مردہ سانپ

گھنی شاخوں اورہری پتوں کی چھتری والا دارِ زعفران واحد درخت تھا جو لُرستان کے تخت آب و اشیون کے علاقے میں نظر آتا تھا۔ کچھ دن ہوئے، مجھے شوق پیدا ہوا کہ دارِ زعفران کو قریب سے جاکر دیکھا جائے۔ تخت آب میں خیمہ لگانے کے پہلے ہی دن میں نے ایک لرستانی سے اس درخت کا نام پوچھ لیا۔ اس سرزمین کے حد نگاہ تک پھیلے ہوئے پست و بلند میں یہ درخت پہچان میں آنے والا تنہا پیکر تھا جو ایک لمبے ٹیلے پر تنا کھڑا تھا، جیسے کوئی تماشاگر خود حیرت سے اپنی جگہ پر جم کر رہ گیا ہو۔ راتوں کو جب اندھیرا اترنے لگتا تو سیاہ پڑتے ہوئے سرخ افق کے پیش منظر میں درخت ایک دو گھنٹے تک کسی اساطیری ہیولے کی طرح نظر آتا رہتا۔ اور رات کی سیاہی جتنی بڑھتی جاتی اور ستارے جتنے روشن ہوتے جاتے، وہ تاریکی میں ڈوبتا اور گھلتاجاتا۔ تاریکی نیچے کی گھاٹیوں سے اٹھتی ہوئی آتی اور درخت کو اپنی لپیٹ میں لے لیتی۔ 

تیسرے دن میں نے درخت کے نزدیک جانے کا فیصلہ کیا۔ مغرب کے وقت میں نے چھڑی اٹھائی اور چل کھڑا ہوا۔ سید احمد، میرا خانساماں، بھی ہمراہ تھا۔ وہ کوئی پچیس سال کا ہوگا۔ اس کے پھولے پھولے گول زرد چہرے پر مہاسوں کی کثرت تھی اور اس کی اداس صورت میں اکیلی نمایاں چیز اس کی دھنسی ہوئی سوئی سوئی آنکھیں تھیں۔ 

سورج کی چمک اب آنکھوں کو چبھ رہی تھیں۔ کسی پیلے تھال کی طرح وہ دور کی پہاڑیوں سے تھوڑا اوپر فضا میں معلق تھا۔ اس کے اوپر آسمان میں ٹکے ہوئے چھدرے بادل کا رنگ کالا پڑتاجارہاتھا۔ اس کی نچلی گوٹ البتہ ابھی سرخ تھی۔ میرے سامنے پھیلی ہوئی زمین پر نالیاں نالیاں سی بنی ہوئی تھیں اور اس پر اٹھے ہوئے ٹیلے مل کر سمندر سے ابھری ہوئی بڑی بڑی مچھلیوں کی پیٹھوں کی طرح معلوم ہوتے تھے۔ 

نیچے کی گھاٹیوں میں سایے گہرے ہورہے تھے اور بلندی کی ماہی پشت زمین پر ہر طرف بکھری ہوئی کربی کی جھاڑیاں اورپتھروں کی سلیں دھوپ میں چمک رہی تھیں۔ یوں تو دن بھر ہی یہ علاقہ ویران اور خاموش رہتا تھا لیکن غروب کے وقت اس کا سناٹا پراسرار، وہم انگیز اورڈراؤنا سا ہوجاتا تھا۔ نیچے سامنے والی گھاٹی سے ایک بنجارا اوپر جارہا تھااور اس سے کچھ آگے بڑھ کر کئی اور بنجارے ایک اور پہاڑی کی کمر پر چل رہے تھے۔ ایک کگارے کے چھوٹے سے ہموار قطعے پر کئی سیاہ خیمے دکھائی دے رہے تھے۔ ان میں سے ایک کے اندر سے دھواں اوپر جارہا تھا۔ ایک اور خیمے کے سامنے رہ رہ کر شعلے بھڑک رہے تھے۔ 

ہم ڈھلانوں سے اترتے ہوئے سایہ دار میدان میں پہنچ گئے اور تڑخی ہوئی زمین پر مشکل سے پیر جماجما کر ایک اور دامن سے اوپر چڑھتے ہوئے ٹیلوں کی روشن پٹی تک آگئے۔ سورج نیچے اترتا جارہا تھا جیسے کسی طلائی تمغے کی زنجیر کو آہستہ آہستہ ڈھیل دی جارہی ہو۔ جتنی دیر ہم گھاٹیوں میں چلتے، دارِ زعفران نگاہوں سے اوجھل رہتا۔ ٹیلوں کے اوپر جاکر ہم اس کو دوبارہ دیکھتے اور اپنا راستہ اس کی جانب موڑ لیتے۔ 

ہم درخت کے قریب پہنچ گئے تھے۔ اوپر سے وہ چھتری کی طرح تھا، او ر زمین کے پاس ہی اس کے تنے سے کئی شاخیں پھوٹی تھیں جو اوپر اٹھ کر تیلیوں کی طرح درخت کی چھتری کو سنبھالے ہوئے تھیں۔ سورج ڈھل چکا تھا اور اب اپنے کنویں میں آخری غوطہ لگانے کو تھا۔ اس کی پھیکی نارنجی روشنی درخت کی چھتری اور تنے کی شاخوں سے چھنتی ہوئی زمین پر پڑ رہی تھی اور اس روشنی میں درخت کے نیچے کی ہموار زمین پر پڑے ہوئے سنگ پاروں کی پرچھائیاں صاف نظر آرہی تھیں۔ خود درخت کی پرچھائیں اس کے قریب کی زمین پر واضح تھی مگر کچھ آگے بڑھ کر دھندلی ہوتی گئی تھی۔ میں اور سید درخت کی پرچھائیں پر چلتے ہوئے زمین کے روشن دھبوں کے نزدیک پہنچ رہے تھے۔ درخت کی شاخوں پر سیکڑوں چھوٹی چھوٹی چڑیاں بول رہی تھیں۔ 

سید نے زور سے ہانک لگائی۔ اچانک چڑیاں بھرّا ماکر اڑیں اور درخت کے اوپر اوپر چترکی طرح گھومنے لگیں۔ سورج کی ایک قاش غائب ہوچکی تھی اور بقیہ حصے کو آسانی سے نظر بھر کے دیکھا جاسکتا تھا۔ اب اس کا رنگ سرخ تھا جیسے پگھلا ہوا لوہا ٹھنڈا ہو چلا ہو۔ اس کے اوپر ٹکا ہوا چھدرا بادل پورا سیاہ ہوگیا تھا۔ دارِ زعفران کے دوسری سمت تیز ڈھال کی صورت میں اترتی ہوئی زمین ایک گھاٹی تک چلی گئی تھی۔ جھٹپٹے میں کچھ بنجارے چلتے پھرتے نظر آرہے تھے۔ ہواکے ساتھ کسی بچے کی آواز رہ رہ کے کانوں تک پہنچ رہی تھی۔ میں اور سید درخت کے نیچے تھے۔ میں درخت کی چکنی چھال پر ہاتھ پھیر رہا تھا اور سید مجھ سے چند قدم کے فاصلے پر گھوم گھوم کر درخت کو دیکھ رہاتھا۔ اچانک اس کی ڈری ڈری آواز بلند ہوئی، 

’’ارے، سانپ!‘‘ 

میں ایک قدم پیچھے ہٹ گیا۔ سید نے ہاتھ سے ایک شاخ کی طرف اشارہ کیا۔ 

شاخ میں ایک سانپ لٹکا ہوا تھا۔ 

’’لیکن مرا ہوا، گڈریوں نے پھن کچل کر ڈال میں لٹکا دیا ہے۔‘‘ 

شاخ کی جنبش کے ساتھ اس کے دونوں طرف لٹکا ہوا سانپ کا بدن بھی دھیرے دھیرے ہل رہا تھا۔ پھن کچلے جانے کی وجہ سے اس کا منھ کھل گیا تھا۔ سرخ رنگ کا گوشت منھ سے باہرنکل آیا تھا، اسی میں کہیں اس کی آنکھیں بھی مل گئی تھیں اور اب ان کا پتا نہیں چلتا تھا۔ اس کی کمر بھی پھٹ گئی تھی۔ پتھر یا لاٹھی کا زخم تھا۔ سفید پیٹ پر کالی اور زرد چتیاں تھیں۔ باقی بدن پر سفید اور راکھی رنگ کے چھوٹے چھوٹے سفنے تھے۔ پتلا لمبا سانپ تھا او راس کی گردن پر نقطے نقطے تھے جیسے گلوبند لپٹا ہوا ہو۔ 

سید، جو آگے بڑھ کر اسے دیکھ رہا تھا، بولا، 

’’مادہ ہے، گردن دیکھیے کتنی پتلی ہے۔ ان سانپوں کو مارنا نہیں چاہئے۔ جو مارتا ہے، ٹھوکریں کھاتا پھرتا ہے۔ میں نے یہ سانپ دیکھے ہیں۔ کسی سے بولتے نہیں۔ اب دیکھ لیجئے گا، جس نے بھی اسے مارا ہے، پائی پائی کو محتاج، جنگل بیابان کی خاک چھانتا، در در بھٹکتا پھرے گا، جیسے میں پورے پانچ سال سے بھٹک رہا ہوں، اور ابھی پتا نہیں کہاں کہاں کا پانی لکھا ہے۔‘‘ 

سورج کی بچی کھچی قاش بھی دور کے پہاڑوں کی اوٹ میں جا چھپی۔ گھاٹیاں تاریک ہوگئیں اور صرف ان کے حاشیوں اورٹیلوں کی بلندی پرلالی باقی رہ گئی۔ اس کالے بادل کی گوٹ اب کسی جھاڑی کی طرح معلوم ہورہی تھی جس میں آگ لگ گئی ہو۔ چڑیاں اب بھی درخت کے اوپر اوپر چکر کاٹ رہی تھیں اور شاخ پر مردہ سانپ آہستہ آہستہ ہل رہا تھا۔ دور پر سفید دھبوں کے سے ہمارے خیمے بمشکل نظر آرہے تھے۔ ہم درخت سے کچھ دور ہوگئے تو چڑیاں دھیرے دھیرے دو تین چکر کاٹ کر پھردرخت پربیٹھ گئیں۔ ہم گھاٹی میں پہنچے تھے کہ ان کی چہچہاہٹ سنائی دی اور سید نے اپنی کہانی شروع کی، 

’’کس کو یقین آسکتا تھا کہ مجھے باورچی گیری کرنا پڑے گی۔ میرے ابا بیوپاری تھے۔ خرم آباد میں سب ان کو جانتے پہچانتے تھے۔ اب بھی، اتنے برسوں بعد بھی، وہاں ان کا نام لیجیے تو سب سوداگروں کو یاد آجائے۔ کنبے میں بس میں تھا اورمیری ماں اورمجھ سے بڑی ایک بہن جوبیاہ کر سسرال کی ہوگئی تھی۔ میں ابھی چھوٹاتھا۔ اسکول میں پڑھتا تھا۔ میرے ابا تہران سے مال لاکر بیچتے تھے۔ اچھا بھلا کاروبار تھا۔ بہت سے لوگ تو ہم سے جلتے تھے۔ میری ماں دھیمے مزاج کی بے زبان عورت تھی۔ بچپن ہی سے میں دیکھتا تھا کہ اس کے دل میں کچھ ہے، جو وہ کسی کو بتاتی نہیں۔ دن میں دوبار وہ اس کوٹھری کے اندر ضرور جاتی تھی جو ہمارے مکان کے بڑے کمرے کے پیچھے تھی۔ وہاں جاکر وہ اندر سے دروازہ بند کرلیتی اور کچھ دیر تک وہیں رہتی تھی۔ 

مجھ کو اس نے وہاں جانے سے منع کر رکھا تھا۔ کہتی تھی بچوں کو اندھیری جگہوں پر نہ جانا چاہئے۔ میں خود ہی اندھیرے سے ڈرتا تھا، اس لیے میرا بھی وہاں جانے کو جی بھی نہیں چاہتا تھا۔ مجھ کو اتنا پتا تھا کہ اس کوٹھری میں میرے ماں باپ کے کپڑوں کے دو پرانے صندوق ہیں اور ایک بکس، ایک سماور اورکچھ اور سامان۔ 

ایک دن میں نے ڈرتے ڈرتے دروازے کی جھری میں سے کوٹھری کے اندر جھانکا بھی تو مجھے سامنے کے طاقچے میں رکھے سماور کی چمک نظر آئی، بس۔ غرض وہ کوٹھری مجھے ایک اندھیری اورڈراونی جگہ معلوم ہوتی تھی اورمجھ کو اس کے اندر قدم رکھنے کی ذرا بھی خواہش نہ ہوتی تھی۔ 

جاڑوں کی ایک رات کی بات ہے، میں اسکول کا کام کرتے کرتے تھک کر کرسی ¹ کے نیچے جا لیٹا اور سو گیا۔ ابا ابھی آئے نہیں تھے اور ہم نے بھی کھانا نہیں کھایا تھا۔ معمول یہ تھا کہ ابا کے آنے کے بعد سب ساتھ بیٹھ کر کھاتے تھے۔ شاید بھوک ہی کی وجہ سے میری آنکھ کھل گئی۔ باہر نکلا کہ ماں سے کھانا مانگوں۔ اچانک میں نے دیکھا کہ کرسی کے اوپر ایک سانپ کنڈلی مارے بیٹھا ہے۔ طاقچے میں جلتے ہوئے چراغ کی روشنی کرسی پر پڑ رہی تھی۔ 

پہلے تو مجھے خیال ہوا کوئی رسی وسی ہے، لیکن جب اس نے پھن اٹھاکر میری طرف دیکھا تو میں ایک چیخ مار کر پھر کرسی کے نیچے گھس گیا۔ ماں کمرے کے باہر تھی، میری آواز سن کر آگئی۔ اس نے مجھے کرسی کے نیچے سے کھینچ کر نکالا۔ میں نے جب اس کو ساری بات بتائی اور قسم کھاکر کہا کہ میں نے اپنی آنکھوں سے کرسی پر سانپ دیکھا ہے تو وہ مجھ کو بہلانے لگی کہ میں نے خواب دیکھا ہوگا، ورنہ ایسا ہو ہی نہیں سکتا۔ لیکن مجھے اپنی آنکھوں پر بھروسا تھا۔ مجھ کو یقین تھا کہ میں نے کرسی پر سانپ ہی دیکھا ہے۔ خلاصہ یہ کہ اس رات میں بڑی بے چین نیند سویا۔ دوسرے دن اسکول جاتے ہوئے میرے دل میں سانپ دیکھنے کی دہشت سمائی ہوئی تھی۔ کلاس میں بھی سارے وقت میری آنکھوں کے سامنے وہی منظر رہا کہ سانپ کنڈلی مارے ہوئے ہے اور پھن اٹھاکر مجھے دیکھ رہا ہے۔ 

چھٹی کے بعد مجھ کو گھر جاتے ڈر لگ رہا تھا۔ دیر تک گلی کوچوں میں مٹرگشتی کرتا رہا۔ تھک گیا تو ایک مکان کی چبوتریا پر بیٹھ گیا۔ کچھ دیر بعد میں نے دیکھا کہ ماں گھبرائی ہوئی مجھ کو گلیوں میں ڈھونڈتی پھر رہی ہے۔ وہ بہت پریشان تھی، کہتی جاتی تھی کہ سارے شہر کی خاک چھان ڈالی ہے۔ مجھے دیکھتے ہی لپک کر آئی اور اس آوارہ گردی کا سبب پوچھنے لگی۔ میں نے صاف کہہ دیا کہ گھر میں جو سانپ نکلا تھا، اس سے مجھ کو ڈر لگ رہا ہے اور اب میری وہاں جانے کی ہمت نہیں ہو رہی ہے۔ وہ میرا ہاتھ پکڑ کر تھپکنے لگی اوربولی، بیٹے، ڈرو نہیں۔ آؤ گھر چلیں۔ تم نے کچھ اور دیکھا ہوگا۔ نیند میں تو تھے۔ اور پھر سانپ سے ڈرنا کیا۔ اگر تھا بھی تو ہمارے ہی یہاں کا تو سانپ تھا۔ وہ گھراتی سانپ تھا۔ گھراتی سانپ کسی کو ستاتا نہیں۔ سب گھروں میں سانپ کا ایک ایک جوڑا تو ہونا ہی چاہئے۔ 

پھر اس نے مجھ کو لے جاکر بازار سے گیہوں کی کھیلیں اوربتاشے دلوائے۔ ہم ساتھ ساتھ گھر لوٹے۔ راستے میں اس نے مجھے تاکید کی کہ سانپ والی بات کسی کو نہ بتاؤں۔ میں نے بھی وعدہ کرلیا۔ 

اس قصے کو دن گزر گئے اور سانپ والی بات میرے لیے ایسی ہی ہوکر رہ گئی جیسے آدمی کسی پرانے زخم کی دُکھن کا عادی ہوجائے۔ مگر اس کے بعد سے میں کبھی گھر میں یا کمرے میں اکیلا نہیں رہتا تھا۔ ہمیشہ ماں کے پہلو سے لگا رہتا اور اسی کے ساتھ مکان میں اِدھر اُدھر آتا جاتا تھا۔ تہہ خانے اور خاص کرکوٹھری کا تو رخ بھی نہ کرتا تھا۔ میں کھٹک گیا تھا کہ جو بھی ہے، وہ اسی اندھیری کوٹھری میں ہے، جس کا دروازہ ہمیشہ بند رہتاہے اور صرف ماں اس کے اندر جاتی ہے۔ 

آخر ایک رات ماں مجھ سے کہنے لگی، ’’بیٹے، تمھیں ایک بات بتانا ہے۔ اب تم سیانے ہوگئے ہو اور ضروری ہے کہ تم بھی وہ بھید جان لو اور کسی اورکو نہ بتاؤ۔‘‘ 

میرا دل بولنے لگا کہ بات اسی سانپ کی ہے۔ میرا چہرہ فق ہوگیا اور بدن تھرتھرانے لگا۔ ماں نے میرا ہاتھ پکڑ لیا اوربولی، ’’آخر تو تمھیں پتا چلنا ہی ہے، اسی گھرمیں جو رہتے ہو، اورکسی نہ کسی دن وہ تمھیں دکھائی دے جائیں گے۔‘‘ 

میں ماں سے چمٹا ہوا کھڑا سن رہا تھا، لیکن میرا جی چاہا کہ اس کے پاس سے بھاگ کھڑا ہوں۔۔۔ مجھے ماں سے بھی ڈر لگنے لگا تھا، جیسے اس نے خود اپنے پاس کہیں سانپ چھپا رکھے ہوں۔ وہ مجھ پرجھکی ہوئی بول رہی تھی اور اس کی گرم سانس مجھے اپنے چہرے پرمحسوس ہورہی تھی۔ اس کے ہاتھ میں میرا ہاتھ پسینے سے تر ہوگیا اورمجھے چکر آنے لگا۔ ایسا معلوم ہورہا تھا کہ میری ماں کے کپڑوں میں سے ابھی ابھی کوئی سانپ سرسراتا ہوا گرے گا اور سیدھا مجھ پر لپکے گا۔ 

ماں کہہ رہی تھی، 

’’لال، آخر تو تم ان کو دیکھو گے ہی۔ اب ان سے دوستی کرنا سیکھ لو۔ وہ تمھیں کوئی نقصان نہیں پہنچائیں گے۔ جانتے ہو، زیادہ تر مکانوں میں گھراتی سانپ ہوتے ہیں مگر کوئی کسی کو بتاتا نہیں۔ ہمارا نصیبہ انھیں کے دم سے ہے۔ وہ ہمارے گھر کی حفاظت کرتے ہیں۔ اس کوٹھری میں رہتے ہیں۔ دو ہیں۔ انھیں میں کا ایک تھا، جسے تم نے اس رات کرسی پر دیکھا تھا۔ دوسر انیچے کرسی کے اس طرف تھا، تمھیں دکھائی نہیں دیا۔ تم چیخ پڑے اور میں آئی تو وہ چلے گئے۔ انھیں شاید خود بھی پتا ہے کہ تم ان سے ڈرتے ہو۔ اسی لیے تو وہ تمھارے سامنے آتے نہیں۔‘‘ 

ماں کی باتیں سن کر میں ڈر سے کانپنے لگا، منھ سے چیخ نکلتے نکلتے رہ گئی۔ لیکن بھاگ کر جاتا کہاں۔ اکیلے میں ڈر لگتا تھا۔ کچھ بھی ہو، میں کم سے کم وہاں اپنی ماں کے ساتھ تو تھا۔ 

بہت کہہ سن کر آخر ماں نے مجھے راضی کرلیا کہ اس کے ساتھ چلوں اور سانپوں سے کچھ کچھ آشنائی پیدا کروں۔ میں دونوں مٹھیوں میں اس کے دامن کو جکڑے ہوئے تھا اور وہ مجھے آہستہ آہستہ آگے بڑھا رہی تھی۔ اس نے کوٹھری کے دروازے کی کنڈی کھولی تو میں نے اس کے لباس میں منھ چھپا لیا اورآنکھیں بند کرلیں۔ ماں نے ایک کنارے ہوکر میرا چہرہ کوٹھری کی طرف گھما دیا۔ دروازے کے کھلے ہوئے پٹ سے آتی ہوئی مدھم روشنی کی چادر سی کوٹھری کے فرش پر پھیلی ہوئی تھی۔ میں نے دونوں ہاتھوں سے چہرہ ڈھانپ لیا تھا اور انگلیوں کے بیچ سے دیکھ رہا تھا۔ اس روشنی میں مجھے دو سانپوں کے چھوٹے چھوٹے خوبصورت سر دکھائی دیے۔ دونوں نے منھ اوپر اٹھا لیے تھے اور ہم کو ٹک ٹک دیکھ رہے تھے۔ 

ماں کہہ رہی تھی، 

’’یہ داہنی طرف والا وہی ہے جو تمھیں دکھائی دیا تھا۔ یہ ہمیں ذرا بھی پریشان نہیں کرتے۔ گھر میں ہر طرف آتے جاتے ہیں۔ برسوں سے ہمارے ساتھ ہیں۔ تمھیں بھی ان سے ڈرنا نہیں چاہیے۔ دیکھو نا، کیسا تمھیں دیکھ دیکھ کے حیران ہورہے ہیں۔ اگر میں ساتھ نہ ہوتی تو دونوں بھاگ کر چھپ گئے ہوتے۔ نئے لوگوں کے سامنے بالکل نہیں آتے ہیں، لیکن تم تو گھر ہی کے ہو۔ اب بڑے ہورہے ہو۔ چاہیے کہ انھیں اچھی طرح پہچان لو اور یہ بھی تم سے ہل جائیں۔ ہمارا نصیبہ انھیں کے دم سے ہے۔ اور دیکھو بیٹے، کہیں ایسا نہ ہو کسی کے سامنے منھ سے یہ بات نکال بیٹھو کہ ہمارے یہاں سانپ ہیں۔ کسی کو بھی ان کے ٹھکانے کا پتا نہ دینا۔ اپنے ابا کو بھی نہیں۔ بہن کو بھی نہ بتانا۔ وہ خود جانتے ہیں مگر کسی سے کہتے نہیں۔‘‘ 

پھر وہ آہستہ سے کوٹھری میں داخل ہوئی اورمیں اکیلا دروازے پرکھڑا رہ گیا۔ میں دیوار سے لگا ہوا کانپ رہا تھا۔ ماں سانپوں کے قریب پہنچی تو وہ دھیرے دھیرے رینگتے ہوئے آگے بڑھے۔ دونوں ایک ایک طرف سے اس کی پنڈلیوں میں لپٹ گئے اوراس کی جوتیوں اور شلوار کے پائینچوں پر سر رگڑنے لگے۔ ماں ان سے باتیں کر رہی تھی جیسے لوگ پالتو پرندوں اور جانوروں سے باتیں کرتے ہیں۔ زمین پر پانی کا برتن اورکھانے کا کچھ سامان تھا۔ تھوڑی دیر بعدماں باہر نکل آئی اور کہنے لگی، 

’’دیکھا بیٹے، کیسے اچھے اور غریب سانپ ہیں! اب تم ان کے عادی ہوجاؤگے۔ انھوں نے بھی تم کو پہچان لیاہے اورا ب تم سے بھاگا نہیں کریں گے۔ اگرکسی دن ان کے پاس جاؤ اور انھیں پریشان نہ کرو تو وہ اسی طرح تمھارے بھی لپٹیں گے اورتمھارے پیروں پر سر رکھ دیں گے۔‘‘ 

ماں نے کہہ تو دیا تھا کہ سانپ میرے دوست بن گئے ہیں لیکن میں خود کو اس پرکبھی تیار نہ کرسکا کہ کوٹھری میں جاؤں اور ان کو دیکھوں۔ ان کا اس گھر میں ہونا میرے لیے مستقل عذاب تھا۔ میں ہر وقت سہما سہما رہتا تھا۔ ذرا سی آواز پر میرا دل بیٹھنے لگتا۔ مجھے وہم ہوگیا تھا کہ ایک نہ ایک دن سانپ مجھ کو ڈس لیں گے۔ مجھے دکھائی دینے لگتا کہ ڈسے جانے کے بعد میرا بدن پھول گیا ہے اور میں تکلیف سے بل کھا رہاہوں۔ اسی لیے میں کسی بھی وقت گھر میں اکیلا نہیں رہتا تھا۔ کوئی رات نہ جاتی تھی کہ میں ہول اورہراس کے بغیر چین کی نیند سو سکوں۔ اکثر سوتے سے چونک کر اٹھ بیٹھتا اوراپنے بستر کو غور سے دیکھنے لگتا تھا۔ 

ہمارے کمرے کی چھت لکڑی کی تھی۔ چھت پرکڑیاں ڈال کر ان پر نرکل اورلکڑی کی چھیلن جمائی گئی تھی۔ اس زمانے میں میرا ایک کھیل یہ بھی تھا کہ چت لیٹ جاتا اور چھت کی کڑیوں کو دونوں جانب سے گنا کرتا تھا۔ میں ساری کڑیوں کو ان کے رنگوں، ان کی موٹائی پتلائی، ان کے رخنوں اور گانٹھوں سمیت پہچانتا تھا۔ ایک زمستانی رات جب ہم کھاناکھا چکے تھے، میں اپنی جگہ پرلیٹا چپت کو دیکھ رہا تھا۔ اپنے اسکول اور کلاس کے بارے میں سوچتا ہوا میں کڑیوں کوایک ایک، اور دو دو، اور کبھی ایک ایک چھوڑ کر گن رہا تھا۔ اسی میں ایک بار جب میں بیچ کی کڑیوں کی جوڑی پر پہنچا تو دیکھا کہ ایک کڑی میں کوئی چیز لٹکی ہوئی دھیرے دھیرے ہل رہی ہے۔ 

یہ نئی چیز تھی جسے میں نے اب تک نہیں دیکھا تھا۔ پہلے تو مجھے خیال ہوا کہ کوئی نرکل یا چھیلن اپنی جگہ سے باہر لٹک پڑی ہے، لیکن فوراً ہی پتا چل گیا کہ انھیں میں کا ایک سانپ ہے جو چھت پر پہنچ گیا ہے۔ ایک گز سے زیادہ کا بدن چھت سے لٹکا ہوا تھا اور وہ نیچے دیکھ رہا تھا۔ میں اچھل کر کھڑا ہوگیا اور کمرے کے ایک کونے میں جا چھپا۔ میری زبان بند ہوکر رہ گئی تھی۔ ابا اوراماں نے بھی سانپ کو دیکھ لیا تھا اور اب حیران حیران سے ایک دوسرے کو دیکھ رہے تھے، لیکن کچھ بولے نہیں۔ آخر ابا اٹھ کر آئے اور ہاتھ پکڑ کر مجھے اپنے ساتھ لے گئے۔ میں ڈر کے مارے کرسی کے نیچے گھس گیا اور وہیں مجھے نیند آگئی۔ 

کچھ دن بعد ابا نے ایک اچھا سا مکان مول لے لیا اور ہم اسباب سمیت وہاں چلے گئے۔ میں بہت خوش تھا اور سمجھ رہاتھا اب ہمیں سانپوں کی علت سے چھٹکارا مل جائے گااور مجھے کوٹھری اور تہہ خانے اور کمروں کی چھتوں، اور اپنے بستر، اور گھر کے کسی بھی حصے سے ڈر نہیں لگے گا اور میں بے کھٹکے ہر جگہ آجاسکوں گا اور راتوں کو آرام سے سویا کروں گا۔ لیکن میرا خیال غلط تھا۔ جلد ہی مجھے معلوم ہوگیا کہ سانپوں کا وہی سا جوڑا ہم سے پہلے ہی اس گھر میں پہنچ چکا ہے۔ اب پھر ماں کا کام ان کی خدمت کرنا تھا۔ وہ روز ان کو دیکھنے جاتی اور ان کی خوراک پہنچاتی۔ پھر اب کیا ہوسکتا تھا۔ میں اس مکان میں رہنے پر مجبور تھا۔ میرے ماں باپ وہاں تھے، میرے سونے کا ٹھکانہ وہاں تھا، وہی ایک جگہ تھی جہاں ہم کو صبح شام کا کھانا کھانا تھا اور سردی گرمی میں چھت کے نیچے پناہ لینا تھی۔ 

 اب مجھ کو یقین ہوگیا تھا کہ ہر گھر میں سانپ کا ایک جوڑا ضرور رہتا ہے اور گھر والے مجبور ہوتے ہیں کہ ان کے ساتھ گزارہ کریں، انھیں کھانے کو دیں اور دوسروں کو ان کے بارے میں کچھ نہ بتائیں اور اس بات کو راز کی طرح اپنے سینے میں چھپائے رکھیں۔ اگر مجھ کو کسی کے چہرے پر فکر یا پریشانی نظر آتی اور محسوس ہوتا کہ اسے کوئی دھڑکا لگا ہوا ہے تو میں اپنے آپ سے کہتا، ہو نہ ہو اس میرے یار کو اپنے گھر کے سانپ دکھائی دے گئے ہیں اور اب ڈر کے مارے اس کی جان پر بنی ہوئی ہے، اس لیے کہ جس دن سے میں نے سانپوں کو دیکھا تھا خود میری یہی حالت تھی۔ 

ایک دن سہ پہر کے وقت میں اسکول کے لڑکوں کے ساتھ کھیلتا کودتا گھر لوٹ رہا تھا۔ راستے میں زمین کا بڑا سا ہموار قطعہ پڑا جس میں بچے کھیل رہے تھے۔ ہم بھی کبھی کبھی اسکول سے لوٹتے میں دیر دیر تک اس میدان میں دوڑیں لگاتے اور اگر گیند پاس ہوتی تو گول بناکر فٹ بال کھیلتے تھے۔ اس روز ہم وہاں پہنچے تو ایک لڑکے کو میدان کے کنارے ایک سانپ پڑا نظر آیا جسے مار دیا گیا تھا۔ لڑکے نے اسے اٹھا لیا۔ زرد رنگ کا لمبا سا سانپ تھا۔ اس کا پھن کسی چیز سے کچل دیا گیاتھا۔ لڑکے نے سانپ کو دم سے پکڑ رکھا تھا اور اسے گھما گھما کر دوسرے لڑکوں کو ڈرا رہا تھا۔ جو لڑکے ڈر رہے تھے وہ تو بھاگ کھڑے ہوئے اور جنھیں ڈر نہیں لگا وہ اطمینان سے کھڑے رہے اور سانپ ان کے بدن پر لگتا رہا۔ 

لڑکے نے سانپ میری طرف بڑھایا تو میں چیخ مارکر بھاگا۔ سب لڑکے ہنسنے اورمیرا مذاق اڑانے لگے۔ آخر اس لڑکے نے سانپ کو ایک گڑھے میں ڈال دیا اور ہم آگے بڑھے۔ راستے میں بھی انھوں نے میرا پیچھا نہیں چھوڑا اور یہ کہہ کہہ کر میری ہنسی اڑاتے رہے کہ میں مرے ہوئے سانپ سے بھی ڈرتا ہوں اور اسے چھونے کی ہمت نہیں رکھتا۔ اب جو ہم سِنوں کے سامنے میری کرکری ہوئی اور سانپ سے میرے ڈرنے کا حال سب کو معلوم ہوگیا تو میری غیرت کو جوش آگیا۔ مجھے یہ گوارا نہ تھا کہ میں سب میں بودا ٹھہروں اورڈر پوک کہلانے لگوں، اس لیے میں نے کہہ دیا کہ مردہ سانپ سے ڈرنا کیسا، میں تو زندہ سانپ سے بھی نہیں ڈرتا، اور اپنی بات کو سچ ثابت کرنے کی دھن میں یہ بھی بتا گیا کہ ہمارے مکان میں دو دو سانپ ہیں جو ہمیشہ ہمارے ساتھ رہتے ہیں اور میں ان کے پاس چلا جاتا ہوں اور انھیں ہاتھ سے چھوتا ہوں۔ 

میری بات سن کر سب ہنس پڑے اور پھر میرا مذاق اڑانے اورمجھ کو جھوٹا بنانے لگے۔ میں انگاروں پر لوٹ رہا تھا اور خون کے گھونٹ پی رہا تھا، کہہ بیٹھا اگر تم لوگ مجھے جھوٹا سمجھتے ہو اور میری بات کا اعتبار نہیں کرتے تو میں تمھیں وہ سانپ دکھا سکتا ہوں۔ چلو، سب مل کر میرے یہاں چلو۔ وہ سب کے سب خوشی سے چیختے ہوئے راضی ہوگئے اور میرے گھر کی طرف چل پڑے۔ ذرا دیر میں گھر آگیا۔ ماں گھر پر موجود نہیں تھی۔ راستے بھر مجھے اس کا یہ کہنا یاد آتا رہا کہ سانپوں کے بارے میں نہ تو کسی سے کچھ کہوں، نہ کسی کو ان کا پتا نشان بتاؤں۔ لیکن اب معاملہ ہاتھ سے نکل چکا تھا اور پھینکے ہوئے پانی کو اٹھایا نہیں جاسکتا تھا۔ 

اگرا ب میں لڑکوں کو سانپ نہ دکھاتا تو وہ اسکول میں میری جان کو آجاتے اور میں ہمیشہ کے لیے بزدل اور جھوٹا ہونے کی شرم میں مبتلا رہتا۔ 

میں نے سیڑھیاں چڑھ کر کمرے کا دروازہ کھولا۔ لڑکے میرے پیچھے پیچھے تھے۔ صرف ہمارے پیروں کی آہٹیں سنائی دے رہی تھیں۔ سب خاموش اور دم سادھے ہوئے تھے۔ میرا دل سینے میں اس طرح دھڑ دھڑ کر رہا تھا کہ میں اس کی آواز سن سکتا تھا۔ سانپوں کا سامنا کرنے کے خیال سے میرے ماتھے پر ٹھنڈا پسینہ آگیا تھا اور پیر کانپ رہے تھے۔ کوٹھری کے دروازے پر پہنچا تو اس کی کنڈی کھولنے کے لیے میرا ہاتھ نہیں اٹھ رہا تھا، لیکن سب لڑکے میرے پیچھے کھڑے انتظار کر رہے تھے۔ جس لڑکے نے میدان میں مردہ سانپ اٹھایا تھا وہ آگے بڑھا اور بولا، ’’میں سمجھ گیا۔ تمہارے یہاں گھراتی سانپ ہیں۔ مگر گھراتی سانپ تو کسی کو دکھائے نہیں جاتے۔ خیر، اب دروازہ کھولو۔ ذرا دیکھیں تو۔‘‘ 

اور مجھے ہچکچاتے دیکھا تو اس نے خود آگے بڑھ کر ایک دم سے دروازہ کھول دیا۔ 

سب لڑکے گردنیں بڑھا بڑھا کر کوٹھری کے اندر دیکھنے لگے۔ کوٹھری کے فرش پر پانی کا برتن اور کھانے کا سامان تو تھا لیکن سانپوں کا کہیں پتا نہ تھا۔ کچھ لڑکے دبے پاؤں اندر داخل ہوئے اور ہر طرف دیکھنے لگے، مگر سانپ گویا کبھی وہاں تھے ہی نہیں۔ ایک کونے میں ایک ٹوٹی پھوٹی کرسی تھی، طاقچوں میں کچھ برتن اور دوسرا کاٹھ کباڑ، اور بس۔ کچھ لڑکوں نے پانی کا برتن اور کھانا دیکھ کر وہاں سانپوں کا ہونا مان لیا، لیکن بعض پھر بھی میری ہنسی اڑاتے رہے۔ 

لڑکوں کے جانے کے بعد میری بھی گھر میں ٹھہرنے کی ہمت نہیں ہوئی۔ ماں کے آنے تک میں گلی میں گھومتا رہا اور ہم دونوں ساتھ ساتھ گھر میں داخل ہوئے۔ میں اپنے گھر اور اپنی زندگی کا راز ظاہر کردینے سے پریشان تھا، اس لیے زبردستی دو تین نوالے حلق سے اتار کر جلدی ہی سوگیا۔ 

دوسرے دن میری ماں معمول سے پہلے ہی گھبرائی ہوئی جاگ پڑی۔ اس کی عجیب حالت تھی، چہرے کارنگ اڑا ہوا اور آنکھیں کچھ ایسی ہورہی تھیں کہ ان کی طرف دیکھتے ڈر لگتاتھا۔ 

وہ کچھ دیر تک کسی سوچ میں گم رہی، پھر لپک کر کوٹھری میں گئی ا ورا یک دو منٹ تک اندر رہی۔ میں سانس روکے ماں کی واپسی کا انتظار کر رہاتھا۔ میں سوچ رہا تھا اب کیا ہوگا، کیا اسے وہاں سانپ ملیں گے؟ کبھی سوچتا کہ سانپ غائب ہوگئے ہوں گے اورماں سمجھ جائے گی کہ میں نے کیا حرکت کی ہے۔ وہی ایک موقع تھا جب میرا دل چاہا کہ سانپ موجود ہوں اور ماں کو دکھائی دے جائیں۔ میں جانتا تھا کہ سانپوں سے پیچھا چھڑانے کا یہ صحیح طریقہ نہیں تھا۔ ذرا دیر بعد ماں باہر نکلی، کچھ دیر تک مجھ کو غور سے دیکھتی رہی، پھر ابا سے بولی، 

’’کچھ پتا ہے؟ سانپ گئے! رات خواب میں آئے تھے۔ کہہ رہے تھے لوگ ان کا ٹھکانہ جان گئے ہیں اس لیے وہ ہمارے یہاں سے جارہے ہیں، ہمیشہ کے لیے، ا ور اب ہم پر جو کچھ بھی پڑے گی اس کے ذمہ دار ہم خود ہوں گے۔ بار بار میری آنکھ کھلتی اور میں صلوات پڑھ کر اور شیطان پر لعنت بھیج کر سوجاتی تھی، لیکن ہر بار یہی خواب آتا تھا۔ صبح تک ٹھیک سے سو نہیں سکی۔ اب کوٹھری میں جاکر جو دیکھا تو خواب سچا تھا۔ سانپ گئے۔ کہیں پتا نہیں۔ میں سمجھتی ہوں اسی لڑکے نے کوئی گل کھلایا ہے۔‘‘ 

پھر اس نے ڈانٹ کر مجھ سے معاملہ پوچھا۔ میں نے بھی جو کچھ ہوا تھا سب کا سب بتا دیا۔ ماں نے یہ ماجرا سنا تو اس کے سینے سے ایک آہ نکلی اورآنکھوں سے آنسو بہنے لگے۔ میں اس کا اکلوتا بیٹا تھا اس لیے اس نے مجھے زیادہ کچھ تو نہیں کہا لیکن اتنا ضرور کہا، 

’’بیٹے تم نے ہماری زندگی برباد کردی۔ ہمارے گھر کا اقبال رخصت کردیا۔ بدنصیبی کو دعوت دے دی۔ مجھے ڈر ہے اب تھوڑے ہی دن میں ہم محتاج اور دربدر ہوجائیں گے۔ یہ سانپ پشتوں سے ہمارے یہاں چلے آرہے تھے۔ ہمارے گھر کے نگہبان تھے۔ انھیں شاید پتا تھا کہ تم ان کو بھگا کر رہوگے۔ ان کا دل تم سے نہیں مل رہا تھا، اسی لیے وہ تم سے دور دور رہتے تھے۔ وہ جانتے تھے کہ تم کو اپنی زبان پر قابو نہیں، گھر کار از نہیں چھپاسکتے۔ آخر تم نے وہی کیا جس کا مجھے ڈر تھا۔ سانپ گئے، اور ہم بے سہارا رہ گئے۔ مجھے تو یہ بھی ڈر ہے کہ خدا نہ کرے وہ تمھیں کچھ آزار نہ پہنچا دیں۔‘‘ 

کئی دن تک میں سخت وحشت میں گرفتار رہا اور ڈرتا رہا کہ کہیں مجھے کوئی سانپ ڈس نہ لے۔ ماں نے مجھ کو بہن کے گھر بھیج دیا۔ کئی دن تک وہیں رہا، اپنے گھر میں قدم نہیں رکھا۔ یہاں تک کہ ایک ہفتے بعدماں نے آکر بتایا کہ اسے پھر خواب میں سانپ نظر آئے ہیں اور انھوں نے کہا ہے کہ اگرچہ ان کو ہمارا گھر چھوڑ دینا پڑا ہے لیکن وہ ہم سے کوئی سروکار نہیں رکھیں گے اورمجھ سے بھی نہیں بولیں گے، اس لیے ماں مجھے گھر لے گئی۔ 

اس قصے کو زیادہ دن نہیں ہوئے تھے کہ میرے ابا کا کاروبار الٹ پلٹ ہوگیا۔ تہران سے جو مال وہ بیچنے کو لائے تھے، اس کا مندا پڑ گیا اور بکری نہیں ہوسکی۔ ابا نے نقصان بھرنے کے لیے دوسرے دھندوں میں ہاتھ ڈالا لیکن سب میں گھاٹا ہی گھاٹا رہا۔ 

شہر بھر میں بات پھیل گئی کہ ابا دیوالیے ہوگئے اورلین دار اُن پر چڑھ دوڑے۔ جو کچھ ہمارے پاس تھا سب ہاتھ سے جاتا رہا۔ مکان تک نکل گیا۔ وہ شخص جس کے بھاگوان ہاتھوں کی دھوم تھی اور جو مٹی کو چھو دیتا تو سونا ہو جاتی، اس کا ایسا وقت بگڑا کہ کرائے کے ایک کمرے میں زمین پکڑ کے بیٹھ رہا اور تھوڑے ہی دن میں مر گیا۔ سب کا یہی کہنا تھا کہ پریشانیوں اور کوفت نے ابا کی جان لے لی، لیکن جن لوگوں کو سانپوں کے معاملے کی خبر تھی وہ جانتے تھے کہ اس بدبختی اور سیاہ روزی کا اصل سبب میں ہوں۔ 

باپ کے مرنے کے بعدمجھ کو اسکول چھوڑنا پڑا۔ مدت تک ڈرائیوری کی، اس شہر سے اُس شہر دوڑتا پھرا۔ جان کھپا کر ا ور وسرے ڈرائیوروں کی گالیاں کھا کھاکر پیسے جمع کیے اور ایک ٹیکسی خریدی۔ شہر کے باہر کی بستیوں کے پھیرے کرتا تھا۔ کام چل نکلا اور قریب تھا کہ جم جاؤں اور گھر بسالوں۔ ماں بھی بڑی خوش تھی۔ مگر ایک دن شام کے وقت جب میں سواریاں بٹھائے واپس آرہا تھا، شہر ے ایک موٹر اترتے ہوئے میری نگاہ اچانک ایک مردہ سانپ پرپڑ گئی جس کا پھن کسی گاڑی کے نیچے آکر پچی ہوگیا تھا۔ بالکل ویسا ہی سانپ تھا جیسے ہمارے یہاں تھے۔ دم بھر میں ایک عجیب سی دہشت سے میرا بدن کپکپا گیا۔ 

میں نے گاڑی کو ایک طرف کاٹا کہ سانپ اس کے نیچے نہ آنے پائے۔ اس طرف ایک بڈھا اپنے خچرپر ڈھیروں لکڑیاں لادے پہاڑ سے اتر کر شہر جارہا تھا۔ قریب تھا کہ دونوں کو روند ڈالوں۔ جلدی سے میں نے گاڑی کو پھر دوسری جانب کاٹا۔ اتار کا راستہ تھا، بریک ماروں تو گاڑی الٹ جائے اور ہوا یہی۔ ایک دو لڑھکنیاں کھاکے ہم ایک کھڈ میں جا پڑے۔ مسافروں میں سے دو وہیں کے وہیں ختم ہوگئے، دو تین زخمی بھی ہوئے۔ میرا بھی ہاتھ ٹوٹ گیا اور گاڑی تو ایسی مٹی کہ کسی کام کی نہ رہی۔ 

اس لیے میں نے سمجھ لیا کہ دوڑنے دھوپنے سے کچھ نہیں ہونا، اس وقت کا انتظار کرنا چاہئے جب وہ میرا پیچھا چھوڑ دیں۔ میں نے آوارہ گردی شروع کردی۔ کبھی یہاں، کبھی وہاں، دو نوالوں کے لیے ہاتھ پاؤں مارنے لگا۔ اب خانسا ماں ہوگیا ہوں۔ ماں اکیلی بیٹھی میری لگائی ہوئی آگ میں جل رہی ہے۔ جب میری حالت پر اس کا بہت دل کڑھتا ہے تو کہتی ہے، 

’’بیٹا، تم نے ہمیں بھی برباد کیا، خود بھی کہیں کے نہ رہے۔‘‘ 

*

ہم آخری پہاڑی چڑھ رہے تھے۔ ہمارے خیمے تھوڑی ہی دور رہ گئے تھے۔ مغربی افق کی سرخی سیاہی میں ڈھلتی جارہی تھی۔ کالے بادل نے کسی بہت بڑے اژدہے کی طرح دارِ زعفران کی چھتری کو نگل لیا تھا۔ درخت کا تنا یوں معلوم ہورہا تھا جیسے آگ کے شعلوں میں کوئی ہاتھ پھیلائے کھڑا ہو۔ 

سید نے کہا، ’’اور آج، قسمت کا لکھا یہ تھا کہ ہم اس درخت کو دیکھنے جائیں اور وہاں ہمیں مردہ سانپ دکھائی دے جائے۔ یہ اشارہ ہے اس کا کہ مجھ کو جلد سے جلد یہاں سے رخصت ہونا ہے۔ جاتا ہوں، بستر باندھ لوں، کل صبح روانہ ہوجاؤں گا۔ 


حاشیہ
(۱) کرسی، بڑا سا اونچا تخت جس پر اس سے بہت بڑی پوشش ڈال دی جاتی ہے۔ جاڑوں میں گھر والے اسی پوشش اور تخت کے نیچے سوتے ہیں۔ برقی حرارت کے رواج سے پہلے گھروں میں کرسی کا استعمال عام تھا۔ (مترجم)