Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "night"

Nazm MATCHES FOR "night"

Nazm

tu nahin jaanti

tere ho.nTo.n se bahtii hu.ii ye ha.nsii
do-jahaano.n pe naafiz na hone kaa baa.is
tire haath hai.n
jin ko tuu ne hamesha labo.n par rakhaa muskuraate hu.e
tuu nahii.n jaantii
nii.nd kii goliyaa.n kyo.n banaa.ii ga.ii.n
log kyo.n raat ko uTh ke rote hai.n sote nahii.n
tuu ne ab tak ko.ii shab agar jaagte bhii guzaarii
to vo barbie night thii
tujh ko kaise bataa.uu.n
ki terii sadaa ke ta'aaqub me.n
mai.n kaise dariyaa.o.n sahraa.o.n aur jangalo.n se guzartaa hu.aa
ek aisii jagah jaa giraa thaa
jahaa.n pe.D kaa suukhnaa 'aam sii baat thii
jahaa.n un charaaGo.n ko jalne kii ujrat nahii.n mil rahii thii
jahaa.n la.Dkiyo.n ke badan sirf KHushbuu banaane ke kaam aate the
jahaa.n ek maa'suum bachcha parinde paka.Dne ke saare hunar jaantaa thaa
mujh ko maa'luum thaa
teraa aise jahaa.n aisii duniyaa se ko.ii ta'alluq nahii.n
tuu nahii.n jaantii
kitnii aa.nkhe.n tujhe dekhte dekhte bujh ga.ii.n
kitne kurte tire haath se istirii ho ke jalne kii KHvaahish me.n khuu.nTii se laTke rahe
kitne lab tere maathe ko tarse
kitnii shahraahe.n is shauq me.n phaT ga.ii hai.n
ki tuu un ke siine pe paa.nv dhare
mai.n tujhe Dhuu.nDte Dhuu.nDhte thak gayaa huu.n
ab mujhe terii maujuudgii chaahiye
apne saaTan me.n sahme hu.e surKH pairo.n ko ab mere haatho.n pe rakh
mai.n ne chakhnaa hai in kaa namak

Tahzeeb Hafi
Nazm

good-night

nii.nd mere aasaab pe savaar ho chukii hai
umiid ne daaman jhaTak kar
dahliiz par uu.nghtii hu.ii aa.nkho.n ke haath zaKHmii kar diye hai.n
intizaar
apne mantiqii anjaam ko pahu.nch rahaa hai
ab mai.n so jaanaa chaahtaa huu.n
nii.nd se merii aa.nkhe.n band ho rahii hai.n
haa.n
sub.h agar merii aa.nkhe.n na khul sake.n
to mujhe mu.aaf kar denaa

Ali Sahil
Nazm

night-club

na.ii tahziib ke shahkaar-e-aziim!
terii pur-kaif o tarab-KHez fazaa.o.n ko salaam!
kitne nau-KHez o hasii.n jism yahaa.n chaaro.n taraf
raqs me.n mahv hai.n uryaanii kii tasviir bane
apnii ra.anaa.ii o zebaa.ii kii tash.hiir bane
saaz-e-pur-josh kii sa.ngat me.n thirakte jo.De
farsh-e-marmar pe phisalte hai.n bahak jaate hai.n
dau.Dtii jaatii hai rag rag me.n sharaab-e-gulfaam
na.ii tahziib ke shahkaar-e-aziim!
terii pur-kaif o tarab-KHez fazaa.o.n ko salaam!
un kii aa.nkho.n se chhalaktii hai havas kii mastii
un ke siino.n me.n farozaa.n hai.n vo jinsii sho.ale
jin kii ik ek lapaT se hai bhasam sharm-o-hayaa
qahqahe, saaz kii taano.n me.n Dhale jaate hai.n
lams kii aag me.n sab jism jale jaate hai.n
aa.nkh ke Doro.n me.n poshiida hai.n mub.ham se payaam
na.ii tahziib ke shahkaar-e-aziim!
terii pur-kaif o tarab-KHez fazaa.o.n ko salaam
dha.Dkane.n tez hu.ii.n shauq kii lai ba.Dhne lagii
jism par ta.ngii-e-malbuus zaraa aur ba.Dhii
aa.nkh me.n nashshe kii ik lahr zaraa aur cha.Dhii
larzish-e-paa se jhalakne lagii dil kii laGzish!
daf.atan jaaz kii pur-josh sadaa band hu.ii
raushnii Duub ga.ii phail ga.ii zulmat-e-shab....
jism se jism kii qurbat jo bujhaane lagii aag
dopahar Dhal ga.ii jazbaat kii hone lagii shaam
na.ii tahziib ke shahkaar-e-aziim!
terii pur-kaif o tarab-KHez fazaa.o.n ko salaam
jal gayaa siina-e-sozaa.n me.n hii insaa.n kaa zamiir
ruuh kii chiiKH fazaa.o.n me.n kahii.n Duub ga.ii
ruKH-e-tahziib pasiine me.n sharaabor hu.aa
ilm hai sar-ba-garebaa.n o adab mohr-ba-lab
kis se is daur-e-jaraahat me.n ho marham kii talab
mulk-e-tahziib me.n cha.ngez hai phir KHuu.n-aashaam
na.ii tahziib ke shahkaar-e-aziim!
terii pur-kaif o tarab-KHez fazaa.o.n ko salaam

Saleem Betab
Nazm

good night

raat kaa vaqt hai
ko.ii aahaT na kar
baat jo bhii ho man me.n vo man me.n hii rakh
bol dene se takliif ghaTtii nahii.n
balki baT jaatii hai aur
ba.Dh jaatii hai
raat ke vaqt to chup hii rahnaa munaasib hai kahnaa nahii.n
ek bhii baat mujh par jo bhaarii pa.De
ko.ii bhii baat jo mujh ko sone na de
aur sun baat sun
mere sun lene se ye pareshaaniyaa.n hal na ho.ngii kabhii
mai.n teraa ek ma.amuulii aashiq hii huu.n chaaraagar bhii nahii.n
ko.ii aisii pareshaanii ho jis kaa hal
mere siine se lagte hii mil jaa.egaa to hii zahmat uThaa
mujh ko bas vo bataa jis me.n jismo.n kii taasiir kaam aa sake
is barahna badan par badan kii hii tadbiir kaam aa sake
aur ye mumkin na ho to vahii baat hai
raat kaa vaqt hai

Nivesh Sahu
Nazm

night walk (shab-nawardi)

january kii sardii me.n
yaar shab-navardii me.n
mere ghar chale aa.e
mai.n ne bhii kamiino.n kii
muKHtalif namuuno.n kii
aisii mezbaanii kii
kursii-vursii lagvaa.ii
chaa-e-shaa.e ma.ngvaa.ii
aag tho.Dii dahkaa.ii
aag ke dahakne se
guftuguu bhii garmaa.ii
guftuguu bhii chaa.e kii
guftuguu alaav kii
aur phir alaav se
ik badan kii yaad aa.ii
mai.n ne zikr chhe.Daa phir
hashr kaa qayaamat kaa
us badan kii qaamat kaa
us badan kii rangat kaa
yaaro kaise batlaa.uu.n
us badan ke zer-o-bam
jism pe ugaa resham
naaf me.n rukii shabnam
yaar vo badan jis dam
baazuu.o.n me.n aataa thaa
kyaa sitam na Dhaataa thaa
aag hii lagaataa thaa
haa.e vo rahaa jab tak
ham ne hijr vaalo.n kii
raagnii nahii.n gaa.ii
sardiyaa.n nahii.n aa.ii.n
sardiyo.n se yaad aayaa
lak.Diyo.n ke sho'le sab
maa.nd pa.D ga.e lekin
yaar mere jal uTThe
sab ke sab machal uThe

Salman Saeed
Nazm

night bulb

duur ek kamre me.n
night bulb jaltaa hai
us kii raushnii me.n dil
dam-ba-dam pighaltaa hai
merii be-KHudii jaanaa.n
mujh se baat kartii hai
is udaas kamre me.n
aur hasiin lagtii hai
kitnaa gahraa rishta hai
meraa is udaasii se
roz shaam aate hii
saath saath chalte hai.n
night bulb ke niiche
ek saath jalte hai.n

Mohammad Anas
Nazm

hizyan

almaan me.n raat ke is pahar
ek hii kursii par baiThe
ek hii manzar ko ghuurte
jab naukrii par night shift karte
meraa saatvaa.n ghanTa chal rahaa hai
to ba-zaahir sab saakit hai
sukuut me.n hai
magar ba-baatin tumhaarii socho.n kaa sayyaal
kisii ghuman gherii kii tarah
mere dil-o-dimaaG ke
sabhii nihaa.n-o-ayaa.n gosho.n me.n
be-aavaaz tuufaa.n barpaa kiye hu.e hai
tum jo koso.n duur
apne atraaf me.n raushnii phuuTne kaa manzar-naama
faraamosh kiye
baahnii jaanib khulne vaalii khi.Dkii ke saath lage
king size palang par akele so rahe ho
tumhe.n kyaa KHabar
saakit manzaro.n me.n tartiib paane vaale
KHaamosh tuufaan
kaisii tabaahii kaa pesh-KHema ho sakte hai.n
tumhe.n kyaa KHabar
rat-jago.n me.n palne vaale
kaale ishq
kaisii gahrii aa.nkho.n kaa madfan ho sakte hai.n
meraa tum se mohabbat nahii.n junuun kaa rishta hai
aur majnuu.n kii aah se KHud junuun bhii KHauf khaataa hai
tum jo mere junuu.n ko niDar saahilo.n se ho kar
lalkaarte rahte ho
tumhe.n kyaa KHabar
tuufaanii raato.n me.n saahilo.n se lauTne vaalii sadaa.e.n
apnii june se big.Dii hu.ii haalato.n me.n palaTtii hai.n
kabhii jo tum un ke masKH-shuda chehro.n par
vahshat kii aa.Dii-tirchhii satre.n pa.Dh paa.o
to ek laa-muKHtatim be-KHvaabii ke maraz me.n pa.D jaa.o

Komal Raja
Nazm

night school

fasl-e-gul mahkii hai phir Guncha-dahan khultaa hai
shaam Dhalne lagii aur shab kaa badan khultaa hai
aasmaa.n par hu.e chaahat ke sitaare raushan
shahr-e-KHaamosh me.n ik baab-e-suKHan khultaa hai

Ishrat moin Seemaa
Nazm

shri guru-nanak

kyuu.n mahak uThtaa na KHushbuu se dimaaG-e-aalam
nighat-e-gulshan-e-israar guruu-naanak the

Shatir Amritsari
Nazm

KHuda se

tuu bhii mujh ko to.D ke KHush hai
paagal
ghar thii mai.n teraa

Nighat Sahiba
Nazm

wote of thanks

shukriya
sab baaGbaano.n kaa
jinho.n ne
apnii mohabbat aur lagan se
mere dil kii zamiin ko is qaabil banaayaa
ki ab vahaa.n sirf behis kii jhaa.Diyaa.n ugtii hai.n

Nighat Sahiba
Nazm

phulon ki sej par

jab tum vo pa.Dhnaa chaahte ho
jo mujhe likhnaa nahii.n aataa
aur naa-umiid ho kar apne chehre ke nuquush badal dete ho
hamaarii aa.nkho.n ke beach saat zamiine.n aur
saat aasmaan aa jaate hai.n
aur merii aa.nkhe.n taariiKH ke kho.e hu.e
auraaq Dhuu.nDne lag jaatii hai.n
tum puuchhte ho aise kyuu.n dekhtii ho
mai.n vaapas aa jaatii huu.n
aur tumhe.n sach-much dekhne lagtii huu.n
aise hii jaise tum chaahte ho

Nighat Sahiba
Nazm

maika

mai.n ne chaahaa thaa ko.ii ujaale saa haath
merii u.nglii paka.D kar mujhe aage ba.Dhnaa sikhaa.e
madraso.n daftaro.n shaah-raaho.n makaano.n duukaano.n
talak le chale
lekin aisaa hu.aa
jis jagah aa.nkhe.n kholii thii mai.n ne
vahaa.n haath saare roTii banaane pe maamuur the
KHauf aataa thaa ghar se nikalte hu.e
Dagmagaate qadam
gu.ng alfaaz
bebas nigaahe.n liye
aage ba.Dhtii thii mai.n
chuu.nki ruknaa ko.ii hal nahii.n thaa
so mai.n apnii galii se nikal kar jahaa.n bhii ga.ii
ajnabii merii sahmii hu.ii zaat pe
Darte Darte adaa hotii har baat pe
fiqre kaste rahe
aur ha.nste rahe
tab se ab tak nahii.n yaad
kitne hii dariyaa bahe
kab gulaabii badan saa.nvlaa ho gayaa
ujlii be-daaG aa.nkho.n me.n
kab dard ke zard mausam utar aa.e
kab aa.ina dhuul se bhar gayaa

Nighat Sahiba
Nazm

amn ki nazm

vo ishq hai
jo safed baalo.n pe ho.nT rakhe
sunahraa kar de

Nighat Sahiba
Nazm

iltija

ham vo nahii.n jo tum samajhte ho
ham vo hai.n jo tum nahii.n samajhte
ham laash ke mu.nh pe apnii nazm kii miTTii Daalte hai.n
aur chain se so jaate hai.n
sub.h uTh kar kaam kii talaash me.n nikalte hai.n
hame.n aise mat dekho
jaise suukhii ghaas baadal ko dekhtii hai
hame.n aise dekho
jaise marne vaalaa gor-kan ko dekhtaa hai

Nighat Sahiba
Nazm

bachat

ham ne ghar banaane ke
naa-muraad chakkar me.n
tiiliyaa.n bachaa.ii hai.n
u.ngliyaa.n jalaa.ii hai.n

Nighat Sahiba
Nazm

hadsa

nazm mar ga.ii us din
jab mai.n ne biis ruupe bachaane ke liye
motor gaa.Dii ko rikshe pe fauqiyat dii
ab mai.n likhne baiThtii huu.n
to kambaKHt rikshe vaale kii
bebas aa.nkhe.n
kaaGaz me.n se jhaa.nktii hai.n
mai.n diary phe.nk detii huu.n

Nighat Sahiba
Nazm

period

mai.n ne KHuun-aaluud kap.De tab dho.e hai.n
jab mujhe ma.aluum nahii.n thaa
ki KHuun se bachche bante hai.n
aur bachcho.n ko jamhuurii mamaalik daryaaft karte hai.n
aur caro.n me.n tel kii jagah isti.maal karte hai.n

Nighat Sahiba
Nazm

iltija

ham vo nahii.n jo tum samajhte ho
ham vo hai.n jo tum nahii.n samajhte
ham laash ke mu.nh pe apnii nazm kii miTTii Daalte hai.n
aur chain se so jaate hai.n
sub.h uTh kar kaam kii talaash me.n nikalte hai.n
hame.n aise mat dekho
jaise suukhii ghaas baadal ko dekhtii hai
hame.n aise dekho
jaise marne vaalaa gorkan ko dekhtaa hai

Nighat Sahiba
Nazm

raushni ke KHuda

ye jo diivaare.n mai.n ne giraa dii hai.n
jo haath zaKHmii kiye hai.n
tum sochte ho
ki sab raushnii dekhne ke liye thaa
raushnii ke KHudaa
mai.n ne chaahaa thaa suuraj mujhe dekh le

Nighat Sahiba
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now