Akbar Allahabadi ki "ShokhiyaaN"

ḳhilāf-e-shar.a kabhī shaiḳh thūktā bhī nahīñ

magar añdhere ujāle meñ chūktā bhī nahīñ

KHilaf-e-shara kabhi shaiKH thukta bhi nahin

magar andhere ujale mein chukta bhi nahin

aa.ī hogī kisī ko hijr meñ maut

mujh ko to niiñd bhī nahīñ aatī

aai hogi kisi ko hijr mein maut

mujh ko to nind bhi nahin aati

leaderoñ kī dhuum hai aur follower koī nahīñ

sab to general haiñ yahāñ āḳhir sipāhī kaun hai

leaderon ki dhum hai aur follower koi nahin

sab to general hain yahan aaKHir sipahi kaun hai

da.avā bahut baḌā hai riyāzī meñ aap ko

tūl-e-shab-e-firāq ko to naap dījiye

dawa bahut baDa hai riyazi mein aap ko

tul-e-shab-e-firaq ko to nap dijiye

bas jaan gayā maiñ tirī pahchān yahī hai

tū dil meñ to aatā hai samajh meñ nahīñ aatā

bas jaan gaya main teri pahchan yahi hai

tu dil mein to aata hai samajh mein nahin aata

qaum ke ġham meñ dinner khāte haiñ hukkām ke saath

rañj leader ko bahut hai magar ārām ke saath

qaum ke gham mein dinner khate hain hukkaam ke sath

ranj leader ko bahut hai magar aaram ke sath

āshiqī kā ho burā us ne bigāḌe saare kaam

ham to a.b meñ rahe aġhyār b.a ho ga.e

aashiqi ka ho bura us ne bigaDe sare kaam

hum to ab mein rahe aghyar ba ho gae

dhamkā ke bose lūñgā ruḳh-e-rashk-e-māh kā

chandā vasūl hotā hai sāhab dabāv se

dhamka ke bose lunga ruKH-e-rashk-e-mah ka

chanda wasul hota hai sahab dabaw se

duniyā meñ huuñ duniyā kā talabgār nahīñ huuñ

bāzār se guzrā huuñ ḳharīdār nahīñ huuñ

duniya mein hun duniya ka talabgar nahin hun

bazar se guzra hun KHaridar nahin hun

ilāhī kaisī kaisī sūrateñ tū ne banā.ī haiñ

ki har sūrat kaleje se lagā lene ke qābil hai

ilahi kaisi kaisi suraten tu ne banai hain

ki har surat kaleje se laga lene ke qabil hai

maz.habī bahs maiñ ne kī hī nahīñ

fāltū aql mujh meñ thī hī nahīñ

mazhabi bahs main ne ki hi nahin

faltu aql mujh mein thi hi nahin

public meñ zarā haath milā lījiye mujh se

sāhab mire īmān kī qīmat hai to ye hai

public mein zara hath mila lijiye mujh se

sahab mere iman ki qimat hai to ye hai

paidā huā vakīl to shaitān ne kahā

lo aaj ham bhī sāhib-e-aulād ho ga.e

paida hua wakil to shaitan ne kaha

lo aaj hum bhi sahib-e-aulad ho gae

ham aah bhī karte haiñ to ho jaate haiñ badnām

vo qatl bhī karte haiñ to charchā nahīñ hotā

hum aah bhi karte hain to ho jate hain badnam

wo qatl bhi karte hain to charcha nahin hota

bole ki tujh ko diin kī islāh farz hai

maiñ chal diyā ye kah ke ki ādāb arz hai

bole ki tujh ko din ki islah farz hai

main chal diya ye kah ke ki aadab arz hai

coat aur patlūn jab pahnā to mister ban gayā

jab koī taqrīr kī jalse meñ leader ban gayā

coat aur patlun jab pahna to mister ban gaya

jab koi taqrir ki jalse mein leader ban gaya

batā.ūñ aap ko marne ke ba.ad kyā hogā

polāo khā.eñge ahbāb fātiha hogā

bataun aap ko marne ke baad kya hoga

polao khaenge ahbab fatiha hoga

ham aisī kul kitābeñ qābil-e-zabtī samajhte haiñ

ki jin ko paḌh ke laḌke baap ko ḳhabtī samajhte haiñ

hum aisi kul kitaben qabil-e-zabti samajhte hain

ki jin ko paDh ke laDke bap ko KHabti samajhte hain

hayā se sar jhukā lenā adā se muskurā denā

hasīnoñ ko bhī kitnā sahl hai bijlī girā denā

haya se sar jhuka lena ada se muskura dena

hasinon ko bhi kitna sahl hai bijli gira dena

jo kahā maiñ ne ki pyaar aatā hai mujh ko tum par

hañs ke kahne lagā aur aap ko aatā kyā hai

jo kaha main ne ki pyar aata hai mujh ko tum par

hans ke kahne laga aur aap ko aata kya hai