Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "mukhbar"

Nazm MATCHES FOR "mukhbar"

Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

kabhi kabhi

kabhii kabhii mire dil me.n KHayaal aataa hai
ki zindagii tirii zulfo.n kii narm chhaa.nv me.n
guzarne paatii to shaadaab ho bhii saktii thii
ye tiirgii jo mirii ziist kaa muqaddar hai
tirii nazar kii shu.aa.o.n me.n kho bhii saktii thii
ajab na thaa ki mai.n begaana-e-alam ho kar
tire jamaal kii ra.anaa.iyo.n me.n kho rahtaa
tiraa gudaaz-badan terii niim-baaz aa.nkhe.n
inhii hasiin fasaano.n me.n mahv ho rahtaa
pukaartii.n mujhe jab talKHiyaa.n zamaane kii
tire labo.n se halaavat ke ghuu.nT pii letaa
hayaat chiiKHtii phirtii barahna sar aur mai.n
ghanerii zulfo.n ke saa.e me.n chhup ke jii letaa
magar ye ho na sakaa aur ab ye aalam hai
ki tuu nahii.n tiraa Gam terii justujuu bhii nahii.n
guzar rahii hai kuchh is tarah zindagii jaise
ise kisii ke sahaare kii aarzuu bhii nahii.n
zamaane bhar ke dukho.n ko lagaa chukaa huu.n gale
guzar rahaa huu.n kuchh an-jaanii rahguzaaro.n se
muhiib saa.e mirii samt ba.Dhte aate hai.n
hayaat o maut ke pur-haul KHaarzaaro.n se
na ko.ii jaada-e-manzil na raushnii kaa suraaG
bhaTak rahii hai KHalaa.o.n me.n zindagii merii
inhii KHalaa.o.n me.n rah jaa.uu.ngaa kabhii kho kar
mai.n jaantaa huu.n mirii ham-nafas magar yuu.nhii
kabhii kabhii mire dil me.n KHayaal aataa hai

Sahir Ludhianvi
Nazm

aurat

uTh mirii jaan mire saath hii chalnaa hai tujhe
qalb-e-maahaul me.n larzaa.n sharar-e-ja.ng hai.n aaj
hausle vaqt ke aur ziist ke yak-ra.ng hai.n aaj
aabgiino.n me.n tapaa.n valvala-e-sa.ng hai.n aaj
husn aur ishq ham-aavaaz o ham-aaha.ng hai.n aaj
jis me.n jaltaa huu.n usii aag me.n jalnaa hai tujhe
uTh mirii jaan mire saath hii chalnaa hai tujhe
tere qadmo.n me.n hai firdaus-e-tamaddun kii bahaar
terii nazro.n pe hai tahziib o taraqqii kaa madaar
terii aaGosh hai gahvaara-e-nafs-o-kirdaar
taa-ba-kai gird tire vahm o ta.ayyun kaa hisaar
kau.nd kar majlis-e-KHalvat se nikalnaa hai tujhe
uTh mirii jaan mire saath hii chalnaa hai tujhe
tuu ki be-jaan khilauno.n se bahal jaatii hai
taptii saa.nso.n kii haraarat se pighal jaatii hai
paa.nv jis raah me.n rakhtii hai phisal jaatii hai
ban ke siimaab har ik zarf me.n Dhal jaatii hai
ziist ke aahanii saa.nche me.n bhii Dhalnaa hai tujhe
uTh mirii jaan mire saath hii chalnaa hai tujhe
zindagii jehd me.n hai sabr ke qaabuu me.n nahii.n
nabz-e-hastii kaa lahuu kaa.npte aa.nsuu me.n nahii.n
u.Dne khulne me.n hai nik.hat KHam-e-gesuu me.n nahii.n
jannat ik aur hai jo mard ke pahluu me.n nahii.n
us kii aazaad ravish par bhii machalnaa hai tujhe
uTh mirii jaan mire saath hii chalnaa hai tujhe
goshe goshe me.n sulagtii hai chitaa tere liye
farz kaa bhes badaltii hai qazaa tere liye
qahr hai terii har ik narm adaa tere liye
zahr hii zahr hai duniyaa kii havaa tere liye
rut badal Daal agar phuulnaa phalnaa hai tujhe
uTh mirii jaan mire saath hii chalnaa hai tujhe
qadr ab tak tirii taariiKH ne jaanii hii nahii.n
tujh me.n sho.ale bhii hai.n bas ashk-fishaanii hii nahii.n
tuu haqiiqat bhii hai dilchasp kahaanii hii nahii.n
terii hastii bhii hai ik chiiz javaanii hii nahii.n
apnii taariiKH kaa unvaan badalnaa hai tujhe
uTh mirii jaan mire saath hii chalnaa hai tujhe
to.D kar rasm kaa but band-e-qadaamat se nikal
zof-e-ishrat se nikal vahm-e-nazaakat se nikal
nafs ke khii.nche hu.e halqa-e-azmat se nikal
qaid ban jaa.e mohabbat to mohabbat se nikal
raah kaa KHaar hii kyaa gul bhii kuchalnaa hai tujhe
uTh mirii jaan mire saath hii chalnaa hai tujhe
to.D ye azm-shikan daGdaGa-e-pand bhii to.D
terii KHaatir hai jo zanjiir vo saugand bhii to.D
tauq ye bhii hai zamurrad kaa guluu-band bhii to.D
to.D paimaana-e-mardaan-e-KHirad-mand bhii to.D
ban ke tuufaan chhalaknaa hai ubalnaa hai tujhe
uTh mirii jaan mire saath hii chalnaa hai tujhe
tuu falaatuun o arastuu hai tuu zahraa parvii.n
tere qabze me.n hai garduu.n tirii Thokar me.n zamii.n
haa.n uThaa jald uThaa paa-e-muqaddar se jabii.n
mai.n bhii rukne kaa nahii.n vaqt bhii rukne kaa nahii.n
la.Dkha.Daa.egii kahaa.n tak ki sambhalnaa hai tujhe
uTh mirii jaan mire saath hii chalnaa hai tujhe

Kaifi Azmi
Nazm

daraKHt-e-zard

mujhe is shaam hai apne labo.n par ik suKHan laanaa
'alii' darvesh thaa tum us ko apnaa jadd na batlaanaa
vo sibtain-e-mohamaad, jin ko jaane kyuu.n bahut arfa.a
tum un kii duur kii nisbat se bhii yaksar mukar jaanaa
ki is nisbat se zahar o zaKHm ko sahnaa zaruurii hai
ajab Gairat se Galtiida-ba-KHuu.n rahnaa zaruurii hai

Jaun Eliya
Nazm

do ishq

ummiid ki lau jaagaa Gam-e-dil kaa nasiiba
lo shauq kii tarsii hu.ii shab ho ga.ii aaKHir
lo Duub ga.e dard ke be-KHvaab sitaare
ab chamkegaa be-sabr nigaaho.n kaa muqaddar

Faiz Ahmad Faiz
Nazm

log aurat ko faqat jism samajh lete hain

ik bujhii ruuh luTe jism ke Dhaa.nche me.n liye
sochtii huu.n mai.n kahaa.n jaa ke muqaddar pho.Duu.n

Sahir Ludhianvi
Nazm

sapna aage jata kaise

chhoTaa saa ik gaa.nv thaa jis me.n
diye the kam aur bahut a.ndheraa
bahut shajar the tho.De ghar the
jin ko thaa duurii ne gheraa
itnii ba.Dii tanhaa.ii thii jis me.n
jaagtaa rahtaa thaa dil meraa
bahut qadiim firaaq thaa jis me.n
ek muqarrar had se aage
soch na saktaa thaa dil meraa
aisii suurat me.n phir dil ko
dhyaan aataa kis KHvaab me.n teraa
raaz jo had se baahar me.n thaa
apnaa-aap dikhaataa kaise
sapne kii bhii had thii aaKHir
sapnaa aage jaataa kaise

Muneer Niyazi
Nazm

mata-e-ghair

mere KHvaabo.n ke jharoko.n ko sajaane vaalii
tere KHvaabo.n me.n kahii.n meraa guzar hai ki nahii.n
puuchh kar apnii nigaaho.n se bataa de mujh ko
merii raato.n ke muqaddar me.n sahar hai ki nahii.n

Sahir Ludhianvi
Nazm

parchhaiyan

tum aaj hazaaro.n miil yahaa.n se duur kahii.n tanhaa.ii me.n
yaa bazm-e-tarab-aaraa.ii me.n
mere sapne buntii ho.ngii baiThii aaGosh paraa.ii me.n
aur mai.n siine me.n Gam le kar din-raat mashaqqat kartaa huu.n
jiine kii KHaatir martaa huu.n
apne fan ko rusvaa kar ke aGyaar kaa daaman bhartaa huu.n
majbuur huu.n mai.n majbuur ho tum majbuur ye duniyaa saarii hai
tan kaa dukh man par bhaarii hai
is daur me.n jiine kii qiimat yaa daar-o-rasan yaa KHvaarii hai
mai.n daar-o-rasan tak jaa na sakaa tum jehd kii had tak aa na sakii.n
chaahaa to magar apnaa na sakii.n
ham to do aisii ruuhe.n hai.n jo manzil-e-taskii.n paa na sake.n
jiine ko jiye jaate hai.n magar saa.nso.n me.n chitaae.n jaltii hai.n
KHaamosh vafaa.e.n jaltii hai.n
sangiin haqaa.iq-zaaro.n me.n KHvaabo.n kii ridaa.e.n jaltii hai.n
aur aaj jab in pe.Do.n ke tale phir do saa.e lahraa.e hai.n
phir do dil milne aa.e hai.n
phir maut kii aa.ndhii uTThii hai phir ja.ng ke baadal chhaa.e hai.n
mai.n soch rahaa huu.n in kaa bhii apnii hii tarah anjaam na ho
in kaa bhii junuu.n naakaam na ho
in ke bhii muqaddar me.n likhii ik KHuun me.n lith.Dii shaam na ho
suuraj ke lahuu me.n lith.Dii hu.ii vo shaam hai ab tak yaad mujhe
chaahat ke sunahre KHvaabo.n kaa anjaam hai ab tak yaad mujhe
hamaaraa pyaar havaadis kii taab laa na sakaa
magar unhe.n to muraado.n kii raat mil jaa.e
hame.n to kashmakash-e-marg-e-be-amaa.n hii milii
unhe.n to jhuumtii gaatii hayaat mil jaa.e
bahut dino.n se hai ye mashGala siyaasat kaa
ki jab javaan ho.n bachche to qatl ho jaa.e.n
bahut dino.n se ye hai KHabt hukmaraano.n kaa
ki duur duur ke mulko.n me.n qaht bo jaa.e.n
bahut dino.n se javaanii ke KHvaab viiraa.n hai.n
bahut dino.n se sitam-diida shaah-raaho.n me.n
nigaar-e-ziist kii ismat panaah Dhuu.nDhtii hai
chalo ki aaj sabhii paa.emaal ruuho.n se
kahe.n ki apne har ik zaKHm ko zabaa.n kar le.n
hamaaraa raaz hamaaraa nahii.n sabhii kaa hai
chalo ki saare zamaane ko raaz-daa.n kar le.n
chalo ki chal ke siyaasii muqaamiro.n se kahe.n
ki ham ko jang-o-jadal ke chalan se nafrat hai
jise lahuu ke sivaa ko.ii rang raas na aa.e
hame.n hayaat ke us pairahan se nafrat hai
kaho ki ab ko.ii qaatil agar idhar aayaa
to har qadam pe zamii.n tang hotii jaa.egii
har ek mauj-e-havaa ruKH badal ke jhapTegii
har ek shaaKH rag-e-sa.ng hotii jaa.egii
uTho ki aaj har ik jang-juu se ye kah de.n
ki ham ko kaam kii KHaatir kalo.n kii haajat hai
hame.n kisii kii zamii.n chhiin.ne kaa shauq nahii.n
hame.n to apnii zamii.n par halo.n kii haajat hai
kaho ki ab ko.ii taajir idhar kaa ruKH na kare
ab is jagah ko.ii ku.nvaarii na bechii jaa.egii
ye khet jaag pa.De uTh kha.Dii hu.ii.n fasle.n
ab is jagah ko.ii kyaarii na bechii jaa.egii
ye sar-zamiin hai gautam kii aur naanak kii
is arz-e-paak pe vahshii na chal sake.nge kabhii
hamaaraa KHuun amaanat hai nasl-e-nau ke liye
hamaare KHuun pe lashkar na pal sake.nge kabhii
kaho ki aaj bhii ham sab agar KHamosh rahe
to is damakte hu.e KHaak-daa.n kii KHair nahii.n
junuu.n kii Dhaalii hu.ii atomii balaa.o.n se
zamii.n kii KHair nahii.n aasmaa.n kii KHair nahii.n
guzishta jang me.n ghar hii jale magar is baar
ajab nahii.n ki ye tanhaa.iyaa.n bhii jal jaa.e.n
guzishta ja.ng me.n paikar jale magar is baar
ajab nahii.n ki ye parchhaa.iyaa.n bhii jal jaa.e.n
tasavvuraat kii parchhaa.iyaa.n ubhartii hai.n

Sahir Ludhianvi
Nazm

iblis ki majlis-e-shura

ibliis
ye anaasir kaa puraanaa khel ye duniyaa-e-duu.n
saakinaan-e-arsh-e-aazam kii tamannaa.o.n kaa KHuu.n
is kii barbaadii pe aaj aamaada hai vo kaarsaaz
jis ne is kaa naam rakhaa thaa jahaan-e-kaaf-o-nuu.n
mai.n ne dikhlaayaa fara.ngii ko muluukiyat kaa KHvaab
mai.n ne to.Daa masjid-o-dair-o-kaliisaa kaa fusuu.n
mai.n ne naadaaro.n ko sikhlaayaa sabaq taqdiir kaa
mai.n ne mun.im ko diyaa sarmaaya daarii kaa junuu.n
kaun kar saktaa hai is kii aatish-e-sozaa.n ko sard
jis ke ha.ngaamo.n me.n ho ibliis kaa soz-e-daruu.n
jis kii shaaKHe.n ho.n hamaarii aabiyaarii se buland
kaun kar saktaa hai is naKHl-e-kuhan ko sar-niguu.n
pahlaa mushiir
is me.n kyaa shak hai ki mohkam hai ye ibliisii nizaam
puKHta-tar is se hu.e KHuu-e-Gulaamii me.n avaam
hai azal se in Gariibo.n ke muqaddar me.n sujuud
in kii fitrat kaa taqaazaa hai namaaz-e-be-qayaam
aarzuu avval to paidaa ho nahii.n saktii kahii.n
ho kahii.n paidaa to mar jaatii hai yaa rahtii hai KHaam
ye hamaarii sa.ii-e-paiham kii karaamat hai ki aaj
suufii-o-mullaa muluukiyyat ke bande hai.n tamaam
tab-e-mashriq ke liye mauzuu.n yahii afyuun thii
varna qavvaalii se kuchh kam-tar nahii.n ilm-e-kalaam
hai tavaaf-o-haj kaa ha.ngaama agar baaqii to kyaa
kund ho kar rah ga.ii momin kii teG-e-be-niyaam
kis kii nau-miidii pe hujjat hai ye farmaan-e-jadiid
hai jihaad is daur me.n mard-e-musalmaa.n par haraam
duusraa mushiir
KHair hai sulataanii-e-jamhuur kaa GauGaa ki shar
tuu jahaa.n ke taaza fitno.n se nahii.n hai baa-KHabar
pahlaa mushiir
huu.n magar merii jahaa.n-biinii bataatii hai mujhe
jo muluukiyat kaa ik parda ho kyaa is se KHatar
ham ne KHud shaahii ko pahnaayaa hai jamhuurii libaas
jab zaraa aadam hu.aa hai KHud-shanaas-o-KHud-nigar
kaarobaar-e-shahryaarii kii haqiiqat aur hai
ye vajuud-e-miir-o-sultaa.n par nahii.n hai munhasir
majlis-e-millat ho yaa parvez kaa darbaar ho
hai vo sultaa.n Gair kii khetii pe ho jis kii nazar
tuu ne kyaa dekhaa nahii.n maGrib kaa jamhuurii nizaam
chehra raushan andaruu.n cha.ngez se taariik-tar
tiisraa mushiir
ruuh-e-sultaanii rahe baaqii to phir kyaa iztiraab
hai magar kyaa is yahuudii kii sharaarat kaa javaab
vo kaliim-e-be-tajallii vo masiih-e-be-saliib
niist paiGambar va-lekin dar baGal daarad kitaab
kyaa bataa.uu.n kyaa hai kaafir kii nigaah-e-parda-soz
mashriq-o-maGrib kii qaumo.n ke liye roz-e-hisaab
is se ba.Dh kar aur kyaa hogaa tabii.at kaa fasaad
to.D dii bando.n ne aaqaa.o.n ke KHemo.n kii tanaab
chauthaa mushiir
to.D is kaa ruumat-ul-kubraa ke aivaano.n me.n dekh
aal-e-ceaser ko dikhaayaa ham ne phir ceaser kaa KHvaab
kaun bahr-e-ruum kii maujo.n se hai lipTaa hu.aa
gaah baalad-chuu.n-sanobar gaah naalad-chuu.n-rubaab
tiisraa mushiir
mai.n to is kii aaqibat-biinii kaa kuchh qaa.il nahii.n
jis ne afra.ngii siyaasat ko kyaa yuu.n be-hijaab
paa.nchvaa.n mushiir ibliis ko muKHaatab kar ke
ai tire soz-e-nafas se kaar-e-aalam ustuvaar
tuu ne jab chaahaa kiyaa har pardagii ko aashkaar
aab-o-gil terii haraarat se jahaan-e-soz-o-saaz
ablah-e-jannat tirii ta.aliim se daanaa-e-kaar
tujh se ba.Dh kar fitrat-e-aadam kaa vo mahram nahii.n
saada-dil bando.n me.n jo mash.huur hai parvardigaar
kaam thaa jin kaa faqat taqdiis-o-tasbiih-o-tavaaf
terii Gairat se abad tak sar-niguu.n-o-sharmsaar
garche hai.n tere muriid afra.ng ke saahir tamaam
ab mujhe un kii faraasat par nahii.n hai e'tibaar
vo yahuudii fitna-gar vo ruuh-e-mazdak kaa buruuz
har qabaa hone ko hai is ke junuu.n se taar taar
zaaG dashtii ho rahaa hai ham-sar-e-shaahiin-o-charG
kitnii sur.at se badaltaa hai mizaaj-e-rozgaar
chhaa ga.ii aashufta ho kar vus.at-e-aflaak par
jis ko naadaanii se ham samjhe the ik musht-e-Gubaar
fitna-e-fardaa kii haibat kaa ye aalam hai ki aaj
kaa.npte hai.n kohsaar-o-murG-zaar-o-juu.ebaar
mere aaqaa vo jahaa.n zer-o-zabar hone ko hai
jis jahaa.n kaa hai faqat terii siyaadat par madaar

Allama Iqbal
Nazm

ek laDka

KHudaa-e-izz-o-jal kii nemato.n kaa mo'tarif huu.n mai.n
mujhe iqraar hai us ne zamii.n ko aise phailaayaa
ki jaise bistar-e-kam-KHvaab ho diibaa-o-maKHmal ho
mujhe iqraar hai ye KHema-e-aflaak kaa saaya
usii kii baKHshishe.n hai.n us ne suuraj chaa.nd taaro.n ko
fazaa.o.n me.n sa.nvaaraa ik had-e-faasil muqarrar kii
chaTaane.n chiir kar dariyaa nikaale KHaak-e-asfal se
mirii taKHliiq kii mujh ko jahaa.n kii paasbaanii dii
samundar motiyo.n muu.ngo.n se kaane.n la.al-o-gauhar se
havaa.e.n mast-kun KHushbu.o.n se ma.amuur kar dii hai.n
vo haakim qaadir-e-mutlaq hai yaktaa aur daanaa hai
a.ndhere ko ujaale se judaa kartaa hai KHud ko mai.n
agar pahchaantaa huu.n us kii rahmat aur saKHaavat hai
usii ne khusravii dii hai la.iimo.n ko mujhe nakbat
usii ne yaava-goyo.n ko miraa KHaazin banaayaa hai
tava.ngar hirzah-kaaro.n ko kiyaa daryuuza-gar mujh ko
magar jab jab kisii ke saamne daaman pasaaraa hai
ye la.Dkaa puuchhtaa hai aKHtar-ul-iimaan tum hii ho

Akhtarul Iman
Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal
Nazm

hamdard

ai dil un aa.nkho.n par na jaa
jin me.n vafuur-e-ra.nj se
kuchh der ko tere liye
aa.nsuu agar lahraa ga.e
ye chand lamho.n kii chamak
jo tujh ko paagal kar ga.ii
in jugnu.o.n ke nuur se
chamkii hai kab vo zindagii
jis ke muqaddar me.n rahii
sub.h-e-talab se tiirgii

Ahmad Faraz
Nazm

us aangan ka chand

chanchal muskaatii muskaatii gorii kaa mukh.Daa mahtaab
patjha.D ke pe.Do.n me.n aTkaa piilaa saa ik pattaa chaa.nd

Ibn۔e۔Insha
Nazm

self made logon ka alamiya

self made logo.n kaa alamiya
raushnii mizaajo.n kaa kyaa ajab muqaddar hai
zindagii ke raste me.n bichhne vaale kaa.nTo.n ko
raah se haTaane me.n
ek ek tinke se aashiyaa.n banaane me.n
KHushbu.e.n paka.Dne me.n gulistaa.n sajaane me.n
umr kaaT dete hai.n
umr kaaT dete hai.n
aur apne hisse ke phuul baa.nT dete hai.n
kaisii kaisii KHvaahish ko qatl karte jaate hai.n
darguzar ke gulshan me.n abr ban ke rahte hai.n
sabr ke samundar me.n kashtiyaa.n chalaate hai.n
ye nahii.n ki un ko is roz-o-shab kii kaahish kaa
kuchh sila nahii.n miltaa
marne vaalii aaso.n kaa KHuu.n-bahaa nahii.n miltaa
zindagii ke daaman me.n jis qadar bhii KHushiyaa.n hai.n
sab hii haath aatii hai.n
sab hii mil bhii jaatii hai.n
vaqt par nahii.n miltii.n vaqt par nahii.n aatii.n
yaanii un ko mehnat kaa ajr mil to jaataa hai
lekin is tarah jaise
qarz kii raqam ko.ii qist qist ho jaa.e
asl jo ibaarat ho pas navisht ho jaa.e
fasl-e-gul ke aaKHir me.n phuul un ke khulte hai.n
un ke sahn me.n suuraj der me.n nikalte hai.n

Amjad Islam Amjad
Nazm

KHadsha

ye chaa.ndnii me.n dhule paa.nv jab bhii raqs kare.n
fazaa me.n an-gine ghu.ngruu chhanakne lagte hai.n
ye paa.nv jab kisii raste me.n rang barsaa.e.n
to mausamo.n ke muqaddar chamakne lagte hai.n

Mohsin Naqvi
Nazm

ramayan ka ek scene

ruKHsat hu.aa vo baap se le kar KHudaa kaa naam
raah-e-vafaa kii manzil-e-avval hu.ii tamaam
manzuur thaa jo maa.n kii ziyaarat kaa intizaam
daaman se ashk po.nchh ke dil se kiyaa kalaam
iz.haar-e-be-kasii se sitam hogaa aur bhii
dekhaa hame.n udaas to Gam hogaa aur bhii
dil ko sa.nbhaaltaa hu.aa aaKHir vo naunihaal
KHaamosh maa.n ke paas gayaa suurat-e-KHayaal
dekhaa to ek dar me.n hai baiThii vo KHasta-haal
saktaa saa ho gayaa hai ye hai shiddat-e-malaal
tan me.n lahuu kaa naam nahii.n zard rang hai
goyaa bashar nahii.n ko.ii tasviir-e-sa.ng hai
kyaa jaane kis KHayaal me.n gum thii vo be-gunaah
nuur-e-nazar ye diida-e-hasrat se kii nigaah
jumbish hu.ii labo.n ko bharii ek sard aah
lii gosha-ha-e-chashm se ashko.n ne ruKH kii raah
chehre kaa rang haalat-e-dil kholne lagaa
har muu-e-tan zabaa.n kii tarah bolne lagaa
aaKHir asiir-e-yaas kaa qufl-e-dahan khulaa
afsaana-e-shadaa.id-e-ra.nj-o-mehan khulaa
ik daftar-e-mazaalim-e-charKH-e-kuhan khulaa
vaa thaa dahaan-e-zaKHm ki baab-e-suKHan khulaa
dard-e-dil-e-Gariib jo sarf-e-bayaa.n hu.aa
KHuun-e-jigar kaa rang suKHan se 'ayaa.n hu.aa
ro kar kahaa KHamosh kha.De kyuu.n ho merii jaa.n
mai.n jaantii huu.n jis liye aa.e ho tum yahaa.n
sab kii KHushii yahii hai to sahraa ko ho ravaa.n
lekin mai.n apne mu.nh se na hargiz kahuu.ngii haa.n
kis tarah ban me.n aa.nkho.n ke taare ko bhej duu.n
jogii banaa ke raaj-dulaare ko bhej duu.n
duniyaa kaa ho gayaa hai ye kaisaa lahuu sapiid
andhaa kiye hu.e hai zar-o-maal kii umiid
anjaam kyaa ho ko.ii nahii.n jaantaa ye bhed
soche bashar to jism ho larzaa.n misaal-e-biid
likkhii hai kyaa hayaat-e-abad in ke vaaste
phailaa rahe hai.n jaal ye kis din ke vaaste
letii kisii faqiir ke ghar me.n agar janam
hote na merii jaan ko saamaan ye baham
Dastaa na saa.np ban ke mujhe shaukat-o-hasham
tum mere laal the mujhe kis saltanat se kam
mai.n KHush huu.n phuu.nk de ko.ii is taKHt-o-taaj ko
tum hii nahii.n to aag lagaa duu.ngii raaj ko
kin kin riyaazato.n se guzaare hai.n maah-o-saal
dekhii tumhaarii shakl jab ai mere naunihaal
puuraa hu.aa jo byaah kaa armaan thaa kamaal
aafat ye aa.ii mujh pe hu.e jab safed baal
chhaTtii huu.n un se jog liyaa jin ke vaaste
kyaa sab kiyaa thaa mai.n ne isii din ke vaaste
aise bhii naa-muraad bahut aa.e.nge nazar
ghar jin ke be-charaaG rahe aah 'umr bhar
rahtaa miraa bhii naKHl-e-tamannaa jo be-samar
ye jaa-e-sabr thii ki du'aa me.n nahii.n asar
lekin yahaa.n to ban ke muqaddar biga.D gayaa
phal phuul laa ke baaG-e-tamannaa uja.D gayaa
sarzad hu.e the mujh se KHudaa jaane kyaa gunaah
ma.njdhaar me.n jo yuu.n mirii kashtii hu.ii tabaah
aatii nazar nahii.n ko.ii amn-o-amaa.n kii raah
ab yaa.n se kuuch ho to 'adam me.n mile panaah
taqsiir merii KHaaliq-e-aalam bahal kare
aasaan mujh Gariib kii mushkil ajal kare
sun kar zabaa.n se maa.n kii ye fariyaad-e-dard-KHez
us KHasta-jaa.n ke dil pe chalii Gam kii teG-e-tez
'aalam ye thaa qariib ki aa.nkhe.n ho.n ashk-rez
lekin hazaar zabt se rone se kii gurez
sochaa yahii ki jaan se bekas guzar na jaa.e
naashaad ham ko dekh ke maa.n aur mar na jaa.e
phir arz kii ye maadar-e-naashaad ke huzuur
maayuus kyuu.n hai.n aap alam kaa hai kyuu.n vafuur
sadma ye shaaq 'aalam-e-piirii me.n hai zaruur
lekin na dil se kiijiye sabr-o-qaraar duur
shaayad KHizaa.n se shakl 'ayaa.n ho bahaar kii
kuchh maslahat isii me.n ho parvardigaar kii
ye jaa'l ye fareb ye saazish ye shor-o-shar
honaa jo hai sab us ke bahaane hai.n sar-ba-sar
asbaab-e-zaahirii me.n na in par karo nazar
kyaa jaane kyaa hai parda-e-qudrat me.n jalva-gar
KHaas us kii maslahat ko.ii pahchaantaa nahii.n
manzuur kyaa use hai ko.ii jaantaa nahii.n
raahat ho yaa ki ranj KHushii ho ki intishaar
vaajib har ek rang me.n hai shukr-e-kird-gaar
tum hii nahii.n ho kushta-e-naira.ng-e-rozgaar
maatam-kade me.n dahr ke laakho.n hai.n sogvaar
saKHtii sahii nahii.n ki uThaa.ii ka.Dii nahii.n
duniyaa me.n kyaa kisii pe musiibat pa.Dii nahii.n

Chakbast Braj Narayan
Nazm

shahr-nama

ko.ii tishna-lab hii na thaa yahaa.n
jo pukaartaa ki idhar udhar
sabhii muft-bar the tamaash-bii.n
ko.ii bazm me.n ko.ii baam par

Ahmad Faraz
Nazm

zabta

na de sakegii sahaaraa tumhe.n ko.ii tadbiir
fanaa tumhaaraa muqaddar baqaa mirii taqdiir

Habib Jalib
Nazm

raat sunsan hai

sub.h kyaa jaane kahaa.n hotii hai kab hotii hai
jaane insaan ne kis vaqt ye ne.amat paa.ii
merii qismat me.n bas ik silsila-e-shaam-o-sahar
mere kamre ke muqaddar me.n faqat tanhaa.ii

Mustafa Zaidi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now