Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "va.ada-shikan"

Nazm MATCHES FOR "va.ada-shikan"

Nazm

pashemani

mere va.ada-shikan
tuu pareshaa.n na ho
merii barbaadiyo.n par pashemaa.n na ho
ye tabaahii mirii apnii taqdiir hai
KHvaab mere the merii hii ta.abiir hai
is me.n terii kahaa.n ko.ii taqsiir hai
merii taqdiir par merii taqsiir par
itnaa hairaa.n na ho
KHud se barham na ho
KHud se naalaa.n na ho
Gam-badaamaa.n na ho
mai.n hii naadaan thaa
mai.n hii naadaan huu.n
so mai.n viiraan huu.n
KHud pashemaan huu.n

Tariq Qamar
Nazm

urdu

zabaan-e-hind hai urdu to maathe kii shikan kyuu.n hai
vatan me.n be-vatan kyuu.n hai
mirii mazluum urdu terii saa.nso.n me.n ghuTan kyuu.n hai
teraa lahja mahaktaa hai to lafzo.n me.n thakan kyuu.n hai
agar tuu phuul hai to phuul me.n itnii chubhan kyuu.n hai
vatan me.n be-vatan kyuu.n hai
ye 'nanak' kii ye 'KHusrav' kii 'dayaa-sha.nkar' kii bolii hai
ye diivaalii ye baisaakhii ye iid-ul-fitr holii hai
magar ye dil kii dha.Dkan aaj-kal dil kii jalan kyuu.n hai
vatan me.n be-vatan kyuu.n hai
ye naazo.n kii palii thii 'miir' ke 'Gaalib' ke aa.ngan me.n
jo suuraj ban ke chamkii thii kabhii mahlo.n ke daaman me.n
vo shahzaadii zabaano.n kii yahaa.n be-anjuman kyuu.n hai
vatan me.n be-vatan kyuu.n hai
mohabbat kaa sabhii elaan kar jaate hai.n mahfil me.n
ki is ke vaaste jazba hai hamdardii kaa har dil me.n
magar haq maa.ngne ke vaqt ye begaana-pan kyuu.n hai
vatan me.n be-vatan kyuu.n hai
ye doshiiza jo baazaaro.n se iThlaatii guzartii thii
labo.n kii naazukii jis kii gulaabo.n sii bikhartii thii
jo tahziibo.n ke sar kii o.Dhnii thii ab kafan kyuu.n hai
vatan me.n be-vatan kyuu.n hai
mohabbat kaa agar da.avaa hai to is ko bachaa.o tum
jo va.ada kal kiyaa thaa aaj vo va.ada nibhaa.o tum
agar tum raam ho to phir ye raavan kaa chalan kyuu.n hai
vatan me.n be-vatan kyuu.n hai

Manzar Bhopali
Nazm

mazdur ki maut

dekhtaa kyaa hai ki bachcha bhuuk se hai be-qaraar
jaise ko.ii maar khaa ke bhaagne vaalaa shikaar

Shatir Hakeemi
Nazm

talib-e-ilm

ham-nashii.n puuchh na landan me.n mashaaGil mere
goyaa haalaat nahii.n zikr ke qaabil mere
ghar se niklaa thaa pa.Dhaa.ii kii tamanna le kar
dil me.n machle hu.e armaano.n kii duniyaa le kar
Bar karne kaa bahut jald iraada kar ke
apne maa.n-baap se do saal kaa vaa'da kar ke
daaKHila milne me.n lekin jo zaraa der hu.ii
goyaa ye kahiye ki taqdiir ulaT pher hu.ii
bore hotaa thaa sub.h-o-shaam akelaa ghar me.n
dard rahtaa thaa KHayaalaat se mere sar me.n
dil bahut jab Gam-e-tanhaa.ii se ghabraataa thaa
to zaraa sair-e-gulistaa.n ko nikal jaataa thaa
ek din yuu.nhii jo gul-gasht-e-chaman ko niklaa
dard se chuur mudaavaa-e-mehan ko niklaa
dekhtaa kyaa huu.n ki ek bench pe chashme ke qarii.n
mahv-e-nazaara-e-fitrat hai ko.ii zohra-jabii.n
us ke nazdiik mai.n chupke se vahii.n baiTh gayaa
but-shikan jaise ko.ii but ke qarii.n baiTh gayaa
baat mausam se jo niklii to mohabbat pe ga.ii
lazzat-e-vasl se ba.Dh kar Gam-e-furqat pe ga.ii
KHarch karne ke liye ghar se raqam aatii thii
foreign exchange ke permit pe go kam aatii thii
ham piccadily pe har ik shaam milaa karte the
biich baazaar sar-e-'aam milaa karte the
maGribii raqs mujhe go ki nahii.n aataa thaa
us ne ik din me.n sikhaa Daalaa magar chaa chaa chaa
roz kamre me.n slow waltz kiyaa kartaa thaa
mai.n mai-e-husn ko chakh chakh ke piyaa kartaa thaa
vo ga.ii aur milii phir vo ga.ii aur milii
baa'z auqaat bahut jald va fil-faur milii
ab ye 'aalam hai ki bas KHuun-e-jigar piitaa huu.n
zindagii maut se bad-tar hai magar jiitaa huu.n

Betab Amrohvi
Nazm

rag-yug ki nazmen

baajaa kabhii na thamne vaalaa
shevan suukhii phaliyo.n kaa
gard-aaluud havaa ke jhakka.D
itnii uthal-puthal jaarii
sannaaTaa phir bhii sannaaTaa
ik khi.nchii kamaan
vo kab TuuTaa kab phuuTaa

Shafiq Fatima Shera
Nazm

tazmin bar-ashaar-e-ghaalib

vaa dareGaa thaa dil-e-biimaar-e-Gam ko aasraa
aab-e-teG-e-naaz se ik din mujhe hogii shifaa
hasrat ai shauq-e-jaraahat! ruKHsat ai zauq-e-fanaa
haath hii teG-aazmaa kaa kaam se jaataa rahaa
dil pe ik lagne na paayaa zaKHm-e-kaarii haa.e haa.e

Ze Khe Sheen
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

latifa

ik shaah aur ik shaahzaada
ghar se pahne hu.e labaada
jangal ko chale shikaar karne
chiital pe hiran pe vaar karne
garmii jo ba.Dhii utaar Daale
vo garm libaade uun vaale
ik masKHaraa bhii thaa saath un ke
aayaa thaa kahii.n se haath un ke
kaa.ndhe pe ye us ke Daal kar vo
kahne lage dekh-bhaal kar vo
ab bojh hai tum pe ik gad.he kaa
sunte hii vo masKHaraa ye bolaa
ye baat nahii.n huzuur-e-vaalaa
hai bojh ye mujh pe do gadho.n kaa

Mohammad Shafiuddin Nayyar
Nazm

hijrat

vo pattharo.n ke qabiile kii reshmii la.Dkii
rivaayato.n kii fasiilo.n me.n KHud ko qaid kiye
fareb-e-zaat kii ik KHushnumaa havelii me.n
akele-pan kii kathaa sun rahii thii phuulo.n se
aur apne aap ko bahlaa.e thii parindo.n se
ki us kii ruuh kii vaadii me.n ik hiran-jazba
qulaa.nche.n bhartaa hu.aa khaa.iyo.n me.n dau.D gayaa
ye pattharo.n ke qabiile kii shaahzaadii bhii
har e'timaad kii zanjiir to.D kar niklii
talaash kartii hu.ii apnaa vo hiran-jazba
dukho.n kii jhiil kinaare udaas aa baiThii

Ishrat Afreen
Nazm

mushk wala hiran

apnii duniyaa kaa sab se niraalaa hiran
uttrakhand kaa bholaa-bhaalaa hiran

Mateen Achalpuri
Nazm

nili gard ka zamzam

mai.n taKHayyul ke tashaddud kaa shikaar
dekhtaa huu.n aasmaa.n se saaya saaya chiith.De girte hu.e
sun rahaa huu.n
fa.Dfa.Daatii dhuup kii piilii sadaa
dard kii buu.Dhii chu.Dele.n
aa.nkh ke sahraa me.n apnii retlii aavaaz me.n sab ko pukaare.n
aa.o aa.o
mai.n akelaa apne sannaaTe me.n gird-o-pesh ke aashob me.n khoyaa hu.aa
chal rahaa huu.n
raaste ke sa.ng-reze aa.nkh se chunte hu.e
taaki pathraa.ii hu.ii mar mar kii sa.Dke.n rafta rafta mere paa.nv chaaT le.n
chal rahaa huu.n
jaane kis jaanib mujhe jaanaa hai kyuu.n jaanaa hai
shaayad faaslo.n kii intihaa uftaadgii hai
aur shaayad manzile.n is vaahime kii maut kii manzar hai.n
jo taaza lahuu ke aa.iine kaa aks hai
aur kyaa maaluum ye bhii vaahima ho
kaash ko.ii lafz apnii band muTThii khol de
aur kaaGaz par bichhii satro.n kaa jaal
mujh pe chaaro.n samt se aa kar gire
kyaa KHabar aazaad ho jaa.uu.n vadaq riit ke kohraam se
chiiKHtii chiile.n zamii.n se saaya saaya chiitha.Do.n ko le u.De.n
aur mai.n miTTii kii na.ngii god me.n leTe hu.e
aasmaa.n ko apne uupar o.Dh luu.n

Aftab Iqbal Shamim
Nazm

pas-e-aina

mujhe jamaal-e-badan kaa hai e'tiraaf magar
mai.n kyaa karuu.n ki varaa-e-badan bhii dekhtaa huu.n
ye kaa.enaat faqat ek ruKH nahii.n rakhtii
chaman bhii dekhtaa huu.n aur ban bhii dekhtaa huu.n
mirii nazar me.n hai.n jab husn ke tamaam andaaz
mai.n fan bhii dekhtaa huu.n fikr-o-fan bhii dekhtaa huu.n
nikal gayaa huu.n fareb-e-nigaah se aage
mai.n aasmaa.n ko shikan-dar-shikan bhii dekhtaa huu.n
vo aadmii ki sabhii ro.e jin kii mayyat par
mai.n us ko zer-e-kafan KHanda-zan bhii dekhtaa huu.n

Ahmad Nadeem Qasmi
Nazm

jiwan-rut ka zard safar

jism
shikan-aaluud
thakan kii chaadar o.Dhe
raat ko chup kii
narm masahrii
par soyaa hai
gum-sum hai
khoyaa khoyaa hai
nii.nd ke malmal jaise
niile haale me.n
terii yaade.n
raqs kii suurat
kho.e hu.e sundar
deso.n kaa
qarya qarya ghuum rahii hai.n
jiivan ke sat-rang pahante
giit kii lai par
haule haule jhuum rahii hai.n
jiivan-rut ke zard safar me.n
aa.nkho.n ke darvaazo.n se
daaKHil hote dulhan jaise
kore KHvaab
tere paikar kii KHushbuu
se ujlii ujlii baate.n karte
resham haath
merii apnii gardan kii
ruu.o.n se khel rahe hai.n
tanhaa.ii ke bhor samo.n me.n
khulne vaalaa
hijr kaa mausam jhel rahe hai.n
sub.h jab hogii
TuuTe badan kii Thiikriyo.n ko
kun kaa maalik jo.D ke
phir se siidhaa kar degaa
haDDiyo.n ke guude me.n
ek na.e din ke jiivan kii
sabz ummiide.n bhar bhar degaa
yuu.n jiivan ke
godaam me.n jaltii saa.nso.n kaa
ek aur suhaanaa din
shaam kii chakkii me.n
daana daana ho kar pis jaa.egaa
aur jism yuu.nhii dhiire dhiire
ik roz shikan-aaluud thakan kii
chaadar o.Dhe
maran barat kii
narm masahrii par so jaa.egaa

Ashraf Jawed Malik
Nazm

jokham

jab kabhii mai.n apnii ko.ii
puraanii likhii nazm uThaa.uu.n
to vo kuchh badlii badlii sii lagtii hai
use jitnii baar pa.Dho utnii hii baar
merii raa.e us ke baare me.n badalne lagtii hai
ki kabhii nazm jii ko achchhii lagtii hai
to kabhii akhartii hai
kabhii chehre pe muskaan to kabhii maathe pe shikan
aane lagtii hai

Uday Bansal
Nazm

aaKHiri shab

kurra-e-arz pe insaan kii ye aaKHirii shab
roz-e-avval ke ujaale kii tarah raushan hai
aasmaano.n kii taraf aag ke sho.ale hai.n davaa.n
kaun jaane inhii rasto.n se farishte ho.n ravaa.n
arz se us ke KHaliifa ko uThaane ke liye
us ko apne vatan-e-asl me.n laane ke liye
is liye din ke ujaale kii tarah raushan hai
afv kii va.ada-o-paimaan kii ye aaKHirii shab
kurra-e-arz pe insaan kii ye aaKHirii shab
aur KHudaayaan-e-zamii.n ne bhii navaazaa us ko
ilm-o-tahziib-o-tamaddun se sa.nvaaraa us ko
mah-o-parvii.n kaa bhii yuu.n us ko sikhaayaa hai shikaar
ki KHudaavand-e-zamii.n hone lagaa us kaa shumaar
aur ibliis ne us ilm ko azmat de kar
apnii taKHriib ke aadam ko dikhaa.e jauhar
aur phir ahl-e-siyaasat ke hai.n ehsaan bahut
aish-e-insaa.n ke jinho.n ne kiye saamaan bahut
kii bahut chaaragarii ahl-e-siyaasat ne magar
puuchhe.n in chaaragaro.n se vo bitaa.e kyo.n kar
apne har dard ke darmaan kii ye aaKHirii shab
kurra-e-arz pe insaan kii ye aaKHirii shab

Naim Siddiqi
Nazm

ek bar Tahalti phir aae

ik siimii.n-badan ik tauba-shikan hai mahv-e-KHiraam station par
maah-e-taabaa.n maah-e-raushan maah-e-kaamil maah-e-anvar
iThlaatii hu.ii bal khaatii hu.ii aa.nchal pak.De mu.nh ko mo.De
kuchh se bhi.Dtii kuchh se kaTtii kuchh dil jo.De kuchh dil to.De
madfuun hazaaro.n ke armaa.n ubhre hu.e gore shaano.n me.n
majruuh pa.De ho.nge kitne in pardesii insaano.n me.n
kaalii matvaalii aa.nkho.n me.n pinhaa.n be-rut kii barsaate.n
bebaak nazar kii shoKHii me.n KHvaabiida gunaaho.n kii raate.n
fitrat kaa sunahraa tohfa hai ye husn-o-ishq ke aalam me.n
yaa tasviiro.n kii malika hai ruumaan ke rangii.n album me.n
vo rafta-rafta ab merii nazro.n se chhuptii jaatii hai
ab station ke us jaanib rahgiiro.n ko bahkaatii hai
purvaa ke ik jho.nke kii tarah guzrii dil kii aabaadii se
kaliyo.n ko be-mahkaa.e hu.e chal dii hasrat kii vaadii se
dariyaa kii ik mauj-e-siimii.n saahil se Takraa kar chal dii
barsaat ke dhu.ndle baadal me.n ik barq sii lahraa kar chal dii
in chalte-phirte saayo.n se ulfat kii tamanna kaun kare
jo apne bas se baahar ho.n phir un kii parvaa kaun kare
lekin haa.n itnii KHvaahish hai ai kaash jo puurii ho jaa.e
allaah kare vo doshiiza ik baar Tahaltii phir aa.e

Salam Sandelvi
Nazm

shaitanat

kahne ko shahr-yaar bhii hai.n
aur shahr bhii
lekin ko.ii makiin
na ko.ii makaan hai
jhulse hu.e daraKHt hai.n
bele.n jalii hu.ii.n
paude hu.e hai.n KHaak
suukhii hai pattii pattii to
uj.De hai.n barg-o-baar
aur saare shahr
lipTe hu.e hai.n Gubaar me.n
sab hai.n dhu.aa.n dhu.aa.n
insaaniyat hai sar-niguu.n
jangal kaa raaj hai
aur sar uThaa.e
siina phulaa.e hai.n shahr-yaar
goyaa ye kah rahe hai.n
ki do kuchh KHiraaj-baaj
paa.ii hai.n tum ne apne
muraado.n kii kashtiyaa.n
ham ne to
apnaa va.ada kiyaa aap se vafaa
ab ham ko milnaa chaahiye
is kaam kaa sila
taaki ai shahryaar
dikhaa.e.n ham aap ko
shaitaa.n ke khel aur
maz.hab kii aa.D me.n kare.n
insaaniyat kaa KHuu.n
dahshat-pasand ham ko kahe.n
kis kii hai majaal

Ashraf Rafi
Nazm

pata nahin wo kaun tha

pata nahii.n vo kaun thaa
jo mere haath
muugre kii Daal pa.nkh mor kaa thamaa ke chal diyaa
pata nahii.n vo kaun thaa
havaa ke jho.nke kii tarah jo aayaa aur guzar gayaa
nazar ko rang dil ko nik.hato.n ke dukh se bhar gayaa
mai.n kaun huu.n
guzarne vaalaa kaun thaa
ye phuul pa.nkh kyaa hai.n kyuu.n mile
ye sochte hii sochte tamaam rang ek rang me.n utarte ga.e
......siyaah ra.ng
tamaam nik.hate.n idhar udhar bikhar ga.ii.n
.........KHalaao.n me.n
yaqiin hai...... nahii.n nahii.n gumaan hai
vo ko.ii meraa dushman-e-qadiim thaa
dikhaa ke jo saraab merii pyaas aur ba.Dhaa gayaa
mai.n be-hisaab aarzuu.o.n kaa shikaar
intihaa-e-shauq me.n fareb us kaa khaa gayaa
gumaan... nahii.n nahii.n yaqiin hai
vo ko.ii meraa dost thaa
jo do gha.Dii ke vaaste hii kyuu.n na ho
nazar ko rang dil ko nik.hato.n se bhar gayaa
pata nahii.n kidhar gayaa
mai.n is ko Dhuu.nDhtaa hu.aa
tamaam kaa.enaat me.n
udhar udhar bikhar gayaa

Bashar Nawaz
Nazm

ek gap

do gap-baazo.n ne kal mujh ko
ek kahaanii yuu.nhii sunaa.ii
jhuuT hai sach hai rab hii jaane
log puraane ye kahte the
ek zamaana aisaa bhii thaa
chaa.nd sitaare suuraj saare
saath rahaa karte the
ik din ik nanhe taare kii
saalgirah jo aa.ii
suuraj ne sab
aasmaan ke baashindo.n ko
ghar pe ziyaafat par bulvaayaa
cake ba.Daa saa kahkashaa.n ke
ik baazaar se aaya
khiir magar ghar par hii pakegii
aisaa ghar me.n tai paayaa

Mohammad Asadullah
Nazm

hum aur waldain

jab apne kaar-e-KHair pe shaadaa.n hu.aa karo
us vaqt vaaldain ke haq me.n du'aa karo

Salim Husain
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now