Fasad shayari

Rioting among human beings is an ugly reality. Poets have not put this reality aside; in fact they have commented on the ills of rioting in their own creative ways. Here is a sampler to help you see the ugliness of violence and appreciate how it damages us.

log TuuT jaate haiñ ek ghar banāne meñ

tum taras nahīñ khāte bastiyāñ jalāne meñ

log TuT jate hain ek ghar banane mein

tum taras nahin khate bastiyan jalane mein

Bashir Badr

tum abhī shahr meñ kyā na.e aa.e ho

ruk ga.e raah meñ hādsa dekh kar

tum abhi shahr mein kya nae aae ho

ruk gae rah mein hadsa dekh kar

Bashir Badr

dekhoge to har moḌ pe mil jā.eñgī lāsheñ

DhūñDoge to is shahr meñ qātil na milegā

dekhoge to har moD pe mil jaengi lashen

DhunDoge to is shahr mein qatil na milega

Malikzada Manzoor Ahmad

yahāñ ek bachche ke ḳhuun se jo likhā huā hai use paḌheñ

tirā kīrtan abhī paap hai abhī merā sajda harām hai

yahan ek bachche ke KHun se jo likha hua hai use paDhen

tera kirtan abhi pap hai abhi mera sajda haram hai

Bashir Badr

bārūd ke badle hāthoñ meñ aa jaa.e kitāb to achchhā ho

ai kaash hamārī āñkhoñ ikkīsvāñ ḳhvāb to achchhā ho

barud ke badle hathon mein aa jae kitab to achchha ho

ai kash hamari aankhon ka ikkiswan KHwab to achchha ho

Ghulam Mohammad Qasir

junūñ ko hosh kahāñ ehtimām-e-ġhārat

fasād jo bhī jahāñ meñ huā ḳhirad se huā

junun ko hosh kahan ehtimam-e-ghaarat ka

fasad jo bhi jahan mein hua KHirad se hua

Iqbal Azeem

jo dil ko hai ḳhabar kahīñ miltī nahīñ ḳhabar

har sub.h ik azaab hai aḳhbār dekhnā

jo dil ko hai KHabar kahin milti nahin KHabar

har subh ek azab hai aKHbar dekhna

Obaidullah Aleem

maiñ jaag jaag ke kis kis intizār karūñ

jo log ghar nahīñ pahuñche vo mar ga.e hoñge

main jag jag ke kis kis ka intizar karun

jo log ghar nahin pahunche wo mar gae honge

Irfan Sattar

is qadar maiñ ne sulagte hue ghar dekhe haiñ

ab to chubhne lage āñkhoñ meñ ujāle mujh ko

is qadar main ne sulagte hue ghar dekhe hain

ab to chubhne lage aankhon mein ujale mujh ko

Kamil Bahzadi

chāroñ taraf haiñ shole ham-sā.e jal rahe haiñ

maiñ ghar meñ baiThā baiThā bas haath mal rahā huuñ

chaaron taraf hain shole ham-sae jal rahe hain

main ghar mein baiTha baiTha bas hath mal raha hun

Alam Khursheed

ye kaun aag lagāne pe hai yahāñ māmūr

ye kaun shahr ko maqtal banāne vaalā hai

ye kaun aag lagane pe hai yahan mamur

ye kaun shahr ko maqtal banane wala hai

Khurshid Rabbani

gharoñ meñ qaid haiñ bastī ke shorafā

saḌak par haiñ fasādī aur ġhunDe

gharon mein qaid hain basti ke shorafa

saDak par hain fasadi aur ghunDe

Tanveer Samani

jale makānoñ meñ bhuut baiThe baḌī matānat se sochte haiñ

ki jañgaloñ se nikal kar aane kyā zarūrat thī aadmī ko

jale makanon mein bhut baiThe baDi matanat se sochte hain

ki jangalon se nikal kar aane ki kya zarurat thi aadmi ko

Unknown

jalā hai shahr to kyā kuchh na kuchh to hai mahfūz

kahīñ ġhubār kahīñ raushnī salāmat hai

jala hai shahr to kya kuchh na kuchh to hai mahfuz

kahin ghubar kahin raushni salamat hai

Faza Ibn e Faizi

har ek kūcha hai sākit har ik saḌak vīrāñ

hamāre shahar meñ taqrīr kar gayā ye kaun

har ek kucha hai sakit har ek saDak viran

hamare shahar mein taqrir kar gaya ye kaun

Shamim Shahzad

dīvār-o-dar pe ḳhuun ke chhīñTe haiñ jā-ba-jā

bikhrā huā hai rañg-e-hinā tere shahar meñ

diwar-o-dar pe KHun ke chhinTe hain ja-ba-ja

bikhra hua hai rang-e-hina tere shahar mein

Kaif Azimabadi

aaj kheleñge mire ḳhuun se holī sab log

kitnā rañgīn har ik shaḳhs dāmāñ hogā

aaj khelenge mere KHun se holi sab log

kitna rangin har ek shaKHs ka daman hoga

Betab Sury

aisī havā bahī ki hai chāroñ taraf fasād

juz sāya-e-ḳhudā kahīñ dār-ul-amāñ nahīñ

aisi hawa bahi ki hai chaaron taraf fasad

juz saya-e-KHuda kahin dar-ul-aman nahin

Shaikh Zahuruddin Hatim

har ek shāḳh thī larzāñ fazā meñ chīḳh-o-pukār

havā ke haath meñ ik āb-dār ḳhanjar thā

har ek shaKH thi larzan faza mein chiKH-o-pukar

hawa ke hath mein ek aab-dar KHanjar tha

Rahi Fidai