Baarish Shayari

bārish huī to ghar ke darīche se lag ke ham

chup-chāp sogvār tumheñ sochte rahe

barish hui to ghar ke dariche se lag ke hum

chup-chap sogwar tumhein sochte rahe

thoḌī sī bārish hotī hai

kitnī jaldī bhar jaatā huuñ

thoDi si barish hoti hai

kitni jaldi bhar jata hun

kitnī dilkash haiñ ye bārish kī phuvāreñ lekin

aisī bārish meñ mirī jaan bhī jā saktī hai

kitni dilkash hain ye barish ki phuwaren lekin

aisi barish mein meri jaan bhi ja sakti hai

ham se pūchho mizāj bārish kā

ham jo kachche makān vaale haiñ

hum se puchho mizaj barish ka

hum jo kachche makan wale hain

yaad aa.ī vo pahlī bārish

jab tujhe ek nazar dekhā thā

yaad aai wo pahli barish

jab tujhe ek nazar dekha tha

bārish sharāb-e-arsh hai ye soch kar 'adam'

bārish ke sab hurūf ko ulTā ke pī gayā

barish sharab-e-arsh hai ye soch kar 'adam'

barish ke sab huruf ko ulTa ke pi gaya

bārish kī bahut tez havā meñ kahīñ mujh ko

darpesh thā ik marhala jalne kī tarah kā

barish ki bahut tez hawa mein kahin mujh ko

darpesh tha ek marhala jalne ki tarah ka

ā.ankhoñ kī pyāliyoñ meñ bārish machī huī hai

sahrā meñ koī manzar shādāb aa rahā hai

aaankhon ki pyaliyon mein barish machi hui hai

sahra mein koi manzar shadab aa raha hai

chale aate haiñ be-mausam kī bārish kī tarah aañsū

basā-auqāt rone kā sabab kuchh bhī nahīñ hotā

chale aate hain be-mausam ki barish ki tarah aansu

basa-auqat rone ka sabab kuchh bhi nahin hota

yuuñ dil meñ aaj nuur kī bārish huī 'jamīl'

jaise koī charāġh jalā de bujhā huā

yun dil mein aaj nur ki barish hui 'jamil'

jaise koi charagh jala de bujha hua