Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "tabdiilii"

Nazm MATCHES FOR "tabdiilii"

Nazm

tabdili

is bhare shahr me.n ko.ii aisaa nahii.n
jo mujhe raah chalte ko pahchaan le
aur aavaaz de o be o sar-phire
dono.n ik duusre se lipaT kar vahii.n
gird-o-pesh aur maahaul ko bhuul kar
gaaliyaa.n de.n ha.nse.n haathaa-paa.ii kare.n
paas ke pe.D kii chhaa.nv me.n baiTh kar
ghanTo.n ik duusre kii sune.n aur kahe.n
aur is nek ruuho.n ke baazaar me.n
merii ye qiimtii be-bahaa zindagii
ek din ke liye apnaa ruKH mo.D le

Akhtarul Iman
Nazm

mazdur ki bansuri

mazduur hai.n ham, mazduur hai.n ham, majbuur the ham, majbuur hai.n ham
insaaniyat ke siine me.n ristaa hu.aa ik naasuur hai.n ham
daulat kii aa.nkho.n kaa surma bantaa hai hamaarii haDDii se
mandir ke diye bhii jalte hai.n mazduur kii pighlii charbii se
ham se baazaar kii raunaq hai, ham se chehro.n kii laalii hai
jaltaa hai hamaare dil kaa diyaa duniyaa kii sabhaa ujyaalii hai
daulat kii sevaa karte hai.n Thukraa.e hu.e ham daulat ke
mazduur hai.n ham, mazduur hai.n ham sautele beTe qismat ke
sone kii chaTaa.ii tak bhii nahii.n, ham zaat ke itne heTe hai.n
ye sejo.n par sone vaale shaayad bhagvaan ke beTe hai.n
ham me.n nahii.n ko.ii tabdiilii jaa.De kii paalii raato.n me.n
baisaakh ke tapte mausam me.n, saavan kii bharii barsaato.n me.n
kap.De kii zaruurat hii kyaa hai mazduuro.n ko, haivaano.n ko
kyaa bahs hai, sardii garmii se lohe ke bane insaano.n ko
hone do charaaGaa.n mahlo.n me.n, kyaa ham ko agar diivaalii hai
mazduur hai.n ham, mazduur hai.n ham, mazduur kii duniyaa kaalii hai
mazduur ke bachche takte hai.n jab hasrat se duukaano.n ko
mazduur kaa dil detaa hai du.aa devtaa.o.n ko, bhagvaano.n ko
khaayaa miTTii ke bartan me.n, so.e to bichhaune ko tarse
muKHtaaro.n par tanqiide.n hai.n, be-chaargiyaa.n majbuuro.n kii
suukhaa chehra dahqaano.n kaa, zaKHmii piiThe.n mazduuro.n kii
vo bhuuko.n ke an-daataa hai.n, haq un kaa hai be-daad kare.n
ham kis darvaaze par jaa.e.n kis se jaa kar fariyaad kare.n
baazaar-e-tamaddun bhii un kaa duniyaa-e-siyaasat bhii un kii
maz.hab kaa iraada bhii un kaa, duniyaa-e-siyaasat bhii un kii
paaband hame.n karne ke liye sau raahe.n nikaalii jaatii hai.n
qaanuun banaa.e jaate hai.n, zanjiire.n Dhaalii jaatii hai.n
phir bhii aaGaaz kii shoKHii me.n anjaam dikhaa.ii detaa hai
ham chup hai.n lekin fitrat kaa insaaf duhaa.ii detaa hai

Jameel Mazhari
Nazm

hairani

hairaanii hai
vo log bhii
tabdiilii aur baGaavat kii
baate.n karte hai.n
jo kuchh khone ko tayyaar nahii.n

Khaleel Tanveer
Nazm

farar

is se pahle mai.n darvaaza kholuu.n
kuchh boluu.n
afvaaho.n kii gard me.n lipTe zahr-aaluud mohabbat-naame liye hu.e tum
udh.De hu.e rishto.n ke jaame siye hu.e tum
mujh me.n aan samaa.e
mai.n rahne ke liye banaa huu.n
jo aa.e mujh me.n rah jaa.e
mujhe sajaa.e
jitnaa pyaar kare utnaa sukh paa.e
tum se pahle bhii kuchh log yuu.nhii aa.e the
apne andar mujh me.n tabdiilii ke KHvaab sajaa laa.e the
aur phir ik din
jis ne jo bhii ahd kyaa vo to.D diyaa
jis ne jo bhii baat kahii vo radd kar dii
lekin tum ne to had kar dii
mere din viiraan hu.e hai.n
merii sub.h ke chehre par kitnii raato.n ke zaKHm lage hai.n
merii shaam udaas kha.Dii hai
mere ufuq par suuraj lahuuluhaan pa.Daa hai
diivaaro.n se KHuu.n ristaa hai
darvaazo.n se meraa ik ik raaz ayaa.n hai
mere sahn me.n dushman kii saazish raqsaa.n hai
sunaa hai ab is haal me.n mujh ko chho.D ke tum jaane vaale ho
mere baahar baiTh ke merii yaad kaa Gam khaane vaale ho
tum se aur ummiid bhii kyaa ho
tum bhii to duniyaa vaale ho
jab tak ishq se ishq nahii.n miltaa tanhaa dukh sahnaa hai
ghar kii fikr to us ko hogii jis ko ghar me.n rahnaa hai

Saleem Kausar
Nazm

aawazen

aflaak ke taaro.n me.n jaltii bujhtii hu.ii kuchh aavaaze.n hai.n
kohsaar ke phuulo.n me.n bikhrii bahkii hu.ii kuchh aavaaze.n hai.n
hai mausam-e-gul kii aamad se ashkaal-e-chaman me.n tabdiilii
yaa murG-e-sahar kii gulshan me.n badlii hu.ii kuchh aavaaze.n hai.n
zardaar kii har aavaaz me.n hai biphrii hu.ii suurat kaa naqsha
mazduur nahiif-o-bechaare sahmii hu.ii kuchh aavaaze.n hai.n
aavaaz jise ham kahte hai.n tahriik hai ye kuchh shaklo.n kii
ham jin ko samajhte hai.n shakle.n Thahrii hu.ii kuchh aavaaze.n hai.n
vo giit hame.n jo yaad rahe dekhii hu.ii suurat hai ko.ii
maanuus hai.n jo shakle.n ham se jaanii hu.ii kuchh aavaaze.n hai.n
ilhaad ke kuchh mai-KHvaaro.n ne pii lii hai ziyaada hii shaayad
atraaf-e-dayaar-e-maGrib se bahkii hu.ii kuchh aavaaze.n hai.n
ai 'zeb' khavayyaa hii apne hai.n un kii luGat se naa-vaaqif
har bahr se maujo.n kii suurat uThtii hu.ii kuchh aavaaze.n

Zeb Usmania
Nazm

ye KHalaf ka wada hai

aKHtaruzzamaa.n naasir
vaqt jaise royaa ho
dhuup narm lahje me.n jaise aaj goyaa ho
duur ko.ii masjid me.n
biich asr o maGrib ke
jaise khoyaa khoyaa ho
aKHtaruzzamaa.n naasir
mai.n tumhaarii aa.nkho.n se dekhtaa thaa duniyaa ko
mai.n tumhaare haatho.n se zindagii ko chhuutaa thaa
mai.n tumhaare qadmo.n se naaptaa thaa rasto.n ko
mai.n tumhaarii saa.nso.n se suu.nghtaa thaa KHushbuu ko
mai.n tumhaaraa manzar thaa
be-sadaa samundar thaa
sar pe aasmaa.n tum the
haa.n miraa bayaa.n tum the
aur merii dhartii me.n chaahate.n tumhaarii thii.n
aadate.n tumhaarii thii.n
din tumhaare lahje kii chhaa.nv me.n guzarte the
zindagii se la.Dte the zindagii se Darte the
aKHatruzzamaa.n naasir
jaane kyuu.n hu.aa badlii charKH ne bhii ruKH badlaa
duur masjid-e-jaa.n se kyuu.n azaan-e-dil ubhrii
sajda-e-talab chamkaa
harf-e-kunj-e-lab chamkaa
din Guruub hote hii zauq-e-muntaKHab chamkaa
kaash ye nahii.n hotaa kaash mai.n vahii.n hotaa
aKHtaruzzamaa.n naasir
mai.n kisii tamaddun kaa aaKHirii musaafir huu.n
mai.n hazaar KHvaabo.n kii dau.D-dhuup me.n shaamil
mai.n hazaar jazbo.n kii rel-pel kaa aadii
mai.n hazaar haatho.n se zindagii banaataa huu.n
mai.n hazaar qadmo.n se raasto.n pe chaltaa huu.n
mai.n hazaar shaano.n pe karvaTe.n badaltaa huu.n
mai.n hazaar aa.nkho.n se manzaro.n me.n Dhaltaa huu.n
mai.n asiir duniyaa kaa
mai.n basiir fardaa kaa
mai.n varaq huu.n maazii kaa
vaqt hai munaadii kaa
Darte Darte kahtaa huu.n mai.n bhii ek shaa.er huu.n
aKHtaruzzamaa.n naasir
ye safar jo jaarii hai kaun is kaa jaada hai
kaun is kii manzil hai
lauTnaa bhii mushkil hai
mai.n to jaise bhar paayaa aur ek dar paayaa
roz-o-shab kaa halqa hai
mai.n bhii ek qaidii huu.n
sub.h kaa a.ndheraa huu.n
shaam kii safedii huu.n
aKHtaruzzamaa.n naasir
naukrii hai sarkaarii
badtariin samjhauta, badtariin dushvaarii
aaj mere haatho.n me.n tiir hai.n na patthar hai.n
aaj merii aa.nkho.n me.n KHvaab hai.n na manzar hai.n
mai.n sag-e-malaamat kii sun rahaa huu.n aavaaze.n
roz-o-shab ke narGe se bhaagnaa bhii mushkil hai
aur aise aalam me.n
farz-e-ain vaajib hai
shuGl-e-mai bhii jaa.ez hai
aKHtaruzzamaa.n naasir
hukm mujh ko azbar hai
tiin nannhii dhuupe.n hai.n
vo nafiis paikar hai
jin ke saath jiinaa hai
dhuup hai to sahnii hai
bas yahii guzaarish hai
ek chhoTii tabdiilii
sirf itnii KHvaahish hai
aKHtaruzzamaa.n naasir
e'tidaal laazim hai
ye KHalaf kaa va.ada hai
duur hai KHudaa lekin
tosha-e-sa.aadat hai
raushnii kaa jaada hai

Javed Nasir
Nazm

tabdili

kisii ne kahaa kaisii patthar dil hai tuu
kyaa ye kab hu.aa nahii.n to
is dil par kuchh lage chiiKH uThtaa hai
rotaa hai KHuun bahaataa hai
yaqiinan patthar to aisaa nahii.n kartaa
yaa patthar kii tabii.at me.n bhii badlaav aayaa hai
badlaav us mausam kii tarah
badlaav us kii baato.n kii tarah
badlaav us muqaffal pa.De ghar kii tarah
jo kabhii jhuumtaa thaa ik parivaar ke hone se
badlaav jo ik rote shaKHs ko ha.nsaa de
aur ha.nste ko rulaa de
badlaav is badlaa.o kii tarah jo sab badal de
ye kaisaa badlaav
patthar patthar hii hai yaa badal gayaa
meraa dil dil hii hai yaa badal gayaa
ko.ii to hai jo badal gayaa
mai.n mai.n hii huu.n yaa

Geetanjali Geet
Nazm

kuchh roz abhi hum zinda hain

kuchh roz abhii ham zinda hai.n
kuchh roz usuulo.n kii KHaatir
ham duniyaa se la.D sakte hai.n
phir vaqt ke saath har shai me.n
tabdiilii aa jaatii hai
patthar par sabza ugtaa hai
baalo.n me.n chaa.ndii paktii hai
Gussa kam ho jaataa hai
bastii ke mohazzab logo.n me.n
ham sanjiida kahlaate hai.n

Rasheed Afroz
Nazm

tabdili

ek thaa raaja ek thii raanii
kaun sunaa.e ab ye kahaanii
ab na sher ko jaal me.n pak.De
aur na chuhaa jaal ko katre
aur na jiite baazii kachhvaa
aur na rahe KHargosh bhii sotaa
chaa.nd kii bu.Dhiyaa chalii ga.ii hai
suut kaatnaa chho.D chukii hai
haatim-taa.ii aur alii-baabaa
sakhii saKHaavat aur marjiina
ko.ii sunaataa nahii.n kahaanii
na to daadaa aur na naanii
KHatm hu.e sab jaaduu Tone
qisse pariyo.n ke bhuuto.n ke
har dam T.v pesh-e-nazar hai
ab duniyaa kaa haal digar hai
T.v me.n cartoon aate hai.n
bachcho.n kaa dil bahlaate hai.n

Ameen Hazin
Nazm

ye dimagh

ye dimaaG sotaa hii rahtaa hai
maile malgaje kap.Do.n kii gaThrii
ek uu.nghtaa hu.aa kaahil vajuud
nashshe kii aadat se be-kaar
ye dimaaG sotaa hii rahtaa hai
aham confrenco.n me.n
KHaas majliso.n me.n
ko.ii haadsa hone vaalaa ho
yaa ko.ii tabdiilii aane vaalii ho
kone me.n gum.Dii maare pa.Daa rahtaa hai
soche hu.e ek arsa hu.aa
me.ade me.n jalan hotii thii
to chal detaa thaa khojne ke liye
zyaada haath paa.uu.n phir bhii nahii.n maartaa thaa
gum.Dii maare hu.e
khojne ke liye sochnaa
us ke bas se baahar thaa
puuchhe ko.ii is thake hu.e se
ye kab bedaar hogaa
kaahil
be-kaar
gum.Dii maare hu.e
naakaara
maile malgaje kap.Do.n kii gaThrii
ye dimaaG

Azra Abbas
Nazm

tabdili

sub.h-dam jab bhii dekhaa hai mai.n ne kabhii
nanhe bachcho.n ko school jaate hu.e
raqs karte hu.e gungunaate hu.e
apne basto.n ko gardan me.n Daale hu.e
u.ngliyaa.n ek kii ek pak.De hu.e

Zubair Rizvi
Nazm

bargad se wapsi

use buddhaa pe raham aayaa
vo bachchii haath me.n pencil paka.D kar sochtii hai
aur phir tasviir ke uupar
lakiire.n khii.nch kar mo.nchhe.n banaatii hai
aur is tabdiilii se andar hii andar muskuraatii hai
ki jaise us ne daanish kii sabhii kamzoriyaa.n
apnii lakiiro.n se chhupaa dii hai.n
use maaluum hii kab hai
ki us ke haath kii jumbish ne andar kii
sabhii aalaa.ishe.n chehre pe rakh dii hai.n
vo jin ko jism se aazaad kar ke ek arse se tyaagii thaa
ab aasaar-e-qadiima vaale safhe par 'danaayaa' aur 'sataa' ke ko.ii mafhuum hii baaqii nahii.n hai.n
zaraa mo.nchhe.n banaane se sabhii dukh miT ga.e hai.n
marg' kii ko.ii zaruurat hii nahii.n
buddhaa kapilvastu kaa shahzaada dobaara ban gayaa hai

Qasim Yaqub
Nazm

watan ki shan

raanii jab school se aa.ii
ammii ko ye baat bataa.ii
ammii jii school me.n apne
KHuub hu.ii hai aaj safaa.ii
konaa konaa saaf hu.aa hai
saabun se bhii hu.ii dhulaa.ii
ham ne sundar chart banaa.e
aur ik ik diivaar sajaa.ii
phuulo.n ke paudo.n se ham ne
gulshan kii dhartii mahkaa.ii
is se bhii ba.Dh kar ammii bhii
aur hu.ii hai ek ba.Daa.ii
vaqt pe madam aa jaatii hai.n
hotii hai ab KHuub pa.Dhaa.ii
ammii ye kyaa bhed hai aaKHir
kaise ye tabdiilii aa.ii
ye sun kar phir ammii bolii.n
beTii ko har baat bataa.ii
tum ko ye maaluum nahii.n hai
bhaarat ne lii hai a.ng.Daa.ii
bachcha bachcha jaag uThaa hai
KHuun me.n sab ke garmii aa.ii
daftar mil school dukaane.n
chhaa.ii hai sab par ra.anaa.ii
mandir masjid gurudvaare bhii
karte hai.n jalva-aaraa.ii
jangal jangal sabza lahkaa
dahqaa.n kii ummiid bar aa.ii
shahr hu.e hai.n saaf aur suthre
gaa.nv me.n bhii raunaq aa.ii
kitne hii dukh duur hu.e hai.n
ghaTtii jaatii hai mah.ngaa.ii
jhuggii me.n rahne vaalo.n ko
colony kii raah dikhaa.ii
bhaarat me.n ab amn-o-amaa.n hai
miT ga.e jhag.De aur la.Daa.ii
des ke dushman sakte me.n hai.n
bol ke sab ne mu.nh kii khaa.ii
jai ho jai indaraa gaa.ndhii kii
us ne vatan kii shaan ba.Dhaa.ii

Masooda Hayat
Nazm

agla safha

taKHliiq ke KHumaar me.n chuur
ek KHush-gavaar mo.D me.n
us ne jab
be-hisaab logo.n ke nasiib me.n
KHushiyaa.n likh Daalii ho.ngii
be-shumaar tab
us ne ruk kar
sochaa hogaa
tavaazun kii KHaatir
kuchh to tabdiilii chaahiye
aur yuu.n us mo.D me.n
likh kar aglaa nasiib
us ne jo palTaa saf.ha
vo meraa thaa

Umar Farhat
Nazm

nemul-badal

mujhe ma.aluum hai ki kuchh na badlegaa
na shaaKH-e-hijr par aasaar aa.e.nge KHizaa.o.n ke
KHayaalo.n ke samundar me.n na kuchh tabdiilii aa.egii
na kirdaaro.n ke roz o shab me.n ko.ii farq aa.egaa
magar in nazmo.n Gazlo.n kii kahaanii aur giito.n kii
aatii jaatii lahro.n se
ye meraa KHushk saahil
sairaab to hotaa rahe
mujh ko mere hone kaa ehsaas to hotaa rahe

Malik Ehsan
Nazm

zard aur sabz ka milap

bahaar ho yaa KHizaa.n mausam dono.n hii
naGmagii se bharpuur hai.n
vasl se judaa.ii tak
ek saaz bajtaa hai
jis kii dhun pe dha.Dkane.n
maah-o-saal kaa qasiida pa.Dhtii hai.n
shaaKH ne chaahaa
patto.n ko jo.De rakhe magar
rang kii tabdiilii ne
mulaaqaat ke zaa.iqo.n kaa lutf KHatm kar diyaa
havaa ne ek sabz daraKHt ko bikheraa
miTTii kii KHushbuu ne baa.nhe.n phailaa kar
zard rang kaa istiqbaal kiyaa
october ke Dhalte shab-o-roz
thakan kaa ehsaas paidaa karte hu.e apnaa paiGaam
sabt kar rahe hai.n
ruuh udaasii ke ghere me.n
sabz rang kii mutalaashii hai
KHvaab ko ta.abiir pahnaate hu.e
mai.n ne havaa kaa zaa.iqa chakhaa
aur ye bhed paa liyaa
ki zard aur sabz kaa milaap

Omainuz Zahra Sayyad
Nazm

bojh

mai.n dukh kaa bojh uThaa.e
ek muddat se chal rahaa huu.n
lagtaa hai
kisii bhii vaqt merii gardan TuuT jaa.egii
mai.n sustaanaa chaahtaa huu.n
ko.ii meraa bojh nahii.n baTaa saktaa
sab ke sar pe
ek vaznii Tokraa rakhaa hu.aa hai
ko.ii nafrat ke bojh tale dabaa hu.aa hai
kisii se mohabbat nahii.n sambhaalii jaa rahii
ham sab mazduur hai.n
bojh uThaanaa hamaaraa kaam hai
hame.n
sustaane kii ijaazat nahii.n miltii
bojh uThaane kii ujrat
Tokaro.n kii tabdiilii hai

Mustafa Arbab
Nazm

siyah hote gulabon ka nauha

ba.Dhtii hu.ii KHunkii ke saath
daraKHto.n ne
libaas badalnaa shuruu.a kiyaa
ajab rut hai
zardii me.n malbuus ashjaar
KHaamosh kha.De hai.n
hijr zada barahna Tahniyaa.n
sard havaa ke saamne bebas patto.n kii
chiiKH-o-pukaar sun kar bhii un kii
madad na kar sake.n
tanhaa.ii kisii jho.nke kii tarah naachtii hu.ii gulistaa.n me.n daaKHil hu.ii
aur ek safed phuul to.D kar
KHaak pe phe.nkaa
chaman ke saare phuul murjhaane lage
rangat kii tabdiilii kaa maatam thaa yaa phir
is phuul ke miTTii hone kaa
mai.n ek kone me.n baiThii
be-rahm mausamo.n ke tuyuur
u.Dte hu.e dekh kar
soch rahii huu.n
mujhe ab
siyaah hote gulaabo.n kaa nauha likhnaa hai

Omainuz Zahra Sayyad
Nazm

tabdili

miraa beTaa
buluuGat kii hade.n chhuune lagaa hai
use naazuk ra.ngaa-ra.ng titliyaa.n KHush aa rahii hai.n
vo aksar gungunaataa hai dhanak naGme
ab us kii putliyo.n me.n sabz fasle.n lahlahaatii hai.n
vo sotaa hai to KHvaabo.n me.n kahii.n gul-gasht kartaa hai
ab us kii muskuraahaT me.n chubhan hai
aur us ke haath gustaaKHii ke juuyaa ho chale hai.n
vo kaano.n par yaqii.n karne ko raazii hii nahii.n hai
use asbaab kii sachchaa.iyo.n par shak guzartaa hai
vo ab har chiiz ko chhuu kar parakhnaa chaahtaa hai

Rashid Jamaal Farooqi
Nazm

main

mai.n ulfat ke samundar ke jaziire par hu.ii barbaad tanhaa huu.n
ye barbaadii miraa singhaar Thahrii hai
mai.n ab maanuus huu.n is se
mai.n ab ko.ii bhii tabdiilii kabhii bhii sah nahii.n saktii
mujhe barbaad rahne de
mujhe aabaad mat karnaa

Mahrukh Ali Mahi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now