Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "mashvara"

Nazm MATCHES FOR "mashvara"

Nazm

mashwara

kisii kii yaad sataatii hai raat din tum ko
kisii ke pyaar se majbuur ho ga.ii ho tum
tumhaaraa dard mujhe bhii udaas rakhtaa hai
qariib aa ke bahut duur ho ga.ii ho tum

Kafeel Aazar Amrohvi
Nazm

mashwara

nannhii la.Dkii
saahil ke itne nazdiik
ret se apne ghar na banaa
ko.ii sarkash mauj idhar aa.ii to
tere ghar kii buniyaade.n tak bah jaa.e.ngii
aur phir un kii yaad me.n tuu
saarii umr udaas rahegii!

Parveen Shakir
Nazm

jawan beTi se bap ka KHitab

mirii beTii mirii jaanaa.n
tumhe.n sab yaad to hogaa
bahut pahle bahut pahle
javaanii kaa thaa jab aalam
mire baazuu me.n taaqat thii
mire siine me.n himmat thii
unhe.n ayyaam me.n ik din
mirii aaGosh-e-ulfat me.n
kisii ne laa ke rakkhaa thaa
tumhaaraa phuul saa chehra
badan be-intihaa naazuk
mire in saKHt haatho.n me.n
ajab narmii sii aa.ii thii
mirii is aa.nkh ne buu se liye the aur ro.ii thii
mujhe to yaad hai sab kuchh
tumhe.n bhii yaad to hogaa
na.e kap.De khilaune duudh kii botal KHariidii thii
bahut bechain hotaa thaa jo tum raato.n ko rotii thii.n
chalii thii.n apne pairo.n par jo tum pahle-pahal beTaa
mujhe aisaa lagaa thaa chal pa.Dii dil kii mire dha.Dkan
qadam do chaar le kar tum jo ik-dam la.Dkha.Daa.ii thii.n
mirii saa.nse.n mire siine ke andar thartharaa.ii thii.n
mirii godii me.n rafta rafta din guzraa kiye aur tum
na jaane sote sote mere siine par javaanii tak
mirii jaa.n aaj aa.ii ho
tumhe.n mujh se shikaayat hai
ki mai.n ne saKHtiyaa.n kii hai.n
mirii vo saKHtiyaa.n tum ko bahut ranjuur kartii thii.n
mujhe bhii ranj hotaa thaa
magar thii tarbiyat laazim
tumhe.n saa.nche me.n Dhalnaa thaa
tabii.at ko badalnaa thaa
tumhe.n sab yaad to hogaa
mirii beTii mire baazuu me.n vo quvvat nahii.n baaqii
tumhaarii har KHushii kii hai.n zamaanat dha.Dkane.n merii
magar ik mashvara sun lo
ki ab sab bhuul jaa.o tum
na.e rishte banaa.o tum
hamaaraa saath chhuuTegaa
na.e rishto.n ke merii jaa.n masaa.il kam nahii.n hoge
magar tab ham nahii.n ho.nge
akelii jaan hogii tum
faqat vo tarbiyat hogii
jo mai.n ne saKHtiyaa.n kar ke
tumhaare dil me.n Daalii hai
vo tum ko yaad to hogii
sabaq sab yaad to hogaa

Afeef Siraj
Nazm

mashwara

raato.n ko sone se pahle
na.ii puraanii yaado.n ko
ulaT-palaT karte rahnaa
varna kaalii pa.D jaa.e.ngii
idhar udhar se sa.D jaa.e.ngii

Mohammad Alvi
Nazm

bachpan ka wo zamana

aataa hai yaad mujh ko bachpan kaa vo zamaana
rahtaa thaa saath mere KHushiyo.n kaa jab KHazaana
har roz ghar me.n milte umda laziiz khaane
be-mehnat-o-mashaqqat haasil thaa aab-o-daana
bachcho.n ke saath rahnaa KHushiyo.n ke giit gaanaa
dil me.n na thii kuduurat thaa sab se dostaana
meh.ndii ke patte laanaa aur piis kar lagaanaa
phir surKH haath apne har ek ko dikhaanaa
aavaaz DugDugii kii juu.n hii sunaa.ii detii
us kii taraf lapaknaa bachcho.n kaa vaalihaana
har saal pyaare abbuu laate the ek bakraa
chaara use khilaanaa maidaan me.n ghumaanaa
vo duur jaa chukaa hai aataa nahii.n palaT kar
bachpan kaa vo zamaana lagtaa hai ik fasaana
daadii ko mai.n ne ik din ye mashvara diyaa thaa
chehre kii jhurriyo.n ko aasaan hai miTaanaa
chehre pe aap ke hai.n jo be-shumaar shikne.n
aayaa mirii samajh me.n un se najaat paanaa
kap.De kii saarii shikne.n miTtii hai.n istirii se
aasaan saa amal hai ye istirii chalaanaa
ik garm istirii ko chehre pe aap phere.n
umda hai meraa nusKHa hai shart aazmaanaa
ik roz vaalida se jaa kar kahaa kitchen me.n
ab chho.Diyegaa ammii ye roTiyaa.n pakaanaa
ik pe.D roTiyo.n kaa daalaan me.n lagaa.e.n
us pe.D ko kahe.nge roTii kaa kaarKHaana
shaaKHo.n se taaza taaza phir roTiyaa.n mile.ngii
to.De.nge roTiyaa.n ham khaa.e.nge ghar me.n khaanaa
kaisii ajiib baate.n aatii thii.n mere lab par
aaj un ko kah rahaa huu.n baate.n hai.n ahmaqaana
vo pyaarii pyaarii baate.n ab yaad aa rahii hai.n
bachpan kaa vo zamaana kyaa KHvaab thaa suhaanaa

Abdul Qadir
Nazm

tajdid

ab mire shaane se lag kar kis liye rotii ho tum
yaad hai tum ne kahaa thaa
''jab nigaaho.n me.n chamak ho
lafz jazbo.n ke asar se kaa.npte ho.n aur tanaffus
is tarah uljhe.n ki jismo.n kii thakan KHushbuu bane
to vo gha.Dii ahd-e-vafaa kii saa.at-e-naayaab hai
vo jo chupke se bichha.D jaate hai.n lamhe hai.n masaafat
jin kii KHaatir paa.nv par pahre biThaatii hai
nigaahe.n dhund ke pardo.n me.n un ko Dhuu.nDtii hai.n
aur samaa.at un kii miiThii narm aahaT ke liye
daaman bichhaatii hai''
aur vo lamha bhii tum ko yaad hogaa
jab havaa.e.n sard thii.n aur shaam ke maile kafan par haath rakh kar
tum ne lafzo.n aur ta'alluq ke na.e ma.anii bataa.e the, kahaa thaa
''har gha.Dii apnii jagah par saa.at-e-naayaab hai
haasil-e-umr-e-gurezaa.n ek bhii lamha nahii.n
lafz dhoka hai.n ki un kaa kaam iblaaG-e-ma.aanii ke alaava kuchh nahii.n
vaqt ma.anii hai jo har lahza na.e chehre badaltaa hai
jaane vaalaa vaqt saaya hai
ki jab tak jism hai ye aadmii ke saath chaltaa hai
yaad misl-e-nutq paagal hai ki is ke lafz ma.anii se tahii hai.n
ye jise tum Gam aziyyat dard aa.nsuu
dukh vaGaira kah rahe ho
ek lamhaatii ta.assur hai tumhaaraa vahm hai
tum ko meraa mashvara hai, bhuul jaa.o tum se ab tak
jo bhii kuchh mai.n ne kahaa hai''
ab mire shaane se lag kar kis liye rotii ho tum!

Amjad Islam Amjad
Nazm

brake up

ta.alluq
tark karnaa hai
ta.alluq
tark
kar lenaa
magar
vaise nahii.n
jaise
zamaana
tark
kartaa hai
dilo.n me.n
farq
kartaa hai
vafaa ko
Garq kartaa hai.n
ta.alluq
tark karnaa hai
ta.alluq
tark kar lenaa
magar
ik mashvara sun lo
ise tum iltijaa samjho
tumhe.n bas itnaa
karnaa hai
ki is
anjaam se pahle
meraa aaGaaz dohraa do
mujhe phir mujh se milvaa do
tumhe.n bas itnaa
karnaa hai
mohabbat
ke mahiine kii
vahii taariiKH chunnii hai
vahii
ik vaqt
rakhnaa hai
vahii
kap.De pahan.ne hai.n
vahii
KHushbuu lagaanii hai
jo pahle din lagaa.ii thii
mohabbat kii
vo
pahlii
muskuraahaT
saath laanii hai
usii cafe me.n aanaa hai
usii Table ko chun.naa hai
vahii coffee ma.ngaanii hai
ki jo us din ma.ngaa.ii thii
chamak
aa.nkho.n me.n
vo hii ho
khanak
baato.n me.n
vo hii ho
hathelii par
usii andaaz me.n
meh.ndii rachaa lenaa
ki jo
us din rachaa.ii thii
suno jaanaa.n
mohabbat kaa
miraa pahlaa
lifaafa
vo gulaabii KHat
use tum saath le aanaa
tumhaaraa
KHat
ki jis ke rang
ab tak
huu-ba-huu vo hai.n
use mai.n saath laa.uu.ngaa
lifaafe ham
badal le.nge
ta.alluq
tark kar le.nge
usii din
kii tarah
cafe se jaate vaqt
mu.D kar dekh paa.o to
ye tum par chho.Dtaa huu.n mai.n
ta.alluq to.Dtaa huu.n mai.n
jahaa.n se
ibtidaa kii thii
vahii.n par
intihaa karnaa
ta.alluq
tark karnaa hai
ta.alluq
tark
kar lenaa
magar
vaise nahii.n
jaise
zamaana
tark
kartaa hai

Siraj Faisal Khan
Nazm

ek aur mashwara

bastiyaa.n ho.n kaisii bhii pastiyaa.n ho.n jaisii bhii
har tarah kii zulmat ko raushnii kahaa jaa.e
KHaak Daale.n manzil par bhuul jaa.e.n saahil ko
ruKH jidhar ho paanii kaa us taraf bahaa jaa.e
mulk bech Daale.n yaa aabruu rakhe.n girvii
jaisaa hukm-e-haakim ho us tarah kiyaa jaa.e
shor me.n sadaa.o.n ke ajnabii havaa.o.n ke
kaun sun.ne vaalaa hai? kis se ab kahaa jaa.e!
guftuguu pe pahre hai.n har taraf kaTahre hai.n
raaste mu.ayyan hai.n har qadam pe likkhaa hai
kis jagah pe ruknaa hai! kis taraf chalaa jaa.e

Amjad Islam Amjad
Nazm

nazm-go ke liye mashwara

nazm kahoge
kah loge kyaa?
dekho itnaa sahl nahii.n hai
bantii baat biga.D jaatii hai
aksar nazm aka.D jaatii hai

Daniyal Tareer
Nazm

in kitabon mein band ujale hain

aadmii kaa vaqaar ilm se hai
zindagii kii bahaar ilm se hai
ilm se bahra-var jo hote hai.n
nekiyaa.n vo zamii.n me.n bote hai.n
ilm hai raushnii charaaG hai ilm
dil kii dha.Dkan hai aur dimaaG hai ilm
hai.n jo ilm-e-kitaab se mahruum
un ko duniyaa me.n kuchh nahii.n maaluum
un kaa jiinaa bhii hai ko.ii jiinaa
aa.nkh to hai magar hai.n naa-biinaa
jahl zulmat hai raushnii hai ilm
maut a.ndheraa hai zindagii hai ilm
jaise KHushbuu har ik gulaab me.n hai
ilm bhii band har kitaab me.n hai
ye kitaab aisii ek khetii hai
kuchh na kuchh aadmii ko detii hai
ilm se phuul dil kaa khiltaa hai
aagahii kaa suraaG miltaa hai
jaante hai.n jo pa.Dhne vaale hai.n
in kitaabo.n me.n band ujaale hai.n
duniyaa bhar kii zabaane.n boltii.n hai.n
zehn ke dar kitaab kholtii hai.n
jo kitaabo.n se duur rahte hai.n
umr bhar be-shu.uur rahte hai.n
sach to ye hai kitaab hai bhaa.ii
sab se behtar rafiiq-e-tanhaa.ii
meraa 'ejaaz' mashvara hai yahii
tum bhii jaa kar pa.Dho kitaab ko.ii

Ejaz Rahmani
Nazm

kash samajhdar na banun

siskii aur qahqaha
mai.n apne paa.nv tale se jannat nikaal kar
ba.Dii KHushii se tumhe.n sau.npne ke liye tayyaar huu.n
mai.n apne paa.nv me.n ba.ndhii grihastii kii be.Diyo.n ko
bas tho.Daa saa Dhiilaa kar rahii huu.n
ziyaada duur nahii.n jaa.uu.ngii
ek qahqaha lagaa kar ek siskii bhar kar
yaa ek nazm likh kar lauT aa.uu.ngii
mai.n aazaad aurat huu.n lekin
agar mere bachcho.n ke baalo.n me.n liikhe.n pa.D jaa.e.n
un kii gardan par pasiina milii miTTii nazar aa.e
mere khaano.n me.n masaalaho.n kii tartiib ga.Dba.D ho jaa.e
bachcho.n ke home-work kii copy par
not-done likhaa hu.aa aa jaa.e
ghar aa.e mehmaano.n ko KHush-aamdiid kahte hu.e
ek cup chaa.e bhii na pilaa sakuu.n
office se lauTte hu.e thake hu.e shauhar se
haal-ahvaal bhii na puuchhuu.n
to merii saa.nse.n ghuTTii hu.ii
aur qahqaha phaTii phaTii aa.nkhe.n
aur nazm adhuuraa KHvaab lagtii hai
KHudaa ne nubuvvat ataa karte hu.e imaam banaate hu.e
puurii qalandarii ataa karte hu.e
mujh par e'tibaar nahii.n kiyaa thaa
puurii qaum ko a.alaa nasl dene kii zimmedaarii
faqat merii hai
is aa.alii mansab par kaam karte karte
mai.n thak bhii to saktii huu.n
merii ittifaaqii ruKHsat manzuur ho chukii hai
mai.n jaa rahii huu.n ek siskii bharne ek qahqaha lagaane
aur ek nazm likhne ke liye
chhuTTii aKHlaaqii taur par manzuur hone ke baavajuud
ghar kii har chiiz ko mujh se shikaayat
kyuu.n hai
bachcho.n ke chehre par Gussa dekh kar sochtii huu.n
qahqaha ayyaashii aur siskii yaa aas hai
aur nazm paa.nv me.n chubhaa hu.aa kaa.nch kaa Tuk.Daa hai
merii maa.n kahtii hai
tum mujh se achchhii maa.n nahii.n ho
tum ajab ho ghar shauhar aur bachcho.n ke alaava
aur bhii kuchh chaahtii ho
merii beTii mere haath se qalam chhiin kar
kahtii hai french-fry banaa kar do
mai.n sochtii huu.n
merii beTii ko bhii jab
ek qahqahe nazm yaa tasviir ke liye
apnii zindagii kii tijorii se
kuchh pal darkaar ho.nge
to mai.n use kyaa mashvara duu.ngii
qahqaha bachpan kii bichh.Dii hu.ii sakhii
siskii haatho.n se u.Dtaa hu.aa panchhii
aur nazm gunaah hai

Ateeya Daud
Nazm

wo lamha

na do mashvara ham ko
ki zaraa sa.nbhal kar chalo
ab to har din merii holii
aur har raat diivaalii hai

Anita Mohan
Nazm

jaen kahan hum

tabii.at jo andar se jhunjhlaa rahii hai
to baahar se aavaaz ye aa rahii hai
ki ai faazil-e-dars-gaah-e-himaaqat
hijaabaat-e-daanish uThaa kar bhii dekho
sharaafat ke piichhe jigar ho gayaa KHuu.n
sharaafat se piichhaa chhu.Daa kar bhii dekho
azal se mohabbat KHudii kaa hai zindaa.n
ab is se zaraa baahar aa kar bhii dekho
muravvat ne pahnaa.ii hai.n be.Diyaa.n jo
zaraa un kaa lohaa ghulaa kar bhii dekho
tasavvur kii vaadii me.n bhaTkoge kab tak
kabhii shahr-e-imkaa.n me.n jaa kar bhii dekho
Garaz 'maz.harii' is dayaar-e-junuu.n me.n
milaa, kuchh na khone se paa kar bhii dekho
sunaa mashvara teraa ai saut-e-Gaibii
zalaalat kii sarhad me.n aa kar bhii dekhaa
rizaalat kii gardan me.n baa.nhe.n bhii Daalii.n
sharaafat se piichhaa chhu.Daa kar bhii dekhaa
hamiyyat kaa gho.nTaa galaa rafta rafta
mohabbat ko phaa.nsii cha.Dhaa kar bhii dekhaa
kaf-e-mor se us kaa luqma bhii chhiinaa
haq-e-ahl-e-KHidmat churaa kar bhii dekhaa
shu.uur o KHirad ko Guruur o hasad ko
sulaa kar bhii dekhaa jagaa kar bhii
phire kuu-ba-kuu aql kii rahbarii me.n
Garaz ye ki kho kar bhii, paa kar bhii dekhaa
na khone se haasil, na paane se haasil
jise suud kahte hai.n vo bhii ziyaa.n hai
yahii bas ki taqdiir-e-aql o junuu.n hai
yahii KHisht-e-ta.amiir-e-kaun-o-makaa.n hai
mohabbat jahannam hai, nafrat jahannam
jidhar jaa.e.n ik aag shola-fishaa.n hai
dayaar-e-vafaa yaa dayaar-e-havas ho
na raahat yahaa.n hai na raahat vahaa.n hai
sharaafat bhii Gam-gii.n rizaalat bhii Gam-gii.n
bas ab mu.nh na khulvaa KHudaa darmiyaa.n hai
samak se samaa tak tapish hii tapish hai
fazaa se KHalaa tak fuGaa.n hii fuGaa.n hai
KHudii paa.nv pak.De hai jaa.e.n kahaa.n ham
tasavvur kii jannat banaa.e.n kahaa.n ham

Jameel Mazhari
Nazm

mashwara

namii de kar jo miTTii ko
musalsal guu.ndhte ho tum
bataa.o kyaa banaa.oge
ko.ii kuuza ko.ii muurat yaa phir mahbuub kii suurat
suKHnavar huu.n kaho to mashvara ik duu.n
ye ghaaTe kaa hii saudaa hai
yahaa.n miTTii kii muurat kii agar aa.nkhe.n banaa.oge
tumhe.n aa.nkhe.n dikhaa.egii
taraashoge zabaan us kii to turshii jhel paa.oge
agar jo dil banaayaa to hazaaro.n KHvaahishe.n ban kar tumhe.n tum se hii maa.ngegii
ataa-e-KHil.at-e-ahmar use KHud-sar banaa degii
vahaa.n apnii mohabbat kaa jo naadir taaj pahnaayaa
KHudaa KHud ko hii samjhegii
abhii bhii vaqt hai maano
iraada multavii kar do
ise miTTii hii rahne do
ise miTTii hii rahne do

Safiya Chaudhry
Nazm

mashwara

mujhe ye Dar hai kisii aaftaab kii garmii
tirii nazar ke hazaar aa.ino.n ko to.D na de
mujhe ye vahm kisii maahtaab kii ThanDak
lahuu se garmii-e-fikr-o-amal nicho.D na le

Zehra Nigaah
Nazm

mashwara

merii mahbuub ye tauhiin-e-mohabbat hogii
bevafaa kah ke mire pyaar ko majruuh na kar
tujh ko shikva hai shikaayat hai gila hai mujh se
merii qismat kii tarah tuu bhii KHafaa hai mujh se
terii har baat hai tasliim
magar kahne de
daur-e-sarmaaya kii
ro.ndii hu.ii ik laash ham
zulm kii aag me.n
ma.asuum mohabbat jhulse
is se behtar hai ki
begaana banaa le.n KHud ko
lafz-dar-lafz
hikaayaat me.n kho jaa.e.n ham
kapkapaate hu.e ho.nTo.n pe tabassum rakh le.n
TimTimaatii hu.ii aa.nkho.n me.n tajallii bhar le.n
asr-e-haazir kaa
taqaazaa bhii yahii hai hamdam
apnii begaangii ko
apnaa muqaddar samjhe.n
tuu muqaddas hai
tire gird taqaddus kaa hisaar
mai.n ki
is ahd kaa
ik shaa.er-e-aashufta-e-mizaaj
mere hisse me.n
faqat
nazm Gazal aur ash.aar
mai.n bahar-haal
tire shauq kaa saamaan nahii.n
merii aa.nkho.n me.n hai.n TuuTe hu.e
lafzo.n ke nuquush
mere ho.nTo.n pe hai.n
bikhre hu.e maazii ke huruuf
sach to ye hai ki miraa tujh se ko.ii mel nahii.n
ishq me.araaj-e-muqaddar hai ko.ii khel nahii.n

Asad Rizvi
Nazm

mashwara

merii mahbuub ye aa.nsuu hai.n ki motii ruKH par
un ko is tarah na bekaar ga.nvaa maan bhii jaa
abhii jalne de ye siina abhii phaTne de dimaaG
aatish-e-Gam ko na ashko.n se bujhaa maan bhii jaa

Daud Ghazi
Nazm

mashwara

aatish-e-be-suud me.n mat kuud ho kar be-KHatar
mat ga.nvaa yuu.n muft me.n aazaadii-e-qalb-o-jigar
jab tirii qismat me.n ba.ngla hai na gaa.Dii hai na zar
KHaana-aabaadii kaa phir ye kyuu.n taraddud is qadar
aarzuu terii bajaa merii nasiihat hai magar
ai mare hamdam KHudaa ke vaaste shaadii na kar

Asad Jafri
Nazm

wo baat

mai.n chaahtaa huu.n
ki mashvara bhii karuu.n kisii se
pe aql-e-insaan
(aql-e-nsaqis)
har ek pahluu pe Gaur
KHud ek maz.haka hai
yahaa.n se aage jo marhala hai
vo fahm-e-insaa.n se maavaraa hai
KHayaal aataa hai akasr akasr
KHaliifatul-arz huu.n
isii sat.h par jo suljhaa.uu.n baat ko mai.n
magar KHilaafat ko kyaa vilaayat milii hu.ii hai
maziid ye kyaa avaam o ashraaf kii himaayat milii hu.ii hai
agar nahii.n to ye juzv-e-afkaar kis liye hai
ye fikr-e-be-kaar kis liye hai

Shahram Sarmadi
Nazm

aadhi maut ka janm

masiihaa ne apne nusKHe me.n
merii tahliil kii tajviiz likhii hai
baabaa ne mere dobaara janm kaa mashvara maa.ngaa
aur maa.n ne mere be-naam katbe ko aa.nsu.o.n se saaf kiyaa
tab
mere adhuure aur puure janm kaa faisla mujh par chho.D diyaa gayaa
do qabro.n me.n bane vajuud kaa taKHmiina lagaate hu.e
sochtaa huu.n
kyaa karuu.n?
marne ke liye jii uThuu.n?
yaa jiine ke liye multavii ho jaa.u.n?
pyaare ristho!
mai.n ek taraf du.aa.o.n ke kafan me.n lipTaa pa.Daa huu.n
aur duusrii taraf
mere sirhaane suuraj-mukhii kaa phuul dharaa hai

Anjum Saleemi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now