Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "wiring"

Nazm MATCHES FOR "wiring"

Nazm

kala

kaalaa had se bhii kaalaa thaa
utnaa kaalaa jitnii terii soch
utnaa kaalaa jitnii tere dil kii kaalak
kaun thaa kaalaa
kaalaa kaalaa sochtaa jaataa
khurach khurach kar nochtaa jaataa
apnaa honaa khojtaa jaataa
jumlo.n kii badbuu ke andar
apnii KHushbuu suu.nghtaa jaataa
apnii cigarette phuu.nktaa jaataa
kaale kii cigarette bhii kaalii
kaale kaa gurda bhii kaalaa
kaale kii kuppii bhii kaalii
kaale kii chuskii bhii kaalii
kaale kaa har kash bhii kaalaa
har har kash se laal bhabhuukaa
kaale kii aa.nkhe.n bhii kaalii
aa.nkho.n se girne vaale sab aa.nsuu kaale
aur kaalii aa.nkho.n me.n dikhne vaalii
mushkil kii diivaar bhii kaalii
kaale kii to jiit bhii kaalii haar bhii kaalii
kaale ke sab balb bhii kaale
kaale kii sab wiring kaalii
wiring vo jo andar andar
sulag sulag kar
kaale kii saarii socho.n ko
aur KHvaabo.n ko
galaa chukii thii
jalaa chukii thii
jab vo chaltaa to lagtaa vo lahraataa hai
chalte chalte bal khaataa hai
gir jaataa hai
kaalaa kyaa thaa
kalang kaa Tiika
zamii.n kaa dhabba
kaalaa jis kii aag me.n jal kar raakh hu.aa thaa
kaale ke andar kii aag thii
yaa thii vo baahar kii aag
aag bhii kaalii
dhu.aa.n bhii kaalaa raakh bhii kaalii
aag se uThne vaalaa ik ik sho.ala kaalaa
kaale kii bebasii bhii kaalii
kaale kii khujlii bhii kaalii
kaale ke sab pho.De-phu.nsii chhaale kaale
kaale ko sab kaalaa kahne vaale kaale
ik din kaalii sa.Dak kinaare
ba.ngaalii ke paan ke cabin kii jaalii ko thaame kaalaa
ghuur rahaa thaa aate jaate
ra.ng-bira.nge kirdaaro.n ko
rickshaw motor cycle aur caro.n ko
ik lambii sii kaalii gaa.Dii
dhu.aa.n u.Daatii
chiiKHtii aur chillaatii guzrii
gahre kaale baalo.n vaalii gorii bachchii
ek galii se bhaagtii niklii
kaalaa bhaagaa
aur gorii bachchii ko puure zor se dhakkaa de kar
kaalii gaa.Dii ke dhakke ko KHud par jhelaa
kaalaa jaate jaate sab se kaisaa khelaa
gorii bachchii bach ga.ii lekin
kaalaa apnii jaa.n de baiThaa
piile laal gulaabii chehre
kaale kii jaanib jab lapke
sab ne dekhaa
kaale kii aa.nkho.n me.n chiiKH rahaa thaa ek savaal
kaale ke zaKHmo.n se bahne vaalaa KHuun thaa laal

Imran Shamshad Narmi
Nazm

world-bank

chalo aa.o
ham in jismo.n se
ek ik rag bhii khii.nche.n
aur rago.n ko wiring ke kaam me.n laa.e.n
phir in jismo.n ke sab a.azaa nicho.De.n
aur lahuu se is imaarat kaa
chamaktaa rang aur roGan banaa.e.n
imaarat jab mukammal ho chuke to
inhii.n jismo.n se kuchh ke maGz le kar
inhe.n sarmaa.e kii hiddat se pighlaa.e.n
asaase aur ba.Dh jaa.e.n

Harris Khalique
Nazm

punjab

viir-singh aur amritaa-piriitam yahaa.n maahir yahaa.n
'arsh' 'aKHtar' 'josh' aur 'mahruum' se shaa.ir yahaa.n

Arsh Malsiyani
Nazm

arz-e-watan

KHayaalaat me.n saKHt hai intishaar
taKHayyul pareshaa.n qalam be-qaraar
jahaa.n KHuun-aaluuda-o-KHuu.n-ra.ng hai
vatan par pa.Daa saaya-e-ra.ng hai
gul-o-laala hai.n musta.id be-takaa.n
rafiiqo.n ne rakkhii hathelii pe jaa.n
har ik lab pe hai bas yahii ik suKHan
hasiin aur dilkash hai arz-e-vatan
KHuluus aaj paamaal hai aur tabaah
usuul aaj daryuuza-KHvaah-e-panaah
giraftaar-e-aazaar duniyaa hai aaj
mohabbat pariishaan-o-rusvaa hai aaj
usuul-e-mohabbat ke ham tarjumaa.n
KHuluus-o-mohabbat ke ham paasbaa.n
divaano.n ko mutlaq nahii.n hai qaraar
sadaaqat se betaab dil paa.edaar
har ik lab pe hai bas yahii ik suKHan
hasiin aur dilkash hai arz-e-vatan
vatan hai ye naanak kaa farmaa.n-paziir
thaa gautam isii kaarvaa.n kaa amiir
mohabbat ne rutba diyaa hai buland
mohabbat ne sab ko kiyaa arjumand
hai Gairat kaa tuufaan chhaayaa hu.aa
hai bachcho.n me.n bhii josh aayaa hu.aa
iraade hai.n sab ke bahut ustuvaar
Gayuur aur bedaar hai.n jaa.n-nisaar
har ik lab pe hai bas yahii ik suKHan
hasiin aur dilkash hai arz-e-vatan
na dii dushmano.n ko kabhii is ne raah
himaala hai rif.at se aalam-panaah
himaala kii dilchasp hai daastaa.n
ye azmat nishaa.n sab kaa hai paasbaa.n
zamaane pe ye baat hai aashkaar
amaa us kii hai duKHtar-e-naam-daar
himaala kii azmat kii ham ko qasam
himaala kii rif.at kii ham ko qasam
hifaazat himaala kii ab farz hai
himaala kaa ham par ba.Daa qarz hai
ye kahte hai.n sab mil ke KHurd-o-kalaa.n
ki Gairat kaa is vaqt hai imtihaa.n
hu.aa ruu-e-sha.nkar hai Gusse se laal
dikhaa.egaa ab raqs taanDau jalaal
iraade hai.n sab ke bahut ustuvaar
Gayuur aur bedaar sab jaa.n-nisaar
har ik lab pe hai bas yahii ik suKHan
hasiin aur dilkash hai arz-e-vatan
muhaafiz hai.n ham amn ke laa-kalaam
zamaane ko dete hai.n budh kaa payaam
sabaa apne gulshan se jaatii hai jab
miTaatii hai duniyaa ke ra.nj-o-ta.ab
rasiilii hai sub.h aur rasiilii hai shaam
nihaa.n in me.n hai zindagii kaa payaam
rivaayat kaa mahfuuz kar ke vaqaar
hame.n luuTnaa hai KHushii kii bahaar
zaraa dekhiyegaa rafiiqo.n kii aan
hai rakkhii jinho.n ne hathelii pe jaan
har ik lab pe hai bas yahii ik suKHan
hasiin aur dilkash hai arz-e-vatan
hai izzat kaa jur.at kaa ab imtihaa.n
kahii.n jhuk na jaa.e vatan kaa nishaa.n
farebo.n se ko.ii panaptaa nahii.n
kabhii jhuuT kaa meva paktaa nahii.n
sadaaqat kaa hai bol-baalaa sadaa
nahii.n kaam aate daroG iftiraa
fazaa hai chaman kii hame.n saazgaar
hai paabanda-tar is zamii.n kii bahaar
har ik lab pe hai bas yahii.n ik suKHan
hasiin aur dilkash hai arz-e-vatan
hayaa aur muravvat hai jo pur rahe.n
hu.ii hai.n vo aa.nkhe.n bahut KHashmagii.n
ba.Dhe hai.n vatan kii taraf bad-qimaash
kaleja zamii.n kaa hu.aa paash paash
pahaa.Do.n pe hai barf Gusse se laal
fazaa.e.n hu.ii.n garm aatish misaal
hai.n jehlam me.n aane ko tuGyaaniyaa.n
har ik mauj par hai Gazab kaa samaa.n
mohabbat kii duniyaa ko dil me.n liye
bahaar-e-javaanii se paimaa.n kiye
vatan kii hifaazat ko tayyaar hai.n
mohabbat ke baada se sarshaar hai.n
hifaazat hai farz apne armaan kii
hame.n aaj parvaa nahii.n jaan kii
har ik lab pe hai bas yahii ik suKHan
hasiin aur dilkash hai arz-e-vatan
2
aa.o ba.Dho maidaan me.n shero.n dushman par yalGaar kare.n
qabr bane maidaan me.n us kii aisaa us par vaar kare.n
za.ng na lagne paa.e apne bhaarat kii aazaadii ko
aa.o zer-e-daam kare.n sayyaado.n kii sayyaadii ko
lauh-e-dil par naqsh karo har haal me.n zinda rahnaa hai
mulk kii KHidmat ke raste me.n jo dukh aa.e sahnaa hai
ye sailaab-e-surKH nahii.n hai zulm-o-sitam kii aa.ndhii hai
is sailaab ko roke.nge ham himmat ham ne baa.ndhii hai
shero.n kii aulaad ho tum in viiro.n kii santaan ho tum
mard-e-mujaahid mard-e-jarii ho yodhdhaa ho balvaan ho tum
saa.nchii maduraa amaritsar ajmer kii azmat tum se hai
sub.h-e-banaras shaam-e-avadh kii asl-o-haqiiqat tum se hai
taaj ajantaa aur elora ke vaahid fankaar ho tum
KHush-siirat KHush-suuraat KHush-muurat KHush-kirdaar ho tum
bhiilaa.ii chitranjan tum se bhaaka.D ana.ngal tum se hai
daamodar kii shaan hai tum se azmat-e-chanbal tum se hai
tum ne basaa.e shahr niraale jangal tum se ma.ngal hai.n
tum ne nikaalii nahre.n itnii sahraa tum se jal-thal hai.n
tum ne itnii himmat se dariyaa.o.n ke ruKH mo.D diye
tum ne khodii.n sura.nge.n itnii duur ke rishte jo.D diye
tum kashmiir kii arz-e-hasii.n ke nazzaaro.n me.n palte ho
kohsaaro.n ko phaa.ndte ho tum dariyaa.o.n pe chalte ho
tum mysore me.n virindaa-ban ke baaG sajaane vaale ho
uuTii shimla daarjiling se shahr basaane vaale ho
taatya-Tope laxmii-baa.ii Tiipuu kii aulaad ho tum
ja.ng ke fan me.n qaabil ho tum maahir ho ustaad ho tum
hinduu muslim sikh iisaa.ii jainii bodh aur paarsii
dahqaa.n taajir aur mulaazim saadhuu-sant aur siyaasii
le ke vatan kaa jhanDaa aa.o dushman par yalGaar kare.n
qabr bane ran-bhuum me.n us kii aisaa us par vaar kare.n

Arsh Malsiyani
Nazm

working lady

mai.n jab bhii ghar pe aatii huu.n
bahut sii chiize.n laatii huu.n
aur un chiizo.n me.n akasr
KHud ko rakh kar bhuul jaatii huu.n
pataa us vaqt chaltaa hai
ki jab takiye pe rakhne ko
mujhe sar hii nahii.n miltaa
mayassar KHvaab kaise ho.n
ki aa.nkhe.n hii nahii.n hotii.n
thakan se chuur haatho.n kii
mai.n jab jab siskiyaa.n suntii huu.n
apnii kirchiyaa.n chuntii huu.n
pahluu me.n kahii.n dil bhii nahii.n miltaa
mujhe bas paa.nv milte hai.n jo paa.nv paa.nv chalte
mujhe le jaate hai.n ik aise kamre me.n
jahaa.n par ko.ii meraa jism o.Dhe so rahaa hai
ye kis ne suu.iyaa.n sii ruuh me.n merii chubho dii hai.n
mai.n KHud ko to.D detii huu.n vahii.n par chho.D detii huu.n
so bas chup chaap ghar kii sii.Dhiyo.n par baiTh jaatii huu.n
havaa.e.n bain kartii.n jab baraabar se guzartii hai.n
paka.D kar haath un kaa paas hii apne biThaatii huu.n
na.e kuchh diip raushan kar ke KHud bhii muskuraatii huu.n
zaraa sii ek aurat huu.n
diyo.n kii lau me.n lekin jagmagaatii huu.n

Almas Shabi
Nazm

mohabbat

tumhe.n ye kis ne kah diyaa aaKHir
ki
kisii restaurant ke niim taariik goshe me.n
baiTh kar maddham sargoshiyo.n me.n
muskuraate labo.n se baat karnaa
aur icecream ke cup me.n chammach hilaate hu.e
KHvaahish-e-dil ko zabaa.n par le aanaa mohabbat hai
tumhe.n ye kis ne kah dayaa aaKHir
ki
kisii raqs-kade me.n
ham-raqs ke baalo.n ko chhuute hu.e dhiire se
dilkash dhuno.n ke hasii.n suro.n par
uThte hu.e qadmo.n kii taal par
aa.nkho.n me.n jhaa.nknaa
sitaaro.n ko chun lenaa
aur an-kahii sunaa denaa mohabbat hai
jaa.ez-o-naa-jaa.ez ke falsafe kaa asaa thaame
javaaz-e-had-o-be-had kii diivaar sajaa.e
bilaa dastak be-ruuh makaan-e-jism me.n dar aanaa mohabbat hai
mohabbat ko mahz chaar harf na samjho jinhe.n tum scrabble me.n isti.maal karte ho
na hii mohabbat ko.ii video game hai
jis me.n gum ho kar tum tension ko bhulaate ho
mohabbat ko wrong number samajh ke milaate ho
mohabbat ko.ii Daraa hu.aa parinda nahii.n
jise tum jumlo.n kii Dor se baa.ndhte ho
muTThii me.n band karte ho aur bhuul jaate ho
balki mohabbat to kisii vahshii qabiile kii chaalaak devii
tumhaarii anaa ko apne tilism me.n yuu.n qaid kartii hai
ki tum saaraa zo.am bhuul jaate ho
mohabbat man kaa sachchaa saudaa hai
ise baazaar me.n bechaa nahii.n karte
mohabbat ik naazuk sii la.Dkii
jise rulaayaa nahii.n karte
mohabbat ko zaa.e.a nahii.n karte

Fariya Hameed Chaudhry
Nazm

wrong concept

tumhaare aane pe
shaadiyaane baje the jo
vo nahii.n rahe
faqat vahii kiyaa
jo shaadiyaane bajaa rahe the
vo u.ngliyaa.n aur ho.nT bhii ab
zamii.n ke andar dabe hu.e hai.n
jo haath
maare KHushii ke
tum ko uThaa ke
jhuulaa jhulaa rahe the
vo aaj baarish ke thappa.Do.n se
phaTii hu.ii qabr me.n pa.De hai.n
ye aaj jo kuchh bhii ho rahaa hai
ye hai nahii.n ho chukaa samajh lo
ye vartamaan haal ya.anii present
is kaa concept hii Galat hai
haqiiqatan sirf do hii baate.n qubuul ho.ngii
ko.ii bhii shai yaa to ho chukii hai
yaa aage hogii
aur is kaa lubb-e-lubaab ye hai
jo aaya hai us ko jaanaa hogaa
chalo
mai.n chaltaa huu.n
allaah haafiz

Shadab Javed
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now