Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "savere"

Nazm MATCHES FOR "savere"

Nazm

kutte

na aaraam shab ko na raahat savere
Galaazat me.n ghar naaliyo.n me.n basere
jo big.De.n to ik duusre ko la.Daa do
zaraa ek roTii kaa Tuk.Daa dikhaa do
ye har ek kii Thokare.n khaane vaale
ye faaqo.n se uktaa ke mar jaane vaale
ye mazluum maKHluuq gar sar uThaa.e
to insaan sab sar-kashii bhuul jaa.e
ye chaahe.n to duniyaa ko apnaa banaa le.n
ye aaqaa.o.n kii haDDiyaa.n tak chabaa le.n
ko.ii in ko ehsaas-e-zillat dilaa de
ko.ii in kii so.ii hu.ii dum hilaa de

Faiz Ahmad Faiz
Nazm

aarzu ke musafir

aksar aisaa hu.aa
shahr-dar-shahr
aur bastii bastii
kisii bhii dariiche me.n
ko.ii charaaG-e-mohabbat na thaa
be-ruKHii se bharii
saarii galiyo.n me.n
saare makaano.n ke
darvaaze yuu.n band the
jaise ik sard
KHaamosh lahje me.n
vo kah rahe ho.n
muravvat kaa aur mehrbaanii kaa maskan
kahii.n aur hogaa
yahaa.n to nahii.n hai
yahii ek manzar sameTe the
shahro.n ke pathriile sab raaste
jaane kis vaaste
aarzuu ke musaafir bhaTakte rahe

Javed Akhtar
Nazm

apni jang rahegi

jab tak chand luTere is dhartii ko ghere hai.n
apnii ja.ng rahegii
ahl-e-havas ne jab tak apne daam bikhere hai.n
apnii ja.ng rahegii
maGrib ke chehre par yaaro apne KHuun kii laalii hai
lekin ab us ke suuraj kii naav Duubne vaalii hai
mashriq kii taqdiir me.n jab tak Gam ke a.ndhere hai.n
apnii ja.ng rahegii
zulm kahii.n bhii ho ham us kaa sar KHam karte jaa.e.nge
mahlo.n me.n ab apne lahuu ke diye na jalne paa.e.nge
kuTiyaa.o.n se jab tak sub.ho.n ne mu.nh phere hai.n
apnii ja.ng rahegii
jaan liyaa ai ahl-e-karam tum Tolii ho ayyaaro.n kii
dast-e-nigar kyuu.n ban ke rahe ye bastii hai KHuddaaro.n kii
Duube hu.e dukh-dard me.n jab tak saa.njh savere hai.n
apnii ja.ng rahegii

Habib Jalib
Nazm

mera kamre se bas nindon ka rishta tha

miraa kamre se bas nii.ndo.n kaa rishta thaa
aur us ziine se KHvaabo.n kaa
jo lahraataa hu.aa jaataa thaa chhat tak
vo chhat
jahaa.n se aasmaa.n nazdiik thaa
jahaa.n aaraam farmaatii thii.n aa.nkhe.n
vo aa.nkhe.n jin me.n sapne the
vo sapne jin me.n duniyaa thii
vo duniyaa jis me.n sab kuchh thaa
vahii chhat
jahaa.n par ek chi.Diyaa kii suriilii chahchahaahaT thii
patango.n kii sajaavaT thii
falak kii jhilmilaahaT thii
magar afsos
vo chi.Diyaa jo savere ghar me.n sabse pahle uThtii thii
kise maa'luum thaa ik din vo zer-e-daam aa.egii
patang-e-kaaGazii jo aasmaa.n chhuune hii vaalii thii
kise maa'luum thaa vo lauT kar naakaam aa.egii
falak jis par tamannaa.o.n ke kitne chaa.nd raushan the
kise maa'luum thaa us par amaavas kii bhii ko.ii shaam aa.egii
vo chhat jo ghar kaa sabse pur-sukuu.n aur pyaaraa hissa thii
kise maa'luum thaa vo KHud-kushii ke kaam aa.egii

Charagh Sharma
Nazm

hamari gay

rab kaa shukr adaa kar bhaa.ii
jis ne hamaarii gaay banaa.ii
us maalik ko kyuu.n na pukaare.n
jis ne pilaa.ii.n duudh kii dhaare.n
KHaak ko us ne sabza banaayaa
sabze ko phir gaay ne khaayaa
kal jo ghaas charii thii ban me.n
duudh banii ab gaay ke than me.n
sub.haan-allaah duudh hai kaisaa
taaza garm safed aur miiThaa
duudh me.n bhiigii roTii merii
us ke karam ne baKHshii serii
duudh dahii aur miiThaa maskaa
de na KHudaa to kis ke bas kaa
gaay ko dii kyaa achchhii suurat
KHuubii kii hai goyaa muurat
daana dunkaa bhuusii chokar
khaa letii hai sab KHush ho kar
khaa kar tinke aur ThaThre
duudh hai detii shaam savere
kyaa hii Gariib aur kaisii pyaarii
sub.h hu.ii jangal ko sidhaarii
sabze se maidaan haraa hai
jhiil me.n paanii saaf bharaa hai
paanii mauje.n maar rahaa hai
charvaahaa chumkaar rahaa hai
paanii pii kar chaaraa char kar
shaam ko aa.ii apne ghar par
duurii me.n jo din hai kaaTaa
bachche ko kis pyaar se chaaTaa
gaay hamaare haq me.n hai ne.amat
duudh hai detii khaa ke banaspat
bachh.De us ke bail banaa.e
jo khetii ke kaam me.n aa.e
rab kii hamd-o-sanaa kar bhaa.ii
jis ne aisii gaay banaa.ii

Ismail Merathi
Nazm

raat

gayaa din hu.ii shaam aa.ii hai raat
KHudaa ne ajab shai banaa.ii hai raat
na ho raat to din kii pahchaan kyaa
uThaa.e maza din kaa insaan kyaa
hu.ii raat KHilqat chhuTii kaam se
KHamoshii sii chhaa.ii sar-e-shaam se
lage hone ab hot baazaar band
zamaane ke sab kaar behvaar band
musaafir ne din bhar kiyaa hai safar
sar-e-shaam manzil pe kholii kamar
daraKHto.n ke patte bhii chup ho ga.e
havaa tham ga.ii pe.D bhii so ga.e
a.ndheraa ujaale pe Gaalib hu.aa
har ik shaKHs raahat kaa taalib hu.aa
hu.e raushan aabaadiyo.n me.n charaaG
hu.aa sab ko mehnat se haasil faraaG
kisaan ab chalaa khet ko chho.D kar
ki ghar me.n kare chain se shab basar
Gariib aadmii jo ki mazduur hai.n
mashaqqat se jin ke badan chuur hai.n
vo din bhar kii mehnat ke maare hu.e
vo maa.nde thake aur haare hu.e
nihaayat KHushii se ga.e apne ghar
hu.e baal bachche bhii KHush dekh kar
ga.e bhuul sab kaam-dhandhe kaa Gam
savere ko uTThe.nge ab taaza-dam
kahaa.n chain ye baadshah ko nasiib
ki jis be-Gamii se hai.n sote Gariib

Ismail Merathi
Nazm

insaf

mere dono.n bhaa.ii ab bhii
masjid me.n pa.Dhne jaate hai.n
ahkaam-e-KHudaavandii saare
pa.Dhte hai.n aur dohraate hai.n
aapaa mire hisse kii roTii
cha.ngiir me.n Dhak kar rakhtii hai
aur sub.h savere uTh kar vo
roTii chi.Diyo.n ko detii hai

Zehra Nigaah
Nazm

kachchi basti

aaj savere se
bastii me.n
qatl-o-KHuu.n kaa
chaaquu-zanii kaa
ko.ii qissa nahii.n hu.aa hai
KHair
abhii to shaam hai
puurii raat pa.Dii hai

Javed Akhtar
Nazm

ai matawalo! naqon walo!!

aavaara aavaara phirnaa chho.D ke ma.nDlii yaaro.n kii
dekh rahe hai.n dekhne vaale 'inshaa' kaa ab haal vahii
kyaa achchhaa KHush-baash javaa.n thaa jaane kyuu.n biimaar hu.aa
uThte baiThte miir kii baite.n pa.Dhnaa us kaa shi.aar hu.aa
taur-tariiqa ukh.Daa-ukh.Daa chehraa piilaa saKHt maluul
raah me.n jaise KHaak pe ko.ii maslaa maslaa baaG kaa phuul
shaam savere baal bikhere baiThaa baiThaa rotaa hai
naaqo.n vaalo! in logo.n kaa aalam kaisaa hotaa hai

Ibn۔e۔Insha
Nazm

wasiyyat

mire beTe mirii aa.nkhe.n mire baa'd un ko de denaa
jinho.n ne ret me.n sar gaa.D rakkhe hai.n
aur aise mutma.in hai.n jaise un ko
na ko.ii dekhtaa hai aur na ko.ii dekh saktaa hai
magar ye vaqt kii jaasuus nazre.n
jo piichhaa kartii hai.n sab kaa zamiiro.n ke a.ndhere tak
a.ndheraa nuur par rahtaa hai Gaalib bas savere tak
saveraa hone vaalaa hai
(2)
mire beTe mirii aa.nkhe.n mire baa'd un ko de denaa
kuchh andhe suurmaa jo tiir a.ndhere me.n chalaate hai.n
sadaa dushman kaa siina taakte KHud zaKHm khaate hai.n
lagaa kar jo vatan ko daav par kursii bachaate hai.n
bhunaa kar khoTe sikke dharm ke jo pun kamaate hai.n
jataa do un ko aise Thag kabhii pak.De bhii jaate hai.n
(3)
mire beTe unhe.n tho.Dii sii KHuddaarii bhii de denaa
jo haakim qarz le ke is ko apnii jiit kahte hai.n
jahaa.n rakhte hai.n sonaa rehn KHud bhii rehn rahte hai.n
aur is ko bhii vo apnii jiit kahte hai.n
shariik-e-jurm hai.n ye sun ke jo KHaamosh rahte hai.n
qusuur apnaa ye kyaa kam hai ki ham sab un ko sahte hai.n
(4)
mire beTe mire baa'd un ko meraa dil bhii de denaa
ki jo shar rakhte hai.n siine me.n apne dil nahii.n rakhte
hai un kii aastii.n me.n vo bhii jo qaatil nahii.n rakhte
jo chalte hai.n unhii.n rasto.n pe jo manzil nahii.n rakhte
ye majnuu.n apnii nazro.n me.n ko.ii mahmil nahii.n rakhte
ye apne paas kuchh bhii faKHr ke qaabil nahii.n rakhte
taras khaa kar jinhe.n jantaa ne kursii par biThaayaa hai
vo KHud se to na uTThe.nge unhe.n tum hii uThaa denaa
ghaTaa.ii hai jinho.n ne itnii qiimat apne sikke kii
ye zimma hai tumhaaraa un kii qiimat tum ghaTaa denaa
jo vo phailaa.e.n daaman ye vasiyyat yaad kar lenaa
unhe.n har chiiz de denaa par un ko vote mat denaa

Kaifi Azmi
Nazm

ammi

savere savere jagaatii hai.n ammii
mire haath mu.nh phir dhulaatii hai.n ammii

Abdul Bari Arif Jamali
Nazm

be-shumar aankhen

aasmaa.n ke chehre par be-shumaar aa.nkhe.n hai.n
be-shumaar aa.nkho.n me.n be-hisaab manzar hai.n
manzaro.n ke aa.iine apne apne chehro.n ko KHud hii dekh sakte hai.n
KHud hii jaan sakte hai.n apnii be-navaa.ii ko
vus.ato.n kii chaadar par silvaTe.n bahut sii hai.n
is KHamosh duniyaa me.n aahaTe.n bahut sii hai.n
aatii jaatii lahro.n kaa azhdahaam rahtaa hai
vaqt ek KHanjar hai
be-niyaam rahtaa hai
ye ajiib duniyaa hai jis me.n kuchh nahii.n miltaa
phir bhii ek lamhe me.n be-shumaar taariiKHe.n
yuu.n badaltii rahtii hai.n
jaise KHushk patto.n kaa Dher u.Dtaa phirtaa hai
be-kanaar samto.n me.n
be-shumaar samto.n me.n be-shumaar aa.nkhe.n hai.n
kuchh nahii.n hai takne ko aur hazaar aa.nkhe.n hai.n
raasto.n ke dhaage se har taraf laTakte hai.n
KHaak ke jaziire se
har taraf bhaTakte hai.n
phir bhii aasmaano.n par raat ke a.ndhere me.n
sub.h ke savere hai.n
ye ajab mu.amma hai
jis taraf bhii ham dekhe.n
TuuTte hu.e lamhe bhaagte hu.e raste jaagte hu.e manzar
aa.ino.n ke andar bhii aa.ino.n ke baahar bhii
ek shor barpaa hai
jis ko ham nahii.n sunte
aur vo ham se kahtaa hai
tum bhii mere jaise ho
mai.n bhii miTne vaalaa huu.n tum bhii miTne vaale ho
aasmaa.n ke chehre par be-shumaar aa.nkhe.n hai.n
be-shumaar aa.nkho.n me.n be-hisaab manzar hai.n
manzaro.n ke aa.iine
ra.ng rang aa.iine ke javaab manzar hai.n
manzaro.n ke andar bhii sad hazaar manzar hai.n
vo bhii miTne vaale hai.n
ham bhii miTne vaale hai.n

Shahzad Ahmad
Nazm

bakira

....aur chaadar par shab-baashii kaa zinda lahuu thaa
us ne uTh ke a.ng.Daa.ii lii
aa.iine me.n chehra dekhaa
sarshaarii me.n itmiinaan kii ThanDii saa.ns lii
us kii thakii hu.ii aa.nkho.n me.n
diivaanii maGruur chamak thii
fat.h ke nashshe se palke.n bojhal thii.n
us ne sochaa hide-park me.n
jo la.Dkii ik jaasuusii novel me.n Duubii
use milii thii
vo to jaise faaKHta niklii
us ne apnii sex appeal kaa kampaa maar ke
raam kiyaa thaa
us kii lachchhe-daar anokhii baate.n sun kar
us ke saath chalii aa.ii thii
sub.h-savere
chaa.e banaa kar
bosa de kar
chalii ga.ii thii
vo to sach-much baakara niklii
(varna sola sattarah baras kii la.Dkii harrafa hotii hai)
us ne sochaa
us ne shab bhar
band kalii par
ik za.nbuurii raqs kiyaa thaa
aur chaadar par itnaa lahuu thaa
jaise ja.ng-e-aziim
isii bistar par la.Dii ga.ii thii
us ne apnii mo.nchho.n ke guchchhe me.n
apnii ha.nsii dabaa.ii
ek KHayaal se
aa.nkho.n me.n saaya lahraayaa
sar chakraayaa....
ye to us kii mahvaarii kaa murda lahuu thaa
jo chaadar par phail gayaa thaa

Saqi Faruqi
Nazm

bas

ga.e leTne raat Dhalte hu.e
uThe sub.h ko aa.nkh malte hu.e
nahaa dho ke kap.De badalte hu.e
uThaa.ii kitaab aur chalte hu.e
savere kaa jab tak ki school hai
yahii apnaa har roz ma.amuul hai
kha.De hai.n sa.Dak par ki ab aa.ii bas
guzartaa hai ik ik minute ik baras
bas aa.ii to rush is qadar pesh-o-pas
ki allaah bas aur baaqii havas
ba.Dhe ham bhii cha.Dhne ko jab sab ke saath
to handle pe thaa paa.nv pedal pe haath
passenger kii vo bhii.D vo bas kaa gate
guzarte hai.n machchhar jahaa.n par sameT
ko.ii ho gayaa choT khaa kar flat
kisii kii hai kohnii kisii kaa hai peT
kha.De ho.n kahaa.n paa.nv rakkhe.n kidhar
a.ndheraa idhar hai a.ndheraa udhar
magar hukm checker kaa hai aa.iye
kha.De kyo.n hai.n aage ba.Dhe jaa.iye
jahaa.n me.n jahaa.n tak jagah paa.iye
khisakte khisakte chale jaa.iye
sitaaro.n se aage jahaa.n aur hai.n
zamii.n aur hai.n aasmaa.n aur hai.n

Kaleem Aajiz
Nazm

ye basti meri basti hai

jagat maa.n thii vo
so chhoTaa ba.Daa har ko.ii us ko maa.e hii kah kar bulaataa thaa
savere hii savere maa.e ke haatho.n ke
un muulii bhare KHasta paraaTho.n ke binaa
kab sardiyo.n kaa lutf aataa thaa

Ishrat Afreen
Nazm

balance-sheet

kise KHabar thii
ek musaafir mustaqbil zanjiir karegaa aur safar ke sab aadaab badal jaa.e.nge
kise yaqii.n thaa
vaqt kii rau jis din muTThii me.n band ho ga.ii saarii aa.nkhe.n saare KHvaab badal jaa.e.nge
hame.n KHabar thii
hame.n yaqii.n thaa
tabhii to ham ne to.D diyaa thaa rishta-e-shohrat-e-aam
tabhii to ham ne chho.D diyaa thaa shahr-e-numuud-o-naam
lekin ab mire andar kaa kamzor aadmii shaam savere mujhe Daraane aa jaataa hai
na.e safar me.n kyaa khoyaa hai kyaa paayaa hai sab samjhaane aa jaataa hai

Iftikhar Arif
Nazm

kawwa

aage piichhe daa.e.n baa.e.n
kaa.e.n kaa.e.n kaa.e.n kaa.e.n
sub.h-savere nuur ke ta.Dke
mu.nh dho-dhaa kar nanhe la.Dke
baiThte hai.n jab khaanaa khaane
kavve lagte hai.n ma.nDlaane
tauba tauba DhiiT hai.n kitne
kavve hai.n yaa kaale fitne
laakh ha.nkaa.o laakh u.Daa.o
mu.nh se ciiKHo haath hilaa.o
ghuuro ghu.Dko yaa dhutkaaro
ko.ii chiiz uThaa kar maaro
kavve baaz nahii.n aate hai.n
jaate hai.n phir aa jaate hai.n
har dam hai khaane kii aadat
shor machaane kii hai aadat
bachcho.n se bilkul nahii.n Dartaa
un kii kuchh parvaa nahii.n kartaa
dekhaa nanhaa bholaa-bhaalaa
chhiin liyaa haatho.n se nivaalaa
ko.ii ishaara ho yaa aahaT
taa.D ke u.D jaataa hai jhaT-paT
ab karne do kaa.e.n kaa.e.n
ham kyuu.n apnii jaan khapaa.e.n

Hafeez Jalandhari
Nazm

kya likhun

aksar
likhte hu.e aataa hai
dil me.n ye savaal
kyaa likhuu.n
us ujle savere ko
jo laataa hai apne saath Dhero.n ummiide.n
yaa likhuu.n
raat ke us a.ndhere ko
jo de jaataa hai aa.nkho.n me.n hazaaro.n sapne
kyaa likhuu.n
in mahaktii havaa.o.n ko
jo har pal ehsaas dilaatii hai.n
ki zinda ho tum
yaa likhuu.n
un an-ginat du.aa.o.n ko
jin me.n huu.n mai.n sirf mai.n
kyuu.n na likhuu.n
us hasiin chaa.nd ko
jo sikhaataa hai mujhe
sar uThaa kar aasmaa.n kii or dekhnaa
yaa likh duu.n
un ujle sitaaro.n ko
jo sikhaate hai.n
khud ko sameT kar chamakte rahnaa
aur agar bikhro bhii
to TuuT kar du.aa ban jaanaa

Rashmi Bhardwaj
Nazm

bichhDe ghar ka saya

sub.h-savere
vo bistar se saa.e jaisii uThtii hai
phir chuulhe me.n raat kii ThanDii aag ko
raushan kartii hai
itne me.n din cha.Dh jaataa hai
jaldii jaldii chaa.e banaa kar shauhar ko ruKHsat kartii hai
sayyaare gardish karte hai.n
shahr me.n sahraa sahraa.o.n me.n chaTyal maidaa.n
kohsaaro.n ke nasheb-o-faraaz banaa karte hai.n
saare ghar ko dhotii hai
kap.De tauliye tooth-brush bistar kii chaadar
ko.ii kitaab uThaatii hai rakh detii hai
radio on kiyaa phir rokaa on kiyaa
phir ko.ii puraanaa KHat pa.Dhtii hai
(ghanTii bajii)
''maryam! aa jaa.o''
''tum kaisii ho? vo kaise hai.n''
''kyaa us kaa ko.ii KHat aayaa?''
(tho.Dii KHaamoshii kaa vaqfa)
''tum kaisii ho''
''tum se matlab? sach kah duu.n to kyaa kar logii''
dekho sab kii sab baiThii ho.n
''achchhaa''
''achchhaa''
(darvaaza phir band ho gayaa)
''ab kyaa karnaa!
ghar to bilkul saaf pa.Daa hai
ko.ii shikan bistar pe nahii.n hai
diivaar-o-dar dhule-dhulaa.e
ko.ii dhabba yaa mak.Dii kaa jaalaa tinkaa
kahii.n kuchh nahii.n
kyaa karnaa hai!
uf! vo calendar
kitne baras ho ga.e phir bhii
aa.e.n to un se kahtii huu.n
bilkul nayaa calendar laa.e.n
kuchh bhuuk nahii.n
ab kyaa karnaa hai
leT rahuu.n? lekin kyaa leTuu.n
jaane kitnaa leT chukii huu.n
kha.Dii rahuu.n
haa.n kha.Dii rahuu.n
par mai.n to kab se kha.Dii hu.ii huu.n
khi.Dkii kaa parda hii kholuu.n
dhuup kahaa.n tak aa pahu.nchii hai
laa.o apnaa album dekhuu.n
nayyar shabnam shafaq subuuhii aKHtar juuhii
kaise ho.nge
aa.n! ye mai.n huu.n
ittii pyaarii pyaarii thii mai.n
mai.n bilkul hii bhuul ga.ii thii
sab kitnaa achchhaa lagtaa thaa
abbaa, ammaa.n, bhayyaa, appii
sab zinda the
saaya naanii gulshan aapaa
haa.n aur vo gaurayyaa baabaa
aa.nsuu naGme shor Thahaake saare ik sur me.n hote the
saarii duniyaa ghar lagtii thii
amaa.n udhar bulaayaa kartii.n
abbaa udhar pukaaraa karte
bhayyaa Daa.nTte
appii Dhero.n pyaar jataatii.n
khaanaa, piinaa, sonaa, jaagnaa, ha.nsnaa, ruuThnaa, man.naa
Dor ba.ndhii thii
ek me.n ek piroyaa hu.aa thaa
kal nammuu ke ghar shaadii hai
paas hii ko.ii maut hu.ii hai
college kii chhaTii kab hogii
iid phir ab kii tiis kii hogii
ham bhii lail-e-qadr jaage.nge
shahlaa kii ma.ngnii kyuu.n TuuTii?
kyaa iqbaal ko.ii shaa.er thaa?
chup ba.Dke abbaa sun le.nge
saa.e dau.D rahe hai.n ghar me.n
har goshe me.n uupar niiche andar baahar dau.D rahe hai.n
lambe chhoTe sabz o zard hazaaro.n saa.e
baahar shahr me.n ko.ii nahii.n hai
dhuup siyah pa.Dtii jaatii hai
qadd-e-aadam aa.iine me.n
us kaa na.ngaa jism kha.Daa hai
jism ke andar suuraj kaa Guncha mahkaa hai
sayyaare gardish karte hai.n
sab anjaane sayyaaro.n me.n bhuule-bisre ghar raushan hai.n
kis lamhe kaa hai ye tamaasha
hast-o-buud ke sannaaTe me.n
laa-maujuud kii taariikii me.n
sirf yahii aa.iina raushan
sirf ik aks-e-guzishta raushan
bichh.De ghar kaa saaya raushan

Farhat Ehsas
Nazm

jila-watani

aaj sarhad pe KHaamosh topo.n ke ho.nTo.n pe
pap.Dii kii tah bhii chaTaKH kar girii hai
har ik roz sub.h savere se taariikiyo.n kii taho.n tak
akelaa hii chaltaa hai suuraj
udaasii se har aa.nkh ko apnii jaanib tavajjoh kii KHaatir
bulaataa hai lekin
nigaahe.n milaane kaa har hausla
har badan me.n
faqat siskiyo.n kii tarah jaagtaa hai
ab faqat aabruu kaa dhu.aa.n kohar ban ke rukaa hai
bas ab bulbulo.n ke tarannum me.n bhii
nauha-e-zindagii ke sitam-KHez tuufaan hai.n
ab faqat mere apne chahiito.n kii laasho.n ke ambaar hai.n
ab to KHar bhii yahaa.n hinhinaate nahii.n
ja.ng-bandii nahii.n sarhade.n bhii nahii.n
ai mirii mujh se ruuThii hu.ii
mere padmaa kii ai zinda-tar sar-zamii.n
merii aa.nkho.n tire aasmaano.n
tirii aur mirii sarhado.n ke vo sab faasle
jo magar qurbato.n ke sivaa kuchh na the
aaj kyuu.n aa.nkh me.n ashk ban ke ruke hai.n
bhalaa kyuu.n mujhe
terii qurbat ke saayo.n ko dhu.ndlaahaTo.n me.n badalte hu.e
dekhne ke liye zinda rahnaa pa.Daa hai

Kishwar Naheed
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now