!
aql o dil o nigaah kaa murshid-e-avvalii.n hai ishq
ishq na ho to shar-o-dii.n butkada-e-tasavvuraat!
sidq-e-KHaliil bhii hai ishq sabr-e-husain bhii hai ishq!
ma.arka-e-vajuud me.n badr o hunain bhii hai ishq!
aaya-e-kaa.enaat kaa ma.anii-e-der-yaab tuu!
nikle tirii talaash me.n qaafila-haa-e-ra.ng-o-buu!
jalvatiyaan-e-madrasa kor-nigaah o murda-zauq
jalvatyaan-e-maikada kam-talab o tahii-kaduu!
mai.n ki mirii Gazal me.n hai aatish-e-rafta kaa suraaG
merii tamaam sarguzisht kho.e hu.o.n kii justujuu!
baad-e-sabaa kii mauj se nash-o-numaa-e-KHaar-o-KHas!
mere nafas kii mauj se nashv-o-numaa-e-aarzuu!
KHuun-e-dil o jigar se hai merii navaa kii parvarish
hai rag-e-saaz me.n ravaa.n saahib-e-saaz kaa lahuu!
fursat-e-kashmukash me.n ii.n dil be-qaraar raa
yak do shikan zyaada kun gesuu-e-taabdaar raa
lauh bhii tuu, qalam bhii tuu, teraa vajuud al-kitaab!
gumbad-e-aabgiina-ra.ng tere muhiit me.n habaab!
aalam-e-aab-o-KHaak me.n tere zuhuur se faroG
zarra-e-reg ko diyaa tuu ne tuluu-e-aaftaab!
shaukat-e-sanjar-o-saliim tere jalaal kii numuud!
faqr-e-'juned'-o-'baayaziid' teraa jamaal be-naqaab!
shauq tiraa agar na ho merii namaaz kaa imaam
meraa qayaam bhii hijaab! meraa sujuud bhii hijaab!
terii nigaah-e-naaz se dono.n muraad paa ga.e
aql, Gayaab o justujuu ishq, huzuur o iztiraab!
tiira-o-taar hai jahaa.n gardish-e-aaftaab se!
tab-e-zamaana taaza kar jalva-e-be-hijaab se!
terii nazar me.n hai.n tamaam mere guzishta roz o shab
mujh ko KHabar na thii ki hai ilm-e-naKHiil be-rutab!
taaza mire zamiir me.n ma.arka-e-kuhan hu.aa!
ishq tamaam mustafaa! aql tamaam buu-lahab!
gaah ba-hiila mii-barad, gaah ba-zor mii-kashad
ishq kii ibtidaa ajab ishq kii intihaa ajab!
aalam-e-soz-o-saaz me.n vasl se ba.Dh ke hai firaaq
vasl me.n marg-e-aarzuu! hijr me.n lazzat-e-talab!
ain-e-visaal me.n mujhe hausla-e-nazar na thaa
garche bahaana-juu rahii merii nigaah-e-be-adab!
garmii-e-aarzuu firaaq! shorish-e-haa-o-huu firaaq!
mauj kii justujuu firaaq! qatre kii aabruu firaaq!

Allama Iqbal
Nazm

barahwan khilaDi

KHush-gavaar mausam me.n
an-ginat tamaashaa.ii
apnii apnii teamo.n ko
daad dene aate hai.n
apne apne pyaaro.n kaa
hausla ba.Dhaate hai.n
mai.n alag-thalag sab se
baarahve.n khilaa.Dii ko
hoot kartaa rahtaa huu.n
baarahvaa.n khilaa.Dii bhii
kyaa ajab khilaa.Dii hai
khel hotaa rahtaa hai
shor machtaa rahtaa hai
daad pa.Dtii rahtii hai
aur vo alag sab se
intizaar kartaa hai
ek aisii saa.at kaa
ek aise lamhe kaa
jis me.n saaneha ho jaa.e
phir vo khelne nikle
taaliyo.n ke jhurmuT me.n
ek jumla-e-KHush-kun
ek naara-e-tahsiin
us ke naam par ho jaa.e
sab khilaa.Diyo.n ke saath
vo bhii mo'atabar ho jaa.e
par ye kam hii hotaa hai
phir bhii log kahte hai.n
khel se khilaa.Dii kaa
umr-bhar kaa rishta hai

Iftikhar Arif
Nazm

udas kyon ho

udaas kyo.n ho
hame.n bataa.o
tumhe.n udaasii kii ranjisho.n se rihaa kare.nge
agarche ham aise KHaak-zaado.n kii dastaras me.n shifaa nahii.n hai
tumhaare zaKHmo.n ko bhar de aisii davaa nahii.n hai
magar ham aise KHudaa-parasto.n kii dastaras me.n du'aa-e-kun hai
tumhaare haq me.n du'aa kare.nge
udaas kyo.n ho
hame.n bataa.o

Arslan Abbas
Nazm

safar nama

1
pecking
yuu.n gumaa.n hotaa hai baazuu hai.n mire saath karo.D
aur aafaaq kii had tak mire tan kii had hai
dil miraa koh o daman dasht o chaman kii had hai
mere kiise me.n hai raato.n kaa siyah-faam jalaal
mere haatho.n me.n hai sub.ho.n kii enaan-e-gulguu.n
merii aaGosh me.n paltii hai KHudaa.ii saarii
mere maqduur me.n hai mojiza-e-kun-fayakuu.n

Faiz Ahmad Faiz
Nazm

aap-biti

1
yuu.n to marne ke liye zahr sabhii piite hai.n
zindagii tere liye zahr piyaa hai mai.n ne
sham.a jaltii hai par ik raat me.n jal jaatii hai
yaa.n to ek umr isii tarah se jalte guzrii
kaun sii KHaak hai ye jaane kahaa.n kaa hai KHamiir
ik na.e saa.nche me.n har roz hii Dhalte guzrii
kis tarah mai.n ne guzaarii hai.n ye Gam kii gha.Diyaa.n
kaash mai.n aisii kahaanii ko sunaa bhii saktaa
ta.ana-zan hai.n jo mire haal pe arbaab-e-nashaat
un ko ik baar mai.n ai kaash rulaa bhii saktaa
mai.n ki shaa.er huu.n mai.n paiGaambar-e-fitrat huu.n
merii taKH.iil me.n hai ek jahaan-e-bedaar
dastaras me.n mirii nazzaara-e-gul-haa-e-chaman
mere idraak me.n hai.n kun-fayakuu.n ke asraar
mire ash.aar me.n hai qalb-e-hazii.n kii dha.Dkan
merii nazmo.n me.n mirii ruuh kii dil-doz pukaar
phir bhii rah rah ke khaTaktii hai mire dil me.n ye baat
ki mire paas to alfaaz kaa ik parda hai
sirf alfaaz se tasviir nahii.n ban saktii
sirf ehsaas me.n haalaat kii tafsiir kahaa.n
sirf fariyaad me.n zaKHmo.n kii vo zanjiir kahaa.n
aisii zanjiir ki ek ek ka.Dii me.n jis kii
kitnii kho.ii hu.ii KHushiyo.n ke manaazir pinhaa.n
kitnii bhuulii hu.ii yaado.n ke pur-asraar kha.nDar
kitne uj.De hu.e luuTe hu.e sunsaan nagar
kitne aate hu.e jaate hu.e chehro.n ke nuquush
kitne bante hu.e miTte hu.e lamhaat kaa raaz
kitnii uljhii hu.ii raaho.n ke nasheb aur faraaz
2
kyaa kahuu.n mujh ko kahaa.n laa.ii mirii umr-e-ravaa.n
aa.nkh kholii to har ik samt a.ndhero.n kaa samaa.n
re.ngtii uu.nghtii maGmuum sii ik raahguzaar
gard-e-aalaam me.n khoyaa hu.aa manzil kaa nishaa.n
gesuu-e-shaam se lipTii hu.ii Gam kii zanjiir
siina-e-shab se nikaltii hu.ii fariyaad-o-fuGaa.n
ThanDii ThanDii sii havaa.o.n me.n vo Gurbat kii thakan
dar-o-diivaar pe taariik se saa.e larzaa.n
kitnii kho.ii hu.ii biimaar o fasurda aa.nkhe.n
TimTimaate se diye chaar taraf nauha-kunaa.n
muzmahil chehre masaa.ib kii giraa.n-baarii se
dil-e-majruuh se uThtaa hu.aa Gamnaak dhu.aa.n
yahii taariikii-e-Gam to miraa gahvaara hai
mai.n isii kokh me.n thaa nuur-e-sahar ke maanind
har taraf sog me.n Duubaa hu.aa meraa maahaul
meraa uj.Daa hu.aa ghar 'miir' ke ghar ke maanind
ik taraf azmat-e-aslaaf kaa maathe pe Guruur
aur ik samt vo iflaas ke phaile hu.e jaal
bhuuk kii aag me.n jhulse hu.e saare armaa.n
qarz ke bojh se jiine kii uma.nge.n paamaal
vaqt kii dhund me.n lipTe hu.e kuchh pyaar ke giit
mehr o iKHlaas zamaane kii jafaa.o.n se niDhaal
bhaa.ii bhaa.ii kii mohabbat me.n niraale se shukuuk
nigah-e-Gair me.n jis tarah anokhe se savaal
''ek ha.ngaame pe mauquuf thii ghar kii raunaq''
muflisii saath liye aa.ii thii ik ja.ng-o-jidaal
faaqa-mastii me.n bikharte hu.e saare rishte
ta.ng-dastii ke sabab saarii fazaa.e.n behaal
ik jahannam kii tarah thaa ye miraa gahvaara
is jahannam me.n mere baap ne dam to.D diyaa
TuuT kar rah ga.e bachpan ke suhaane sapne
mujh se mu.nh pher liyaa jaise mirii shoKHii ne
mere ha.nste hu.e chehre pe udaasii chhaa.ii
jaise ik raat bhayaanak mire sar par aa.ii
raahe.n dushvaar magar raah-numaa ko.ii na thaa
saamne vus.at-e-aflaak KHudaa ko.ii na thaa
mere ajdaad kii miiraas ye viiraan saa ghar
jis ko ghere hu.e har samt tabaahii ke bha.nvar
jis kii chhat girtii hu.ii TuuTaa hu.aa darvaaza
har taraf jaise bikhartaa hu.aa ik shiiraaza
na kahii.n atlas-o-kamKHvaab na diibaa-o-hariir
har taraf mu.nh ko basore hu.e jaise taqdiir
mujh ko us ghar se mohabbat to bhalaa kyaa hotii
yaa.n agar dil me.n na jiine kii tamannaa hotii
ye samajh kar ki yahii hai mirii qismat kaa likhaa
us kii diivaar ke saa.e me.n lipTaa rahtaa
lekin is dil kii KHalish ne mujhe bedaar kiyaa
mujh ko haalaat se aamaada-e-paikaar kiyaa
be-kasii raKHt-e-safar ban kar mire saath chalii
yaad aa.ii thii mujhe gaa.nv kii ek ek galii
lahlahaatii hu.ii fasle.n vo mire aam ke baaG
vo makaano.n me.n larazte hu.e dhu.ndle se charaaG
duur tak paanii me.n phaile hu.e vo dhaan ke khet
aur taalaab-kinaare vo chamaktii hu.ii ret
mere ham-umr vo saathii vo mire ham-jolii
mere school ke vo dost mirii vo Tolii
ek baar un kii nigaaho.n ne mujhe dekhaa thaa
jaise ik baar mire dil ne bhii kuchh sochaa thaa
''mai.n ne jab vaadi-e-Gurbat me.n qadam rakkhaa thaa
duur tak yaad-e-vatan aa.ii thii samjhaane ko''

Khalilur Rahman Azmi
Nazm

hashr ki subh daraKHshan ho maqam-e-mahmud

raat daa.Dhii ke a.ndhere se takalluf barte
arsh ke saamne rusvaa.ii kii gardan na uThe
izn-e-sajda pe kamar taKHta na ho jaa.e kahii.n
khokhle lafzo.n me.n lohaa to nahii.n bhar sakte
saika.Do.n saal kii tabliiG ke chaaliis samar
kashtii ban jaa.e to tannuur se paanii uble
saalhaa-saal se aaraam natiija matluub
tiin-sau-saaTh sanam KHaana-e-ka.aba se chale
reg-zaaro.n me.n Gubaar aur khajuurii saa.e
uu.nT kii aa.nkh me.n tash.hiir hu.aa dard-e-safar
ko.ii 'hi.nda' se kahe daa.nt kahaa.n hai.n tere
fat.h-e-makka se magar log hidaayat paa.e.n
KHuun jam jaa.e jo naalain me.n chalte chalte
arsh kii aa.nkh se rahmat kaa samundar uble
jibra.iil apnii hai.at me.n hai.n numaa.ish-manzar
paa.nv paataal me.n sar charKH se Takraa.e kahii.n
par jo khole to har ik samt pe parde laTke.n
aur jaltaa hu.aa suuraj abhii kho jaa.e kahii.n
qaafila aayaa hai 'buu-bakr' se mansuub magar
maal taqsiim hu.aa daaman-e-haajat-ma.nda.n
nuur ka.ndhe pe uThaa.e shab-e-hijrat ke safiir
Gaar me.n saath rahe paas hii paivand hu.e
masjid-e-nabvii me.n ambaar-e-Ganiimat raushan
log rote hu.e nikle hai.n pareshaa.n-manzar
raushnii pahu.nchii 'abuu-jahl' kii diivaaro.n tak
ghar kii taariikii me.n rasta na bane biinaa.ii
pe.D ke saa.e kii pahchaan yahuudii raahib
ruk gayaa aab-e-ravaa.n beva ke darvaaze par
dast-e-zohraa me.n nishaanaat ayaa.n chakkii se
ilm ke baab 'alii' umr me.n sab se chhoTe
chaa.nd kaa naam tire chaak-garebaano.n me.n
mubtadii Dhuu.nDte hai.n masjid-e-aqsaa me.n imaam
sidrat-ul-muntahaa jibriil ijaazat maa.nge
kaun thaa kis ne pukaaraa ki chale bhii aa.o
kaun maujuud thaa pahle se vahaa.n kaun gayaa
kaun suntaa thaa vahaa.n kis ne pukaaraa kis ko
kis kii aavaaz kii tanviir se aalim chamke
sar-bulandii thii muqaddar me.n qalam se pahle
bakriyaa.n kaun 'haliima' kii charaane jaa.e
'aamina' batn se iz.haar hai aadam kaa uruuj
mujtam.a kis ne kiyaa logo.n ko parbat ke qariib
kis ne lalkaaraa zalaalat ko musalsal tanhaa
jau kii roTii kabhii mil jaa.e kabhii faaqa-kashii
bhuuk se peT pe patthar kabhii baa.ndhe kis ne
tiin-sau-terah kii ta.adaad hai kis gintii me.n
fikr pe daa.era-kun KHandaqe.n khodii jaa.e.n
duur kii dhuup me.n hai faisla-kun rah-e-tabuuk
'ha.nzala' saamne aa jaa.e.n jo chhaT jaa.e Gubaar
mai.n ne pahu.nchaa diyaa tum tak jo mujhe pahu.nchaa thaa
mai.n ne pahu.nchaa diyaa tum tak jo mujhe pahu.nchaa thaa
mai.n ne pahu.nchaa diyaa tum tak jo mujhe pahu.nchaa thaa
ko.ii pardesii hai KHeme pe pareshaa.n-surat
aur 'faaruuq' chale biivii ko ham-raah liye
faasle to.D kar aavaaz ke saa.e phaile
haakim-e-vaqt kaa kurtaa ka.ii paivand lagaa
bakriyaa.n jis se sambhaalii nahii.n jaatii.n thii.n kabhii
nisf duniyaa pe KHilaafat ke alam lahraa.e
yaad hai saahibo KHaibar ko ukhaa.Daa kis ne
kis kii talvaar thii aa.iina zamaane ke liye
kis ne zarKHez shujaa.at ke sitaare bo.e
jaan dii jaavedaa.n lamhaat tilaavat mashGuul
KHuun ke dhabbe hai.n qur.aan pe taabinda nazar

Adil Mansuri
Nazm

parindon ki music conference

totaa chhe.De thap-thap tabla mainaa giit sunaa.e
ulluu jab mirda.ng bajaa.e kavvaa shor machaa.e
kuk.Duu.n kuu.n kii taan lagaa ke murGaa gaay KHayaal
qumrii apnii Thumrii gaay murGii deve taal
mor apnii dum ko phailaa kar katthak naach dikhaa.e
totaa chhe.De thap-thap tabla mainaa giit sunaa.e
chi.Diyaa baajii sabhaa me.n naache KHushii se chham chham chham
moTii bataKH cho.nch se Dholak piiTe dham dham dham
bayaa bajaa.e manjere aur bhau.nraa bhajan u.Daa.e
totaa chhe.De thap-thap tabla mainaa giit sunaa.e
bulbul gul kii yaad me.n ro-ro gaa.e diipak raag
mast papiihaa duur se naGmo.n kii bha.Dkaa.e aag
koyal pahan ke paa.el saarii mahfil me.n iThlaa.e
totaa chhe.De tha-thap tabla mainaa giit sunaa.e
ra.ng bira.ngii chi.Diyaa.n ab chhe.De.n aisii qavvaalii
pattaa pattaa buuTaa buuTaa taal me.n deve taalii
phuuphii chiil vajd me.n aa kar uu.nchii taan lagaa.e
totaa chhe.De thap-thap tabla mainaa giit sunaa.e
inglistaan kaa saaras aa kar naache rock ain rol
murGaabii se bole madam english gaanaa bol
dekho dekho kitnii pyaarii mahfil hai ye haa.e
totaa chhe.De thap-thap tabla mainaa giit sunaa.e

Raja Mehdi Ali Khan
Nazm

wahi kashf-e-zat ki aarzu

miraa dil giro mirii jaa.n giro
chalaa aa ki hai miraa dar khulaa
tuu miraa nasiib hai raah-rau
ye havaa ye barq ye ra.ad-o-abr ye tiirgii
rah-e-intizaar kii naarasii
mire jaan-o-dil pe hai.n lau buto
mire mehmaa.n mire raah-rau
ai gurez-paa tuu saraab-e-dasht KHalaa na ban
vo navaa na ban jo fareb-e-raah-guzaar ho
vo fusuun-e-arz-o-samaa na ban
jise dil-girafto.n se aar ho
jo tujhe bulaatii hai pai-ba-pai
vo sadaa jilaajal-e-jaa.n kii hai
vo sadaa muruur-e-zamaa.n kii hai
kise us sadaa se faraar ho
miraa dil giro mirii jaa.n giro
tirii kun-ma-kun tirii rau-ma-rau
mujhe baar-e-jaa.n
ki mai.n harf jis kaa bayaa.n hai tuu
mai.n vo jism jis kii ravaa.n hai tuu
tuu kalaam hai mai.n tirii zabaa.n
tuu vo sham.a hai ki mai.n jis kii lau
kisii naqsh-e-kaar kaa ik nafas
ka.ii suurate.n jo sadaa se tishna-e-ra.ng thii.n
hu.ii.n vasl-e-ma.anii se baarvar
kisii but-taraash kii ik nigah
ka.ii sa.ng-e-aziyat-e-yaas-o-marg
se bach ga.e
hu.e samt-e-raah se baa-KHabar
chalaa aa ki merii nidaa me.n bhii
vahii ruuyat-e-azalii ki hai
jise yaad Gaayat-e-ra.ng-o-buu
jise yaad raaz-e-mai-o-subuu
jise yaad vaada-e-taar-o-puu
chalaa aa ki merii nidaa me.n bhii
isii kashf-e-zaat kii aarzuu

Noon Meem Rashid
Nazm

ek sawal KHuda-e-bartar se

ham is zamiin o aasmaa.n ke darmiyaa.n
hairaan hai.n aur sar-garaa.n
ai KHudaa-e-do-jahaa.n!
ai harf-e-kun ke raaz-daa.n!
ai mamba-e-kaun-o-makaa.n!
itnaa to batlaa de
ko.ii aisii bhii duniyaa hai
jahaa.n insaaniyat kii saaf peshaanii pe
ilm o fan kii pau phaTtii ho aur
fikr o nazar ke aa.iino.n se
nuur kii kirne.n ubaltii ho.n
dilo.n me.n KHair o barkat kii du.aa.e.n guu.njtii ho.n
sub.h dam aakaash ke niilam tale
jaam-e-haqiiqat pii ke jiine kii tamannaa raqs kartii ho
jahaa.n ehsaas ke kohre se
fikr-e-nau ke taare jhilmilaate ho.n
jahaa.n ho.nTo.n pe harf-e-aagahii kii jot ho
aa.nkho.n se hairat
zehn se vijdaan ke chashme ubalte ho.n,
jahaa.n raato.n ke sannaaTe me.n
dil mahv-e-niyaaz-o-naaz rahtaa ho
fazaa-e-be-karaa.n ke sahar kaa hamraaz rahtaa ho
mohabbat, ishq, dildaarii, vafaa unvaan-e-hastii ho.n
uKHuvvat, narm-guftaarii ataa-e-paimaana-edil ho.n

Sajida Zaidi
Nazm

maut ka git

arsh kii aa.D me.n insaan bahut khel chukaa
KHuun-e-insaan se haivaan bahut khel chukaa
mor-e-be-jaa.n se sulaiman bahut khel chukaa
vaqt hai aa.o do-aalam ko digar-guu.n kar de.n
qalb-e-giitii mai.n tabaahii ke sharaare bhar de.n

Makhdoom Mohiuddin
Nazm

bachcha aur murgha

ik bachche ne murGe se kahaa
pyaare murGe ye shor hai kyaa
sun sun terii kuk.Duu.n-kuu.n
mai.n saKHt pareshaa.n hotaa huu.n
jab taare chhupte hote hai.n
sab chain aaraam se sote hai.n
us vaqt se tuu chillaataa hai
kyuu.n itnaa shor machaataa hai
ma.aluum ho aaKHir baat hai kyaa
kuchh apne dil kaa haal bataa
jaa duur machaa ye shor kahii.n
pa.Dhne me.n dil lagtaa hii nahii.n
murGe ne sunaa bachche kaa bayaa.n
bolaa na ho naaraaz miyaa.n
tum sab nii.nd ke maate ho
so so vaqt ga.nvaate ho
ye mai.n jo shor machaataa huu.n
maalik ko pukaare jaataa huu.n
ye merii ibaadat hai pyaare
allaah kii taa.at hai pyaare
mai.n qahr se us ke Dartaa huu.n
har vaqt ibaadat kartaa huu.n
jab sub.h ko baa.ng mai.n detaa huu.n
aur naam KHudaa kaa letaa huu.n
tum kitne Gaafil hote ho
mai.n jaagtaa huu.n tum sote ho

Mahshar Badayuni
Nazm

daimi sukh

mohabbat daa.imii sukh hai
ki jis ko maut kii gha.Diyaa.n
kabhii kam kar nahii.n saktii.n
ye mausam ik daf.a aa.e
to phir aa kar Thahar jaa.e
hasii.n shaadaab sii kaliyaa.n
nigaaho.n me.n samaa jaa.e.n
to phir ye mar nahii.n saktii.n
KHayaalo.n kii ravaanii me.n
ki jaise bahte paanii me.n
ka.nval khil jaa.e.n KHvaabo.n ke
to qudarat muskuraatii hai
ishaara kar ke taaro.n se
chhalakte aabshaaro.n se
madhur sargoshiyaa.n kar ke
hame.n rasta dikhaatii hai
ye rasta kis qadar hairaan-kun manzil dikhaataa hai
isii raste pe insaa.n KHud ko pahlii baar paataa hai
mohabbat ko sazaa kahne se pahle soch kar rakhnaa
ki jo is se bichha.D jaa.e use manzil nahii.n miltii
bikhar jaa.e.n jo ban kar KHaak phir mahfil nahii.n miltii
mohabbat daa.imii sukh hai
ye sukh mai.n chaahtii huu.n terii aa.nkho.n me.n nazar aa.e
ki tuu is kaa.enaat-e-KHvaab kaa hamraaz ban jaa.e
mohabbat daa.imii sukh hai

Shaista Mufti
Nazm

hamein nabud mat karna

agarche suut se takle ne dhaage ko na khii.nchaa thaa
mire reshe bunat ke marhale me.n the
rage.n maa.n kii duriido.n se na bichh.Dii thii.n
mai.n apne jism se kuchh faasle par thaa
magar mere aqiide kaa ta.ayyun karne vaalo.n ne
mire maslak ke baare me.n
jo sochaa thaa use tajsiim kar Daalaa
mai.n jis dam apne hone par utar aayaa
mujhe taqsiim kar Daalaa
kisii ne mere maathe par tilak daaGaa
saliibo.n ko mirii chhaatii pe khii.nchaa
aur kaano.n me.n azaa.n bhar dii
phir is ke ba.ad
peshaanii pe a.ngaare
saliibe.n apne siine par
samaa.at par namiida za.ng ke taale sambhaale
mai.n ne saarii umr
duniyaa ke tasarruf me.n guzaarii hai
mirii fitrat simaTnaa aur
qismat TuuT jaanaa hai
mai.n paara huu.n
mujhe duniyaa masaltii hai
nafii isbaat kii zarbe.n
mujhe taqsiim kartii hai.n
bikhartaa huu.n
mire zarre thirakte hai.n
to kahte hai.n
hame.n naabuud mat karnaa
ki jab taqsiim hone kaa amal mumkin nahii.n rahtaa
to phir zarra
zaraa bhar choT khaane par
dhamaake ko ugaltaa hai
dhamaake ko samajhte ho
dhamaaka jis se harf-e-kun Tapaktaa hai
hame.n naabuud mat karnaa

Syed Mubarak Shah
Nazm

main KHud sochta hun

haadse zindagii kii alaamat hai.n lekin vo ik haadsa
ham jise maut kahte hai.n
kab aur kaise kahaa.n ruu-numaa ho ko.ii jaantaa hai
bilaa-raib ko.ii nahii.n jaantaa
mai.n KHud sochtaa huu.n mujhe ek muddat se kyaa ho gayaa hai
mere phaile hu.e jaagte zinda haatho.n kii sab u.ngliyaa.n so chukii hai.n
mere larzaa.n labo.n par jamii pap.Diyaa.n barq se raakh hote hu.e abr par ro chukii hai.n
ilm o irfaan kii raah me.n jaise merii du.aa.e.n asar kho chukii hai.n
mai.n kyaa jaantaa huu.n
fanaa ke tasalsul me.n ko.ii girah Daalne ke liye
harf-e-kun kii zaruurat hai jo maa.ngne par bhii ko.ii na degaa
ki ab vo zamaano.n se bahte hu.e KHuun kaa KHuu.n-bahaa to nahii.n hai
vo jis ke tasarruf me.n sab kuchh hai
husn-e-talab kii mujhe daad de kar agar ye kahe
KHuub ho tum magar jaante ho ki tum kaun ho
tum rah-e-raftagaa.n kii masaafat kaa ik aur aaGaaz ho intihaa to nahii.n ho
adam aur maujuud ke darmiyaa.n ik ka.Dii ho KHudaa to nahii.n ho
to mai.n kyaa kahuu.ngaa mai.n KHud sochtaa huu.n

Jameel ur Rahman
Nazm

nazm

tumhe.n mujh se mohabbat ho
aur is had tak mohabbat ho
ki mere naam kii KHushbuu tumhaarii be-sukuu.n nii.ndo.n kaa ghar aabaad kartii ho
vo merii yaad kii chaadar lipaT kar tum se tum ko
ziist ke be-zaar-kun ma.amuul se aazaad kartii ho

Kainaat
Nazm

qaht

mai.n apne band kamre me.n pa.Daa huu.n
ki raushnii bhii ujaalo.n kii muntazir hai
vo kone me.n lagaa jaalaa bhii thak gayaa hai
niilii diivaare.n jo ummiid kaa ik zaaviya banaatii thii.n
KHud ko parde se chhupaatii hai.n
ki khi.Dkii se nazar aataa
baarish kaa KHuubsuurat manzar
mahzuuz kun thaa
calender ke palaTne par
ab ram nazm bhii sunaa.ii nahii.n detii
magar khi.Dkii par rasta banaataa hu.aa paanii
vo bhii be-taab hai ki jhaa.nk le andar
ki pahro.n kaun hai jo chup kii sham.a jalaa.e
khi.Dkii par pa.De paanii ke qatro.n ko
muqaddas se muqaddas jaantaa hai
ki ek ek qatra aa.nsuu se shabiih hai
ki barse to bahut barse vagarna qaht vaajib hai

Saira Iqbal
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now