Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "ved"

Nazm MATCHES FOR "ved"

Nazm

tum hi kaho kya karna hai

jab dukh kii nadiyaa me.n ham ne
jiivan kii naav Daalii thii
thaa kitnaa kas-bal baa.nho.n me.n
lohuu me.n kitnii laalii thii
yuu.n lagtaa thaa do haath lage
aur naav puuram paar lagii
aisaa na hu.aa, har dhaare me.n
kuchh an-dekhii ma.njdhaare.n thii.n
kuchh maa.njhii the anjaan bahut
kuchh be-parkhii parvaare.n thii.n
ab jo bhii chaaho chhaan karo
ab jitne chaaho dosh dharo
nadiyaa to vahii hai, naav vahii
ab tum hii kaho kyaa karnaa hai
ab kaise paar utarnaa hai
jab apnii chhaatii me.n ham ne
is des ke ghaav dekhe the
thaa vedo.n par vishvaash bahut
aur yaad bahut se nusKHe the
yuu.n lagtaa thaa bas kuchh din me.n
saarii biptaa kaT jaa.egii
aur sab ghaav bhar jaa.e.nge
aisaa na hu.aa ki rog apne
kuchh itne Dher puraane the
ved in kii Toh ko paa na sake
aur ToTke sab be-kaar ga.e
ab jo bhii chaaho chhaan karo
ab jitne chaaho dosh dharo
chhaatii to vahii hai, ghaav vahii
ab tum hii kaho kyaa karnaa hai
ye ghaav kaise bharnaa hai

Faiz Ahmad Faiz
Nazm

dharti ki sulagti chhati se bechain sharare puchhte hain

dhartii kii sulagtii chhaatii se bechain sharaare puuchhte hai.n
tum log jinhe.n apnaa na sake vo KHuun ke dhaare puuchhte hai.n
sa.Dko.n kii zabaa.n chillaatii hai saagar ke kinaare puuchhte hai.n
ye kis kaa lahuu hai kaun maraa ai rahbar-e-mulk-o-qaum bataa
ye jalte hu.e ghar kis ke hai.n ye kaTte hu.e tan kis ke hai.n
taqsiim ke andar tuufaa.n me.n luTte hu.e gulshan kis ke hai.n
bad-baKHt fazaa.e.n kis kii hai.n barbaad nasheman kis ke hai.n
kuchh ham bhii sune.n ham ko bhii sunaa
kis kaam ke hai.n ye diin-dharm jo sharm kaa daaman chaak kare.n
kis tarah ke hai.n ye desh-bhagat jo baste gharo.n ko KHaak kare.n
ye ruuhe.n kaisii ruuhe.n hai.n jo dhartii ko naapaak kare.n
aa.nkhe.n to uThaa nazre.n to milaa
jis raam ke naam pe KHuun bahe us raam kii 'izzat kyaa hogii
jis diin ke haatho.n laaj luTe is diin kii qiimat kyaa hogii
insaan kii is zillat se pare shaitaan kii zillat kyaa hogii
ye ved haTaa qur.aan uThaa
ye kis kaa lahuu hai kaun miraa
ai rahbar-e-mulk-o-qaum bataa

Sahir Ludhianvi
Nazm

rishwat

ye hai mil vaalaa vo baniyaa hai ye saahuukaar hai
ye hai duukaa.n-daar vo hai ved ye attaar hai
vo agar Thag hai to ye Daaku hai vo baT-maar hai
aaj har gardan me.n kaalii jiit kaa ik haar hai

Josh Malihabadi
Nazm

nehru

jin taqaazo.n ne us ko diyaa thaa janam
un kii aaGosh me.n phir samaayaa na vo
KHuun me.n ved guu.nje hu.e
aur jabii.n par farozaa.n azaa.n
aur siine pe raqsaa.n saliib
be-jhijhak sab ke qaabuu me.n aayaa na vo

Kaifi Azmi
Nazm

kahani

dhuup pa.Dii, to khul ga.ii aa.nkhe.n, khul gayaa saaraa bhed
Gash khaayaa, to dau.De aa.e munshii, panDit, ved

Mustafa Zaidi
Nazm

pir-e-tasma-e-pa

mere kaa.ndhe pe baiThaa ko.ii
pa.Dhtaa rahtaa hai injiil o qur.aan o ved
makkhiyaa.n kaan me.n bhinbhinaatii hai.n
zaKHmii hai.n kaan
apnii aavaaz kaise sunuu.n
raanaa hinduu thaa akbar musalmaan thaa
sanjai vo pahlaa insaan thaa
hastinaapur me.n jis ne qabl-e-masiih
television banaayaa
aur ghar baiThe ik andhe raaja ko
yudh kaa tamaasha dikhaayaa
aadmii chaa.nd par aaj utraa to kyaa
ye taraqqii nahii.n
ab se pahle, bahut pahle
jab zarra TuuTaa na thaa
chashma jauhar kaa phuuTaa na thaa
farsh se arsh tak jaa chukaa hai ko.ii
ye aur aisii bahut sii jahaalat kii baate.n
mere kaa.ndhe pe hotii hai.n

Kaifi Azmi
Nazm

shuur

hai kaa.enaat mire dil kii dha.Dkano.n me.n asiir
mai.n ek zarra bisaat-e-nizaam-e-shamsii par
mai.n ek nuqta sar-e-kaa.enaat-e-vahm-o-shu.uur
ek qatra anal-bahr hai sadaa merii
mai.n kaa.enaat me.n tanhaa huu.n aaftaab kii tarah
mire lahuu me.n ravaa.n ved bhii hai.n qur.aa.n bhii
shajar hajar bhii hai.n sahraa bhii hai.n gulistaa.n bhii
ki mai.n huu.n vaaris-e-taariiKH-e-asr-e-insaanii

Ali Sardar Jafri
Nazm

wed

ved un ke dil-e-haq-kesh kii tasviire.n hai.n
jalva-e-qudrat-e-maabuud kii tafsiire.n hai.n

Chakbast Braj Narayan
Nazm

tulsidas

the puraan-o-ved-o-giitaa ke masaa.il jis qadar
silk-e-raamaa.en me.n rakhaa tuu ne sab ko baa.ndh kar
jo KHazaane the puraane un se the ham be-KHabar
aa.nkhe.n thii.n lekin na azmat apnii aatii thii nazar

Jagat Mohan Lal Ravan
Nazm

dharm-o-iman

bahut din se vatan me.n ik mahaaz-e-ja.ng qaa.em hai
kahii.n hai dharm ko KHatra kahii.n iimaan ko KHatra
bapaa hai saKHt tuufaa.n ruunumaa hai.n saKHt ha.ngaame
kahii.n hai ved ko KHatra kahii.n qur.aan ko KHatra
kahii.n masjid ko KHatra hai shivaale ke mahanto.n se
kahii.n hai KHaanqah vaalo.n se dev asthaan ko KHatra
kahii.n muslim ko KHatra apne iimaanii tahaffuz kaa
kahii.n hinduu ke puujaa-paaT ke sammaan ko KHatra
kahii.n shuddhii ke parchaarak ko KHatra dharm rakshaa kaa
kahii.n tabliiG ke jhanDe kii aan-baan ko KHatra
nahii.n hotaa ko.ii aisaa minute chaubiis ghanTe me.n
na rahtaa ho vatan vaalo.n ke maal-o-jaan ko KHatra
ye saarii pesh-ba.ndii hai faqat is baat kii KHaatir
ki laahaq ho na british raaj ke aivaan ko KHatra
ye Thekedaar diin aur dharm ke is ke bhii zaamin hai.n
na paidaa ho mafaad-e-ahal-e-inglistaan ko KHatra
ye KHaana-ja.ngiyaa.n jitnii hai.n sab kaa mudda.aa ye hai
na hargiz ruunumaa ho jaan bal kii jaan ko KHatra
Gulaamaan-e-azal ya.anii ye jhuuTe peshvaa-e-dii.n
lagaa rahtaa hai har dam jin ke dastar-KHvaan ko KHatra
vo kab chaahe.nge ko.ii is tarah kaa inqalaab aa.e
ki ho mahsuus un ke amn-o-itmiinaan ko KHatra
hamaaraa farz hai ham un lafango.n ko fanaa kar de.n
ki hai un sab ke sab se aam hindostaan ko KHatra

Ahmaq Phaphoondvi
Nazm

jidhar dekhta hun udhar tu hi tu hai

bulbul ke chahchahe me.n
Guncho.n ke qahqahe me.n
rang-e-gul-e-chaman me.n
KHushbuu-e-yaasman me.n
bustaan-e-pur-fazaa me.n
sarsar me.n aur sabaa me.n
dariyaa ke paaniyo.n me.n
us kii ravaaniyo.n me.n
sahraa.o.n me.n bhii huu.n mai.n
parbat kii kundaro.n me.n
suuraj me.n chandramaa me.n
anjum me.n kahkashaa.n me.n
motii ke jhalakne me.n
hiire ke damakne me.n
har sham-e-anjuman me.n
parvaana kii jalan me.n
tabla kii har sadaa me.n
tambuur kii navaa me.n
aalam kii suurato.n me.n
miTTii kii muurato.n me.n
phir qalb-e-paarsaa me.n
aur siina-e-safaa me.n
naaquus me.n azaa.n me.n
aur ved me.n quraa.n me.n
kaahin kii bansurii me.n
aur naGma-e-‘purii’ me.n

Narayan Das Puri
Nazm

maharishi-swami-dayanand

apnii tahziib jise log bhulaa baiThe the
ved-mantar se vahii yaad dilaataa aayaa

Charkh Chinioti
Nazm

sachcha wed

he dayaa-ma.e ham ko shaktii aur viddyaa daan kar
duur ho.n vipdaa hamaarii sab kaa tuu kalyaan kar
bhed zaat aur paat kaa ab tuu miTaa de hind se
mere bhaarat kii sabhii desho.n me.n uu.nchii shaan kar
ham dharam-parsaar me.n saare lage.n ai iishvar
phir se saare desh me.n paidaa isii kaa gyaan kar
kaaT de har dukh kaa bandhan ho sadaa terii dayaa
merii is bintii pe ai bhagvan zaraa kuchh dhyaan kar
ved ke amrit ko pii kar mukt ho jaa.e.n sabhii
gyaan sachchaa ved kaa 'betaab' ko bhii daan kar

Betab Alipuri
Nazm

KHarbuza

ek achchhii Gizaa hai KHarbuuza
ek sastii davaa hai KHarbuuza
phal hai bachcho ye garm mausam kaa
jab ki is kaa mizaaj hai ThanDaa
log is ko KHariid laate hai.n
aur khaa kar sukuun paate hai.n
biij bhii is ke kaam aate hai.n
ved in se davaa banaate hai.n
ye KHudaa kii hai ik ba.Dii ne.amat
faa.ide-mand aur kam qiimat

Murtaza Sahil Tasleemi
Nazm

sham-e-ayaadat

(3)
na.e zamaane me.n agar udaas KHud ko paa.uu.ngaa
ye shaam yaad kar ke apne Gam ko bhuul jaa.uu.ngaa
ayaadat-e-habiib se vo aaj zindagii milii
KHushii bhii chau.nk chauk uThii Gam kii aa.nkh khul ga.ii
agarche doctor ne mujh ko maut se bachaa liyaa
par is ke baa'd us nigaah ne mujhe jilaa liyaa
nigaah-e-yaar tujh se apnii manzile.n mai.n paa.uu.ngaa
tujhe jo bhuul jaa.uu.ngaa to raah bhuul jaa.uu.ngaa
(4)
qariib-tar mai.n ho chalaa huu.n dukh kii kaa.enaat se
mai.n ajnabii nahii.n rahaa hayaat se mamaat se
vo dukh sahe ki mujh pe khul gayaa hai dard-e-kaa.enaat
hai apne aa.nsu.o.n se mujh pe aa.iina Gam-e-hayaat
ye be-qusuur jaan-daar dard jhelte hu.e
ye KHaak-o-KHuu.n ke putle apnii jaa.n pe khelte hu.e
vo ziist kii karaah jis se be-qaraar hai fazaa
vo zindagii kii aah jis se kaa.np uThtii hai fazaa
kafan hai aa.nsu.o.n kaa dukh kii maarii kaa.enaat par
hayaat kyaa inhe.n haqiiqato.n se honaa be-KHabar
jo aa.nkh jaagtii rahii hai aadmii kii maut par
vo abr-e-ra.ng-ra.ng ko bhii dekhtii hai saada-tar
sikhaa gayaa dukh miraa puraanii piir jaan.naa
nigaah-e-yaar thii jahaa.n bhii aaj merii rahnumaa
yahii nahii.n ki mujh ko aaj zindagii na.ii milii
haqiiqat-e-hayaat mujh pe sau tarah se khul ga.ii
gavaah hai ye shaam aur nigaah-e-yaar hai gavaah
KHayaal-e-maut ko mai.n apne dil me.n ab na duu.ngaa raah
jiyuu.ngaa haa.n jiyuu.ngaa ai nigaah-e-aashnaa-e-yaar
sadaa suhaag zindagii hai aur jahaa.n sadaa-bahaar
(5)
abhii to kitne naa-shuniida naGma-e-hayaat hai.n
abhii nihaa.n dilo.n se kitne raaz-e-kaa.enaat hai.n
abhii to zindagii ke naa-chashiida ras hai.n saik.Do.n
abhii to haath me.n ham ahl-e-Gam ke jas hai.n saik.Do.n
abhii vo le rahii hai.n merii shaa.erii me.n karvaTe.n
abhii chamakne vaalii hai chhupii hu.ii haqiiqate.n
abhii to bahr-o-bar pe so rahii hai.n merii vo sadaa.e.n
sameT luu.n unhe.n to phir vo kaa.enaat ko jagaa.e.n
abhii to ruuh ban ke zarre zarre me.n samaa.uu.ngaa
abhii to sub.h ban ke mai.n ufuq pe thartharaa.uu.ngaa
abhii to merii shaa.erii haqiiqate.n luuTaa.egii
abhii mirii sadaa-e-dard ik jahaa.n pe chhaa.egii
abhii to aadmii asiir-e-daam hai Gulaam hai
abhii to zindagii sad-inqalaab kaa payaam hai
abhii tamaam zaKHm o daaG hai tamaddun-e-jahaa.n
abhii ruKH-e-bashar pe hai.n bahmiyat kii jhaa.iyaa.n
abhii mashiyyato.n pe fat.h paa nahii.n sakaa bashar
abhii muqaddaro.n ko bas me.n laa nahii.n sakaa bashar
abhii to is dukhii jahaa.n me.n maut hii kaa daur hai
abhii to jis ko zindagii kahe.n vo chiiz aur hai
abhii to KHuun thoktii hai zindagii bahaar me.n
abhii to rone kii sadaa hai naGma-e-sitaar me.n
abhii to u.Dtii hai.n ruKH-e-bahaar par havaa.iyaa.n
abhii to diidanii hai.n har chaman kii be-fazaa.iyaa.n
abhii fazaa-e-dahr legii karvaTo.n pe karvaTe.n
abhii to sotii hai.n havaa.o.n kii vo sansanaahaTe.n
ki jis ko sunte hii hukuumato.n ke ra.ng-e-ruKH u.De.n
chapeTe.n jin kii sarkasho.n kii gardane.n maro.D de.n
abhii to siina-e-bashar me.n sote hai.n vo zalzale
ki jin ke jaagte hii maut kaa bhii dil dahal uThe
abhii to batn-e-Gaib me.n hai is savaal kaa javaab
KHudaa-e-KHair-o-shar bhii laa nahii.n sakaa thaa jis kii taab
abhii to god me.n hai.n devtaa.o.n kii vo maah-o-saal
jo de.nge ba.Dh ke barq-e-tuur se hayaat ko jalaal
abhii rag-e-jahaa.n me.n zindagii machalne vaalii hai
abhii hayaat kii na.ii sharaab Dhalne vaalii hai
abhii chhurii sitam kii Duub kar uchhalne vaalii hai
abhii to hasrat ik jahaan kii nikalne vaalii hai
abhii ghan-garaj sunaa.ii degii inqalaab kii
abhii to gosh-bar-sadaa hai bazm aaftaab kii
abhii to puu.njii-vaad ko jahaan se miTaanaa hai
abhii to saamraajo.n ko sazaa-e-maut paanaa hai
abhii to daa.nt piistii hai maut shahryaaro.n kii
abhii to KHuu.n utar rahaa hai aa.ankho.n me.n sitaaro.n kii
abhii to ishtiraakiyat ke jhanDe ga.Dne vaale hai.n
abhii to ja.D se kisht-o-KHuu.n ke nazm ukha.Dne vaale hai.n
abhii kisaan-o-kaamgaar raaj hone vaalaa hai
abhii bahut jahaa.n me.n kaam-kaaj hone vaalaa hai
magar abhii to zindagii musiibato.n kaa naam hai
abhii to nii.nd maut kii mire liye haraam hai
ye sab payaam ik nigaah me.n vo aa.nkh de ga.ii
ba-yak-nazar kahaa.n kahaa.n mujhe vo aa.nkh le ga.ii

Firaq Gorakhpuri
Nazm

hiroshima ki piDa

kisii raat ko
merii nii.nd achaanak uchaT jaatii hai
aa.nkh khul jaatii hai
mai.n sochne lagtaa huu.n ki jin vaigyaniko.n ne anu-astro.n kaa
avishkaar kiyaa thaa
ve hiroshima naagaa-saakii ke
bhiishan narsanhaar ke samaachaar sun kar
raat ko so.e kaise ho.nge

Atal Bihari Vajpayee
Nazm

din diwangat hue

roz aa.nsuu bahe roz aahat hu.e
raat ghaayal hu.ii din diva.ngat hu.e
ham jinhe.n har gha.Dii yaad karte rahe
rikt man me.n na.ii pyaas bharte rahe
roz jin ke hirdai me.n utarte rahe
ve sabhii din chitaa kii lapaT par rakhe
roz jalte hu.e aaKHirii KHat hu.e
din diva.ngat hu.e

Kunwar Bechain
Nazm

makhan-chor

chorii Daaka KHuun-KHaraaba nafrat aur fasaad
jab bhii netaa bhaashan deve.n phaile jaatii-vaad
gautam aur naanak kii shikshaa kis ne rakkhii yaad

Sabir Dutt
Nazm

dastur sazi ki koshish

yuu.n to har shaa.ir kii fitrat me.n hai kuchh diivaangii
Gair zimmedaariyaa.n hai.n us kii juzv-e-zindagii
arz-e-sheristaan me.n ye shaa.iraana KHaasiyat
cancer kii tarah se jab phailne ba.Dhne lagii
muKHtalif school jab ja.ngii akhaa.De ban ga.e
fikr-o-fan me.n jab niraajii kaifiyat paidaa hu.ii
mumlikat me.n zaabta ko.ii na jab baaqii rahaa
har jagah qaanuun kii hone lagii be-hurmatii
ek ik tuk-band ustaado.n ke mu.nh aane lagaa
likh ke sub.h-o-shaam nazme.n be-tukii se be-tukii
kuu.De-karkaT kii tarah har suu nazar aane lage.n
Dheriyaa.n hii Dheriyaa.n diivaan-e-KHaas-o-aam kii
had to ye hai ahl-e-machhlii-shahr bhii karne lage
maahii-giirii chho.D kar din raat fikr-e-shaa.irii
jin se bohraan-e-Gizaa state me.n paidaa hu.aa
qaht-e-maahii se ba.Dhii har chaar jaanib bhuk-marii
chand qaumii dard rakhne vaale ahlurraa.e se
qaum kii naa-gufta-ba-haalat na jab dekhii ga.ii
ek dastuur-ul-amal tayyaar karne ke liye
ik kametii 'amn'-saahab kii sadaarat me.n banii
taaki is par chal ke nazm-o-zabt aa.e qaum me.n
taaki kuchh to mo.atadil ho shaa.iro.n kii zindagii
duusre kaamo.n me.n bhii qaumii energy sarf ho
tuk faroshii ke alaava bhii to maqsad ho ko.ii
daur-e-'aflaatuun'-o-'tulsii-das' se 'iqbaal' tak
history kal shaa.iro.n kii is kametii ne pa.Dhii
duusre mulko.n ke aa.iin-o-zavaabit me.n jahaa.n
jo munaasib baat thii vo chhaa.nT kar rakh lii ga.ii
raat din kii saKHt mehnat aur jaa.n-sozii ke ba.ad
is kametii ne report apnii bil-aaKHir pesh kii
KHaaka-e-dastuur-e-qaumii ya.anii vo she.rii report
'amn'-saahab ne raqam kii thii ba-sinf-e-masnavii
is pe raa.e-aamma ma.aluum karne ke liye
shaa.iro.n ko naql dastaavez kii bhejii ga.ii
muKHtalif ahl-e-suKHan ne apne apne taur par
raa.e dii dastuur me.n tarmiim yaa tansiiKH kii
masnavii me.n KHaamiyaa.n Dhuu.nDe.n zabaa.n kii jaa-ba-jaa
ek shaa.ir ne jo the shaagird-e-nuuh-naarvii
saik.Do.n misre badal kar rakh diye kuchh is tarah
nafs-e-mazmuu.n nazr ho kar rah gayaa islaah kii
un kaa kahnaa thaa ki bandish chust honii chaahiye
sher ke andar balaa se ho na fikrii taazgii
na.at-go hazraat kaa kahnaa thaa shaa.ir ke liye
shart avval hai ki ho jaa.e vo kaTTar maz.habii
aaqibat kii baat soche aur munaajaate.n likhe
us ke jan me.n kaar-aamad shaa.irii hai bas vahii
aise shaa.ir jo ki haamii the taraqqii-vaad ke
in kaa kahnaa thaa ki shaa.ir kaa suKHan ho maqsadii
ya.anii pahle se muqarrar-karda mauzuaat par
mumlikat me.n aam kii jaa.e shu.uurii shaa.irii
KHvaah sheristaan me.n is kaa na ho ko.ii vajuud
laaziman dikhlaa.ii jaa.e kashmakash tabqaat kii
ik qabiila jo muKHaalif thaa shu.uurii fikr kaa
thaa taraqqii-vaadiyo.n se jis ko buGz-e-lillaahii
is qabiile kaa ye kahnaa thaa ki shaa.ir kaa kalaam
laaziman ho ik mu.amma qaid-e-ma.anii se barii
jis ko shaa.ir KHud na samjhe nazm kar lene ke ba.ad
jis ko pa.Dh kar gum ho aql-e-maulvii-e-ma.anavii
dekh kar dastuur me.n nazm-o-nasq kaa tazkira
saKHt barham ho ga.e kul shaa.iraan-e-naksalii
in kaa nukta thaa ki shaa.ir fitratan aazaad hai
us pe lag saktii nahii.n paabandiyaa.n tanziim kii
zindagii me.n zaabta laane ke bilkul the KHilaaf
saath naksal-vaadiyo.n ke duusre hazraat bhii
muKHtasar ye hai ki sab ne rad kiyaa dastuur ko
saarii mehnat 'amn'-saahab kii akaarat ho ga.ii
dekh kar naa-aaqibat andeshii-e-ahl-e-suKHan
is tarah goyaa hu.ii un kii mohazzab KHaamushii
me.nDako.n ko taulnaa aasaa.n nahii.n hai jis tarah
shaa.iro.n ko bhii munazzam karnaa mushkil hai yuu.nhii

Raza Naqvi Vahi
Nazm

email

yuu.n hii email se aa jaate hai.n saada se KHutuut
saadgii itnii ki KHushbuu na ve rang liye
haa.n vahii rang jo tere lab-o-ruKHsaar kaa hai
ab to kaaGaz pe ko.ii naqsh ubhartaa hii nahii.n
haa.n vahii naqsh tere meh.ndii lage haatho.n kaa
ab kisii harf se aatii nahii.n KHushbuu terii
kaise alfaaz hai.n ye jo terii saa.nso.n kii mahak
bin sameTe hu.e chup-chaap chale aate hai.n
itnii chup-chaap ki aahaT bhii nahii.n mil paatii
kam se kam dekhiye aavaaz diyaa kartaa thaa
aur ab ham yahaa.n logo.n kiyaa karte hai.n
KHat ke pahluu me.n ab aataa hii nahii.n zulf kaa baal
ab to mahsuus nahii.n hotii zabaan-e-tasliim
ab to screen pe aadaab liyaa karte hai.n
ab faqat Dhuu.nDh ke rah jaate hai.n suurat terii
ab to bas tuu hii samajhtaa hai zaruurat merii
ai na.e daur ye email mubaarak ho tujhe
ye taraqqii kaa nayaa taur mubaarak ho tujhe
dil sulagtaa hai magar dekh dhu.aa.n bhii to nahii.n
ho.nT rakhuu.n to kahaa.n pairo.n ke nishaa.n bhii to nahii.n
dil ke bahlaane ko inbox me.n ghuum aataa huu.n
ain mumkin hai teraa mel ko.ii aayaa ho
garche aayaa bhii to maaluum hai kyaa laa.egaa
ik tasallii teraa paiGaam ko.ii laayaa ho
jaan kar zahar bhii ham zahar piye dete hai.n
jaane kyo.n page ko refresh kiye dete hai.n
mel khulte hii meraa saaraa bharam TuuT gayaa
dekhiye kyaa to hamesha ki liye chhuuT gayaa
tishnagii phir se vahii phir se vahii bechainii
ho.nT rakhuu.n to kahaa.n par ki nishaa.n bhii to nahii.n

Abdul Qadir
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now