Sher on Azaab

yād-e-māzī 'azāb hai yā-rab

chhīn le mujh se hāfiza merā

yaad-e-mazi 'azab hai ya-rab

chhin le mujh se hafiza mera

aa.e kuchh abr kuchh sharāb aa.e

is ke ba.ad aa.e jo azaab aa.e

aae kuchh abr kuchh sharab aae

is ke baad aae jo azab aae

azaab hotī haiñ aksar shabāb kī ghaḌiyāñ

gulāb apnī hī ḳhushbū se Darne lagte haiñ

azab hoti hain aksar shabab ki ghaDiyan

gulab apni hi KHushbu se Darne lagte hain

butoñ kī chaah meñ ham to azaab hī meñ rahe

shab-e-firāq kaTī roz-e-intizār aayā

buton ki chah mein hum to azab hi mein rahe

shab-e-firaq kaTi roz-e-intizar aaya

unhī pe ho kabhī nāzil azaab aag ajal

vahī nagar kabhī Thahreñ payambaroñ vaale

unhi pe ho kabhi nazil azab aag ajal

wahi nagar kabhi Thahren payambaron wale

rah-e-hayāt meñ kāñToñ ne mehrbāñ ho kar

bachā liyā hai azāb-e-shaguftagī se mujhe

rah-e-hayat mein kanTon ne mehrban ho kar

bacha liya hai azab-e-shaguftagi se mujhe

chhapī thī jis kī ġhazal meñ zamāne bhar kī ḳhushī

ḳhud us kī ziist kā naġhma azaab sā ubhrā

chhapi thi jis ki ghazal mein zamane bhar ki KHushi

KHud us ki zist ka naghma azab sa ubhra